ଛାତ୍ରଛାତ୍ରୀ

ଓଡିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୩୦(ଓଡିଶା ଡ଼ଟ୍ କମ୍)-ଚଳିତବର୍ଷ ଜୁଲାଇ ଠାରୁ ଏମ୍ସରେ ରୋଗୀସେବା ଆରମ୍ଭ ହେବ । ଓଡିଶା ଗସ୍ତରେ ଆସିଥିବା କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଗୋଲାମନବୀ ଆଜାଦ୍ ବୁଧବାରଏମ୍ସ ବୁଲି ଦେଖିବାପରେ ଏ ବିଷୟରେ ସୂଚନା ଦେଇଛନ୍ତି ।

ଭୁବନେଶ୍ୱର ଉପକଣ୍ଠ ସିଜୁଆ ଠାରେ ନିର୍ମାଣଧିନ ଅଖିଳ ଭାରତୀୟ ଆର୍ୟୁବେଦ ସଂସ୍ଥା ଏମ୍ସର ନିର୍ମାଣ କାର୍ଯ୍ୟ ସମୀକ୍ଷାକରି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ କହିଛନ୍ତି ଏମ୍ସର ନିର୍ମାଣ କାର୍ଯ୍ୟ ଆସନ୍ତା ମେ ସୁଦ୍ଧା ଶେଷ କରିବା ପାଇଁ ନିର୍ମାଣକାରୀ ସଂସ୍ଥାକୁ ନିର୍ଦ୍ଦେଶ ଦିଆଯାଇଛି ।

ଏମ୍ସର ନିର୍ମାଣ କାର୍ଯ୍ୟରେ ତିନୋଟି ସଂସ୍ଥା ନିୟୋଜିତ ହୋଇଛନ୍ତି । ମେ ସୁଦ୍ଧା ସମସ୍ତ ଆନୁସଙ୍ଗିକ କାର୍ଯ୍ୟ ଶେଷ କରିବା ସହ ଏମ୍ସରେ ଛାତ୍ରଛାତ୍ରୀଙ୍କ ହଷ୍ଟେଲ,ଗେଷ୍ଟେ ହାଉସ,ଷ୍ଟାପକ୍ୱାଟର ଶୀଘ୍ର ଶେଷ କରିବାକୁ ସେ ନିର୍ଦ୍ଦେଶ ଦେଇଛନ୍ତି ।

ସମୀକ୍ଷା ବୈଠକରେ ତିନୋଟି ଯାକ ସଂସ୍ଥାର ବରିଷ୍ଠ ଅଧିକାରୀଙ୍କୁ ଡାକି ଏ ବିଷୟରେ ତାଗିଦ୍ କରିଦେଇଛନ୍ତି । ପ୍ରଥମ ପର୍ଯ୍ୟାୟରେ ଆଉଟଡୋର ସହ କେତେକ ଗୁରୁତ୍ୱପୂର୍ଣ୍ଣ ବିଭାଗରେ ସ୍ୱାସ୍ଥ୍ୟସେବା ଯୋଗାଇ ଦେବାକୁ ଲକ୍ଷ ରଖି ଯାଇଥିବା ସ୍ୱାସ୍ଥ୍ୟମନ୍ତ୍ରୀ ସୂଚନା ଦେଇଛନ୍ତି ।

ଆଜିର ଏ ଗସ୍ତ ସମୟରେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡାକ୍ତରୀ ଛାତ୍ରଛାତ୍ରୀଙ୍କ ସହିତ ଆଲୋଚନା କରିଛନ୍ତି । ଛାତ୍ରଛାତ୍ରୀମାନେ ଏମ୍ସ ଆଖପାଖ ଗାଁରେ ସ୍ୱାସ୍ଥ୍ୟସେବା ଯୋଗାଇ ଦେବାସହ ଡାକ୍ତରଙ୍କୁ ସାହାର୍ଯ୍ୟ କରିନ୍ତୁ ଓ ଅଭିଜ୍ଞତା ହାସଲ କରନ୍ତୁ ବୋଲି ସେ ଛାତ୍ରଛାତ୍ରୀମାନଙ୍କୁ ପରାମର୍ଶ ଦେଇଛନ୍ତି ।

ଓଡିଶା ଡ଼ଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଖୋର୍ଦ୍ଧା, ଜାନୁଆରୀ ୨୮(ଓଡିଶା ଡଟ୍ କମ୍)-ସ୍ଥାନୀୟ ବିବେକାନନ୍ଦ ଇନଷ୍ଟିଚ୍ୟୁଟ୍ ଅଫ୍ ଆଡ୍ଭାନ୍ସଡ ଏଜୁକେସନାଲ୍ ରିସର୍ଚ୍ଚ ଆଣ୍ଡ୍ ଟେକ୍ନୋଲୋଜି ଓ କଲେଜ୍ ଅଫ୍ ବିଜିନେସ୍ ମ୍ୟାନେଜ୍ମେଣ୍ଟ୍ ର ମିଲିତ ଆନୁକୁଲ୍ୟରେ ୬୪ତମ ସାଧାରଣ ତନ୍ତ୍ର ଦିବସ ପାଳିତ ହୋଇଯାଇଛି ।

ବିବେକାନନ୍ଦ ବିଜ୍ଞାନ ଭବନର ସଭାପତି ଶିକ୍ଷାବିତ୍ ଡକ୍ଟର ଅଶୋକ କୁମାର ନନ୍ଦ ମୁଖ୍ୟ ଅତିଥି ଭାବରେ ଯୋଗଦେଇ ଆଗାମୀ ପିଢୀପାଇଁ ଭାରତବର୍ଷକୁ ଦୁର୍ନୀତି ଓ ଭ୍ରଷ୍ଟାଚାର ମୁକ୍ତ କରିବା ପାଇଁ ଛାତ୍ରଛାତ୍ରୀମାନଙ୍କୁ ଆହ୍ୱାନ ଦେଇଥିଲେ ।

ଅନୁଷ୍ଠାନର ପ୍ରଶାସକ ଡକ୍ଟର ବୃନ୍ଦାବନ ପଣ୍ଡା ଭାରତର ମହାପୁରୁଷମାନଙ୍କ ତ୍ୟାଗପୁତ ଜୀବନୀକୁ ପଢିବା ପାଇଁ ପିଲାମାନଙ୍କୁ ପରାମର୍ଶ ଦେଇଥିଲେ । ଅନୁଷ୍ଠାନର ଚେୟାରମ୍ୟାନ୍ ଶିକ୍ଷାବିତ୍ ଡକ୍ଟର ଧିରେନ୍ଦ୍ର ନନ୍ଦ ଛାତ୍ରଛାତ୍ରୀମାନେ ଦେଶ ପ୍ରେମର ଭାବନାରେ ବାନ୍ଧିହୋଇ ସମାଜରେ ନିଜର ସ୍ଥିତିକୁ ମଜଭୁତ କରିବାକୁୁ କହିଥିଲେ ।

ଅନ୍ୟମାନଙ୍କ ମଧ୍ୟରେ ଅନୁଷ୍ଠାନର ଉପାଧ୍ୟକ୍ଷ ସଂଜୟ କୁମାର ନାୟକ, ଅଧ୍ୟାପକ ମାନସ ରଞ୍ଜନ ସ୍ୱାଇଁ, ପ୍ରଫୁଲ୍ଲ କୁମାର ମହାପାତ୍ର୍ର, ସରସ୍ୱତୀ ସାହୁ, ସ୍ମୃତିଶୋଭନ ରାଉତ, ଅଭିଜିତ ପଟ୍ଟଯୋଶୀ, ପ୍ରବାସିନି ସାହୁ, ସୁଶାନ୍ତ କୁମାର ଦାଶ, ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମରେ ସହଯୋଗ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଜାନୁଆରୀ ୯(ଓଡିଶା ଡଟ୍ କମ୍)- ଆଜିକାଲିକାର ସାମ୍ବାଦିକମାନେ ଗତାନୁଗତିକତା ବା ପାରମ୍ପରିକତା ଠାରୁ ଟିକେ ଦୂରେଇ ଯାଇ, ଟିକେ ବାଟ ଭାଙ୍ଗି ଭିନ୍ନ ଧାରାରେ ରିପୋଟିଂ ବା ସମ୍ବାଦ ପରିବେଷଣ କରିବା ଲାଗି ଭୁବନେଶ୍ୱରରୁ ପ୍ରକାଶିତ ଦୈନିକ ଓଡ଼ିଆ ଖବରକାଗଜ ‘ସାହାଣମେଲା’ ର ସମ୍ପାଦକ ଶ୍ରୀ ଦେବେନ୍ଦ୍ର ନାଥ ଦାଶ ପରାମର୍ଶ ଦେଇଛନ୍ତି ।

ଉତ୍କଳ ବିଶ୍ୱବିଦ୍ୟାଳୟ- ଅନୁବନ୍ଧିତ ‘ଏକାଡେମୀ ଅଫ୍ ମ୍ୟାନେଜମେଣ୍ଟ ଆଣ୍ଡ୍ ଇନ୍ଫର୍ମେସନ୍ ଟେକ୍ନୋଲୋଜି (ଅମିତ୍) ର ଭୁବନେଶ୍ୱର – ମଞ୍ଚେଶ୍ୱର ସ୍ଥିତ ସ୍ନାତକୋତ୍ତର ସାମ୍ବାଦିକତା ଓ ଗଣ-ଯୋଗାଯୋଗ ବିଭାଗ ଆନୁକୂଲ୍ୟରେ ଆଜି ଅନୁଷ୍ଠିତ ‘ଓଡ଼ିଆ ସାମ୍ବାଦିକତାର ବିକାଶ’ ଶୀର୍ଷକ ଆଲୋଚନାଚକ୍ରରେ ଅତିଥି ଭାବେ ଯୋଗ ଦେଇ ସେ କହିଲେ ଯେ ସାମ୍ବାଦିକ ମାନେ ଭଲ ହେବା ପାଇଁ ସବୁବେଳେ ଚେଷ୍ଟା କରିବା ଆବଶ୍ୟକ ।

ସେମାନେ ଚାହଁଲେ ରିପୋଟିଂ କଲା ବେଳେ ଆବଶ୍ୟକ ସ୍ଥଳେ ସଂପୃକ୍ତ ବ୍ୟକ୍ତିମାନଙ୍କୁ ଆଉଁଷି ଦେବା ସଙ୍ଗେ ସଙ୍ଗେ ସେମାନଙ୍କ ଚୋପା ମଧ୍ୟ ଛଡ଼ାଇ ଦେଇପାରିବେ ।

ସେ କହିଲେ ଯେ ସାମ୍ବାଦିକତା ହେଉଛି ଏକ ସମ୍ମାନଜନକ ପେସା । ଜଣେ ସାମ୍ବାଦିକ ହେବାକୁ ଆଗ୍ରହ ପ୍ରକାଶ କଲେ, ସେ ବହୁବିଧ ପ୍ରତିଭାଧାରୀ ହୋଇଥିବା ଆବଶ୍ୟକ । ତାଙ୍କ ଚିନ୍ତାଧାରା ‘ଡାଇନାମିକ୍’ ହେବା ଦରକାର । ସାହିତ୍ୟ ସହିତ ସାମ୍ବାଦିକତା ଅଙ୍ଗାଙ୍ଗୀ ଭାବେ ଜଡ଼ିତ ଥିବା ଯୋଗୁଁ ସାମ୍ବାଦିକମାନଙ୍କର ଅଭିଧାନଗତ ତଥା ବ୍ୟାକରଣଗତ ଜ୍ଞାନ ରହିବା ସର୍ବାଦୌବାନୀୟ ।

ଦାଶ କହିଲେ ଯେ ସମ୍ପ୍ରତି ସମ୍ବାଦପତ୍ର ଗୁଡିକ ବିଭିନ୍ନ ରାଜନୈତିକ ଦଳ ବା କର୍ପୋରେଟ୍ ହାଉସ୍ ଅଥବା ଅର୍ବୁଦପତିଙ୍କ ସହିତ ସମ୍ପୃକ୍ତ ଥିବା ଯୋଗୁଁ ଅଧୁନା ରିପୋର୍ଟର ମାନେ ସ୍ୱାଧୀନ ବା ନିରପେକ୍ଷ ଭାବେ ଲେଖି ପାରୁନାହାନ୍ତି । ବିଶ୍ୱପ୍ରସିଦ୍ଧ ଶ୍ରୀକ୍ଷେତ୍ର ପୁରୀର ଶ୍ରୀଜଗନ୍ନାଥ ମନ୍ଦିର ସହିତ ‘ସାହାଣମେଲା’ର ନାମଗତ ତଥା ଭାବଗତ ସମ୍ପର୍କ ରହିଛି ।

ଶ୍ରୀଜଗନ୍ନାଥ ହେଉଛନ୍ତି ସମଗ୍ର ଓଡ଼ିଆ ଜାତିର ପରିଚୟ ଏବଂ ଓଡ଼ିଆ ମାନଙ୍କ ତ୍ରାଣକର୍ତ୍ତା । ‘ସାହାଣମେଲା’ଶବ୍ଦର ଅର୍ଥ ହେଉଛି ଯାହା ସର୍ବସାଧାରଣଙ୍କ ଲାଗି ଖୋଲା ।

ଦାଶ କହିଲେ ଯେ ଯେଉଁ ସମ୍ବାଦ ପ୍ରକାଶନ ଦ୍ୱାରାଜନସମାଜର କୌଣସି ଉପକାର ହୁଏ ନାହିଁ ,ବରଂ କ୍ଷତି ହୁଏ – ସେ ପ୍ରକାର ସମ୍ବାଦର ପରିବେଷଣ ସର୍ବଥା ତଥା ସର୍ବଦା ବର୍ଜ୍ଜନୀୟ ।

ବିଭିନ୍ନ ଘଟଣାରେ ଦେଖାଯାଉଛି ଯେ ନିର୍ଦ୍ଧିଷ୍ଟ ଗୋଷ୍ଠୀର ସଦସ୍ୟମାନେ ସର୍ବତ୍ର ଗଣ୍ଡଗୋଳ ଘଟାଉଛନ୍ତି । ଅଥଚ ଦଳେ ନୀରିହ ବା ଡରୁଆ ଲୋକ ଗୋଳିଆପାଣିକୁ ଗୋଡ଼ ନ ବଢ଼ାଇବା ନ୍ୟାୟରେ ଅନ୍ୟାୟର ପ୍ରତିବାଦ ନ କରି ଚୁପଚାପ ରହିଯାଉଛନ୍ତି । କିନ୍ତୁ ବେଳେ ବେଳେ ବା ସ୍ଥଳ ବିଶେଷରେ ସେମାନେ ମଧ୍ୟ ମାଡ଼ ଖାଇଯାଉଛନ୍ତି ।

ଗୁଣ୍ଡା,ବଦ୍ମାସ୍ ମାନଙ୍କ ଯୋଗୁଁ ନୀରିହ ଛାତ୍ରଛାତ୍ରୀ ବା ଅନ୍ୟ ଲୋକମାନେ ଅଯଥା ବଦ୍ନାମ୍ ହେଉଛନ୍ତି ।

‘ଅମିତ୍’ ସାମ୍ବାଦିକତା ବିଭାଗର ମୁଖ୍ୟ ତଥା ପ୍ରଫେସର ବନବିହାରୀ ମହାନ୍ତିଙ୍କ ପୌରୋହିତ୍ୟରେ ଅନୁଷ୍ଠିତ ଏହି ସମ୍ପାଦାନରେ ବିଭାଗୀୟ ସଂଯୋଜକ,ଅଧ୍ୟାପକ ଟିକାୟତ ନାୟକ ଧନ୍ୟବାଦ ଅର୍ପଣ କରିଥିଲେ । ଦୀପକ ରଞ୍ଜନ ଆଚାର୍ଯ୍ୟ ବେଦରୁ ଶ୍କୋକ ଆବୃତ୍ତି କରିଥିଲେ ।

ଅନ୍ୟମାନଙ୍କ ମଧ୍ୟରେ ରାଜେଶ କୁମାର ଆଚାର୍ଯ୍ୟ, ସ୍ଥିତିପ୍ରଜ୍ଞା ଦାସ, ସ୍ୱର୍ଣ୍ଣପ୍ରଭା ଦାସ, ରୋଜି ନାଏକ, ରଞ୍ଜନ କୁମାର ପଟ୍ଟନାୟକ, ନିହାରିକା ରାଉତ, ନିବେଦିତା ରଥ, ସୁପ୍ରଭା କାନୁନଗୋ, ରମାକାନ୍ତ ବିଶ୍ୱାସ, ସ୍ୱର୍ଣ୍ଣଲତା ଭାରିମଲ୍ଲ, ରାଜେଶ କୁମାର ଆଚାର୍ଯ୍ୟ, ମୁକେଶ କୁମାର ମଙ୍ଗରାଜ,ସୋନାଲି ମହାପାତ୍ର,ଗାୟତ୍ରୀ ଲେଙ୍କା, ସୁମିତ୍ରା ପାତ୍ର, ମୌସୁମୀ ପଟ୍ଟନାୟକ,ସୁମନ୍ କୁମାର ବାନାର୍ଜୀ,ମମତା ଭୁଜବଳ, ରଶ୍ମିତା ମିଞ୍ଜ୍ ଏବଂ ରୀତାରାଣୀ ଘୋଷ ପ୍ରମୁଖ ଆଲୋଚନାରେ ଅଂଶ ଗ୍ରହଣ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଜାନୁଆରୀ ୮(ଓଡିଶା ଡଟ୍ କମ୍)-ଜାନୁଆରୀ ୧୨ତାରିଖରେ ସ୍ୱାମୀ ବିବେକାନନ୍ଦଙ୍କ ୧୫୦ତମ ଜନ୍ମ ଜୟନ୍ତୀ ପାଳନ କରାଯାଉ ଅଛି । ଏଥି ପାଇଁ ସମଗ୍ର ଦେଶରେ ବିବେକାନନ୍ଦ ସାର୍ଦ୍ଧ ସମିତି ସମାରୋହ ସମିତି ଗଠନ କରାଯାଇଛି ।

କେରଳ ପ୍ରଦେଶର ମାତା ଅମୃତାମୟୀ ଏଥିରେ ଅଧ୍ୟକ୍ଷତା କରୁଛନ୍ତି । ଓଡିଶାରେ ଏହି ସମିତିର ଅଧ୍ୟକ୍ଷତା କରୁଛନ୍ତି କର୍ଣ୍ଣେଲ ଶରତ ମହାପାତ୍ର । ଆସନ୍ତା ଜାନୁଆରୀ ୧୨ତାରିଖରେ ଓଡିଶା ତଥା ସମଗ୍ର ଦେଶରେ ଏହି ସମିତି ଦ୍ୱାରାସମାବେଶ ଓ ସାଧାରଣ ସଭାର ଆୟୋଜନ କରାଯାଉଛି ।

ଭୁବନେଶ୍ୱରରେ ମଧ୍ୟ ଏହି ଦିନ ୟୁନିଟ୍-୩ କ୍ୟାପିଟାଲ୍ ହାଇସ୍କୁଲ ପଡିଆରେ ଏକ ବିରାଟ ସାଧାରଣ ସଭା ଅନୁଷ୍ଠିତ ହେବ । ପ୍ରଥମେ ଅପରାହ୍ନ ୨ଟା ୩୦ରେ ଛାତ୍ରଛାତ୍ରୀ, ଯୁବକଯୁବତୀ ଓ ସମାଜର ସମସ୍ତ ଜାତି ସନ୍ଥର ନାଗରିକ ମାନଙ୍କୁ ନେଇ ଏକ ବିରାଟ ଶୋଭାଯାତ୍ରା କ୍ୟାପିଟାଲ୍ ହାଇସ୍କୁଲରୁ ବାହାରି ରାମ ମନ୍ଦିର ପଛ ଦେଇ ଲୋୟର ପିଏମଜିରେ ପହଞ୍ଚିବ ।

ସେଠାରୁ ମାଷ୍ଟର କ୍ୟାଣ୍ଟିନ ଦେଇ ରାମ ମନ୍ଦିର ସାମନା ପଟରୁ କ୍ୟାପିଟାଲ୍ ହାଇସ୍କୁଲରେ ପୁଣି ଥରେ ପହଞ୍ଚିବ । ସେଠାରେ ଅପରାହ୍ନ ୩ଟା ୩୦ରେ ଏକ ସାଧାରଣ ସଭା ହେବ । ଏହି ସଭାରେ ବିଶିଷ୍ଟ ହୃଦରୋଗ ବିଶେଷଜ୍ଞ ଓ ଗବେଷକ ଡକ୍ଟର କବି ପ୍ରସାଦ ମିଶ୍ର ମୁଖ୍ୟ ବକ୍ତା, ଚିନ୍ମୟ ମିଶନର ଆଞ୍ଚଳିକ ସଂଯୋଜକ ଶ୍ରୀ ସଦାନନ୍ଦଜୀ ମହାରାଜ ସମ୍ମାନୀତ ଅତିଥି ଭାବେ ଯୋଗଦେବେ । ସଭାରେ ଅଧ୍ୟକ୍ଷତା କରିବେ ବିଶିଷ୍ଟ ସ୍ତମ୍ଭକାର କର୍ଣ୍ଣେଲ ଶରତ ମହାପାତ୍ର ।

ଶୋଭାଯାତ୍ରାରେ ଭୁବନେଶ୍ୱରର ଅନେକ ବିଦ୍ୟାଳୟ ଓ ମହାବିଦ୍ୟାଳୟର ଛାତ୍ରଛାତ୍ରୀମାନେ ସ୍ୱାମୀ ବିବେକାନନ୍ଦଙ୍କ ବେଶରେ ସଜ୍ଜିତ ହୋଇ ତଥା ସ୍ୱାମୀଜୀଙ୍କ ବାଣୀର ପ୍ଲାକାର୍ଜ ଧରି ନଗର ପରିକ୍ରମା କରିବେ । ସ୍ୱାମୀ ବିବେକାନନ୍ଦଙ୍କ ସୁନ୍ଦର ବେଶ ପ୍ରତିଯୋଗିତାରେ କୃତି ବିଦ୍ୟାଳୟ ମାନଙ୍କୁ ପ୍ରଥମ, ଦ୍ୱିତୀୟ ଓ ତୃତୀୟ ପୁରସ୍କାର ପ୍ରଦାନ କରାଯିବ ।

ଏହି ସଭାରେ ଭୁବନେଶ୍ୱର ମହାନଗରର ସମସ୍ତ ଆଧ୍ୟାତ୍ମିକ ସଙ୍ଗଠନର କର୍ମକର୍ତା ଓ ଭକ୍ତଗଣ ବହୁ ସଂଖ୍ୟାରେ ଯୋଗଦେବେ । ଜନସାଧାରଣ ଏଥିରେ ବହୁସଂଖ୍ୟାରେ ଯୋଗଦେବା ପାଇଁ ସମାରୋହ ସମିତି ତରଫରୁ ଅନୁରୋଧ କରାଯାଇଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଜାନୁଆରୀ ୭(ଓଡିଶା ଡଟ୍ କମ୍)- ଶସ୍ୟ ଶ୍ୟାମଳା, ଚିର ହରିତ, ବଣ ଜଙ୍ଗଲ ଓ ସବୁଜିମା ଭରା ଓଡ଼ିଶାରେ ପାଦଦେଉ ଦେଉ ଅଭିଭୂତ ହୋଇପଡ଼ିଥିଲେ ହିନ୍ଦୀ ସିନେମାର ହିମ୍ୟାନ୍ ହିରୋ ଧର୍ମେନ୍ଦ୍ର ।

ଆକାଶମାର୍ଗରୁ ଓଡ଼ିଶାର ସୌନ୍ଦର୍ଯ୍ୟଭରା ରୂପକୁ ଦେଖି ଭାବ ବିହ୍ୱଳ ହୋଇପଡ଼ିଥିଲେ ସେ । କାଦମ୍ବିନୀର ଦଶମ ଜାତୀୟସ୍ତରର ଲେଖକ ସମ୍ମିଳନୀରେ ମୁଖ୍ୟ ଅତିଥି ଭାବେ ଯୋଗ ଦେଇ ଧର୍ମେନ୍ଦ୍ର ପ୍ରଥମେ ଓଡ଼ିଶାର ରୂପ ବର୍ଣ୍ଣନା କରି ପୂର୍ବରୁ ଓଡ଼ିଶା ଆସିପାରି ନଥିବାରୁ ଦୁଃଖ ପ୍ରକାଶ କରିଥିଲେ ।

ଏହି ଅବସରରେ ସେ ଭାରତ ମାତାର ମର୍ଯ୍ୟାଦା ରକ୍ଷା କରିବା ପାଇଁ ସବୁବର୍ଗର ଭାରତୀୟଙ୍କୁ ଅନୁରୋଧ କରିଥିଲେ । ମଣିଷଠାରୁ ସବୁ ଚାଲିଯାଇପାରେ, ମାତ୍ର ହୃଦୟରେ ଥିବା ସ୍ନେହ ଓ ପ୍ରେମ ନିଜଠାରୁ ଅଲଗା ହୋଇପାରେନାହିଁ ବୋଲି ସେ କହିଥିଲେ ।

ଭୁବନେଶ୍ୱରରେ କିସ୍ ର ପ୍ରତିଷ୍ଠା କରି ୨୦ହଜାର ଛାତ୍ରଛାତ୍ରୀଙ୍କୁ ନିଶୁଳ୍କ ଶିକ୍ଷା ଦାନ ଭଳି ମହତ କାର୍ଯ୍ୟ ସହ କାଦମ୍ବିନୀ ପତ୍ରିକା ଜରିଆରେ ସାହିତ୍ୟକୁ ସମୃଦ୍ଧି କରାଉଥିବାରୁ ଏହାର ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କୁ ଧର୍ମେନ୍ଦ୍ର ଧନ୍ୟବାଦଅର୍ପଣ କରିଥିଲେ ।

ଚୀନ୍ ର ବିଶିଷ୍ଟ ଲେଖିକା, ସାମ୍ବାଦିକା ଓ ବକ୍ତା ଲିଜିଆ ଝାଙ୍ଗ କହିଲେ ଭାରତକୁ ଏହା ତାଙ୍କର ୬ଷ୍ଠ ପରିଦର୍ଶନ । ସାଧାନାକୁ ସିଦ୍ଧି କରିବାକୁ ହେଲେ ଜୀବନରେ କେତେ କଷ୍ଟ କରିବାକୁ ପଡ଼େ ସେ ନିଜେ ହିଁ ତା’ର ଭୁକ୍ତଭୋଗୀ କହିଥିଲେ ଜିଆଙ୍ଗ ।

ନିଜ ମା’ଙ୍କ କାରଖାନାରେ କାମ କରିବାଠାରୁ ଆରମ୍ଭ କରି ଲଂଲଣ୍ଡରେ ପଢ଼ିବା ଦେଶୀ ଓ ବିଦେଶୀ ଗଣମାଧ୍ୟମରେ କାମ କରିବା ପର୍ଯ୍ୟନ୍ତ ଜୀବନର ପ୍ରତ୍ୟେକ ମୁହୂର୍ତ୍ତରୁ ଅନେକ କିଛି ଶିକ୍ଷା ମିଳିଥାଏ ବୋଲି ସେ କହିଥିଲେ ।

ଅନ୍ୟତମ ସମ୍ମାନୀତ ଅତିଥି ଭାବେ ବିଶିଷ୍ଟ ପଞ୍ଜାବୀ କବି ସୁରଜିତ ପାତ୍ର କହିଲେ, ଓଡ଼ିଶାର ସାହିତ୍ୟ ଅଗ୍ରଗଣ୍ୟ । ପଞ୍ଜାବ ଓ ଓଡ଼ିଶାର ସଂପର୍କ ଅତି ନିବିଡ଼ ବୋଲି କହି ସେ କହିଲେ, ଦୁଇଜଣଙ୍କ ମଧ୍ୟରେ ସଂଘର୍ଷ ଲାଗି ଭିନ୍ନ ଭାଷା ଉତ୍ପନ୍ନ ହୋଇଥାଏ ।

ମାତ୍ର ନିଜ ସହ ନିଜେ ସଂଘର୍ଷ କଲେ କବିତାର ସୃଷ୍ଟି ହୋଇଥାଏ । ତେଣୁ ଜଣେ କବି ହେବାକୁ ଚାହିଁଲେ, ସେ ନିଜ ସହ ସଂଘର୍ଷ କରିବାକୁ ପଡ଼ିବ । ବିଶିଷ୍ଟ ସାହିତ୍ୟିକା ପ୍ରତିଭା ରାୟ କାର୍ଯ୍ୟକ୍ରମର ଅନ୍ୟତମ ସମ୍ମାନୀତ ଅତିଥି ଭାବେ ଯୋଗଦେଇ ସାହିତ୍ୟର ଚତୁର୍ଭୁଜ ଲେଖକ-ପାଠକ-ପ୍ରକାଶକ-ପତ୍ରିକା ମଧ୍ୟରେ ଉତ୍ତମ ସମନ୍ୱୟ ରକ୍ଷା ହୋଇ ନପାରିଲେ ସାହିତ୍ୟର ବିକାଶ ହୋଇପାରିବ ନାହିଁ ।

ସାହିତ୍ୟର ସୃଷ୍ଟି ଓ ବିକାଶ ପାଇଁ ଏହି ଚାରିଜଣଙ୍କ ଭୂମିକା ଗୁରୁତ୍ୱପୂର୍ଣ୍ଣ ବୋଲି କହିଥିଲେ । ବିଶିଷ୍ଟ ସାହିତ୍ୟିକ ତଥା କେନ୍ଦ୍ର ଶ୍ରମ ଓ ନିଯୁକ୍ତି ବିଭାଗ ସଚିବ ଡ. ମୃତ୍ୟୁଞ୍ଜୟ ଷଡଙ୍ଗୀ ସମସାମୟିକ ସମାଜିକ ସମସ୍ୟା ଉପରେ ଆଲୋକପାତ କରି ସାହିତ୍ୟ ହିଁ ସମାଜ ସୁଧାରରେ ସହାୟକ ହୋଇପାରିବ ବୋଲି କହିଥିଲେ ।

ସାହିତ୍ୟିକ ଶାନ୍ତନୁ କୁମାର ଆଚାର୍ଯ୍ୟଙ୍କ ସଭାପତିତ୍ୱରେ ଆୟୋଜିତ କାର୍ଯ୍ୟକ୍ରମରେ ବିଶିଷ୍ଟ କବି ଡ. ରମାକାନ୍ତ ରଥ, ବିଶିଷ୍ଟ କଥାକାର ଡ. ଗୌରହରି ଦାସ, ତିରୁପତି ରାଷ୍ଟ୍ରୀୟ ସଂସ୍କୃତ ବିଶ୍ୱବିଦ୍ୟାଳୟର କୁଳପତି ଡ. ହରେକୃଷ୍ଣ ଶତପଥୀ ଓ ‘ସମାରୋହ’ର ସମ୍ପାଦିକା ଶୈଳରାଣୀ ମିଶ୍ର ମଧ୍ୟ ସେମାନଙ୍କ ବକ୍ତବ୍ୟ ରଖିଥିଲେ ।

କାର୍ଯ୍ୟକ୍ରମରେ ଜ୍ଞାନପୀଠ ପୁରସ୍କାର ବିଜୟିନୀ ଡ. ପ୍ରତିଭା ରାୟ, କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ପାଇଁ ଗାଳ୍ପିକ ଡ. ଗୌରହରି ଦାସ, ଅନୁବାଦକ ପ୍ରଶାନ୍ତ ମହାନ୍ତି, ଗାଳ୍ପିକା ସୃଷ୍ଟିଶ୍ରୀ ନାଏକଙ୍କୁ ସମ୍ବର୍ଦ୍ଧନା ଦିଆଯାଇଥିଲା । ସେହିପରି କବି ରମାକାନ୍ତ ରଥଙ୍କୁ ‘କାଦମ୍ବିନୀ ସାରସ୍ୱତ ସମ୍ମାନ- ୨୦୧୩’ ସମ୍ମାନ ପ୍ରଦାନ କରାଯାଇଥିଲା ।

ଏହି ଅବସରରେ ‘ଅନ୍ଧାରରେ ବିଷଣ୍ଣ ବର୍ଣ୍ଣମାନଳା’, ‘ମଣିଷର ଜୟଯାତ୍ରା’, ନିଶିପଦ୍ମ’, ‘ମାଆ’, କୁନିରାଇଜ’ର ଶିଶୁ କବିତା ସଂକଳନ, ‘ଗଳ୍ପ ଏକବିଂଶ ଶତାବ୍ଦୀର’, ଚନ୍ଦନଡ଼ ଓ ଆନ୍ୟାନ୍ୟ ପୁସ୍ତକ ଉନ୍ମୋଚିତ ହୋଇଥିଲା ।

କାର୍ଯ୍ୟକ୍ରମରେ ଅଚ୍ୟୁତ ସାମନ୍ତ ସ୍ୱାଗତ ଭାଷଣ ସହ ଅତିଥିପରିଚୟ ପ୍ରଦାନ କରିଥିବା ବେଳେ ସମ୍ପାଦିକା ଡ. ଇତି ସାମନ୍ତ ଧନ୍ୟବାଦଅର୍ପଣ କରିଥିଲେ । କାଦମ୍ବିନୀ ପକ୍ଷରୁ ଆୟୋଜିତ ପତ୍ରିକା ହାଟକୁ ପ୍ରଥମେ ଧର୍ମେନ୍ଦ୍ର ଉଦ୍ଘାଟନ କରିଥିଲେ ।

ପତ୍ରିକା ହାଟରେ ରାଜ୍ୟ ତଥା ରାଜ୍ୟ ବାହାରୁ ୧୫୦ରୁ ଊର୍ଦ୍ଧ୍ଵ ଷ୍ଟଲ ଖୋଲିଥିଲା । ପରେ ପରେ ଆୟୋଜିତ ହୋଇଥିଲା କବିତା ପାଠୋତ୍ସବ । ଏଥିରେ ବହୁ କବି ଯୋଗ ଦେଇ କବିତା ପାଠ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୦(ଓଡିଶା ଡଟ୍ କମ୍)-ନିଜର ମୌଳିକ ଅଧିକାର ବିଷୟରେ ଲୋକମାନଙ୍କୁ ସଚେତନ କରିବା ପାଇଁ ବିଶ୍ୱମାନବାଧିକାର ଦିବସ ଅବସରରେ ସୋମବାର ଦିନ କିସ୍ ତରଫରୁ ଭୁବନେଶ୍ୱରରେ ମାନବ ଶୃଙ୍ଖଳ ଅନୁଷ୍ଠିତ ହୋଇ ଯାଇଛି ।

କିସ୍ ତରଫରୁ ହ୍ୟୁମାନ ଚେନ୍ ଫର ହ୍ୟୁମାନିଟ୍ କାର୍ଯ୍ୟକ୍ରମରେ ଅନୁଷ୍ଠାନରେ ରହି ପାଠ ପଢୁଥିବା ପ୍ରାୟ ୨୦ ହାଜର ଛାତ୍ରଛାତ୍ରୀ ଯୋଗ ଦେଇଥିଲେ । ସକାଳ ଘ ୯.୫ମି. ରୁ ଘ ୯.୭ମି. ପର୍ଯ୍ୟନ୍ତ ୨ ମିନିଟ ଧରି ଏହି ମାନବ ଶୃଙ୍ଖଳ ଅନୁଷ୍ଠିତ ହୋଇଥିଲା ।

ରାଜଭବନ ରୁ କିସ୍ ପର୍ଯ୍ୟନ୍ତ ମୁଖ୍ୟରାସ୍ତାରେ କିସ୍ ର ଛାତ୍ରଛାତ୍ରୀମାନେ ରହିଥିଲେ । ମାଷ୍ଟର କ୍ୟାଣ୍ଟିନ,ରାମ ମନ୍ଦିର ଓ ଫରେଷ୍ଟ ପାର୍କ ସମେତ ରାଜଧାନୀର ୪୫ଟି ସ୍ଥାନରେ ମଧ୍ୟ ମାନବ ଶୃଙ୍ଖଳ ଅନୁଷ୍ଠିତ ହୋଇଥିଲା ।

ସବୁ ସ୍ଥାନକୁ ମିଶାଇ ପ୍ରାୟ ୨୫ କି.ମି. ପର୍ଯ୍ୟନ୍ତ ମାନବ ଶୃଙ୍ଖଳ କରାଯାଇଥିଲା । ମାନବିକତା ପାଇଁ ମାନବଶୃଙ୍ଖଳ ବିଷୟ ବସ୍ତୁ ଓ ମାଇଁ ଭୟସ କାଉଂଟ୍ସ ସ୍ଲୋଗାନ ଦେଇ ଛାତ୍ରଛାତ୍ରୀମାନେ ରାସ୍ତାରେ ମାନବ ଶୃଙ୍ଖଳ କରିଥିଲେ ।

ଏହି କାର୍ଯ୍ୟକ୍ରମରେ ସ୍ୱାସ୍ଥ୍ୟମନ୍ତ୍ରୀ ଡା.ଦାମୋଦର ରାଉତ, ସାଂସଦ ପ୍ରଶନ୍ନ ପାଟ୍ଟସାହାଣୀ, ବିଧାୟକ ବିଜୟ ମହାନ୍ତି ,ଭୁବନେଶ୍ୱର ମେୟର ଅନନ୍ତ ନାରାୟଣ ଜେନା,କିସ୍ ର ପ୍ରତିଷ୍ଠାତା ଅଚ୍ୟୁତ ସାମନ୍ତ, ଓଟିଭିର ନିର୍ଦ୍ଦେଶକ ବିଭୂପ୍ରସାଦ ରଥ ପ୍ରମୁଖ ଯୋଗଦେଇଥିଲେ ।

ଓଡିଆ ସିନେମା ଓ ଟେଲି ଭିଜନର ନାମୀ କଳାକାର, ବରିଷ୍ଠ ସମ୍ବାଦିକ, ଅନେକ ଉଚ୍ଚପଦସ୍ଥ ସରକାରୀ କର୍ମଚାରୀ ମାନେ ମଧ୍ୟ ଏଥିରେ ସାମିଲ ହୋଇଥିଲେ । ଏହି ଅବସରରେ ଛାତ୍ରଛାତ୍ରୀମାନଙ୍କ ଦ୍ୱାରାପାରମ୍ପରିକ ନୃତ୍ୟ ପରିବେଷଣ କରାଯାଇଥିଲା ।

କିସ୍ ପ୍ରତିଷ୍ଠାତା ଅଚ୍ୟୁତ ସାମନ୍ତ ଏହି ଅବସରରେ କହିଥିଲେ ଏହି କାର୍ଯ୍ୟକ୍ରମ ମୌଳିକତା ଅଧିକାର ହାସଲ ଓ ସମାନତା ପାଇଁ ସନ୍ଦେଶ ଦେଉଛି । ମାନବ ଶୃଙ୍ଖଳ ମାଧ୍ୟମରେ ନିଶ୍ଚିତ ଭାବରେ ମାନବ ବା ଲୋକମାନେ ଚାହିଁଲେ ନିଜ ଜୀବନକୁ ନିଜ କାର୍ଯ୍ୟକାଳକୁ ନିଜ ବ୍ୟବହାରକୁ କିଛି ପରିମାଣରେ ଶୃଙ୍ଖଳିତ କରିପାରିବେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୯(ଓଡିଶା ଡଟ୍ କମ୍)- ସମ୍ମାନଜନକ ଲିମ୍କା ବୁକ୍ସ ଅଫ୍ ରେକର୍ଡ଼ କୁଇଜ୍- ୨୦୧୨ ନ୍ୟାସନାଲ ଫାଇନାଲକୁ ଡିଏଭି ପବ୍ଲିକ ସ୍କୁଲ ପୋଖରୀ ଫୁଟ ଉନ୍ନୀତ ହୋଇଛି । ଏହି ଫାଇନାଲ ପ୍ରତିଯୋଗୀତା ଦେଶର ରାଜଧାନୀ ଦିଲ୍ଲୀଠାରେ ଚଳିତ ଡିସେମ୍ବର ୧୧ ତାରିଖରେ ଅନୁଷ୍ଠିତ ହେବ ।

ସେମିଫାଇନାଲସ୍ତରରେ ଡିଏଭି ପୋଖରୀ ପୁଟ୍ ସ୍କୁଲ ୮୦ଟି ଦଳ ସହ ମୁକାବିଲା କରି ଇଷ୍ଟ ଜୋନ୍ରୁ ଫାଇନାଲକୁ ଉନ୍ନିତ ହୋଇଛି । ନ୍ୟାସନାଲ ଫାଇନାଲ ରାଉଣ୍ଡକୁ ଉନ୍ନିତ ହୋଇଥିବା ଦଳଗୁଡ଼ିକ ହେଲେ- ଡିଏଭି ପବ୍ଲିକ ସ୍କୁଲ, ପୋଖରୀପୁଟ, ଭୁବନେଶ୍ୱର; ସେଣ୍ଟ ଥୋମାସ, ରାଞ୍ଚି; ଆର୍ମି ପବ୍ଲିକ୍ ସ୍କୁଲ, କିର୍କି-ପୁନେ; ମୁସ୍ତିଫଣ୍ଡ ଆରିୟାନ ହାଇୟର ସେକେଣ୍ଡାରୀ ସ୍କୁଲ, ଗୋଆ; ଚୈତନ୍ୟ ଜୁନିୟର କଲେଜ, ନାରାୟଣଗୁଡ଼ା- ହାଇଦରାବାଦ; ଜର୍ଜରିଆନ ପବ୍ଲିକ ସ୍କୁଲ, କୋଚି; ବାଲ ଭାରତୀ ପବ୍ଲିକ ସ୍କୁଲ, ନୋଇଡ଼ା; ୟାଦବିନ୍ଦ୍ର ପବ୍ଲିକ୍ ସ୍କୁଲ, ଚଣ୍ଡିଗଡ଼; ରୟାନ ଦିପି ବିଦ୍ୟା ମନ୍ଦିର, ଶ୍ରୀକି୍ରଷ୍ଣା ନଗର, ନାଗପୁର; ଏମ୍ଜିଏନ୍ ପବ୍ଲିକ ସ୍କୁଲ ଆଦର୍ଶ ନଗର, ଜଳନ୍ଧର ।

ଏହି କାର୍ଯ୍ୟକ୍ରମର ଲକ୍ଷ୍ୟ ହେଉଛି ସାରା ଦେଶର ଯୁବ ପ୍ରତିଯୋଗୀମାନଙ୍କୁ ପ୍ରୋଶ୍ଚାହିତ କରି ଜ୍ଞାନର ବୃଦ୍ଧି ଘଟାଇବା । ଚଳିତ ବର୍ଷ ୮୦ଟି ସହରରେ ୪୦୦୦ ସ୍କୁଲର ପ୍ରତିଯୋଗୀମାନଙ୍କୁ ନେଇ ଆୟୋଜିତ ହୋଇଛି ।

ଏହି ମଲଟି ସିଟି ଅଭିଯାନ ଡେରେକ୍ ‘ଓ’ ବେରେନ୍ ଆଣ୍ଡ ଆସୋସିଏଟଙ୍କ ସହଯୋଗରେ ଆରମ୍ଭ କରାଯାଇଥିଲା । ଏହି କାର୍ଯ୍ୟକ୍ରମରେ ୮ମରୁ ୧୨ଶ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀମାନେ ଅଂଶ ଗ୍ରହଣ କରିପାରିବେ ।

ଲିମ୍କା ବୁକ୍ସ ଅଫ୍ ରେକର୍ଡ଼ କୁଇଜ୍ ୪ଟି ଜୋନ୍ରେ ଅନୁଷ୍ଠିତ ହେଉଛି । ଯଥା ନର୍ଥ, ସାଉଥ, ଇଷ୍ଟ ଆଣ୍ଡ ୱେଷ୍ଟ ଜୋନ୍ । ଏହା ଜୁନ୍ ମାସରୁ ଆରମ୍ଭ ହୋଇ ଡିସେମ୍ବର ମାସରେ ଶେଷ ହୁଏ । ଏହି କୁଇଜ ପ୍ରତିଯୋଗିତ ୩ସ୍ତରରେ ହୋଇଥାଏ-ଇଣ୍ଟର ସ୍କୁଲ ଲେଭଲ, ସେମିଫାଇନାଲ ଏବଂ ପାଇନାଲ ରାଉଣ୍ଡ ।

ଅନୁପମ ଆଲୁଆଲିଆ, ଭାଇସ୍ ପ୍ରେସିଡ଼େଣ୍ଟ, ମାର୍କେଟିଙ୍ଗ କୋକାକୋଲା ଇଣ୍ଡିଆ ଆଣ୍ଡ ସାଉଥ ୱେଷ୍ଟ ଏସିଆ କହିବା ଅନୁଯାୟୀ ଲିମ୍କା ବୁକ୍ସ ଅପ୍ ରେକର୍ଡ଼ କୁଇଜ ଯୁବ ଗୋଷ୍ଠୀଙ୍କ ଉକ୍ତଣ୍ଠାକୁ ପ୍ରୋସ୍ଚାହିତ କରିବା ପାଇଁ ଏକ ମୂଲ୍ୟବାନ ପଦକ୍ଷେପ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୯(ଓଡିଶା ଡଟ୍ କମ୍)-ଅନ୍ତଃ ରାଜ୍ୟଛାତ୍ର ଜୀବନ ଦର୍ଶନ-୨୦୧୨ କାର୍ଯ୍ୟକ୍ରମରେ ଓଡିଶା ଆସିଥିବା ଉତର-ପୂର୍ବାଞ୍ଚଳର ରାଜ୍ୟର ଛାତ୍ର ଛାତ୍ରୀମାନଙ୍କୁ ଏକାମ୍ର ନଗରୀର ଜନତାଙ୍କ ତରଫରୁ ଏକ ଭବ୍ୟ ନାଗରିକ ସମ୍ବର୍ଦ୍ଧନା ଦିଆଯାଇଛି ।

ରବିବାର ଦିନ ଭୁବନେଶ୍ୱରର ଇଡିକଲ ପ୍ରେକ୍ଷାଳୟରେ ଅନୁଷ୍ଠିତ ଏହି ଭବ୍ୟ ନାଗରିକ ସମ୍ବର୍ଦ୍ଧନା ଉତ୍ସବରେ ମୁଖ୍ୟ ଅତିଥିରୂପେ ଅର୍ଥମନ୍ତ୍ରୀ ପ୍ରସନ୍ନ ଆଚାର୍ଯ୍ୟ,ସମ୍ମାନୀତ ଅତିଥିରୂପେ ମେୟର ଅନନ୍ତ ନାରାୟଣ ଜେନା ଓ କିଟ୍ ବିଶ୍ୱବିଦ୍ୟାଳୟର ପ୍ରତିଷ୍ଠାତା ଅଚ୍ୟୁତ ସାମନ୍ତ ଯୋଗଦେଇଥିଲେ ।

ଅନଃ ରାଜ୍ୟଛାତ୍ର ଜୀବନ ଦର୍ଶନ ଜାତୀୟ ସଂହତି ତଥା ବିବିଧତାରେ -ଏକତା-ଭାରତର ବିଶେଷତା ଏହାର ପ୍ରତ୍ୟେକ୍ଷ ଅନୁଭୁତି ଦେଉଥିବା ଏକ କାର୍ଯ୍ୟକ୍ରମ ଯାହାକୁ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ଦ୍ୱାରା୧୯୬୬ ମସିହାରୁ ଆରମ୍ଭ କରାଯାଇଛି ।

ଏହି ଯାତ୍ରାରେ ପ୍ରତିବର୍ଷ ଉତର-ପୂର୍ବାଞ୍ଚଳର ୭ଟି ରାଜ୍ୟର ଛାତ୍ରଛାତ୍ରୀମାନେ ଦେଶର ଅନ୍ୟାନ୍ୟ ରାଜ୍ୟକୁ ଭ୍ରମଣରେ ଯାଆନ୍ତି । ବିଭିନ୍ନ ପରିବାରରେ ରୁହନ୍ତି ଏବଂ ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ ଆମ ଦେଶର ବିବିଧତା ମଧ୍ୟରେ ଆମେ ଭାରତବାସୀ ଏହାର ପ୍ରତ୍ୟେକ୍ଷ ଅନୁଭୁତି ନିୟନ୍ତି ।

ସୌଭାଗ୍ୟର ବିଷୟ ୧୯ ଜଣ ଛାତ୍ରୀ ଓ ୧୧ ଜଣ ଛାତ୍ର ସମେତ ୩୦ ଜଣ ଉତର-ପୂର୍ବାଞ୍ଚଳର ରାଜ୍ୟର ଛାତ୍ର ଛାତ୍ରୀମାନଙ୍କର ଏକ ଦଳ “ଅନ୍ତଃ ରାଜ୍ୟଛାତ୍ର ଜୀବନ ଦର୍ଶନ-୨୦୧୨” ଅନ୍ତର୍ଗତ ତିନି ଦିନ ପାଇଁ ଓଡିଶା ଆସିଛନ୍ତି ।

୮ ତାରିଖ ସକାଳେ ଭୁବନେଶ୍ୱର ରେଲୱେଷ୍ଟେସନରେ ପହଞ୍ଚିବାପରେ ସେମାନଙ୍କୁ ଭବ୍ୟ ସ୍ୱାଗତ କରାଯାଇଥିଲା । ଏହାପରେ ରାଜଧାନୀର ୩୦ଟି ଅତିଥି ପରିବାର ସେମାନଙ୍କୁ ନିଜ ନିଜ ଘରକୁ ନେଇଯାଇଥିଲେ ।

ସେମାନେ ତିନିଦିନ ଧରି ଅତିଥି ହୋଇଥିଲେ ଏକାମ୍ର ନଗରୀର ଅତିଥି ପରିବାରରେ । ପରିବାର ମଧ୍ୟରେ ସେମାନେ ନିଜର ଦୈନଦିନ କାମସାରି ବାହାରି ଯାଉଥିଲେ ବିଭିନ୍ନ ସ୍ଥାନ ପରିଦର୍ଶନରେ ପୁଣି ସେମାନେ ରାତ୍ରୀରେ ଫେରି ଆସୁଥିଲେ ପରିବାର ମଧ୍ୟକୁ । ଯେଉଁ ପରିବାରରେ ସେହି ଅତିଥିମାନେ ରହୁଥିଲେ ସେହି ପରିବାରର ଆନନ୍ଦ କହିଲେ ନସରେ ।

ତିନିଦିନରେ ସେହି ଛାତ୍ରଛାତ୍ରୀମାନେ କିସ୍ ର ଛାତ୍ର ଛାତ୍ରୀମାନଙ୍କ ସହିତ ଭାବ ବିନିମୟ,ଗୀତା ବୈଷୟିକ ମହାବିଦ୍ୟାଳୟରେ ଏକ ଭବ୍ୟ ସ୍ୱାଗତ କାର୍ଯ୍ୟକ୍ରମ,ବିଶ୍ୱ ପ୍ରସିଦ୍ଧ କୋଣାର୍କ ମନ୍ଦିର ଦର୍ଶନ,ପିପିଲି ନିକଟସ୍ଥ ଦରଡା ଗ୍ରାମ ପରିଦର୍ଶନ,ନେତାଜୀ ଜନ୍ମ ସ୍ଥାନରେ ଶ୍ରଦ୍ଧାଞ୍ଜଳୀ ଅର୍ପଣ ତଥା ରେଭେନ୍ସା ବିଶ୍ୱବିଦ୍ୟାଳୟ ପରିସରରେ କାର୍ଯ୍ୟକ୍ରମରେ ଯୋଗ ଦେଇଥିଲେ ।

ଅତିଥିମାନଙ୍କୁ ସ୍ୱାଗତ କରିବାପାଇଁ ଗଠିତ ହୋଇଛି ସ୍ୱାଗତ ସମିତି । ଏଥିରେ ଅଧ୍ୟକ୍ଷ ଅଛନ୍ତି ବିଧାୟକ ପ୍ରତାପ ଷଡଙ୍ଗୀ ଓ ସଂପାଦକ ଖଗେଶ୍ୱର ଖଣ୍ଡାୟତ ।

ପୂର୍ବତନ କୃଷି ମନ୍ତ୍ରୀ ଅମର ପ୍ରସାଦ ଶତପଥି,ଶିକ୍ଷାବିତ ଡଃ.ଅଚ୍ୟୁତ ସାମନ୍ତ,ଉତ୍କଳ ବିଶ୍ୱବିଦ୍ୟାଳୟର ପି.ଜି. କାଉନସିଲର ଅଧ୍ୟକ୍ଷ ଅଧ୍ୟାପକ ପ୍ରଫୁଲ ମିଶ୍ର, ଗୋପିନାଥ ମହାନ୍ତି,ଶିକ୍ଷାବିତ ଓ ଚଳଚିତ୍ର ନିର୍ମାତା ବିରଞ୍ଚିନାରାୟଣ ପଣ୍ଡା, ନାଇଡୁ ଶିକ୍ଷାନୁଷ୍ଠାନର ଅଧ୍ୟକ୍ଷା ଏ.ପି.ନାଇଡୁ, ଯୁବ ସମାଜସେବୀ ଜଗନ୍ନାଥ ପ୍ରଧାନ, ଶିଳ୍ପପତି ଅଜୟ ଅଗ୍ରୱାଲ, ଶିକ୍ଷାବିତ ବିନୋଦ ଦାସ, ଯୋଗାଣ ନିଗମର ପୂର୍ବତନ ଅଧ୍ୟକ୍ଷ ସୁଦିପ୍ତ କୁମାର ରାଏ ପ୍ରମୁଖ ସଦସ୍ୟ ରହିଛନ୍ତି ।

୧୧ ତାରିଖ ସକାଳେ ଭୁବନେଶ୍ୱର ରେଲୱେଷ୍ଟେସନରେ ତାଙ୍କୁ ବିଦାୟ ସମ୍ବର୍ଦ୍ଧନା ଦିଆଯିବ । ସେହିଦିନ ସେମାନେ ଯେତେବେଳେ ବ୍ରହ୍ମପୁର ରେଲୱେଷ୍ଟେସନରେ ପହଞ୍ଚିବେ ସେଠାରେ ମଧ୍ୟ ତାଙ୍କୁ ସ୍ୱାଗତ ସମର୍ଦ୍ଧନା ଜ୍ଞାପନ କରାଯିବ ବୋଲି ସଂଗଠନ ସଂପାଦକ ଗୋବିନ୍ଦ ନାୟକ ପ୍ରକାଶ କରିଛନ୍ତି ।

ଓଡିଶା ଡଟ୍ କମ୍