ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ରାୟଗଡା, ଜାନୁଆରୀ ୧୭(ଓଡ଼ିଶା ଡ଼ଟ୍ କମ୍)-ରାୟଗଡ ଗଣବଳାତ୍କାର ପୀଡିତାଙ୍କ ଶେଷକୃତ୍ୟ ରାୟଗଡ ଶିରିଗୁଡା ସ୍ଥିତ ଶ୍ମଶାନରେ ଶୋକାକୁଳ ପରିବେଶ ମଧ୍ୟରେ ସଂପନ୍ନ ହୋଇଯାଇଛି ।
ବୁଧବାର ଦିନ ଏହି କାର୍ଯ୍ୟରେ ରାଜନୈତିକ ବ୍ୟକ୍ତିବିଶେଷ, ପ୍ରଶାସନିକ ଅଧିକାରୀଙ୍କ ସମେତ ଶତାଧିକ ଲୋକ ଶ୍ମଶାନଘାଟରେ ଉପସ୍ଥିତ ରହି ପୀଡିତାଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ ।
ଶ୍ମଶାନରେ ମୃତ ଦେହକୁ କଂଗ୍ରେସର ପିସିସି ସଂପାଦକ ମୁନା ତ୍ରିପାଠୀ, ଜିଲା କଂଗ୍ରେସ ସଭାପତି ଦୁର୍ଗାପ୍ରସାଦ ପଣ୍ଡା,ପୂର୍ବତନ ବିଧାୟକ ପୂର୍ଣ୍ଣଚନ୍ଦ୍ର ମାଝି, ମା ଘରର କେବିକା ଜିଲାର ଅଧ୍ୟକ୍ଷା କାଦମ୍ବିନୀ ତ୍ରିପାଠୀ, ଜିଲାପରିଷଦ ଅଧ୍ୟକ୍ଷା ସୁଜାତା ମାଣ୍ଡାଙ୍ଗି, ବିଜେଡିର ଜିଲା ସଭାପତି ସୁଧୀର ଦାସ, କେସିସି ବ୍ୟାଙ୍କ ଉପାଧ୍ୟକ୍ଷ ହେମନ୍ତ ନାୟକ, ପୌର ପରିଷଦର ଅଧ୍ୟକ୍ଷ ରାଇସିଂ ବିଡିକା, ବିଜେପି ପକ୍ଷରୁ ରାଜ୍ୟ କାର୍ଯ୍ୟକାରୀଣି ସଭ୍ୟ ରଜତ ମାଦଳା, ଜିଲା ସଂପାଦକ ସୁମନ୍ତ ମହାରଣା ପ୍ରମୁଖ ଯୋଗ ଦେଇଥିଲେ ।
ପ୍ରଶାସନ ପକ୍ଷରୁ ଡେପୁଟି କଲେକ୍ଟର ସୁବ୍ରତ ପାଣିଗ୍ରାହି, ଅତିରିକ୍ତ ଏସପି ଏକେ ସିଂ, ଡିଏସପି ଭିଆର ରାଓ, ଥାନାଧିକାରୀ ପ୍ରଶାନ୍ତ ଭୂପତି, ତଦନ୍ତ ଅଧିକାରୀ ସୁଜାତା ଖମ୍ଭାରି ପ୍ରମୁଖ ଯୋଗ ଦେଇଥିଲେ । ପୀଡିତାଙ୍କ ସଦଗତି ପାଇଁ ଦଦୁଇ ମିନିଟ ନୀରବ ପ୍ରାର୍ଥନା କରାଯାଇଥିଲା ।
ପୀଡିତାଙ୍କ ଦାଦା ଡି ମାଲ୍ଲେସୁ ମୁଖାଗ୍ନି ଦେଇଥିଲେ । ଜିଲ୍ଲାପାଳ ଶବସତ୍କାର ପାଇଁ ରେଡକ୍ରସ ପାଣ୍ଠିରୁ ଦଶ ହଜାର ଟଙ୍କା ଅନୁଦାନ ପ୍ରଦାନ କରିଥିଲେ ।
ଗତ ତିନି ଦିନ ତଳେ ଅଚାନକ ଭାବେ ପୀଡିତାଙ୍କ ସ୍ୱାସ୍ଥ୍ୟରେ ଅବନତି ଦେଖା ଦେବା ପରେ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲେ ସୁଦ୍ଧା ଡାକ୍ତରଙ୍କ ସମସ୍ତ ଚେଷ୍ଟା ବିଫଳ ହୋଇଥିଲା । ଦୀର୍ଘ ୧୩ ଦିନ ଧରି ମୃତ୍ୟୁ ସହ ସଂଘର୍ଷ କରିବା ପରେ ପୀଡିତାଙ୍କ ବିଶାଖାପାଟଣାର ଏକ ଘରୋଇ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଯାଇଥିଲା ।
ବୁଧବାର ଦିନ ମୃତଦେହ ବ୍ୟବଛେଦ ପରେ ପୁଲିସର ସୁରକ୍ଷାବଳୟ ମଧ୍ୟରେ ରାୟଗଡ ସ୍ଥିତ ପୀଡିତାର ବାସଗୃହ ଆଞ୍ଜିଆପେଟାକୁ ଅଣାଯାଇଥିଲା । ସେଠାରେ ପୀଡିତାର ପରିବାରବର୍ଗ ସହିତ କଂଗ୍ରେସର ନେତାମାନେ ଅପେକ୍ଷା କରି ରହିଥିଲେ ।
ସେଠାରେ ସାହିବାସିନ୍ଦା ଶେଷଦର୍ଶନ କରିବା ପରେ ମୃତଦେହକୁ ସିଧାସଳଖ ଆମ୍ବୁଲାନ୍ସ ମାଧ୍ୟମରେ ଶୋଭାଯାତ୍ରାରେ ଶ୍ମଶାନକୁ ନିଆଯାଇଥିଲା । ଶିରିଗୁଡା ସ୍ଥିତ ଶ୍ମଶାନରେ ଅପରାହ୍ନ ପ୍ରାୟ ୪ଟାରେ ଶବସତ୍କାର କରାଯାଇଥିଲା ।
ଓଡ଼ିଶା ଡ଼ଟ୍ କମ୍
