ଓଡିଶା ଡଟ କମ: ଅମରନାଥ ପରିଡା
ପାରାଦୀପ ମଇ୨୧ (ଓଡିଶା ଡ଼ଟ୍ କମ୍) ପାରାଦୀପ ଠାରେ ଥିବା କାର୍ଗିଲ ଇଣ୍ଡିଆ ପ୍ରାଇଭେଟ ଲିମିଟେଡ କର୍ତ୍ତୁପକ୍ଷ ଓ ଟ୍ରକ ମାଲିକଙ୍କ ମଧ୍ୟରେ ପରିବହନ ଦରକୁ ନେଇ ଚାଲିଥିବା ଟଣା ଓଟରା ଯୋଗୁଁ ଗତ ଦଶ ଦିନ ଧରି କାରଖାନାର ଉତ୍ପାଦନ ବନ୍ଦ ରହିଛି ଫଳରେ କାମ କରୁଥିବା ଶତାଧିକ ଶ୍ରମିକ ବିନା ରୋଜଗାର ରେ ବସିରହିଛନ୍ତି ।
କମ୍ପାନି ଏହାକୁ ଗ୍ରହଣ କରୁ ନ ଥିବାରୁ ଉଭୟଙ୍କ ମଧ୍ୟରେ ବିବାଦ ଜାରି ରହିଛି । ଏହାର କିଛି ସମାଧାନ ନହେବାରୁ କମ୍ପାନି ତାର ଉତ୍ପାଦନ ବନ୍ଦ କରିଦେଇଛି।
ଫଳରେ କାରଖାନାର ପ୍ରାୟ ୨୬୦ ଜଣ ଶ୍ରମିକ ରୋଜଗାର ହରାଇ ବସିରହିଥିବା ଶ୍ରମିକ ସଂଘ ନେତା ସୁଧାକର ମନ୍ତ୍ରୀ କହିଛନ୍ତି । ଉତ୍ପାଦନ ବନ୍ଦକୁ ବେଆଇନ ଦର୍ଶାଇ ସେ ସ୍ଥାନୀୟ ପ୍ରଶାସନକୁ ତୁରନ୍ତ ହସ୍ତକ୍ଷେପ କରି ଏହାର ସମାଧାନ କରିବା ପାଇଁ ଦାବି କରିଛନ୍ତି ।
ଜିଲ୍ଲା ଟ୍ରକ ମାଲିକ ସଂଘ ନେତା ସନ୍ତୋଷ କୁମାର ପଟ୍ଟନାୟକ କହିଛନ୍ତି ଯେ ଲଗାତାର ଭାବରେ ଡିଜେଲ ଓ ପେଟ୍ରୋଲ ତଥା ସ୍ପେୟାର ପାର୍ଟର ଦାମ ବଢୁଥିବାରୁ ଆମେ ପରିବହନ ଦର ବୃଦ୍ଧି କରିବାକୁ କହିଥିଲୁ।
କିନ୍ତୁ ଏହି ଦର କେବଳ କାର୍ଗିଲ ଇଣ୍ଡିଆ ପାଇଁ ନଥିଲା ଏହା ଅନ୍ୟ ସମସ୍ତ କମ୍ପାନୀ ପାଇଁ ମଧ୍ୟ ପ୍ରଯୁଜ୍ୟ ଥିଲା । ହେଲେ କାର୍ଗିଲ ଇଣ୍ଡିଆ ଆମ ସହ ଆଲୋଚନା ନକରି ଆପେ ଆପେ ନିଜର ଉତ୍ପାଦନ ବନ୍ଦ କରିଦେଇଛି ।
କାର୍ଗିଲ ଇଣ୍ଡିଆର ଅଧିକାରୀ ଶ୍ରୀ ଭାନୁ ପ୍ରକାଶ ରାଉତ କହିଛନ୍ତି ଯେ, “ଟ୍ରକ ମାଲିକ ସଂଘ ବାରମ୍ବାର ପରିବହନ ଦରବୃଦ୍ଧି କରୁଥିବାରୁ ଆମକୁ କ୍ଷତିର ସାମନା କରିବାକୁ ପଡୁଛି। ସେଥିପାଇଁ ଆମେ ପ୍ରଶାସନର ସାହାଯ୍ୟ ଚାହିଁଛୁ । ଯଦି ଆମେ ଡରି ଉତ୍ପାଦନ ଚାଲୁ କରୁଛୁ ତେବେ ଭବିଷ୍ୟତରେ କମ୍ପାନି ଚଲେଇବା କଷ୍ଟ ହୋଇଯିବ ।”
ପ୍ରତି ମାସରେ ତିରିଶ ହଜାର ଟନ ଖାଇବା ତେଲ ଉତ୍ପାଦନ କରୁଥିବାର କ୍ଷମତା ରଖିଥିବା କାର୍ଗିଲ ଇଣ୍ଡିଆ ହେଉଛି ଆମେରିକୀୟ ଟ୍ରେଡିଂ କମ୍ପାନୀ କାର୍ଗିଲର ଏକ ଇଉନିଟ । ପାରାଦୀପ କାରଖାନାରେ ଏହି କମ୍ପାନୀ ପ୍ରାୟ ୧୩୦ କୋଟି ଟଙ୍କାରୁ ଅଧିକ ବିନିଯୋଗ କରିସାରିଛି ।
କମ୍ପାନୀ ଉତ୍ପାଦନ କରୁଥିବା ଲୋକପ୍ରିୟ ଖାଇବା ତେଲର ବ୍ରାଣ୍ଡ ହେଲା ସ୍ଵୀକାର, ନେଚର ଫ୍ରେଶ ଓ ଜେମିନ ।
ଓଡିଶା ଡ଼ଟ୍ କମ୍
