ଏନ୍ସିପି

ଓଡ଼ିଶା ଡ଼ଟ୍ କମ୍ : ଆଶିଷ ସେନାପତି

କେନ୍ଦ୍ରାପଡ଼ା, ନଭେମ୍ବର ୧୬(ଓଡ଼ିଶା ଡ଼ଟ୍ କମ୍) କେନ୍ଦ୍ରାପଡ଼ା ପୌର ନିର୍ବାଚନ ଫଳାଫଳ ବୁଧବାର ଘୋଷଣା ହୋଇଥିବା ବେଳେ ଏଥିରେ ଶାସକ ବିଜୁ ଜନତା ଦଳର ପ୍ରାର୍ଥୀମାନେ ଅଧିକ ୱାର୍ଡ଼ରେ ବିଜୟୀ ହୋଇ ସଂଖ୍ୟା ଗରିଷ୍ଠତା ହାସଲ କରିଛନ୍ତି ।

ଫଳାଫଳ ଅନୁଯାୟୀ ବିଜେଡ଼ି ପ୍ରାର୍ଥୀ ୧୩ଟି ୱାର୍ଡ଼ରେ ବିଜୟୀ ହୋଇଥିବା ବେଳେ କଂଗ୍ରେସ ୫ଟି ଏବଂ ବିଜେପି, ଏନ୍ସିପି ଓ ସ୍ୱାଧିନ ପ୍ରାର୍ଥୀ ଗୋଟିଏ ଲେଖାଏଁ ୱାର୍ଡ଼ରେ ବିଜୟୀ ହୋଇଛନ୍ତି ।

୨୧ଟି ୱାର୍ଡ଼ ପାଇଁ ମଙ୍ଗଳବାର ଭୋଟ୍ ଗ୍ରହଣ ହୋଇଥିଲା ଓ ୬୯ ଜଣ ପ୍ରାର୍ଥୀ ଏହି ନିର୍ବାଚନରେ ପ୍ରତିଦ୍ଵନ୍ଦ୍ୱିତା କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଡ଼ିସେମ୍ବର ୨୯(ଓଡ଼ିଶା ଡ଼ଟ୍ କମ୍) ରାଜ୍ୟରେ ଶାସକ ବିଜୁ ଜନତା ଦଳ(ବିଜେଡ଼ି) ଠାରୁ ରାଷ୍ଟ୍ରବାଦୀ କଂଗ୍ରେସ ପାର୍ଟି(ଏନ୍ସିପି) ତାର ସମର୍ଥନ ପ୍ରତ୍ୟାହାର କରିଥିବା ଘୋଷଣା କରିଛି ।

ବୁଧବାର ଅନୁଷ୍ଠିତ ରାଜ୍ୟ କାର୍ଯ୍ୟକାରିଣୀ ବୈଠକରେ ଏହି ନିଷ୍ପତ୍ତି ନିଆଯାଇଥିବା ଏନ୍ସିପି ରାଜ୍ୟ ସଭାପତି ଉତ୍କଳ କେଶରୀ ପରିଡ଼ା କହିଛନ୍ତି ।

“ବିଜେଡ଼ି କୌଣସି ବିଷୟରେ ଆମ ସହ ବିଚାରବିମର୍ଷ କରୁନଥିବାରୁ ସମର୍ଥନ ପ୍ରତ୍ୟାହାର କରାଯାଇଛି । ସରକାର ଚାଷୀଙ୍କ ସ୍ୱାର୍ଥ ବିରୋଧୀ କାର୍ଯ୍ୟ କରୁଛନ୍ତି” ସେ କହିଛନ୍ତି ।

ବିଜେଡ଼ି ଗତ ୨୦୦୯ ବିଧାନସଭା ଏବଂ ଲୋକସଭା ନିର୍ବାଚନ ପୂର୍ବରୁ ବିଜେପି ସହ ତାହାର ୧୧ ବର୍ଷର ମେଣ୍ଟ ଭଙ୍ଗକରି ସିପିଆଇ, ସିପିଆଇ-ଏମ୍ ଏବଂ ଏନ୍ସିପି ସହ ମେଣ୍ଟ କରିଥିଲା ।

ସମର୍ଥନ ପ୍ରତ୍ୟାହାର ଫଳରେ ଉଭୟ ଦଳ ମଧ୍ୟରେ ଗତ ୨୨ ମାସ ଧରି ରହିଥିବା ମେଣ୍ଟ ଭାଙ୍ଗି ଯାଇଛି । ୧୪୭ ସଦସ୍ୟ ବିଶିଷ୍ଟ ରାଜ୍ୟ ବିଧାନସଭାରେ ବର୍ତ୍ତମାନ ଏନ୍ସିପିର ଚାରି ଜଣ ବିଧାୟକ ଅଛନ୍ତି ।

ତେବେ ଏ ସଂପର୍କରେ ବିଜେଡ଼ି ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ ପାଇ ନାହିଁ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର ୨୭(ଓଡ଼ିଶା ଡ଼ଟ୍ କମ୍) ଅଦିନିଆ ବର୍ଷା କ୍ଷତିଗ୍ରସ୍ତ ଚାଷୀ ମାନଙ୍କ ପାଇଁ ଏଫ୍ଏକ୍ୟୁ ମାନରେ କୋହଳ ଓ ମଧ୍ୟବର୍ତ୍ତୀକାଳୀନ ସହାୟତା ଘୋଷଣା କରିବାକୁ ଏନ୍ସିପି ଦାବୀ କରିଛି ।

ଏଭଳି ସଂକଟରେ ଚାଷୀଙ୍କ ପାଇଁ ତୁରନ୍ତ ହସ୍ତକ୍ଷେପ କରିବାକୁ କେନ୍ଦ୍ର କୃଷି ମନ୍ତ୍ରୀ ସଦର ପାୱାରଙ୍କୁ ଏନ୍ସିପି ବିଧାୟକ ଦଳ ନେତା ଅମର ଶତପଥୀ ସୋମବାର ଚିଠି ଲେଖି ଅନୁରୋଧ କରିଛନ୍ତି ।

ଖରିଫ ଅମଳ ସମୟରେ ବର୍ଷାର କ୍ଷତି ସବୁ ଫସଲ ଉଜାଡ଼ି ଦେଇଛି । ସମସ୍ତ ଜିଲ୍ଲାର ଚାଷୀ କ୍ଷତିଗ୍ରସ୍ତ ହୋଇଛନ୍ତି କେବଳ ଧାନ ନୁହେଁ କପା, ପରିବା, ତୈଳବୀଜ ଓ ଆଗୁଆ ରବି ଫସଲ ମଧ୍ୟ କ୍ଷତିଗ୍ରସ୍ତ ହୋଇଛି ବୋଲି ସେ ଏଥିରେ ଲେଖିଛନ୍ତି ।

ରାଜ୍ୟ ସରକାର ଚାଷୀଙ୍କ ପାଇଁ ଘୋଷଣା କରିଥିବା ପ୍ୟାକେଜ ଦାବୀ ମୁତାବକ ହୋଇନାହିଁ । କେନ୍ଦ୍ର ସରକାର ଆନ୍ଧ୍ରପ୍ରଦେଶ ଏବଂ ମହାରାଷ୍ଟ୍ରକୁ ଯଥାକ୍ରମେ ଚାରି ଶହ କୋଟି ଓ ଦୁଇ ଶହ କୋଟି ଟଙ୍କା ସହାୟତା କରିଛନ୍ତି ।

ଏକ୍ଷେତ୍ରରେ ଓଡ଼ିଶାକୁ କିଛି ମିଳି ନାହିଁ ତେଣୁ ଶୀଘ୍ର ମଧ୍ୟବର୍ତ୍ତୀକାଳିନ ସହାୟତା ଦିଆଯିବା ଜରୁରୀ, ସେ ଜଣାଇଛନ୍ତି ।

ଓଡ଼ିଶା ଡ଼ଟ୍ କମ୍