କ୍ରାଇମବ୍ରାଞ୍ଚ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୫(ଓଡିଶା ଡଟ୍ କମ୍ )- କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା ଜମିଜମା ଠକେଇ ମାମଲାରେ ହାଇଟେକ୍ ଗ୍ରୁଫ ଏମ୍ଡି ତରୁପତି ପାଣିଗ୍ରାହୀଙ୍କ ସମେତ ତିନିଜଣଙ୍କୁ ଗିରଫ କରିଛି ।

ଅନ୍ୟ ଦୁଇଜଣ ହେଲେ ତିରୁପତିଙ୍କ ସଂପର୍କୀୟ ମଧୁସୂଦନ ପାଣିଗ୍ରାହୀ ଓ ଆରଏମ୍ଇ ପ୍ରାଇଭେଟ ଲିମିଟେଡର ଡାଇରେକ୍ଟର ତିରୁପତି ଚୌଧୁରୀ । କ୍ରାଇମବ୍ରାଞ୍ଚ ଏଡିଜି ବିଜୟ କୁମାର ଶର୍ମା ଏ ସଂପର୍କରେ ଏକ ସାମ୍ବାଦିକ ସମ୍ମିଳନୀରେ ମଙ୍ଗଳବାର ଦିନ ଏହି ସୂଚନା ଦେଇଛନ୍ତି ।

ଜମି ଯୋଗାଇ ଦେବାପାଇଁ କହି ଲୋକଙ୍କ ଠାରୁ ଟଙ୍କା ନେଇ ଏଥିରେ ଖିଲାପ ହୋଇଥିବା ସେ କହିଛନ୍ତି । ଏନେଇ କ୍ରାଇମବ୍ରାଞ୍ଚରେ ଜଣେ ବ୍ୟକ୍ତି ଅଭିଯୋଗ କରିଥିଲେ । ସେହି ଆଧାରରେ କ୍ରାଇମବ୍ରାଞ୍ଚ ଏମାନଙ୍କୁ ଗିରଫ କରିଛି ।

ଅଭିଯୋଗକାରୀଙ୍କୁ ସୁନ୍ଦରପଦା ଅଞ୍ଚଳରେ ଜମି ଯୋଗାଇ ଦେବାକୁ କଂପାନୀ ଟଙ୍କା ନେଇଥିଲା । ୨୦୦୩ରୁ ୨୦୦୯ ମସିହା ମଧ୍ୟରେ ୩୦ଟି କିସ୍ତିରେ ସେ ଟଂକା ଦେଇଥିଲେ । ଏନେଇ ତିନି ଜଣଙ୍କ ନାମରେ କେସ ରୁଜୁ ହୋଇଥିଲା ।

ଘଟଣାର ସଂପର୍କରେ ଅଧିକ ତଥ୍ୟ ପାଇଁ ତଦନ୍ତ ଚାଲିଛି ବୋଲି ଶ୍ରୀ ଶର୍ମା କହିଛନ୍ତି । ଏ ନେଇ ଗ୍ରୁପର ଅନ୍ୟାନ୍ୟ ଅଫିସ ଉପରେ ଚଢାଉ କରାଯାଉଛି ବୋଲି ସେ ସୂଚନା ଦେଇଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୬(ଓଡ଼ିଶା ଡ଼ଟ୍ କମ୍) –ଆୟୁର୍ବେଦିକ୍ ଡାକ୍ତର ମାଧବୀଲତା ପ୍ରଧାନଙ୍କ ମୃତ୍ୟୁ ଘଟଣାର କ୍ରାଇମବ୍ରାଞ୍ଚ ତଦନ୍ତ ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି । ଏହାପରେ କ୍ରାଇମବ୍ରାଞ୍ଚ ତଦନ୍ତ ଭାର ହାତକୁ ନେଇଛି ।

ଏ ସଂକ୍ରାନ୍ତରେ କ୍ରାଇମବ୍ରାଞ୍ଚ ଥାନାରେ ଏକ ମାମଲା ରୁଜୁ ହୋଇଛି । ଡିସିପି ଓ ୩ ଜଣ ଅଫିସଙ୍କୁ ନେଇ ଗଠିତ ଏହି ଟିମ୍ ଆଜି ପୁରୀ ଗସ୍ତ କରିବେ ବୋଲି କ୍ରାଇମବ୍ରାଞ୍ଚର ଅତିରିକ୍ତ ଡିଜି ବିଜୟକୁମାର ଶର୍ମା ସୂଚନା ଦେଇଛନ୍ତି ।

ସେହିପରି ମହିଳା କଂଗ୍ରେସର ଅଭିଯୋଗକ୍ରମେ ରାଜ୍ୟ ମାନବାଧିକାର କମିଶନ ପୁରୀ ଏସପି ଏବଂ କଟକ ରେଳବାଇ ଏସପିଙ୍କୁ ଡାକ୍ତର ମାଧବୀଲତାଙ୍କ ମାମଲାରେ ଯେଉଁସବୁ ଅନୁସନ୍ଧାନ ହୋଇଛି ତା’ର ରିପୋର୍ଟ କଟକସ୍ଥିତ ରାଜ୍ୟ ମାନବାଧିକାର ସୁରକ୍ଷା ସେଲରେ ଦାଖଲ କରିବାକୁ ନିର୍ଦେଶ ଦେଇଛନ୍ତି ।

ମହିଳା କମିଶନର ଅଧ୍ୟକ୍ଷା ଜ୍ୟୋତି ପାଣିଗ୍ରାହୀ ଏହି ଘଟଣାର ଅନୁଧ୍ୟାନ ପରେ ଦେଇଥିବା ମନ୍ତବ୍ୟକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଥିଲା ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ କମ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୨୧(ଓଡ଼ିଶା ଡ଼ଟ୍ କମ୍) – ସେପ୍ଟେମ୍ବର ୬ ଭୁବନେଶ୍ୱରରେ ରାଜ୍ୟ ସରକାରଙ୍କ ବିରୋଧରେ ଅନୁଷ୍ଠିତ କଂଗ୍ରେସର ସମାବେଶ ବେଳେ କର୍ତବ୍ୟରତ ଜଣେ ମହିଳା ପୁଲିସ କନଷ୍ଟେବଳଙ୍କୁ ମାଡ଼ ଘଟଣାର ଅନୁସନ୍ଧାନ କରି ରାଜ୍ୟ ମହିଳା କମିଶନ ରାଜ୍ୟ ସରକାରଙ୍କୁ ଦେଇଥିବା ରିପୋର୍ଟକୁ କଂଗ୍ରେସ ବିରୋଧ କରିଛି ।

ସରକାରଙ୍କ ଚାପରେ ଏଭଳି ରିପୋର୍ଟ ପ୍ରସ୍ତୁତ ହୋଇଛି ବୋଲି ଅଭିଯୋଗ କରିଛି କଂଗ୍ରେସ । କମିଶନରଙ୍କ ଦ୍ୱାରାସୁପାରିଶ କରାଯାଇଥିବା କ୍ରାଇମବ୍ରାଞ୍ଚ ତଦନ୍ତକୁ ମଧ୍ୟ ଦଳ ବିରୋଧ କରିଛି ।

କଂଗ୍ରେସର ବରିଷ୍ଠନେତା ଗଣେଶ୍ୱର ବେହେରା କହିଛନ୍ତି ଆମେ କ୍ରାଇମବ୍ରାଞ୍ଚ ତଦନ୍ତକୁ ଭୟ କରୁନାହୁଁ । ଯେତେବେଳେ ଏହି ଘଟଣାର ଲୋକପାଳ ତଦନ୍ତ ଚାଲୁଛି ତେଣୁ କ୍ରାଇମବ୍ରାଞ୍ଚ ତଦନ୍ତ ପାଇଁ ସୁପାରିଶ କରିବା କୌଣସି ପ୍ରାସଙ୍ଗକତା ନାହିଁ । ସାମଗ୍ରୀକ ଭାବେ ବିଚାରକଲେ ଏ ରିପୋର୍ଟଟି ସରକାରଙ୍କ ଦ୍ୱାରାପ୍ରଭାବିତ ବୋଲି ଜଣାପଡୁଛି ।

କମିଶନର ଅଧ୍ୟକ୍ଷା ଜ୍ୟୋତି ପାଣିଗ୍ରାହୀ ରାଜ୍ୟ ସରକାରଙ୍କୁ ଦେଇଥିବା ତାଙ୍କ ୬ ପୃଷ୍ଠା ରିପୋର୍ଟରେ ଦର୍ଶାଇଛନ୍ତି ଯେ ସେଦିନ କଂଗ୍ରେସର ସମାବେଶ ବେଳେ ଯେଉଁସବୁ ଘଟଣା ଘଟିଲା ତାହା ନିନ୍ଦନୀୟ ଏବଂ ଏଥିପାଇଁ ସେ ଓଡ଼ିଶା କଂଗ୍ରେସ ବ୍ୟାପାର ଦାୟିତ୍ୱରେ ଥିବା କେନ୍ଦ୍ରୀୟ ପ୍ରଭାରୀ ଜଗଦୀଶ ଟାଇଟଲର ଓ ଅନ୍ୟାନ୍ୟ ନେତାମାନଙ୍କୁ ଦାୟୀ କରିଛନ୍ତି ।

ଘଟଣାର ବ୍ୟାପକତା ଏବଂ ବିଭିନ୍ନ ସ୍ତରର ସଂପୃକ୍ତି ନେଇ ଏହାର କ୍ରାଇମବ୍ରାଞ୍ଚ ତଦନ୍ତ କରିବାପାଇଁ ପାଣିଗ୍ରାହୀ ରାଜ୍ୟ ସରକାରଙ୍କୁ ସୁପାରିସ କରିଥିବାବେଳେ ଏହି ଘଟଣାରେ ରାଜ୍ୟ ସରକାର, ମୁଖ୍ୟମନ୍ତ୍ରୀ ଓ ପୁଲିସ ଡିଜି ଆଦୌ ଦାୟୀ ନୁହନ୍ତି ବୋଲି ଉଲ୍ଲେଖ କରିଛନ୍ତି ।

ଏହାଛଡ଼ା ପରିସ୍ଥିତିକୁ ସମ୍ଭାଳିବାରେ ପୁଲିସ ଓ ପ୍ରଶାସନ ଯେଭଳି କାର୍ଯ୍ୟ କରିଛି ତାହାକୁ ସେ ମଧ୍ୟ ପ୍ରଶଂସା କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

କାକଟପୁର,ଅକ୍ଟୋବର ୧୩ (ଓଡିଶା ଡଟ୍ କମ୍ )- ବହୁଚର୍ଚ୍ଚିତ ହାଇସ୍କୁଲ ସାର୍ଟିଫିକେଟ ବାର୍ଷିକ ପରୀକ୍ଷା ପ୍ରଶ୍ନପତ୍ର ଚୋରି ଘଟଣାରେ ଦୁଇଜଣ ଅଭିଯୁକ୍ତ ପୁରୀ ଜିଲା କାକଟପୁର ନିକଟସ୍ଥ ବାଜପୁର ଭଗବତୀ ବିଦ୍ୟାପୀଠର ପିଅନ ରୋହିତ ଭୋଇ ଓ ରାତ୍ର ଜଗୁଆଳି ପତିତପାବନ ଚାନ୍ଦଙ୍କୁ କ୍ରାଇମବ୍ରାଞ୍ଚ ପୁଲିସ ଗିରଫ କରିଛି ।

ଚଳିତ ବର୍ଷ ମାର୍ଚ୍ଚ ୨୧ ତାରିଖରେ ମାଟ୍ରିକ ପରୀକ୍ଷା ପ୍ରଶ୍ନପତ୍ର ବାଜପୁର ଭଗବତୀ ବିଦ୍ୟାପୀଠରୁ ଚୋରି ହୋଇଯିବାରୁ ସମଗ୍ର ରାଜ୍ୟରେ ୨୫ଦିନ ପରେ ଆଉଥରେ ପରୀକ୍ଷା କରାଇବାକୁ ପଡିଥିଲା ।

ରାଜ୍ୟ ସରକାର ଘଟଣାର କ୍ରାଇମବ୍ରାଞ୍ଚ ତଦନ୍ତ ପାଇଁ ନିର୍ଦ୍ଦେଶ ଦେବା ପରେ କ୍ରାଇମବ୍ରାଞ୍ଚ ଆଇଜି ବିଜୟ ଶର୍ମାଙ୍କ ପ୍ରତ୍ୟକ୍ଷ ତଦାରଖରେ ମାମଲାର ତଦନ୍ତ ଚାଲିଛି ।

କ୍ରାଇମବ୍ରାଞ୍ଚ ଡିଏସପି ବି.ପି. ଚକ୍ରବର୍ତୀଙ୍କ ନେତୃତ୍ୱରେ ଏକ ଦଳ ଶୁକ୍ରବାର ଦିନ ଏ ଦୁଇଜଣଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛନ୍ତି ।

ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ ପ୍ରିୟରଞ୍ଜନ ମିଶ୍ର ସେମାନଙ୍କ ଜାମିନ ଆବେଦନ ଖାରଜ କରିଦେବାରୁ ଉଭୟଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।

କ୍ରାଇମବ୍ରାଞ୍ଚ ଡିଏସପି ଶ୍ରୀ ଚକ୍ରବର୍ତୀ କହିଛନ୍ତି ଯେ ଏହି ଘଟଣାର ମୁଖ୍ୟ ଅଭିଯୁକ୍ତ ଏବେବି ଫେରାର ରହିଛି ଖୁବଶୀଘ୍ର ସେ ଗିରଫ ହେବେ ବୋଲି ଆଶା କରାଯାଉଛି ।

ଓଡିଶା ଡଟ୍ କମ୍

ଓଡିଶା ଡଟ କମ