ଓଡିଶା ଖବର

ଓଡିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ଵର, ୨୦ ଜୁନ(ଓଡିଶା ଡ଼ଟ୍ କମ୍): ମହିଳାଙ୍କ ବିରୋଧରେ ହେଉଥିବା ବିଭିନ୍ନ ଅତ୍ୟାଚାର ଯଥା ଧର୍ଷଣ, ଯୌତୁକ ହତ୍ୟା, ଏସିଡ ଆକ୍ରମଣ ଏବଂ ଅବୈଧ ଚାଲାଣ ଆଦି ଜଘନ୍ୟ ଅପରାଧର ତଦନ୍ତ ତ୍ୱରାନ୍ୱିତ କରିବା ଏବଂ ଆଇନଗତ କାର୍ଯ୍ୟ।ନୁଷ୍ଠାନର ତଦାରଖ କରିବା ପାଇଁ ପୋଲିସ ଜିଲ୍ଲାମାନଙ୍କରେ ସ୍ଵତନ୍ତ୍ର ୟୁନିଟ ଖୋଲାଯିବ ।

ଇନଭେଷ୍ଟିଗେଟିଙ୍ଗ ୟୁନିଟ୍ସ ଫର କ୍ରାଇମ୍ସ ଏଗେନଷ୍ଟ ୱୂମେନ (ଆଇୟୁସିଏଡବ୍ଲ୍ୟୁ) ନାମରେ ନାମିତ ଏହି ସ୍ଵତନ୍ତ୍ର ସଂସ୍ଥା ପାଇଁ ୧୦୫ ଜଣ ପୋଲିସ ଅଧିକାରୀ ପଦବୀକୁ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଅନୁମୋଦନ କରିଛନ୍ତି।

ଏହି ୟୁନିଟ ଗୁଡିକ ଭୁବନେଶ୍ଵର, ବାଲେଶ୍ଵର, ରାଉରକେଲା, ସମ୍ବଲପୁର, ବ୍ରହ୍ମପୁର, ମୟୂରଭଞ୍ଜ ଓ ଅନୁଗୋଳରେ କାର୍ଯ୍ୟକରିବ। ଏଥିରେ ପ୍ରତି ୟୁନିଟରେ ଜଣେ ଅତିରିକ୍ତ ପୋଲିସ ଅଧୀକ୍ଷକ, ଦୁଇ ଜଣ ଉପଆରକ୍ଷୀ ଅଧିକ୍ଷକ, ଚାରି ଜଣ ଆରକ୍ଷୀ ନୀରିକ୍ଷକ, ଚାରି ଜଣ ଉପଆରକ୍ଷୀ ନୀରିକ୍ଷକ ଏବଂ ଚାରି ଜଣ କନେଷ୍ଟବଳ ରହିବେ ।

ଏହି ପଦବୀଗୁଡିକ ମଧ୍ୟରୁ ଏକ ତୃତୀୟାଂଶ ମହିଳାମାନଙ୍କ ପାଇଁ ସରଂକ୍ଷିତ ରହିବ ।

ଏହି ୟୁନିଟ ଗୁଡିକ ମହିଳାମାନଙ୍କ ବିରୋଧରେ ହେଉଥିବା ଅପରାଧର ତଦନ୍ତ କରିବା ସହିତ ଏହାକୁ ରୋକିବା ପାଇଁ ଆଗକୁ ପଦକ୍ଷେପ ନେବା, ଗୁଇନ୍ଦା ତଥ୍ୟ ସଂଗ୍ରହ କରିବା, ସଂଗଠିତ ଅପରାଧକୁ ରୋକିବା, ଆଇନଗତ ବ୍ୟବସ୍ଥାର କାର୍ଯ୍ୟକାରୀତାର ତଦାରଖ କରିବା ସଚେତନତା ସୃଷ୍ଟି ଦିଗରେ କାର୍ଯ୍ୟକରିବ ।

ଓଡିଶା ଡ଼ଟ୍ କମ୍

ଓଡିଶା ଡ଼ଟ୍ କମ୍ ସମ୍ବାଦଦାତା

ରାଉରକେଲା , ୨୦ ଜୁନ(ଓଡିଶା ଡ଼ଟ୍ କମ୍): ଦୀପିକା ମହିଳା ସଙ୍ଘତିର ଅଧ୍ୟକ୍ଷା ଶ୍ରୀମତୀ ମଞ୍ଜରୀ ପ୍ରସାଦ ଇନ୍ଦିରା ଗାନ୍ଧି ପାର୍କ ଠାରେ “ବାଳ କ୍ରିଡାସ୍ଥଳ” ର ଶୁଭ ଉଦ୍ଘାଟନ କରିଛନ୍ତି। ଏହି ସଙ୍ଘତି ଦ୍ଵାରା ବିଭିନ୍ନ ଖେଳ ଉପକରଣ ଇନ୍ଦିରା ଗାନ୍ଧି ପାର୍କରେ ସ୍ଥାପିତ କରାଯିଛି।

ଏଠାରେ ସୂଚନାଯୋଗ୍ୟ ଯେ, ସ୍ଥାପିତ ନୂତନ ଖେଳ ଉପକରଣ ଗୁଡିକ ୪ ରୁ ୧୪ ବର୍ଷ ବୟସ ବର୍ଗର ପିଲାମାନଙ୍କ ପାଇଁ ଉଦ୍ଦିଷ୍ଟ ଅଟେ ଓ ଏହି କ୍ରିଡା ସାମଗ୍ରୀ ଗୁଡିକ ପିଲାମାନଙ୍କ ପାଇଁ ଆକର୍ଷଣର କେନ୍ଦ୍ର ବିନ୍ଦୁ ହେବ ବୋଲି ସଙ୍ଘତି ଆଶା ପ୍ରକଟ କରିଛି।

ସୁରକ୍ଷାକୁ ଦୃଷ୍ଟିରେ ରଖି ଉକ୍ତ ଖେଳ ଉପକରଣ ଗୁଡିକରେ ବ୍ୟାରିକେଡର ବ୍ୟବସ୍ଥା କରାଯାଇଛି । ଟାଉନ ଇଞ୍ଜିନିୟରିଂ ସିଭିଲ ବିଭାଗ ଉକ୍ତ ଅଞ୍ଚଳରେ ଡିଜାଇନ ଗ୍ରୀଲ ଲଗାଇବା ସହିତ ଦୁଇଟି ଗେଟ ଏବଂ ବସିବା ପାଇଁ ବ୍ୟବସ୍ଥା ଗ୍ରହଣ ପୂର୍ବକ ତାଙ୍କର ସହଯୋଗ ଦେଇଛନ୍ତି ।

ନୂତନ ଖେଳ ଉପକରଣ ମଧ୍ୟରେ ସାମିଲ ରହିଛି ଲୁପ ରଙ୍ଗ, ରୋଲର ସ୍ଲାଇଡ, ଷ୍ଟାଣ୍ଡାର୍ଡ ସି-ସି, ଏମଜିଆର ପ୍ଲାଟଫର୍ମ, ସର୍କୁଲାର ସ୍ଵିଙ୍ଗ, କ୍ରିଷ୍ଟାଲ ମେଜ ଏବଂ ଡବଲ ଆର୍କ ସ୍ଵିଙ୍ଗ ଆଦି ରହିଥିବା ସଙ୍ଘତି ପକ୍ଷରୁ ସୂଚନା ପ୍ରଦାନ କରାଯାଇଛି।

ଏହି ଉଦ୍ଘାଟନୀ ଉତ୍ସବରେ ଆରଏସପି ର ସିଇଓ ଶ୍ରୀ ଜି ଏସ ପ୍ରସାଦ, ଏମଏମ ବିଭାଗର ଇଡ଼ି ଶ୍ରୀ ଉମେଶ କୁମାର, ପ୍ରକଳ୍ପ ବିଭାଗର ଇଡ଼ି ଶ୍ରୀ ଏମ କେ ଦାସ ଏବଂ ଶ୍ରୀ ଏସ କେ ଆଚାର୍ଯ୍ୟ, କାର୍ଯ୍ୟ ବିଭାଗର ଇଡ଼ି ଶ୍ରୀ ଅଶ୍ଵିନୀ କୁମାର, ଅର୍ଥ ବିଭାଗର ଜି ଏମ ଶ୍ରୀ ସୀତାରାମ ପ୍ରଧାନ, କାର୍ମିକ ଓ ପ୍ରଶାସନ ବିଭାଗର ଜିଏମ ଇନ ଚାର୍ଜ ଶ୍ରୀ ପି କେ ପ୍ରଧାନ, ସହର ସେବା ବିଭାଗର ଜିଏମ ଶ୍ରୀ ରେହମାନ ଖାନ, ସଙ୍ଘତିର ଉପାଧ୍ୟକ୍ଷା ଶ୍ରୀମତୀ ଶର୍ମିଷ୍ଠା ଦାସ, ଶ୍ରୀମଟି ଜ୍ୟୋତ୍ସ୍ନା ଆଚାର୍ଯ୍ୟ, ଶ୍ରୀମତୀ ସବିତା କୁମାର ତଥା କାରଖାନାର ଅନ୍ୟ ବହୁ ବରିଷ୍ଠ ଅଧିକାରୀ ଓ ସଙ୍ଘତିର କର୍ମକର୍ତ୍ତା ଉପସ୍ଥିତ ଥିଲେ ।

ଓଡିଶା ଡ଼ଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତ

ସମ୍ବଲପୁର,ଜୁନ ୪ (ଓଡିଶା ଡଟ୍ କମ୍): ସମ୍ବଲପୁର ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଜଣେ ଅବସରପ୍ରାପ୍ତ ପ୍ରଫେସରଙ୍କ ଠାରୁ ନିର୍ବିକାର ଭାବେ କୌଣସି ଅନୁସନ୍ଧାନ ନକରି ଆଜିକୁ ୮/୯ ବର୍ଷ ହେଲା ତାଙ୍କ ଅବସରକାଳୀନ ଭତ୍ତାରୁ ଲକ୍ଷାଧିକ ଟଙ୍କା ରଖିଛନ୍ତି ।

ତାଙ୍କ ଟଙ୍କା ଫେରାଇବା ପାଇଁ ସେ ସଂଖ୍ୟାଧିକ ପତ୍ର କୁଳପତି, କୁଳ ସଚିବ ଏପରିକି କୁଳାଧିପତିଙ୍କୁ ଲେଖିଥିଲେ ବି ତାର କିଛି ଫଳ ହୋଇନାହିଁ । ଗତ ୨୦୦୬ ମସିହାରୁ ସେ ଅବସର ନେଇଥିଲେ ହେଁ ତାଙ୍କ ପ୍ରାପ୍ୟ ବାବଦ ଟ.୧,୩୫,୫୦୦ ଟଙ୍କା ଏପର୍ଯ୍ୟନ୍ତ ଫେରି ପାଇନାହାନ୍ତି ।

ସମ୍ବଲପୁର ବିଶ୍ୱବିଦ୍ୟାଳୟ ଉପାଧ୍ୟୁତ୍ତର ଓଡିଆ ବିଭାଗର ଅବସରପ୍ରାପ୍ତ ପ୍ରଫେସର ଆଦିକନ୍ଦ ସାହୁ ବିଭାଗୀୟ ମୁଖ୍ୟ ଥିଲା ବେଳେ ବିଶ୍ୱବିଦ୍ୟାଳୟ ଅନୁଦାନ ଆୟୋଗ ବିଭାଗର ମୁ୍ୟଜିୟମ୍‍ ପାଇଁ ମଞ୍ଜୁର କରିଥିବା ଟ.୫୦,୦୦୦,୦୦ ବିଭାଗୀୟ ମୁଖ୍ୟ ଭାବେ ଗ୍ରହଣ କରିଥିଲେ ।

ବିଶ୍ୱବିଦ୍ୟାଳୟକୁ ବାରମ୍ବାର ଲେଖି ଲେଖି ପ୍ରଶାସନିକ ଅନୁମତି ନମିଳିବା କାରଣରୁ ସେ ଟଙ୍କା ଖର୍ଚ୍ଚ ନ ହୋଇ ବିଭାଗର ଏକାଉଣ୍ଟ ନଂ ୧୪୪ ୟୁକୋ ବ୍ୟାଙ୍କ କଟାପାଲି ଶାଖାରେ ଜମା ହୋଇରହିଛି ।

ବିଭାଗର କାର୍ଯ୍ୟାଳୟ ମଧ୍ୟ ବିଶ୍ୱବିଦ୍ୟାଳୟ ଅଧୀନର । କୌଣସି ଅନୁସନ୍ଧାନ ନକରି ବିଶ୍ୱବିଦ୍ୟାଳୟ ତାଙ୍କ ଅବସରକାଳୀନ ଭତ୍ତାରୁ ୫୦ ହଜାର ଓ ସୁଧ ବାବଦକୁ ୮୫ ହଜାର ୫ ଶହ ଟଙ୍କା ଗତ ୨୦୦୬ ମସିହାରୁ କାଟି ରଖିଛନ୍ତି ଯେ, ଯେତେ ଚିଠି ଲେଖିଲେ ବି କେହି କିଛି ଶୁଣୁନାହାନ୍ତି ବରଂ କିଛି ମାନସିକ ନିର୍ଯ୍ୟାତନା ପାଇଲା ଭଳି ବ୍ୟବହାର ସମ୍ପୃକ୍ତ କର୍ତ୍ତୃପକ୍ଷଙ୍କ ଠାରୁ ତାଙ୍କୁ ମିଳିଛି ।

ଏ ସଂକ୍ରାନ୍ତରେ ପ୍ରଫେସର ସାହୁ କୁଳପତି, କୁଳାଧିପତି, କୁଳସଚିବଙ୍କୁ ବାରମ୍ବାର ଜଣାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ ।

ପ୍ରଫେସର ସାହୁ ଓଡିଶାର ଜଣେ ନାମଜାଦା ଲେଖକ । ବାରମ୍ବାର ଚିଠି ଲେଖି ନୟାନ୍ତ ପ୍ରଫେସର ସାହୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ଦ୍ୱାରା ଅମାନବୀୟ ନିର୍ଯ୍ୟାତନାର ଶିକାର ହୋଇଛନ୍ତି ବୋଲି ଅଭିଯୋଗ କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ କମ ସମ୍ବାଦଦାତା

ଭୁବନେଶ୍ଵର,ମଇ ୨୭ (ଓଡିଶା ଡଟ କମ): ସୋମବାର ମଧ୍ୟରାତ୍ରିରେ ଦିଲ୍ଲୀ ପ୍ରାଣୀ ଉଦ୍ୟାନରୁ ନନ୍ଦନକାନନକୁ ଆସିଥିବା ପାଞ୍ଚ ମଣିପୁରୀ ହରିଣଙ୍କ ମଧ୍ୟରୁ ଗୋଟେ ମାଈ ମଣିପୁରୀ ହରିଣର ମୃତ୍ୟୁ ଘଟିଛି।

ନନ୍ଦନକାନନର ପ୍ରାଣୀ ଚିକିତ୍ସକ ଅଧିକାରୀଙ୍କ ଠାରୁ ମିଳିଥିବା ତଥ୍ୟନୁସାରେ ମଣିପୁରୀ ହରିଣଟି ପ୍ରାଣୀ ଉଦ୍ୟାନରେ ପହଞ୍ଚିବା ପରେ ଅଚେତ ହୋଇପଡି ରହିଥିଲା। ସଙ୍ଗେ ସଙ୍ଗେ ତାର ଚିକିତ୍ସା କରାଯାଇଥିଲେ ମଧ୍ୟ କିଛି ସମୟ ପରେ ତା’ର ମୃତ୍ୟୁ ଘଟିଥିଲା।

ସୂଚନା ଯୋଗ୍ୟଯେ, ଗତ ସୋମବାର ମଧ୍ୟରାତ୍ରିରେ ନନ୍ଦନକାନନର ଏକ ସ୍ଵତନ୍ତ୍ର ଟିମ ଦ୍ଵାରା ପ୍ରାଣୀ ଉଦ୍ୟାନ କୁ ଦୁଇ ଗୟଳ ପଞ୍ଜାବ ଚଣ୍ଡିଗଡର ଛତବିର ଚିଡିଆଖାନାରୁ ଚାରୋଟି ପାଣିଗୋଧି, ଚାରୋଟି ଚଉଶିଙ୍ଗା ହରିଣ ଓ ଚାରୋଟି ଗେଣ୍ଡାଳିଆଙ୍କ ପ୍ରତିବଦଳରେ ଏବଂ ପାଞ୍ଚ ମଣିପୁରୀ ହରିଣ ଦିଲ୍ଲୀ ପ୍ରାଣୀ ଉଦ୍ୟାନରୁ ଚାରୋଟି ପାଣିଗୋଧି ଓ ଚାରୋଟି ଚଉଶିଙ୍ଗା ହରିଣ ଙ୍କ ବଦଳରେ ଅଣାଯାଇଥିଲା ।

ମଣିପୁରୀ ହରିଣର ମୃତ୍ୟୁ ପରେ ବର୍ତ୍ତମାନ ନନ୍ଦନକାନନରେ ଗୋଟେ ପୁରୁଷ ଗୟଳ ଓ ଗୋଟେ ମାଈ ଏବଂ ଦୁଇଟି ମାଈ ଓ ଦୁଇଟି ପୁରୁଷ ମଣିପୁରୀ ହରିଣ ଅଛନ୍ତି ।

ଓଡିଶା ଡଟ କମ