ଓଡିଶା ଡଟ୍ କମ୍ ସମ୍ବାଦଦାତା
ବାରିପଦା,ଡିସେମ୍ବର ୨୮(ଓଡିଶା ଡଟ୍ କମ୍ )-ବାରିପଦା ଠାରେ ଓଡିଶା ଜନମୋର୍ଚ୍ଚାର ତୃତୀୟ ଓଡିଶା କ୍ରାନ୍ତି ସମାବେଶ ଶୁକ୍ରବାର ଦିନ ଅନୁଷ୍ଠିତ ହୋଇ ଯାଇଛି । ଏହି ସମାବେଶରେ ୧୫ ହଜାରରୁ ଉର୍ଦ୍ଧ ସମର୍ଥକ ଯୋଗଦେଇ ଥିବା ଜଣାପଡିଛି ।
ଏହି ସମାବେଶରେ ଓଡିଶା ଜନମୋର୍ଚ୍ଚାର ଅଧ୍ୟକ୍ଷ ତଥା ସାଂସଦ ପ୍ୟାରୀମୋହନ ମହାପାତ୍ର ବିଜୁବାବୁ ଅମର ରହେ ଏବଂ ବିଜୁ କର୍ମୀ ଅମର ରହେ ଧ୍ୱନି ସମେତ ନବୀନ ପଟ୍ଟନାୟକ ମୁର୍ଦ୍ଧାବାଦ ଧ୍ୱନି ଦେଇ ନିଜର ବକ୍ତବ୍ୟ ଆରମ୍ଭ କରିଥିଲେ ।
ସେ କହିଲେ ଓଡିଶା ଜନମୋର୍ଚ୍ଚା ବିଜେଡିର ବିକଳ୍ପ । ଜନସାଧାରଣ ଚାହିଁଲେ ଓଡିଶା ଜନମୋର୍ଚ୍ଚା କ୍ଷମତାକୁ ଆସିବ । ରାଜ୍ୟରେ ଚାଲିଥିବା ଅଗଣତାନ୍ତ୍ରୀକ ଶାସନ,ବେକାରୀ ସମସ୍ୟା,ନାରୀ ନିର୍ଯ୍ୟାତନା ଓ ଦରଦାମ ବୃଦ୍ଧି ଉପରେ ଲଗାମ ଲଗାଯିବ । ରାଜ୍ୟବାସୀ ଚାହିଁଲେ ଶାସନ ଭାର ହାତକୁ ନେବୁ ।
ମୋର୍ଚ୍ଚା ଗଠନ ପରେ ରାଜ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆତଙ୍କିତ ହୋଇପଡିଛନ୍ତି । ତାଙ୍କର ଏକଛତ୍ରବାଦ ଓ ଅହଂଭାବ ବିରୋଧରେ ଓଡିଶା ଜନମୋର୍ଚ୍ଚା ତାର ସଂଗ୍ରାମ ଅବ୍ୟାହତ ରଖିବ । ଆଗାମୀ ଦିନରେ ଓଡିଶା ଜନମୋର୍ଚ୍ଚା ନବୀନବାବୁଙ୍କୁ ଉଚିତ୍ ଜବାବ ଦେବ ବୋଲି ସାଂସଦ ଶ୍ରୀ ମହାପାତ୍ର ପ୍ରକାଶ କରିଛନ୍ତି ।
ଏହି ସମାବେଶରେ ଅନ୍ୟମାନଙ୍କ ମଧ୍ୟରେ ମହାସଚିବ ଯଜେ୍ଞଶ୍ୱର ବାବୁ,ରାଜେନ୍ଦ୍ର ସିଂ,ବାବି ମିଶ୍ର, ସୁମନ ବିଶ୍ୱାଳ,ବାରିପଦା ସଂଗଠକ ବିଜୟ ମହାପାତ୍ର, ଭୁବନେଶ୍ୱରର ପୂର୍ବତନ ମେୟର ମିହିର ମହାନ୍ତି ପ୍ରମୁଖ ଉଦ୍ବୋଧନ ଦେଇ ନବୀନ ପଟ୍ଟନାୟକଙ୍କୁ ତୀବ୍ର ଭତ୍ସନା କରିବା ସହିତ ପ୍ୟାରୀମୋହନ ମହାପାତ୍ରଙ୍କୁ ଓଡିଶାର ଲଢୁଆ ସନ୍ତାନ ବୋଲି ଅଭିହିତ କରିଥିଲେ ।
ଓଡିଶା ଡଟ୍ କମ୍
