ଦିଲ୍ଲୀ ଗଣଧର୍ଷଣ ପ୍ରତିବାଦରେ ଭୁବନେଶ୍ୱରରେ ଶୋଭାଯାତ୍ରା

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୦(ଓଡିଶା ଡଟ୍ କମ୍)- ଦିଲ୍ଲୀଠାରେ ପାରା ମେଡ଼ିକାଲ ଛାତ୍ରୀକୁ ଚଳନ୍ତା ବସ ଭିତରେ ଲୋମହର୍ଷଣକାରୀ ଗଣଧର୍ଷଣ ପ୍ରତିବାଦ କରି ଆଜି ଭୁବନେଶ୍ୱରସ୍ଥିତ ମାଷ୍ଟରକ୍ୟାଣ୍ଟିନ୍ ଠାରେ ବିଜୁ ମହିଳା ଜନତା ଦଳ ପକ୍ଷରୁ ନୀରବ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି ।

ବିଧାୟିକା ତଥା ବିଜୁ ମହିଳା ଜନତା ଦଳ ସଭାନେତ୍ରି ଶ୍ରୀମତୀ ପ୍ରମିଳା ମଲ୍ଲିକଙ୍କ ନେତୃତ୍ୱରେ ବିଜୁ ମହିଳା ଜନତା ଦଳର କର୍ମକର୍ତ୍ତା ଓ ୭୦୦ରୁ ଉର୍ଦ୍ଧ୍ଵ ମହିଳା କର୍ମୀ ଏକତ୍ରିତ ହୋଇ କ୍ୟାଣ୍ଡେଲ ଜଳାଇ ନୀରବ ଶୋଭାଯାତ୍ରା କରିଥିଲେ ।

ସ୍ୱାଧୀନତାର ୬୬ ବର୍ଷ ପରେ ଆଜି ମହିଳା ସାମଜ ଦେଶର ରାଜଧାନୀ ଦିଲ୍ଲୀରେ ସୁରକ୍ଷିତ ନୁହଁନ୍ତି । ଏଭଳି ଅମାନୁଷିକ ଘଟଣା ଘଟାଇଥିବା ବ୍ୟକ୍ତିଙ୍କୁ ଭଦ୍ର ସମାଜରେ ବଞ୍ଚି ରହିବାର ଆଦୌ ଅଧିକାର ନାହିଁ । ବାରମ୍ବାର ଦିଲ୍ଲୀରେ ମହିଳାଙ୍କ ଉପରେ ଏଭଳି ଅତ୍ୟାଚାର ଓ ଧର୍ଷଣ ଭଳି ଲଜ୍ଜିତ ଘଟଣା ଘଟୁଥିବାର ଦିଲ୍ଲୀ ସରକାର ଓ କେନ୍ଦ୍ର ସରକାରଙ୍କ ମହିଳାଙ୍କ ସୁରକ୍ଷା ପ୍ରତି କେତେ ଯତ୍ନବାନ ସ୍ପଷ୍ଟ ହୋଇଯାଇଛି ।

ଧର୍ଷିତା ହସ୍ପିଟାଲରେ ମୃତ୍ୟୁ ସହିତ ସଂଗ୍ରାମ କରୁଥିବା ବେଳେ ତାଙ୍କ ପରିବାରବର୍ଗଙ୍କର ମାନସିକତାକୁ ଦୃଷ୍ଟିରେ ରଖି ଦୋଷୀକୁ ଦୃଷ୍ଟାନ୍ତମୂଳକ ଦଣ୍ଡ ବିଧାନ କଲେ ଅନ୍ତତଃ ମହିଳା ସମାଜ ନିଜକୁ ସୁରକ୍ଷିତ ମଣନ୍ତେ ବୋଲି ଶ୍ରୀମତୀ ମଲ୍ଲିକ ନିଜର ପ୍ରତିକ୍ରିୟାରେ କହିଥିଲେ ।

ଏଭଳି ଘୃଣ୍ୟ ଘଟଣାକୁ ସମାଜର ସବୁ ସ୍ତରରେ ନିନ୍ଦା କରିବା ଉଚିତ୍ । ବିଜୁ ମହିଳା ଜନତା ଦଳର ଶତାଧିକ ମହିଳା “ନାରୀ ନିର୍ଯ୍ୟାତନା ବନ୍ଦ ହେଉ”, “ଧର୍ଷଣକାରୀଙ୍କୁ କଠୋର ଦଣ୍ଡ ମିଳୁ”, “ଗଣଧର୍ଷଣ ସଭ୍ୟ ସମାଜ ପାଇଁ କଳଙ୍କ”, “ଗଣଧର୍ଷଣ ନାରୀ ସମାଜ ପାଇଁ କଳଙ୍କ” ମାନ ପ୍ଲାକାର୍ଡ଼ ପ୍ରଦର୍ଶନ କରି ନୀବର ପ୍ରତିବାଦ କରିଥିଲେ ।

ଏହି ଶୋଭାଯାତ୍ରାରେ ବିଧାୟିକା ଅଞ୍ଜଳି ବେହେରା, ବିଜୁ ମହିଳା ଜନତା ଦଳର ଜିଲ୍ଲା ସଭାପତି ସଂଯୁକ୍ତା ମହାନ୍ତି, ରାଜ୍ୟ ଉପସଭାନେତ୍ରୀ ସନ୍ଧ୍ୟା ବିଶ୍ୱାଳ, ଗୀତା ବସ୍ତିଆ, ମିନତୀ ବେହେରା, ରମାଦେବୀ ମହିଳା ମହା ବିଦ୍ୟାଳୟର ସଭାନେତ୍ରୀ ପଲ୍ଲବୀ ମହାପାତ୍ର, ସାଧାରଣ ସମ୍ପାଦିକା ଅର୍ଜିତା ଅପରାଜିତା ବଡ଼ଜେନା ସମେତ ୭୦୦ରୁ ଉର୍ଦ୍ଧ୍ଵ ମହିଳା କର୍ମୀ ସାମିଲ ହୋଇଥିଲେ ।

ଓଡିଶା ଡଟ୍ କମ୍