ଓଡିଶା ଡଟ କମ ସଂବାଦ ଦାତା
ସମ୍ବଲପୁର, ଏପ୍ରିଲ ୧୬ (ଓଡିଶା ଡଟ କମ) ପୂର୍ବତନ ମନ୍ତ୍ରୀ ଜୟ ନାରାୟଣଙ୍କ ଗିରଫଦାରି ପ୍ରତିବାଦରେ ବିଜେପି ତରଫରୁ ଦିଆଯାଇଥିବା ବନ୍ଦ ଡାକରା ଯୋଗୁଁ ଗୁରୁବାର ସମ୍ବଲପୁର ସହରରେ ଜନଜୀବନ ଅସ୍ତ୍ୟବ୍ୟସ୍ତ ହୋଇପଡିଛି ।
ପ୍ରଶାସନର କଟକଣା ସତ୍ୱେ ହନୁମାନ ଜୟନ୍ତୀ ଶୋଭାଯାତ୍ରାରେ ଖଣ୍ଡା ବୁଲାଇବା ଅଭିଯୋଗରେ ପୁଲିସ ବୁଧବାର ମିଶ୍ରଙ୍କୁ ଗିରଫ କରିଥିଲା । ଅଦାଲତ ଜାମିନ ନାମଞ୍ଜୁର କରିବାରୁ ସେ ବର୍ତ୍ତମାନ ଜେଲ ହାଜତରେ ରହିଛନ୍ତି।
ବନ୍ଦ ଡାକରା ଯୋଗୁଁ ସହରରେ ଗାଡି ମଟର ଚଳାଚଳ ବ୍ୟାହତ ହୋଇଛି । ସ୍କୁଲ, କଲେଜ, ଦୋକାନ ଓ ବ୍ୟବସାୟୀକ ପ୍ରତିଷ୍ଠାନ ମଧ୍ୟ ବନ୍ଦ ରହିଛି । ବିରୋଧକାରୀ ମାନେ ରେଳ ଲାଇନ ଉପରେ ବସି ରହିବାରୁ ରେଳ ଚଳାଚଳରେ ମଧ୍ୟ ବାଧା ସୃଷ୍ଟି ହୋଇଥିବା କୁହା ଯାଇଛି ।
ଏଠାରେ ଉଲ୍ଲେଖଯୋଗ୍ୟ ଯେ ଧାର୍ମିକ କାର୍ଯ୍ୟକ୍ରମ ମାନଙ୍କରେ ଶାନ୍ତି ଭଙ୍ଗ ଆଶଙ୍କା କରି ଭାରତୀୟ ପିଙ୍ଗଳକୋଡ ଧାରା ୧୪୪-ଏ ଅନୁସାରେ ପ୍ରଶାସନ ସହରରେ କଟକଣା ଜାରି କରିଛି । ଏହି କଟକଣା ଅନୁସାରେ କୌଣସି ଶୋଭାଯାତ୍ରାରେ କେହି ଅସ୍ତ୍ରଶସ୍ତ୍ର ପ୍ରଦର୍ଶନ କରି ପାରିବେ ନାହିଁ ।
ତେବେ ଏହି କଟକଣକୁ ଉଲ୍ଲଂଘନ କରି ମିଶ୍ର ମଙ୍ଗଳବାର ଅନୁଷ୍ଠିତ ଶୋଭାଯାତ୍ରାରେ ବିଭିନ୍ନ ସ୍ଥାନରେ ଖଣ୍ଡା ପ୍ରଦର୍ଶନ କରି ଥିବା କୁହା ଯାଉଛି ।
ତେବେ ଗିରଫହେବା ପରେ ଜୟନାରାୟଣ କହିଛନ୍ତି ହନୁମାନ ଜୟନ୍ତୀରେ ଅସ୍ତ୍ରଶସ୍ତ୍ରର ପୂଜା ଓ ପ୍ରଦର୍ଶନ ହିନ୍ଦୁ ଧର୍ମର ଏକ ପରମ୍ପରା ଓ ତାକୁ କେହି ବାରଣ କରିପାରିବେ ନାହିଁ ।
ଓଡିଶା ଡଟ କମ
