ଓଡିଶା ଡଟକମ ସଂବାଦ ଦାତା
ଭୁବନେଶ୍ୱର, ମଇ ୧୭ (ଓଡିଶା ଡଟ କମ) ଓଡ଼ିଶାର ୨୦ଜଣ ବିଦ୍ୟାଳୟ ଛାତ୍ରଛାତ୍ରୀ ସପ୍ତାହକ ପାଇଁ ଗୁଜରାଟର ଅହମଦାବାଦ ସ୍ଥିତ ଭାରତୀୟ ମହାକାଶ ଗବେଷଣା କେନ୍ଦ୍ର (ଇସ୍ରୋ)ର ମହାକାଶ ପ୍ରୟୋଗ ସଂସ୍ଥାନ ଓ ଗୁଜରାଟର ସାଇନସ ସିଟି ପରିଦର୍ଶନ କରିବା ପରେ ରବିବାର ଭୁବନେଶ୍ୱର ଫେରିଛନ୍ତି ।
ଟାଟା ଷ୍ଟିଲ ପକ୍ଷରୁ ପଠାଣି ସାମନ୍ତ ପ୍ଲାନେଟାରିୟମ୍ ସହଯୋଗରେ ଆୟୋଜିତ ହେଉଥିବା ଯୁବ ଜ୍ୟୋତିର୍ବିଜ୍ଞାନୀ ଅନ୍ୱେଷଣ (ୟାଟସ୍) କାର୍ଯ୍ୟକ୍ରମ ଜରିଆରେ ଚୟନ ହୋଇଥିବା ଏହି ଛାତ୍ରଛାତ୍ରୀଙ୍କ ବୈଜ୍ଞାନିକ ପ୍ରତିଭାର ବିକାଶ ଲକ୍ଷ୍ୟରେ ଏହି ଯାତ୍ରାର ଆୟୋଜନ କରାଯାଇଥିଲା ।
୧୫ଜଣ ବାଳକ ଓ ୫ଜଣ ବାଳିକା ଏବଂ ସେମାନଙ୍କ ଗାଇଡ ଶିକ୍ଷକଙ୍କୁ ମିଶାଇ ମୋଟ ୪୦ଜଣଙ୍କ ଇସ୍ରୋ ମହାକାଶ ପ୍ରୟୋଗ ସଂସ୍ଥାନ (ଏସ୍ଏସି) କୁ ପରିଦର୍ଶନ ସେମାନଙ୍କୁ ଇସ୍ରୋର ବିଭିନ୍ନ ପରିଚାଳନାଗତ ଦିଗ ବିଷୟରେ ଜାଣିବାର ଅନନ୍ୟ ସୁଯୋଗ ପ୍ରଦାନ କରିଥିଲା ।
ଏହି ସଂସ୍ଥାନରେ ଡେଭଲପମେଂଟ, ରିଏଲାଇଜେସନ୍ ଓ କ୍ୱାଲିଫିକେସନ୍ ଅଫ୍ କମୁ୍ୟନିକେସନ୍, ନେଭିଗେସନ୍, ପୃଥିବୀ ନିରୀକ୍ଷଣ ଓ ଗ୍ରହଙ୍କ ପେଲୋଡ୍ସ ଓ ସମ୍ପର୍କୀୟ ଡାଟା ପ୍ରୋସେସିଂ, ଯୋଗାଯୋଗ ବିଭାଗର ଗ୍ରାଉଣ୍ଡ ସିଷ୍ଟମ୍, ପ୍ରସାରଣ, ରିମୋଟ୍ ସେନ୍ସିଂ ଓ ବିପର୍ଯ୍ୟୟ ନିରୀକ୍ଷଣ ଭଳି କାର୍ଯ୍ୟ ସମ୍ପାଦନ ହୋଇଥାଏ ।
ଇସ୍ରୋ ମହାକାଶ ପ୍ରୟୋଗ ସଂସ୍ଥାନର ନିର୍ଦ୍ଦେଶକ ତଥା ପ୍ରତିଷ୍ଠିତ ମହକାଶବିଜ୍ଞାନୀ ଶ୍ରୀ ତପନ ମିଶ୍ର ଟାଟା ଷ୍ଟିଲ ଓ ପଠାଣି ସାମନ୍ତ ପ୍ଲାନେଟାରିୟମ୍ ପକ୍ଷରୁ ନିଆଯାଇଥିବା ଏହି ପଦକ୍ଷେପକୁ ପ୍ରଶଂସା କରିବା ସହିତ ଛାତ୍ରଛାତ୍ରୀଙ୍କୁ ପରାମର୍ଶ ଦେବା ସହ ନିଜର ଅଭିଜ୍ଞତା ବାଂଟିଥିଲେ ।
ଛାତ୍ରଛାତ୍ରୀମାନେ ବିଭିନ୍ନ ପ୍ରୟୋଗଶାଳା ଓ ବିଭାଗ ଯଥା ଭାଇବ୍ରେଟର ଚାମ୍ବର, ଥର୍ମୋ ଡାଇନାମିକ୍ ଚାମ୍ବର ଭଳି ଏକାଧିକ ବିଭାଗ ତଥା ଭବିଷ୍ୟତରେ ମହାକାଶରେ ସ୍ଥାନିତ ହେବାକୁଥିବା ନିର୍ମାଣଧିନ ଉପଗ୍ରହ ଦେଖିବାର ସୁଯୋଗ ପାଇଥିଲେ । ଏହିସବୁ ପ୍ରୟୋଗାଶାଳାର ବୈଜ୍ଞାନିକମାନେ ସେମାନଙ୍କ ଅନୁସନ୍ଧାନ କାର୍ଯ୍ୟ ବିଷୟରେ ବିସ୍ତୃତ ଭାବେ ବର୍ଣ୍ଣନା କରିବା ସହିତ ଛାତ୍ରଛାତ୍ରୀଙ୍କ ବିଭିନ୍ନ ପ୍ରଶ୍ନର ଉତ୍ତର ମଧ୍ୟ ଦେଇଥିଲେ ।
ରାଜ୍ୟ ସଚିବାଳୟରେ ଚଳିତ ମାସ ୮ ତାରିଖ ଦିନ ମୁଖ୍ୟ ସଚିବଙ୍କ ଦ୍ୱାରା ଶୁଭାରମ୍ଭ ହୋଇଥିବା ଏହି ଗସ୍ତରେ ଛାତ୍ରଛାତ୍ରୀଙ୍କୁ ଅହମଦାବାଦରେ ଥିବା ଗୁଜରାଟର ସାଇନସ ସିଟି ମଧ୍ୟ ଦେଖିବାର ସୁଯୋଗ ମିଳିଥିଲା । ଏଠାରେ ସେମାନଙ୍କୁ ବିଜ୍ଞାନ, ପୃଥିବୀ ଓ ବିଭିନ୍ନ ପ୍ରକାର କୌତୁହଳପୂର୍ଣ୍ଣ ପ୍ରଦର୍ଶନୀ ଦେଖିବାକୁ ମିଳିଥିଲା ।
ପଠାଣି ସାମନ୍ତ ପ୍ଲାନେଟାରିୟମ୍ ର ଉପ ନିର୍ଦ୍ଦେଶକ ଡଃ ଶୁଭେନ୍ଦୁ ପଟ୍ଟନାୟକ ଓ ଟାଟା ଷ୍ଟିଲର ଜଣେ ଅଧିକାରୀଙ୍କ ତତ୍ୱାବଧନାରେ ଛାତ୍ରଛାତ୍ରୀ ଓ ସେମାନଙ୍କ ଗାଇଡ୍ ଶିକ୍ଷକ ଏହି ଗସ୍ତରେ ଯାଇଥିଲେ ।
ଟାଟା ଷ୍ଟିଲ ପକ୍ଷରୁ, ପଠାଣି ସାମନ୍ତ ପ୍ଲାନେଟାରିୟମ୍ ସହଯୋଗରେ ରାଜ୍ୟର ୮ଟି ଜୋନ୍ ଯଥା ଯାଜପୁର, ବେଲପାହାଡ, କେନ୍ଦୁଝର, ବାଲେଶ୍ୱର, ଯୋଡ଼ା, ଭୁବନେଶ୍ୱର, ବ୍ରହ୍ମପୁର ଓ ଜୟପୁରରେ ୮ମ ରୁ ୧୦ମ ଶ୍ରେଣୀର ବିଦ୍ୟାଳୟ ଛାତ୍ରଛାତ୍ରୀଙ୍କୁ ନେଇ ଆୟୋଜିତ ହୋଇଥିବା ଯୁବ ଜ୍ୟୋତିର୍ବିଜ୍ଞାନୀ ପ୍ରତିଭା ଅନ୍ୱେଷଣ ପ୍ରତିଯୋଗିତାରେ ୮୦୦ ପ୍ରତିଯୋଗୀଙ୍କ ମଧ୍ୟରୁ ଶ୍ରେଷ୍ଠ ୨୦ଜଣଙ୍କୁ ଚୟନ କରାଯାଇଥିଲା ।
ଅନ୍ତରୀକ୍ଷ ବିଜ୍ଞାନ ତଥା ଜ୍ୟୋତିର୍ବିଜ୍ଞାନର କିମ୍ବଦନ୍ତୀ ପୁରୁଷ ପଠାଣି ସାମନ୍ତଙ୍କ ଅବଦାନକୁ ଲୋକପ୍ରିୟ କରିବା ଓ ବିଦ୍ୟାଳୟ ଛାତ୍ରଛାତ୍ରୀଙ୍କ ମଧ୍ୟରେ ଅନ୍ତରୀକ୍ଷ ଓ ଜ୍ୟୋତିର୍ବିଜ୍ଞାନ ସମ୍ପର୍କରେ ଆଗ୍ରହ ସୃଷ୍ଟି କରିବା ତଥା ସେମାନଙ୍କର ଲୁକ୍କାୟିତ ପ୍ରତିଭାକୁ ଚିହ୍ନଟ କରିବା ଲକ୍ଷ୍ୟ ନେଇ ଟାଟା ଷ୍ଟିଲ, ପଠାଣି ସାମନ୍ତ ପ୍ଲାନେଟାରିୟମ୍ ସହଯୋଗରେ ୨୦୦୭ ମସିହାରୁ ଉକ୍ତ ପ୍ରତିଯୋଗିତାର ଆୟୋଜନ କରିଆସୁଛି ।
ଓଡିଶା ଡଟ କମ
