ପୋଲାଭରମ ପ୍ରକଳ୍ପକୁ ବିରୋଧକରି ବିଜେଡିର ସମାବେଶ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ମାଲକାନାଗିରି,ଅଗଷ୍ଟ ୨୭ (ଓଡ଼ିଶା ଡ଼ଟ୍ କମ୍)- ଓଡିଶାର ଶାସକ ବିଜୁ ଜନତା ଦଳ ଦ୍ୱାରା ଆନ୍ଧ୍ରପ୍ରଦେଶ ସରକାରଙ୍କ ବିରୋଧରେ ମାଲକାନଗିରି ଜିଲା ମୋଟୁଠାରେ ଏକ ବିରାଟ ସମାବେଶ ଅନୁଷ୍ଠିତ ହୋଇ ଯାଇଛିି ।

ଓଡିଶା ସରକାରଙ୍କ ବିରୋଧ ତଥା ସୁପ୍ରିମକୋର୍ଟରେ ଦୁଇଟି ମାମଲା ବିଚାରାଧୀନ ରହିଥିବା ସତ୍ତ୍ୱେ ଆନ୍ଧ୍ର ସରକାରଙ୍କ ପ୍ରସ୍ତାବିତ ପୋଲାଭରମ ପ୍ରକଳ୍ପ ପାଇଁ ଘୋଷଣା ପରିପ୍ରେକ୍ଷୀରେ ଶାସକ ବିଜେଡି ତରଫରୁ ଏହି ଚେତାବନୀ ସମାବେଶର ଆୟୋଜନ କରାଯାଇଥିଲା ।

ଏହି ପ୍ରକଳ୍ପ ଫଳରେ ମାଲକାନଗିରି ଜିଲାର ୨୧୨୦ ହେକ୍ଟର ଜମି ସହ ବହୁ ଗ୍ରାମ ଜଳାର୍ଣ୍ଣବ ହୋଇଯିବା ଆଶଙ୍କା ରହିଛି । ମାଲକାନଗିରି ଜିଲ୍ଲାରେ ରହୁଥିବା ବହୁ ଆଦିମ ଅଧିବାସୀ ଏହାଦ୍ୱାରା କ୍ଷତିଗ୍ରସ୍ତ ହେବେ ।

ପୂର୍ବରୁ ବହୁ ସଂଗଠନ ଏହି ପ୍ରକଳ୍ପକୁ ବିରୋଧ କରି ଦାବି, ବିକ୍ଷୋଭ କରିଥିବାବେଳେ ଉଭୟ ଓଡିଶା ଓ ଛତିଶଗଡ ସରକାରଙ୍କ ପକ୍ଷରୁ ଏହି ପ୍ରକଳ୍ପ ବିରୋଧରେ ମାମଲା ଦାଏର କରାଯାଇଛି । ଗତ ମାର୍ଚ୍ଚ ୨୦୧୨ରେ ପ୍ରକଳ୍ପକୁ ମଞ୍ଜୁରୀ ଦିଆଯାଇ ନାହିଁ ବୋଲି ଜଙ୍ଗଲ ଓ ପରିବେଶ ମନ୍ତ୍ରୀ ଜୟନ୍ତୀ ନଟରାଜନ କହିଥିଲେ ।

ଏହି ସଭାରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ରବି ନାରାୟଣ ନନ୍ଦ,ଜୟରାମ ପାଙ୍ଗୀଙ୍କ ସମେତ ଅଭିଭକ୍ତ କୋରାପୁଟ ଜିଲ୍ଲାର ସମସ୍ତ ବିଜେଡି ନେତାମାନେ ଯୋଗ ଦେଇଥିଲେ ।

ଓଡ଼ିଶା ଡ଼ଟ୍ କମ୍