ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର,ଅକ୍ଟୋବର ୨୫(ଓଡ଼ିଶା ଡ଼ଟ୍ କମ୍)–କେନ୍ଦ୍ର ସରକାରଙ୍କ ଖଣି ମନ୍ତ୍ରଣାଳୟ ଅଧିନସ୍ଥ ନବରତ୍ନ ଉଦ୍ୟୋଗ ନାଲକୋ, ପକ୍ଷରୁ ସେପ୍ଟେମ୍ବର ୨୦୧୨ରେ ସମାପ୍ତ ହୋଇଥିବା ଚଳିତ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସିକ ଫଳାଫଳ ଘୋଷଣା କରାଯାଇଛି ।
ଆଜି ନୂଆଦିଲ୍ଲୀଠାରେ ଆୟୋଜିତ କଂପାନୀର ବୋର୍ଡ ଅଫ ଡାଇରେକ୍ଟର୍ସଙ୍କ ବୈଠକରେ ଉପସ୍ଥାପିତ ଆର୍ଥିକ ଫଳାଫଳ ଅନୁସାରେ କଂପାନୀ, ୨୦୧୨-୧୩ ଆର୍ଥିକ ବର୍ଷର ଦ୍ୱିତୀୟ ତିନି ମାସରେ ୫ କୋଟି ଟଙ୍କା ନିଟ ଲାଭ କରିଛି ।
ଗତ ବର୍ଷ ଏହି ଅବଧି ମଧ୍ୟରେ ନିଟ ଲାଭ ୧୩୯ କୋଟି ଟଙ୍କା ଥିଲା । କଂପାନୀର ବ୍ୟବସାୟ ପରିମାଣ ଗତ ବର୍ଷ ଦ୍ୱିତୀୟ ତିନି ମାସରେ ୧୫୮୪ କୋଟି ଟଙ୍କା ଥିବା ବେଳେ ଚଳିତ ବର୍ଷ ଏହା ସାମାନ ବୃଦ୍ଧି ପାଇ ୧୫୮୬ କୋଟି ଟଙ୍କା ହୋଇଛି ।
ଗତ ବର୍ଷା ଋତୁରେ କୋଇଲା ଯୋଗାଣରେ ବ୍ୟାଘାତ ତଥା ଖରାପ ମାନର କୋଇଲା ହେତୁ କଂପାନୀର ଲାଭରେ ଗୁରୁତର ହ୍ରାସ ଘଟିଛି ।
ଏହି କାରଣରୁ କଂପାନୀକୁ ଅଧିକ ମୂଲରେ କୋଇଲା ଆମଦାନୀ କରି ବ୍ୟବହାର କରିବାକୁ ପଡିଥିଲା ଏବଂ ରାଜ୍ୟ ଗ୍ରୀଡରୁ ଆହୁରି ଅଧିକ ଦରରେ ବିଦ୍ୟୁତ ଶକ୍ତି କ୍ରୟ କରିବା ଏବଂ ଅଧିକ ପରିମାଣରେ ଏଚଏଫଓ ବ୍ୟବହାର କରିବାକୁ କଂପାନୀ ବାଧ୍ୟ ହୋଇଥିଲା ।
ଏହା ଫଳରେ, ଉତ୍ପାଦନ ଖର୍ଚ୍ଚ ୧୪୯ କୋଟି ଟଙ୍କା ଅଧିକ ହୋଇଥିଲା ।
ଉତ୍ପାଦନ କ୍ଷେତ୍ରରେ, ଗତ ବର୍ଷ ଦ୍ୱିତୀୟ ତିନି ମାସରେ ଆଲୁମିନା ଉତ୍ପାଦନ ୩.୮୮ ଲକ୍ଷ ଟନ ହୋଇଥିବା ବେଳେ ଚଳିତ ବର୍ଷ ଏହି ସମୟ ମଧ୍ୟରେ ଏହା ସାମାନ୍ୟ ବୃଦ୍ଧି ପାଇ ୩.୯୮ ଲକ୍ଷ ଟନ ହୋଇଛି ।
ବିଦ୍ୟୁତ ଶକ୍ତି ଉତ୍ପାଦନ ୧୪୬୬ ନିୟୁତ ୟୁନିଟରୁ ୧୪୪୪ ନିୟୁତ ୟୁନିଟକୁ ହ୍ରାସ ପାଇଛି । ଗତ ବର୍ଷର ଦ୍ୱିତୀୟ ତିନି ମାସରେ ଆଲୁମିନିୟମ ଉତ୍ପାଦନ ପରିମାଣ ୧.୦୫ ଲକ୍ଷ ଟନ ଥିବା ବେଳେ ଚଳିତ ବର୍ଷ ଏହା ସାମାନ୍ୟ ହ୍ରାସ ପାଇ ୧.୦୨ ଲକ୍ଷ ଟନ ହୋଇଛି ।
ଧାତୁ ବିକ୍ରୟ କ୍ଷେତ୍ରରେ, ଗତ ବର୍ଷର ଦ୍ୱିତୀୟ ତିନି ମାସରେ ନାଲକୋ ୧.୦୧ ଲକ୍ଷ ଟନ ଆଲୁମିନିୟମ ବିକ୍ରି କରିଥିବା ବେଳେ ଚଳିତ ବର୍ଷ ମଧ୍ୟ ଏହି ପରିମାଣ ପ୍ରାୟ ସମାନ ରହିଛି ।
ଓଡ଼ିଶା ଡ଼ଟ୍ କମ୍
