କଟକ

ଓଡିଶା ଡଟ୍ କମ୍ ସଂବାଦ ଦାତା

ଭୁବନେଶ୍ଵର, ଡିସେମ୍ବର ୧୬ (ଓଡିଶା ଡଟ୍ କମ୍) କଟକ ଜିଲ୍ଲାର ଏକ ଗାଁରେ ଚଢଉକରି ଆତଙ୍କବାଦୀ ସଂଗଠନ ଅଲକାଏଦା ସହ ସମ୍ପର୍କ ରଖିଥିବା ଅଭିଯୋଗରେ ଜଣେ ବ୍ୟକ୍ତିଙ୍କୁ ଗିରଫ କରିଥିବା ପୁଲିସ ବୁଧବାର କହିଛି ।

ଜଗତପୁର ଥାନାଠାରୁ ୫ କିଲୋମିଟର ଦୂର ପଶ୍ଚିମକଛ ଗାଁରୁ ଗିରଫ ହୋଇଥିବା ୩୭ ବର୍ଷ ବୟସ୍କ ଏହି ବ୍ୟକ୍ତିଙ୍କ ନାଁ ହେଲା ମୌଲବୀ ମହମ୍ମଦ ଅବଦୁଲ ରେହମାନ ।

ସେ ପାକିସ୍ତାନ, ଦୁବାଇ, ସାଉଦି ଆରବ ଆଦି ସ୍ଥାନ ଭ୍ରମଣ କରିବା ସହ ଆଫଗାନିସ୍ଥାନ ସୀମାରେ ଆତଙ୍କବାଦ ତାଲିମ ହାସଲ କରିଥିବା ପୁଲିସ ସନ୍ଦେହ କରୁଛି ।

ରାଜ୍ୟ ଓ ଦିଲ୍ଲୀ ପୁଲିସ ମିଳିତ ଭାବେ କରିଥିବା ଏହି ଚଢାଉରେ ରେହମାନ ଘରୁ ମୋବାଇଲ୍ ଫୋନ, ଟାବଲେଟ୍ , ପାସପୋର୍ଟ ଆଦି ଜବତ କରାଯାଇଛି ।

୨୦୧୪ରେ ଭାରତରେ ଆତଙ୍କବାଦୀ ଗତିବିଧି କରିବା ପାଇଁ ଅଲକାଏଦା ଅଲକାଏଦା ଇଣ୍ଡିଆନ୍ ସବକଣ୍ଟିନେଣ୍ଟ୍ (ଏକ୍ୟୁଆଇଏସ୍) ନାମକ ସଂଗଠନ ଗଠନ କରିଥିଲା । ଅବଦୁଲ ଏହି ସଂଗଠନରେ ଯୋଗ ଦେବା ପାଇଁ ଲୋକଙ୍କୁ ମତଉଥିଲା ବୋଲି ପୁଲିସ ଜାଣିବାକୁ ପାଇଛି ।

ଦିଲ୍ଲୀ ପୁଲିସ ନିକଟରେ ମହମ୍ମଦ ଆସିଫ ନାମକ ଜଣେ ସନ୍ଦିଗ୍ଧ ଆତଙ୍କବାଦିକୁ ଉତ୍ତରପ୍ରଦେଶରୁ ଗିରଫ କରିଛି । ଆସିଫ ଓ ଅନ୍ୟ ଦୁଇଜଣଙ୍କ ସହ ଅବଦୁଲ ୨୩ ଜୁନ୍ ୨୦୧୩ରେ ତାଲିମ ପାଇଁ ପାଇଁ ପାକିସ୍ତାନ ଯାଇଥିଲେ ବୋଲି ପୋଲିସ ସୂଚନା ଦେଇଛି ।

ରେହମାନଙ୍କ ଟାଙ୍ଗୀ ଅଞ୍ଚଳରେ ଏକ ମଦ୍ରାସା ରହିଛି। ସେଠାରେ ପଢୁଥିବା ଅଧିକାଂଶ ଛାତ୍ର ହେଲେ ଝାଡ଼ଖଣ୍ଡର । ରାଜ୍ୟର ଏକ ଅଦାଲତରେ ତାକୁ ହାଜର କରାଯିବା  ପରେ ପୋଲିସ ଅଧିକ ପଚରା ଉଚୁରା ପାଇଁ ତାକୁ ଦିଲ୍ଲୀ ନେଇଛି ।

୨୦୦୧ରେ ଅବଦୁଲଙ୍କ ବଡ଼ଭାଇ ତାହିର ଅଲ୍ଲୀଙ୍କୁ କଲିକତାରେ ଥିବା ଆମେରିକାର ଦୂତାବାସ ନିକଟରେ ହୋଇଥିବା ଏକ ବିସ୍ଫୋରଣ ଘଟଣାରେ ଗିରଫ କରାଯାଇଥିଲା ।

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

କଟକ,ମଇ ୩୧(ଓଡିଶା ଡଟ୍ କମ୍): ଶନିବାର ପ୍ରାତଃ ସମୟରେ ପୂର୍ବତନ ଜଜ ପି.କେ ମହାନ୍ତିଙ୍କର କଟକର ସିଡ଼ିଏରେ ଥିବା ବାସଗୃହରେ ହୋଇଥିବା ଡକାୟତି ଘଟଣାରେ ପୁଲିସ ତାଙ୍କ ଘରେ କାମ କରୁଥିବା ଜଣେ ବ୍ୟକ୍ତିକୁ ଅଟକ ରଖି ପଚରା ଉଚରା କରୁଥିବା ରବିବାର କହିଛି ।

ପ୍ରାୟ ୩ ଟାରୁ ୪:୩୦ ମଧ୍ୟରେ ହୋଇଥିବା ଏହି ଘଟଣାରେ ଶ୍ରୀ ମହାନ୍ତିଙ୍କ ଘରର ମେନ୍ ଫାଟକ ଭାଙ୍ଗି କିଛି ଦୁର୍ବୁତ୍ତ ତାଙ୍କ ଶୋଇବା ଘରେ ପଶିଯାଇଥିଲେ । ମହାନ୍ତି ଓ ତାଙ୍କ ସ୍ତ୍ରୀଙ୍କ ପାଟିକୁ ସେମାନେ କପଡାରେ ବାନ୍ଧିବା ସହ ଦଉଡିରେ ଉଭୟଙ୍କ ହାତକୁ ଖଟରେ ବାନ୍ଧି ଦେଇଥିଲେ ।

ତା’ପରେ ସେମାନେ ମହାନ୍ତିଙ୍କ ସ୍ତ୍ରୀଙ୍କ ଠାରୁ ଚାବି ଆଣି ଲକ୍ଷାଧିକ ଟଙ୍କା ଓ ଚାରୋଟି ସୁନା ଚୂଡି, କାନ ଫୁଲ, ସୁନା ମୁଦି, ଓ ପାଞ୍ଚ ଟି ସୁନା ହାର ଆଦି ଲୁଟି ସାରି ଗଲାବେଳେ ତାଙ୍କ କାର କାରର ଚାବି ନେଇ ସେଥିରେ ଫେରାର ହୋଇ ଯାଇଥିଲେ ।

ଶନିବାର ପୁଲିସ ଉକ୍ତ ଗାଡିକୁ ଭୁବନେଶ୍ଵରର ରସୁଲଗଡ ନିକଟରେ ପାଇ ଉଦ୍ଧାର କରିଥିଲେ । ଶ୍ରୀ ମହାନ୍ତି ହେଉଛନ୍ତି ଓଡିଶା ହାଇ କୋର୍ଟର ଜଣେ ପୂର୍ବତନ ବିଚାରପତି । ସେ ପିପିଲି ଗଣ ଦୁଷ୍କର୍ମ ଘଟଣା ଓ କଳିଙ୍ଗ ନଗର ହାତ ପାପୁଲି ଘଟଣାର ତଦନ୍ତ କରୁଛନ୍ତି ।

ସେ ବିଚାରପତି ଥିବା ସମୟରେ ଦେଇଥିବା ଫଇସଲା ସହ ଏହି ଡକାୟତି ଘଟନାର  କୌଣସି ସମ୍ପର୍କ ଅଛିକି ନାହିଁ  ତାହା ମଧ୍ୟ ପୁଲିସ ତଦନ୍ତ ବେଳେ ଅନୁଧ୍ୟାନ କରୁଥିବା ଜଣେ ପୋଲିସ ଅଧିକାରୀ ଓଡିଶା ଡଟ କମ କୁ କହିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍କମ୍ ସମ୍ବାଦଦାତା

ଭୁବନେଶ୍ୱର,ଫେବୃଆରି ୫(ଓଡିଶା ଡଟ୍ କମ୍ )-ମହିଳାଙ୍କ ବିରୋଧରେ ସଙ୍ଗଠିତ ହେଉଥିବା ଅପରାଧଜନିତ ମାମଲାର ବିଚାର ପାଇଁ ରାଜ୍ୟର ପ୍ରଥମ ସ୍ୱତନ୍ତ୍ର ଟ୍ରାକ କୋର୍ଟ ସୋମବାର ଦିନ କଟକସ୍ଥିତ ସିଭିଲକୋର୍ଟ ପରିସରରେ ଉଦଘାଟିତ ହୋଇଯାଇଛି ।

ଉଦଘାଟନୀ ଉତ୍ସବରେ ଓଡ଼ିଶା ଉଚ୍ଚନ୍ୟାୟାଳୟର ବିଚାରପତି ମଦନମୋହନ ଦାସ, ବିଚାରପତି ଇନ୍ଦ୍ରଜିତ ମହାନ୍ତି, ବିଚାରପତି କୁମାରୀ ସଞ୍ଜୁ ପଣ୍ଡା, ବିଚାରପତି ବିଜୟକୁମାର ନାୟକ, ବିଚାରପତି ସଞ୍ଜୟକୁମାର ମିଶ୍ର, ବିଚାରପତି ବୀରକିଶୋର ମିଶ୍ର ଓ ବିଚାରପତି ରଘୁବୀର ଦାଶ ଯୋଗ ଦେଇଥିଲେ ।

ଏହି ସ୍ୱତନ୍ତ୍ର ଟ୍ରାକ ଅଦାଲତରେ ମହିଳାଙ୍କ ବିରୋଧରେ ହେଉଥିବା ବିଭିନ୍ନ ଅପରାଧ ତଥା ଅପହରଣ, ବଳାତ୍କାର, ଗଣ ବଳାତ୍କାର ଜନିତ ହତ୍ୟା ଆଦି ମାମଲାର ତ୍ୱରିତ ଫଇସଲା କରାଯିବ ।

ମହଳିାଙ୍କ ବିରୋଧରେ ହେଉଥିବା ଅପରାଧଜନିତ ମୋକଦ୍ଧମା ହ୍ରାସ କରିବା ସକାଶେ ନିକଟରେ ଫୁଲକୋର୍ଟରେ ପ୍ରସ୍ତାବ ଗ୍ରହଣ କରାଯାଇ ତୁରନ୍ତ ରାଜ୍ୟର ୩୦ଟି ଜିଲାରେ ‘ସ୍ୱତନ୍ତ୍ର ଟ୍ରାକ କୋର୍ଟ’ର୍ ଖୋଲିବାକୁ ନିଷ୍ପତି ଗ୍ରହଣ କରାଯାଇଥିଲା ।

ବିଶେଷକରି ଭାରତୀୟ ପିଙ୍ଗଳ କୋର୍ଡର ଦଫା ୩୬୬, ୩୭୬, ୩୫୪, ୫୦୯, ୪୯୩ ଓ ୪୯୮(କ) ଧାରାକୁ ନେଇ ପୀଡ଼ିତାଙ୍କୁ ତ୍ୱରିତ ନ୍ୟାୟ ପ୍ରଦାନ କରାଯିବ ।

ବର୍ତମାନ ସାରା ରାଜ୍ୟରେ ୨୫ ହଜାରରୁ ଊର୍ଦ୍ଧ୍ଵ ଏହି ଧରଣର ମୋକଦ୍ଧମା ବିଚାର ପାଇଁ ପଡିରହିଥିବାବେଳେ ସେଥିମଧ୍ୟରୁ ୩ ହଜାର ୬୭୯ଟି ବଳାତ୍କାର ମାମଲା ବିଚାରାଧୀନ ରହିଛି । ବିଚାରପାଇଁ ପଡ଼ିିରହିଥିବା ବଳାତ୍କାର ମାମଲା ମଧ୍ୟରୁ ୧୫୬୬ଟି ମାମଲା ତଦନ୍ତ ସ୍ତରରେ ରହିଛି ବୋଲି ଏକ ଆକଳନରୁ ଜଣାପଡିଛି ।

କଟକ ଜିଲା ଓ ଦୌରା ଜଜ ଶତ୍ରୁଘ୍ନ ପୂଜାହାରୀଙ୍କ ପ୍ରତାକ୍ଷ ତତ୍ୱାବଧାନ ଓ ଅନ୍ୟ ବିଚାର ବିଭାଗୀୟ ଅଧିକାରୀଙ୍କ ସହାୟତାରେ ଏହି ଉଦଘାଟନୀ ଉତ୍ସବ ଅନୁଷ୍ଠିତ ହୋଇଥିଲା ।

ଓଡିଶା ଡଟ୍କମ୍

ଓଡିଶା ଡଟ୍ କମ୍ ସମ୍ବାଦଦାତା

କଟକ, ଜାନୁଆରୀ ୨୪(ଓଡିଶା ଡଟ୍ କମ୍)- ବଜରଙ୍ଗ ଦଳ ପକ୍ଷରୁ ମହିଳା ପାକିସ୍ଥାନ କ୍ରିକେଟ ଟିମ ଗସ୍ତକୁ ବିରୋଧ କରି ଗୁରୁବାର ୧୨ଘଣ୍ଟିଆ କଟକ ବନ୍ଦ ପାଳନ ଶାନ୍ତିପୂର୍ଣ୍ଣ ଭାବେରେ ଅନୁଷ୍ଠିତ ହୋଇଯାଇଛି ।

ଏହି ବନ୍ଦପାଳନରେ ହିନ୍ଦୁ ଜାଗରଣ ସାମ୍ମୁଖ୍ୟ, ବଜରଙ୍ଗଦଳ, ରାଷ୍ଟ୍ର ସୁରକ୍ଷା ମଞ୍ଚ, ଉତ୍କଳ ଭାରତ ଆଦି ସଂଗଠନ ସାମିଲ ହୋଇ ଟାୟାର ଜାଳି ବିକ୍ଷୋଭ କରିଥିଲେ । ଏହି ବନ୍ଦ ପାଳନ ବେଳେ ଦୋକାନ ବଜାର ବନ୍ଦ ରହିବା ସହିତ,ଗାଡି ଚଳାଚଳ ବାଧାପ୍ରାପ୍ତ ହୋଇଥିଲା ।

ବିଭିନ୍ନ ସରକାରୀ ଓ ବେସରକାରୀ ଅନୁଷ୍ଠାନ ବନ୍ଦ ରହିବା ସହିତ ଜନଜୀବନ ଉପରେ ବ୍ୟାପକ ପ୍ରଭାବ ପଡିଥିଲା । ପିକେଟିଂକରି ବଜରଙ୍ଗ ଦଳର ଶହଶହ କର୍ମୀ ଗିରଫ ହୋଇଥିଲେ ।

ବଜରଙ୍କ ଦଳ ତରୁଫରୁ କୁହାଯାଇଛି ପାକିସ୍ତାନ କ୍ରିକେଟ ଟିମକୁ ଭାରତ ମାଟିରେ ଖେଳାଇ ନ ଦେବା ପାଇଁ କଟକ ବାସୀ ସରକାରକୁ ଜଣାଇ ଦେଇଛନ୍ତି । ସକାଳ ସାତଟାରୁ ସନ୍ଧ୍ୟା ୭ଟା ଯାଏ ବନ୍ଦ କଟକ ସହରକୁ ବନ୍ଦକରି ଏହା ପ୍ରମାଣିତ କରିଦେଇଛନ୍ତି ।

ନିକଟରେ ଭାରତୀୟ ଜବାନଙ୍କ ମୁଣ୍ଡକାଟି ନେବା ପରେ ଏହାର ପ୍ରତିବାଦରେ ପାକିସ୍ତାନ ଖେଳାଳିଙ୍କୁ ଭାରତରେ ପ୍ରବେଶ ପାଇଁ ଦଳ ବିରୋଧ କରୁଛି । ରାଜ୍ୟ ସରକାର ସେମାନଙ୍କୁ ପୂର୍ଣ୍ଣ ସୁରକ୍ଷା ଯୋଗାଇଦେବା ସହିତ କଟକ ବାରବାଟୀ ଷ୍ଟାଡିୟମରେ ଖେଳିବାକୁ ଅନୁମତି ଦେଇଛନ୍ତି । ଏହି ବନ୍ଦ ଡାକରାକୁ ପୂର୍ଣ୍ଣ ସମର୍ଥନ ଦେଇଛନ୍ତି କଟକ ବାସୀ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

କଟକ, ଜାନୁଆରୀ ୨୩(ଓଡିଶା ଡଟ୍ କମ୍)-ରାଜ୍ୟର ଲୋକପାଳ ଜଷ୍ଟିସ ପି.କେ ପାତ୍ରଙ୍କର ମଙ୍ଗଳବାର ସନ୍ଧ୍ୟାରେ କଟକ ବଡ଼ ଡାକ୍ତରଖାନାରେ ହୃଦଘାତରେ ପରଲୋକ ହୋଇଯାଇଛି ।

ତାଙ୍କୁ ୭୩ବର୍ଷ ବୟସ ହୋଇଥିଲା । ମଧୁମେହ ରୋଗରେ ଗୁରୁତର ଆକ୍ରାନ୍ତ ହୋଇ ଗତ ୧୮ତାରିଖରେ ବଡ଼ ଡାକ୍ତରଖାନାରେ ଭର୍ତି ହୋଇଥିଲେ ।

ଓଡ଼ିଶା ହାଇକୋର୍ଟର ବିଚାରପତି ରୂପେ ସେ ଅନେକ ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରିଥିଲେ । ବିଚାରପତି ପଦରୁ ଅବସର ଗ୍ରହଣ କରିବା ପରେ ଜଷ୍ଟିସ ପାତ୍ର କଳିଙ୍ଗନଗର ଗୁଳିକାଣ୍ଡ ତଦନ୍ତ କମିଶନର ଅଧ୍ୟକ୍ଷ ରୂପେ କାର୍ଯ୍ୟ କରିଥିଲେ ।

ଲୋକପାଳ ଜଷ୍ଟିସ ଶରତଚନ୍ଦ୍ର ମହାପାତ୍ରଙ୍କ ବିୟୋଗ ପରେ ଜଷ୍ଟିସ ପାତ୍ରଙ୍କୁ ତାଙ୍କ ସ୍ଥାନରେ ନିଯୁକ୍ତି ଦିଆଯାଇଥିଲା ।

ଓଡିଶା ଡଟ୍ କମ୍