ଓଡ଼ିଶା ଡ଼ଟ୍ କମ୍ ସମ୍ବାଦଦାତା
କଟକ, ମାର୍ଚ୍ଚ ୨୭(ଓଡ଼ିଶା ଡ଼ଟ୍ କମ୍) ଦୀର୍ଘ ୧୨ ବର୍ଷ ପରେ କଟକ ଜିଲ୍ଲାର ଜଣେ ଯୁବକ ଘରକୁ ଫେରିଥିବା ବେଳେ ହଜିଲା ପୁଅକୁ ପାଇ ତାଙ୍କ ପରିବାର ଲୋକେ ଆନନ୍ଦରେ ବିମୋହିତ ହୋଇପଡ଼ିଛନ୍ତି ।
ଆଠଗଡ ଥାନା ଭାଗିରଥିପୁର ଗ୍ରାମର ନାରାୟଣ ପ୍ରଧାନଙ୍କ ପୁଅ ବେଣୁଧର ପ୍ରଧାନ ସୋମବାର ଘରକୁ ଫେରି ଆସିବା ପରେ କେବଳ ପରିବାର ଲୋକ ନୁହେଁ ଗାଁରେ ମଧ୍ୟ ଖୁସିର ଲହରୀ ଖେଳି ଯାଇଛି ।
ପାକିସ୍ତାନ ଜେଲରେ ସଜା ଭୋଗିବା ପରେ ବେଣୁଧର ରେଡକ୍ରସ ସହାୟତାରେ ନିଜ ଘର ଲୋକଙ୍କ ପାଖରେ ପହଞ୍ଚିଛନ୍ତି ।
ପୁଅକୁ ଫେରିପାଇ ମା’ ବାସନ୍ତୀ ଖୁସିରେ ଆତ୍ମହରା ହୋଇ ପଡ଼ିଛନ୍ତି । ଉକ୍ତ ଯୁବକଙ୍କୁ ଫେରି ପାଇବେ ବୋଲି ପରିବାର ଲୋକେ ଆଶା କରି ନ ଥିଲେ । ବହୁତ ଖୋଜାଖୋଜି କରିବା ପରେ ଭାଗ୍ୟକୁ ଆଦରିଚୁପ୍ ରହିଥିଲେ ।
ଗତ ଫେବୃଆରୀ ମାସରେ ଗାଁର ଜଣେ ବ୍ୟକ୍ତିଙ୍କ ଠାରୁ ବେଣୁଧର ଅମୃତସରରେ ଥିବା ଜାଣିବାକୁ ପାଇଥିଲେ । ପରେ ପରିବାର ଲୋକଙ୍କୁ ଓଡିଶା ରେଡକ୍ରସ ଶାଖାର ସମ୍ପାଦକଙ୍କ ସହ ଯୋଗାଯୋଗ କରିବାକୁ କୁହାଯାଇଥିଲା ।
କୌଣସି କଥାକୁ ନେଇ ଘରେ ଗାଳି ଦେବାରୁ ବେଣୁଧର ରାଗି ଅନ୍ୟତ୍ର ପଳାଇଥିଲେ । ଏ ନେଇ ସେମାନେ ସ୍ଥାନୀୟ ଥାନାରେ ଅଭିଯୋଗ କରିବା ସହ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ।
ତେବେ ଗତ ବର୍ଷ କିଛି ପୋଲିସ ଅଧିକାରୀ ଗାଁକୁ ଆସି ବୀରୁ ନାମଜ ଯୁବକଙ୍କ ନିଖୋଜ ଥିବା ସଂପର୍କରେ ପଚରାଉଚରା କରିଥିଲେ । ବୀରୁ ନାମରେ କେହି ନ ଥିବାରୁ ସେମାନେ ତାଙ୍କ ବାପାଙ୍କ ନାମ ନାରାୟଣ କହିବା ପରେ ବେଣୁଧରଙ୍କ ସଂପର୍କରେ ତଥ୍ୟ ନେଇ ଯାଇଥିଲେ ।
ଫେବୃଆରୀ ୨୫ ତାରିଖରେ ଆଠଗଡ ପୋଲିସ ଗାଁକୁ ଆସି ବେଣୁଧର ଆସିଛନ୍ତି କି ନାହିଁ ସେ ନେଇ ପଚାରି ବୁଝିଥିଲେ । କିନ୍ତୁ ସେ କେଉଁଠି ଅଛନ୍ତି କିଛି କହି ନଥିଲେ । ଏନେଇ ସେମାନେ ଉଚ୍ଚ ପୋଲିସ ଅଧିକାରୀଙ୍କୁ ଜଣାଇଥିଲେ ମଧ୍ୟ କିଛି ସୁଫଳ ମିଳି ନଥିଲା ।
ତେବେ ଚଳିତ ମାସରେ ବେଣୁଧର ପାକିସ୍ତାନ ଜେଲରେ ଥିବା ପରିବାର ଲୋକେ ରେଡକ୍ରସ ପକ୍ଷରୁ ଜାଣିବାକୁ ପାଇଥିଲେ । ସେ ଭୁଲବଶତଃ ସେତେବେଳେ ସମଝୌତା ଏକ୍ସପ୍ରେସରେ ପାକିସ୍ତାନ ଚାଲି ଯାଇଥିଲେ ।
ଦଣ୍ଡର ସମୟସୀମା ଶେଷ ହେବା ପରେ ପାକିସ୍ତାନ ପୋଲିସ ଗତ ଫେବୃଆରୀ ୧୬ରେ ୧୧ ଜଣ ଭାରତୀୟଙ୍କୁ ମୁକ୍ତ କରି ଭାରତକୁ ପଠାଇଥିଲେ ଏବଂ ସେମାନଙ୍କ ମଧ୍ୟରେ ବେଣୁଧର ମଧ୍ୟ ଥିଲେ ।
ସେଠାରେ ଯାଞ୍ଚ ସମୟରେ ତାଙ୍କ ପାଖରେ ଭିସା ଓ ପାସପୋର୍ଟ ନ ଥିବାରୁ ତାଙ୍କୁ ସ୍ଥାନୀୟ ପୋଲିସ ଗିରଫ କରିଥିଲା । ଅନୁପ୍ରବେଶ ଅଭିଯୋଗରେ ସେଠାରେ ତାଙ୍କୁ ଜେଲ ଦଣ୍ଡ ଭୋଗିବାକୁ ପଡ଼ିଥିଲା ।
ଓଡ଼ିଶା ଡ଼ଟ୍ କମ୍
