ପରୀକ୍ଷା

ଓଡ଼ିଶା ଡ଼ଟ୍ କମ୍ : ସ୍ନିଗ୍ଧା ରାୟ

ଭଦ୍ରକ, ମଇ ୧୭(ଓଡ଼ିଶା ଡ଼ଟ୍ କମ୍) ମାଟ୍ରିକ ପରୀକ୍ଷା ଖାତା ମୂଲ୍ୟାୟନ ଶେଷ ହୋଇଥିବା ବେଳେ ଭଦ୍ରକ ଜିଲ୍ଲାରେ ଏହି କାର୍ଯ୍ୟରେ ନିୟୋଜିତ ୨୫ ଜଣ ଶିକ୍ଷକ ଅନୁପସ୍ଥିତ ରହିଥିବାରୁ ସେମାନଙ୍କର ଦରମା ବନ୍ଦ କରାଯାଇଛି ।

ଜିଲ୍ଲା ଶିକ୍ଷା ମଣ୍ଡଳାଧିଶ ସତ୍ୟ ମୋହନ ସେନାପତି କର୍ତବ୍ୟରେ ଅବହେଳା ପାଇଁ ଏହି ଶିକ୍ଷକ ମାନଙ୍କ
ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରି ଦରମା ବନ୍ଦ କରିଛନ୍ତି ।

ଗତ ୧ତାରିଖ ଠାରୁ ମ୍ୟାଟ୍ରିକ ପରୀକ୍ଷା ଖାତା ମୂଲ୍ୟାୟନ ଜିଲ୍ଲା ସ୍କୁଲ ଓ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ଆରମ୍ଭ ହୋଇଥିଲା । ସରକାରୀ ଉଚ୍ଚ ବିଦ୍ୟାଳୟରେ ୩୪୬ଜଣ ଓ ଜିଲ୍ଲା ସ୍କୁଲରେ ୩୫୬ଜଣଙ୍କୁ ନିୟୋଜିତ କରାଯାଇଥିଲା ।

ତେବେ ସମଗ୍ର ମୂଲ୍ୟାୟନ ପ୍ରକ୍ରିୟାରୁ ଏହି ଶିକ୍ଷକମାନେ ଅନୁପସ୍ଥିତ ରହିଥିବା ଜଣାପଡ଼ିଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ମଇ ୬(ଓଡ଼ିଶା ଡ଼ଟ୍ କମ୍) ରବିବାର ଅନୁଷ୍ଠିତ ଯୁଗ୍ମ ପ୍ରବେଶିକା ପରୀକ୍ଷାରେ ଆଡମିଟ୍ କାର୍ଡରେ ଆବଶ୍ୟକ ସୂଚନାର ଅଭାବ ଓ ରୋଲ୍ ନମ୍ବର ନଥିବାରୁ ଶତାଧିକ ଛାତ୍ରଛାତ୍ରୀ ପରୀକ୍ଷା ଦେବାରୁ ବଞ୍ଚିତ ହୋଇଛନ୍ତି ।

ପରୀକ୍ଷା କେନ୍ଦ୍ର ଗୁଡିକର ରୋଲ୍ ନମ୍ବର ସହ ପରୀକ୍ଷାର୍ଥୀଙ୍କ ଆଡ଼ମିଟ୍ କାର୍ଡ଼ରେ ଥିବା ରୋଲ୍ ନମ୍ବର ସମାନ ନଥିବାରୁ ପରୀକ୍ଷାର୍ଥୀଙ୍କୁ ନିର୍ଦ୍ଧାରିତ ପରୀକ୍ଷା କେନ୍ଦ୍ର ମଧ୍ୟକୁ ପ୍ରବେଶ କରିବା ପାଇଁ ଅନୁମତି ଦିଆଯାଇନାହିଁ ।

ଏହାବ୍ୟତୀତ କେତେକ କେନ୍ଦ୍ରରେ ପ୍ରଥମ ସିଟିଙ୍ଗରେ ବସିବା ପାଇଁ ପରୀକ୍ଷାର୍ଥୀଙ୍କ ଆଡ଼ମିଟ୍ କାର୍ଡ଼ରେ ଉଲ୍ଲେଖ କରାଯାଇଥିବା ବେଳେ ପରୀକ୍ଷା କେନ୍ଦ୍ର କର୍ତୃପକ୍ଷ ସେମାନଙ୍କୁ ଦ୍ୱିତୀୟ ସିଟିଙ୍ଗରେ ବସିବା ପାଇଁକହିଥିବା ଛାତ୍ରଛାତ୍ରୀମାନେ ଅଭିଯୋଗ କରିଛନ୍ତି ।

ଏନେଇ ଉଭୟ ପରୀକ୍ଷାର୍ଥୀ ଓ ଅଭିଭାବକଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।

ଚଳିତ ବର୍ଷ ୯୯ ହଜାର ୮୩୬ ଜଣ ଛାତ୍ରଛାତ୍ରୀ ଏହି ପରୀକ୍ଷା ଦେବା ପାଇଁ ଆବେଦନ କରିଥିବା ବେଳେ ସେମାନଙ୍କ ମଧ୍ୟରୁ ଇଂଜିନିୟରିଂରେ ୬୮ ହଜାର ଓ ମେଡ଼ିକାଲରେ ୩୧ ହଜାର ୫୦୦ ଜଣ ପରୀକ୍ଷାର୍ଥୀ ଥିଲେ ।

ଏଥିପାଇଁ ରାଜ୍ୟର ବିଭିନ୍ନ ସ୍ଥାନରେ ୧୫୧ଟି ଓ ରାଜ୍ୟ ବାହାରେ ୩୧ଟି କେନ୍ଦ୍ରରେ ଛାତ୍ରଛାତ୍ରୀମାନେ ପରୀକ୍ଷା ଦେବା ପାଇଁ ବ୍ୟବସ୍ଥା କରାଯାଇଥିଲା । ଏଥିମଧ୍ୟରୁ କେବଳ ଭୁବନେଶ୍ୱରରେ ୪୨ଟି କେନ୍ଦ୍ର କରାଯାଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ମଇ ୬(ଓଡ଼ିଶା ଡ଼ଟ୍ କମ୍) ରାଜ୍ୟର ୧୫୧ଟି ଏବଂ ରାଜ୍ୟ ବାହାରେ ୩୧ଟି କେନ୍ଦ୍ରରେ ରବିବାର ଓଡ଼ିଶା ଯୁଗ୍ମ ପ୍ରବେଶିକା ପରୀକ୍ଷା ଅନୁଷ୍ଠିତ ହୋଇଛି ।

ଏଗୁଡ଼ିକ ମଧ୍ୟରୁ ଭୁବନେଶ୍ୱରରେ କେବଳ ୪୨ଟି ପରୀକ୍ଷା କେନ୍ଦ୍ର କରାଯାଇଛି । ଯୁଗ୍ମ ପ୍ରବେଶିକା ପରୀକ୍ଷା ଅଧିନରେ ଥିବା ଏମ୍.ଫାର୍ମା ବ୍ୟତୀତ ଅନ୍ୟ ସମସ୍ତ ପାଠ୍ୟକ୍ରମ ପାଇଁ ଏହି ପରୀକ୍ଷା ହେବ ।

ଚଳିତ ବର୍ଷ ୯୯ ହଜାର ୮୩୬ ଜଣ ଛାତ୍ରଛାତ୍ରୀ ଏହି ପରୀକ୍ଷା ଦେବା ପାଇଁ ଆବେଦନ କରିଥିବା ବେଳେ ସେମାନଙ୍କ ମଧ୍ୟରୁ ଇଂଜିନିୟରିଂରେ ୬୮ ହଜାର ଓ ମେଡ଼ିକାଲରେ ୩୧ ହଜାର ୫୦୦ ଜଣ ଅଛନ୍ତି ।

ତିନୋଟି ସିଫ୍ଟରେ ଏହି ପରୀକ୍ଷା ଅନୁଷ୍ଠିତ ହେବାକୁ ଥିବା ବେଳେ ପ୍ରଥମ ସିଫ୍ଟ ସକାଳ ୯ଟାରୁ ୧୧ଟା,ଦ୍ୱିତୀୟ ସିଫ୍ଟ ୧୨ଟାରୁ ୧ଟା ଏବଂ ତୃତୀୟ ସିଫ୍ଟ ୨ଟା ୩୦ରୁ ୪ଟା ୩୦ ପର୍ଯ୍ୟନ୍ତ ହେବ ।

ପରୀକ୍ଷାକୁ ଶୃଙ୍ଖଳିତ କରିବା ପାଇଁ ପ୍ରାୟ ଚାରି ଶହ ଜଣ ସ୍କ୍ୱାର୍ଡ଼ଙ୍କୁ ବିଭିନ୍ନ କେନ୍ଦ୍ରରେ ନିୟୋଜିତ କରାଯାଇଥିବା ଜେଇଇ କର୍ତୃପକ୍ଷ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ମାର୍ଚ୍ଚ ୧୮(ଓଡ଼ିଶା ଡ଼ଟ୍ କମ୍) ଜଗତସିଂହପୁର ଜିଲ୍ଲାରେ ବିଭାଗୀୟ କର୍ତୃପକ୍ଷ ଏବଂ ହାଇକୋର୍ଟଙ୍କ ନିର୍ଦ୍ଦେଶକୁ ବେଖାତିର କରି ସ୍କୁଲ ଠାରୁ ବହୁ ଦୂରରେ ପରୀକ୍ଷା କେନ୍ଦ୍ର କରାଯାଇଥିବାରୁ ମ୍ୟାଟ୍ରିକ ପରୀକ୍ଷାର୍ଥୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।

ଜିଲ୍ଲାର ୨୮୫ ହାଇସ୍କୁଲର ୧୮, ୩୧୮ ଜଣ ଛାତ୍ରଛାତ୍ରୀ ୭୧ଟି ପରୀକ୍ଷା କେନ୍ଦ୍ରରେ ସୋମବାର ହେବାକୁ ଥିବା ମ୍ୟାଟ୍ରିକ ପରୀକ୍ଷା ଦେବେ ।

ପରୀକ୍ଷା କେନ୍ଦ୍ର ବହୁତ ଦୂରରେ ହୋଇଥିବାରୁ ସେଠାକୁ ଯିବା ପାଇଁ ଅଧିକ ସମୟ ଲାଗିବ ଏବଂ ପରୀକ୍ଷା ଦେବାରେ ବାଧାପ୍ରାପ୍ତ ହେବ ବୋଲି ବିଭିନ୍ନ ହାଇସ୍କୁଲର ଛାତ୍ରଛାତ୍ରୀମାନେ କହିଛନ୍ତି ।

ସ୍କୁଲ ଠାରୁ ୪୦ କିମି ଦୂରରେ ପରୀକ୍ଷା କେନ୍ଦ୍ର କରାଯାଇଥିବାରୁ ଏହା ହାଇକୋର୍ଟଙ୍କ ନିର୍ଦ୍ଦେଶକୁ ଅବମାନନା କରାଯାଇଛି ବୋଲି ଅଭିଭାବକମାନେ ଅଭିଯୋଗ କରିଛନ୍ତି ।

ଯେଉଁ ସ୍ଥାନ ଗୁଡ଼ିକରେ ପରୀକ୍ଷା କେନ୍ଦ୍ର ୪୦ କିମି ଦୂରରେ ରହିଛି ସେଗୁଡ଼କ ପରିବର୍ତନ କରିବା ପାଇଁ ସେମାନେ ଜିଲ୍ଲାପାଳ ଏବଂ ସ୍କୁଲ ଓ ଗଣଶିକ୍ଷା ବିଭାଗର ହସ୍ତକ୍ଷେପ ଲୋଡ଼ିଛନ୍ତି ।

ସରକାର ସ୍କୁଲ ଠାରୁ ୫/୧୦ କିମି ଦୂରରେ ପରୀକ୍ଷା କେନ୍ଦ୍ର କରିବା ପାଇଁ ନିର୍ଦ୍ଦେଶ ଦେଇଥିଲେ ମଧ୍ୟ
ତାହା କରାଯାଇ ନାହିଁ ବୋଲି ଜଣେ ଅଭିଭାବକ ସୁଦର୍ଶନ ସ୍ୱାଇଁ କହିଛନ୍ତି ।

ଭୌଗୋଳିକ ସ୍ଥିତି ଯୋଗୁଁ ୫ରୁ୧୦ କିମି ମଧ୍ୟରେ ପରୀକ୍ଷା କେନ୍ଦ୍ର କରିବା କଷ୍ଟକର କିନ୍ତୁ କେତେକ ସ୍କୁଲର କେନ୍ଦ୍ର ଏହି ଦୂରତା ମଧ୍ୟରେ କରାଯାଇଛି ବୋଲି ସ୍କୁଲ ସିଆଇ ପ୍ରଶାନ୍ତ କୁମାର ସ୍ୱାଇଁ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ସ୍ନିଗ୍ଧା ରାୟ

ଭଦ୍ରକ, ମାର୍ଚ୍ଚ ୧୪(ଓଡ଼ିଶା ଡ଼ଟ୍ କମ୍) ଭଦ୍ରକ ଜିଲ୍ଲାର ଏକ ଗ୍ରାମରେ ସ୍କୁଲ ପରିଚାଳନା କମିଟି ଓ ଭାରପ୍ରାପ୍ତ ପ୍ରଧାନ ଶିକ୍ଷୟତ୍ରୀଙ୍କ ମଧ୍ୟରେ ବିବାଦ ଯୋଗୁଁ ଅଧ୍ୟୟନରତ ୬୦ରୁ ଉର୍ଦ୍ଧ୍ଵ ଛାତ୍ରଛାତ୍ରୀ ବାର୍ଷିକ ପରୀକ୍ଷା ବର୍ଜନ କରିଛନ୍ତି ।

ବନ୍ତ ବ୍ଲକ ଅଧିନସ୍ଥ ଗଣିଜଙ୍ଗ ପଞ୍ଚାୟତସ୍ଥ ବେଲାମୁଣ୍ଡା ସାହି ପ୍ରକଳ୍ପ ପ୍ରାଥମିକ ବିଦ୍ୟାଳୟର ଉକ୍ତ ଛାତ୍ରଛାତ୍ରୀମାନେ ଏହି ବିବାଦ ଯୋଗୁଁ ଦୀର୍ଘ ୨ମାସ ଧରି ମଧ୍ୟାହ୍ନ ଭୋଜନ ଓ ପୋଷାକ ପାଇବାରୁ ବଞ୍ଚିତ ହୋଇ ଆସୁଥିଲେ ।

ପରବର୍ତୀ ସମୟରେ ଏହି ଘଟଣାକୁ ନେଇ ଭାରପ୍ରାପ୍ତ ପ୍ରଧାନ ଶିକ୍ଷୟତ୍ରୀ ଓ ପରିଚାଳନା କିମଟି ପକ୍ଷରୁ ସର୍ବଶିକ୍ଷା ଅଭିଯାନ ପ୍ରକଳ୍ପ ସଂଯୋଜକ ଓ ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ ।

ପ୍ରକଳ୍ପ ସଂଯୋଜକ ଉକ୍ତ ଘଟଣାରେ ଗତ ୧ତାରିଖରେ ତଦନ୍ତ କରାଇ ମଧ୍ୟାହ୍ନ ଭୋଜନ ଓ ପୋଷାକ
ବଣ୍ଟନ ନହେବା କାରଣ ପଛରେ ଉଭୟ ପକ୍ଷଙ୍କ ସଂପୃକ୍ତିକୁ ନେଇ ସ୍ଥାନୀୟ ଆଞ୍ଚଳିକ ସାଧନ କେନ୍ଦ୍ର
ସଂଯୋଜକଙ୍କୁ ପ୍ରଧାନ ଶିକ୍ଷକ ଦାୟିତ୍ୱ ନେବାକୁ ନିର୍ଦ୍ଦେଶ ଦେଇଥିଲେ ।

ତଦନୁଯାୟୀ ଗତକାଲି ଦୀର୍ଘଦିନ ଛୁଟିରେ ଥିବା ଶିକ୍ଷୟତ୍ରୀ ବେହେରା ସିଆରସିସିଙ୍କୁ ଦାୟୀତ୍ୱ ଅର୍ପଣ କରି ବୁଧବାର ସାଧାରଣ ଶିକ୍ଷୟତ୍ରୀ ଭାବେ ବିଦ୍ୟାଳୟକୁ ଯାଇଥିଲେ ।

ତେବେ ସଂପୃକ୍ତ ଶିକ୍ଷୟତ୍ରୀଙ୍କୁ ବିଦ୍ୟାଳୟକୁ ନଆସିବା ଦାବି କରି ବିଭାଗୀୟ ଅଧିକାରୀଙ୍କୁ ଜଣାଇଥିବା ପରିଚାଳନା କମିଟିର କର୍ମକର୍ତା ଏଥିରେ ଉତ୍କକ୍ଷିପ୍ତ ହୋଇ କେତେକ ଅବିଭାବକଙ୍କ ସହାୟତାରେ ଛାତ୍ରଛାତ୍ରୀ ମାନଙ୍କୁ ଅଧା ପରୀକ୍ଷାରୁ ଉଠାଇ ନେଇଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

କଟକ, ଡ଼ିସେମ୍ବର ୧୧(ଓଡ଼ିଶା ଡ଼ଟ୍ କମ୍) ମାଧ୍ୟମିକ ଶିକ୍ଷା ପରିଷଦ ଦ୍ଵାରା ପରିଚାଳିତ ୨୦୧୧ ବାର୍ଷିକ ମ୍ୟାଟ୍ରିକ ପରୀକ୍ଷା ଆସନ୍ତା ଫେବୃୟାରୀ ୨୨ରୁ ଆରମ୍ଭ ହେବ ବୋଲି ପରିଷ ପକ୍ଷରୁ କୁହାଯାଇଛି ।

ପ୍ରାୟ ଦୁଇ ହଜାରରୁ ଉର୍ଦ୍ଧ୍ଵ କେନ୍ଦ୍ରରେ ଏହି ପରୀକ୍ଷା ହେବ । ଛାତ୍ରଛାତ୍ରୀମାନେ ପଢୁଥିବା ସ୍କୁଲ ନିକଟସ୍ଥ ହାଇସ୍କୁଲରେ ପରୀକ୍ଷା କେନ୍ଦ୍ର କରିବାକୁ ନିଷ୍ପତ୍ତି ନିଆଯାଇଛି ।

ସିବିଏସ୍ଇ ଢାଞ୍ଚାରେ ପରୀକ୍ଷା ପରିଚାଳନା କରିବା ପାଇଁ ନିଷ୍ପତ୍ତି ନିଆଯାଇଥିବା ବେଳେ ପ୍ରଥମ ଥର ପାଇଁ ପାସ ଛାତ୍ରଛାତ୍ରୀଙ୍କୁ ସାତ ଦିନ ମଧ୍ୟରେ ସାର୍ଟିଫିକେଟ ପ୍ରଦାନ କରାଯିବ ।

ଚଳିତ ମାସ ୨୨ ତାରିଖରୁ ଫର୍ମ ପୂରଣ ଆରମ୍ଭ ହେବ ଓ କଟକ ସମେତ ପରିଷର ୪ଟି ଜୋନ୍ ଓ ୧୮ଟି ସର୍କଲରେ ଏହି ଫର୍ମ ବିକ୍ରି କରାଯିବ । ଏଥର ପ୍ରାୟ ଛଅ ଲକ୍ଷ ଛାତ୍ରଛାତ୍ରୀ ପରୀକ୍ଷା ଦେବେ ବୋଲି ପରିଷଦ ପକ୍ଷରୁ କୁହାଯାଇଛି ।

ଓଡ଼ିଶା ଡ଼ଟ୍ କମ୍

 

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର, ଡ଼ିସେମ୍ବର ୨(ଓଡ଼ିଶା ଡ଼ଟ୍ କମ୍) ରାଜ୍ୟରେ ଥିବା ସମସ୍ତ ସ୍ୱୟଂଶାସିତ କଲେଜ ଗୁଡ଼ିକର ପରୀକ୍ଷା ପଦ୍ଧତି, ଅନୁଦାନ ବ୍ୟୟ ସଂପର୍କରେ ସମୀକ୍ଷା କରାଯିବ ବୋଲି ଉଚ୍ଚଶିକ୍ଷା ମନ୍ତ୍ରୀ ଗୁରୁବାର ବିଧାନସଭାରେ କହିଛନ୍ତି ।

ରାଜ୍ୟରେ ସମୁଦାୟ ୨୯ଟି ସ୍ୱୟଂଶାସିତ କଲେଜ ଥିବା ବେଳେ ସେଥିମଧ୍ୟରୁ ୧୯ଟି ସରକାରୀ, ନଅଟି ଅନୁଦାନପ୍ରାପ୍ତ ଏବଂ ଗୋଟିଏ ଅଣ ଅନୁଦାନପ୍ରାପ୍ତ କଲେଜ ରହିଛି ।

ବିଶ୍ୱ ବିଦ୍ୟାଳୟ ଅନୁଦାନ ଆୟୋଗଙ୍କ ନିୟମାବଳୀ ଅନୁସାରେ ଏହି କଲେଜ ଗୁଡ଼ିକୁ ସ୍ୱୟଂଶାସିତ ମାନ୍ୟତା ଦିଆଯାଇଛି । ଫଳରେ କଲେଜ ଗୁଡ଼ିକ ନିଜେ ନିଜର ପରୀକ୍ଷା କରୁଛନ୍ତି । ପରୀକ୍ଷା ପାଇଁ ପ୍ରଶ୍ନପତ୍ର ବାହାରେ ପ୍ରସ୍ତୁତ ହେଉଥିବା ବେଳେ ୫୦ ପ୍ରତିଶତ ଖାତା ଦେଖା ସଂପୃକ୍ତ କଲେଜରେ ହୋଇପାରୁଛି ବୋଲି ମନ୍ତ୍ରୀ ଦେବୀ ପ୍ରସାଦ ମିଶ୍ର ବିଧାନସଭାରେ କହିଛନ୍ତି ।

ସଂପୃକ୍ତ କଲେଜ ଗୁଡ଼ିକର ପରୀକ୍ଷାରେ ତୃଟି ବିଚ୍ୟୁତି ସଂପର୍କରେ ସରକାରୀ ଭାବେ ସମୀକ୍ଷା କରାଯିବ । ସରକାର ଗଠନ କରିଥିବା ଟାସ୍କଫୋର୍ସର ସୁପାରିଶ ଅନୁସାରେ ମଧ୍ୟ ପକ୍ଷେପ ନିଆଯାଉଛି ବୋଲି ସେ କହିଛନ୍ତି ।

ସ୍ୱୟଂଶାସିତ କଲେଜ ଗୁଡ଼ିକରେ ପରୀକ୍ଷା ପଦ୍ଧତିକୁ ନେଇ ବିଧାୟକମାନେ ତୀବ୍ର ଅସନ୍ତୋଷ ପ୍ରକାଶ କରିଥିଲେ । ସଂପୃକ୍ତ କଲେଜରେ ପ୍ରଶ୍ନପତ୍ର ପ୍ରସ୍ତୁତି, ପରୀକ୍ଷା ଏବଂ ଖାତା ଦେଖା ଯାଉଛି । ଯେଉଁ ଅଧ୍ୟାପକମାନେ ପ୍ରଶ୍ନପତ୍ର ପ୍ରସ୍ତୁତ କରୁଛନ୍ତି ସେମାନେ ଖାତା ଦେଖୁଛନ୍ତି ବୋଲି ବିଧାୟକମାନେ କହିଥିଲେ ।

ତେଣୁ ଏକ ସ୍ୱତନ୍ତ୍ର ସଂସ୍ଥା ଗଠନ କରି ସମସ୍ତ ସ୍ୱୟଂଶାସିତ କଲେଜରେ ଏକା ପ୍ରଶ୍ନପତ୍ର ଓ ପରୀକ୍ଷା ବ୍ୟବସ୍ଥା କରିବାକୁ ସେମାନେ ଦାବି କରିଛନ୍ତି ।

ଓଡ଼ିଶା ଡ଼ଟ୍ କମ୍