ପ୍ରବାସୀ ଓଡିଆ

ଦୁବାଇ , ଭୁବନେଶ୍ୱର, ୧୪ ମଇ (ଓଡିଶା ଡଟ କମ) – ୟୁଏଇ ଗସ୍ତରେ ଥିବା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉପସାଗରୀୟ ଦେଶ ସମୂହ (ଜିସିସି) କୁ ଓଡିଶାର କୃଷିଜାତ ପଦାର୍ଥ ସହ ଯୋଡିବା ପାଇଁ ଏହି ରାଷ୍ଟ୍ର ସମୂହରେ କାମ କରୁଥିବା ଖାଦ୍ୟ ପ୍ରକ୍ରିୟାକରଣ, କୋଲ୍ଡ ଚେନ ପ୍ରଦାନକାରୀ ଖାଦ୍ୟ ବିତରଣ କମ୍ପାନୀ ତଥା ଖାଦ୍ୟ ଓ ଗ୍ରୋସରୀ ଖୁଚୁରା ବ୍ୟବସାୟ ଚଳାଉଥିବା ଶିଳ୍ପପତି ମାନଙ୍କର ବୈଠକରେ ଆହ୍ୱାନ କରିଛନ୍ତିା

ଏହି ବଡ ଶିଳ୍ପପତି ମାନଙ୍କୁ ଉଦବୋଧନ ଦେଇ ଶ୍ରୀ ପ୍ରଧାନ କହିଛନ୍ତି ଯେ ଉପସାଗରୀୟ ଦେଶ ଗୁଡିକରୁ ଭାରତ ଏହାର ପେଟ୍ରୋଲଜାତ ଦ୍ରବ୍ୟର ୬୦ ଭାଗ କ୍ରୟ କରୁଛି । ମାତ୍ର ଏହି ରାଷ୍ଟ୍ର ଗୁଡିକର ଖାଦ୍ୟ ଆବଶ୍ୟକତାର ମାତ୍ର ୧୮ ପ୍ରତିଶତ ଭାରତରୁ ଆସୁଛି ।

ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଉପସାଗରୀୟ ଦେଶ ମାନଙ୍କର ନେତୃତ୍ୱ ମଧ୍ୟରେ ଏହି ରାଷ୍ଟ୍ର ସମୂହ ଭାରତକୁ ଶକ୍ତି ସୁରକ୍ଷା ଓ ଭାରତ ଏହି ଦେଶ ଗୁଡିକୁ ଖାଦ୍ୟ ସୁରକ୍ଷା ଯୋଗାଇ ଦେବା ପାଇଁ ଦୃଢ ଇଚ୍ଛାଶକ୍ତି ବ୍ୟକ୍ତ କରିଛନ୍ତି ।

ସାରା ଭାରତ ଏହି ଯୋଜନାରେ ଲାଭବାନ ହେବାର ସୁଯୋଗ ଥିବା ବେଳେ ଏଥି ପାଇଁ ଅନେକ ସମ୍ଭାବନା ଥିବା ଓଡିଶା ଭଳି ରାଜ୍ୟ ଏହି ପ୍ରକ୍ରିୟାରେ ଭଲ ଭାବେ ଯୋଡି ହେବା ପାଇଁ ଶିଳ୍ପପତି ମାନଙ୍କୁ ଶ୍ରୀ ପ୍ରଧାନ ଆହ୍ୱାନ ଜଣାଇଛନ୍ତି ।

ଓଡିଶାରୁ ଅତି ନଗଣ୍ୟ ବା ଆଦୌ ଖାଦ୍ୟ ସାମଗ୍ରୀ ଆସୁ ନ ଥିବା ନେଇ ଚିନ୍ତା ବ୍ୟକ୍ତ କରିବା ସହ ଓଡିଶାରେ ଦେଶର ଅନ୍ୟ ଭାଗ ତୁଳନାରେ ତୁଳନାତ୍ମକ ଭାବେ ଭିତିଭୂମି ଓ କୃଷି ଉତ୍ପାଦର ଅଧିକ ସୁବିଧା ରହିଛି ବୋଲି ଶ୍ରୀ ପ୍ରଧାନ ଏହି ନିବେଶକ ସମୂହ ଆଗରେ ପ୍ରକାଶ କରିଛନ୍ତି ।

ଶ୍ରୀ ପ୍ରଧାନ କହିଛନ୍ତି ଯେ ଜିସିସିକୁ ସିଧା ଯୋଡୁଥିବା ଏୟାରପୋର୍ଟ, ପାରାଦୀପ ବନ୍ଦର ଭଳି ଦେଶର ଦୁଇ ନମ୍ବର ସ୍ଥାନରେ ଥିବା ବନ୍ଦର ରହିଛି ଓ ଏହି ବନ୍ଦରରେ ଶୁଦ୍ଧ କଂଟେନର ପରିଚାଳନା ବ୍ୟବସ୍ଥା ଉପସାଗରୀୟ ରାଷ୍ଟ୍ର ଗୁଡିକ ପାଇଁ ଖାଦ୍ୟ ପ୍ରକ୍ରିୟାକରଣର ପେଣ୍ଠ ସ୍ଥଳୀ ହୋଇ ପାରିବ ବୋଲି ଶ୍ରୀ ପ୍ରଧାନ କହିଛନ୍ତି ।

ଓଡିଶାର ଭିନ୍ନ ଜଳବାୟୁର ଅଂଚଳ, ବିସ୍ତୃତ ଜଙ୍ଗଲ ଅଂଚଳ, ମଧୁର ଜଳ ଉପଲବ୍ଧତା, ଦକ୍ଷ ମାନବ ସମ୍ବଳ, ବିଶେଷ ଭାବରେ ପ୍ରଚୁର ଜୈବ କୃଷି ଉତ୍ପାଦନର ସମ୍ଭାବନା ତଥା ନିଆରା ଓଡିଆ ଖାଦ୍ୟ ସାମଗ୍ରୀ ସମ୍ପୂର୍ଣ ଉପସାଗରୀୟ ଦେଶରେ ବିପଣନର ବ୍ୟାପକ ସମ୍ଭାବନା ତିଆରି କରୁଛି । ଓଡିଶାର ସମ୍ଭାବନାକୁ ଦେଖି ରାଜ୍ୟର ସମ୍ପୂର୍ଣ ଖାଦ୍ୟ ପ୍ରକ୍ରିୟାକରଣର ଭ୍ୟାଲ୍ୟୁ ଚେନରେ ପୁଂଜିନିବେଶ କରିବା ପାଇଁ ସେ ଆହ୍ୱାନ ଜଣାଇଥିଲେ ।

ଓଡିଶା ଜଙ୍ଗଲର ପତ୍ରଖିଆ ଛେଳି ବିଶେଷ ଭାବରେ ମୟୁରଭଂଜର ଛେଳିକୁ ନ୍ୟୁଜିଲ୍ୟାଣ୍ଡ ମେଣ୍ଢା ଭଳି ଲୋକପ୍ରିୟ କରା ଯାଇ ପାରିବ । କଳାହାଣ୍ଡିର ସୁବାସିତ ଚାଉଳ, ଚିଲିକାର ସାମୁଦ୍ରିକ ଉତ୍ପାଦ, ଉପ ସାଗରୀୟ ରାଷ୍ଟ୍ରରେ ବହୁଳ ଭାବେ ଆଦୃତ ହୋଇ ପାରିବ ବୋଲି ସେ କହିଛନ୍ତି । ଆମ୍ବ, ବିଭିନ୍ନ କିସମର ଫୁଲ, ବିଭିନ୍ନ ପରିପରିବା ଯେପରି ପୋଟଳ, ସଜନା ଛୁଇଁ, ପଣସ, କନ୍ଦମୂଳ, ବାଇଗଣ ଆଦି ଓଡିଶାର କୃଷି ଉତ୍ପାଦ ସମ୍ବନ୍ଧରେ ସେ ସୂଚନା
ଦେଇଥିଲେ ।

ଓଡିଶାର କିଆଫୁଲ, କନ୍ଧମାଳର ହଳଦି, କୋରାପୁଟର ଅଦା ବିଷୟରେ ସୂଚନା ଦେବା ସହ କୋରାପୁଟ, କନ୍ଧମାଳ ଓ ଦେବଗଡ ଆଦି ଜିଲ୍ଲାରେ ଜୈବିକ କୃଷିରେ ସିଧା ସିଧା ସାମିଲ ହେବାର ସମ୍ଭାବନା ଉପରେ ଶ୍ରୀ ପ୍ରଧାନ ସୂଚନା ଦେଇଥିଲେ ।

ଏହି ଅବସରରେ ଶ୍ରୀ ପ୍ରଧାନ ଭାରତ ସରକାରଙ୍କ ତରଫରୁ ଓଡିଶାରେ ଆସନ୍ତା ଜୁନ ମାସରେ ଅନୁଷ୍ଠିତ ହେଉଥିବା କୃଷି କନକ୍ଲେଭ ତଥା ନଭେମ୍ବର ମାସରେ ମେକ ଇନ ଓଡିଶା କନକ୍ଲେଭରେ ଯୋଗ ଦେବା ପାଇଁ ନିମନ୍ତ୍ରଣ ଦେଇଥିଲେ ।

ଏହି ବୈଠକରେ ସଫଲର ଅନ୍ତରାଷ୍ଟ୍ରୀୟ ବିପଣନ ମୁଖ୍ୟ ପ୍ରଦୀପ୍ତ କୁମାର ସାହୁ ତଥା ଡିଲୋଆଇଟ ମୁମ୍ବାଇର ଦେବାଶୀଷ ମିଶ୍ର ଓଡିଶାରେ କୃଷି ଓ କୃଷି ପ୍ରକ୍ରିୟାକରଣରେ ଥିବା ସମ୍ଭାବନା ସମ୍ପର୍କରେ ପାବାର ପଏଂଟ ପ୍ରେଜେଂଟେସନ ମାଧ୍ୟମରେ ଶିଳ୍ପପତି ମାନଙ୍କୁ ବୁଝାଇଥିଲେ ।

 

 

ଓଡିଶା ଡଟକମ ସଂବାଦ ଦାତା

ଦୁବାଇ, ଜାନୁଆରୀ ୨୧ (ଓଡିଶା ଡଟ କମ) ଦୁବାଇ ଠାରେ ପଶ୍ଚିମ ଓଡିଶାର କୃଷି ଭିତ୍ତିକ ଗଣ ପର୍ବ ପୁଷପୁନି ବ୍ୟାପକ ଜାକ ଜମକରେ ଶୁକ୍ରବାର ପାଳନ କରିଛନ୍ତି ସେଠାରେ ରହୁଥିବା ପ୍ରବାସୀ ଓଡିଆ।

ଏଆଇ ବର୍ଷା ପଣ୍ଡ ପାର୍କରେ ଅନୁଷ୍ଠିତ ଏହି ଗୋଟିଏ ଦିନ ବ୍ୟାପି କାର୍ଯ୍ୟକ୍ରମରେ ଭାଗ ନେଇଥିବା ବ୍ୟକ୍ତି ଓ ପରିବାରର ସଦସ୍ୟ ମାନେ ସମ୍ବଲପୁରୀ ବସ୍ତ୍ର ପରିଧାନ କରିଥିଲେ ଓ ପଶ୍ଚିମ ଓଡିଶାର ଲୋକପ୍ରିୟ ପାରମ୍ପରିକ ଖାଦ୍ଯ ଯଥା ମାଂସ ତରକାରୀ ଓ ଆମ୍ବିଳ ସମସ୍ତଙ୍କୁ ପରସା ଯାଇଥିଲା ।

ସମ୍ବଲପୁରୀ ଗୀତ ଓ ନୃତ୍ୟବାଦ୍ୟର ତାଳେ ତାଳେ ଦର୍ଶକ ଝୁମିଉଠିଥିଲେ । ଚଳିତ ବର୍ଷ କାର୍ଯ୍ୟକ୍ରମର ମୁଖ୍ୟ ଆକର୍ଷଣ ଥିଲେ ବିଶ୍ଵ ଦୃଷ୍ଟିହୀନ କ୍ରିକେଟ ପରିଷଦ ଓ ଜାତୀୟ ଦୃଷ୍ଟିହୀନ କ୍ରିକେଟ ଦଳର କର୍ମ କର୍ତ୍ତା ମାନେ।

ଏହି ଅବସରରେ ବରଗଡର ପଙ୍କଜ ଭୁଏ ଓ ଭୁବନେଶ୍ବରର ମହମ୍ମଦ ଜଫର ଇକବଳ ଜାତୀୟ ଦୃଷ୍ଟିହୀନ କ୍ରିକେଟ ଦଳର ସଦସ୍ୟ ଭାବେ କ୍ରିକେଟ ଖେଳି ଖ୍ଯାତି ଅର୍ଜନ କରିଥିବାରୁ ସେମାନକୁ ସମ୍ମାନିତ କରା ଯାଇଥିଲା।

ଉଭୟ ଏହି କାର୍ଯ୍ୟକ୍ରମରେ ସ୍ଵତନ୍ତ୍ର ଅତିଥି ଭାବେ ଯୋଗଦାନ କରିଥିଲେ। ଏଠାରେ ଉଲ୍ଲେଖଯୋଗ୍ୟଯେ ପଶ୍ଚିମ ଓଡିଶା ପରିବାର ଦୁବାଇ ତରଫରୁ ୨୦୧୬ରେ ଆୟୋଜିତ ନୂଆଖାଇ ଭେଟ ଘାଟ କାର୍ଯ୍ୟକ୍ରମରେ ଲୋକପ୍ରିୟ ରଙ୍ଗବତୀ ଗୀତର ଗାୟକ ଜିତେନ୍ଦ୍ରିୟ ହରିପାଳଙ୍କୁ ଓ ୨୦୧୭ ପୁଷପୁନି କାର୍ଯ୍ୟକ୍ରମରେ ପଦ୍ମଶ୍ରୀ ହଳଧର ନାଗଙ୍କୁ ସମ୍ମାନିତ କରା ଯାଇଥିଲା।

ପଶ୍ଚିମ ଓଡିଶା ପରିବାର ଦୁବାଇ ନିୟମିତ ଭାବରେ ପଶ୍ଚିମ ଓଡିଶାର କଳା ଓ ସଂସ୍କୃତିର ପ୍ରଚାର ପ୍ରସାର ପାଇଁ ବିଭିନ୍ନ ସମୟରେ କାର୍ଯ୍ୟକ୍ରମ ମାନ ଆୟୋଜନ କରି ଆସୁଛନ୍ତି।

ଓଡିଶା ଡଟ କମ

ମୁମ୍ବାଇ, ସେପ୍ଟେମ୍ବର ୩୦ (ଓଡିଶା ଡଟ କମ ) ପଶ୍ଚିମ ଓଡିଶା ପରିବାର –ମୁମ୍ବାଇ ଦ୍ଵାରା ଏକାଦଶ “ନୂଆଖାଇ ଭେଟଘାଟ -୨୦୧୭” ସେପ୍ଟେମ୍ବର ୨୪ ରବିବାର ସ୍ଵତନ୍ତ୍ରବୀର ସଭରକର ସଭାଗାର, ଦାଦର, ମୁମ୍ବାଇ ଠାରେ ଆୟୋଜିତ କରଯାଇଥିଲା।

ଏଥିରେ ମୁମ୍ବାଇରେ ଅବସ୍ଥାପିତ ପଶ୍ଚିମ ଓଡିଶାର ଅଧିବାସୀଗଣ ବହୁ ଉତ୍ସାହ ସହ ଅଂଶଗ୍ରହଣ କରିଥିଲେ।

ମହାରାଷ୍ଟ୍ର ସରକାରଙ୍କ ଶକ୍ତି ସଚିବ ଶ୍ରୀଯୁକ୍ତ ଅରବିନ୍ଦ ସିଂ, ଆଇଏସ ଏଥିରେ ମୁଖ୍ୟ ଅତିଥି ଭାବରେ ଯୋଗଦାନ କରିଥିଲେ । ଇତ୍ୟାବସରେ ଶ୍ରୀଯୁକ୍ତ ଅରବିନ୍ଦ ସିଂ ଓ ଅନ୍ୟ ଅତିଥିଗଣ ସ୍ମରଣିକା “ଜୁହାର” ର ସପ୍ତମ ସଂସ୍କରଣର ଅନାବରଣ କରିଥିଲେ।

ବଲିଉଡ ଓ ଟିଭି ଜଗତର ବରିଷ୍ଠ କଳାକାର, ଶ୍ରୀ ସତୀଶ ଶାହ ଉତ୍ସବର ବିଶେଷ ଅତିଥି ଭାବରେ ଯୋଗଦାନ କରି ପଶ୍ଚିମ ଓଡିଶା ଫାଉଣ୍ଡେସନ ତରଫରୁ ପଦ୍ମଶ୍ରୀ ଡା: ଜିତେନ୍ଦ୍ର ହରିପାଲଙ୍କୁ ସାଲ ଓ ମୋମେଣ୍ଟୋପ୍ରଦାନ ପୂର୍ବକ ସମ୍ମାନିତ କରିଥିଲେ। ସେ ମଧ୍ୟ ସମ୍ବଲପୁରୀ ସଙ୍ଗୀତର ତାଳେ ତାଳେ ନାଚି, ଉପସ୍ଥିତ ଦର୍ଶକଙ୍କର ମନୋରଞ୍ଜନ କରିଥିଲେ।

ଅନେକ ବଲିଉଡ ସିନେମାର ସେଲେବ୍ରିଟି ଖଳନାୟକ ଶ୍ରୀ ଆଶୀଷ ବିଦ୍ୟାର୍ଥୀ ଉତ୍ସବରେ ଯୋଗଦାନକରି ସମ୍ବଲପୁରୀ ସଂସ୍କୃତିର ପ୍ରଚାର ପ୍ରସାର ନିମିତ୍ତ ଆୟୋଜକ ମାନଙ୍କର ପ୍ରୟାସକୁ ପ୍ରସଂଶା କରିଥିଲେ। ଦର୍ଶକମାନଙ୍କ ଅନୁରୋଧରେ ସେ ମଧ୍ୟ ସମ୍ବଲପୁରୀ ସଙ୍ଗୀତର ତାଳେ ତାଳେ ନାଚି ଉଠିଥିଲେ।

ସେଲେବ୍ରିଟି ଟିଭି ତାରକା ସୋନଲିକା ଯୋଶୀ ଓ ଲୋକପ୍ରିୟ ଟିଭି ଧାରାବାହିକ “ତାରକ ମେହେତାକା ଉଲ୍ଟା ଚଷମା” ର ଦିଶା ବକାନି ମଧ୍ୟ ଏହି ଅବସରର ଯୋଗଦାନ କରି ସଭିଙ୍କୁ ନୂଆଖାଇର ଶୁଭକାମନା ଜଣାଇଥିଲେ।

ସମସ୍ତ ଅତିଥିଙ୍କୁ ଆୟୋଜକ ମାନଙ୍କ ତରଫରୁ ସମ୍ବଲପୁରୀ ବସ୍ତ୍ର ଓ ମୋମେଣ୍ଟୋ ପ୍ରଦାନ କରି ସମ୍ମାନିତ କରାଯାଇଥିଲା।

ସମ୍ବଲପୁରର ଲୋକନୃତ୍ୟ ମଣ୍ଡଳୀ “ରଙ୍ଗ ଫରୁଆ” ଲୋକପ୍ରିୟ ସମ୍ବଲପୁରୀ ସଙ୍ଗୀତ ଓ ନୃତ୍ୟ ପରିବେଷଣ କରି ଉପସ୍ଥିତ ଦର୍ଶକଙ୍କ ମନୋରଞ୍ଜନ କରିଥିଲେ। ପଦ୍ମଶ୍ରୀ ଡା: ଜିତେନ୍ଦ୍ର ହରିପାଲଙ୍କ ସଙ୍ଗୀତ ରଙ୍ଗବତୀର ତାଳେ ନାଚି ନାଚି ଦର୍ଶକ ମତୁଆଲା ହୋଇଉଠିଥିଲେ।

ଆୟୋଜନ କମିଟିର ବରିଷ୍ଠ ସଦସ୍ୟ ଶ୍ରୀ ପ୍ରଦୀପ ପଣ୍ଡା “ରଙ୍ଗ ଫରୁଆ” ମଣ୍ଡଳୀକୁ ମୋମେଣ୍ଟୋ ପ୍ରଦାନ କରି ସମ୍ମାନିତ କରିଥିଲେ।

ଆୟୋଜନ କମିଟି ମେଧାବୀ ତଥା ଖେଳକୁଦ ଓ କଳା କ୍ଷେତ୍ରରେ ଉତ୍ତମ ପ୍ରଦର୍ଶନ କରିଥିବା ଛାତ୍ରଛାତ୍ରୀ ମାନଙ୍କୁ ପ୍ରୋତ୍ସାହିତ କରିଥିଲେ। ଏହି ଅବସରରେ ସମ୍ବଲପୁରୀ ବସ୍ତ୍ର ପ୍ରତିଯୋଗିତା ଅନୁଷ୍ଠିତ ହୋଇଥିଲା।

ସମ୍ବଲପୁରୀ କପଡାକୁ ନେଇ ଡିଜାଇନର ବସ୍ତ୍ର ପ୍ରସ୍ତୁତ କରୁଥିବା ଏକ ସମ୍ବଲପୁର ସ୍ଥିତ କମ୍ପାନୀ “Traditional Vougue” ଅନୁକୂଲ୍ୟରେ ସମ୍ବଲପୁରୀ ବସ୍ତ୍ରକୁ ନେଇ ଏକ ଫାଶନ ସୋ ଅନୁଷ୍ଠିତ ହୋଇଥିଲା। ସମସ୍ତ ପ୍ରତିଭାଗୀଙ୍କୁ ଖିରୀ ଓ ମଣ୍ଡାପିଠା ଦ୍ଵାରା ଆପ୍ୟାୟିତ କରାଯାଇଥିଲା।

ଆଯୋଜକମାନଙ୍କ ତରଫରୁ SBI General Life Insurance, National Payment Corporation of India, Tata Motors, IDBI Capital, Traditional Vouge, ବୈଶାଖୀ , Union Bank, Canara Bank, Ferro Tech India, Siddhi Trade matrix, Bank of India ଓ ଓଡିଶା ସରକାରଙ୍କ ସଂସ୍କୃତି ବିଭାଗକୁ କୃତଜ୍ଞତା ଜ୍ଞାପନ କରାଯାଉଛି। ଆଯୋଜକମାନଙ୍କ ତରଫରୁ ଓ ଟିଭି ଓ କଳିଙ୍ଗ ଟିଭିକୁ ଉତ୍ସବର ପ୍ରସାରଣପାଇଁ କୃତଜ୍ଞତା ଜ୍ଞାପନ କରାଯାଉଛି।

ଓଡିଶ ଡଟ କମ

ମୁମ୍ବାଇ : ମୁମ୍ବାଇ ଏବଂ ନବୀ ମୁମ୍ବାଇ ରେ ରହୁଥିବା ପ୍ରବାସୀ ଓଡ଼ିଆ ମାନେ ଗତ ସପ୍ତାହରେ ପଦ୍ମଶ୍ରୀ ସମ୍ମାନ ରେ ବିଭୂଷିତ ବିଶିଷ୍ଟ ଚଳଚିତ୍ର ନାୟକ ଏବଂ ନିର୍ଦେଶକ ସାଧୁ ମେହେରଙ୍କୁ ସମ୍ବର୍ଦ୍ଧନା ଜ୍ଞାପନ କରିଥିଲେ | ଶହେ ରୁ ଅଧିକ ଓଡ଼ିଆ ନବୀ ମୁମ୍ବାଇ ସ୍ଥିତ ଓଡିଶା ଭବନ ରେ ଏକାଠି ହୋଇଥିଲେ |
ଭୂତତ୍ୱ ବିଜ୍ଞାନୀ ରବି ବସ୍ତିଆ ଯେ କି ନିଜେ ଜଣେ ପଦ୍ମଶ୍ରୀ ମେହେରଙ୍କୁ ଉପଢୌକନ ସହ ସମ୍ମାନିତ କରିଥିଲେ | ମେହେର ନିଜର ଚାଳିଶ ବର୍ଷର କାର୍ଯ୍ୟକଲା ଭିତରେ ଅନେକ ହିନ୍ଦୀ ଓ ଓଡ଼ିଆ ଚଳଚିତ୍ର ରେ ଅଭିନୟ କରିଛନ୍ତି |

ସେ ଅଂକୁର ଚଳଚିତ୍ର ପାଇଁ ଶ୍ରେଷ୍ଠ ନାୟକ ଭାବରେ ଜାତୀୟ ପୁରସ୍କାର ଲାଭ କରିଥିଲେ | ମେହେର ନିଜ କାର୍ଯ୍ୟ ଜୀବନ ର କିଛି ଅନୁଭୂତି ବର୍ଣ୍ଣନା କରିଥିଲେ | ଓଡ଼ିଆ ଚଳଚିତ୍ର ଜଗତର ବିକାଶ ଏବଂ ଅଧିକ ଶିଶୁ ଚଳଚିତ୍ର ନିର୍ମାଣ ଉପରେ ସେ ଗୁରୁତ୍ୱ ଆରୋପ କରିଥିଲେ |

ଏଠାରେ ଉଲ୍ଲେଖଯୋଗ୍ୟ ଯେ ମେହେରଙ୍କ ଦ୍ୱାରା ଅଶୀ ଦଶକ ରେ ନିର୍ଦେଶିତ ବାବୁଲା ଶିଶୁ ଚଳଚିତ୍ର ଉଚ୍ଚ ପ୍ରଶଂସିତ ହୋଇଥିଲା | ବିଭୁତି ରଥ, ଡ଼ାଃ ପ୍ରଶାନ୍ତ ମହାନ୍ତି ସଭା ପରିଚାଳନା କରିଥିଲେ |

ପ୍ରଫୁଲ୍ଲ ଦାସ

ଭୁବନେଶ୍ଵର, ନଭେମ୍ବର ୨ (ଓଡିଶା ଡଟ କମ) ଓଡିଆ ସଂସ୍କୃତି ଓ ପରମ୍ପରାକୁ ବଞ୍ଚାଇ ରଖିବା ପାଇଁ କାର୍ଯ୍ୟ କରୁଥିବା ‘ବିଜୟ’ ଏକ ଉଚ୍ଛ୍ଵାସ ଟ୍ରଷ୍ଟ ଭୁବନେଶ୍ବରରେ ତାର ତିନିଦିନ ବ୍ୟାପୀ ଷଷ୍ଠ ବାର୍ଷିକ ମହୋତ୍ସବରେ ନୃତ୍ୟ, ସଙ୍ଗୀତ, ନାଟକ ଏବଂ କର୍କଟ ରୋଗ ସମ୍ପର୍କିତ ଆଲୋଚନା ଚକ୍ରର ଆୟୋଜନ କରି ବିଭିନ୍ନ କ୍ଷେତ୍ରରେ ପାରଦର୍ଶିତା ଲାଭ କରିଥିବା ପ୍ରବାସୀ ଓଡିଆଙ୍କୁ ସମ୍ମାନିତ ଓ ପୁରସ୍କୃତ କରିଛି ।

ଅକ୍ଟୋବର ୨୪ରୁ ଅକ୍ଟୋବର ୨୬ ପର୍ଯ୍ୟନ୍ତ ରବୀନ୍ଦ୍ର ମଣ୍ଡପରେ ଅନୁଷ୍ଠିତ ଏହି ମହୋତ୍ସବରେ ମୁମ୍ବାଇର ଡାକ୍ତର କାନନ ତ୍ରିପାଠୀଙ୍କୁ ପ୍ରବାସୀ ଓଡିଆ ସମ୍ମାନ ପ୍ରଦାନ କର ଯାଇଥିଲା ।

ତ୍ରିପାଠୀ ମୁମ୍ବାଇ ଓଡିଆ ଏସୋସିଆସନର ପ୍ରତିଷ୍ଠାତା ଓ ସଭାପତି ଅଛନ୍ତି।  ଗତ ତିରିଶ ବର୍ଷ ହେଲା ମୁମ୍ବାଇରେ ରହି ଓଡିଆ ସଂସ୍କୃତି ଓ ପରମ୍ପରାକୁ ଓଡିଆ ଓ ଅଣ ଓଡିଆମାନଙ୍କ ମଧ୍ୟରେ ବିସ୍ତାର କରିବାରେ ସେ ମୁଖ୍ୟ ଭୂମିକା ଗ୍ରହଣ କରିଛନ୍ତି।

ଏହି ଅବସରରେ କର୍କଟ ରୋଗ ସମ୍ପର୍କିତ ଆୟୋଜିତ ଏକ ଆଲୋଚନା ଚକ୍ରକୁ ଓଡିଶାର ସ୍ୱାସ୍ଥ୍ୟ ମନ୍ତ୍ରୀ ପ୍ରଦୀପ କୁମାର ଅମାତ ଓ ଭୁବନେଶ୍ବର ଉତ୍ତର ବିଧାୟକ ପ୍ରିୟଦର୍ଶୀ ମିଶ୍ର ପ୍ରଦୀପ ଜାଳି ଉଦଘାଟନ କରିଥିଲେ ।

ପ୍ରଥମ ଥର ପାଇଁ ସାମାଜିକ ସେବା ସମ୍ମାନ ନାମରେ ଚଳିତ ବର୍ଷ ଠାରୁ ଏକ ନୂତନ ପୁରସ୍କାର ଆରମ୍ଭ କରାଯାଇଥିବା ଟ୍ରଷ୍ଟ ତରଫରୁ ଘୋଷଣା କରା ଯାଇଥିଲା। ଏହି ପୁରସ୍କାର ପାଇଥିଲେ ମୁମ୍ବାଇର ପୂର୍ବତନ ପୁଲିସ ମହାନିର୍ଦେଶକ ଅରୂପ ପଟନାୟକ ।

ଟ୍ରଷ୍ଟ ର ଏହି ମହୋତ୍ସବରେ ଓଡିଶା , ସୁଦୂର ମୁମ୍ବାଇ ଏବଂ ଭାରତର ଅନ୍ଯାନ୍ଯ ସ୍ଥାନରୁ ବ୍ୟକ୍ତି ମାନେ ଆସି ଯୋଗ ଦେଇଥିବା ଏହାର ସମ୍ପାଦକ ଅରିନ୍ଦମ ମିଶ୍ର ସୂଚନା ଦେଇଛନ୍ତି।

ଓଡିଶା ଡଟ କମ

ମୁମ୍ବାଇ, ସେପ୍ଟେମ୍ବର ୨୭ (ଓଡିଶା ଡଟ କମ ) ପଶ୍ଚିମ ଓଡିଶା ପରିବାର ମୁମ୍ବାଇ ପକ୍ଷରୁ ମୁମ୍ବାଇରେ ଗତ ରବିବାର ଦାଦର ଠାରେ ଥିବା ସ୍ଵତନ୍ତ୍ର ବୀର ସାବରକର ଅଡିଟୋରିଆମ ଠାରେ ନୂଆଖାଇ ଭେଟ ଘାଟ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ସହ ବ୍ୟାପକ ଜନସମାଗମ ମଧ୍ୟରେ ପାଳନ ହୋଇଛି।

ଏନାର୍ଜୀ ଭିଜିଲାନସ କମିଶନ ମହାରାଷ୍ଟ୍ରର ଅଧକ୍ଷ୍ୟ ପ୍ରଦୀପ ବାଭନିସକର ଓ ତାଙ୍କ ପତ୍ନୀ ଏହି ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ପଞ୍ଚାୟତିରାଜ ମନ୍ତ୍ରାଳୟର ଯୁଗ୍ମ ସଚିବ ସଂଜୀବ ପାଟଯୋଶୀ ଏହି ଉତ୍ସବରେ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ।

ନିଜର ଉଲ୍ଲେଖନୀୟ କାର୍ଯ୍ୟ ପାଇଁ ପ୍ରେସିଡେନଟ ଅଫ ଇଣ୍ଡିଆ ଆୱାର୍ଡ ୨୦୧୬ ପାଇ ପଶ୍ଚିମ ଓଡିଶାକୁ ଗୌରବାନ୍ଵିତ କରିଥିବାରୁ ପାଟଯୋଶୀଙ୍କୁ ସମ୍ମାନିତ କରଯାଇଥିଲା । ଏହି କାର୍ଯ୍ୟକ୍ରମରେ ପଶ୍ଚିମ ଓଡିଶା ର ବିଶିଷ୍ଟ ଚଳଚିତ୍ର ଅଭିନେତା ଓ ନିର୍ଦ୍ଦେଶକ ସାଧୁ ମେହେର ଉଦବୋଧନ ଦେଇଥିଲେ । ମୁମ୍ବାଇ ଠାରେ ନୂଆଖାଇ ଭେଟ ଘାଟ ପାଳନର ଦଶ ବର୍ଷ ପୂର୍ତ୍ତି ଉପଲକ୍ଷେ ଏକ ସ୍ମରଣିକା ଜୁହାର ୨୦୧୬ ଉନ୍ମୋଚିତ କରଯାଇଥିଲା ।

ବଲିଉଡ ଚିତ୍ର ତାରକା ଟାଇଗର ସରଫ ମଧ୍ୟ ଏହି ଉତ୍ସବରେ ଯୋଗ ଦେଇ ନିଜର ବକ୍ତବ୍ୟ ପ୍ରଦାନ କରିଥିଲେ । ଏହି ଉତ୍ସବ ରେ ବଲାଙ୍ଗିର ଜିଲ୍ଲାର ଲୋଇସିଙ୍ଘାରୁ ଆସିଥିବା କଳାକାର ଡାଳଖାଇ, ରସରକେଲି, ଓ ରଙ୍ଗବତୀ ଆଦି ନୃତ୍ୟ ପରିବେଷଣ କରିଥିଲେ ।

ବରିଷ୍ଠ ଭାରତୀୟ ରାଜସ୍ୱ ସେବା ଅଧିକାରୀ ଶ୍ରୀକାନ୍ତ ଚାଟାର୍ଜୀ କଳାକାର ମଣ୍ଡଳୀକୁ ଆକର୍ଷଣୀୟ ନୃତ୍ୟ ପ୍ରଦର୍ଶନ ପାଇଁ ମାନପତ୍ର ପ୍ରଦାନ କରିଥିଲେ । ଏହି ଉତ୍ସବରେ ଶିକ୍ଷା ଓ ଅନ୍ୟ ବିଭାଗରେ ଉଲ୍ଲେଖନୀୟ ପ୍ରଦର୍ଶନ କରିଥିବା ବିଭିନ୍ନ ଛାତ୍ର ଓ ଛାତ୍ରୀଙ୍କୁ ମଧ୍ୟ ପୁରସ୍କାର ପ୍ରଦାନ କରଯାଇଥିଲା

ଓଡିଶା ଡଟ କମ

ଓଡିଶା ଡଟ କମ ସଂବାଦ ଦାତା

ମୁମ୍ବାଇ, ଅଗଷ୍ଟ ୫ (ଓଡିଶା ଡଟ କମ)  ରିଜର୍ଭ୍ ବେଂକର ଅବସରପ୍ରାପ୍ତ ଡେପୁଟି ଗଭର୍ନର୍ ହାରୁନ୍ ରଶିଦ ଖାନ୍ଂକୁ ମୁମ୍ବାଇ ସ୍ଥିତ ଓଡିଆ ସଂଗଠନ ଜଗନ୍ନାଥ କ୍ୟାନସର୍ ଏଡ ଫାଉଣ୍ଡେସନ ଓ ମୁମ୍ବାଇ ରେ ଅବସ୍ଥାପିତ ବିଶିଷ୍ଟ ବ୍ୟାଙ୍କର ମାନଂକ ସହଯୋଗରେ ଭବ୍ୟ ବିଦାୟ ସମ୍ବର୍ଧନା ଜ୍ଞାପନ କରାଯାଇଛି ।

ବସି ଠାରେ ଥିବା ଓଡିଆ ଭବନରେ ପ୍ରାୟ ଦେଢ ଶହ ଓଡିଆ ଏକତ୍ରିତ ହୋଇ ଶ୍ରୀ ଖାନ୍ଂକୁ ଏହି ସମ୍ବର୍ଧନା ଜଣାଇଥିଲେ । ଏହି ଅବସରରେ ଦେନା ବେଂକ୍ ରୁ ଅବସର ନେଇଥିବା ବରିଷ୍ଠ ଅଧିକାରୀ ଗୁରୁପ୍ରସାଦ ମହାନ୍ତି ଓ ତାଂକ ସ୍ତ୍ରୀ ଶ୍ରୀମତୀ ଗାୟତ୍ରୀ ମହାଂତିଂକୁ ମଧ୍ୟ ବିଦାୟ ସମ୍ବର୍ଧନା ଜ୍ଞାପନ କରାଯାଇଥିଲା।

ଏଠାରେ ଉଲ୍ଲେଖନୀୟ ଯେ ହାରୁନ୍ ରଶିଦ ଖାନ୍ ପ୍ରଥମ ଓଡିଆ ଭାବରେ ରିଜର୍ଭ୍ ବେଂକର ଡେପୁଟି ଗଭର୍ନର୍ ପଦ ହାସଲ କରିଥିଲେ ।

ବେଂକ୍ ସେବା କୁ ସର୍ବ ସାଧାରଣ ପାଖରେ ପହଂଚାଇବାକୁ ତାଂକ ଅଧ୍ୟକ୍ଷତା ରେ ଗଠିତ ଖାନ୍ କମିଟି ଅଭିନବ ପ୍ରସ୍ତାବ ମାନ ଦେଇଥିଲେ ।

ତାଙ୍କ ନେତୃତ୍ଵରେ ଅର୍ଥନୈତିକ କ୍ଷେତ୍ରରେ ଅନେକ ସଫଳତା ମିଳି ପାରିଛି ବୋଲି ଶ୍ରୀ ଏ. ପି. ହୋତା, ସି ଇ ଓ , ଏନ.ପି.ସି.ଆଇ ଓ ମୃତ୍ୟୁଞ୍ଜୟ ମହାପାତ୍ର, ବରିଷ୍ଠ ଅଧିକାରୀ, ଷ୍ଟେଟ୍ ବେଂକ୍ ଅଫ ଇଣ୍ଡିଆ ପ୍ରମୁଖ ମତ ବ୍ୟକ୍ତ କରିଥିଲେ।

ଡ. ଏସ. ପଟନାୟକ ଓ ପି.କେ. ମହାଂତି ପ୍ରମୁଖ ନିଜ ନିଜ ମତ ରଖିଥିଲେ ।ବିଖ୍ୟାତ ଅଭିନେତା ପୁପିନ୍ଦର୍ କାର୍ୟକ୍ରମ ପରିଚାଳନା କରିଥିଲେ ।

ଓଡିଶା ଡଟ କମ

ଓଡିଶା ଡଟ କମ ସଂବାଦ ଦାତା

ନୂଆଦିଲ୍ଲୀ ୨୯ ନଭେମ୍ବର (ଓଡିଶା ଡଟ କମ) ଓଡ଼ିଶା ସରକାର ଏବଂ ଗୁଜରାଟ ସରକାରଙ୍କର ସଂସ୍କୃତି ବିଭାଗର ମିଳିତ ସହଯୋଗରେ, ଦିଲ୍ଲୀର ସାଂସ୍କୃତିକ ତଥା ସାମାଜିକ ଅନୁଷ୍ଠାନ “ଓଡ଼ିଆ ପୁଅ” ର ପ୍ରୟାସରେ ପ୍ରଥମ ଥର ପାଇଁ ଦିଲ୍ଲୀରେ ଉପରୋକ୍ତ ଦୁଇ ରାଜ୍ୟ ମଧ୍ୟରେ ଏକ ସଂସ୍କୃତି ବିନିମୟ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି।

କାର୍ତ୍ତିକ ପୂର୍ଣ୍ଣିମା ଦିନ, “ସମନ୍ୱୟ”ଶୀର୍ଷକରେ ନାମିତ ଏହି କାର୍ଯ୍ୟକ୍ରମରେ ଗୁଜରାଟ ସରକାରଙ୍କର ସୌଜନ୍ୟରେ ଆସିଥିବା କଳାକାରମାନଙ୍କର “ଗରବା-ରାସ” ନୃତ୍ୟ ସହିତ ଓଡ଼ିଶା ସରକାରଙ୍କର ସୌଜନ୍ୟରେ ବଲାଙ୍ଗୀରରୁ ଆସିଥିବା ପଶ୍ଚିମ ଓଡ଼ିଶାର ଲୋକନୃତ୍ୟ “ଭାଇ ଜଉନ୍ତିଆ”, “ନଚନିଆଁ”, “ରଙ୍ଗବତୀ” “ସମ୍ବଲପୁରୀ” ଆଦି ନୃତ୍ୟ ଉପସ୍ଥିତ ଦର୍ଶକମାନଙ୍କୁ ଆନନ୍ଦିତ କରିଥିଲା।

ଏହି କାର୍ଯ୍ୟକ୍ରମରେ ଉଭୟ ରାଜ୍ୟର ପ୍ରବାସୀ ଉପସ୍ଥିତ ଥିବା ସହିତ ଅନ୍ୟରାଜ୍ୟର ପ୍ରବାସୀଙ୍କ ଉପସ୍ଥିତି ଦେଖିବାକୁ ମିଳିଥିଲା। “ଓଡ଼ିଆ ପୁଅ”ର “ତ୍ରୟୋଦଶ ବୋଇତ ବନ୍ଦାଣ ଉତ୍ସବ”ର ପ୍ରସ୍ତୁତି – ଏହି “ସମନ୍ୱୟ” କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ କେନ୍ଦ୍ର ତୈଳ ତଥା ପ୍ରାକୃତିକ ବାଷ୍ପ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗ ଦେଇଥିଲେ।

ପ୍ରତ୍ୟେକ ବର୍ଷ ପରି ଚଳିତ ବର୍ଷ ମଧ୍ୟ ଦିଲ୍ଲୀରୁ ପ୍ରକାଶିତ ଇ-ସମ୍ବାଦ ପତ୍ର “ଓଡ଼ିଆ ପୁଅ” ତରଫରୁ “ଓଡ଼ିଆ ପୁଅ ସମ୍ମାନ”ରେ ପ୍ରଶାସନିକ ସେବା ପାଇଁ ଭାରତୀୟ ପ୍ରଶାସନିକ ସେବା ଅଧିକାରୀ ଡ. ଅରବିନ୍ଦ କୁମାର ପାଢ଼ୀ, ଶିଳ୍ପ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ନାଲକୋର ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକ ଶ୍ରୀ ତପନ କୁମାର ଚାନ୍ଦ, ମହାନଦୀ କୋଲଫିଲ୍ଡସ୍ ଲିମିଟେଡ୍ ର କାର୍ମିକ ନିର୍ଦ୍ଦେଶକ ଶ୍ରୀ ପୂର୍ଣ୍ଣଚନ୍ଦ୍ର ପାଣିଗ୍ରାହୀ, ଏବଂ ଭାରତୀୟ ରାଜସ୍ଵ ସେବା ଅଧିକାରୀ ଶୋଭନ କରଙ୍କୁ ସମ୍ମାନୀତ କରାଯାଇଥଲା।

ସେହିପରି “ଓଡ଼ିଆ ପୁଅ ଯୁବ ସମ୍ମାନ”ରେ ଚଳଚିତ୍ର ନିର୍ମାତା ଜିତେନ୍ଦ୍ର ମିଶ୍ର ଏବଂ ସମାଜ ସେବୀ ସଂଗ୍ରାମ ଧରଙ୍କୁ ସମ୍ମାନୀତ କରା ଯାଇଥିଲା। ସମ୍ମାନୀତ ଅତିଥି ଭାବେ ବରିଷ୍ଠ ପ୍ରଶାସକ ଡ. ଅରୁଣ କୁମାର ରଥ ଯୋଗ ଦେଇଥିବା ବେଳେ, “ଓଡ଼ିଆ ପୁଅ” ର ସଂପାଦକ ଶ୍ୟାମସୁନ୍ଦର ସାହୁ ଧନ୍ୟବାଦ ଦେଇଥିଲେ।

ଓଡିଶା ଡଟ କମ