ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ଜୁଲାଇ ୫(ଓଡ଼ିଶା ଡ଼ଟ୍ କମ୍) ବିଭିନ୍ନ ଦୁରାରୋଗ୍ୟରେ ପୀଡ଼ିତ ସମସ୍ତ ଗରିବ ପରିବାରଙ୍କୁ ସରକାର ରାଜ୍ୟ ଚିକିତ୍ସା ପାଣ୍ଠିରୁ ସହାୟତା ଯୋଗାଇ ଦେବାକୁ ନିଷ୍ପତି ନେଇଛନ୍ତି ।
ଏହି ସୁବିଧା ଘରୋଇ ଓ ସରକାରୀ ଡ଼ାକ୍ତରଖାନାରେ ଉପଲବ୍ଧ ହେବ ବୋଲି ବୁଧବାର ମୁଖ୍ୟଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ କୁହାଯାଇଛି ।
ଚିକିତ୍ସା ପାଣ୍ଠି ବାବଦରେ ଦଶ କୋଟି ଟଙ୍କା ବ୍ୟୟ ବରାଦ କରାଯାଇଥିବା ବେଳେ ସମସ୍ତ ଜିଲ୍ଲା ସଦର ମହକୁମା ଡ଼ାକ୍ତରଖାନାକୁ ଦଶ ଲକ୍ଷ ଟଙ୍କା ଲେଖାଏଁ ଦିଆଯାଇଛି । ଯେଉଁ ରୋଗୀମାନେ ଏହି ଯୋଜନାର ସର୍ତ ଅନୁସାରେ ଯୋଗ୍ୟ ବିବେଚିତ ହେବେ ସୋନଙ୍କୁ ସହାୟତା ଯୋଗାଇ ଦିଆଯିବ ବୋଲି ମୁଖ୍ୟ ଶାସନ ସଚିବ ବୈଠକ ପରେ କହିଛନ୍ତି ।
ରାଜ୍ୟ ଚିକିତ୍ସା ପାଣ୍ଠି ଏବଂ ରାଷ୍ଟ୍ରୀୟ ସ୍ୱାସ୍ଥ୍ୟ ବୀମା ଯୋଜନାକୁ ମିଳିତ ଭାବେ କାର୍ଯ୍ୟକାରୀ କରିବାକୁ ଯୋଜନା କରାଯାଇଛି । ଏହାବ୍ୟତୀତ ଏହି ସୁବିଧା କେବଳ ସରକାରୀ ଡ଼ାକ୍ତରଖାନାରେ ଏହାକୁ ବ୍ୟାପକ କରି ଘରୋଇ ଡ଼ାକ୍ତରଖାନା ଗୁଡ଼ିକରେ ଉପଲବ୍ଧ କରିବାକୁ ସ୍ଥିର କରାଯାଇଛି ।
ସେଥିପାଇଁ ଆଠଟି ଡ଼ାକ୍ତରଖାନାକୁ ଚିହ୍ନଟ କରାଯାଇଛି । ଏହି ଡ଼ାକ୍ତରଖାନା ଗୁଡ଼ିକ ହେଲା କଳିଙ୍ଗ ହସ୍ପିଟାଲ, ହାଇଟେକ୍ ହସ୍ପିଟାଲ, ଆପୋଲୋ, ସମ୍, ଆୟୁଷ ଏବଂ ଆଇଏମ୍ଏସ୍, କଟକ ସ୍ଥିତ ଶାନ୍ତି ମେମୋରିଆଲ ହସ୍ପିଟାଲ ଓ ନିଆଳି ସ୍ଥିତ ଚିତ୍ତରଞ୍ଜନ ସେବା ସନ ।
ଏହାବ୍ୟତୀତ ଭାଇଜାକ୍ ର ୫ଟି ହସ୍ପିଟାଲକୁ ଏହି ଯୋଜନାରେ ସାମିଲ କରିବାକୁ ନିଷ୍ପତି ହୋଇଛି । ଏହାଦ୍ୱାରା କଳାହାଣ୍ଡି, କୋରାପୁଟ ଜିଲ୍ଲାର ଲୋକମାନେ ସେଠାରେ ଚିକିତ୍ସିତ ହୋଇପାରିବେ । ଯୋଜନା ବାବଦରେ ଲୋକଙ୍କୁ ଅଧିକ ସୂଚନା ଦିଆଯିବା ସହ ସଚେତନ କରାଯିବ ବୋଲି କୁହାଯାଇଛି ।
ଓଡ଼ିଶା ଡ଼ଟ୍ କମ୍