ନେପାଳ

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର, ମଇ ୧୨ (ଓଡିଶା ଡଟ କମ) ମଙ୍ଗଳବାର ରାଜ୍ୟର କଟକ, ଭୁବନେଶ୍ୱର ଓ ରାଉରକେଲା ସମେତ ବହୁ ସ୍ଥାନରେ ଭୁକମ୍ପର ଝଟକା ଅନୁଭୂତ ହୋଇଥିବା ପ୍ରତ୍ୟକ୍ଷଦର୍ଶୀ କହିଛନ୍ତି ।

ନେପାଳରେ ଅପରାହ୍ନ ପ୍ରାୟ ୧୨.୩୫ରେ ହୋଇଥିବା ୭.୩  ରିକ୍ଟର ସ୍କେଲ ମାତ୍ରାର ଏହି ଭୂକମ୍ପର ପ୍ରଭାବ ଯୋଗୁଁ ଏହି ଝଟକା ଅନୁଭବ ହୋଇଥିବା ଏଠାରେ ସ୍ଥାନୀୟ ପାଣିପାଗ କାର୍ଯ୍ୟ।ଳୟ କହିଛି ।
ତେବେ ମାତ୍ର କେଇ ସେକେଣ୍ଡ ପାଇଁ ଅନୁଭୂତ ହୋଇଥିବା ଏହି ଭୂକମ୍ପ ର ପ୍ରଭାବ ଯୋଗୁଁ ରାଜ୍ୟରେ କୌଣସି କ୍ଷୟ କ୍ଷତି ହୋଇ ଥିବା ସୂଚନା ମିଳିନାହିଁ ।

ତେବେ ଭୁକମ୍ପନ ଅନୁଭବ କରି ଲୋକେ ବହୁତଳ ପ୍ରାସାଦ ଓ ଏପାର୍ଟମେଣ୍ଟରୁ ଖୋଲା ଯାଗାକୁ କିଛି ସମୟ ପାଇଁ ଚାଲି ଯାଇଥିଲେ । ପରବର୍ତୀ ସମୟରେ ପରିସ୍ଥିତି ସାମାନ୍ୟ ହୋଇଥିଲେ ମଧ୍ୟ କିଛି ଲୋକ ଖୋଲା ଜାଗାରେ ରହିଥିବାର ଦେଖା ଯାଇଥିଲା ।

ଓଡିଶା ଡଟ କମ

ଭୁବନେଶ୍ଵର, ମଇ ୨ (ଓଡିଶା ଡଟ କମ) ଭୂକମ୍ପ ପ୍ରଭାବିତ ନେପାଳରୁ ଓଡିଶାର ଆହୁରି ୬୩ ଜଣ ଗୃହ ପ୍ରତ୍ୟାବର୍ତନ କରିଥିବା ରାଜ୍ୟ ସରକାର କହିଛନ୍ତି । ଏହାକୁ ମିଶାଇ ନେପାଳରୁ ରାଜ୍ୟରେ ନିଜ ଘରକୁ ଫେରି ଆସିଥିବା ବ୍ୟକ୍ତିଙ୍କ ସଂଖ୍ୟା ୯୨ରେ ପହଞ୍ଚିଛି ।

ସ୍ଵତନ୍ତ୍ର ରାଜସ୍ଵ କମିଶନରଙ୍କ ଅଫିସରୁ ମିଳିଥିବା ସୂଚନା ଅନୁସାରେ ନେପାଳରେ ଏବେ ମଧ୍ୟ ରାଜ୍ୟର ପ୍ରାୟ ତିନିଶହରୁ ଅଧିକ ଲୋକ ବିଭିନ୍ନ ସ୍ଥାନରେ ଆଶ୍ରୟ ନେଇ ସୁରକ୍ଷିତ ରହିଛନ୍ତି ଓ ସେମାନଙ୍କୁ ଫେରାଇ ଆଣିବା ପାଇଁ ଉଦ୍ୟମ ଜାରି ରହିଛି ।

ଏହା ମଧ୍ୟରେ ତୀର୍ଥ ଯାତ୍ରାରେ ଯାଇ ଉତ୍ତରାଖଣ୍ଡରେ ଫସିଯାଇଥିବା ଭଦ୍ରକର ୫୪ ଜଣଙ୍କୁ ଉଦ୍ଧାର କରାଯାଇଥିବା ଏହି ଅଫିସ ସୂଚନା ଦେଇଛି  ।

ଓଡିଶା ଡଟ କମ

ଭୁବନେଶ୍ଵର, ଏପ୍ରିଲ ୩୦ (ଓଡିଶା ଡଟ କମ) ଭୂକମ୍ପ ପ୍ରଭାବିତ ନେପାଳରେ ରହୁଥିବା ଅଥବା ସେଠାକୁ ବୁଲିବାକୁ ଯାଇଥିବା ଓଡିଶାର ପ୍ରାୟ ସମସ୍ତ ୪୪୫ ଜଣ ବ୍ୟକ୍ତି ସୁରକ୍ଷିତ ଥିବାର ସୂଚନା ମିଳିଥିବା ସ୍ଵତନ୍ତ୍ର ରାଜସ୍ଵ କମିଶନର ପ୍ରଦୀପ୍ତ ମହାପାତ୍ର ଗୁରୁବାର ସୂଚନା ଦେଇଛନ୍ତି ।

ସେମାନଙ୍କ ମଧ୍ୟରୁ ୩୦ ଜଣ ଦେଶକୁ ଅଥବା ରାଜ୍ୟକୁ ଫେରିଆସିଥିବା ସେ କହିଛନ୍ତି । କାଠମାଣ୍ଡୁ ବିମାନବନ୍ଦର ରେ ବ୍ୟାପକ ଭିଡ ଥିବାରୁ କେତେକ ବ୍ୟକ୍ତି ସଡକ ମାର୍ଗରେ ପ୍ରତ୍ୟାବର୍ତନ କରିଥିବା ସେ କହିଛନ୍ତି ।

କେନ୍ଦ୍ରାପଡାରୁ ସର୍ବାଧିକ ୩୭୬ ଜଣ ନେପାଳରେ ଭୂମିକମ୍ପ ସମୟରେ ଥିବା ସୂଚନା ମିଳିଥିବା ବେଳେ, ବଲାଙ୍ଗିର, ଖୋର୍ଦ୍ଧା, କେନ୍ଦୁଝର, ନବରଙ୍ଗପୁର ଓ ଅନ୍ୟାନ୍ୟ ଜିଲ୍ଲାରୁ ଯଥାକ୍ରମେ ୩, ୯, ୪୮, ୧, ଓ ୮ ଜଣ ଥିବା ସୂଚନା ମିଳିଛି ।

ଏହା ମଧ୍ୟରେ କେନ୍ଦ୍ରାପଡା ଜିଲ୍ଲାର ୧୮ ଜଣ, ବଲାଙ୍ଗିରର ୮, ନବରଙ୍ଗପୁରର ୧, ଏବଂ ଅନ୍ୟ ଜିଲ୍ଲାର ଆଠ ଜଣ ପ୍ରତ୍ୟାବର୍ତ୍ତନ କରିଥିବା ସମ୍ପୃକ୍ତ ଜିଲ୍ଲାର ଜିଲ୍ଲାପାଳ ମାନେ ସୂଚନା ଦେଇଥିବା ସେ କହିଛନ୍ତି ।

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର, ଏପ୍ରିଲ ୨୮ (ଓଡିଶା ଡଟ କମ) ଭୂକମ୍ପ ପିଡୀତ ନେପାଳରେ ରହୁଥିବା ଓଡିଆଙ୍କୁ ସହାୟତା ଯୋଗାଇବା ଉଦ୍ଦେଶ୍ୟରେ ରାଜ୍ୟସରକାର ଦିଲ୍ଲୀରେ ଏକ ହେଲ୍ପଲାଇନ ଆରମ୍ଭ କରିବା ସହ ବିମାନ ବନ୍ଦରର ତିନି ନମ୍ବର ଟର୍ମିନାଲରେ ଏକ ହେଲ୍ପ ଡେସ୍କ ଆରମ୍ଭ କରିଛନ୍ତି ।

ସରକାରଙ୍କ ମୁଖ୍ୟ ରେସିଡେଣ୍ଟ କମିଶନରଙ୍କ କାର୍ୟାଳୟରେ ଆରମ୍ଭ କରାଯାଇଥିବା ଏହି ହେଲ୍ପଲାଇନର ନମ୍ବର ହେଲା ୦୧୧-୨୪୬୭୯୨୦୧ , ପିବିଏକ୍ସ ଏକ୍ସଟେନସନ -୦୪ ଓ ମୋବାଇଲ ନମ୍ବର ହେଲା ୦୭୮୦୩୮୫୦୦୦୫ ।

ନେପାଳରେ ଥିବା ଓଡିଆ ମାନଙ୍କୁ ଘରକୁ ସୁରକ୍ଷିତ ଫେରାଇଆଣିବା ପାଇଁ ସରକାରଙ୍କ ମୁଖ୍ୟ ରେସିଡେଣ୍ଟ କମିଶନର ସେଠାକାର କତୃପକ୍ଷଙ୍କ ସହ ନିୟମିତ ଯୋଗାଯୋଗ ରଖିଥିବା, ସ୍ପେଶାଲ ରିଲିଫ କମିଶନର ପ୍ରଦୀପ୍ତ ମହାପାତ୍ର ଏକ ବିବୃତି ରେ ଜଣାଇଛନ୍ତି ।

ଏୟାରପୋର୍ଟ ନିକଟରେ ଥିବା ଓଡିଶା ସଦନରେ ଦଶଟି କୋଠରି ରିଜର୍ଭ ରଖା ଯାଇଥିବା ବେଳେ ରେଳ କତ୍ତୃପକ୍ଷଙ୍କୁ ବିମାନ ବନ୍ଦରରେ ଏକ ସହାୟତା କେନ୍ଦ୍ର ଖୋଲିବା ପାଇଁ ଅନୁରୋଧ କରାଯାଇଛି ।

ନେପାଳରୁ ଆଠଜଣ ଓଡିଆ ସୁରକ୍ଷିତ ଭାବେ ସୋମବାର ନୂଆ ଦିଲ୍ଲୀ ରେ ପହଞ୍ଚିଥିବା ବେଳେ ସମସ୍ତେ ନିଜ ନିଜ ଘର ଅଭିମୁଖେ ଯାତ୍ରା କରିଛନ୍ତି ।

ସରକାରଙ୍କୁ ମିଳିଥିବା ସୂଚନା ଅନୁସାରେ ନେପାଳରେ କେନ୍ଦ୍ରପଡା ଜିଲ୍ଲାର ପଟ୍ଟାମୁଣ୍ଡାଇ ଓ ଆଳି ବ୍ଲକର ୩୩୫ ଜଣ ରହୁଥିବା ବେଳେ ସେମାନଙ୍କ ମଧ୍ୟରୁ ଅରୁତମଣୋହୀ ଗ୍ରାମର ବୁଲୁ କୁମାର ସେଠୀ, କ୍ଷୀରୋଦ ବେହେରା, ମନୋଜ ବେହେରା ଓ ବଡାଙ୍କୋ ଗାଁର ମମତା ବେହେରା ସାମାନ୍ୟ ଆହତ ହୋଇଥିବା ବେଳେ ଅନ୍ୟମାନେ ସୁରକ୍ଷିତ ଅଛନ୍ତି ।

ମିଳିଥିବା ଅନ୍ୟ ଏକ ରିପୋର୍ଟ ଅନୁସାରେ ବଲାଙ୍ଗିର ଜିଲ୍ଲାର ବିଧୁଭୂଷଣ ମହାପାତ୍ର, ପ୍ର୍ଜ୍ଞା ପାରମିତା ଗୁରୁ ଓ ଅଦ୍ରିକା ମହାପାତ୍ର ଭୂମିକମ୍ପ ଦ୍ଵାରା ପ୍ରଭାବିତ ହୋଇ ଏଟିମୋର, ଲାଳିପୁର ନେପାଳରେ ଥିବା ରିଲିଫ କ୍ୟାମ୍ପରେ ଆଶ୍ରୟ ନେଇ ଭାରତରୁ ପଠାଯାଇଥିବା ସାହାଯ୍ୟକୁ ଅପେକ୍ଷା କରିଛନ୍ତି ।

ସେହିପରି ଝାରସୁଗୁଡାରେ ଥିବା ରାଜ୍ୟ ଆର୍ମଡ ପୁଲିସ ବେଟାଲିୟନରେ କାର୍ଯ୍ୟରତ ନେପାଳର ୯୦୦ କର୍ମଚାରୀଙ୍କ ମଧ୍ୟରୁ ଦଶ ଜଣ ନିଜ ଘରକୁ ଯାଇଥିଲେ । ସେମାନେ ସମସ୍ତେ ସୁରକ୍ଷିତ ଥିବା ଖବର ମିଳିଛି ।

ଓଡିଶା ଡଟ କମ

ଭଦ୍ରକ, ଏପ୍ରିଲ ୨୭ (ଓଡିଶା ଡଟ କମ) ଗତ ଦୁଇଦିନ ତଳେ ଘଟିଯାଇଥିବା ପ୍ରଳୟଙ୍କରୀ ଭୂକମ୍ପରେ ଭାରତ ତଥା ନେପାଳର ମୃତାହତଙ୍କ ଉଦ୍ଦେଶ୍ୟରେ ଭଦ୍ରକ ଜିଲା ସାମ୍ବାଦିକଙ୍କ ପକ୍ଷରୁ ସୋମବାର ଏକ ସଭା କରାଯିବା ସହ ମହମବତୀ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି ।

ଏହି ଭୂକମ୍ପରେ ନେପାଳରେ ସର୍ବାଧିକ କ୍ଷୟକ୍ଷତି ହୋଇ ମୃତ୍ୟୁ ସଂଖ୍ୟା ବୃଦ୍ଧି ପାଉଥିବାବେଳେ ଭାରତରେ ମଧ୍ୟ ଏହି ପ୍ରାକୃତିକ ବିପର୍ଯ୍ୟୟରେ ଧନଜନ ନଷ୍ଟ ହୋଇଛି । ଏହି ଦୁଃଖଦ ଘଟଣା ପ୍ରତି ସମବେଦନା ଜଣାଇ ସାମ୍ବାଦିକ ମାନଙ୍କ ପକ୍ଷରୁ ଏକ ଶୋକସଭା ସ୍ଥାନୀୟ ବାଲଟୋ ମନ୍ଦିର ପ୍ରାଙ୍ଗଣରେ ଅନୁଷ୍ଠିତ ହୋଇଥିଲା ।

ସାମ୍ବାଦିକ ଅଶୋକ କୁମାର ନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଶୋକସଭାରେ ଭୂମିକମ୍ପରେ ମୃତ୍ୟୁ ଘଟିଥିବା ଲୋକମାନଙ୍କ ପାଇଁ ଦୁଇମିନିଟ ନୀରବ ପ୍ରାର୍ଥନା କରାଯାଇଥିଲା ।

ଆହତ ହୋଇଥିବା ବ୍ୟକ୍ତିମାନଙ୍କର ଆଶୁ ଆରୋଗ୍ୟ କାମନା କରି ଈଶ୍ୱରଙ୍କ ଠାରେ ପ୍ରାର୍ଥନା କରାଯାଇଥିଲା ।

ଏହି ଦୁଃଖଦ ସମ୍ବାଦକୁ ଗଣମାଧ୍ୟମ ବହୁ ମାତ୍ରାରେ ପ୍ରଚାର ପ୍ରସାର କରିବା ସହିତ ସମସ୍ତେ ନିଜ କ୍ଷମତା ମୁତାବକ ସହଯୋଗ କରିବା ଉଚିତ ବୋଲି ସାମ୍ବାଦିକମାନେ ମତାମତ ଦେଇଥିଲେ । ଏହି ଅବସରରେ ଜିଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ଯଥାସମ୍ଭବ ଅର୍ଥରାଶି ସହାୟତା କରିବାକୁ ସର୍ବସମ୍ମତି ନିଷ୍ପତ୍ତି ଗ୍ରହଣ କରାଯାଇଥିଲା ।

ଏହି ଶୋକସଭାରେ ସାମ୍ବାଦିକ ଭଜ ଗୋବିନ୍ଦ ଜେନା, ନିହାର ଦାସ, ପ୍ରମୋଦ ରାୟ, ପ୍ରତାପ ଦାସ, ଡ.ହରିହର ନାୟକ, ତପନ ମିଶ୍ର, ସ୍ମୃତି ରଞ୍ଜନ ସାହୁ, ଅତିଶ ବେହେରା, ବିଭୁପ୍ରସାଦ ବେହେରା, ଚାରୁଦ ନାୟକ,ପ୍ରିୟ ଦର୍ଶନ ବୋଇତି, ଉମାକଲ୍ୟାଣ ମହାପାତ୍ର, ଜ୍ଞାନ ପ୍ରକାଶ ପାଣି, ଅବିନାଶ ପଣ୍ଡା, ସମ୍ବିତ ନାୟକ, ରୂପକ ରାୟ, ଲାଲା ପ୍ରମୋଦ ରାୟ,ଶୈଳେନ୍ଦ୍ର ପଲେଇ,ପାର୍ଥ ସାରଥି ନାୟକ,ସର୍ବେଶ୍ୱର ନାଥ, ଗୌରହରି ନାୟକ,ନରେନ୍ଦ୍ର ସାମଲ,ରବିନାରାୟଣ ଖିଲାର, ଜଗନ୍ନାଥ ମଲ୍ଲିକ, ଲକ୍ଷ୍ମୀକାନ୍ତ ନାଥ, ରବିନାରାୟଣ ସାହୁ, ରାଜେନ୍ଦ୍ର ପ୍ରସାଦ ଜେନା,ଶ୍ରୀକାନ୍ତ ତ୍ରିପାଠୀ, ଶୁଭେନ୍ଦୁ ଧଳ, ମନୋଜ ପଣ୍ଡା, ସ୍ନିଗ୍ଧା ରାୟ, ପ୍ରିୟଙ୍କା ପଣ୍ଡା, ସିପ୍ରା ରାୟ, ଅପୂର୍ବ ରଂଜନ ବେହେରା, ମହେଶ ମିଶ୍ର, ନବକିଶୋର ସ୍ୱାଇଁ, ତପନ ସ୍ୱାଇଁ, ଉଦ୍ଧବ ଚରଣ ମିଶ୍ର, ଶାନ୍ତନୁ ପଣ୍ଡା, ଆଶିଷ ଅମିତାଭ ମହାପାତ୍ର ପ୍ରମୁଖ ଉପସ୍ଥିତ ଥିଲେ ।

ମୃତାହତ ବ୍ୟକ୍ତି ମାନଙ୍କ ପ୍ରତି ଶ୍ରଦ୍ଧାଞଳି ଜଣାଇ ସନ୍ଧ୍ୟାରେ ଏକ ମହମବତୀ ଶୋଭାଯାତ୍ରା ଜିଲାପାଳଙ୍କ କାର୍ଯ୍ୟାଳୟ ଠାରୁ ବାହାରି ସହର ପରିକ୍ରମା କରିଥିଲା ।
ଓଡିଶା ଡଟ କମ