ଭୁବନେଶ୍ୱର ଏପ୍ରିଲ ୩୦ (ଓଡିଶା ଡଟ କମ) ମୁକ୍ତଚିନ୍ତନବାଦୀ “ଫ୍ରିଥଟ ପାର୍ଟି ଅଫ୍ ଇଣ୍ଡିଆ” ପକ୍ଷରୁ ଓଡ଼ିଶା ପ୍ରଦେଶ ଗଠନର ପ୍ରମୁଖ ସ୍ରଷ୍ଟା ଉତ୍କଳ ଗୌରବ ମଧୁସୂଦନ ଦାସଙ୍କର ୧୬୭ତମ ଜନ୍ମଜୟନ୍ତୀ ଉତ୍ସବ ପାଳନ ଅବସରରେ ୪ଟି ଜାତି-ଜାତକ-ଯୌତୁକଶୂନ୍ୟ ପ୍ରେମ ବିବାହ ଅନୁଷ୍ଠିତ ହୋଇଛି ।
ଏ ଉପଲକ୍ଷେ ଜାତୀୟ ତଥା ଆନ୍ତର୍ଜାତିକ କ୍ଷେତ୍ରରେ ଓଡ଼ିଆଙ୍କ ସଫଳ ଭୂମିକା ନିମନ୍ତେ ପ୍ରଶାସନ ଓ ଶିକ୍ଷାଦାନର ଭାଷା ଇଂରାଜୀ ରଖାଯାଉ ଶୀର୍ଷକ ଆଲୋଚନାଚକ୍ର ଦଳର କୋପରନିକସ ହଲରେ ଅନୁଷ୍ଠିତ ହୋଇଯାଇଛି ।
ପାର୍ଟି ଅଧକ୍ଷ୍ୟ ଡ଼ଃ ବିଜୟାନନ୍ଦ କରଙ୍କ ଅଧ୍ୟକ୍ଷତାରେ ଆୟୋଜିତ ଉକ୍ତ ଉତ୍ସବରେ ଭାଗନେଇ ଦଳର ସଧାରଣ ସମ୍ପାଦକ ବି. ରାମଚନ୍ଦ୍ର ସି ଏସ ଟି ଭୋଲଟେୟାର ଦର୍ଶାଇଥିଲେ ଯେ ଶିକ୍ଷାଦାନ ଓ ପ୍ରଶାସନର ଭାଷା ଇଂରାଜୀ ବଦଳରେ ଓଡ଼ିଆ ରଖାଗଲେ ଓଡ଼ିଶା ମାଟିରେ ମଧୁସୂଦନ ଦାସଙ୍କ ଭଳି ପ୍ରତିଭା ଆଉ ସୃଷ୍ଟି ହୋଇ ପାରିବେ ନାହିଁ ।
ଓଡ଼ିଶାର କୌଣସି ଯୁବକଯୁବତୀ ସର୍ଭଭାରତୀୟ କିମ୍ବା ଆନ୍ତର୍ଜାତିକ ସ୍ତରୀୟ ଦାମୀ କର୍ମକ୍ଷେତ୍ରରେ ନିଯୁକ୍ତି ଲାଭ କରିପାରିବେ ନାହିଁ । ସେ ଆହୁରି ଦର୍ଶାଇଥିଲେ ଯେ ଇଂରାଜୀ ଭାଷା ଆଧୁନିକ ଜ୍ଞାନ-ଭଣ୍ଡାରର ଭାଷା । ଏହି ବିଶ୍ୱ ଭାଷା ମାଧ୍ୟମରେ ବିଶ୍ୱବାଣିଜ୍ୟ, ବିଶ୍ୱ କୂଟନୀତି, ଉଚ୍ଚତର ଗବେଷଣା ଆଦି ଚାଲିଛି ।
ଓଡ଼ିଆ ଭାଷାକୁ ବିଶ୍ୱଭାଷା ଇଂରାଜୀର ସମୀପବର୍ତ୍ତୀ କରିବା ପାଇଁ ଆମର ଚିନ୍ତା କରିବାର ବେଳ ଆସିଛି । ଓଡ଼ିଆ ଭାଷାର ଲିପି ଓ ନୁ୍ୟମେରାଲସ୍କୁ ହଟାଇ ତ ସ୍ଥାନରେ ବିଶ୍ୱସ୍ତରରେ ଆଦୃତ ରୋମାନ ଲିପି ଓ ଆରବିକ୍ ନ୍ୟୁମେରାଲସକୁ ଆଦରି ନେଲେ ଓଡ଼ିଶାର ପ୍ରତ୍ୟେକ ବିଦ୍ୟାର୍ଥୀ ବିଶେଷ ଉପକୃତ ହେବେ ।
ଅକ୍ଷର ଗୋଲ କରିବାରେ ଯେଉଁ ସମୟ ଶକ୍ତି ଅର୍ଥ ବରବାଦ ହେଉଛି, ଶବ୍ଦଟିଏ ଲେଖିଲା ବେଳେ ଯେଉଁ ବନାନ ଅଶୁଦ୍ଧି ଘଟୁଛି ତାହା ମଧ୍ୟ ଦୂରୀଭୁତ ହେବ । ସ୍ଥାନର ନାମ, ବ୍ୟକ୍ତିଙ୍କ ନାମ, ଖେଳର ନାମ, ଔଷଧର ନାମ ଯନ୍ତ୍ରପାତିର ନାମ ଏବଂ ଅନ୍ୟାନ୍ୟ ଆନ୍ତର୍ଜାତିକ ଶବ୍ଦାବଳୀ ଓଡ଼ିଆ ଭାଷାରେ ରୋମାନ୍ ଲିପିରେ ନିର୍ଭୁଲ ଭାବେ ଲେଖି ହେବ ।
ଏଥିପ୍ରତି ସମସ୍ତ ଦୂରଦୃଷ୍ଟିସଂପନ୍ନ ଓ ଉଦାରବାଦୀ ବ୍ୟକ୍ତିମାନେ ଯଥୋଚିତ ଧ୍ୟାନ ଦେବା ପାଇଁ ସେ ତାଙ୍କ ବକ୍ତବ୍ୟରେ ନିବେଦନ କରିଥିଲେ । ସଭାପତି ଡ଼ଃ ବିଜାୟାନନ୍ଦ କର କହିଥିଲେ ଯେ, ଇଂରାଜୀ ଭାଷାକୁ ଚିନ୍ତାଶୀଳ ବ୍ୟକ୍ତିମାନେ ଏକ ବିଦେଶୀ ଭାଷାରୂପେ ଆଉ ଗଣନା କରୁନାହାନ୍ତି ।
ଜାତୀୟତା ନିର୍ବିଶେଷରେ ପ୍ରତ୍ୟେକ ଯୁବକଯୁବତୀ ଇଂରାଜୀ ଭାଷାରେ ଦକ୍ଷତା ବୃଦ୍ଧି ପାଇଁ ବେଶ ତତ୍ପର ଅଛନ୍ତି । ଓଡ଼ିଆ ଭାଷାଭାଷୀ ଲୋକଙ୍କ ପାଇଁ ବାରିଷ୍ଟର ମଧୁସୂଦନ ଦାସ ଯାହା କରିଯାଇଛନ୍ତି ତାହାର ପଶ୍ଚାତରେ ରହିଥିଲା ତାଙ୍କର ଇଂରାଜୀ ଭାଷାରେ ଅଦ୍ୱିତୀୟ ଦକ୍ଷତା । ଓଡ଼ିଶାର କୌଣସି ବ୍ୟକ୍ତି ଏହି କଥା ଭୁଲିଯିବା ଉଚିତ ହେବନାହିଁ ବୋଲି ଡ଼ଃ କର ସୂଚାଇଥିଲେ ।
ସଭାସ୍ଥଳୀରେ ଜଗତସିଂହପୁର ଜିଲ୍ଲାର ସୁଧୀର କୁମାର ସାହୁ ଓ କଟକ ଜିଲ୍ଲାର ସୌଦାମିନୀ ସାହୁ, ଗଞ୍ଜାମ ଜିଲ୍ଲାର ଟି. ଶ୍ରୀନିବାସ ଓ ଭୁବନେଶ୍ୱରର ପୂଜା ବେହେରା, କଟକ କିଶୋର ନଗର ଅଞ୍ଚଳର ଲିଲୁପ୍ତ ଭୋଇ ଓ ଖୋର୍ଦ୍ଧା ଜିଲ୍ଲା ପାନନଗରର କଳ୍ପନା ନାୟକ, ନୟାଗଡ଼ ଜିଲ୍ଲାର ମୁକେଶ ନାୟକ ଓ ସେହି ଅଞ୍ଚଳର ସ୍ମିତା ପାତ୍ର ଫୁଲମାଳ ଆଦାନପ୍ରଦାନରେ ଜାତି-ଜାତକ-ଯୌତୁକଶୂନ୍ୟ ପ୍ରେମ ବିବାହ କରିଛନ୍ତି ।
ଦେଶ ତଥା ବିଶ୍ୱର ହିତ ପାଇଁ ଉକ୍ତ ନବଦଂପତିମାନେ ଏକ-ସନ୍ତାନ ପରିବାର ନୀତି ଅନୁସରଣ କରିବେ ବୋଲି ଶପଥ ନେଇଛନ୍ତି । ଜୟନ୍ତୀ ଉତ୍ସବରେ ସାମ୍ବାଦିକ ମନୋହର ପଣ୍ଡା, ସମାଜସେବୀ ବଦ୍ରିନାରାୟଣ, ଆମଫୋଇ କୋଷାଧ୍ୟକ୍ଷା ସ୍ୱପ୍ନା ବିଜୟିନୀ, ଦଳର ପଦାଧିକାରୀ ପ୍ରସନ୍ନ କୁମାର ବେହେରା ଓ ବିଜୟ ସ୍ୱାଇଁ ପ୍ରମୁଖ ଭାଗ ନେବା ସହ ନବଦଂପତିମାନଙ୍କୁ ଶୁଭେଚ୍ଛା ଜଣାଇଛନ୍ତି ।
ଓଡିଶା ଡଟ କମ
