ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା
ଭୁବନେଶ୍ୱର, ନଭେମ୍ବର ୧୫(ଓଡ଼ିଶା ଡ଼ଟ୍ କମ୍) ଇଣ୍ଡିଆନ୍ ମେଡ଼ିକାଲ କାଉନ୍ସିଲ ପକ୍ଷରୁ ଆଗାମୀ ବର୍ଷ ପ୍ରାରମ୍ଭରେ ଜାତୀୟ ସ୍ତରରେ ଡାକ୍ତରୀ ପ୍ରବେଶିକା ପରୀକ୍ଷା ହେବ ବୋଲି ଘୋଷଣା କରାଯାଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ପରୀକ୍ଷାର ନମୁନା ପ୍ରଶ୍ନ ପ୍ରକାଶ ପାଇନଥିବାରୁ ଗଭୀର ଉଦବେଗ ପ୍ରକାଶ ପାଇଛି ।
ଏହି ମର୍ମରେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କୁ ଲେଖାଯାଇଥିବା ଏକ ପତ୍ରରେ କୁହାଯାଇଛି ଯେ ଇଣ୍ଡିଆନ୍ ମେଡ଼ିକାଲ କାଉନ୍ସିଲର ନିର୍ଦ୍ଧାରିତ କାର୍ଯ୍ୟକ୍ରମ ଅନୁସାରେ ଚଳିତ ନଭେମ୍ବର ଦ୍ଵୀତୀୟ ସପ୍ତାହ ସୁଦ୍ଧା ସମ୍ଭାବ୍ୟ ପ୍ରଶ୍ନ ପତ୍ରର ନମୁନା ପ୍ରକାଶ ପାଇବା କଥା, ମାତ୍ର ତାହା ଏପର୍ଯ୍ୟନ୍ତ ସମ୍ଭବ ହୋଇନାହିଁ ।
ଅପରପକ୍ଷରେ ସେହି ସର୍ବଭାରତୀୟ ପ୍ରବେଶିକା ପରୀକ୍ଷା ହେବାକୁ ଆଉ ୪/୫ମାସ ବାକି ରହିଛି । ପ୍ରଶ୍ନପତ୍ରର ନମୁନା ବ୍ୟତୀତ ଏପର୍ଯ୍ୟନ୍ତ ସେହି ପରୀକ୍ଷା କ୍ଷେତ୍ରରେ ସଂରକ୍ଷଣ ବ୍ୟବସ୍ଥା କ’ଣ ହେବ ତାହା ମଧ୍ୟ ନିର୍ଦ୍ଧାରଣ ହୋଇନାହିଁ ।
ପ୍ରବେଶିକା ଏବଂ ନାମଲେଖା ନିମନ୍ତେ ବୟସସୀମା କେତେ ହେବ ତାହା ମଧ୍ୟ ନିର୍ଦ୍ଧାରଣ ହୋଇନାହିଁ । ଯେଉଁଥିପାଇଁ ଆଶାୟୀ ଯୁବକ ଯୁବତୀଙ୍କ ମଧ୍ୟରେ ଏକ ଆଶଙ୍କାର ବାତାବରଣ ଲାଗିରହିଛି ।
ତେଣୁ ଯୁବକ ଯୁବତୀଙ୍କ ମଧ୍ୟରେ ପ୍ରତିଯୋଗିତା ମନୋଭାବ ସୃଷ୍ଟି ହୋଇନାହିଁ ବୋଲି ଦର୍ଶାଯାଇଛି । ଏହାଦ୍ୱାରା ଗ୍ରାମାଞ୍ଚଳର ଯୁବକ ଓ ଯୁବତୀମାନେ ବହୁଳ ଭାବେ କ୍ଷତିଗ୍ରସ୍ତ ହେବେ ବୋଲି ମଧ୍ୟ ଦର୍ଶାଯାଇଛି ।
ଉକ୍ତ ଚିଠିରେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀଙ୍କ ମାଧ୍ୟମରେ ଭାରତୀୟ ମେଡ଼ିକାଲ କାଉନ୍ସିଲଙ୍କ ପରାମର୍ଶ ଦିଆଯାଇ ଲେଖାଯାଇଛି ଯେ, ପ୍ରବେଶିକା ପରୀକ୍ଷାର ପ୍ରଶ୍ନପତ୍ର ଏବଂ ସଂରକ୍ଷଣ ବ୍ୟବସ୍ଥା ସଂପର୍କରେ ପ୍ରତ୍ୟେକ ରାଜ୍ୟକୁ ବହୁଆଗରୁ ଜଣାଇଦେବା ଉଚିତ୍ ।
ଓଡ଼ିଶା କ୍ଷେତ୍ରରେ ଉଦ୍ଧିଷ୍ଟ ସିଟ୍ ସଂଖ୍ୟା ହେଉଛି ମୋଟ ସିଟ୍ ସଂଖ୍ୟାର ୮୫ପ୍ରତିଶତ । ବାକି ୧୫ପ୍ରତିଶତରେ ଅନ୍ୟ ରାଜ୍ୟର ଯୁବକ ଯୁବତୀଙ୍କୁ ଦିଆଯିବାରେ କିଛି ଅସୁବିଧା ତଥା ଅଭିଯୋଗ ରହିବ ନାହିଁ ।
ସାମଗ୍ରିକ ଭାବେ କହିବାକୁ ଗଲେ ସର୍ବଭାରତୀୟ ପରୀକ୍ଷା ହେଲେ ବି ଓଡ଼ିଶାର ଯୁବକ ଯୁବତୀମାନଙ୍କ ପାଇଁ ରାଜ୍ୟର ୮୫ପ୍ରତିଶତ ସିଟ୍ ସଂରକ୍ଷିତ ରହୁ ଏବଂ ବାକି ୧୫ ପ୍ରତିଶତରେ ଅନ୍ୟାନ୍ୟ ରାଜ୍ୟ ତଥା ଦେଶର ପିଲାମାନେ ନାମ ଲେଖାଇ ପାରନ୍ତି ବୋଲି ଦର୍ଶାଯାଇଛି ।
ଓଡିଶା ଡଟ୍ କମ୍
