ବରଗଡ଼: ବିଜେପୁର ବ୍ଲକରେ ଫ୍ଲୋରୋସିସ ଆତଙ୍କ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବରଗଡ, ଅଗଷ୍ଟ ୧୨(ଓଡ଼ିଶା ଡ଼ଟ୍ କମ୍) ବରଗଡ଼ ଜିଲ୍ଳାର ଗାଇସିଲେଟ, ବରପାଲି, ଝାରବନ୍ଧ ଓ ବିଜେପୁର ବ୍ଲକରେ ଭୂତଳ ଜଳରେ ମାତ୍ରାଧିକ ପରିମାଣର ଲୌହ ଓ ଫ୍ଲୋରାଇଡ଼ର ମାତ୍ରା ରହିଥିବାରୁ ସମ୍ପୃକ୍ତ ଅଂଚଳରେ ଫ୍ଲୋରୋସିସ ରୋଗର ଲକ୍ଷଣ ଦେଖାଯାଇଛି ।

ବିଜେପୁର ବ୍ଳକ ପିପିଲିପାଲି ଗାଁର ୮୦ ପ୍ରତିଶତରୁ ଅଧିକ ବ୍ୟକ୍ତି ଅକାଳ ବାର୍ଦ୍ଧକ୍ୟ, ଶାରୀରିକ ଦୁର୍ବଳତା ଅନୁଭବ କରୁଥିବା ଏବଂ ଦନ୍ତରୋଗରେ ଆକ୍ରାନ୍ତ ହେଉଥିବା ଜଣାପଡ଼ିବା ପରେ ବରଗଡ଼ ଜିଲ୍ଳାର ବାୟୋ ଡ଼ାଇଭରସିଟି ସେଲର ସଦସ୍ୟ ମାନେ ଉକ୍ତ ଗ୍ରାମକୁ ଯାଇ ଏହାର ସତ୍ୟତା ଉପଲବ୍ଧି କରିଥିଲେ ।

ଏହି ଗାଁର ୪୮ ବର୍ଷିୟ ଖାନାପୂରୀ ପଟେଲଙ୍କ ଠାରେ ପାଞ୍ଚବର୍ଷ ତଳେ ଫ୍ଲୋରୋସିସର ଲକ୍ଷଣ ଦେଖାଯାଇଥିଲା । ଏ ସମ୍ପର୍କରେ ସେ ବୁର୍ଲା ମେଡ଼ିକାଲ କଲେଜ ଓ କଟକ ବଡ଼ ଡ଼ାକ୍ତରଖାନାରେ ପରୀକ୍ଷା କରି ତାଙ୍କୁ ସ୍କେଲେଟାଲ ଫ୍ଲୋରୋସିସ ହୋଇଥିବା ଜାଣିବାକୁ ପାଇଥିଲେ ।

ବିଗତ ପାଞ୍ଚ ବର୍ଷ ହେଲା ସେ ଚିକିତ୍ସିତ ହେଉଛିନ୍ତି । ତାଙ୍କ ଅଣ୍ଟାର ତଳକୁ କାର୍ଯ୍ୟ କରୁ ନଥିବାରୁ ସେ ଶଯ୍ୟାଶାୟୀ ଅଛନ୍ତି । ତାଙ୍କର ୭ ବର୍ଷର ନାତି ଓ ବୋହୁ ମଧ୍ୟ ନ୍ତ ଫ୍ଲୋରୋସିସର ଶିକାର ହୋଇଥିବା ଜଣାପଡ଼ିଛି । ପିପିଲିପାଲି ପ୍ରାଥମିକ ସ୍କୁଲରେ ପଢ଼ୁଥିବା ପ୍ରାୟ ୯୦ ପ୍ରତିଶତ ଛାତ୍ର ଛାତ୍ରୀ ଦନ୍ତ ଫ୍ଲୋରୋସିସର ଶିକାର ହୋଇଥିବା ଦେଖାଯାଇଛି ।

ଏହା ବ୍ୟତିତ ଛାତ୍ରଛାତ୍ରୀଙ୍କ ରୋଗ ପ୍ରତିରୋଧ ଶକ୍ତି ହ୍ରାସ ପାଉଥିବା, ରକ୍ତହୀନତାର ଶିକାର ହେଉଥିବା, ନିୟିମିତ ରୂପେ ଜ୍ୱରରେ ପଡ଼ୁଥିବା ଆଦି ଲକ୍ଷଣ ଖୋଯାଇଛି । ଗାଁର ୩୨ବର୍ଷିୟ ୱାର୍ଡ଼ ମେମ୍ବର ଗଜରାଜ ପଟେଲ ନିଜେ ମଧ୍ୟ ଉଭୟ ଦନ୍ତ ଓ ସ୍କେଲେଟାଲ ଫ୍ଲୋରେସିସର ଶିକାର ଥିବା କହିଛନ୍ତି ।

ଏସଂପର୍କରେ ବିଜେପୁର ବିଡ଼ିଓଙ୍କ ଦୃଷ୍ଟି ଆକର୍ଷଣ କରାଯାଇଥିଲା । ତେବେ ବିଡ଼ିଓଙ୍କ ବଦଳି ପରେ ଏଥି ପ୍ରତି କେହି ଧ୍ୟାନ ଦେଉ ନାହାନ୍ତି । ଅବଶ୍ୟ କିଛି ସରକାରୀ ଅଧିକାରୀ ଆସି ନଳକୂପ ଜଳର ନମୂନା ନେଇଛନ୍ତି । ମାତ୍ର ଗ୍ରାମବାସୀଙ୍କୁ କୌଣସି ପ୍ରକାର ଚିକିତ୍ସାଗତ ସୁବିଧା ଯୋଗାଇ ଦିଆଯାଇ ନଥିବା କିମ୍ବା ସ୍ୱାସ୍ଥ୍ୟ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଇ ନଥିବା ଗଜରାଜ କହିଛନ୍ତି ।

ପ୍ରକାଶ ଯୋଗ୍ୟ, ପାନୀୟ ଜଳରେ ଫ୍ଲୋରାଇଡ଼ର ମାତ୍ରା ଲିଟର ପିଛା ୧.୪ ମିଲିଗ୍ରାମରୁ ଅଧିକ ହେଲେ ତାହାକୁ ମାରାତ୍ମକ ବୋଲି ଗ୍ରହଣ କରାଯାଇଥାଏ । ଏହି ପର୍ଯ୍ୟାୟରେ ଦାନ୍ତ ଗୁଡ଼ିକରେ ଥିବା ଏନାମେଲ କ୍ଷୟ ହେବା ସାଙ୍ଗକୁ ଦାନ୍ତ କଳା ହୋଇ ଦନ୍ତ ଫ୍ଲୋରୋସିସ ହୋଇଥାଏ ।

ସେହିପରି ଫ୍ଲୋରାଇଡ଼ର ମାତ୍ରା ୨.୦ରୁ ଅଧିକ ହେଲେ ତାହା ସ୍କେଲେଟାଲ ଫ୍ଲୋରୋସିସର କାରଣ ହୋଇଥାଏ । ବରଗଡ଼ ଜିଲ୍ଳା ପ୍ରଶାସନ ତଥା ସ୍ୱାସ୍ଥ୍ୟ ବିଭାଗ ଏ ସମ୍ପର୍କରେ ଅବଗତ ଥାଇ ସୁଦ୍ଧା ଏଭଳି ଗମ୍ଭୀର ସ୍ୱାସ୍ଥ୍ୟ ସଙ୍କଟ କ୍ଷେତ୍ରରେ କୌଣସି ପଦକ୍ଷେପ ନ ନେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ବରଗଡ଼ ଅଗ୍ରଗାମୀ ବାୟୋ ଡ଼ାଇଭରସିଟି ସେଲ ପକ୍ଷରୁ ଅଭିଯୋଗ କରାଯାଇଛି ।

ପାନୀୟ ଜଳଦ୍ୱାରା ପିପଲିପାଲିରେ ଫ୍ଲୋରୋସିସ୍ ହେଉଥିବା ପ୍ରମାଣିତ ହୋଇ ସାରିଥିବାରୁ ଗାଁରେ ଥିବା ଗଭୀର ନଳକୂପ ଗୁଡ଼ିକୁ ତୁରନ୍ତ ବନ୍ଦ କରିବା ସହ ଅନ୍ୟ ଅଞ୍ଚଳରୁ ପାଇପ ଯୋଗେ ପାନୀୟ ଜଳ ଯୋଗାଇ ଦେବାକୁ ଦାବି କରାଯାଇଛି ।

ବିଜେପୁର ବ୍ଳକର ଏହି ଗ୍ରାମ ସମେତ ପୁଟକିଗ୍ରିଞ୍ଜେଳ, ସାଇପାଲି ଓ ପୁରେନା ଗ୍ରାମର ଭୂତଳ ପାନୀୟ ଜଳରେ ମଧ୍ୟ ଫ୍ଲୋରାଇଡ଼ର ମାତ୍ରା ବିପଦଜନକ ସ୍ତରରେ ରହିଥିବା ଜଣାପଡ଼ିଛି । ବିଜେପୁର ବ୍ଳକ ସାଇପାଲି ପଞ୍ଚାୟତର ପୁଟୁକିଗ୍ରିଞ୍ଜେଲ ଗ୍ରାମରେ ଥିବା ନଳକୂପ ଗୁଡ଼ିକରେ ଫ୍ଲୋରାଇଡ଼ର ମାତ୍ରା ସର୍ବାଧିକ ୩.୯୦ରୁ ୪.୫୦ ମିଲିଗ୍ରାମ ପ୍ରତି ଲିଟର ଥିବା ବେଳେ ଲୌହର ମାତ୍ରା ୨୦.୪ ମିଲିଗ୍ରାମ ପ୍ରତି ଲିଟର ରହିଥିବା ଜଣାପଡ଼ିଛି ।

ତେବେ ଏହି ଗ୍ରାମ ଗୁଡ଼ିକ ପାଇଁ ପ୍ରଶାସନ ପକ୍ଷରୁ ପାନୀୟ ଜଳର ବିକଳ୍ପ ବ୍ୟବସ୍ଥା କରିବାରେ ଅବହେଳା କରାଯାଉ ଥିବା ବେଳେ ସଚେତନତା ଅଭାବରୁ ଲୋକେଦିନକୁଦିନ ଅଧିକ ରୋଗାଗ୍ରସ୍ତ ହେଉଛନ୍ତି ।

ଏଣୁ କାଳବିଳମ୍ବ ନକରି ବିଜେପୁର ଅଞ୍ଚଳର ଗାଁ ଗୁଡ଼ିକରେ ସ୍ୱାସ୍ଥ୍ୟ ବିଭାଗ ପକ୍ଷରୁ ସର୍ବେକ୍ଷଣ କରାଯିବା ସହ ଆବଶ୍ୟକ ପଦକ୍ଷେପ ନେବାକୁ ସ୍ଥାନୀୟ ଅଞ୍ଚଳର ଲୋକମାନେ ଦାବି କରିଛନ୍ତି

ଓଡ଼ିଶା ଡ଼ଟ୍ କମ୍