ନୂଆଗାଁ

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ଫେବୃୟାରୀ ୨୮(ଓଡ଼ିଶା ଡ଼ଟ୍ କମ୍) ସ୍ଥାନୀୟ ଲୋକଙ୍କ ଦାବି ପୂରଣ ବିନା ସଂପୃକ୍ତ ଅଞ୍ଚଳରେ ପୋସ୍କୋ ପକ୍ଷରୁ ହେବାକୁ ଥିବା ସେମିନାର ବନ୍ଦ କରିବାକୁ ଦାବି ହୋଇଛି ।

ଦାବି ପୂରଣ ହୋଇନଥିବାରୁ ସେଠାରେ କାର୍ଯ୍ୟକ୍ରମ କରାଗଲେ ଆଇନ ଶୃଙ୍ଖଳା ପରିସ୍ଥିତି ଉପୁଜିବା ଆଶଂକା କରି ନୂଆଗାଁର ନବନିର୍ବାଚିତ ଲୋକ ପ୍ରତିନିଧିମାନେ ଏନେଇ ପୋଲିସ ଏବଂ ଜିଲ୍ଲା ପ୍ରଶାସନକୁ ଜଣାଇଛନ୍ତି ।

ସଂପୂର୍ଣ୍ଣ ଭାବରେ ପଞ୍ଚାୟତ ନିର୍ବାଚନ କାର୍ଯ୍ୟ ଶେଷ ହୋଇନଥିବାରୁ ପରିସ୍ଥିତି ଏବେବି ଉତ୍ତେଜନା ପୂର୍ଣ୍ଣ ରହିଛି । କମ୍ପାନୀ କର୍ତୃପକ୍ଷଙ୍କୁ ଏଭଳି କାର୍ଯ୍ୟକ୍ରମ କରିବା ପାଇଁ ଅନୁମତି ନଦେବାକୁ ନୂଆଗାଁ ସରପଞ୍ଚ ଅଞ୍ଜଳି ପ୍ରଧାନ ଓ ସମିତି ସଭ୍ୟା ସୌଦାମିନୀ ନାୟକ କହିଛନ୍ତି ।

ତେବେ ସ୍ଥାନୀୟ ଲୋକଙ୍କ ଠାରୁ ଅଭିଯୋଗ ପାଇବା ପରେ ପୋଲିସ ପକ୍ଷରୁ କାର୍ଯ୍ୟକ୍ରମ କରିବା ନେଇ କଟକଣା ଜାରି କରାଯାଇଛି ।

ଆସନ୍ତା ମାର୍ଚ୍ଚ ୧ରେ କମ୍ପାନୀ ନୂଆଗାଁ ପଞ୍ଚାୟତରେ ଥିବା କାର୍ଯ୍ୟାଳୟ ନିକଟରେ”ସେମିନାର ଅନ୍ ଇଂଜିନିୟରିଂ ସର୍ଭିସ ଇନ୍ ପୋସ୍କୋ ଷ୍ଟିଲ” କାର୍ଯ୍ୟକ୍ରମ ଆୟୋଜନ କରିବାକୁ ଯାଉଛି ।

ଏହି ସେମିନାରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେବାର କାର୍ଯ୍ୟକ୍ରମ ଥିବାବେଳେ ଇଡ଼୍କୋ ତଥା ସରକାରଙ୍କ ବରିଷ୍ଠ ଅଧିକାରୀମାନେ ଯୋଗ ଦେବାକୁ କହିଛନ୍ତି । ଏହାସହ ଦକ୍ଷିଣକୋରିଆ ଏବଂ ବିଭିନ୍ନ ସ୍ଥାନରୁ ପ୍ରାୟ ୫୦ ଜଣ ପ୍ରତିନିଧି ଯୋଗ ଦେବେ ।

ପୋସ୍କୋ ଇସ୍ପାତ ପ୍ରକଳ୍ପରେ ଇଂଜିନିୟରିଂ ପାଇଁ ସୁଯୋଗ ସୃଷ୍ଟି କରିବା ଏହି ସେମିନାର ଉଦ୍ଦେଶ୍ୟ । ତେଣୁ ଏଥିରେ ଜାତୀୟ ଓ ଅନ୍ତର୍ଜାତୀୟ ଶିଳ୍ପାନୁଷ୍ଠାନର ଇଂଜିନିୟରମାନେ ଯୋଗ ଦେବେ ବୋଲି କମ୍ପାନୀର ଜଣେ ବରିଷ୍ଠ ଅଧିକାରୀ କହିଛନ୍ତି ।

କାର୍ଯ୍ୟକ୍ରମରେ ଯୋଗ ଦେବା ପାଇଁ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରାଯାଇଛି ଏବଂ ଏଥିପାଇଁ ପୋଲିସ ଠାରୁ ଅନୁମତି ଲୋଡ଼ା ଯାଇଛି, ସେ କହିଛନ୍ତି ।

ଏହି କାର୍ଯ୍ୟକ୍ରମର ଆୟୋଜନ କରିବା ପୂର୍ବରୁ କମ୍ପାନୀ କର୍ତୃପକ୍ଷ ସ୍ଥାନୀୟ ଗ୍ରାମବାସୀଙ୍କ ସହ ଆଲୋଚନା କରିନଥିବାରୁ ପୋସ୍କୋ ସପକ୍ଷବାଦୀ ତଥା ମିଳିତ କ୍ରିୟାନୁଷ୍ଠାନ କମିଟି ସମାଲୋଚନା କରିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ଫେବୃୟାରୀ ୧୮(ଓଡ଼ିଶା ଡ଼ଟ୍ କମ୍) ପଞ୍ଚାୟତ ନିର୍ବାଚନର ଅନ୍ତିମ ପର୍ଯ୍ୟାୟ ଭୋଟ୍ ଗ୍ରହଣ ପାଇଁ ପୋସ୍କୋ ଅଞ୍ଚଳରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।

ସମ୍ବେଦନଶୀଳ ଭାବେ ଚିହ୍ନଟ ଏର୍ସମା ବ୍ଲକ, ନୂଆଗାଁ, ଗଡ଼କୁଜଙ୍ଗ ଏବଂ କୁଜଙ୍ଗ ଅଞ୍ଚଳରେ ଶନିବାର ଠାରୁ ଅତିରିକ୍ତ ପୋଲିସ ଫୋର୍ସ ମୁତୟନ କରାଯାଇଛି ।

ରବିବାର ହେବାକୁ ଥିବା ଅନ୍ତିମ ପର୍ଯ୍ୟାୟରେ ଏର୍ସମା ବ୍ଲକର ୪୬୧ଟି ବୁଥ୍ ରେ ଭୋଟ୍ ଗ୍ରହଣ କରାଯିବା ସହ କୁଜଙ୍ଗ ବ୍ଲକ ଅନ୍ତର୍ଗତ ବଗଡ଼ିଆ ପଞ୍ଚାୟତର ଦଶଟି ବୁଥ୍ ରେ ପୁନଃ ମତଦାନ ହେବ ।

ଉତ୍ତେଜନା ପ୍ରବଣ ଢିଙ୍କିଆ ପଞ୍ଚାୟତର ୨୩ଟି ବୁଥ୍ ରୁ ୧୬ଟିର ମତଦାନ ତ୍ରିଲୋଚନପୁର ଏବଂ ନୂଆଗାଁରେ କରିବାକୁ ପ୍ରଶାସନ ନିଷ୍ପତି ନେଇଛି ।

ତେବେ ବାସନ୍ଦ ହୋଇ ପୋସ୍କୋ ଅସ୍ଥାୟୀ କଲୋନୀରେ ଗତ ପାଂଚ ବର୍ଷ ଧରି ରହିଆସୁଥିବା ଢିଙ୍କିଆର ୫୨ ପରିବାରର ଭୋଟରମାନେ ତ୍ରିଲୋଚନପୁର ଯାଇ ମତଦାନ କରିବାକୁ କୁହାଯାଇଛି ।

ଭୋଟରମାନେ ନିଜ ଗାଁରେ ଥିବା ଭୋଟ୍ କେନ୍ଦ୍ରରେ ମତଦାନ କରିବାର ନିୟମ ଥିବା ବେଳେ ପ୍ରଶାସନ ଏମାନଙ୍କୁ ପାଞ୍ଚ କିମି ଦୂରରେ ତ୍ରିଲୋଚନପୁର ଯାଇ ମତଦାନ କରିବାକୁ କରିଛନ୍ତି, ଏହା ପଞ୍ଚାୟତ ନିୟମ ଉଲଂଘନ କରିଛି ବୋଲି ଗାଁମୁଖିଆ ଚନ୍ଦନ ମହାନ୍ତି କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ଡ଼ିସେମ୍ବର ୮(ଓଡ଼ିଶା ଡ଼ଟ୍ କମ୍) ପୋସ୍କୋ କାମ ପାଇଁ ପ୍ରକଳ୍ପ ଅଞ୍ଚଳକୁ ଆସି ଲୋକଙ୍କ ଦ୍ୱାରାଅଟକ ଥିବା ଗାଡ଼ି ଗୁଡ଼ିକୁ ଉଦ୍ଧାର ପାଇଁ ଉଦ୍ୟମ ଆରମ୍ଭ ହୋଇଛି ।

କମ୍ପାନୀ ଉପ ପରିଚାଳନା ନିର୍ଦ୍ଦେଶକ ହୋ ଚାନ୍ ରୁଏ, ଉପସଭାପତି ବିକାଶ ସରଣ ଏବଂ ପୋସ୍କୋ ଇଣ୍ଡିଆ ନିର୍ଦ୍ଦେଶକ ୱାଇ.କେ.କିମ୍ ଗୁରୁବାର ନୂଆଗାଁ ଓ ଗଡ଼କୁଜଙ୍ଗ ଅଞ୍ଚଳ ଗସ୍ତ କରି ଗ୍ରାମବାସୀଙ୍କ ସହ ଆଲୋଚନା କରିଛନ୍ତି ।

ପ୍ରକଳ୍ପ ପାଇଁ ସହଯୋଗ କରିବାକୁ ସେମାନେ ଗ୍ରାମବାସୀଙ୍କୁ ଅନୁରୋଧ କରିଛନ୍ତି ।

ଅଧିକାରୀଙ୍କ ସହ ଆଲୋଚନା ପରେ ଅଟକ ଛଅଟି ଗାଡ଼ିକୁ ଛାଡ଼ି ଦେବା ପାଇଁ କୁଞ୍ଜ ବିହାରୀ ଗ୍ରାମ୍ୟ ସୁରକ୍ଷା କମିଟି ରାଜି ହୋଇଥିବା ବେଳେ ଦାବି ପୂରଣ ନହେବା ପର୍ଯ୍ୟନ୍ତ ଗାଡ଼ି ନଛାଡ଼ିବାକୁ ଗଡ଼କୁଜଙ୍ଗ ଗ୍ରାମବାସୀମାନେ ଅଡ଼ି ବସିଛନ୍ତି ।

ତେବେ ଗାଡ଼ି ଗୁଡ଼ିକୁ ଉତ୍ୟକ୍ତ ଗ୍ରାମବାସୀଙ୍କ ଠାରୁ ଛଡ଼ାଇବା ପାଇଁ ଅଧିକାରୀମାନେ ପୋଲିସର ସହାୟତା ଲୋଡ଼ିଛନ୍ତି ।

ଅଟକ ଗାଡ଼ି ଗୁଡ଼ିକୁ ଛାଡ଼ି ଦେବା ପାଇଁ ବୁଧବାର ପୋସ୍କୋ ଇଂଜିନିୟରିଂ ଓ ନିର୍ମାଣ କମ୍ପାନୀ ଅଧିକାରୀ ମନୋଜ ବଜାଜ୍ ଏବଂ ମହାପ୍ରବନ୍ଧକ ରାଜା ମିତ୍ର ମଧ୍ୟ ଲୋକଙ୍କ ସହ ଆଲୋଚନା କରିଥିଲେ ।

ସମସ୍ତ ପ୍ରକାର ସୁବିଧା ଅସୁବିଧାର ସମାଧାନ ପାଇଁ କମ୍ପାନୀ କର୍ତୃପକ୍ଷ ଗ୍ରାମାବସୀଙ୍କ ସହ ସିଧାସଳଖ କଥାବାର୍ତା ପାଇଁ ଯୋଜନା କରୁଥିବା ମିତ୍ର କହିଛନ୍ତି ।

କେଉଁ ଉଦ୍ଦେଶ୍ୟରେ କମ୍ପାନୀର ଗାଡ଼ି ଗୁଡ଼ିକ ରାତିରେ ଗ୍ରାମବାସୀଙ୍କ ଅଜାଣତରେ ଏହି ଅଞ୍ଚଳକୁ ପ୍ରବେଶ କରିଥିଲା ବୋଲି କମିଟିର ନେତା ଅମ୍ରିତ ଦାସ, ଚରଣ ପରିଡ଼ା କହିଛନ୍ତି ।

ଶେଷରେ ସମସ୍ୟା ନେଇ କମ୍ପାନୀ ଅଧିକାରୀ ଗ୍ରାମାବସୀଙ୍କ ସହ ସିଧାସଳଖ କଥାବାର୍ତା ହେବା ପାଇଁ ଯୋଜନା କରିଥିବାରୁ କମିଟି ସଦସ୍ୟମାନେ ଏହାକୁ ପ୍ରଶଂସା କରିଛନ୍ତି ।

କମ୍ପାନୀ କର୍ତୃପକ୍ଷ ନିଜର ଭୁଲ ସ୍ୱୀକାର କରିବା ସହ କ୍ଷତିପୂରଣ ବାବରେ ୫୩ ହଜାର ୨୦୦ ଟଙ୍କା
ଦେଇଛନ୍ତି ଏବଂ ଦାବି ପୂରଣ ନହେବା ପର୍ଯ୍ୟନ୍ତ କୌଣସି କାମ କିମ୍ବା ଅଫିସ ଖୋଲିବ ନାହିଁ, ତେଣୁ ଗାଡ଼ି ଗୁଡ଼ିକୁ ଛାଡ଼ି ବୋକୁ ଆମେ ରାଜି ହୋଇଛୁ ବୋଲି ଦାସ କହିଛନ୍ତି ।

ତେବେ କମିଟିର ନିଷ୍ପତି ଉପରେ ଗ୍ରାମବାସୀ ଖୁସି ନାହାନ୍ତି । ଦାବି ପୂରଣ ନହେବା ପର୍ଯ୍ୟନ୍ତ ଗାଡ଼ି ଗୁଡ଼ିକୁ ଛାଡ଼ି ଦିଆଯିବ ନାହିଁ । କମିଟିର ନିଷ୍ପତି ତା’ର ନିଜସ୍ୱ ବୋଲି ଗ୍ରାମାବସୀମାନେ କହିଛନ୍ତି ।

ଗାଡ଼ି ଅଟକ ନେଇ ପୋସ୍କୋ ଇଂଜିନିୟରିଂ ଏବଂ ନିର୍ମାଣ କମ୍ପାନୀ ଅତିରିକ୍ତ ମହାପ୍ରବନ୍ଧକ କୁଜଙ୍ଗ ଥାନାରେ ଏତଲା ଦେଇଥିବା ବେଳେ ପୋଲିସ ମାମଲା ରୁଜୁ କରିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ନଭେମ୍ବର ୧(ଓଡ଼ିଶା ଡ଼ଟ୍ କମ୍) ଜଗତସିଂହପୁର ଜିଲ୍ଲାରେ ପ୍ରସ୍ତାବିତ ପୋସ୍କୋ ପ୍ରକଳ୍ପ ଅଞ୍ଚଳକୁ ଯାଇଥିବା କମ୍ପାନୀର ଅଧିକାରୀଙ୍କୁ ମଙ୍ଗଳବାର ନୂଆଗାଁରେ ଶତାଧିକ ପୁରୁଷ ଓ ମହିଳାମାନେ ଆକ୍ରମଣ କରିଛନ୍ତି ।

କମ୍ପାନୀର ଉପ ମହାପ୍ରବନ୍ଧକ ସଂପୃକ୍ତ ଅଞ୍ଚଳକୁ ଗଛ କାଟିବା ତଥା ଚିଙ୍ଗୁଡ଼ି ଘେରି ଭାଙ୍ଗିବାକୁ ଯାଇଥିବା ବେଳେ ଲୋକମାନେ ଆକ୍ରମଣ କରିଛନ୍ତି । ଗତ ମାସରେ ପୋସ୍କୋ ପ୍ରକଳ୍ପ ପାଇଁ ଜିଲ୍ଲା ପ୍ରଶାସନ ପ୍ରାୟ ୧୫ ହଜାର ଗଛ କାଟି ସାରିଥିବା ବେଳେ ଏନେଇ ଲୋକମାନେ କ୍ଷତିପୂରଣ ଦେବାକୁ ଦାବି କରିଥିଲେ ।

ତେବେ ସଂପୃକ୍ତ ଅଧିକାରୀଙ୍କ ନେତୃତ୍ୱରେ ଇଡ଼୍କୋ ଅଧିକାରୀ ସଂଗ୍ରାମ ମହାପାତ୍ର ଚାରୋଟି ଗଛ କଟା ଯନ୍ତ୍ର ଧରି ଗଛ କାଟିବାକୁ ସେଠାରେ ପହଞ୍ଚିବାରୁ ଲୋକମାନେ ଏହାକୁ ବିରୋଧ କରିଥିଲେ । ଏହାକୁ ନେଇ ସେଠାରେ ଉତେଜନା ପ୍ରକାଶ ପାଇଥିଲା ।

ତେବେ ପାନବରଜ ଭାଙ୍ଗିବା ଯୋଗୁଁ କ୍ଷତିଗ୍ରସ୍ତ ହୋଇଥିବା ସାତ ଜଣଙ୍କୁ କ୍ଷତିପୂରଣ ଦେବାକୁ ପୋସ୍କୋ କମ୍ପାନୀ ଏବଂ ଇଡ଼୍କୋ ଅଧିକାରୀ ମନା କରିଦେଇଥିବା ବଡ଼ଘାଇପାଇ ଜଙ୍ଗଲ କମିଟିର ସସ୍ୟମାନେ ଅଭିଯୋଗ କରିଛନ୍ତି ।

ନିଜର ଦାବି ଉପସ୍ଥାପନ କରିଥିବା ବେଳେ ସଂପୃକ୍ତ ଅଧିକାରୀମାନେ ଆମକୁ ଏବଂ ମହିଳା ମାନଙ୍କୁ ଦୁର୍ବ୍ୟବହାର କରିଥିଲେ ବୋଲି ଜଣେ ପ୍ରଭାବିତ ଅକ୍ଷୟ ସାମଲ କହିଛନ୍ତି ।

ଲୋକଙ୍କ ଆକ୍ରମଣରେ ଆହତ ପୋସ୍କୋ ଅଧିକାରୀ ଏବଂ ଅନ୍ୟମାନଙ୍କୁ କୁଜଙ୍ଗ ଡ଼ାକ୍ତରଖାନାକୁ ପଠାଇ ଦିଆଯାଇଥିବା ମହାପାତ୍ର କହିଛନ୍ତି ।

ତେବେ ଉକ୍ତ କମିଟିର ଲୋକମାନେ ମିଛରେ ପାନବରଜ ଏବଂ ଚିଙ୍ଗୁଡ଼ି ଘେରି ଭାଙ୍ଗିବା ନେଇ କ୍ଷତିପୂରଣ ଦାବି କରୁଥିବାରୁ ଅଧିକାରୀମାନେ କ୍ଷତିପୂରଣ ରାଶି ଦେବାକୁ ମନା କରିଦେଇଥିଲେ ଏବଂ ଏହାକୁ ନେଇ ଗଣ୍ଡଗୋଳ ହୋଇଥିଲା ବୋଲି ସେ କହିଛନ୍ତି । ଚିଙ୍ଗୁଡ଼ି ଘେରି ପାଇଁ କମ୍ପାନୀ ୫୦ ଲକ୍ଷ ଟଙ୍କା କ୍ଷତିପୂରଣ ଦେଇସାରିଥିବା ସେ କହିଛନ୍ତି ।

ଏନେଇ ସେ ଆକ୍ରମଣକାରୀଙ୍କ ବିରୋଧରେ କୁଜଙ୍ଗ ଥାନାରେ ଲିଖିତ ଅଭିଯୋଗ କରିଛନ୍ତି । ଏହି ଘଟଣାରେ ପୋଲିସ ଦୁଇଟି ମାମଲା ରୁଜୁ କରିଥିବା କୁଜଙ୍ଗ ଆଇଆଇସି ଗୁପ୍ତେଶ୍ୱର ଭୋଇ କହିଛନ୍ତି ।

ଓଡ଼ିଶା ଡ଼ଟ୍ କମ୍