ଆଦିବାସୀ

ଓଡିଶା ଡଟ୍ କମ୍ ସମ୍ବାଦଦାତା

ବଲାଙ୍ଗୀର, ଜାନୁଆରୀ ୧୫(ଓଡିଶା ଡଟ୍ କମ୍)-ବଲାଙ୍ଗୀର ଜିଲ୍ଲାରେ ଆଜି ଠାରୁ ପ୍ରସିଦ୍ଧ ଶୂଳିଆ ଯାତ୍ରା ଆରମ୍ଭ । ସୁଲିଆ ପୀଠର ବଡଖଳା ଠାରେ ଦୀର୍ଘ ୭ ବର୍ଷପରେ ପୁଣି ଥରେ ପଶୁବଳି ପଡିଛି ।

ମଙ୍ଗଳବାର ସକାଳେ ଆଦିବାସୀମାନେ ପାରମ୍ପରିକ ବେଶ,ପୋଷାକ,ଅସ୍ତ୍ରଶସ୍ତ୍ରରେ ସଜ୍ଜିତ ହୋଇ ବାଜା ବଜାଇ ଶୋଭାଯାତ୍ରାରେ ଆସି ସୁଲିଆ ପୀଠରେ ପହଞ୍ଚିଥିଲେ । ପ୍ରଥମେ ରୀତି,ନୀତି ଅନୁଯାୟୀ ପୂଜା କଲାପରେ ସକାଳେ ବଳି ପ୍ରଦାନ କରିଥିଲେ ।

ତାପରେ ପରେ ସେଠାରେ କ୍ରମାଗତ ଭାବରେ ଛେଳି,କୁକୁଡା,ପୋଡ,ବତକ ବଳି ଦିଆଯାଇଥିଲା । ବଡଖଳା ବ୍ୟତୀତ ସାନଖଳା ଓ ନୂଆଖଳାରେ ମଧ୍ୟ ବଳିପଡିଛି । ସଂସ୍କାରିତ ହୋଇ ବଳି ଠାରୁ ଦୂରେଇ ଯାଇଥିବା ସୁଲିଆ ପୀଠର ମୁଖ୍ୟ ପୂଜକ ବିରଞ୍ଚି କୁଆଁର ଚଳିତ ବର୍ଷ ନିଜ ସଂପ୍ରଦାୟର ଲୋକଙ୍କ ସହ ସାମିଲ ହୋଇ ନିଜେ ବଳିରେ ମୁଖ୍ୟ ଭୂମିକା ଗ୍ରହଣ କରିଛନ୍ତି ।

ଜିଲ୍ଲା ଆଦିବାସୀ କଲ୍ୟାଣ ସଂଘର ସଭାପତି ବ୍ରଜ କିଶୋର ସିଂଭୋଇ ଓ ଆୟୋଜକ କମିଟିର ସଂପାଦକ ମଧୁ ପ୍ରଧାନ କହିଛନ୍ତି ଯେ,ପରମ୍ପରା ଅନୁଯାୟୀ ବଡ ଖଳାରେ ଆମେ ଗୋଟିଏ ବଳି ପ୍ରଦାନ କରିଛୁ ।

କିନ୍ତୁ ମାନସିକ କରିଥିବା ଭକ୍ତମାନେ ବଳିଦେଲେ ଆମେ କଣ କରିବୁ ? ଘଟଣାସ୍ଥଳରେ ଉପସ୍ଥିତ ଥିବା ବଲାଙ୍ଗୀର ଏସ୍ ପି ରମେଶ ପ୍ରକାଶ କହିଛନ୍ତି ଯେ,ଆଦିବାସୀଙ୍କ ପରମ୍ପରାରେ ହସ୍ତକ୍ଷେପ କରିବାକୁ ଆମେ ଚାହୁଁନାହୁଁ ।

କିନ୍ତୁ ବହୁ ସଂଖ୍ୟକ ଜୀବ ଜନ୍ତୁଙ୍କୁ ବଳି ନଦେବାପାଇଁ ହାଇକୋର୍ଟ ଆଦେଶ ଥିବାରୁ ଆମେ ତାକୁ ପାଳନ କରୁଛୁ । ବଡଖଳାରେ ବଳିଦେବାପାଇଁ ଆସିଥିବା ଲୋକମାନଙ୍କୁ ପୋଲିସ ପ୍ରତିରୋଧ କରିବାକୁ ଚେଷ୍ଟା କରିବାରୁ ସାମାନ୍ୟ ଉତେଜନା ଦେଖାଯାଇଥିଲା । ସଂପୃକ୍ତ ଖଳାମାନଙ୍କରେ ୧୪୪ଧାରା ଜାରି କରାଯାଇଥିଲେ ମଧ୍ୟ ଆଦିବାସୀମାନେ ତାକୁ ମାନିନଥିଲେ ।

ଓଡିଶା ଡଟ୍ କମ୍

 

ଓଡିଶା ଡଟ୍ କମ୍ ସମ୍ବାଦଦାତା

ବଲାଙ୍ଗୀର, ଜାନୁଆରୀ ୧୪(ଓଡିଶା ଡଟ୍ କମ୍)-ମଙ୍ଗଳବାର ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକ ଅନ୍ତର୍ଗତ ଖଇରଗୁଡା ଗ୍ରାମରେ ଆଦିବାସୀଙ୍କ ପ୍ରସିଦ୍ଧ ସୁଲିଆ ଯାତ୍ରା । ଯାତ୍ରା କମିଟି ଏଥିପାଇଁ ସମସ୍ତ ପ୍ରକାର ବ୍ୟବସ୍ଥା କରିଛି । ଅନ୍ୟପଟରେ ମୁଖ୍ୟ ଖଳାରେ ପଶୁ ବଳି ନିଷେଧ କରିବା ପାଇଁ ପ୍ରଶାସନ ୧୪୪ ଧାରା ଲାଗୁ କରିଛି ।

ଆସନ୍ତାକାଲି ୩ ମାଜିଷ୍ଟେଡ ଓ ୨ ପ୍ଲାଟୁନ ପୋଲିସ ଫୋର୍ସ ଯାଇ ଶାନ୍ତିଶୃଙ୍ଖଳା ରକ୍ଷା କରିବେ ବୋଲି ବଲାଙ୍ଗୀର ଉପଜିଲ୍ଲାପାଳ ଜ୍ୟୋତି ରଞ୍ଜନ ପ୍ରଧାନ କହିଛନ୍ତି ।

ଖଇରଗୁଡା ଗ୍ରାମର ସୁଲିଆ ପାହାଡର ପାଦଦେଶରେ ରହିଛି ସୁଲିଆ ଦେବତାଙ୍କ ପୀଠ । ପ୍ରତିବର୍ଷ ପୌଷମାସ ଶୁକ୍ଲପକ୍ଷ ଦ୍ୱିତୀୟ ମଙ୍ଗଳବାରରେ ଏଠାରେ ପୂଜାର୍ଚ୍ଚନା ସହ ହଜାର ହଜାର ପଶୁବଳି ଦିଆଯାଇଥାଏ ।

ମାନସିକ କରି ଲୋକମାନେ ପୋଢ,ଛେଳି ଓ କୁକୁଡାକୁ ବଳି ଦେଇଥାନ୍ତି । ବଳିକୁ ବନ୍ଦ କରିବାକୁ ବହୁ ସ୍ୱଚ୍ଛାସେବୀ ଦାବିକରି ହାଇକୋର୍ଟ ଯିବାପରେ ମାନ୍ୟବର କୋର୍ଟ ବଳିନପକାଇବାକୁ ନିଦେ୍ର୍ଧଶ ଦେଲେ । ତଥାପି ଆଦିବାସୀମାନେ ନୂଆଖଳା ଓ କୁମରିଆ ଗ୍ରାମର ସାନଖଳାରେ ବଳିଦେବା ଆରମ୍ଭ କଲେ ।

ମୁଖ୍ୟଖଳାରେ ପ୍ରଶାସନ ପକ୍ଷରୁ ପ୍ରତିବର୍ଷ ୧୪୪ ଧାରା ଲାଗୁ କରି ବଳି ଦେବାକୁ ବାରଣ କରୁଛନ୍ତି କିନ୍ତୁ ପୋଲିସ ଓ ମାଜିଷ୍ଟେଟଙ୍କ ଉପସ୍ଥିତିରେ ତଥାପି ବଳି ପଡୁଛି ।

ଚଳିତବର୍ଷ ମଧ୍ୟ ଆଦିବାସୀ ନେତାଙ୍କ ସହ ପ୍ରଶାସନ ଆଲୋଚନା କରିଥିଲା । ବଳିବନ୍ଦ ପାଇଁ ନିବେଦନ କରିଥିଲା । କିନ୍ତୁ ଆଦିବାସୀ ପରମ୍ପରା ବଜାୟ ରଖିବାକୁ ଜିଦ୍ ଧରି ସୁଲିଆପିଠରେ ବଳି ପଡିବ ବୋଲି କହିଛନ୍ତି ଆଦିବାସୀ କଲ୍ୟାଣ ମହାସଂଘର ସଭାପତି ବ୍ରଜ କିଶୋର ସିଂ ଭୋଇ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୨(ଓଡିଶା ଡଟ୍ କମ୍ )-ଆୟୂଷ ଡାକ୍ତର ମାଧବୀଲତା ପ୍ରଧାନଙ୍କ ମୃତ୍ୟୁ ଘଟଣାକୁ ନେଇ ଦିଆଯାଇଥିବା ମୁଲତବୀ ପ୍ରସ୍ତାବ ଅଗ୍ରାହ୍ୟ ହୋଇଯିବା ପ୍ରତିବାଦରେ ବିରୋଧୀ କଂଗ୍ରେସ ବିଧାୟକମାନେ ଶୁକ୍ରବାର ଦିନ ଗୃହରେ ହୋହାଲ୍ଲା କରିଥିଲେ ।

ଏ ନେଇ ପ୍ରବଳ ହୋହଲ୍ଲା ହେବାରୁ ଓ ବିରୋଧୀ ସଦସ୍ୟମାନେ ଗୃହର ମଧ୍ୟଭାଗକୁ ଚାଲିଆସି ‘ବିଧାନସଭାର କଣ୍ଠରୋଧ ଚଳିବ ନାହିଁ’ ବୋଲି ସ୍ଳୋଗାନ ଦେବାରୁ ଗୃହ ଚଳାଇବା କଷ୍ଟକର ହୋଇଥିଲା । ଫଳରେ ବାଚସ୍ପତି ଶ୍ରୀ ଅମାତ ୩ଟା ୫୬ମିନିଟରେ ଗୃହକୁ ଦିନକ ପାଇଁ ମୁଲତବୀ ଘୋଷଣା କରିଥିଲେ ।

ଡାକ୍ତର ମାଧବୀଲତା ମୃତ୍ୟୁ ପ୍ରସଙ୍ଗରେ ଆଲୋଚନା ପାଇଁ ବିରୋଧୀ ଦଳ ପକ୍ଷରୁ ମୁଲତବୀ ପ୍ରସ୍ତାବ ଆଗତ କରିବାକୁ ଥିବାବେଳେ ବାଚସ୍ପତି ଏହାକୁ ଅଗ୍ରାହ୍ୟ କରିଦେବାରେ ଶ୍ରୀ ସିଂହ ପ୍ରତିକି୍ରୟା ପ୍ରକାଶ କରିକହିଲେ ଯେ,ବନ୍ଦର ପାଇଁ ବୁଝାମଣାପତ୍ର ସ୍ୱାକ୍ଷରରେ ଦୁର୍ନୀତି ବିଷୟ ଆଲୋଚନା ପାଇଁ ଆମେ ମୁଲତବୀ ପ୍ରସ୍ତାବ ଆଗତକଲୁ, ତାହାକୁ ବିଚାରାଧୀନ ରହିଛି ବୋଲି କହି ବିନା ଆଲୋଚନାରେ ଅଗ୍ରାହ୍ୟକଲେ ।

ଆଦିବାସୀ ଓ ଦଳିତଙ୍କ ସ୍ୱାର୍ଥରକ୍ଷା ପାଇଁ ଓଆରଭି ଆଇନର ସଂଶୋଧନ ସମ୍ପର୍କରେ ଆମେ ମୁଲତବୀ ପ୍ରସ୍ତାବ ଆଗତକଲୁ, ତାହାକୁ ବି ବିଚାରାଧୀନ ରହିଥିବା ଦର୍ଶାଇ ଅଗ୍ରାହ୍ୟକଲେ ।

ଡାକ୍ତର ମାଧବୀଲତା ପ୍ରଧାନଙ୍କ ମୃତ୍ୟୁ ସମ୍ପର୍କରେ ମୁଲବତୀ ପ୍ରସ୍ତାବ ଆଣିଲୁ ଯେ ତାହାକୁ ବି ଆଲୋଚନା ପାଇଁ ଗ୍ରହଣ କରୁନାହାନ୍ତି । ଗତ ବର୍ଷା ଅଧିବେଶନଠାରୁ ଚଳିତ ଅଧିବେଶନ ମଧ୍ୟରେ ଘଟିଥିବା ଘଟଣାବଳୀ ସମ୍ପର୍କରେ ଆଲୋଚନା ପାଇଁ ଆମେ ମୁଲବତୀ ପ୍ରସ୍ତାବ ଆଗତକରୁଛୁ; କିନ୍ତୁ ସରକାର ସମାନ ଉତର ଦେଇ ଏସବୁକୁ ଏଡ଼ାଇ ଯାଉଛନ୍ତି । ମନେହେଉଛି, ସବୁକିଛି ଆଜିକାଲି ବିଚାରାଧୀନ ।

ପ୍ରଶ୍ନୋତର ସମୟ ପରେ ଶୂନ୍ୟକାଳ ଆରମ୍ଭ ହେବା କ୍ଷଣି ମୁଲତବୀ ପ୍ରସ୍ତାବ ନଆସିବାରୁ ବୈଧାନିକ ପ୍ରଶ୍ନ ଛଳରେ ଭୂପିନ୍ଦର ମାଧବୀଲତା ମୃତୁ୍ୟ ପ୍ରସଙ୍ଗ ଉତାପନ କରିଥିଲେ । ସେ କହିଲେ, ମାଧବୀଲତାଙ୍କ ମୃତ୍ୟୁ ଏବେ ବି ରହସ୍ୟମୟ ହୋଇରହିଛି । ତାଙ୍କ ପରିବାର ଏବେ ନ୍ୟାୟ ପାଇଁ ଏଣେତେଣେ ଦୌଡ଼ୁଛନ୍ତି । ବିଚାରାଧୀନ ରହିଛି ବୋଲି କହି ଖସିଗଲେ ଚଳିବନି, ସରକାର ସ୍ୱଚ୍ଛ ହୋଇଥିଲେ ଏହା ସ୍ପଷ୍ଟ କରିବାକୁ ସେ ଆହ୍ୱାନ ଦେଇଥିଲେ ।

ଏଥିସହିତ ସରକାର ଗୃହରେ ସେମାନଙ୍କୁ ନ୍ୟାୟ ପ୍ରଦାନ କରୁନଥିବାରୁ ବାଚସ୍ପତି ଆମକୁ ନ୍ୟାୟ ଆଉ ସୁରକ୍ଷା ପ୍ରଦାନ କରିବାକୁ କଂଗ୍ରେସ ସଭ୍ୟମାନେ ଦାବି କରିଥିଲେ । ଶୂନ୍ୟକାଳ ଆରମ୍ଭର ମାତ୍ର ୬ମିନିଟରେ, ୧୧ଟା ୩୬ରେ ବାଚସ୍ପତି ପ୍ରଦୀପ କୁମାର ଅମାତ ଗୃହକୁ ଅପରାହ୍ଣ ୩ଟା ଯାଏଁ ମୁଲତବୀ ଘୋଷଣା କରିଥିଲେ ।

ଅପରାହ୍ଣ ୩ଟାରେ ଅଧିବେଶନ ଆରମ୍ଭ ହେବାକ୍ଷଣି ବିରୋଧୀମାନେ ପୁନର୍ବାର ମୁଲତବୀ ପ୍ରସ୍ତାବ ଗ୍ରହଣ ନହେବା ପ୍ରସଙ୍ଗ ଉତାପନ କରିଥିଲେ । ଏମିତି ବାଦାନୁବାଦ ମଧ୍ୟରେ ପ୍ରାୟ ୫୫ମିନିଟ ଗୃହ ଚାଲିଥିଲା; କିନ୍ତୁ ଏ ନେଇ ପ୍ରବଳ ହୋହଲ୍ଲା ହେବାରୁ ଗୃହକୁ ବାଚସ୍ପତି ଦିନକ ପାଇଁ ମୁଲତବୀ ଘୋଷଣା କରିଥିଲେ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୧୨(ଓଡ଼ିଶା ଡ଼ଟ୍ କମ୍)-ଜାତି-ଜନଜାତି କଲ୍ୟାଣ ପରିଷଦ,ଓଡିଶା ତରଫରୁ ‘ଆଦିବାସୀମାନଙ୍କର ସ୍ୱାସ୍ଥ୍ୟ ଓ କୃଷି’ ଶୀର୍ଷକ ଆଜି ଏକ ରାଜ୍ୟସ୍ତରୀୟ ଆଲୋଚନା ଚକ୍ର ସ୍ଥାନୀୟ ୟୁନିଟ-୫ ସ୍ଥିତ ସଚିବାଳୟ କର୍ମଚାରୀ ସଂଘ ସଭାଗୃହରେ ଅନୁଷ୍ଠିତ ହୋଇଯାଇଛି ।

ଏଥିରେ ଜାତି ଜନଜାତି ମାନଙ୍କର ସ୍ୱାସ୍ଥ୍ୟହାନି ଓ ନୂଆ ନୂଆ ରୋଗର ପିଡୀତ ହେବା ସେମାନଙ୍କ ପ୍ରଗତିର ମୂଖ୍ୟ ସମସ୍ୟା ରୂପେ ଛିଡା ହୋଇଥିବା କଥା ଆଲୋଚିତ ହୋଇଛି । ଏହି ବନ୍ଧୁମାନଙ୍କର ମୁଣ୍ଡପିଛା ଜମି ବର୍ଷକୁ ବର୍ଷ ଖଣି-ଖାଦାନ କାରଖାନା ବନ୍ଧ ଇତ୍ୟାଦି ନିର୍ମାଣ କାରଣରୁ କମି କମି ଯାଉଛି ।

ଫଳରେ ସେମାନଙ୍କର ମୁଖ୍ୟ କୃଷି ଭିତିକ ଜୀବିକା ନଷ୍ଟ ହୋଇଯାଉଛି । ଆଧୁନିକ କୃଷି ନାମରେ ରାସାୟନିକ ସାର ଔଷଧ ଇତ୍ୟାଦିର ବହୁଳ ପ୍ରୟୋଗ କାରଣରୁ କୃଷକ ସମାଜ ଅଧିକ ଖର୍ଚ୍ଚାନ୍ତ ହୋଇ ମରୁଛନ୍ତି ।

ଜନଜାତି ମାନଙ୍କ ଦ୍ୱାରାଉତ୍ପାଦିତ ଜୈବୀକ କୃଷି ଉତ୍ପାଦିତ ସ୍ଥାନରୁ କମ୍ ମୂଲ୍ୟରେ କ୍ରୟ କରାଯିବା ଯୋଗୁଁ ଉଭୟ ଜନଜାତି ଓ ସମସ୍ତ କୃଷକ ସମାଜକୁ ଉପଯୁକ୍ତ ସହାୟକ ମୂଲ୍ୟ ନାହିଁ ।

ଆଦିବାସୀମାନେ ସବୁ ସମୟରେ ସମାଜ ତଥା ରାଷ୍ଟ୍ର କଲ୍ୟାଣ ପାଇଁ କାମ କରିଆସୁଛନ୍ତି । ବତ ର୍ମାନ ସାମାଜିକ ସମନ୍ୱୟ ନିମନ୍ତେ ସେମାନଙ୍କର ଆର୍ଥିକ ଏବଂ ସାମାଜିକ ସୁରକ୍ଷା ଦେବାପାଇଁ ବକ୍ତାମାନେ ମତ ପୋଷଣ କରିଛନ୍ତି ।

ଏହି ଅବସରରେ ମାଙ୍କିଡିଆ ଆଦିମ ଜନଜାତିର ପ୍ରଥମ ମ୍ୟାଟ୍ରିକୁଲେଟ୍ ଏବଂ ସ୍ନାତକ ଛାତ୍ର ବାୟା ମାଙ୍କିଡିଆ ଏବଂ ବିଶିଷ୍ଟ ରୋଗୀ ସେବକ କୈଳାସ ଚନ୍ଦ୍ର ଷଡଙ୍ଗୀଙ୍କୁ ଅଙ୍ଗବସ୍ତ୍ର, ଶ୍ରୀଫଳ ଏବଂ ମାନପତ୍ର ଦେଇ ସମ୍ମାନୀତ କରାଯାଇଛି ।

ଅର୍ଜ୍ଜୁନ ହେମ୍ବ୍ରମଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଆଲୋଚନା ଚକ୍ରରେ ଜନଜାତି ଭାଷା ଓ ସଂସ୍କୃତି ପ୍ରତିଷ୍ଠାନ, ଓଡିଶାର ସଚୀବ ପ୍ରଫେସର ପ୍ରେମାନନ୍ଦ ପଣ୍ଡା ମୁଖ୍ୟ ଅତିଥି , କୃଷି ବିଶ୍ୱବିଦ୍ୟାଳୟ, ଭୁବନେଶ୍ୱର ଆଗ୍ରୋନୋମିର ବିଭାଗୀୟ ମୁଖ୍ୟ ପ୍ରଫେସର ବାସୁଦେବ ବେହେରା ଓ ଡା.ସୂର୍ଯ୍ୟକାନ୍ତ ପାଟଯୋଶୀ ସମ୍ନାନୀତ ଅତିଥି ଏବଂ ଡ. ପରଜିତ୍ ସିଂହ ମୁଖ୍ୟବକ୍ତା ରୂପେ ଯୋଗ ଦେଇଥିଲେ ।

ସଂଗଠନର ରାଜ୍ୟ ସଂପାଦକ ବିଶ୍ୱାମିତ୍ର ମହାନ୍ତଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମକୁ ରଘୁନାଥ ବେହେରା,ଶରତ ଲେଙ୍କା, ବୁଧରାମ ସିଂହ ପ୍ରମୁଖ ପରିଚାଳନା କରିଥିଲେ ।

ଓଡ଼ିଶା ଡ଼ଟ୍ କମ୍

 

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ସେପ୍ଟେମ୍ବର ୨୭(ଓଡ଼ିଶା ଡ଼ଟ୍ କମ୍)-କେ.ବି.କେ ତଥା ଅନ୍ୟ ଆଦିବାସୀ ଜିଲ୍ଲାମାନଙ୍କରେ ଜଳସେଚନ ସୁବିଧାର ସଂପ୍ରସାରଣ ଉପରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଗୁରୁତ୍ୱ ଆରୋପ କରିଛନ୍ତି ।

ଆଜି ସନ୍ଧ୍ୟାରେ ସଚିବାଳୟରେ ପଟ୍ଟନାୟକ କେ.ବି.କେ, କନ୍ଧମାଳ, ଗଜପତି, ସୁନ୍ଦରଗଡ, ମୟୁରଭଞ୍ଜ ଓ କେନ୍ଦୁଝର ଜିଲ୍ଲାର ଜିଲ୍ଲାପାଳ ମାନଙ୍କ ସହିତ ସେମାନଙ୍କ ଜିଳ୍ଲାରେ ଜଳସେଚନ ବ୍ୟବସ୍ଥାର ବିକାଶ ସଂପର୍କରେ ଆଲୋଚନା କରିଥିଲେ ।

ଉପରୋକ୍ତ ଜିଲ୍ଲାମାନଙ୍କରେ ଥିବା ଜଳସେଚନ ସମ୍ଭାବନାର ଉପଯୋଗ ପାଇଁ ରାଜ୍ୟ ସରକାରଙ୍କ ବିଭିନ୍ନ କାର୍ଯ୍ୟକ୍ରମ ଯଥା ଚେକ୍ଡ୍ୟାମ, ଡିପ୍ ବୋରୱେଲ ତଥା ବୃହତ୍ ଉଠାଜଳସେଚନ ଯୋଜନାର କାର୍ଯ୍ୟକାରୀତା ପାଇଁ ସ୍ୱତନ୍ତ୍ର ଧ୍ୟାନ ଦେବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ ।

କୃଷି ତଥା ଉଦ୍ୟାନ କୃଷିର ବିକାଶ ପାଇଁ ସେହି ସବୁ ଅଞ୍ଚଳରେ ଏହା ସୁଯୋଗ ସୃଷ୍ଟି କରିବ ବୋଲି ଶ୍ରୀ ପଟ୍ଟନାୟକ ମତ ଦେଇଥିଲେ । ଏଥିପାଇଁ ନିୟମିତ କ୍ଷେତ୍ର ପରିଦର୍ଶନ ସହିତ ଅଗ୍ରଗତି ତଦାରଖ କରିବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ ।

ଉପରୋକ୍ତ ଜଳସେଚନ କାର୍ଯ୍ୟକ୍ରମର ସଫଳ କାର୍ଯ୍ୟକାରୀତା ପାଇଁ ଜିଲ୍ଲାସ୍ତରରେ ଏସ୍.ପି , ଏମ୍.ଏଲ୍.ଏ ମାନଙ୍କୁ ନେଇ ଏକ କମିଟି ଗଠନ କରି ପ୍ରତି ତିନିମାସରେ ଅଗ୍ରଗତିର ସମୀକ୍ଷା କରିବାପାଇଁ ମଧ୍ୟ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ ।

ଏତଦ୍ୱ୍ୟତୀତ କ୍ଷୁଦ୍ରଜଳସେଚନ ପ୍ରକଳ୍ପ ଗୁଡିକର ମରାମତି ଓ ପୁନରୁଦ୍ଧାର କରିବା ଉପରେ ମଧ୍ୟ ବୈଠକରେ ଗୁରୁତ୍ୱ ଆରୋପ କରାଯାଇଥିଲା ।

ବିଭିନ୍ନ ଉଠା ଜଳସେଚନ ପ୍ରକଳ୍ପର ବିଦ୍ୟୁତତୀକ କାର୍ଯ୍ୟ ଆଗାମୀ ଦୁଇମାସ ମଧ୍ୟରେ ଶେଷ କରିବା ସହିତ ପାଣି ପଞ୍ଚାୟତ ଜରିଆରେ ଏହାର ପରିଚାଳନା ଏବଂ ସେଗୁଡିକର ମରାମତି ଓ ରକ୍ଷଣାବେକ୍ଷଣ ପାଇଁ ସ୍ଥାନୀୟ ଯୁବକ ମାନଙ୍କୁ ନିକଟସ୍ଥ ଆଇ.ଟି.ଆଇ ଓ ଆଇ.ଟି.ସି ରେ ସ୍ୱତନ୍ତ୍ର ତାଲିମର ବ୍ୟବସ୍ଥା କରିବା ପାଇଁ ମଧ୍ୟ ବୈଠକରେ ସ୍ଥିର କରାଯାଇଥିଲା ।

୩୫ ଭାଗରୁ କମ୍ ଜଳସେଚନ ସୁବିଧାଥିବା ବ୍ଲକ୍ ମାନଙ୍କୁ ପ୍ରାଥମିକତା ଦେବାପାଇଁ ସ୍ଥିର ହୋଇଥିଲା । ଏହି ବୈଠକରେ ମୁଖ୍ୟ ଶାସନ ସଚିବ, ଅର୍ଥ ବିଭାଗ ଓ ଜଳସେଚନ ବିଭାଗର ପ୍ରମୁଖ ସଚିବ ଉପସ୍ଥିତ ଥିଲେ ।

ଓଡିଶା ଡଟ୍ କମ୍