କେନ୍ଦୁଝର

ଓଡ଼ିଶା ଡ଼ଟ୍ କମ୍ ସମ୍ବାଦାତା

କେନ୍ଦୁଝର, ସେପ୍ଟେମ୍ବର ୧୨(ଓଡ଼ିଶା ଡ଼ଟ୍ କମ୍)-ଟ୍ରକ ଯୋଗେ ଲୁହାପଥର ପରିବହନକୁ ଦାବି କରି ଆମରଣ ଅନଶନରେ ବସିଥିବା ପ୍ରେମ ରଞ୍ଜନ ବେହେରା ନାମକ ଜଣେ ଟ୍ରକ ମାଲିକଙ୍କ ମୃତ୍ୟୁକୁ ନେଇ କେନ୍ଦୁଝରରେ ବ୍ୟାପକ ଉତ୍ତେଜନା ପ୍ରକାଶ ପାଇଛି ।

ବୁଧବାର ଏହି ଅଭାବନୀୟ ଘଟଣା ପ୍ରଘଟ ହେବାପରେ ଶହଶହ ଟ୍ରକ ମାଲିକ ଉତ୍ତେଜିତ ହୋଇ ଗଣ୍ଡଗୋଳ ଓ ଗାଡି ଭଙ୍ଗାରୁଜା କରିଛନ୍ତି ।

ଉତ୍ୟକ୍ତ ଟ୍ରକ ମାଲିକମାନେ ଜିଲ୍ଲାପାଳଙ୍କ ଗାଡି ଭାଙ୍ଗି ଦେଇଥିଲେ । ଏ ଘଟଣାରେ ପୋଲିସ ନିରବ ଦ୍ରଷ୍ଟା ସାଜିଥିଲେ । ପରିସ୍ଥିତି ଅଣାୟତ ହେବାରୁ ମାଓଦମନ ପାଇଁ ଆସିଥିବା ସିଆରପିଏଫ୍ ଜବାନମାନେ କାର୍ଯ୍ୟାନୁଷ୍ଠାନ ନେବାକୁ ଉଦ୍ୟତ ହେବାରୁ ଟ୍ରକ ମାଲିକଙ୍କ ସମେତ ସାଧାରଣ ଲୋକ ମଧ୍ୟ ଏହାକୁ ବିରୋଧ କରିଥିଲେ ।

ଫଳରେ ଜବାନମାନେ କ୍ଷମାମାଗି ଫେରି ଯାଇଥିଲେ । ଗତ ୮ ଦିନଧରି କେନ୍ଦୁଝର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଘସିପୁରା ଅଞ୍ଚଳର ଗାଡିମାଲିକ ପ୍ରେମରଞ୍ଜନ ବେହେରା ଅନଶନରେ ବସିଥିଲେ ।

ମଙ୍ଗଳବାର ତାଙ୍କ ହେ ଖରାପ ହେବାରୁ ତାଙ୍କୁ ଆନନ୍ଦପୁର ମେଡିକାଲରେ ଭର୍ତ୍ତି କରାଯାଇଥିଲା । ଅବସ୍ଥା ଗୁରୁତ୍ୱର ହେବାରୁ ତାଙ୍କୁ କଟକ ବଡମେଡିକାଲକୁ ସ୍ଥାନାନ୍ତରୀତ କରାଯାଇଥିଲା । ମାତ୍ର କଟକ ଯିବା ବାଟରେ ତାଙ୍କର ପ୍ରାଣବାୟୁ ଉଡି ଯାଇଥିଲା ।

ଦୀର୍ଘ ୯ ଦିନହେଲା ଶହଶହ ଟ୍ରକମାଲିକ ଆନ୍ଦୋଳନରେ ସାମିଲ ହୋଇଥିଲେ ମଧ୍ୟ ଜିଲ୍ଲାପ୍ରଶାସନ କୌଣସି ଆଲୋଚନା ପାଇଁ ଆଗ୍ରହ ପ୍ରକାଶ କରୁନଥିବାରୁ ମାଲିକମାନଙ୍କ ମଧ୍ୟରେ କ୍ଷୋଭ, ଦୁଃଖ ଓ ଉତେଜନା ପ୍ରକାଶ ପାଇଛି ।

ଏ ଘଟଣା ନେଇ ବଡବିଲ ଟ୍ରକ ମାଲିକ ସଂଘ ଆସନ୍ତା କାଲି ୧୨ଘଣ୍ଟିଆ କେନ୍ଦୁଝର ବନ୍ଦ ଡାକରା ଦେଇଛି । ଏ ଘଟଣା ନେଇ ବ୍ୟାବସାୟୀକ ପ୍ରତିଷ୍ଠାନ ବନ୍ଦ ରହିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବଡ଼ବିଲ, ଅଗଷ୍ଟ ୪(ଓଡ଼ିଶା ଡ଼ଟ୍ କମ୍) କେନ୍ଦୁଝର ଜିଲ୍ଲା ବଡ଼ବିଲ ଅଞ୍ଚଳରେ ଶନିବାର ଏକ ହୋଟେଲରେ ଅଗ୍ନିକାଣ୍ଡ ଘଟି ତିନି ଜଣଙ୍କ ମୃତ୍ୟୁ ହେବା ସହ ଜଣେ ଗୁରୁତର ଆହତ ହୋଇଥିବା ପୋଲିସ କହିଛି ।

ସଂପୃକ୍ତ ବ୍ୟକ୍ତିମାନେ ଲକି ଇଣ୍ଡିଆ ନାମକ ହୋଟେଲରେ ଶୋଇଥିବା ବେଳେ ଭୋର ସମୟରେ ହଠାତ୍ ନିଆଁ ଲାଗିଯାଇଥିଲା । ଆହତ ବ୍ୟକ୍ତି ଜଣଙ୍କୁ ନିକଟସ୍ଥ ଡ଼ାକ୍ତରଖାନାରେ ଭର୍ତି କରାଯାଇଛି ।

ସର୍ଟସର୍କିଟ ଯୋଗୁଁ ଅଗ୍ନିକାଣ୍ଡ ହୋଇଥିବା ପୋଲିସ କହିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

କେନ୍ଦୁଝର, ଜୁଲାଇ ୧୪(ଓଡ଼ିଶା ଡ଼ଟ୍ କମ୍) କେନ୍ଦୁଝର ଜିଲ୍ଲା ବାମେବାରୀ ଥାନା ଅନ୍ତର୍ଗତ ଜଗଳା ଡ୍ୟାମ୍ ରେଲୱେ ଓଭରବ୍ରିଜ୍ ନିକଟରେ ଶନିବାର ଟ୍ରାକ୍ଟର ଓଲଟି ୩ଜଣ ମହିଳା ଶ୍ରମିକଙ୍କ ମୃତ୍ୟୁ ହେବା ସହ ୭ଜଣ ଗୁରୁତର ଆହତ ହୋଇଛନ୍ତି ।

ଉକ୍ତ ଟ୍ରାକ୍ଟରଟି ଗଡୁଆଟୋପା ଗ୍ରାମରୁ ୧୦ ଜଣ ମହିଳା ଶ୍ରମିକଙ୍କୁ ନେଇ ଆସୁଥିବାବେଳେ ଜଗଳା ଡ୍ୟାମ୍ ରେଲୱେ ଓଭରବ୍ରିଜ୍ ନିକଟରେ ବିପରୀତ ଦିଗରୁ ଆସୁଥିବା ଏକ ଡ଼ମ୍ପରଏହାକୁ ଧକ୍କା ଦେବାରୁ ଟ୍ରାକ୍ଟରଟି ଓଲଟି ପଡିଥିଲା ।

ଫଳରେ ଟ୍ରାକ୍ଟର ତଳେ ଚାପି ହୋଇ ଘଟଣାସ୍ଥଳରେ ତିନି ଜଣଙ୍କ ମୃତ୍ୟୁ ହୋଇଥିଲା । ମୃତକମାନେ ହେଲେ ବିନତି ମୁଣ୍ଡା, ଟୁରି ମୁଣ୍ଡା ଓ ଶନିବାରି ମୁଣ୍ଡା । ଦୁର୍ଘଟଣାରେ ଆହତ ହୋଇଥିବା ମହିଳାମାନେ ହେଲେ କେତେ ମୁଣ୍ଡା, ସାନିକା ମୁଣ୍ଡା, ସମୋବାରୀ ମୁଣ୍ଡା, ମିଜାରି ମୁଣ୍ଡା, ମଞ୍ଜୁ ମୁଣ୍ଡା, ସାପାନି ମୁଣ୍ଡା ଓ ବାସନ୍ତି ମୁଣ୍ଡ ।

ଆହତ ମହିଳାଙ୍କୁ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା କରାଯାଉଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

କେନ୍ଦୁଝର, ମଇ ୧୫(ଓଡ଼ିଶା ଡ଼ଟ୍ କମ୍) କେନ୍ଦୁଝର ଜିଲ୍ଲାରେ ମଙ୍ଗଳବାର ଯବାନମାନେ କୁମ୍ବିଂ ଅପରେସନ୍ ରେ ଯାଇଥିବା ବେଳେ ଗୁଳି ଫୁଟି ଜଣେ ଯବାନଙ୍କ ମୃତ୍ୟୁ ହୋଇଥିବା ପୋଲିସ କହିଛି ।

ସକାଳୁ ଯବାନମାନେ ନୟାକୋଟ୍ ଜଙ୍ଗଲକୁ କୁମ୍ବିଂ ପାଇଁ ଯାଇଥିବା ବେଳେ ହଠାତ୍ ଜଣେ ଯବାନଙ୍କ ବନ୍ଧୁକରୁ ଗୁଳି ଫୁଟି ତାଙ୍କ ପେଟରେ ବାଜିଥିଲା । ଫଳରେ ସେଠାରେ ତାଙ୍କର ମୃତ୍ୟୁ ହୋଇଥିଲା ।

ଏହା ଦୁର୍ଘଟଣା ଜନିତ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି । ସଂପୃକ୍ତ ଯବାନଙ୍କ ନାଁ ଅଜୟ ସାହୁ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୨୧(ଓଡ଼ିଶା ଡ଼ଟ୍ କମ୍) କେନ୍ଦୁଝର ଓ ନୂଆପଡ଼ା ଜିଲ୍ଲାରେ ମ୍ୟାଟ୍ରିକ ପରୀକ୍ଷାରେ କପି କରିବାକୁ ନେଇ ଶନିବାର ଉତ୍ୟକ୍ତ ଲୋକମାନେ ସ୍କ୍ୱାଡ଼ ଗାଡ଼ି ଭଙ୍ଗାରୁଜା କରିଥିବା ପୋଲିସ କହିଛି ।

କପି କରୁଥିବା ବେଳେ ମାଧ୍ୟମିକ ଶିକ୍ଷା ପରିଷର କେନ୍ଦ୍ରୀୟ ସ୍କ୍ୱାଡ୍ ହାତରେ ଧରାପଡି ୫୧ ଜଣ
ପରୀକ୍ଷାର୍ଥୀ ଦଣ୍ଡିତ ହୋଇଛନ୍ତି ।

ଏଥିରେ ଉତ୍କ୍ଷିପ୍ତ ହୋଇ ଅଭିଭାବକ , ସ୍ଥାନୀୟ ଲୋକ ଓ ପରୀକ୍ଷାର୍ଥୀଙ୍କ ଆକ୍ରମଣରେ ସ୍କ୍ୱାଡ୍ଙ୍କୁ ଆଣିଥିବା କାର୍ ଭାଙ୍ଗି ଚୂରମାର ହୋଇଯାଇଥିବା ବେଳେ ଢେଲାମାଡରେ କାଞ୍ଜିପାଣି ହାଇସ୍କୁଲର ଜଣେ ପରୀକ୍ଷାର୍ଥୀଙ୍କ ମୁଣ୍ଡ ଫାଟି ଯାଇଛି ।

ପରୀକ୍ଷା ଶେଷ ହେବା ମାତ୍ରେ କପି ଧରାପଡିଥିବା ପରୀକ୍ଷାର୍ଥୀ ମଧ୍ୟ ଏଥିରେ ସାମିଲ ହୋଇ କାର୍କୁ
ଭଙ୍ଗାରୁଜା କରିଥିଲେ ଏବଂ ସ୍କ୍ୱାଡ୍ ଳର ଗୁରୁତ୍ୱପୁର୍ଣ୍ଣ କାଗଜପତ୍ର ମଧ୍ୟ ଚିରି ଦେଇଥିଲେ ।

ପରୀକ୍ଷା କେନ୍ଦ୍ରରେ କେତେକ ନିର୍ଦ୍ଦିଷ୍ଟ ପରୀକ୍ଷାର୍ଥୀଙ୍କୁ କପି ପ୍ରୋତ୍ସାହନ ଅଭିଯୋଗରେ କୋମନା ବ୍ଳକ୍ ଭେଲା ସ୍ଥିତ ଡ. କାର୍ଟଜୁ ହାଇସ୍କୁଲର ପ୍ରଧାନ ଶିକ୍ଷକ ତଥା ପରୀକ୍ଷା କେନ୍ଦ୍ର ଅଧୀକ୍ଷକ ଦେବରଞ୍ଜନ ପଟେଲଙ୍କୁ ପୋଲିସ ଗିରଫ କରିଛି ।

ସେହିପରି ସିନାପାଲି ବ୍ଲକ ବୋଡ଼ାଲ ହାଇସ୍କୁଲ ଶିକ୍ଷକ ରମେଶ ପଟେଲ ଓ ୨ ଜଣ ଅଭିଭାବକଙ୍କୁ ମଧ୍ୟ
କପି ଯୋଗାଇବା ଅଭିଯୋଗରେ ପୋଲିସ ଗିରଫ କରଛି ।

ଓଡ଼ିଶା ଡ଼ଟ୍ କମ୍