ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ଜୁଲାଇ ୩(ଓଡ଼ିଶା ଡ଼ଟ୍ କମ୍) ଆଦିବାସୀ ଅଧ୍ୟୁଷିତ କୋରାପୁଟ ଜିଲ୍ଲାରେ ଏକ ମେଡିକାଲ କଲେଜ ପ୍ରତିଷ୍ଠା କରିବାକୁ ନ୍ୟାସନାଲ ଆଲୁମିନିୟମ କମ୍ପାନୀ(ନାଲ୍କୋ)କୁ ସରକାର ପ୍ରସ୍ତାବ ଦେଇଛନ୍ତି ।
ପାରିପାର୍ଶ୍ୱିକ ବିକାଶ ଓ ସାମାଜିକ ଅଙ୍ଗିକାର ବଦ୍ଧତା ସ୍ୱରୂପ ନାଲ୍କୋ ଏହି ମେଡିକାଲ କଲେଜ ପ୍ରତିଷ୍ଠା କରିବାକୁ ସରକାର କହିଛନ୍ତି ।
ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ନାଲ୍କୋ ସିଏମ୍ଡି ବିଏଲ୍ ବାଗ୍ରାଙ୍କୁ ଏକ ପତ୍ର ଲେଖି ମେଡିକାଲ କଲେଜ ପ୍ରତିଷ୍ଠା ପ୍ରସ୍ତାବ ଦେଇଛନ୍ତି ଏବଂ ପୂର୍ଣ୍ଣାଙ୍ଗ ପ୍ରସ୍ତାବ ସହ ଆସନ୍ତା ୫ ତାରିଖ ହେବାକୁ ଥିବା ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ବୈଠକରେ ଯୋଗ ବୋକୁ କହିଛନ୍ତି ।
ଏନ୍ଟିପିସି ଏବଂ ଏମ୍ସିଏଲ୍ ଓଡିଶାରେ ସେମାନଙ୍କ ବ୍ୟବସାୟିକ ଅପରେସନ କରୁଛନ୍ତି ଏବଂ ଉଭୟ ରାଜ୍ୟରେଦୁଇଟି ମେଡିକାଲ କଲେଜ ଓ ହସ୍ପିଟାଲ କରିବାକୁ ରାଜି ହୋଇଛନ୍ତି । ତେଣୁ ନାଲ୍କୋ ଏକ ମେଡିକାଲ କଲେଜ କରିବା ଆବଶ୍ୟକ ବୋଲି ଏହି ପତ୍ରରେ ଉଲ୍ଲେଖ କରାଯାଇଛି ।
ରାଷ୍ଟ୍ରାୟତ୍ତ ଉଦ୍ୟୋଗ ନାଲ୍କୋ ଓଡିଶାରେ ତା’ର ବ୍ୟବସାୟିକ ଅପରେସନ କରି ହଜାର ହଜାର କୋଟି ଟଙ୍କା ଲାଭ କରୁଛି । ତେଣୁ ରାଜ୍ୟବାସୀଙ୍କ ସ୍ୱାସ୍ଥ୍ୟସେବା କ୍ଷେତ୍ରରେ ଏହି ଉଦ୍ୟୋଗ ପଦକ୍ଷେପ ନେବା ବାଞ୍ଛନୀୟ ବୋଲି ମହାପାତ୍ର ପତ୍ରରେ ଉଲ୍ଲେଖ କରିଛନ୍ତି ।
ସଂପୃକ୍ତ ଅଞ୍ଚଳରେ ନାଲ୍କୋ ପକ୍ଷରୁ ମେଡିକାଲ କଲେଜ କରାଗଲେ ଏଥିପାଇଁ ଦରକାର ହେଉଥିବା ହସ୍ପିଟାଲ ସରକାର ଯୋଗାଇ ଦେଇପାରିବେ । ୬୦୦ ଶଯ୍ୟା ବିଶିଷ୍ଟ କୋରାପୁଟ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସରକାର ନାଲ୍କୋ ମେଡିକାଲ କଲେଜ ସହ ସଂପୃକ୍ତ କରାଇପାରିବେ । ତେବେ ନାଲ୍କୋ ପ୍ରଥମେ ଏହି ମେଡିକାଲ କଲେଜ ଲାଗି ଆଗକୁ ଆସିବା ଉଚିତ ବୋଲି କୁହାଯାଇଛି ।
ଓଡ଼ିଶା ଡ଼ଟ୍ କମ୍
