ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ଜାନୁୟାରୀ ୪(ଓଡ଼ିଶା ଡ଼ଟ୍ କମ୍) ବିଜ୍ଞାନକୁ ଲୋକପ୍ରିୟ କରାଇବା ଉଦ୍ଦେଶ୍ୟରେ ୨୦୦୯ ପାଇଁ ଭିଏତନାମର ବୈଜ୍ଞାନିକ ପ୍ରଫେସର ଟି.ଏକ୍ସ.ଥୁଆନଙ୍କୁ ବୁଧବାର କଳିଙ୍ଗ ଚେୟାର ପୁରସ୍କାର ପ୍ରଦାନ କରାଯାଇଛି ।
ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ବିଜୁ ପଟ୍ଟନାୟକଙ୍କ ଦ୍ୱାରାଆରମ୍ଭ ଏହି ପୁରସ୍କାରର ୬୦ ବର୍ଷ ପୂର୍ତି ଅବସରରେ କିଟ୍ ପ୍ରେକ୍ଷାଳୟରେ ଆୟୋଜିତ ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ପୁରସ୍କାର ପ୍ରଦାନ କରିଛନ୍ତି ।
ଅର୍ନ୍ତଜାତୀୟ ସ୍ତରରେ ୟୁନେସ୍କୋ କଳିଙ୍ଗ ପୁରସ୍କାର ପ୍ରଦାନ କରାଯାଉଥିବାରୁ ଏହା ଓଡ଼ିଶା ପାଇଁ ଗର୍ବର ବିଷୟ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ।
୨୦୧୧ ପାଇଁ ୟୁନେସ୍କୋ କଳିଙ୍ଗ ପୁରସ୍କାର ପାଇବାକୁ ମନୋନୀତ ହୋଇଥିବା ମେକ୍ସିକୋର ବୈଜ୍ଞାନିକ ଡ଼. ରେନେ ରାଉର ଡ଼୍ରକର ଅନୁପସ୍ଥିତ ଥିବାରୁ ତାଙ୍କୁ ପୁରସ୍କାର ପ୍ରଦାନ କରାଯାଇପାରି ନାହିଁ ।
ଏହି ଅବସରରେ ପୂର୍ବରୁ କଳିଙ୍ଗ ପୁରସ୍କାର ପାଇଥିବା ୧୧ ଜଣ ବୈଜ୍ଞାନିକ ଏବଂ ଜୁରୀ ସଦସ୍ୟଙ୍କୁ ସମ୍ବର୍ଦ୍ଧିତ କରାଯାଇଛି ।
ଏହି ଉତ୍ସବରେ ଅନ୍ୟ ମାନଙ୍କ ମଧ୍ୟରେ ୟୁନେସ୍କୋର ଉପ ମହାନିର୍ଦ୍ଦେଶକ ଜି.କାଲୋନ୍ଜି, ସାଂସଦ ପ୍ୟାରୀମୋହନ ମହାପାତ୍ର ଏବଂ କଳିଙ୍ଗ ପାଉଣ୍ଡେସନ ଟ୍ରଷ୍ଟର ସଭାପତି ଭବାନୀ ଚରଣ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ ।
୧୯୫୧ରେ ବିଜୁ ପଟ୍ଟନାୟକ କଳିଙ୍ଗ ପୁରସ୍କାର ଆରମ୍ଭ କରିଥିଲେ ଏବଂ ଏହା ବର୍ତମାନ ୟୁନେସ୍କୋ-କଳିଙ୍ଗ ପୁରସ୍କାର ନାମରେ ନାମିତ ହୋଇଛି।
ଓଡ଼ିଶା ଡ଼ଟ୍ କମ୍
