ଓଡିଆ

ଓଡିଶା ଡଟ କମ ସଂବାଦ ଦାତା

ଅକ୍ଟୋବର ୨ (ଓଡିଶା ଡଟ କମ) ଲିବିୟାରେ ଆଇଏସ୍‌ ଆତଙ୍କବାଦୀଙ୍କ ଦ୍ଵାରା ଅପହୃତ ଓଡିଆ ଇଞ୍ଜିନିୟର ପ୍ରଭାତ ସାମଲ ସେମାନଙ୍କ କବଳରୁ ମୁକ୍ତ ହେବା ପରେ ଶୁକ୍ରବାର ନିଜ ରାଜ୍ୟ ଓଡିଶା  ଫେରିଛନ୍ତି ।

ଗୁରୁବାର ସେ ଦିଲ୍ଲୀରେ ପହଞ୍ଚି ଥିଲେ । ସେଠାରେ ପହଞ୍ଚିଲା ପରେ ଗଣମାଧ୍ୟମ ଆଗରେ ଅପହରଣ ସମୟର ଅନୁଭୂତି ବର୍ଣ୍ଣନା କରି କିପରି ଓ କାହିଁକି ସେହି ଆତଙ୍କବାଦୀ ସଂସ୍ଥା ଅପହରଣ କରିଥିଲେ ଓ କିଭଳି ସେ ମୁକ୍ତି ପାଇଲେ, ସେ ସବୁ ଲୋମହର୍ଷଣ କଥା ବର୍ଣନା କରିଥିଲେ  ।

ତାଙ୍କ ମୁକ୍ତି ପାଇଁ ଭାରତ ସରକାରଙ୍କ ଉଦ୍ୟମକୁ ସେ ପ୍ରଶଂସା କରିଛନ୍ତି । ଦୀର୍ଘ ଦିନଧରି ପ୍ରଭାସଙ୍କ ମୁକ୍ତି ନେଇ ଆଶଙ୍କା ଲାଗି ରହିଥିଲା । ଆତଙ୍କବାଦୀ ମାନେ ତାଙ୍କୁ ସର୍ତ୍ତମୂଳକ ଭାବେ ମୁକ୍ତ କରିଥିବା ସେ ତାଙ୍କ ଭାଉଜଙ୍କୁ ପ୍ରଥମେ ଫୋନ୍‌ ଯୋଗେ ଜଣାଇଥିଲେ ।

କିନ୍ତୁ ତାପରେ ଆଉ ଫୋନ୍‌ ଯୋଗେ ତାଙ୍କ ସହିତ ଓଡିଶାରେ ରହୁଥିବା ତାଙ୍କ ସମ୍ପର୍କୀୟ ମାନେ ଫୋନ୍‌ ଯୋଗେ ଯୋଗାଯୋଗ କରିପାରିନଥିଲେ । ତେଣୁ ସେ ମୂକ୍ତ ହୋଇଛନ୍ତି କି ନାହିଁ ସେନେଇ ଆଶଙ୍କା ସୃଷ୍ଟି ହୋଇଥିଲା । ଆଜି ସେ ଭାରତରେ ପହଞ୍ଚିବାପରେ ତାଙ୍କ ପରିବାର ଲୋକେ ଆଶ୍ଵସ୍ଥ ହୋଇଛନ୍ତି । କେନ୍ଦ୍ରାପଡା କାରିଲୋପାଟଣା ଗ୍ରାମରେ ପ୍ରଭାସ ସାମଲଙ୍କ ଘର ।

ଦୂରଦର୍ଶନକୁ ଏକ ସାକ୍ଷାତକାରରେ ପ୍ରଭାସ କହିଛନ୍ତି ଯେ ସେପ୍ଟେମ୍ବର ୭ ତାରିଖରେ କିଛି ବ୍ୟକ୍ତି ତାଙ୍କୁ ଓ ଜଣେ ଭାରତୀୟ ଡାକ୍ତର ରାମମୂର୍ତ୍ତିଙ୍କ ସମେତ ଦୁଇଜଣ ବିଦେଶୀଙ୍କୁ ଆଖିରେ କଳାପଟି ବାନ୍ଧି ଅପହରଣ କରିନେଇଥିଲେ ।

ପ୍ରାୟ ଦଶ ଦିନ ପରେ କିଛି ସ୍ଥାନୀୟ ଲୋକଙ୍କ ହସ୍ତକ୍ଷେପ ଫଳରେ ସେ ସୌଭାଗ୍ୟକ୍ରମେ ମୁକୁଳି ପାରିଥିଲେ । ” ଯଦି ରଖେ ହରି ମାରେ କିଏ” ଭୁବନେଶ୍ଵର ରେ ପହଞ୍ଚିବା ପରେ ସେ କହିଛନ୍ତି ।  ନିଜ ମୁକ୍ତିପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ରମୋଦୀଙ୍କ ଉଦ୍ୟମକୁ ମଧ୍ୟ ପ୍ରଶଂସା କରିଛନ୍ତି ।

ଏଃ ପୂର୍ବରୁ ପ୍ରଭାସ ଦିଲ୍ଲୀ ପହଞ୍ଚିବା ଖବର ବିଜୁଳି ବେଗରେ ପ୍ରଚାର ହେବା ପରେ ତାଙ୍କ ଗ୍ରାମ କାରିଲୋପାଟଣାରେ ଉତ୍ସବର ପରିବେଶ ସୃଷ୍ଟି ହୋଇଥିଲା । ପରିବାରଲୋକେ ସ୍ଥାନୀୟ ମନ୍ଦିରରେ ପୂଜାର୍ଚନା କରିବା ସହ ନିଜ ବନ୍ଧୁ ବାନ୍ଧବ ଓ ଗ୍ରାମବାସୀଙ୍କୁ ମିଠା ବାଣ୍ଟିଥିଲେ ।

ଜଣେ ଫିଲିଫାଇନସ ମହିଳାଙ୍କୁ ବିବାହ କରି ପ୍ରଭାସ ଗତ ବାରବର୍ଷରୁ ଉର୍ଦ୍ଧ୍ଵ ସମୟ ଧରି ଲିବିଆରେ ଏକ ହସ୍‌ପିଟାଲରେ କାର୍ଯ୍ୟ କରୁଛନ୍ତି ସେଠାରେ ଏବେ ମଧ୍ୟ ଅଶାନ୍ତ ପରିସ୍ଥିତି ଲାଗିରହିଛି ।

ଓଡିଶା ଡଟ କମ

ଓଡିଶା ଡଟକମ ସଂବାଦ ଦାତା

ରାଉରକେଲା, ସେପ୍ଟେମ୍ବର ୧୮ (ଓଡିଶା ଡଟ କମ) ପ୍ରାୟ ଦୁଇ ସପ୍ତାହ ତଳେ ଲିବିଆର ସିର୍ତ୍ତେ ସହରରେ ଆଇଏସ ଆତଙ୍କବାଦୀଙ୍କ ଦ୍ଵାରା ଅପହୃତ ହୋଇଥିବା ଓଡିଆ ଯୁବକ ପ୍ରଭାସ ରାଉଳଙ୍କୁ ଅପହରଣକାରୀ ମୁକ୍ତ କରିଥିବା ରାଉରକେଲାରେ ରହୁଥିବା ତାଙ୍କ ଭାଉଜ ଶୁକ୍ରବାର ସୂଚନା ଦେଇଛନ୍ତି ।

ଆନ୍ଧ୍ରପ୍ରଦେଶର ରାମମୂର୍ତ୍ତି କୋସନାମଙ୍କ ସହ ଉକ୍ତସହରର ଏକ ଘରୋଇ ଡାକ୍ତରଖାନାରେ ପରୀକ୍ଷାଗାର ସହାୟକ ଭାବେ କାମକରୁଥିବା କେନ୍ଦ୍ରାପଡା ଜିଲ୍ଲାର ରାଉଳଙ୍କୁ ଆତଙ୍କବାଦୀ ମାନେ ସେପ୍ଟେମ୍ବର ୫ ତାରିଖରେ ଅପହରଣ କରିନେଇଥିଲେ ।

ଦେଶର ବୈଦେଶିକ ମନ୍ତ୍ରାଳୟ ଏହା ପ୍ରକାଶ କରିବା ପରେ ତାଙ୍କୁ ମୁକୁଳାଇବା ପାଇଁ ତାଙ୍କ ପରିବାର ଲୋକେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ନିକଟରେ ଲିଖିତ ଅନୁରୋଧ କରିଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏନେଇ ବୈଦେଶିକ ମନ୍ତ୍ରାଳୟ ସହିତ ଆଲୋଚନା କରିବା ପାଇଁ ଦିଲ୍ଲୀ ସ୍ଥିତ ଆବାସିକ କମିସନଙ୍କୁ ନିର୍ଦ୍ଦେଶ ଦେଇଥିଲେ ।

ଗୁରୁବାର ଅପରାହ୍ନ ସମୟରେ ରାଉଳ ଫୋନକରି ଆତଙ୍କବାଦୀମାନେ ତାଙ୍କୁ ସର୍ତ୍ତମୂଳକ ଭାବେ ମୁକ୍ତ କରିଥିବା ସମ୍ପର୍କରେ ସୂଚନା ଦେଇଥିବା ତାଙ୍କ ଭାଉଜ ମାନସୀ ନାୟକ କହିଛନ୍ତି ।

ଆତଙ୍କବାଦୀମାନେ ରଖିଥିବା ସର୍ତ୍ତ ଅନୁସାରେ ପ୍ରଭାସ ଲିବିଆରେ ଯେଉଁ ଡାକ୍ତରଖାନାରେ  କାମ କରୁଛନ୍ତି ସେଇଠି ହିଁ ରହି କାମକରିବେ । ତେବେ ରାଜ୍ୟ ଓ କେନ୍ଦ୍ର ସରକାର ତାଙ୍କ ମୁକ୍ତି ନେଇ କୌଣସି ସୂଚନା ପାଇନଥିବା ପ୍ରକାଶ କରିଛନ୍ତି ।

ଜଣେ ଫିଲିଫାଇନସ ମହିଳାଙ୍କୁ ବିବାହ କରି ପ୍ରଭାସ ଗତ ବାରବର୍ଷରୁ ଉର୍ଦ୍ଧ୍ଵ ସମୟ ଧରି ଲିବିଆରେ ରହି କାର୍ଯ୍ୟ କରୁଛନ୍ତି ।ସେଠାରେ ଅଶାନ୍ତ ପରିସ୍ଥିତି ଲାଗିରହିଥିବାରୁ ଯେ ପର୍ଯ୍ୟନ୍ତ ସେ ସୁରକ୍ଷିତ ଭାବେ ଗୃହକୁ ପ୍ରତ୍ୟାବର୍ତ୍ତନ ନ କରିଛନ୍ତି ସେ ପର୍ଯ୍ୟନ୍ତ ଆମେ ଆଶଙ୍କା ଭିତରେ ରହିବୁ ବୋଲି ପ୍ରଭାସଙ୍କ ସମ୍ପର୍କୀୟ ବିଭୁପ୍ରସାଦ ନାୟକ କହିଛନ୍ତି।

ଓଡିଶା ଡଟ କମ

ଓଡିଶା ଡଟ କମ ସଂବାଦ ଦାତା

କାନସ ( ଫ୍ରାନସ), ମଇ ୨୨ (ଓଡିଶା ଡଟ କମ) ଫ୍ରାନସର କାନସ ସହରରେ ମଇ ୧୩ରେ ଆରମ୍ଭ ହୋଇଥିବା ବିଶ୍ଵର ପ୍ରସିଦ୍ଧ ଅନ୍ତର୍ଜାତୀୟ ଚଳଚିତ୍ର ମହୋତ୍ସବରେ ଚଳିତ ବର୍ଷ ଓଡିଶାରୁ ଅତିକମରେ ପାଞ୍ଚ ଜଣ କଳାକାର, ପ୍ରଯୋଜକ ଓ ନିର୍ଦ୍ଦେଶକ ଅଂଶ ଗ୍ରହଣ କରି ବିଭିନ୍ନ ଚଳଚିତ୍ର ମାନଙ୍କର ପ୍ରଚାର ପ୍ରସାର କରି ରାଜ୍ୟର ଗୌରବ ବଢାଇଛନ୍ତି ।

ଏହି ମହୋତ୍ସବରେ ଯେଉଁମାନେ ଯୋଗ ଦେଇଛନ୍ତି ସେମାନେ ହେଲେ ପ୍ରସିଦ୍ଧ ଅଭିନେତ୍ରୀ ନନ୍ଦିତା ଦାସ, ଆଇ ଏମ କଲାମର ନିର୍ଦ୍ଦେଶକ ନୀଳ ମାଧବ ପଣ୍ଡା, ଚଳଚିତ୍ର ନିର୍ମାତା ଜିତେନ୍ଦ୍ର ମିଶ୍ର, କାଦମ୍ବିନୀ ମେଡିଆର ଦ୍ଵିତୀ ଚନ୍ଦ୍ରଗୁପ୍ତ ବିକ୍ରମାଦିତ୍ୟ ଓ ଓଡିଆ ଚଳଚିତ୍ର ଜିଅନ୍ତା ଭୁତର ପ୍ରଯୋଜକ ତଥା ନିର୍ମାତା ଅକ୍ଷୟ ପରିଜା ।

ହିମାଂଶୁ ଖଟୁଆଙ୍କ ଦ୍ଵାରା ନିର୍ଦ୍ଦେଶିତ ତଥା କାଦମ୍ବିନୀ ମେଡିଆଦ୍ଵାରା ପ୍ରଯୋଜିତ ଓଡିଆ ଚଳଚିତ୍ର କ୍ରାନ୍ତିଧାରା ମଇ ଅଠର ତାରିଖ ଦିନ ମହୋତ୍ସବରେ ମାର୍କେଟ ସ୍କ୍ରିନିଙ୍ଗ ବିଭାଗରେ ପ୍ରଦର୍ଶିତ ହୋଇଥିଲା ।

୬୮ତମ  ଅର୍ନ୍ତଜାତୀୟ କାନ୍ସ ଚଳଚିତ୍ର ମହୋତ୍ସବ ମଇ ୨୫ ତାରିଖ ପର୍ଯ୍ୟନ୍ତ ଚାଲିବ ।

ଓଡିଶା ଡଟ କମ

ଭୁବନେଶ୍ଵର, ଏପ୍ରିଲ ୩୦ (ଓଡିଶା ଡଟ କମ) ଭୂକମ୍ପ ପ୍ରଭାବିତ ନେପାଳରେ ରହୁଥିବା ଅଥବା ସେଠାକୁ ବୁଲିବାକୁ ଯାଇଥିବା ଓଡିଶାର ପ୍ରାୟ ସମସ୍ତ ୪୪୫ ଜଣ ବ୍ୟକ୍ତି ସୁରକ୍ଷିତ ଥିବାର ସୂଚନା ମିଳିଥିବା ସ୍ଵତନ୍ତ୍ର ରାଜସ୍ଵ କମିଶନର ପ୍ରଦୀପ୍ତ ମହାପାତ୍ର ଗୁରୁବାର ସୂଚନା ଦେଇଛନ୍ତି ।

ସେମାନଙ୍କ ମଧ୍ୟରୁ ୩୦ ଜଣ ଦେଶକୁ ଅଥବା ରାଜ୍ୟକୁ ଫେରିଆସିଥିବା ସେ କହିଛନ୍ତି । କାଠମାଣ୍ଡୁ ବିମାନବନ୍ଦର ରେ ବ୍ୟାପକ ଭିଡ ଥିବାରୁ କେତେକ ବ୍ୟକ୍ତି ସଡକ ମାର୍ଗରେ ପ୍ରତ୍ୟାବର୍ତନ କରିଥିବା ସେ କହିଛନ୍ତି ।

କେନ୍ଦ୍ରାପଡାରୁ ସର୍ବାଧିକ ୩୭୬ ଜଣ ନେପାଳରେ ଭୂମିକମ୍ପ ସମୟରେ ଥିବା ସୂଚନା ମିଳିଥିବା ବେଳେ, ବଲାଙ୍ଗିର, ଖୋର୍ଦ୍ଧା, କେନ୍ଦୁଝର, ନବରଙ୍ଗପୁର ଓ ଅନ୍ୟାନ୍ୟ ଜିଲ୍ଲାରୁ ଯଥାକ୍ରମେ ୩, ୯, ୪୮, ୧, ଓ ୮ ଜଣ ଥିବା ସୂଚନା ମିଳିଛି ।

ଏହା ମଧ୍ୟରେ କେନ୍ଦ୍ରାପଡା ଜିଲ୍ଲାର ୧୮ ଜଣ, ବଲାଙ୍ଗିରର ୮, ନବରଙ୍ଗପୁରର ୧, ଏବଂ ଅନ୍ୟ ଜିଲ୍ଲାର ଆଠ ଜଣ ପ୍ରତ୍ୟାବର୍ତ୍ତନ କରିଥିବା ସମ୍ପୃକ୍ତ ଜିଲ୍ଲାର ଜିଲ୍ଲାପାଳ ମାନେ ସୂଚନା ଦେଇଥିବା ସେ କହିଛନ୍ତି ।

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର, ଏପ୍ରିଲ ୨୮ (ଓଡିଶା ଡଟ କମ) ଭୂକମ୍ପ ପିଡୀତ ନେପାଳରେ ରହୁଥିବା ଓଡିଆଙ୍କୁ ସହାୟତା ଯୋଗାଇବା ଉଦ୍ଦେଶ୍ୟରେ ରାଜ୍ୟସରକାର ଦିଲ୍ଲୀରେ ଏକ ହେଲ୍ପଲାଇନ ଆରମ୍ଭ କରିବା ସହ ବିମାନ ବନ୍ଦରର ତିନି ନମ୍ବର ଟର୍ମିନାଲରେ ଏକ ହେଲ୍ପ ଡେସ୍କ ଆରମ୍ଭ କରିଛନ୍ତି ।

ସରକାରଙ୍କ ମୁଖ୍ୟ ରେସିଡେଣ୍ଟ କମିଶନରଙ୍କ କାର୍ୟାଳୟରେ ଆରମ୍ଭ କରାଯାଇଥିବା ଏହି ହେଲ୍ପଲାଇନର ନମ୍ବର ହେଲା ୦୧୧-୨୪୬୭୯୨୦୧ , ପିବିଏକ୍ସ ଏକ୍ସଟେନସନ -୦୪ ଓ ମୋବାଇଲ ନମ୍ବର ହେଲା ୦୭୮୦୩୮୫୦୦୦୫ ।

ନେପାଳରେ ଥିବା ଓଡିଆ ମାନଙ୍କୁ ଘରକୁ ସୁରକ୍ଷିତ ଫେରାଇଆଣିବା ପାଇଁ ସରକାରଙ୍କ ମୁଖ୍ୟ ରେସିଡେଣ୍ଟ କମିଶନର ସେଠାକାର କତୃପକ୍ଷଙ୍କ ସହ ନିୟମିତ ଯୋଗାଯୋଗ ରଖିଥିବା, ସ୍ପେଶାଲ ରିଲିଫ କମିଶନର ପ୍ରଦୀପ୍ତ ମହାପାତ୍ର ଏକ ବିବୃତି ରେ ଜଣାଇଛନ୍ତି ।

ଏୟାରପୋର୍ଟ ନିକଟରେ ଥିବା ଓଡିଶା ସଦନରେ ଦଶଟି କୋଠରି ରିଜର୍ଭ ରଖା ଯାଇଥିବା ବେଳେ ରେଳ କତ୍ତୃପକ୍ଷଙ୍କୁ ବିମାନ ବନ୍ଦରରେ ଏକ ସହାୟତା କେନ୍ଦ୍ର ଖୋଲିବା ପାଇଁ ଅନୁରୋଧ କରାଯାଇଛି ।

ନେପାଳରୁ ଆଠଜଣ ଓଡିଆ ସୁରକ୍ଷିତ ଭାବେ ସୋମବାର ନୂଆ ଦିଲ୍ଲୀ ରେ ପହଞ୍ଚିଥିବା ବେଳେ ସମସ୍ତେ ନିଜ ନିଜ ଘର ଅଭିମୁଖେ ଯାତ୍ରା କରିଛନ୍ତି ।

ସରକାରଙ୍କୁ ମିଳିଥିବା ସୂଚନା ଅନୁସାରେ ନେପାଳରେ କେନ୍ଦ୍ରପଡା ଜିଲ୍ଲାର ପଟ୍ଟାମୁଣ୍ଡାଇ ଓ ଆଳି ବ୍ଲକର ୩୩୫ ଜଣ ରହୁଥିବା ବେଳେ ସେମାନଙ୍କ ମଧ୍ୟରୁ ଅରୁତମଣୋହୀ ଗ୍ରାମର ବୁଲୁ କୁମାର ସେଠୀ, କ୍ଷୀରୋଦ ବେହେରା, ମନୋଜ ବେହେରା ଓ ବଡାଙ୍କୋ ଗାଁର ମମତା ବେହେରା ସାମାନ୍ୟ ଆହତ ହୋଇଥିବା ବେଳେ ଅନ୍ୟମାନେ ସୁରକ୍ଷିତ ଅଛନ୍ତି ।

ମିଳିଥିବା ଅନ୍ୟ ଏକ ରିପୋର୍ଟ ଅନୁସାରେ ବଲାଙ୍ଗିର ଜିଲ୍ଲାର ବିଧୁଭୂଷଣ ମହାପାତ୍ର, ପ୍ର୍ଜ୍ଞା ପାରମିତା ଗୁରୁ ଓ ଅଦ୍ରିକା ମହାପାତ୍ର ଭୂମିକମ୍ପ ଦ୍ଵାରା ପ୍ରଭାବିତ ହୋଇ ଏଟିମୋର, ଲାଳିପୁର ନେପାଳରେ ଥିବା ରିଲିଫ କ୍ୟାମ୍ପରେ ଆଶ୍ରୟ ନେଇ ଭାରତରୁ ପଠାଯାଇଥିବା ସାହାଯ୍ୟକୁ ଅପେକ୍ଷା କରିଛନ୍ତି ।

ସେହିପରି ଝାରସୁଗୁଡାରେ ଥିବା ରାଜ୍ୟ ଆର୍ମଡ ପୁଲିସ ବେଟାଲିୟନରେ କାର୍ଯ୍ୟରତ ନେପାଳର ୯୦୦ କର୍ମଚାରୀଙ୍କ ମଧ୍ୟରୁ ଦଶ ଜଣ ନିଜ ଘରକୁ ଯାଇଥିଲେ । ସେମାନେ ସମସ୍ତେ ସୁରକ୍ଷିତ ଥିବା ଖବର ମିଳିଛି ।

ଓଡିଶା ଡଟ କମ

କେଦାର ମିଶ୍ର

ଏପ୍ରିଲ୍‍ ଖରାର ତାତି ଯେତିକି ବଢ଼ୁଛି ରାଜଧାନୀ ଭୁବନେଶ୍ୱରରେ ମିଡିଆ ବଜାର ସେତିକି ସର୍‍ଗରମ୍‍ ହୋଇ ଉଠୁଛି । ଏଇ ଅଳ୍ପ କେଇମାସ ଭିତରେ ଇଲେକ୍‍ଟ୍ରୋନିକ୍ସ ମିଡିଆରେ ଏତେ ଅଧିକ ହଲ୍‍ଚଲ୍‍ ଦେଖା ଦେଇଛି ଯେ ତାକୁ ନେଇ ଗୋଟେ ବହି ଲେଖା ଯାଇପାରିବ ।

୯୦ ଦଶକ ପର୍ଯ୍ୟନ୍ତ ଓଡିଆ ଦୂରଦର୍ଶନ ଓ ଆକାଶବାଣୀର ସମ୍ବାଦକୁ ଆମେ ଦୈବବାଣୀ ବୋଲି ଭାବୁଥିଲୁ । ଯତୀନ୍‍ ଦାସ୍‍ କିମ୍ବା ଉପେନ୍ଦ୍ର କୁମାର ପାହାଡାସିଂଙ୍କ ଗୁରୁଗମ୍ଭୀର ସ୍ୱରରେ ଯେଉଁ ଖବର ରେଡିଓରୁ ଭାସି ଆସୁଥିଲା ତାହା ଥିଲା ଆମ ପାଇଁ ତ୍ୱରିତ ଖବର ପାଇବାର ଏକମାତ୍ର ମାଧ୍ୟମ । ତେବେ ସେ ଶୂନ୍ୟବାଣୀର ପରମ୍ପରା ୯୦ ଦଶକ ବେଳକୁ ନବକଳେବର ଗ୍ରହଣ କଲା ।

ପ୍ରଥମେ ରାମୋଜୀ ରାଓ ଘରୋଇ ଟିଭି ଚ୍ୟାନେଲ ଓଡିଆ ସମ୍ବାଦ ପ୍ରସାରଣ ଜଗତକୁ ପ୍ରବେଶ କଲେ । ୯୦ ଦଶକରେ ‘ଇ’ ଟିଭି ବ୍ୟାବସାୟିକ ଖବର ପ୍ରସାରଣର ଏକ ନୂଆ ଧାରା ଓ ଶୈଳୀ ତିଆରି କଲା । ଦୂର୍ଭାଗ୍ୟ କ୍ରମେ ‘ଇ’ ଟିଭିର ସେଇ ଧାରା ଓ ଶୈଳୀ ଆଜି ପର୍ଯ୍ୟନ୍ତ ଇଲେକ୍‍ଟ୍ରୋନିକ୍ସ ଗଣମାଧ୍ୟମର ମାର୍ଗ ଦର୍ଶକ ହୋଇ ରହିଛି । ଇତିମଧ୍ୟରେ ଓଡିଆ ଟିଭି ଚ୍ୟାନେଲ୍‍ର ସଂଖ୍ୟା ବଢ଼ିଛି ହେଲେ ଖବର ପ୍ରସାରଣ ଓ ବିଶ୍ଲେଷଣର ଶୈଳୀ ଯେମିତିକି ସେମିତି ରହିଛି ।

ଗତ କିଛି ବର୍ଷ ଭିତରେ ରାଜ୍ୟରେ ଅନେକ ଟିଭି ଚ୍ୟାନେଲ ଆତ୍ମପ୍ରକାଶ କରିଛି । ବଡ ବଡ ବ୍ୟବସାୟୀକ ସଂସ୍ଥା ମେଡିଆର ଏହି ଗ୍ଲେମର ଦୁନିଆଁରେ ପାଦଥାପିଛନ୍ତି ଅଥବା ପାଦ ଥାପିବାକୁ ଯାଉଛନ୍ତି ।ପୂର୍ବରୁ ଶିକ୍ଷା ବ୍ୟବସାୟରେ ଜଡିତ କୌସ୍ତୁଭ ଗ୍ରୁପ୍‍ର ମାଲିକ ନକ୍ଷତ୍ର ଟିଭି ପ୍ରତିଷ୍ଠା କରିଥିବା ବେଳେ ଶିକ୍ଷା ଓ ଅନୁସନ୍ଧାନର ମନୋଜ ନାୟକ ନିକଟରେ ନିଉଜ୍‍ ୭ ଆରମ୍ଭ କରିଛନ୍ତି ।

କିଟ୍‍ ଓ କିସ ର ପ୍ରତିଷ୍ଠତା ଅଚ୍ୟୁତ ସାମନ୍ତଙ୍କ ଉଦ୍ୟମରେ କଳିଙ୍ଗ ଟିଭି ଆରମ୍ଭ ହେବାକୁ ଯାଉଛି । ଆସନ୍ତା ମାସରୁ ଏହାର ସ୍ଵାଭାବିକ ପ୍ରସାରଣ ଆରମ୍ଭ ହେବ । ସେହିପରି ଖଣି ବ୍ୟବସାୟିକ ସଂସ୍ଥା ସିରାଜ୍‍ଉଦ୍ଧିନ୍‍ ଏଣ୍ଡକୋ ପ୍ରଥମେ ଖବରକାଗଜ ଓ ପରବର୍ତ୍ତୀ ସମୟରେ ଟିଭି ଚ୍ୟାନେଲ୍‍ ବ୍ୟବସାୟରେ ପ୍ରବେଶ କରିବେ ବୋଲି ଶୁଣାଯାଉଛି ।

ଦୁଇଟି ବ୍ୟବସାୟିକ ସଂସ୍ଥା ଇତିମଧ୍ୟରେ ଚଳ ଚଞ୍ଚଳ ହୋଇ ସାରିଛନ୍ତି । ଜିନ୍ଦଲ ଗ୍ରୁପ୍‍ର ଫୋକସ୍‍ ଟିଭି ଓ ଜୀ ଗ୍ରୁପ୍‍ର ଜୀ କଳିଙ୍ଗ ଏବେ ପ୍ରସାରିତ ହେଉଛି ।

ଏହା ପୂର୍ବରୁ ଚିଟ ଫଣ୍ଡ ଦୁର୍ନୀତିରେ ଫସିଥିବା ସି ସୋର ଗ୍ରୁପ ଦ୍ୱାରା ଆରମ୍ଭ ହୋଇଥିବା ଏସ୍‍ ଟିଭି ବନ୍ଦ ହୋଇଯାଇଥିବା ବେଳେ କାମୟାବ୍‍ ଟିଭି ଦରମଲା ଅବସ୍ଥାରେ ବଞ୍ଚିରହିଛି । ଏମ୍‍ବିସି ଟିଭି ଚିଟ୍‍ଫଣ୍ଡର କାଳିମା ସତ୍ତ୍ୱେ ନିଜର ସ୍ଥିତି ବଜାୟ ରଖିଛି ।

କୋଟି କୋଟି ଟଙ୍କାର ପୁଞ୍ଜି ନିବେଶ କରି ଟେଲିଭିଜନ୍‍ ଚ୍ୟାନେଲ୍‍ ବସାଇବାର ସ୍ୱପ୍ନ ପଛରେ ବ୍ୟାବସାୟିକ ଲାଭର ସମ୍ଭାବନା ରହିଛି କି ? ଏ ପ୍ରଶ୍ନ ଅବାନ୍ତର । ଓଡିଆରେ ଚାଲୁଥିବା କେବଳ ‘ଓ’ ଟିଭିକୁ ବାଦ୍‍ ଦେଲେ ଆଉ କୌଣସି ଚ୍ୟାନେଲ୍‍ ଲାଭ କରୁଥିବାର ରେକର୍ଡ ନାହିଁ ।

ଆପାତତଃ ଟିଭି ଚ୍ୟାନେଲ୍‍ ହେଉଛି ପ୍ରାରମ୍ଭିକ ଭାବରେ ନିଶ୍ଚିତ କ୍ଷତି ସହିବାର ଏକ ମାଧ୍ୟମ । କ୍ଷତିରେ ଚାଲୁଥିବା ସତ୍ତ୍ୱେ ଟିଭି ଚ୍ୟାନେଲ୍‍ ବସାଇବାକୁ ଏପ୍ରକାର ଅହେତୁକ ଆଗ୍ରହର କାରଣ କଣ ? ଏହି ପ୍ରଶ୍ନ ଅନେକଙ୍କ ମନରେ ଉଙ୍କି ମାରୁଛି ।

ଗଣମାଧ୍ୟମରେ ପ୍ରତିଯୋଗିତା ଏକ ଶୁଭ ସୂଚନା । ପ୍ରତିଯୋଗିତା ମାଧ୍ୟମରେ ହିଁ ଖବରର ମାନ, ନିରପେକ୍ଷତା ଓ ପ୍ରଭାବ ବଢ଼ିଥାଏ । ନୂଆ ଶୈଳୀ ତଥା ବିଚାରଧାରା ଆସିଥାଏ । ତେବେ ଗତ କେତେ ବର୍ଷର ଟେଲିଭିଜନ୍‍ ଅନୁଭୂତିରୁ କହି ହେବ ଯେ ଖବର ପ୍ରସାରଣର ଶୈଳୀ ଓଡିଆ ଦର୍ଶକଙ୍କ ବ୍ୟାପକ ଆଦୃତି ଲାଭ କରି ନାହିଁ । ସୁତରାଂ ଟିଆର୍‍ପି ଯୁଦ୍ଧରେ ବ୍ୟବସାୟୀକ ପୁଞ୍ଜିନିବେଶ ସତ୍ତ୍ୱେ ଫୋକସ୍‍ ଓ ଜୀ କଳିଙ୍ଗ ଢ଼େର୍‍ ପଛରେ ରହିଛନ୍ତି ।

ଗତ ତିନି ସପ୍ତାହର ଟିଆର୍‍ପି ଅନୁଧ୍ୟାନ କଲେ ଆମେ ଦେଖିବା ଯେ ‘ଓ’ ଟିଭି ୧୪୧-୧୪୫-୧୦୯ ପଏଣ୍ଟ ପାଇ ଆଗରେ ରହିଛି । ଏମ୍‍ବିସି ଟିଭି ୧୦୩-୧୧୭-୧୨୧ ପାଇ ତା ପଛକୁ ରହିଛି ।

ଫୋକସ୍‍ ଟିଭି ୨୮-୩୧-୨୬ ପାଇ ବହୁ ପଛରେ ରହିଛନ୍ତି । ଜୀ କଳିଙ୍ଗ ବହୁ ରାଜନୈତିକ ତୁମ୍ବିତୋଫାନ ସତ୍ତ୍ୱେ ୨୧-୨୩-୨୦ରେ ସୀମିତ ରହିଛି । ନୂଆ ଆସିଥିବା ନିଉଜ୍‍ ୭ ଟିଆର୍‍ପି ଦୌଡରେ ଢ଼େର୍‍ ପଛୁଆ ରହିଛି । ଏହାର ରେଟିଂ ହେଉଛି ୧୧-୧୧-୧୪ । ଏହି ସବୁ ପ୍ରତିଯୋଗିତାରେ ସୌମ୍ୟରଞ୍ଜନ ପଟନାୟକଙ୍କ କନକ ଟିଭିର ନିଜସ୍ୱ ଗଣମାଧ୍ୟମ ଅଭିଜ୍ଞତା ରହିଛି ।

ରାଜ୍ୟର ସବୁଠୁ ଅଧିକ ପ୍ରସାରିତ ଖବରକାଗଜ ‘ସମ୍ବାଦ’ ପାଖରେ ଏହାର ମାଲିକାନା ରହିଥିଲେ ମଧ୍ୟ ଏହାର ବିଶେଷ ଉନ୍ନତି ପରିଲକ୍ଷିତ ହୋଇନାହିଁ । ଟିଆର୍‍ପି ରେଟିଂରେ ଗତ ୩ ସପ୍ତାହରେ ଏହାର ସ୍ଥିତି ହେଉଛି ୧୮-୧୮-୧୬ ।

ବ୍ୟବସାୟୀ ଓ କର୍ପୋରେଟ୍‍ଙ୍କ ଏହି ଅସୁସ୍ଥ ପ୍ରତିଦ୍ୱନ୍ଦ୍ୱିତାରେ ସବୁଠୁ ଅଧିକ କ୍ଷତିଗ୍ରସ୍ତ ହେଉଛି ଓଡିଆ ସାମ୍ବାଦିକଙ୍କର ବୃତ୍ତିଗତ ସୁରକ୍ଷା ତଥା ସାମାଜିକ ମର୍ଯ୍ୟାଦା । ଯାତ୍ରାପାର୍ଟିରେ ଅଭିନେତା ବଦଳିଲା ଭଳି ପ୍ରତିମାସ ଟେଲିଭିଜନରେ ମୁହଁ ବଦଳୁଛି ।

ଅନେକ ସମୟରେ ବରିଷ୍ଠ ସାମ୍ବାଦିକମାନଙ୍କୁ ଅତ୍ୟନ୍ତ ଅପମାନଜନକ ସ୍ଥିତିରେ ଚ୍ୟାନେଲ୍‍ରୁ ବିଦା କରି ଦିଆଯାଉଛି । କିନ୍ତୁ ପାୱାର କରିଡରର ନିକଟତର ଥିବା କେତେକ ସାମ୍ବାଦିକଙ୍କର ହିଁ କଚେପୁଅ ବାର ହୋଇଛି ।

ଫୋନ୍‍ : ୯୪୩୭୧୫୪୪୪୫

 

(ଓଡ଼ିଶା ଡ଼ଟ୍ କମରେ ପ୍ରକାଶିତ ଲେଖା/ରିପୋର୍ଟ ଓ ସ୍ତମ୍ଭ ଲେଖକ/ଲେଖିକାଙ୍କର ନିଜସ୍ୱ ମତ ) ଓଡିଶା ଡଟ୍ କମ ଘୋଷଣାନାମା