ଜନସାଧାରଣ

ଭୁବନେଶ୍ୱର, ଏପ୍ରିଲ ୧୪ (ଓଡିଶା ଡଟ କମ) ରାଜ୍ୟର ବିଭିନ୍ନ ସ୍ଥାନରେ ମଙ୍ଗଳବାର ସମ୍ବିଧାନର ପ୍ରଣେତା ଭାରତରତ୍ନ ଡକ୍ଟର ଭୀମରାଓ ରାମଜୀ ଆମ୍ବେଦକରଙ୍କ ଜନ୍ମ ଦିବସ ବିଭିନ୍ନ ସଂଗଠନ ପାଳନ କରିଛନ୍ତି ।

ରାଷ୍ଟ୍ରୀୟ ସ୍ୱୟଂସେବକ ସଂଘ, ଭୁବନେଶ୍ୱର ମହାନଗର ସଂଗଠନର କର୍ମକର୍ତ୍ତାମାନେ ଏକ ପଟୁଆରରେ ଆସି ଏଜି ଛକରେ ଥିବା ବାବାସାହେବଙ୍କ ମୂର୍ତ୍ତି ନିକଟରେ ପହଁଚିଥିଲେ ।

ସେଠାରେ ଥିବା ଆମ୍ବେଦକରଙ୍କ ପ୍ରତିମୂର୍ତ୍ତୀରେ ପଶ୍ଚିମବଙ୍ଗ ଓ ଓଡିଶା ପୂର୍ବକ୍ଷେତ୍ରର ସମାଜସେବୀ ଗୋପାଳ ପ୍ରସାଦ ମହାପାତ୍ର ମୁଖ୍ୟ ଅତିଥିରୂପେ ଯୋଗ ଦେଇ ପୁଷ୍ପମାଲ୍ୟ ଅର୍ପଣ କରିଥିଲେ ।

ଏହାପରେ ଅନ୍ୟମାନଙ୍କ ମଧ୍ୟରେ ସଂଘର ପୁରୀ ବିଭାଗ ସଂଘଚାଳକ ବୈକୁଣ୍ଠନାଥ ସାହୁ,ବିଭାଗ ପ୍ରଚାରକ ସୃଷ୍ଟିଧର ବିଶ୍ୱାଳ,ବ୍ୟବସ୍ଥା ପ୍ରମୁଖ ଉମାକାନ୍ତ ଗିରି,ପ୍ରସନ୍ନ ସେନାପତି,ଘନଶ୍ୟାମ ମହାପାତ୍ର, ଜୟକୃଷ୍ଣ ପୃଷ୍ଟି,ଦେବୀ ପ୍ରସାଦ ମହାପାତ୍ର,ନୀଳମଣି ମହାପାତ୍ର,ରାଜ୍ୟ ମିଡିଆସେଲ କାର୍ଯ୍ୟାଳୟ ସଂପାଦକ ଗୋଲଖ ଚନ୍ଦ୍ର ଦାସ ପ୍ରମୁଖ ଯୋଗଦେଇ ପୁଷ୍ପମାଲ୍ୟ ଅର୍ପଣ କରିଥିଲେ ।

ଏହି ଅବସରରେ ମୁଖ୍ୟ ଅତିଥି ମହାପାତ୍ର କହିଲେ ବିଶ୍ୱ ଇତିହାସରେ ଭାରତରତ୍ନ ଡକ୍ଟର ଭୀମରାଓ ରାମଜୀ (ବି.ଆର) ଆମ୍ବେଦକର ଏକ ବିରଳ ବ୍ୟକ୍ତିତ୍ୱ ।

ଭାରତ ସମ୍ବିଧାନର ମୁଖ୍ୟ ନିର୍ମାତା ଥିଲେ ସେ । ଅଛୁଆଁ, ପଛୁଆ ଓ ଅନଗ୍ରସର ଜାତିଙ୍କର ଉତ୍ଥାନ ପାଇଁ ନିଃସ୍ୱାର୍ଥପର ସମାଜ ସଂସ୍କାରକ ବାବାସାହେବଙ୍କ ଦାନ ଅସୀମ । ସାରାଜୀବନ ସେ ଅନୁନ୍ନତଙ୍କ ଉନ୍ନତି ପାଇଁ ଲଢ଼ିଛନ୍ତି ।

କୋଟିକୋଟି ଜନସାଧାରଣଙ୍କ ମନମନ୍ଦିରରେ ସେ ପୂଜା ପାଉଛନ୍ତି । ଜଣେ ବିଚକ୍ଷଣ ବିଦ୍ୱାନ, ଆଇନ ବିଶାରଦ, ବୁଦ୍ଧିଜୀବୀ, ସମାଜ ସଂସ୍କାରକ ଓ ରାଷ୍ଟ୍ରନୀତିଜ୍ଞ ଭାବରେ ସେ ସ୍ୱଦେଶ ତଥା ବିଦେଶରେ ବାରମ୍ବାର ସମ୍ବର୍ଦ୍ଧିତ ହୋଇଥିଲେ ।

ଜଣେ ପ୍ରଜ୍ଞାଶୀଳ, ବହୁପାଠୀ, ମାନବବାଦୀ ଦାର୍ଶନିକ ଭାବେ ମଧ୍ୟ ସେ ପରିଚିତ । ବିଂଶ ଶତାବ୍ଦୀର ଭାରତୀୟ ଜନନାୟକଙ୍କ ମଧ୍ୟରେ ଆମ୍ବେଦକର ବିଭିନ୍ନ ଦୃଷ୍ଟିକୋଣରୁ ଏକ ଅଦ୍ୱିତୀୟ, ପ୍ରାତଃ ସ୍ମରଣୀୟ, ଅସାଧାରଣ ପ୍ରଜ୍ଞା ପୁରୁଷ ।

ଭାରତର ଘୃଣ୍ୟ “ଜାତିପ୍ରଥା’ ବିଲୋପ ସଂଗ୍ରାମରେ ସେ ଥିଲେ ଜଣେ ମହାଯୋଦ୍ଧା । ଭାରତର ସମାଜ ଇତିହାସରେ ସେ ଜଣେ ଯୋଗଜନ୍ମା ସମାଜ ସଂସ୍କାରକ ଥିଲେ । ତାଙ୍କ ଜନ୍ମଦିବସରେ ଦେଶବାସୀ ତାଙ୍କ ଆଦର୍ଶରେ ଅନୁପ୍ରାଣିତ ହେଲେ ତାହା ତାଙ୍କପ୍ରତି ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ ବୋଲି ମହାପାତ୍ର ମତବ୍ୟକ୍ତ କରିଥିଲେ ।

ଓଡିଶା ଡଟ କମ

ଓଡ଼ିଶା ଡ଼ଟ୍ କମ୍ : ସ୍ନିଗ୍ଧା ରାୟ

ଭଦ୍ରକ, ମଇ ୨୯(ଓଡ଼ିଶା ଡ଼ଟ୍ କମ୍) ସମଗ୍ର ଦେଶରେ ଗ୍ରୀଷ୍ମପ୍ରବାହ, ଅନାବୃଷ୍ଟି, ପରିବେଶ ପ୍ରଦୂଷଣ ଜନଜୀବନକୁ ପ୍ରଭାବିତ କରିଚାଲିଥିବା ବେଳେ ଭଦ୍ରକ ଜିଲ୍ଲାର ବିଷ୍ଣୁ ଖିଲାର ବୃକ୍ଷ ରୋପଣକୁ ଜୀବନର ମୂଳମନ୍ତ୍ର ଭାବେ ଗ୍ରହଣ କରିଛନ୍ତି ।

ବନ୍ତ ବ୍ଲକ ତୋଡ଼ଙ୍ଗା ଗ୍ରାମପଞ୍ଚାୟତର ଖିଲାରଙ୍କ ଏଭଳି ବୃକ୍ଷରୋପଣ କାର୍ଯ୍ୟକ୍ରମ ଜନସାଧାରଣ ତଥା ବୁଦ୍ଧିଜୀବୀଙ୍କୁ ବିସ୍ମିତ କରିଛି । ବିନା ସ୍ୱାର୍ଥରେ ସେ ଆଜି ପର୍ଯ୍ୟନ୍ତ ସରକାରୀ ଜମିରେ ଦୁଇ ହଜାରରୁ ଉର୍ଦ୍ଧ ଗଛ ଲଗାଇ ରକ୍ଷଣାବେକ୍ଷଣ କରିଆସୁଛନ୍ତି ।

ତାଙ୍କର ଏହି ଗୁଣ ପାଇଁ ସ୍ଥାନୀୟ ବନ୍ୟପ୍ରାଣୀ ବିଭାଗ ବିଶ୍ୱବ୍ୟାଙ୍କ ସହାୟତାରେ ଲଗାଯାଇଥିବା ରାସ୍ତା ପାଶ୍ୱର ବୃକ୍ଷ ଗୁଡ଼ିକର ରକ୍ଷଣାବେକ୍ଷଣ ଦାୟିତ୍ୱ ତାଙ୍କୁ ହସ୍ତାନ୍ତର କରିଛି ।

ବିଶେଷକରି ବର,ନିମ୍ବ,ଆମ୍ବ,ଜାମୁ,କରଞ୍ଜ ଓ ଆକାଶୀ ଭଳି ଗଛ ରୋପଣ କ୍ଷେତ୍ରରେ ସେ କୌଣସି ନର୍ସରୀ କିମ୍ବା ସରକାରୀ ଅନୁଷ୍ଠାନ ସହାୟତା ଲୋଡ଼ିନାହାନ୍ତି । ନିଜ ବାଡ଼ିରେ ଛୋଟ ନର୍ସରୀଟିଏ କରି ବିଭିନ୍ନ ମଞ୍ଜି ସଂଗ୍ରହକରି ଚାରା ତିଆରି କରନ୍ତି ।

ତାହା ଲଗାଇବା ଉପଯୋଗୀ ହୋଇଗଲେ ରାସ୍ତାପାଶ୍ୱରେ, ଛକସ୍ଥାନ କିମ୍ବା ସରକାରୀ ପଡ଼ିଆ ଜମିରେ ଗାତଖୋଳି ଗୋବର ଖତ ଦେଇ ନିଜେ ଲଗାନ୍ତି । କେବଳ ଏତିକିରେ ତାଙ୍କ କାମ ସରେନାହିଁ ।

ଚାରାଗୁଡ଼ିକ କିଭଳି ବଞ୍ଚିବ ସେଥିପାଇଁ ବାଉଁଶ ବତା ଓ କଣିରେ ଘେରି ମୁଣ୍ଡୁଳା ନିର୍ମାଣ କରି ସେଗୁଡ଼ିକୁ ଆବଦ୍ଧ କରିଥାନ୍ତି । ମୁଖ୍ୟତଃ ବର୍ଷାଦିନରେ ବିଷ୍ଣୁ ଏହି କାର୍ଯ୍ୟ ହାତକୁ ନେଇଥାନ୍ତି ।

କିଛିିଦିନ ପରେ ଗଛମୂଳରେ ହୋଇଥିବା ଅନାବନା ଘାସବାଛି ସେଥିରେ ଅଣୁସାର ଓ ଗୋବର ଖତ ଦେବାସହ ପତ୍ର କାଣ୍ଡରେ ଗୋମୂତ୍ରରୁ ଏକପ୍ରକାର କୀଟନାଶକ ତିଆରି ସିଞ୍ଚନ କରିଥାନ୍ତି । ଖରାଦିନରେ ଟ୍ରଲିରେ ପାଣିନେଇ ଦିନ କୁ ଦୁଇଓଳି ସେ ଗଛମୂଳରେ ଢ଼ାଳିଥାନ୍ତି ।

ବିସ୍ମୟର କଥା ଆଜି ପର୍ଯ୍ୟନ୍ତ ଏହି ମହାନ କାର୍ଯ୍ୟ ପାଇଁ କେହି ତାଙ୍କୁ ସମ୍ନାନ କିମ୍ବା ଅଭ୍ୟର୍ଥନ କରିନାହାନ୍ତି । ଏକା ଏକା ନୀତିରେ ବିଶ୍ୱାସ କରୁଥିବା ବିଷ୍ଣୁ ପଛକୁ ନଅନାଇ ଏଭଳି ମହତ କାମକୁ ନିଜ ଜୀବନର ବ୍ରତ ଭାବେ ଗ୍ରହଣ କରିଚାଲିଛନ୍ତି ।

ଏଭଳି ଏକ ଜନହିତକାର କାର୍ଯ୍ୟ ଦେଖି ହରିପୁର ଗ୍ରାମର ଯୁବ ସମାଜସେବୀ ତଥା ଯୋଗଗୁରୁ ସଞ୍ଜିବ ନାୟକ ତାଙ୍କ ସହ ହାତ ମିଳାଇ ସମ୍ନାନ ସହ ଅର୍ଥର ବନ୍ଦୋବସ୍ତ ମଧ୍ୟ କଲେ ।

କେବଳ ସଞ୍ଜିବ ନୁହଁନ୍ତି, ଭଦ୍ରକ ନେହେରୁ ଷ୍ଟାଡ଼ିୟମର କିଛି ଯୁବକ ମଧ୍ୟ ତାଙ୍କର ଏହି ମହାନ କାର୍ଯ୍ୟ ପାଇଁ ହାତ ବଢ଼ାଇଛନ୍ତି । ଏମାନେ ସମସ୍ତେ ମିଶି ଏବେ ଖିଲାରଙ୍କୁ ବୃକ୍ଷରୋପଣ କାର୍ଯ୍ୟରେ ସହାୟତା କରୁଛନ୍ତି ।

ଅମ୍ଳଜାନ ଗ୍ୟାସ ଆମକୁ ମାଗଣାରେ ମିଳିଯାଉଛି ସତ, କିନ୍ତୁ ଆମେ ଭଗବାନ ଓ ତାଙ୍କ ସୃଷ୍ଟି ପରିବେଶ ଉପରେ ଧାରୁଆ ହୋଇ ରହିଯାଉଛୁ । ତେଣୁ ସେମାନଙ୍କ ଠାରୁ ଋଣମୁକ୍ତ ହେବା ପାଇଁ ଆଜିଠାରୁ ଆମେ ବର୍ଷରେ ଗୋଟିଏ ଲେଖାଏଁ ଗଛ ଲଗାଇବା ନିତ୍ୟାନ୍ତ ଜରୁରୀ ବୋଲି ବିଷ୍ଣୁ ଖିଲାର କହିଛନ୍ତି ।

ଏକ ଗ୍ରାମୀଣ ପରିବେଶରେ ବିଷ୍ଣୁ ଯେଭଳି ଆଜିର ମନୁଷ୍ୟକୃତ ସନ୍ତୁଳିତ ପରିବେଶକୁ ତାଙ୍କର ବୃକ୍ଷରୋପଣ ରୂପକ ସଞ୍ଜିବନୀ ପ୍ରଦାନ କରିଚାଲିଛନ୍ତି ତାହା ଆମ ସମସ୍ତଙ୍କ ପାଇଁ ଶିକ୍ଷଣୀୟ ନିଶ୍ଚୟ ।

ଓଡ଼ିଶା ଡ଼ଟ୍ କମ୍