ଦୀପକ ମାଲବ୍ୟ ଲୋକସେବକ ମଣ୍ଡଳର ନୂଆ ସଭାପତି

ଓଡିଶା ଡଟ କମ ସଂବାଦ ଦାତା

ନୂଆଦିଲ୍ଲୀ, ଜୁନ ୩୦ (ଓଡିଶା ଡଟ କମ) ବିଶିଷ୍ଟ ଯୁବ ସଂଗଠକ ତଥା ସମାଜସେବୀ ଦୀପକ ମାଲବ୍ୟ ଲୋକ ସେବକ ମଣ୍ଡଳର ନୂଆ ରାଷ୍ଟ୍ରୀୟ ସଭାପତି ଭାବେ ନିର୍ବାଚିତ ହୋଇଛନ୍ତି । ଲୋକ ସେବକ ମଣ୍ଡଳ ହେଉଛି ରାଜ୍ୟର ଅଗ୍ରଣୀ ଓଡିଆ ଦୈନିକ ଖବର କାଗଜ ସମାଜର ପରିଚାଳକ ।

ସୋମବାର ନୂଆଦିଲ୍ଲୀ ଠାରେ ଲୋକ ସେବକ ମଣ୍ଡଳର ସଦର କାର୍ଯ୍ୟାଳୟ, ଲଜପତ୍‍ ଭବନଠାରେ ଅନୁଷ୍ଠିତ ସଂଗଠନର ସାଧାରଣ ପରିଷଦ ବୈଠକରେ ଶ୍ରୀ ମାଲବ୍ୟ ସର୍ବସମ୍ମତିକ୍ରମେ ସଭାପତି ନିର୍ବାଚିତ ହୋଇଛନ୍ତି । ସେ ଦୁଇବର୍ଷ ପାଇଁ ଏହି ଦାୟିତ୍ୱ ତୁଲାଇବେ ।

ପଞ୍ଜାବକେଶରୀ ଲାଲା ଲଜପତ୍‍ ରାୟଙ୍କ ଦ୍ୱାରା ପ୍ରତିଷ୍ଠିତ ୯୪ ବର୍ଷ ପୁରୁଣା ଦେଶର ଅନ୍ୟତମ ଏହି ସେବାମୂଳକ ପ୍ରତିଷ୍ଠାନ ଲୋକସେବକ ମଣ୍ଡଳର ସମ୍ମାନଜନକ ସଭାପତି ପଦ ଅଳଙ୍କୃତ କରିବାରେ ଶ୍ରୀ ମାଲବ୍ୟ ହେଉଛନ୍ତି ସର୍ବକନିଷ୍ଠ ।

ଉତ୍ତରପ୍ରଦେଶର କାନପୁର ନିବାସୀ ଶ୍ରୀ ମାଲବ୍ୟ ଏହା ପୂର୍ବରୁ ଏହି ଅନୁଷ୍ଠାନରେ ରାଷ୍ଟ୍ରୀୟ ସଂପାଦକ ଭାବେ କାର୍ଯ୍ୟ କରୁଥିଲେ । ଏଠାରେ ସୂଚନାଯୋଗ୍ୟ ଯେ ବିଶିଷ୍ଟ ସମାଜସେବୀ ମନୁଭାଇ ପଟେଲଙ୍କ ଦେହାନ୍ତ ପରେ ମଣ୍ଡଳର ସଭାପତି ପଦ ଖାଲି ପଡ଼ିଥିଲା ।

ବର୍ଷିୟାନ ସର୍ବୋଦୟ ନେତା ତଥା ସମାଜସେବୀ କୀର୍ତ୍ତିଭାଇ ପାଣ୍ଡିଆ ମଣ୍ଡଳର ନୂତନ ଉପସଭାପତି ଭାବେ ନିର୍ବାଚିତ ହୋଇଥିବାବେଳେ ବିଶିଷ୍ଟ ସମାଜସେବୀ, ସାମ୍ବାଦିକ ତଥା ସାହିତ୍ୟିକ ନିରଞ୍ଜନ ରଥ ମଣ୍ଡଳର ନୂଆ ରାଷ୍ଟ୍ରୀୟ ସମ୍ପାଦକ ନିର୍ବାଚିତ ହୋଇଛନ୍ତି ।

ସେହିଭଳି ବିଶିଷ୍ଟ ଯୁବ ସମାଜସେବୀ ଭୀମସେନ ଯାଦବ ମଣ୍ଡଳର କୋଷାଧ୍ୟକ୍ଷ ଭାବେ ନିର୍ବାଚିତ ହୋଇଥିବା ସଂଗଠନ ପକ୍ଷରୁ ପ୍ରକାଶିତ ପ୍ରେସ୍‍ ବିଜ୍ଞପ୍ତିରେ କୁହାଯାଇଛି । ମଣ୍ଡଳର ନୂଆ କାର୍ଯ୍ୟନିର୍ବାହୀ ପରିଷଦରେ ଉପରୋକ୍ତ ଚାରି କର୍ମକର୍ତ୍ତାଙ୍କ ସମେତ ଓଁକାର ଚାନ୍ଦ ଓ ରାଜକୁମାରଙ୍କୁ ସଦସ୍ୟଭାବେ ନିଆଯାଇଛି ।

ଲୋକସେବକମଣ୍ଡଳ ଏକ ସେବାମୂଳକ ଅନୁଷ୍ଠାନ ଭାବେ ଲଜ୍‍ପତ ରାୟଙ୍କ ଦ୍ୱାରା ୧୯୨୧ରେ ପ୍ରତିଷ୍ଠିତ ହୋଇଥିଲା । ମହାତ୍ମା ଗାନ୍ଧୀଙ୍କ ଦ୍ୱାରା ଉଦ୍‍ଘାଟିତ ଏହି ଅନୁଷ୍ଠାନର ପ୍ରଥମ ସଭାପତି ଥିଲେ ଏହାର ପ୍ରତିଷ୍ଠାତା ଲଜପତ୍‍ ରାୟ ।

ତାଙ୍କ ପରେ ରାଜଶ୍ରୀ ପୁରୁଷୋତ୍ତମ ଦାସ ଟଣ୍ଡନ, ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବଳବନ୍ତ ରାୟ ମେହେତା, ପୂର୍ବତନ ପ୍ରଧାନମନ୍ତ୍ରୀ ଲାଲବାହାଦୂର ଶାସ୍ତ୍ରୀ, ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ବିଶ୍ୱନାଥ ଦାସ, ବିଶିଷ୍ଟ ସମାଜସେବୀ ତଥା ପ୍ରଖ୍ୟାତ ସାମ୍ବାଦିକ ଡକ୍ଟର ରାଧାନାଥ ରଥ, ଭାରତର ପୂର୍ବତନ ଉପରାଷ୍ଟ୍ରପତି କୃଷ୍ଣକାନ୍ତ, ସ୍ୱାଧୀନତା ସଂଗ୍ରାମୀ ଓଁକାର ଚାନ୍ଦ ଓ ସ୍ୱାଧୀନତା ସଂଗ୍ରାମୀ ତଥା ସମାଜସେବୀ ମନୁଭାଇ ପଟେଲ ଏହି ଅନୁଷ୍ଠାନର ସଭାପତି ଦାୟିତ୍ୱ ନିର୍ବାହ କରିବାର ସୌଭାଗ୍ୟ ଲାଭ କରିଛନ୍ତି ।

ଦିଲ୍ଲୀ, ପଞ୍ଜାବ, ହିମାଚଳପ୍ରଦେଶ, ଗୁଜରାଟ, ମହାରାଷ୍ଟ୍ର ଓ ଓଡ଼ିଶାରେ ଲୋକସେବକ ମଣ୍ଡଳର ଶାଖାମାନ ଅଛି ଏବଂ ଏହା ମାଧ୍ୟମରେ ମଣ୍ଡଳ ପକ୍ଷରୁ ସମାଜସେବା ସମେତ ବିଭିନ୍ନ ଶୈକ୍ଷିକ, ସ୍ୱାସ୍ଥ୍ୟସେବା ଓ ବିକାଶମୂଳକ କାର୍ଯ୍ୟକ୍ରମ ଚାଲିଛି ।

ସାଧାରଣ ପରିଷଦ ବୈଠକରେ ମଣ୍ଡଳର ଆଜୀବନ ସଦସ୍ୟ ସର୍ବଶ୍ରୀ ମାଲବ୍ୟ, ପାଣ୍ଡିଆ, ଯାଦବ, ରଥଙ୍କ ସମେତ ଓଁକାର ଚାନ୍ଦ, ରାଜକୁମାର, ଅଜୟ ସିଂହ ତଥା ଆଜୀବନ କର୍ମୀ ଡକ୍ଟର ପ୍ରଭାସ ଆଚାର୍ଯ୍ୟ ଓ ରାଜେନ୍ଦ୍ର
କୁମାର ଜେନା ଯୋଗ ଦେଇଥିଲେ ।

ଓଡିଶା ଡଟ କମ