କୃଷକ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୩(ଓଡିଶା ଡଟ୍ କମ୍)-ବିଧାନସଭାରେ ଲାଗି ରହିଥିବା ଅଚଳାବସ୍ଥାକୁ ଦୂର କରିବାକୁ ସୋମବାର ଦିନ ବାଚସ୍ପତି ପ୍ରଦୀପ କୁମାର ଅମାତ ଯେଉଁ ସର୍ବଦଳୀୟ ବୈଠକ ଡାକିଥିଲେ ତାହା ଅସମାପ୍ତ ରହିଛିି ।

ମଙ୍ଗଳବାର ଦିନ ପୁଣିଥରେ ବୈଠକ ବସିପାରେ ବୋଲି ବାଚସ୍ପତି କହିଥିବା ବେଳେ କଂଗ୍ରେସ ଓ ବିଜେପି ଦଳର ନେତାମାନେ କହିଛନ୍ତି ଆଜିର ଏହି ବୈଠକରେ କୌଣସି ନିସ୍ପତି ହୋଇପାରି ନାହିଁ ।

ବୈଠକରେ ବିରୋଧିଦଳର ନେତା ଭୂପିନ୍ଦର ସିଂ, ସଂସଦୀୟ ବ୍ୟାପାର ମନ୍ତ୍ରୀ କଳ୍ପତରୁ ଦାସ, ଆଇନମନ୍ତ୍ରୀ ରଘୁନାଥ ମହାନ୍ତି, ସରକାରୀ ମୁଖ୍ୟ ସଚେତକ ପ୍ରଭାତ ତ୍ରିପାଠୀ, ବିରୋଧିଦଳ ମୁଖ୍ୟସଚେତକ ପ୍ରସାଦ ହରିଚନ୍ଦନ, ସରକାରୀ ଉପମୁଖ୍ୟ ସଚେତକ ସଂଜୟ ଦାସବର୍ମା, ବିଜେପିର କରେନ୍ଦ୍ର ମାଝି, ସିପିଆଇର ଆଦିକନ୍ଦ ସେଠୀ ଏବଂ କଂଗ୍ରେସର ସନ୍ତୋଷ ସିଂ ସାଲୁଜା ଯୋଗ ଦେଇଥିଲେ ।

ବୈଠକ ଦୀର୍ଘ ସମୟ ଚାଲିଥିଲେ ମଧ୍ୟ କୌଣସି ନିସ୍କର୍ଷ ବାହାରି ପାରିନାହିଁ । ବୈଠକ ଶେଷରେ ବିରୋଧିଦଳ ନେତା ଶ୍ରୀ ସିଂ କହିଛନ୍ତି ପ୍ରଥମେ ଚାଷୀଙ୍କ ପ୍ରସଙ୍ଗରେ ଦିଆଯାଇଥିବା ମୁଲତବୀ ପ୍ରସ୍ତାବ ଉପରେ ଆଲୋଚନା କରାଯାଉ ।

ସଂସଦୀୟ ବ୍ୟାପାର ମନ୍ତ୍ରୀ ଶ୍ରୀ ଦାସ କହିଛନ୍ତି ଏହି ମୁଲତବୀ ପ୍ରସ୍ତାବ ୩ଟି ବିଭାଗର ବିଷୟ ହୋଇଥିବାରୁ ଏହାକୁ ମୁଲତବୀ ପ୍ରସ୍ତାବ ଆକାରରେ ଆଲୋଚନା କରାଯିବା ସମ୍ଭବ ନୁହେଁ । ଆମେ ଚାଷୀ ସମସ୍ୟା ଆଲୋଚନା କରିବା ପାଇଁ ପ୍ରସ୍ତୁତ ଅଛୁ । ମାନ୍ୟବର ବାଚସ୍ପତି ଯେଉଁ ଫୋରମରେ ଆଲୋଚନା କରିବାକୁ ଚାହିଁବେ ଆମେ ସେହିବାଟରେ ଆଲୋଚନା କରିବାକୁ ରାଜି ଅଛୁ ।

ବିଜେପିର କରେନ୍ଦ୍ର ମାଝିଙ୍କ ମତରେ ଗୃହକାର୍ଯ୍ୟ ଠିକ୍ ଠାକ ଭାବରେ ଚାଲୁ । କୃଷକମାନଙ୍କର ଯେଉଁ ସମସ୍ୟା ଅଛି ତାହା ମଧ୍ୟ ବିଧାନସଭାରେ ଆଲୋଚନା କରାଯାଉ । ବିଧାନସଭାର ଶୀତ ଅଧିବେଶନ ଆରମ୍ଭରୁ ବିରୋଧିଦଳ ଚାଷୀଙ୍କ ପ୍ରସଙ୍ଗ ଆଲୋଚନା ଦାବିରେ ବିଧାନସଭାକୁ ଅଚଳ କରି ରଖିଛି ।

ପ୍ରଥମ ଦିନରୁ ଚାଷୀଙ୍କ ଧାନ ବିକ୍ରି ନହେବା, ଚାଷୀଙ୍କୁ ବିହନ ଦିଆନଯିବା,ବୋନସ ପ୍ରଦାନ କରାନଯିବା ଆଦି ପ୍ରସଙ୍ଗ ନେଇ ବିରୋଧିଦଳ ମୁଲତବୀ ନୋଟିସ ଦେଇଥିଲେ । ତେବେ ବାଚସ୍ପତି ଏହାକୁ ଅଗ୍ରାହ୍ୟ କରିଦେବାରୁ ସେବେଠାରୁ ବିରୋଧିଦଳ ଗୃହକୁ ଅଚଳ କରିଛି । ଆଜି ଗୃହକାର୍ଯ୍ୟ ଆରମ୍ଭ ହେବାମାତ୍ରେ ବାଚସ୍ପତି ପ୍ରଶ୍ନୋତର କାର୍ଯ୍ୟକ୍ରମ ପରେ ସବୁଦଳର ନେତୃବୃନ୍ଦକୁ ଡାକି ଆଲୋଚନା କରିବେ ବୋଲି କହିଥିଲେ ।

ଫଳରେ କଂଗ୍ରେସ ବିଧାୟକମାନେ ପ୍ରଶ୍ନୋତର କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ନିର୍ଦ୍ଧାରିତ ସମୟରେ ମାତ୍ର ୨ଟି ପ୍ରଶ୍ନ ଆଲୋଚନା ହୋଇ ପାରିଥିଲା । ଏଥିରେ ମୁଖ୍ୟମନ୍ତ୍ରୀଙ୍କ ପକ୍ଷରୁ ଆଇନମନ୍ତ୍ରୀ ରଘୁନାଥ ମହାନ୍ତି ଓ କୃଷିମନ୍ତ୍ରୀ ଦେବୀପ୍ରସାଦ ମିଶ୍ର ଉତର ରଖିଥିଲେ ।

ଶୂନ୍ୟକାଳ ଆରମ୍ଭ ହେବାପରେ ବାଚସ୍ପତି ଅନ୍ୟ କୌଣସି କାର୍ଯ୍ୟକ୍ରମ ନନେଇ ସର୍ବଦଳୀୟ ବୈଠକ ଡାକିଥିଲେ । ଏଥିପାଇଁ ଗୃହକୁ ପ୍ରଥମେ ୧୨ଟା ପର୍ଯ୍ୟନ୍ତ ମୁଲତବୀ କରାଯାଇଥିଲା ।

୧୨ଟାରୁ ୧୨.୩୦ ଓ ଏହାପରେ ଅପରାହ୍ନ ୩ଟା ପର୍ଯନ୍ତ ଗୃହକୁ ମୁଲତବୀ ଘୋଷଣା କରାଯାଇଥିଲା । ୩ଟାରେ ପୁଣି ଗୃହକାର୍ଯ୍ୟ ଆରମ୍ଭ ହେବାମାତ୍ରେ କଂଗ୍ରେସ ବିଧାୟକ ଫ୍ଲାକାର୍ଡ ଧରି ଗୃହମଧ୍ୟରେ ହୋହାଲ୍ଲା କରିବାରୁ ବାଚସ୍ପତି ବାଧ୍ୟହୋଇ ଗୃହକୁ ମଙ୍ଗଳବାର ପର୍ଯନ୍ତ ମୁଲତବୀ ରଖିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧(ଓଡିଶା ଡଟ୍ କମ୍)-ଲୋକପାଳ ବିଲ୍ ଆଣିବା ପାଇଁ ପ୍ରତିଶୃତି ଦେଇ ପାଳନ ନକଲେ ନେତାଙ୍କୁ ଆଉ ଭୋଟ ଦିଅନାହିଁ କି କ୍ଷମତାକୁ ଆଣନାହିଁ ବୋଲି କହିଛନ୍ତି ଆନ୍ନା ହଜାରେ ।

ଶନିବାର ଦିନ ରାଜ୍ୟ ଅତିଥିଭବନରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ହଜାରେ କହିଛନ୍ତି ଯେ,ତାଙ୍କ ଲଢ଼େଇ କେବଳ ଜନ ଲୋକପାଳ ବିଲରେ ସୀମିତ ତାହା ନୁହେଁ ।

ଭ୍ରଷ୍ଟାଚାରକୁ ମୂଳୋତ୍ପାଟନ କରିବା ପର୍ଯ୍ୟନ୍ତ ସେ ଲଢ଼ିବେ । ଦେଶର ଉନ୍ନତି କରିବାକୁ ହେବ । କେନ୍ଦ୍ର ସରକାର ଯେଉଁ ଜନଲୋକପାଳ ବିଲ ଆଣିଛନ୍ତି ତାହା ଅସଂପୂର୍ଣ । ଯଦି ପୂର୍ଣ୍ଣ ଜନ ଲୋକପାଳ ବିଲ ଆସେ ତେବେ ଦେଶରୁ ୬୫ ପ୍ରତିଶତ ଭ୍ରଷ୍ଟାଚାର ହଟିଯିବ ।

ସେ କହିଲେ ବାହାର ଦେଶରୁ ଯେତେ କଂପାନୀ ଆସୁଛନ୍ତି ସମସ୍ତେ ପରିବେଶକୁ ନଷ୍ଟ କରୁଛନ୍ତି । ଦେଶର ଖଣିଜ ସମ୍ପଦକୁ ଲୁୁୁୁଟୁ କରିବାକୁ ବହୁ ବିଦେଶୀ କମ୍ପାନୀ ଏ ଦେଶକୁ ଆସୁଛନ୍ତି । ସରକାର ସେହି କମ୍ପାନୀମାନଙ୍କ ପାଇଁ କୃଷକଙ୍କଠାରୁ ଜମି ଲୁଟୁଛନ୍ତି । ବିଦେଶୀ କମ୍ପାନୀମାନେ ଆମ ଖଣି, ଆମ ପାଣି ବ୍ୟବହାର କରି ଆମ ପାଣିପବନକୁ ପ୍ରଦୂଷିତ କରି କୋଟିକୋଟି ଟଙ୍କା ନେଇ ଯାଉଛନ୍ତି ।

ଏଫ୍ଡିଆଇକୁ ଚାଷୀମାନେ ବିରୋଧ କରିବା ଉଚିତ୍ । ବିଦେଶୀ କଂପାନୀମାନେ ଏ ଦେଶର ଅର୍ଥନୀତିକୁ ଶୋଷଣ କରିବେ । ଆମରି ଜିନିଷରୁ ଫାଇଦା ହାସଲ କରିବେ ।

ଦୁର୍ନୀତି ଯୋଗୁ ଦେଶର ଉନ୍ନତି ହେଉ ନାହିଁ । ଏହା ଯୋଗୁ ଦରଦାମ ବଢି ଯାଉଛି । ସାଧାରଣ ଜନତା ଚଳିବା ଅସମ୍ଭବ ହୋଇ ପଡିଛି । ଏହି ଦୁର୍ନୀତିକୁ ହଟାଇବାପାଇଁ ପ୍ରଥମେ ଜନ ଲୋକପାଳ ବିଲ ଆଣିବା ଦରକାର ବୋଲି ଆନ୍ନା ପ୍ରକାଶ କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୨୯(ଓଡିଶା ଡଟ୍ କମ୍)-ଅରବିନ୍ଦ କେଜିରୱାଲଙ୍କୁ ଆନ୍ନାଙ୍କ ସର୍ତ ମୂଳକ ସମର୍ଥନ । କେଜିରୱାଲାଙ୍କ ପାର୍ଟିରେ ଭଲ ପ୍ରାର୍ଥୀଥିଲେ ସେ ପ୍ରଚାର କରିବାକୁ ଯିବେ । ଦୁର୍ନୀତି ପାଇଁ ସଦାସର୍ବଦା ଲଢେଇ କରିବା ସହିତ ଭ୍ରଷ୍ଟାଚାର ମୁକ୍ତ ଭାରତ ଗଠନ ଲକ୍ଷ ବୋଲି ଓଡିଶାକୁ ତିନି ଦିନିଆ ଗସ୍ତରେ ଆସି ଆଜି ଏହା କହିଛନ୍ତି ସମାଜସେବୀ ଆନ୍ନା ହଜାରେ ।

ଫଟୋ : ଅରବିନ୍ଦ ମହାପାତ୍ର

ଓଡିଶାକୁ ତିନିଦିନିଆ ଗସ୍ତରେ ଆସି ଗୁରୁବାର ଦିନ ଭୁବନେଶ୍ୱରରେ ପହଞ୍ଚିଥିଲେ ସମାଜସେବୀ ଆନ୍ନା ହଜାରେ । ଆନ୍ନାଙ୍କୁ ଭୁବନେଶ୍ୱର ବିମାନ ବନ୍ଦରରେ ଦିନ ୧.୩୦ ମିନିଟି ସମୟରେ ବ୍ୟାପକ ସମ୍ବର୍ଦ୍ଧନା ଦିଆଯାଇଥିଲା । ବିମାନବନ୍ଦରରୁ ଆନ୍ନାଙ୍କୁ ଏକ ବିଶାଳ ଶୋଭାଯାତ୍ରାରେ ନିଆଯାଇଥିଲା ରାଷ୍ଟ୍ରଭାଷା ପ୍ରଚାର ସମିତି ପଡିଆକୁ ।

ଏଠାରେ ଅନୁଷ୍ଠିତ ସାଧାରଣ ସଭାରେ ଆନ୍ନା କହିଲେ କେଜିରୱାଲା ଓ ତାଙ୍କ ରାସ୍ତା ଅଲଗା । କିନ୍ତୁ ଲକ୍ଷ୍ୟ ଏକ । କୃଷକମାନେ ଏଠାରେ ହାଡଭଙ୍ଗା ପରିଶ୍ରମ କରୁଛନ୍ତି । ତାଙ୍କର କିଛି ପରିବର୍ତନ ହେଉନାହିଁ । ଚାଷୀଙ୍କ ସମସ୍ତ ପରିଶ୍ରମର ଫାଇଦା ଦଲାଲ ନେଉଛନ୍ତି ।

ବଡବଡ ବିଲଡିଙ୍ଗକରି ଆଜି ସେମାନେ ବସିଛନ୍ତି ବୋଲି ଆନ୍ନା କହିଛନ୍ତି । ଶିକ୍ଷାକ୍ଷେତ୍ରରେ ଆଜି ଗରିବ ପିଲା ଉଚ୍ଚଶିକ୍ଷା ନେଇ ପାରୁନାହିଁ । ଉଚ୍ଚଶିକ୍ଷାରେ ନିଆଯାଉଥିବା ଡୋନେସନ ନିନ୍ଦନୀୟ ବୋଲି ସେ ପ୍ରକାଶ କରିଥିଲେ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୧୨(ଓଡ଼ିଶା ଡ଼ଟ୍ କମ୍)-ଜାତି-ଜନଜାତି କଲ୍ୟାଣ ପରିଷଦ,ଓଡିଶା ତରଫରୁ ‘ଆଦିବାସୀମାନଙ୍କର ସ୍ୱାସ୍ଥ୍ୟ ଓ କୃଷି’ ଶୀର୍ଷକ ଆଜି ଏକ ରାଜ୍ୟସ୍ତରୀୟ ଆଲୋଚନା ଚକ୍ର ସ୍ଥାନୀୟ ୟୁନିଟ-୫ ସ୍ଥିତ ସଚିବାଳୟ କର୍ମଚାରୀ ସଂଘ ସଭାଗୃହରେ ଅନୁଷ୍ଠିତ ହୋଇଯାଇଛି ।

ଏଥିରେ ଜାତି ଜନଜାତି ମାନଙ୍କର ସ୍ୱାସ୍ଥ୍ୟହାନି ଓ ନୂଆ ନୂଆ ରୋଗର ପିଡୀତ ହେବା ସେମାନଙ୍କ ପ୍ରଗତିର ମୂଖ୍ୟ ସମସ୍ୟା ରୂପେ ଛିଡା ହୋଇଥିବା କଥା ଆଲୋଚିତ ହୋଇଛି । ଏହି ବନ୍ଧୁମାନଙ୍କର ମୁଣ୍ଡପିଛା ଜମି ବର୍ଷକୁ ବର୍ଷ ଖଣି-ଖାଦାନ କାରଖାନା ବନ୍ଧ ଇତ୍ୟାଦି ନିର୍ମାଣ କାରଣରୁ କମି କମି ଯାଉଛି ।

ଫଳରେ ସେମାନଙ୍କର ମୁଖ୍ୟ କୃଷି ଭିତିକ ଜୀବିକା ନଷ୍ଟ ହୋଇଯାଉଛି । ଆଧୁନିକ କୃଷି ନାମରେ ରାସାୟନିକ ସାର ଔଷଧ ଇତ୍ୟାଦିର ବହୁଳ ପ୍ରୟୋଗ କାରଣରୁ କୃଷକ ସମାଜ ଅଧିକ ଖର୍ଚ୍ଚାନ୍ତ ହୋଇ ମରୁଛନ୍ତି ।

ଜନଜାତି ମାନଙ୍କ ଦ୍ୱାରାଉତ୍ପାଦିତ ଜୈବୀକ କୃଷି ଉତ୍ପାଦିତ ସ୍ଥାନରୁ କମ୍ ମୂଲ୍ୟରେ କ୍ରୟ କରାଯିବା ଯୋଗୁଁ ଉଭୟ ଜନଜାତି ଓ ସମସ୍ତ କୃଷକ ସମାଜକୁ ଉପଯୁକ୍ତ ସହାୟକ ମୂଲ୍ୟ ନାହିଁ ।

ଆଦିବାସୀମାନେ ସବୁ ସମୟରେ ସମାଜ ତଥା ରାଷ୍ଟ୍ର କଲ୍ୟାଣ ପାଇଁ କାମ କରିଆସୁଛନ୍ତି । ବତ ର୍ମାନ ସାମାଜିକ ସମନ୍ୱୟ ନିମନ୍ତେ ସେମାନଙ୍କର ଆର୍ଥିକ ଏବଂ ସାମାଜିକ ସୁରକ୍ଷା ଦେବାପାଇଁ ବକ୍ତାମାନେ ମତ ପୋଷଣ କରିଛନ୍ତି ।

ଏହି ଅବସରରେ ମାଙ୍କିଡିଆ ଆଦିମ ଜନଜାତିର ପ୍ରଥମ ମ୍ୟାଟ୍ରିକୁଲେଟ୍ ଏବଂ ସ୍ନାତକ ଛାତ୍ର ବାୟା ମାଙ୍କିଡିଆ ଏବଂ ବିଶିଷ୍ଟ ରୋଗୀ ସେବକ କୈଳାସ ଚନ୍ଦ୍ର ଷଡଙ୍ଗୀଙ୍କୁ ଅଙ୍ଗବସ୍ତ୍ର, ଶ୍ରୀଫଳ ଏବଂ ମାନପତ୍ର ଦେଇ ସମ୍ମାନୀତ କରାଯାଇଛି ।

ଅର୍ଜ୍ଜୁନ ହେମ୍ବ୍ରମଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଆଲୋଚନା ଚକ୍ରରେ ଜନଜାତି ଭାଷା ଓ ସଂସ୍କୃତି ପ୍ରତିଷ୍ଠାନ, ଓଡିଶାର ସଚୀବ ପ୍ରଫେସର ପ୍ରେମାନନ୍ଦ ପଣ୍ଡା ମୁଖ୍ୟ ଅତିଥି , କୃଷି ବିଶ୍ୱବିଦ୍ୟାଳୟ, ଭୁବନେଶ୍ୱର ଆଗ୍ରୋନୋମିର ବିଭାଗୀୟ ମୁଖ୍ୟ ପ୍ରଫେସର ବାସୁଦେବ ବେହେରା ଓ ଡା.ସୂର୍ଯ୍ୟକାନ୍ତ ପାଟଯୋଶୀ ସମ୍ନାନୀତ ଅତିଥି ଏବଂ ଡ. ପରଜିତ୍ ସିଂହ ମୁଖ୍ୟବକ୍ତା ରୂପେ ଯୋଗ ଦେଇଥିଲେ ।

ସଂଗଠନର ରାଜ୍ୟ ସଂପାଦକ ବିଶ୍ୱାମିତ୍ର ମହାନ୍ତଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମକୁ ରଘୁନାଥ ବେହେରା,ଶରତ ଲେଙ୍କା, ବୁଧରାମ ସିଂହ ପ୍ରମୁଖ ପରିଚାଳନା କରିଥିଲେ ।

ଓଡ଼ିଶା ଡ଼ଟ୍ କମ୍

 

ଓଡିଶା ଡଟ୍ କମ୍ ସମ୍ବାଦଦାତା

ସାକ୍ଷୀଗୋପାଳ,ଅକ୍ଟୋବର ୧୦ (ଓଡିଶା ଡଟ୍ କମ୍)- ପବିତ୍ର ଗାନ୍ଧି ଜୟନ୍ତୀରୁ ରାଜ୍ୟର ଦୁଇ ପ୍ରମୁଖ ରାଜନୈତିକ ଦଳ ଆରମ୍ଭ କରିଥିଲେ ପଦଯାତ୍ରା ରାଜନୀତି ।

ବିଜେଡିର ଜନସଂପର୍କ ପଦଯାତ୍ରାକୁ କଂଗ୍ରେସର ପରିବର୍ତନ ପଦଯାତ୍ରା । ବିରୋଧୀ କଂଗ୍ରେସ ପକ୍ଷରୁ ଦୁର୍ନୀତିଗ୍ରସ୍ତ ବିଜେଡି ସରକାରକୁ କ୍ଷମତାଚ୍ୟୁତ କରିବା ପାଇଁ ‘ପରିବର୍ତନ ଆହ୍ୱାନ’ ଡାକରା ଦିଆଯାଇ କଟକର ସ୍ୱରାଜ ଆଶ୍ରମରୁ ଆରମ୍ଭ ହୋଇଥିବା ଏହି ପଦଯାତ୍ରା ମଙ୍ଗଳବାର ଦିନ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଜୟନ୍ତୀରେ ସୁଆଣ୍ଡୋରେ ଉଦଯାପିତ ହୋଇଛି ।

ସତ୍ୟବାଦୀର ବକୁଳବନଠାରେ କଂଗ୍ରେସର ପରିବର୍ତନ ପଦଯାତ୍ରାର ଉଦ୍ୟାପିତ ସମାବେଶରେ କଂଗ୍ରେସର ବହୁ ବରିଷ୍ଠ ନେତା ଯୋଗଦେଇ ଦୁର୍ନୀତିଗ୍ରସ୍ତ ନବୀନ ସରକାରକୁ ହଟାଇବାକୁ ଆହ୍ୱାନ ଦେଇଥିଲେ ।

ରାଜ୍ୟ ସଭାପତି ନିରଞ୍ଜନ ପଟ୍ଟନାୟକ ଅଧ୍ୟକ୍ଷତାକରି କହିଥିଲେ ଯେ ଆଇନ ଶୃଙ୍ଖଳା ରକ୍ଷା କରିବାରେ ସରକାର ସମ୍ପୂର୍ଣ୍ଣ ବିଫଳ ହୋଇଛନ୍ତି । ରାଜ୍ୟ କୃଷକ ମାନଙ୍କ ସ୍ୱାର୍ଥ ରକ୍ଷା କରିବାରେ ସରକାର ଅସମର୍ଥ ହୋଇଥିବାରୁ ଆଗାମୀ ଦିନରେ ଓଡିଶାବାକସୀ ଏହାର ଜବାବ ଦେବେ ।

ଭ୍ରଷ୍ଟାଚାର, ଅନୀତି ଓ ଦୁର୍ନୀତି ଏ ରାଜ୍ୟର ଆଭୂଷଣ ହୋଇଛି । ଏ ସବୁ ପାଇଁ ମୁଖ୍ୟମନ୍ତ୍ରୀ ନିଜେ ଦାୟୀ । କିନ୍ତୁ ସେ ଚତୁରତାର ସହ ଅନ୍ୟମାନଙ୍କ ନାମରେ ଅପଯଶ ବୋଳି ଖସିଯିବାକୁ ଅପଚେଷ୍ଟା କରୁଛନ୍ତି । କଂଗ୍ରେସ ଦଳ ଓଡ଼ିଶାବାସୀଙ୍କ ପାଖରେ ବିଜେଡି ସରକାରଙ୍କ ପ୍ରକୃତ ସ୍ୱରୂପ ଖୋଲିଦେବା ପାଇଁ ଏହି ପଦ ଯାତ୍ରା ଅନୁଷ୍ଠିତ ହୋଇଥିଲା ।

ପ୍ରଦେଶ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ ମୁଖ୍ୟ ଅତିଥି ତଥା ଓଡିଶା କଂଗ୍ରେସ ଦାୟିତ୍ୱରେ ଥିବା ଏଆଇସସି କାର୍ଯ୍ୟକାରୀଣୀ ସଭ୍ୟ ଜଗଦୀଶ ଟାଇଟଲର କହିଲେ ରାଜ୍ୟରେ ବେଇମାନ ଶାସନ ଚାଲିଛି । ଓଡିଶାର ହଜାର ହଜାର କୋଟି ଟଙ୍କାର ଲୁହାପଥରକୁ ପାରାଦୀପ ବନ୍ଦର ଦେଇ ଚୀନ ଓ ଜାପାନକୁ ଚୋରା ଚାଲାଣ କରା ଯାଇଛି ।

ଏଥିରେ ଓଡିଶାର ମୁଖ୍ୟମନ୍ତ୍ରୀଙ୍କ ସିଧାସଳଖ ହାତ ଥିବା ଅଭିଯୋଗକରି ଖୁବ୍ଶୀଘ୍ର ଏ ସଂପକରେ ସାମ୍ବାଦିକ ସମ୍ମିଳନୀ ଡାକି ରାଜ୍ୟବାସୀଙ୍କୁ ଜଣାଇବେ ବୋଲି କହିଥିଲେ ।

ଅନ୍ୟମାନଙ୍କ ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ, ବିରୋଧିଦଳ ନେତା ଭୂପିନ୍ଦର ସିଂହ, କିଶୋରଚନ୍ଦ୍ର ପଟେଲ,ସୁରେଶ କୁମାର ରାଉତରାୟ, ସୌମ୍ୟରଞ୍ଜନ ପଟ୍ଟନାୟକ, ପ୍ରଦେଶ ଯୁବକଂଗ୍ରେସ ସଭାପତି ସଂଗ୍ରାମ କେଶରୀ ଜେନା, ଛାତ୍ର କଂଗ୍ରେସ ସଭାପତି ଚିନ୍ମୟ ସାହୁ, ଚିରଞ୍ଜିବୀ ବିଶ୍ୱାଳ ପ୍ରମୁଖ ଉଦ୍ବୋଧନ ଦେଇ କୋଇଲା ଦୁର୍ନୀତିଠାରୁ ଆରମ୍ଭକରି ଖଣି, ପାଣି, ଡାଲି ସବୁଥିରେ ଦୁର୍ନୀତି ହୋଇଛି ବେଲି ପ୍ରକାଶ କରିଥିଲେ ।

ସେମାନଙ୍କ ମତରେ ଦୁର୍ନୀତିଗ୍ରସ୍ତ ନେତା ଓ ଅଧିକାରୀଙ୍କ ବିରୋଧରେ ପଦକ୍ଷେପ ନେବା ବଦଳରେ ସେମାନଙ୍କୁ ସରକାର ସୁରକ୍ଷା ଯୋଗାଇ ଦେଉଛନ୍ତି । ଯେଉଁମାନେ ଦୁର୍ନୀତି କରୁଛନ୍ତି, ସେମାନଙ୍କୁ ସରକାର ପୁରସ୍କୃତ କରୁଛନ୍ତି । ଯେଉଁମାନେ ଦୁର୍ନୀତି ବିରୋଧରେ ସ୍ୱର ଉତୋଳନ କରୁଛନ୍ତି ବା ଦୁର୍ନୀତି ଲୋକଲୋଚନକୁ ଆଣୁଛନ୍ତି, ମିଥ୍ୟା ମାମଲା ଲଗାଇ ସେମାନଙ୍କୁ ଜେଲରେ ଭର୍ତି କରାଯାଉଛି ।

ବର୍ତମାନ ରାଜ୍ୟରେ ଗଣତନ୍ତ୍ର ନୁହେଁ, ଜଣତନ୍ତ୍ର ଚାଲିଛି । ଦୁର୍ନୀତିଗସ୍ତ ନବୀନ ସରକାରକୁ ହଟାଇବା ପାଇଁ କଂଗ୍ରେସ ସଂଗ୍ରାମ ଆରମ୍ଭ କରିଛି । ଏହି ସଂଗ୍ରାମରେ ଓଡ଼ିଶାବାସୀ ସାମିଲ ହୋଇ ରାଜ୍ୟ ବିରୋଧୀ ନବୀନ ସରକାରକୁ କବର ଦେବାକୁ ବକ୍ତାମାନେ ଆହ୍ୱାନ ଦେଇଥିଲେ । ଶେଷରେ ପୁରୀ ଜିଲ୍ଲା କଂଗ୍ରେସ ସଭାପତି ଶରତ ରଥ ଧନ୍ୟବାଦ ଦେଇଥିଲେ ।

ସେହିପରି ବିଜେଡି ପକ୍ଷରୁ କେନ୍ଦ୍ରର ଉପା ସରକାରର ବୈମାତୃକ ମନୋଭାବ ଓ ରାଜ୍ୟ ସରକାରଙ୍କ ପକ୍ଷରୁ ଆରମ୍ଭ ହୋଇଥିବା ବିଭିନ୍ନ ଜନହିତକର ଯୋଜନା ସମ୍ପର୍କରେ ଲୋକଙ୍କୁ ସଚେତନ କରିବା ପାଇଁ ରାଜ୍ୟର ପ୍ରତ୍ୟେକ ଜିଲ୍ଲାରେ ଚାଲିଥିବା ଜନସମ୍ପର୍କ ଯାତ୍ରା ଜୟପ୍ରକାଶ ନାରାୟଣ ଜୟନ୍ତୀରେ ଉଦଯାପିତ ହେବ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ସାକ୍ଷୀଗୋପାଳ,ଅକ୍ଟୋବର ୧୦ (ଓଡିଶା ଡଟ୍ କମ୍)- ପବିତ୍ର ଗାନ୍ଧି ଜୟନ୍ତୀରୁ ରାଜ୍ୟର ଦୁଇ ପ୍ରମୁଖ ରାଜନୈତିକ ଦଳ ଆରମ୍ଭ କରିଥିଲେ ପଦଯାତ୍ରା ରାଜନୀତି । ବିଜେଡିର ଜନସଂପର୍କ ପଦଯାତ୍ରାକୁ କଂଗ୍ରେସର ପରିବର୍ତନ ପଦଯାତ୍ରା ।

ବିରୋଧୀ କଂଗ୍ରେସ ପକ୍ଷରୁ ଦୁର୍ନୀତିଗ୍ରସ୍ତ ବିଜେଡି ସରକାରକୁ କ୍ଷମତାଚ୍ୟୁତ କରିବା ପାଇଁ ‘ପରିବର୍ତନ ଆହ୍ୱାନ’ ଡାକରା ଦିଆଯାଇ କଟକର ସ୍ୱରାଜ ଆଶ୍ରମରୁ ଆରମ୍ଭ ହୋଇଥିବା ଏହି ପଦଯାତ୍ରା ମଙ୍ଗଳବାର ଦିନ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଜୟନ୍ତୀରେ ସୁଆଣ୍ଡୋରେ ଉଦଯାପିତ ହୋଇଛି ।

ସତ୍ୟବାଦୀର ବକୁଳବନଠାରେ କଂଗ୍ରେସର ପରିବର୍ତନ ପଦଯାତ୍ରାର ଉଦ୍ୟାପିତ ସମାବେଶରେ କଂଗ୍ରେସର ବହୁ ବରିଷ୍ଠ ନେତା ଯୋଗଦେଇ ଦୁର୍ନୀତିଗ୍ରସ୍ତ ନବୀନ ସରକାରକୁ ହଟାଇବାକୁ ଆହ୍ୱାନ ଦେଇଥିଲେ ।

ରାଜ୍ୟ ସଭାପତି ନିରଞ୍ଜନ ପଟ୍ଟନାୟକ ଅଧ୍ୟକ୍ଷତାକରି କହିଥିଲେ ଯେ ଆଇନ ଶୃଙ୍ଖଳା ରକ୍ଷା କରିବାରେ ସରକାର ସମ୍ପୂର୍ଣ୍ଣ ବିଫଳ ହୋଇଛନ୍ତି । ରାଜ୍ୟ କୃଷକ ମାନଙ୍କ ସ୍ୱାର୍ଥ ରକ୍ଷା କରିବାରେ ସରକାର ଅସମର୍ଥ ହୋଇଥିବାରୁ ଆଗାମୀ ଦିନରେ ଓଡିଶାବାସୀ ଏହାର ଜବାବ ଦେବେ ।

ଭ୍ରଷ୍ଟାଚାର, ଅନୀତି ଓ ଦୁର୍ନୀତି ଏ ରାଜ୍ୟର ଆଭୂଷଣ ହୋଇଛି । ଏ ସବୁ ପାଇଁ ମୁଖ୍ୟମନ୍ତ୍ରୀ ନିଜେ ଦାୟୀ । କିନ୍ତୁ ସେ ଚତୁରତାର ସହ ଅନ୍ୟମାନଙ୍କ ନାମରେ ଅପଯଶ ବୋଳି ଖସିଯିବାକୁ ଅପଚେଷ୍ଟା କରୁଛନ୍ତି । କଂଗ୍ରେସ ଦଳ ଓଡ଼ିଶାବାସୀଙ୍କ ପାଖରେ ବିଜେଡି ସରକାରଙ୍କ ପ୍ରକୃତ ସ୍ୱରୂପ ଖୋଲିଦେବା ପାଇଁ ଏହି ପଦ ଯାତ୍ରା ଅନୁଷ୍ଠିତ ହୋଇଥିଲା ।

ପ୍ରଦେଶ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ ମୁଖ୍ୟ ଅତିଥି ତଥା ଓଡିଶା କଂଗ୍ରେସ ଦାୟିତ୍ୱରେ ଥିବା ଏଆଇସସି କାର୍ଯ୍ୟକାରୀଣୀ ସଭ୍ୟ ଜଗଦୀଶ ଟାଇଟଲର କହିଲେ ରାଜ୍ୟରେ ବେଇମାନ ଶାସନ ଚାଲିଛି ।

ଓଡିଶାର ହଜାର ହଜାର କୋଟି ଟଙ୍କାର ଲୁହାପଥରକୁ ପାରାଦୀପ ବନ୍ଦର ଦେଇ ଚୀନ ଓ ଜାପାନକୁ ଚୋରା ଚାଲାଣ କରା ଯାଇଛି । ଏଥିରେ ଓଡିଶାର ମୁଖ୍ୟମନ୍ତ୍ରୀଙ୍କ ସିଧାସଳଖ ହାତ ଥିବା ଅଭିଯୋଗକରି ଖୁବ୍ଶୀଘ୍ର ଏ ସଂପକରେ ସାମ୍ବାଦିକ ସମ୍ମିଳନୀ ଡାକି ରାଜ୍ୟବାସୀଙ୍କୁ ଜଣାଇବେ ବୋଲି କହିଥିଲେ ।

ଅନ୍ୟମାନଙ୍କ ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ, ବିରୋଧିଦଳ ନେତା ଭୂପିନ୍ଦର ସିଂହ, କିଶୋରଚନ୍ଦ୍ର ପଟେଲ,ସୁରେଶ କୁମାର ରାଉତରାୟ, ସୌମ୍ୟରଞ୍ଜନ ପଟ୍ଟନାୟକ, ପ୍ରଦେଶ ଯୁବକଂଗ୍ରେସ ସଭାପତି ସଂଗ୍ରାମ କେଶରୀ ଜେନା, ଛାତ୍ର କଂଗ୍ରେସ ସଭାପତି ଚିନ୍ମୟ ସାହୁ, ଚିରଞ୍ଜିବୀ ବିଶ୍ୱାଳ ପ୍ରମୁଖ ଉଦ୍ବୋଧନ ଦେଇ କୋଇଲା ଦୁର୍ନୀତିଠାରୁ ଆରମ୍ଭକରି ଖଣି, ପାଣି, ଡାଲି ସବୁଥିରେ ଦୁର୍ନୀତି ହୋଇଛି ବେଲି ପ୍ରକାଶ କରିଥିଲେ ।

ସେମାନଙ୍କ ମତରେ ଦୁର୍ନୀତିଗ୍ରସ୍ତ ନେତା ଓ ଅଧିକାରୀଙ୍କ ବିରୋଧରେ ପଦକ୍ଷେପ ନେବା ବଦଳରେ ସେମାନଙ୍କୁ ସରକାର ସୁରକ୍ଷା ଯୋଗାଇ ଦେଉଛନ୍ତି । ଯେଉଁମାନେ ଦୁର୍ନୀତି କରୁଛନ୍ତି, ସେମାନଙ୍କୁ ସରକାର ପୁରସ୍କୃତ କରୁଛନ୍ତି । ଯେଉଁମାନେ ଦୁର୍ନୀତି ବିରୋଧରେ ସ୍ୱର ଉତୋଳନ କରୁଛନ୍ତି ବା ଦୁର୍ନୀତି ଲୋକଲୋଚନକୁ ଆଣୁଛନ୍ତି, ମିଥ୍ୟା ମାମଲା ଲଗାଇ ସେମାନଙ୍କୁ ଜେଲରେ ଭର୍ତି କରାଯାଉଛି ।

ବର୍ତମାନ ରାଜ୍ୟରେ ଗଣତନ୍ତ୍ର ନୁହେଁ, ଜଣତନ୍ତ୍ର ଚାଲିଛି । ଦୁର୍ନୀତିଗସ୍ତ ନବୀନ ସରକାରକୁ ହଟାଇବା ପାଇଁ କଂଗ୍ରେସ ସଂଗ୍ରାମ ଆରମ୍ଭ କରିଛି । ଏହି ସଂଗ୍ରାମରେ ଓଡ଼ିଶାବାସୀ ସାମିଲ ହୋଇ ରାଜ୍ୟ ବିରୋଧୀ ନବୀନ ସରକାରକୁ କବର ଦେବାକୁ ବକ୍ତାମାନେ ଆହ୍ୱାନ ଦେଇଥିଲେ ।

ଶେଷରେ ପୁରୀ ଜିଲ୍ଲା କଂଗ୍ରେସ ସଭାପତି ଶରତ ରଥ ଧନ୍ୟବାଦ ଦେଇଥିଲେ ।

ସେହିପରି ବିଜେଡି ପକ୍ଷରୁ କେନ୍ଦ୍ରର ଉପା ସରକାରର ବୈମାତୃକ ମନୋଭାବ ଓ ରାଜ୍ୟ ସରକାରଙ୍କ ପକ୍ଷରୁ ଆରମ୍ଭ ହୋଇଥିବା ବିଭିନ୍ନ ଜନହିତକର ଯୋଜନା ସମ୍ପର୍କରେ ଲୋକଙ୍କୁ ସଚେତନ କରିବା ପାଇଁ ରାଜ୍ୟର ପ୍ରତ୍ୟେକ ଜିଲ୍ଲାରେ ଚାଲିଥିବା ଜନସମ୍ପର୍କ ଯାତ୍ରା ଜୟପ୍ରକାଶ ନାରାୟଣ ଜୟନ୍ତୀରେ ଉଦଯାପିତ ହେବ ।

ଓଡିଶା ଡଟ୍ କମ୍