ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଢେଙ୍କାନାଳ,ଫେବୃଆରୀ ୨୫ (ଓଡ଼ିଶା ଡ଼ଟ୍ କମ୍), ଢେଙ୍କାନାଳ ଜିଲ୍ଲା ଯୋରନ୍ଦା ଠାରେ ରବିବାର ବିଶ୍ୱପ୍ରସିଦ୍ଧ ଯୋରନ୍ଦା ମେଳା ଆରମ୍ଭ ହୋଇଛି । ଏହି ମେଳାରେ ପ୍ରାୟ ୪ଲକ୍ଷରୁ ଅଧିକ ମହିମା ଧର୍ମାବଲମ୍ବୀ ଭକ୍ତଙ୍କ ସମାଗମ ହୋଇଛି ।
ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶ, ଛତିଶଗଡ଼, ଆସାମ, ବିହାର, ରାୟପୁର ସମେତ ଓଡ଼ିଶାର ପୁରପଲ୍ଲୀରୁ ବହୁ ଭକ୍ତଙ୍କ ସମାଗମ ହୋଇଛି । ଏହି ମେଳାର ମୁଖ୍ୟ ଆର୍କଷଣ ହେଉଛି ଝାଡ଼ଦୀପ ପ୍ରଜ୍ୱଳନ ଦେଖିବା ।
ଏହି ଦୀପ ପ୍ରଜ୍ୱଳନ ଦେଖିବା ପାଇଁ ଭକ୍ତମାନେ ଅପରାହ୍ଣ ୩ଟାରୁ ବତି ମନ୍ଦିର, ଗାଦି ମନ୍ଦିର, ଜ୍ୟୋତି ମନ୍ଦିର, ଶୂନ୍ୟ ମନ୍ଦିର, ଧୁନି ମନ୍ଦିର ଓ ଏକୋଇଶି ହାତିଆ ମନ୍ଦିରରେ ରୁଣ୍ଡ ହୋଇଥିଲେ ।
ଭୋର ୩ଟା ବେଳେ ସାଧୁମାନେ ପୀଠକୁ ଝାଡ଼ୁରେ ପରିଷ୍କାର କରିଥିଲେ । ନୀତି କୂଅରୁ ରୁପା ଗରାରେ ପାଣି ଆଣି ଧୁଆଯିବା ପରେ ସୁନା ଗିନାରେ ଚନ୍ଦନ ପାଣି ଛିଞ୍ଚାାଯାଇଥିଲା ।
ଏହାପରେ ମହିମାଗାଦି ବଳ୍କଳଧାରୀ ସମାଜର ମୁଖ୍ୟ ନରେନ୍ଦ୍ର ବାବା ରୁପା ଝାଡ଼ୁରେ ଛେରାପହଁରା କରିଥିଲେ ।
୬୦ଟି ରୁପା ଚାମରରେ ସାଧୁମାନେ ଚାମର ସେବା କରିଥିଲେ । ଅପରାହ୍ଣ ୫ଟାରେ ଝାଡ଼ଦୀପ ପ୍ରଜ୍ୱଳନ କରାଯାଇଥିଲା । ରାତି ୧ଟା ପର୍ଯ୍ୟନ୍ତ ଗାଦିମନ୍ଦିର ଓ ଅନ୍ୟ ଉପାସନା ପୀଠଗୁଡ଼ିକରେ ଭକ୍ତଙ୍କ ଭିଡ଼ ଲାଗି ରହିଥିଲା ।
ଓଡ଼ିଶା ଡ଼ଟ୍ କମ୍
