ଆତଙ୍କବାଦ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଫେବୃଆରୀ ୨୫ (ଓଡ଼ିଶା ଡ଼ଟ୍ କମ୍) ବିଦେଶୀ ଅନୁପ୍ରବେଶକାରୀଙ୍କ ବିରୋଧରେ କୌଣସି କାର୍ଯାନୁଷ୍ଠାନ କରାଯାଉନଥିବାରୁ ରାଷ୍ଟ୍ରୀୟ ସ୍ୱୟଂସେବକ ସଂଘର ସରସଂଘଚାଳକ ଡା.ମୋହନରାଓ ଭାଗବତ ଉଦବେଗ ପ୍ରକାଶ କରିଛନ୍ତି ।

ସେମାନଙ୍କ ବିରୋଧରେ ରାଜ୍ୟ ହେଉ ଅଥବା କେନ୍ଦ୍ର କାର୍ଯାନୁଷ୍ଠାନ ଗ୍ରହଣ କରିବା ତ ଦୂର ସେମାନଙ୍କୁ ଚିହ୍ନଟ ମଧ୍ୟ କରୁନାହିଁ । ଭୁବନେଶ୍ୱରରେ ଏକ ଜନସଭା କୁ ସମ୍ବୋଧିତ କରି ଭାଗବତ
ଏହା କହିଛନ୍ତି ।

ରାଜନେତାମାନେ ଦେଶର ସମସ୍ୟା ବିଷୟରେ ଚିନ୍ତା କରିବା ବଦଳରେ ନିଜ ନିଜ ସ୍ୱାର୍ଥ ସାଧନରେ ଲାଗିଛନ୍ତି । ସୀମାପାର ଆତଙ୍କବାଦରେ ପାକିସ୍ତାନ ସେନା ସାମିଲ ଅଛନ୍ତି । କେତେକ ଉଗ୍ରବାଦୀଙ୍କ ସହିତ ମିଶି ପାକ୍ ସୈନିକ ଭାରତ ଭିତରକୁ ପ୍ରବେଶ କରୁଛନ୍ତି ବୋଲି ଭାଗବତ ପ୍ରକାଶ କରିଛନ୍ତି ।

ସ୍ଥାନୀୟ ବରମୁଣ୍ଡାସ୍ଥିତ ଦୁର୍ଗାପୂଜା ପଡିଆରେ ରାଷ୍ଟ୍ରୀୟ ସ୍ୱୟଂସେବକ ସଂଘ, ଭୁବନେଶ୍ୱର ମହାନଗର ତରଫରୁ ରବିବାର ଉତିଷ୍ଠତ ଜାଗ୍ରତ କାର୍ଯକ୍ରମ ଅନୁଷ୍ଠିତ ହୋଇ ଯାଇଛି । ଏଥିରେ ଭାଗବତ ମୁଖ୍ୟ ଅତିଥିରୂପେ ଯୋଗଦେଇ କହିଲେ ଯେ,ଆଜିକୁ ଅନେକ ବର୍ଷତଳେ ସ୍ୱାମୀ ବିବେକାନନ୍ଦ ଏହି ଉଦ୍ଦଘୋଷଣା କରିଥିଲେ ଯେ, ‘ପ୍ରଥମେ ଉଠ ଓ ତାପରେ ଜାଗ୍ରତ ହୁଅ’ ।

ଏହାଥିଲା ତାଙ୍କର ବଜ୍ରବାଣୀ । ସମଗ୍ର ଦେଶ ଯେତେବେଳେ ଶହଶହ ବର୍ଷର ବିଦେଶୀ ଶାସନ ଯୋଗୁଁ ଘୋର ତମସ୍ ଭିତରେ ରହୁଥିଲା ସେହି ସମୟରେ ସ୍ୱାମୀଜୀ ଜାତିକୁ ଏହି ଆହ୍ୱାନ
ଦେଇଥିଲେ । ସଂଘ ସ୍ୱାମୀଜୀଙ୍କର ଏହି ଆହ୍ୱାନକୁ ସାକାର କରିବା ପାଇଁ କାର୍ଯ୍ୟକରୁଅଛି ।

ସ୍ୱାମୀଜୀ କହୁଥିଲେ ଯେ ସମସ୍ୟାଠାରୁ ଦୁରେଇ ଗଲେ ଏଥିରୁ ମୁକ୍ତି ମିଳେ ନାହିଁ । ବରଂ ସାହସର ସହିତ ଠିଆହୋଇ ସମସ୍ୟାକୁ ସମ୍ମୁଖିନହେଲେ ଏହାର ସମାଧାନ ହୁଏ । କାଶୀର ଗୋଟିଏ
ଛୋଟିଆ ଘଟଣାରୁ ସ୍ୱାମୀଜୀ ଏହି ଅନୁଭବ କରିଥିଲେ । ଆଜି ଆମର ସମାଜ ଜାଗ୍ରତ ନଥିବାରୁ ଅନେକ ସମସ୍ୟା ଦେଖାଯାଉଛି ।

ଦେଶର ସମସ୍ୟା ଗୁଡିକର ସମ୍ମୁଖିନ ନହୋଇ ଆମେ ତାଠାରୁ ଦୁରେଇ ଯାଇ ଅନ୍ୟ ଉପାୟ ଖୋଜୁଛୁ । ଉଦାହରଣ ହେଉଛି ଏଫ୍ଡିଆଇ ପୁଞ୍ଜି ବିନିଯୋଗକୁ ଭାରତରେ ଅନୁମତି ଦେବାଦ୍ୱାରା ବେକାରୀ ସମସ୍ୟା ବଢିବ ସିନା କମିବ ନାହିଁ ।

ପାକିସ୍ଥାନ ବୈଦେଶୀକ ମନ୍ତ୍ରୀଙ୍କ ଭାରତ ବିରୋଧୀ ମନ୍ତବ୍ୟକୁ ଯେପରି ବିରୋଧ କରିବା କଥା ତାହା ହୋଇ ନାହିଁ । ପାକିସ୍ଥାନ ସେନା କିଛି ଉଗ୍ରବାଦୀଙ୍କ ସହିତ ଆସି ଭାରତ ସୀମାରେ ପଶି
ଯେପରି ଭାବରେ ଆମ ଦେଶର ଜଣେ ସୈନିକର ମୁଣ୍ଡକାଟି ନେଇଗଲେ ତାର ମାତ୍ର ମାମୁଲି ବିରୋଧ କରାଗଲା ।

ଆମର ଦେଶ ଏତେ ବଡଯେ ଆମର ତେଢା ଚାହାଣୀରେ ହିଁ ପାକିସ୍ଥାନ ଦବିଯିବ । ଏଥିପାଇଁ ଆମେ ଐକ୍ୟବଦ୍ଧ ଓ ଦୃଢ ହେବା ଉଚିତ୍ ।

ପାକିସ୍ଥାନ ଖୋଲାଖୋଲି ଭାରତକୁ ବିରୋଧ କରୁଥିବା ବେଳେ ଚୀନ ଭିତରେ ଭିତରେ ଭାରତକୁ ବିରୋଧ କରୁଛି । ପ୍ରଥମରୁ ହିଁ ଚୀନ୍ ଏହିଭଳି ବିରୋଧ କରୁଥିଲା । ଏବେ ମଧ୍ୟ ଚୀନ ଦେଶର
ପ୍ରସ୍ତୁତ ମାଲ ଆମ ଦେଶର ବଜାରକୁ କବଜା କରିବାକୁ ବସିଛି । ଆମ ଦେଶର ନଦୀର ପାଣିକୁ ଚୀନ ଅନ୍ୟ ଦିଗକୁ ନେଇ ଯିବାପାଇିଁଁ ବସିଛି ।

ଆମର ସୀମା ସୁରକ୍ଷିତ ନୁହେଁ । ଆମ ଦେଶରେ ଅନୁପ୍ରବେଶ ସମସ୍ୟା ବଢିବଢି ଚାଲିଛି । ସେମାନଙ୍କୁ ଚିହ୍ନଟ କରିବା ପାଇଁ କୌଣସି ବ୍ୟବସ୍ଥା କରାଯାଇ ନାହିଁ । ଏହିଭଳି ସମୟରେ ଆମେ
ପରସ୍ପରର ଗୋଡ ନଟାଣି ଐକ୍ୟବଦ୍ଧ ହେଲେ ଏହି ସମସ୍ୟାର ମୁକାବିଲା କରିପାରିବା ।

ସରସଂଘଚାଳକ ପ୍ରଣାମ,ଧ୍ୱଜ ଉତୋଳନ ପରେ କାର୍ଯ୍ୟକ୍ରମ ଆରମ୍ଭ ହୋଇଥିଲା । ଏଥିରେ ଭୁବନେଶ୍ୱର ମହାନଗରର ଏକ ହଜାର ସ୍ୱୟଂସେବକ ପୂର୍ଣ୍ଣ ଗଣବେଶରେ ରହି ସମସ୍ତ ପ୍ରକାର
ଶାରୀରିକ କାର୍ଯ୍ୟକ୍ରମରେ ଭାଗନେଇଥିଲେ । ସେମାନେ ସୂର୍ଯ୍ୟନମସ୍କାର ଯୋଗାସନ, ଦଣ୍ଡବ୍ୟାୟାମ, ପତାକା ବ୍ୟାୟାମ ଓ ଘୋଷର ପ୍ରଦର୍ଶନ କରିଥିଲେ । ଦେଶାତ୍ମକ ସଂଗୀତ ଗାନପରେ ସଭାକାର୍ଯ୍ୟ ଆରମ୍ଭ ହୋଇଥିଲା ।

ଏହି କାର୍ଯ୍ୟକ୍ରମରେ ସଂଘର ଓଡିଶା,ପଶ୍ଚିମବଙ୍ଗ,ସିକିମ ଓ ଆଣ୍ଡାମାନନିକୋବର କ୍ଷେତ୍ରର କ୍ଷେତ୍ର ସଂଘଚାଳକ ଶ୍ରୀ ରଣେନ୍ଦ୍ରଲାଲ ବନ୍ଦୋପାଧ୍ୟାୟ, ଓଡିଶା ପ୍ରାନ୍ତ ସଂଘଚାଳକ ଶ୍ରୀ ବିପିନ ବିହାରୀ ନନ୍ଦ
ଓ ଭୁବନେଶ୍ୱର ମହାନଗର ସଂଘଚାଳକ ଶ୍ରୀ ବୈକୁଣ୍ଠନାଥ ସାହୁ ମଞ୍ଚାସୀନ ଥିଲେ ।

ମହାନଗର ଶାରିରୀକ ପ୍ରମୁଖ ଶ୍ରୀ ପ୍ରତାପ ଦ୍ୱିବେଦୀ ଶାରୀରିକ କାର୍ଯକ୍ରମକୁ ସଂଯୋଜନା କରିଥିବା ବେଳେ ବୌଦ୍ଧିକ ପ୍ରମୁଖ ଶ୍ରୀ ଦେବୀପ୍ରସାଦ ମିଶ୍ର ପରିଚୟ ପ୍ରଦାନ,ଧନ୍ୟବାଦ ସହ ଓ ସଂପୂଣ୍ଣ
କାର୍ଯକ୍ରମକୁ ପରିଚାଳନା କରିଥିଲେ ।

ବତର୍ମାନ ପରିସ୍ଥିତିରେ ସ୍ୱୟଂସେବକମାନଙ୍କର ଭୂମିକା ସଂପର୍କରେ ବୁଝାଇବା ପାଇଁ ପରମ ପୂଜନୀୟ ସରସଂଘଚାଳକ ଡା.ଭାଗବତ ବିଭିନ୍ନ ପ୍ରାନ୍ତ ଗସ୍ତ କରୁଛନ୍ତି । ଏହି ଅବସରରେ ସେ
ଚାରିଦିନିଆ ଓଡିଶା ଗସ୍ତରେ ଆସି ଗୁରୁବାର ଦିନ ଭୁବନେଶ୍ୱରରେ ପହଞ୍ଚିଥିଲେ ।

ଡା.ଭାଗବତ ୨୧ ତାରିଖ ଦିନ ସ୍ଥାନୀୟ ରୋଟାରୀ ଭବନରେ ଏକ ବୁଦ୍ଧିଜୀବି ସଂଗୋଷ୍ଠୀରେ ଓ ୨୨ତାରିଖ ଦିନ କଟକର କଳାବିକାଶ କେନ୍ଦ୍ରରେ ଅନୁଷ୍ଠିତ ଏକ ବୁଦ୍ଧିଜୀବି ସମ୍ମିଳନୀରେ
ଉଦ୍ବୋଧନ ଦେଇଥିଲେ । ଏତଦ୍ ବ୍ୟତୀତ ସେ ୨୩ ଓ ୨୪ ତାରିଖ ଦୁଇଦିନଧରି ସ୍ଥାନୀୟ ଉତ୍କଳ ବିପନ୍ନ ସହାୟତା ସମିତି ସଭାଗୃହରେ ସଂଘର ପ୍ରାନ୍ତ କାର୍ଯକାରିଣୀ ବୈଠକରେ
ଯୋଗଦେଇ ମାର୍ଗଦର୍ଶନ କରିଥିଲେ ।

ଓଡ଼ିଶା ଡ଼ଟ୍ କମ୍