କେଦାର ମିଶ୍ର
୨୬, ଜୁନ୍ ୨୦୧୬, ଆମେରିକାର ପ୍ରଖ୍ୟାତ ସମ୍ବାଦପତ୍ର ନ୍ୟୁୟର୍କ୍ ଟାଇମସର ଲେଖିକା ରୁଥ୍ ପାଡାବାର୍ ଏକ ଲମ୍ବା ଆଲେଖ୍ୟ ରେ ପୃଥିବୀର କ୍ରୀଡା ଜଗତରେ ରହିଥିବା ଲିଂଗଗତ ବୈଷମ୍ୟ ଓ ମହିଳା କ୍ରୀଡାବିତ୍ ମାନଂକ ପ୍ରତି କରାଯାଉଥିବା ଅପମାନ ଜନକ ବ୍ୟବହାର ସମ୍ପର୍କରେ ବିଶଦ ବିବରଣୀ ଦେଇଛନ୍ତି।
ରୁଥ୍ ତାଂକ ଲେଖାରେ ଏହି ସଂଘର୍ଷ ର ପ୍ରତୀକ ଭାବରେ ଓଡିଆ ଝିଅ ତଥା ବର୍ତମାନ ସମୟର ସବୁଠୁ ଚର୍ଚିତ ଧାବିକା ଦୁତି ଚାନ୍ଦକୁ ଉପସ୍ଥାପନ କରିଛନ୍ତି ।
ଜୁନ୍ ୨୦୧୪, ଦୁତିଂକ ଜୀବନରେ ଏମିତି ଏକ ମୋଡ ଆଣିଥିଲା ଯାହାକୁ ସେ କଦାପି ଭୁଲି ପାରିବେ ନାହିଁ। ସେହି ବର୍ଷ ମଇ ମାସରେ ତାଇପେ ଠାରେ ଅନୁଷ୍ଠିତ ଏସୀୟ ଜୁନିଅର୍ ଆଥଲେଟିକ୍ ପ୍ରତିଯୋଗିତା ରେ ଦୁତି ୧୦୦ ମିଟର୍ ଓ ୨୦୦ ମିଟର୍ ଦୌଡ ରେ ସ୍ଵର୍ଣ ପଦକ ହାସଲ କରିଥାନ୍ତି ।
ସେ ବର୍ଷ ଗ୍ଲାସଗୋଠାରେ ହେବାକୁ ଥିବା ରାଜ୍ୟ ଗୋଷ୍ଠୀ କ୍ରୀଡା ରେ ଭାଗ ନେଇ ସଫଳ ହେବାକୁ ସେ ବେଶ ଆଶାବାଦୀ ମଧ୍ୟ ଥାଆନ୍ତି । ସେହି ସମୟରେ ତାଂକୁ ତାଂକର ଲିଂଗ ପରୀକ୍ଷା କରିବା ଭଳି ଅପମାନଜନକ ସ୍ଥିତି ସୃଷ୍ଟି କରାଗଲା।
ମାତ୍ର ପାଂଚ ଫୁଟ୍ ଡେଂଗୀ ଏଇ ଅଠର ବର୍ଷର ସାଧାରଣ ଓଡିଆ ଝିଅଟି ଯେ ଏତେ ବେଶୀ ପ୍ରଭାବଶାଳୀ ହୋଇପାରେ, ଏକଥା ବିଶ୍ଵାସ କରିବାକୁ ଭାରତୀୟ ଆଥଲେଟିକ ସଂଗଠନ ନାରାଜ।
ଦୁତିଂକ ହରମୋନ୍ ରେ ଅଧିକ ପରିମାଣରେ ପୁରୁଷ କ୍ରୋମୋଜମ୍ ରହିଛି ବୋଲି କୁହାଗଲା ଓ ଏଥି ପାଇଁ ତାଂକୁ ରାଜ୍ୟ ଗୋଷ୍ଠୀ କ୍ରୀଡା ପ୍ରତିଯୋଗିତାରେ ଅଂଶ ଗ୍ରହଣ କରିବାର ସୁଯୋଗରୁ ବଂଚିତ କରାଗଲା। ତାପରେ ଯାହା ଘଟିଲା, ତାହା ଇତିହାସ। ଆଥଲେଟିକ୍ ସଂଗଠନର ଏହି ଅନ୍ୟାୟ ବିରୋଧରେ ଏହି ଓଡିଆ ଝିଅର ସଂଘର୍ଷ ଓ ସଫଳତା ର ଚର୍ଚା ଆଜି ପୃଥିବୀରେ ଏକ ଅନନ୍ୟ ଉଦାହରଣ ପାଲଟି ଯାଇଛି ।
ରିଓ ଅଲିମ୍ପିକ୍ ପାଇଁ ଶହେ ମିଟର୍ ବର୍ଗରେ ଯୋଗ୍ୟତା ହାସଲ କରିଥିବା ଦୁତି ଆଜି ପି.ଟି.ଉଷାଙ୍କ ପରେ ଦ୍ଵିତୀୟ ଭାରତୀୟ ଧାବିକା। ତାଂକ ପ୍ରତିଭାକୁ ନେଇ କେବଳ ଭାରତ ଉତ୍ସାହିତ ନୁହଁ, ତାଂକ ପ୍ରଦର୍ଶନକୁ ନେଇ ଏବେ ସାରା ପୃଥିବୀ ର କ୍ରୀଡା ପ୍ରେମୀ ଏବେ ଉଦ୍ଗୀବ ।
ସମ୍ପ୍ରତି ନ୍ୟୁୟର୍କ ଟାଇମ୍ସ ତାଂକ ପତ୍ରିକାର ପ୍ରଛଦ ରେ ଦୁତିଂକୁ ସ୍ଥାନିତ କରିଛନ୍ତି (୭/୩/୧୬ ସଂଖ୍ୟା ) ।ସେହିପରି ଭାରତର ଅନ୍ୟତମ ବଡ ପତ୍ରିକା ଇଣ୍ଡିଆ ଟୁଡେ ନିଜ ପ୍ରଛଦରେ ଦୁତିଂକୁ ଭାରତୀୟ ଆଥଲେଟିକ୍ ର ଆଶା ଭାବରେ ପରିଚିତି ଦେଇଛି ।
ଆମ ସମୟର ସବୁଠୁ ବେଶୀ ଗୌରବ ଓ ପରିଚିତି ହାସଲ କରିଥିବା ବିସ୍ମୟ ଧାବିକା ଦୁତି ଚାନ୍ଦଂକ ବିଷୟରେ କେତୋଟି କଥା-
୧. ଦୁତି ଚାନ୍ଦ, ବୟସ-୨୦, ଉଛତା ୫ ଫୁଟ୍, ଜନ୍ମ-୩, ଫେବୃଆରୀ. ୧୯୯୬। ଯାଜପୁର ଜିଲାର ଗୋପାଳପୁର ଗାଁ ର ଏକ ଅତି ସାଧାରଣ ପରିବାରର ଝିଅ ଦୁତି । ବାପା –ଚକ୍ରଧର ଚାନ୍ଦ ଓ ମାଁ -ଅଖୁଜି ଚାନ୍ଦ । ପରିବାରରେ ଚାରି ଭଉଣୀ।
୨. ଦୁତିଂକ ବଡ ଭଉଣୀ ସରସ୍ଵତୀ ଚାନ୍ଦ ପରିବାରର ପ୍ରଥମ ଆଥଲେଟ୍। ଜାତୀୟ ଓ ଆନ୍ତର୍ଜାତୀୟ ସ୍ତରରେ ସରସ୍ଵତୀ ଆଥଲେଟ୍ ଭାବରେ ବେଶ୍ ଖ୍ୟାତି ଲାଭ କରିଥିଲେ ।
୨୦୦୯ ମସିହାରେ କାନାଡା ରେ ଆୟୋଜିତ World Police and fire games ରେ ସରସ୍ଵତୀ ୬ ଟି ମେଡାଲ୍ ହାସଲ କରି ଏକ ବିରଳ ରେକର୍ଡ଼ ପ୍ରତିଷ୍ଠା କରିଥିଲେ।
ସ୍ଵାଭାବିକ ଭାବରେ ସରସ୍ଵତୀ ଥିଲେ ଦୁତିଂକ ପାଇଁ ପ୍ରେରଣା ର ଉତ୍ସ।
୩. ୨୦୧୨ ମସିହାରେ ଦୁତି ଜାତୀୟ କ୍ରୀଡା ପ୍ରତିଯୋଗିତା ରେ ୧୮ ବର୍ଷରୁ କମ୍ ବାଳିକା ବର୍ଗରେ ଚାମ୍ପିଆନ୍ ହୋଇଥିଲେ।୧୧.୮ ସେକେଣ୍ଡ୍ ରେ ୧୦୦ ମିଟର୍ ଦୌଡି ସେ ନିଜ ପାଇଁ ଏକ ମାଇଲ୍ ଖୁଣ୍ଟ ତିଆରି କରିଥିଲେ।
୪. ପୁନେ ଠାରେ ଆୟୋଜିତ ଏସିଆନ୍ ଚାମ୍ପିଆନ୍ସିପ୍ ରେ ୨୩. ୮୧୧ ସେକେଣ୍ଡ୍ ରେ ୨୦୦ ମିଟର୍ ଦୌଡରେ ସେ ବ୍ରୋଂଜ୍ ପଦକ ହାସଲ କରିଥିଲେ ।
୫. ୨୦୧୩ ରେ ଦୁଇଟି ସିନିଅର୍ ବର୍ଗରେ ୧୬ ବର୍ଷ ତଳେ ଶହେ ମିଟର୍ ଦୌଡ ପ୍ରତିଯୋଗିତାରେ ରଚିତା ପଣ୍ଡା-ମିସ୍ତ୍ରୀଙ୍କ ରେକର୍ଡ଼ ଭାଂଗି ୧୧.୭୩ ସେକେଣ୍ଡ୍ ରେ ୧୦୦ ମିଟର୍ ଅତିକ୍ରମ କରିଥିଲେ ।
୬. ଦୌଡ ପ୍ରତିଯୋଗିତା ରେ ଭାରତର ଉଦୀୟମାନ ତାରକା ଭାବେ ଦୁତି ଆଗେଇ ଚାଲିଥିବା ବେଳେ ତାଂକୁ ଲିଂଗ ପରୀକ୍ଷା ଭଳି ଏକ ଅମାନବୀୟ ପରିସ୍ଥିତି ର ସାମନା କରିବାକୁ ପଡିଲା।ତେବେ ଏହାକୁ ସଫଳତାର ସହ ମୁକାବିଲା କରିବାରେ ସେ ଦୃଢ ମନୋବଳ ପ୍ରଦର୍ଶନ କରି ବିଜୟିନୀ ହୋଇଥିଲେ।
୭. ରାଜ୍ୟ ଗୋଷ୍ଠୀ କ୍ରୀଡା ପ୍ରତିଯୋଗିତା ରୁ ଶେଷ ମୁହୂର୍ତରେ ବାଦ ପଡିଥିବା ଦୁତି ଦୁଇ ବର୍ଷ ପର୍ଯନ୍ତ ଏକ ଆଇନଗତ ଲଢେଇ ରେ ଅବତୀର୍ଣ ହୋଇ ନିଜ ପ୍ରତିଷ୍ଠା ବଜାୟ ରଖି ପାରିଲେ। ୨୦୧୬ ରେ ନିଜ ରେକର୍ଡ଼ ନିଜେ ଭାଂଗି ଦୁତି ରିଓ ଅଲିମ୍ପିକ୍ ପାଇଁ ଯୋଗ୍ୟତା ଅର୍ଜନ କରିଛନ୍ତି।
୮. ପି.ଟି.ଉଷାଙ୍କ ପରେ ୧୦୦ ମିଟର ବର୍ଗରେ ଅଲିମ୍ପିକ୍ ପାଇଁ ଯୋଗ୍ୟତା ହାସଲ କରିଥିବା ଦ୍ଵିତୀୟ ଆଥଲେଟ୍ ଭାବରେ ସେ ବିରଳ ସୌଭାଗ୍ୟ ଅର୍ଜନ କରିଛନ୍ତି। ଦୀର୍ଘ ଦିନ ଧରି ଓଡିଶା ନିଜର ଜାତୀୟ ପରିଚୟ ପ୍ରତିଷ୍ଠା କରିବାର ସୁଯୋଗ ଦୁତିଂକ ମାଧ୍ୟମରେ ପାଇଛି ।
୯. ଅତି ସାଧାରଣ ପରିବାରରେ ଜନ୍ମ ନେଇ ଅସାଧାରଣ ପ୍ରତିଭା ଓ ସାମର୍ଥ୍ୟ ପ୍ରଦର୍ଶନ କରିଥିବା ଦୁତି ଓଡିଶା ସରକାରଂକ ଲାଗି ସମ୍ମାନ ର ସଂକେତ ହେବା ଉଚିତ ହୁଅନ୍ତା।
ହେଲେ ଦୁତିଂକୁ ଯେତିକି ସାହାଯ୍ୟ ଓଡିଶା ସରକାର ଦେବା କଥା ତାହା ଘଟୁ ନାହିଁ। ଗୋଟେ ଓଡିଆ ଝିଅ ଆଜି ପୃଥିବୀର ତାରକା ପାଲଟିଛି। ଟା ପଛରେ ପୂରା ଓଡିଆ ଜାତି ଆଜି ଠିଆ ହେବାର ବେଳ ଆସିଛି ।
୧୦. କ୍ରୀଡା ସହିତ ଏକ ଘରୋଇ ମହାବିଦ୍ୟାଳୟ ରେ ଦୁତି ଏବେ ଆଇନ ବିଭାଗର ଛାତ୍ରୀ ।
ଓଡିଶା ଡଟ କମ
