ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ମଇ ୧୨ (ଓଡିଶା ଡଟ କମ) ୨୦୧୪-୧୫ ଆର୍ଥିକ ବର୍ଷରେ ରାଜ୍ୟରେ ମାଛ ଉତ୍ପାଦନ ପୂର୍ବ ବର୍ଷ ତୁଳନାରେ ୧୩ ପ୍ରତିଶତ ବୃଦ୍ଧି ପାଇଥିବା ବେଳେ ବିଦେଶକୁ ରପ୍ତାନି ୨୬ ପ୍ରତିଶତ ବୃଦ୍ଧି ପାଇ ଥିବା ଜଣେ ବରିଷ୍ଠ ବିଭାଗୀୟ ଅଧିକାରୀ ମଙ୍ଗଳବାର କହିଛନ୍ତି ।
ସଚିବାଳୟ ରେ ମୁଖ୍ୟ ଶାସନ ସଚିବ ଗୋକୁଳ ଚନ୍ଦ୍ର ପତି ସୋମବାର ବିଭାଗର କାର୍ଯ୍ୟ ସମୀକ୍ଷା କରି ଆଗାମୀ ଦିନରେ ଉତ୍ପାଦନ ଅଭିବୃଦ୍ଧି ହାରକୁ କୋଡିଏ ପ୍ରତିଶତ କରିବାକୁ ପରାମର୍ଶ ଦେଇଥିଲେ ।
ଏଥିପାଇଁ ଉପଯୁକ୍ତ ପ୍ରଯୁକ୍ତି ବିଦ୍ୟାର ପ୍ରୟୋଗ ଓ ମତ୍ସ୍ୟ ଚାଷୀଙ୍କୁ ଉତ୍ସାହିତ କରିବା ପାଇଁ ସମସ୍ତ ସୁବିଧା ସୁଯୋଗ ଯୋଗାଇଦେବା ପାଇଁ ବୈଠକରେ ଗୁରୁତ୍ଵ ଆରୋପ କରାଯାଇଥିଲା ।
୨୦୧୪-୧୫ ଆର୍ଥିକ ବର୍ଷରେ ରାଜ୍ୟରେ ପୂର୍ବବର୍ଷ ତୁଳନାରେ ଅଧିକ ଚାରି ହଜାର ହେକ୍ଟର ଅଞ୍ଚଳରେ ମାଛ ଚାଷ କରାଯାଇଥିବା ବିଭାଗୀୟ ସଚିବ ବିଷ୍ଣୁପଦ ସେଠୀ କହିଛନ୍ତି ।
ଠିକ ସେହି ପରି ବିଦେଶକୁ ରାଜ୍ୟରୁ ମାଛ ଜାତୀୟ ଦ୍ରବ୍ୟର ରପ୍ତାନି ମଧ୍ୟ ବୃଦ୍ଧି ପାଇଛି । ୨୦୧୪-୧୫ ଆର୍ଥିକ ବର୍ଷରେ ୨୩୦୦ କୋଟି ଟଙ୍କାର ରପ୍ତାନି ହୋଇଥିବା ବେଳେ ଏହାର ପୂର୍ବ ବର୍ଷ ଏହା ୧୮୧୭ କୋଟି ଟଙ୍କା ରହିଥିବା ସେ କହିଛନ୍ତି ।
ରାଜ୍ୟରେ ଜଣ ପିଛା ମାଛ ଖାଇବା ପରିମାଣ ୨୦୧୩ – ୧୪ ଓ ୨୦୧୨-୧୩ରେ ହାରାହାରି ୯.୧୩ କେଜି ରହିଥିବା ବେଳେ ୨୦୧୪-୧୫ରେ ଏହା ୯.୪୦ କେଜିକୁ ବୃଦ୍ଧି ପାଇଛି । ଜାତୀୟ ସ୍ତରରେ ମୁଣ୍ଡ ପିଛା ବାର୍ଷିକ ମାଛ ଖାଇବା ପରିମାଣ ହେଉଛି ୯.୮ କିଲୋଗ୍ରାମ ।
ଓଡିଶା ଡଟ କମ
