ଜଷ୍ଟିସ୍ କାଟଜୁ, ବିଦ୍ରୁପ ଓ ଓଡିଆ ସ୍ଵାଭିମାନ; କେତୋଟି କଥା

କେଦାର ମିଶ୍ର

ଜଷ୍ଟିସ୍ ମାର୍କଣ୍ଡେୟ କାଟଜୁ, ଭାରତର ସୁପ୍ରିମ୍ କୋର୍ଟର ପୂର୍ବତନ ବିଚାରପତି, ପ୍ରେସ୍ କାଉନସିଲ୍ ଅଫ ଇଣ୍ଡିଆ ର ପୂର୍ବତନ ଅଧ୍ୟକ୍ଷ ଓ ସମ୍ପ୍ରତି ସୋସିଆଲ୍ ମିଡିଆ ରେ ସବୁଠୁ ବେଶୀ ଗାଳି ଦେଉଥିବା ଓ ଗାଳି ଖାଉଥିବା ଏକ ଚରିତ୍ର ।

ବିଭିନ୍ନ ସମୟରେ ବିବଦମାନ ମନ୍ତବ୍ୟ ଦେଇ ଚର୍ଚାରେ ରହିଥିବା ଜଷ୍ଟିସ୍ କାଟଜୁ, ବିବାଦକୁ ଭଲ ପାଆନ୍ତି । ଜାଣିଶୁଣି ସେ ବିବାଦ ତିଆରି କରନ୍ତି ନା ତାଂକ କଥା ଆପେ ଆପେ ବିବଦମାନ ହୋଇଯାଏ, ତାହା ଅବଶ୍ୟ ଚିନ୍ତାର ବିଷୟ !

ସୋସିଆଲ୍ ମିଡିଆ ରେ ସେ ବୋଧେ ଏକମାତ୍ର ପୂର୍ବତନ ବିଚାରପତି, ଯିଏ ଖୋଲାଖୋଲି ଦେଶର ରାଜନୀତି, ଅର୍ଥନୀତି ଓ ସାମାଜିକ ନୈତିକତା ପ୍ରସଂଗରେ ଅତ୍ୟନ୍ତ କଠୋର ମନ୍ତବ୍ୟ ଦେଇ ଆସୁଛନ୍ତି। ଗୋଟେ ବାକ୍ୟରେ କହିବାକୁ ଗଲେ- ଜଷ୍ଟିସ୍ କାଟଜୁ ଓ ବିବାଦ ପରଷ୍ପରର ପରିପୂରକ।

ତେବେ ଓଡିଶା ପ୍ରସଂଗରେ ଜଷ୍ଟିସ୍ କାଟଜୁ ଗତ କିଛିଦିନ ତଳେ ଏମିତି କିଛି କଥା କହିଥିଲେ, ଯାହାକି ନିତାନ୍ତ ଅରୁଚିକର ଓ ନିନ୍ଦନୀୟ। ତେବେ ଜଷ୍ଟିସ୍ କାଟଜୁ ଏମିତି ଅନେକ କଥା ଲେଖନ୍ତି ବା କହନ୍ତି ଯାହା ଆଦୌ ଚିନ୍ତା ବା ଚର୍ଚା ର ବିଷୟ ହେବା ଉଚିତ ନୁହଁ।

ବିଭିନ୍ନ ରାଜ୍ୟର ଲୋକଂକୁ ନେଇ ଅତି ଅରୁଚିକର ମନ୍ତବ୍ୟ ଦେବାର ଏକ ବିକଳ ମାନସିକତା ତାଂକର ରହିଛି।

ଓଡିଆଂକ ପୂର୍ବରୁ ବିହାରୀ, ତେଲୁଗୁ,ବଂଗାଳୀ,ଜାଠ, ଗୁଜ୍ଜର ଓ ଆହୁରି ଅନେକଂକ ସମ୍ପର୍କରେ ସେ ଅଦ୍ଭୁତ ଓ ଉନ୍ମାଦ ମନ୍ତବ୍ୟ ସବୁ ଦେଇଛନ୍ତି।

ଜଣେ ଅଭ୍ୟାସଗତ ଅପମାନଦାତା ଓ ଅକାରଣରେ ବିବାଦ ସୃଷ୍ଟି କରି ଆନନ୍ଦ ପାଉଥିବା ଲୋକକୁ ଓଡିଶାରେ ଏତେ ବେଶୀ ଗୁରୁତ୍ବ ଦେବାର କାରଣ କଣ?

ଓଡିଶାର ଇତିହାସ ଓ ସଂସ୍କୃତି ଜଷ୍ଟିସ୍ କାଟଜୁଂକ ପ୍ରମାଣପତ୍ର ଆଧାରରେ ତିଷ୍ଠି ନାହିଁ। ତାଂକ ମନ୍ତବ୍ୟ ଏକ ଅନାବଶ୍ୟକ ପ୍ରଳାପ ଓ ତାର କୌଣସି ସାମାଜିକ ଗୁରୁତ୍ଵ ନାହଁ।

ବରଂ ତାଂକ ବିଷୟରେ ଅଧିକ ଚର୍ଚ୍ଚା କରି ଓ ବିକ୍ଷୋଭ ରାଜନୀତି ମାଧ୍ୟମରେ ଆମେ ତାଂକୁ ମଜା ଉଠେଇବାର ଅଧିକ ସୁଯୋଗ ଦେଇଛୁ।

ଆମେ ଭଲ ଭାବେ ଜାଣି ରଖିବା ଉଚିତ ଯେ ଜଣେ ଲୋକ ର ଚିଡେଇବା ସେତେବେଳେ ସାର୍ଥକ ହୁଏ, ଯେତେବେଳେ ଲକ୍ଷ୍ୟରେ ଥିବା ଲୋକଟି ରାଗିବା ଆରମ୍ଭ କରେ।

ଆମର ମାତ୍ରାଧିକ ପ୍ରତିକ୍ରିୟା ଓ ସୋସିଆଲ୍ ମିଡିଆରେ ଆମର ଅସଭ୍ୟ ଆଚରଣ. ତାଂକୁ ଅଧିକ ଆନନ୍ଦ ଦେବାରେ ସହାୟକ ହେଉଛି। ଏ ପ୍ରସଂଗରେ ଆହୁରି ଅଧିକ କିଛି ଆଲୋଚନା କରାଯାଉ-

୧. ଜଷ୍ଟିସ୍ କାଟଜୁ ଓଡିଆଂକୁ “ବେଚାରା” ଓ “ଅବସାଦଗ୍ରସ୍ତ” ବୋଲି କହିବା ଆଗରୁ ବିହାରୀ ମାନଂକୁ ପାକିସ୍ତାନ କୁ ଦେଇଦେବାକୁ ହାସ୍ୟାସ୍ପଦ ଯୁକ୍ତି ବାଢିଥିଲେ।

ଫେସବୁକ୍ ରେ ସେ ଲେଖିଥିଲେ- ପାକିସ୍ତାନ! କେବଳ କାଶ୍ମୀର ନୁହଁ ତମେ ବିହାର କୁ ମଧ୍ୟ ନେଇଯାଅ। ତାପରେ ଓଡିଶା ପ୍ରସଂଗରେ ସେ ବିହାର ଓ ଓଡିଶା ଭିତରେ ଗୋଟେ ମିଚ୍ଛ ବିବାଦ ତିଆରି କରିଥିଲେ। ପାତ୍ର, ମହାପାତ୍ର ଓ ପଟ୍ଟନାୟକ ପ୍ରସଂଗ ଉଠେଇଲା ବେଳେ ଓଡିଶାର ସାମାଜିକ ଓ ରାଜନୈତିକ ବାସ୍ତବତା ବିଷୟରେ ତାଂକର ଅଜ୍ଞତା ବାରି ହୋଇ ପଡୁଥିଲା।

୨. ତାଂକ ମତରେ ଗାନ୍ଧିଜୀ ଓ ନେତାଜୀ ସୁଭାଷ ଚନ୍ଦ୍ର ବୋଷ ଉଭୟେ ବ୍ରିଟିଶ ସରକାରଂକ ଦଲାଲ ଥିଲେ। ନିରନ୍ତର ଗାନ୍ଧିଜୀ ଓ ନେତାଜୀଂକ ବିରୋଧରେ ଲେଖିଲା ପରେ ତାଂକ କଥାକୁ ଏବେ କେହି ଗୁରୁତ୍ବ ଦେଉନାହାନ୍ତି।

ଗତ ଅକ୍ଟୋବର ୨ ତାରିଖ ଗାନ୍ଧି ଜୟନ୍ତୀ ଦିନ ସେ ପଚାଶରୁ ଅଧିକ ଟୁଇଟ କରିଥିଲେ ମଧ୍ୟ କେହି ତାକୁ ଶୁଣି ନଥିଲେ। ଆମେ ଓଡିଆ ମାନେ ସେଥିରୁ କିଛି ଶିଖୁନୁ କାହିଁକି ?

୩. କାଟଜୁଂକ ମନରେ ଲୋକପ୍ରିୟ ଚରିତ୍ର ମାନଂକ ପ୍ରତି ଗୋଟେ ପ୍ରକାର ଘୃଣାର ଭାବନା ରହିଛି। ତେଣୁ ସେ ସବୁ ଲୋକପ୍ରିୟ ଚେହେରାକୁ ଗାଳି କରନ୍ତି।

ନରେନ୍ଦ୍ର ମୋଦି, ଅରବିନ୍ଦ କେଜରିବାଲ୍, ନିତିଶ କୁମାର, ଅମିତାଭ ବଚ୍ଚନ୍, କହ୍ନେଇୟା କୁମାର ଓ ଆହୁରି ଅନେକଂକୁ ନିୟମିତ ଗାଳି କରିବାରେ ସେ ମଜା ପାଆନ୍ତି। କାଶ୍ମୀର ପ୍ରସଂଗରେ ଆଲୋଚନା କରିବାକୁ ଯାଇ ପୂରା କାଶ୍ମୀରର ନେତୃତ୍ବକୁ ସେ ଜୋକର୍ ବୋଲି କହିଥିଲେ।

୪. କେବଳ ସେତିକି ନୁହଁ, ସୁପ୍ରିମ୍ କୋର୍ଟ୍ ର ମୁଖ୍ୟ ବିଚାରପତି ଓ ଅନ୍ୟାନ୍ୟ ସହଯୋଗୀ ବିଚାରପତିଂକ ବିରୋଧରେ ବ୍ୟକ୍ତିଗତ ଓ ନିନ୍ଦନୀୟ ଆରୋପ ଲଗାଇବାର ଅଭ୍ୟାସ ତାଂକର ରହିଛି।

୫. ତେବେ ଜଷ୍ଟିସ୍ କାଟଜୁ ଯେ କେବଳ ବିବାଦ ଓ ବିସମ୍ବାଦ ତିଆରି କରନ୍ତି ତା’ ନୁହଁ, ବେଳେ ବେଳେ ତାଂକ ଲେଖାରେ ଅନେକ ସତ୍ୟକଥା ମଧ୍ୟ ପ୍ରକାଶ ପାଇଥାଏ। “ସତ୍ୟମ୍ ବୃୟାତ” ଶୀର୍ଷକ ଏକ ବ୍ଲଗ୍ ରେ ସେ ଭାରତର ନ୍ୟାୟ ବ୍ୟବସ୍ଥା ଓ ସାଂସ୍କୃତିକ-ସାମାଜିକ ଇତିହାସକୁ ନେଇ ଅନେକ ତଥ୍ୟ ପୂର୍ଣ୍ଣ ଆଲୋଚନା କରିଛନ୍ତି।

୬. ୧୩ ତାରିଖ ସକାଳ ୭.୧୮ ରେ ଏକ କାର୍ଟୂନ ମାଧ୍ୟମରେ ଜଷ୍ଟିସ୍ କାଟଜୁ ଓଡିଆଂକ ଆଗରେ ନିଜ ମୁଣ୍ଡ ବାଡେଇ ସାରିବା ପରେ, ଏହାକୁ ନେଇ ଅଧିକ ନାଟକ କରିବାର ଆବଶ୍ୟକତା କଣ ଥିଲା। ପ୍ରସଂଗ ପାଉନଥିବା ଓଡିଆ ଟେଲିଭିଜନ ଲାଗି ଏହା ବୋଧେ ଏକ ସହଜ ପ୍ରସଂଗ, ଯାହାକୁ ଅନାବଶ୍ୟକ ଭାବରେ ଲମ୍ବା କରା ଯାଉଛି।

୭. ଏଠି ପ୍ରକାଶଯୋଗ୍ୟ ଯେ କାଟଜୁଂକ ଜେଜେ ବାପା କୈଲାଶନାଥ କାଟଜୁ ଓଡିଶାର ରାଜ୍ୟପାଳ ଥିଲେ ଓ ସେହି ସୂତ୍ରରେ ତାଂକର ପିଲାଦିନର କିଛି ସ୍ମୃତି ଓଡିଶା ସହ ଜଡିତ ହୋଇ ରହିଛି । ଓଡିଶାର ଇତିହାସ ସମ୍ପର୍କରେ ସେ ଯାହା କହିଛନ୍ତି ତାହା ନିହାତି ନିର୍ବୋଧତା ଓ ସବୁ ପ୍ରକାର ନିର୍ବୋଧତାକୁ ଅଣଦେଖା କରିବା ହିଁ ବିଜ୍ଞତାର ପରିଚୟ।

୮. ଆମ ସ୍ବାଭିମାନ ଓ ସଂସ୍କୃତି ବିଷୟରେ ଆମେ ଯେ ବେଶ୍ ସଚେତନ, ଏ କଥା ଜଣାଇବାକୁ ଆମେ ବେଶ୍ ଅଗ୍ରସର- ଠିକକଥା ! ହେଲେ ଅତ୍ୟଧିକ ପ୍ରତିକ୍ରିୟା ପ୍ରବଣ ହେବାର ଅର୍ଥ ହେଉଛି ନିଜ ସ୍ବାଭିମାନକୁ ନାଟକ କରିଦେବା। ଅଧିକ ଭାବ ପ୍ରବଣ ହୋଇ ଗୁଡାଏ ଭୁଲ୍ କରିବାକୁ ଆମେ ଭଲ ପାଉଛୁ କାହିଁକି?

୯ . ଶେଷରେ ଏତିକି କହିବା ଯଥେଷ୍ଟ ହେବଯେ ସୋସିଆଲ୍ ମିଡିଆ ର ଗୋଟେ ସାଧାରଣ ପୋଷ୍ଟିଂ କୁ ନେଇ ହୋ ହଲ୍ଲା କରିବାରେ ଆମେ ଯେତିକି ସମୟ ନଷ୍ଟ କଲେଣି, ସେତିକିରେ ଅନେକ ରଚନାତ୍ମକ କାର୍ଯ୍ୟ କରାଯାଇ ପାରିବ !! ତେଣୁ ହେ ପ୍ରିୟ ଓଡିଆପ୍ରାଣ ବନ୍ଧୁଗଣ!!

ଜଷ୍ଟିସ୍ କାଟଜୁଂକ ବକ୍ତବ୍ୟକୁ ବେଖାତିର କରି ନିଜ ସ୍ଵାଭିମାନ ନିଜେ ବଜାୟ ରଖିବା ଆସନ୍ତୁ !!!!