ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ଜୁନ ୧୫ (ଓଡିଶା ଡଟ କମ) କାଦମ୍ବିନୀ ମିଡିଆ ପ୍ରଯୋଜିତ କଳାତ୍ମକ ଚଳଚିତ୍ର କ୍ରାନ୍ତିଧାରାର ପ୍ରିମିଅର ସୋ ଭୁବନେଶ୍ଵର ସ୍ଥିତ କିଟ୍ କ୍ୟାମ୍ପସରେ ରବିବାର ସନ୍ଧ୍ୟାରେ ଅନୁଷ୍ଠିତ ହୋଇଛି ।
ପାରିବାରିକ ପତ୍ରିକା କାଦମ୍ବିନୀର ସମ୍ପାଦିକା ଡ଼ଃ ଇତିରାଣୀ ସାମନ୍ତଙ୍କ ଗଳ୍ପ ‘ଝଡ ପରର ସୂର୍ଯ୍ୟ’ ଉପରେ ଆଧାରିତ ଏହି ଚଳଚିତ୍ରକୁ ଶତାଧିକ ବିଶିଷ୍ଟ ବ୍ୟକ୍ତି, ଚଳଚିତ୍ର ପ୍ରେମୀ ଓ କଳାକାର ଭରପୁର ଉପଭୋଗ କରିଥିଲେ।
ମଞ୍ଚାସୀନ ଥିବା ଅନ୍ୟ ଅତିଥି ମାନେ ହେଲେ ବିଶିଷ୍ଟ ନାଟ୍ୟ ନିର୍ଦ୍ଦେଶକ ଅନନ୍ତ ମହାପାତ୍ର, ବିଶିଷ୍ଟ ଅଭିନେତା ନିର୍ଦ୍ଦେଶକ ପ୍ରଶାନ୍ତ ନନ୍ଦ, ଅଭିନେତ୍ରୀ ତ୍ରିପୁରା ମିଶ୍ର , ରାଜ୍ୟ ଚଳଚିତ୍ର ନିଗମ ର ଅଧ୍ୟକ୍ଷ ମୁନା ଖାନ, ଚଳଚିତ୍ର ସମୀକ୍ଷକ ଦିଲ୍ଲୀପ ହାଲି ଓ କ୍ରାନ୍ତିଧାରା ର ନିର୍ଦ୍ଦେଶକ ହିମାଂଶୁ ଖଟୁଆ ।
ଏ ଅବସରରେ କ୍ରାନ୍ତିଧାରା ରେ ଅଭିନୟ କରିଥିବା ନାୟକ, ନାୟିକା ଅନ୍ୟ ଅଭିନେତା , ଅଭିନେତ୍ରୀ ତଥା ଚଳଚିତ୍ର ନିର୍ମାଣରେ ଭୂମିକା ଗ୍ରହଣ କରିଥିବା ବ୍ୟକ୍ତି ବିଶେଷଙ୍କୁ ସମ୍ବର୍ଦ୍ଧିତ କରା ଯାଇଥିଲା ।
କ୍ରାନ୍ତିଧାରା ହେଉଛି କାଦମ୍ବିନୀ ମିଡିଆ ପ୍ରଯୋଜିତ ଦ୍ଵିତୀୟ ଚଳଚିତ୍ର । ୧୯୯୯ ରେ ରାଜ୍ୟରେ ହୋଇଥିବା ମହାବାତ୍ୟା ଉପରେ ଆଧାରିତ ଚଳଚିତ୍ର ‘କଥାଂତର’ ଥିଲା ଏହାର ପ୍ରଥମ ଅର୍ଘ୍ୟ । କଥାଂତର ଦେଶ ବିଦେଶରେ ଉଛ ପ୍ରଶଂସିତ ହୋଇଥିବା ବେଳେ ରାଜ୍ୟ ଓ ରାଜ୍ୟ ବାହାରେ ବହୁ ପୁରସ୍କାର ଲାଭ କରିଛି ।
ଓଡିଶା ଡଟ କମ
