ଓଡ଼ିଶା ଡ଼ଟ୍ କମ୍: ସ୍ନିଗଧା ରାୟ
ଭଦ୍ରକ,ସେପ୍ଟେମ୍ବର ୧୦(ଓଡ଼ିଶା ଡ଼ଟ୍ କମ୍)- ପୁଲିସର ମାତ୍ରାଧିକ କାର୍ଯ୍ୟାନୁଷ୍ଠାନ ପ୍ରତିବାଦରେ ପ୍ରଦେଶ କଂଗ୍ରେସ ପକ୍ଷରୁ ଦିଆଯାଇଥିବା ଓଡ଼ିଶା ବନ୍ଦ ଡ଼ାକରା ଭଦ୍ରକରେ ଯଦିଓ ଶାନ୍ତିପୂର୍ଣ୍ଣ ଭାବେ ସମାପନ ହୋଇଛି, ତେବେ ଜିଲା ଶିକ୍ଷାମଣ୍ଡାଳାଧିଶ, ଉଠା ଜଳସେଚନ ବିଭାଗ ଏବଂ ଜିଲା ଜଳ ଓ ପରିମଳ ବିଭାଗ କାର୍ଯ୍ୟାଳୟ ଖୋଲାଯିବାକୁ ନେଇ କେତେକ କଂଗ୍ରେସ କର୍ମୀ ଆସବାବପତ୍ର ଭଂଗାରୁଜା କରିଥିବାର ଜଣାପଡ଼ିଛି ।
ଏହି ବନ୍ଦ ପାଳନ ବେଳେ ଭଦ୍ରକ ରେଳବାଇ ପୁଲିସ ପକ୍ଷରୁ ୨୫ଜଣ ଓ ଟାଉନଥାନା ପକ୍ଷରୁ ୭୨ଜଣ ନେତା ଓ କର୍ମୀଙ୍କୁଦିନ ପ୍ରାୟ ୧ଟା ସମୟରେ ଗିରଫ କରାଯାଇ ବ୍ୟକ୍ତିଗତ ମୁଚାଲିକାରେ ଛାଡ଼ିିଆଯାଇଛି ।
ଯଦିଓ ଏହି ବନ୍ଦ ପାଳନ ଜିଲା କଂଗ୍ରେସ କମିଟି ପକ୍ଷରୁ କରାଯାଉଥିବା ବିଷୟ ପ୍ରଚାର ହେଉଥିଲା, କିନ୍ତୁ ବାସ୍ତବରେ ସହର ତମାମ ବିଭିନ୍ନ ପ୍ରତିବାଦ ସଭା ଓ ଶୋଭାଯାତ୍ରାକୁ ଲକ୍ଷ୍ୟ କଲେ ପୂର୍ବରୁ ଜିଲା କଂଗ୍ରେସରେ ଥିବା ଅନନ୍ତ ଓ ନରେନ ଗୋଷ୍ଠୀଙ୍କ ଅନ୍ତ୍ୱର୍ନ୍ଦ୍ୱ ସ୍ପଷ୍ଟ ବାରିହୋଇ ପଡ଼ିଥିଲା ।
ଏହି ବନ୍ଦ ସମୟରେ ବରିଷ୍ଠ କଂଗ୍ରେସ ନେତା ଅନନ୍ତ ସେଠୀଙ୍କ ଅନୁଗାମୀ ମାନେ ଚରମ୍ପା ରେଳ ଷ୍ଟେସନଠାରୁ ଆରମ୍ଭ କରି ଭଦ୍ରକ ସହରର ବନ୍ତ ଛକ, କଚେରୀ ବଜାର ଏବଂ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପିକେଟିଂ କରି ଗିରଫ ହୋଇଥିଲେ ।
ଅନୁରୁପ ଅନନ୍ତ ସେଠୀଙ୍କ ପ୍ରତିପକ୍ଷ ଗୋଷ୍ଠୀ ଭାବେ ପରିଚିତ ପୂର୍ବତନ ବିଧାୟକ ନରେନ ପଲେଇଙ୍କ ନେତୃତ୍ୱରେ ଶତାଧିକ ନେତା ଓ କର୍ମୀ ଉପରୋକ୍ତ ସ୍ଥାନ ମାନଙ୍କରେ ବିକ୍ଷୋଭ ଓ ଶାନ୍ତିପୂର୍ଣ୍ଣ ପ୍ରତିବାଦ ସଭାମାନ କରିଥିଲେ ।
ଉଭୟ ଗୋଷ୍ଠୀଙ୍କ ପକ୍ଷରୁ ବର୍ଣ୍ଣାର୍ଢ଼୍ୟ ମୋଟର ସାଇକେଲ ଶୋଭାଯାତ୍ରାମାନ ପୃଥକ ପୃଥକ ଭାବେ ବାହାରି ବନ୍ତ ଛକ ଓ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସମବେତ ହୋଇଥିଲେ ।
ଏହି ବନ୍ଦ ବେଳେ ଚରମ୍ପା ରେଳ ଷ୍ଟେସନଠାରେ ସିକନ୍ଦରାବା-ଗୌହାଟି, ଡ଼ିଏମୟୁ ସମେତ ଗୋଟିଏ ମାଲବାହୀ ଟ୍ରେନ ଅଟକି ରହିଥିଲା । ଜାତୀୟ ରାଜପଥରେ ସମସ୍ତ ଯାନବାହନ ସମେତ ଘରୋଇ ବସ ଓ ଟ୍ରେକର ଚଳାଚଳ ବନ୍ଦ ରହିଥିବାବେଳେ ଜିଲାର ସଦର ମହକୁମାରେ ଥିବା ସମସ୍ତ ସରକାରୀ ଓ ବେସରକାରୀ ପ୍ତର, କୋର୍ଟ-କଚେରୀ, ସ୍କୁଲ, କଲେଜ, ବ୍ୟବସାୟ ପ୍ରତିଷ୍ଠାନ ଓ ରାଷ୍ଟ୍ରାୟତ୍ତବ୍ୟାଙ୍କଗୁଡ଼ିକ ସ୍ୱତଃ ବନ୍ଦ ରହିଥିଲା ।
ମାତ୍ର ଜିଲା ଶିକ୍ଷାମଣ୍ଡାଳାଧିଶଙ୍କ କାର୍ଯ୍ୟାଳୟ, ଉଠା ଜଳସେଚନ ବିଭାଗ ଓ ଜିଲା ଜଳ ଓ ପରିମଳ ବିଭାଗ ତିନୋଟି ଖୋଲାଥିବାରୁ କେତେକ କଂଗ୍ରେସ କର୍ମୀ ଉତକ୍ଷିପ୍ତ ହୋଇ ସେଠାରେ ଟେବୁଲ ଚେୟାର ଭଳି ଆସବାବପତ୍ରମାନ ଭଂଗାରୁଜା କରିଥିବାର ଜଣାପଡ଼ିଛି ।
ଯଦିଓ ଏହି ବନ୍ଦ ପାଳନ ବେଳେ କଂଗ୍ରେସର ଦୁଇ ଗୋଷ୍ଠୀଙ୍କର ପ୍ରଭେଦ ଆଖିୃଦୃର୍ଶିଆ ହୋଇଥିଲା, ତେବେ ଉଭୟ ଗୋଷ୍ଠୀର ନେତା ପରସ୍ପର ପ୍ରତି କୌଣସି ଆକ୍ଷେପମୂଳକ ମନ୍ତବ୍ୟ ନଦେଇ ଏହା ଶାସକଦଳ ବିରୁଦ୍ଧରେ ତାଙ୍କ ଦଳର ପୁଞ୍ଜିଭୁତ ବେନାର ପ୍ରତିଫଳନ ବୋଲି ଗଣମାଧ୍ୟମକୁ କହିଛନ୍ତି ।
ଓଡ଼ିଶା ଡ଼ଟ୍ କମ
