ପୁଞ୍ଜିବାଦୀ ଶାସକଶ୍ରେଣୀ ୪ଦଶନ୍ଧି ଧରି ବିଶ୍ୱବ୍ୟାପୀ ଯେଉଁ ଆକ୍ରମଣ ଚଳାଇ ଆସିଛନ୍ତି ତାହାର ଚାପରେ ଶ୍ରମିକଶ୍ରେଣୀ ନିଜର ଲଢ଼ୁଆ ଅତୀତକୁ ଚାପିଦେଇ ଚାଲିଛନ୍ତି । ନହେଲେ ଶ୍ରମିକଶ୍ରେଣୀ କେମିତି ମେ ଦିବସର ଜନ୍ମର ପୃଷ୍ଠଭୂମିଟିକୁ ଭୁଲି ଯାଆନ୍ତେ?

ଏହା ବି ହୋଇପାରେ ଯେ ଏହିସବୁ ସଂଘର୍ଷପୂର୍ଣ୍ଣ ବର୍ଷଗୁଡ଼ିକରେ ସେହି ଇତିହାସଟିକୁ ଶ୍ରମିକ ଆନ୍ଦୋଳନମାନଙ୍କରେ କୁହାଯାଇ ନାହିଁ । ନିଜର ଉଗ୍ର ଅତୀତକୁ ଶ୍ରମିକମାନେ ଚପାଇ ରଖିବା ଏଭଳି ଏକ ସମୟରେ ଚାଲିଛି ଯେତେବେଳେ କି ତଳସ୍ତରରୁ ଆରମ୍ଭ ହୋଇଥିବା ଶ୍ରମିକଶ୍ରେଣୀର ପ୍ରତିରୋଧର ସଂସ୍କୃତିଟିକୁ ପୁଣିଥରେ ଜୀବନ୍ୟାସ ଦେବାର ଆବଶ୍ୟକତା ବେଶୀ ଅନୁଭୂତ ହେଉଛି ।

ଊନବିଂଶ ଶତାବ୍ଦୀର ଶେଷଭାଗରେ ବି ‘ଯେଉଁ କଥାଟି ନିଯୁକ୍ତି ପାଇବାରୁ ଅଧିକ ଖରାପ ମଣା ଯାଉଥିଲା, ତାହା ଥିଲା ନିଯୁକ୍ତି ନପାଇବା ।’ ଏବଂ ପୁଞ୍ଜି ପାଇଁ ଆଜି ଯେମିତି ଅଛି ଆଗରୁ ସେଭଳି ହିଁ ଥିଲା -ଶ୍ରମ କେବଳ ମାତ୍ର ଉତ୍ପାଦନର ଏକ ମୂଲ୍ୟ । କିନ୍ତୁ ଶ୍ରମିକମାନେ ସାହସ ବାନ୍ଧି ନିଜ ଅଧିକାର ପାଇଁ ଲଢ଼େଇ କଲେ । ସେ ଭିତରେ ଥିଲା ୮ଘଂଟିଆ କାର୍ଯ୍ୟ ଦିବସ ।

ମେ ୧, ୧୮୮୬, ପ୍ରଥମ ମେ ଦିବସ ଦିନ ଉତ୍ତର ଆମେରିକାର ହଜାର ହଜାର ଶ୍ରମିକ ସଙ୍ଗଠିତ ହୋଇ ଧର୍ମଘଟ କଲେ ଆଠଘଣ୍ଟିଆ କାର୍ଯ୍ୟ ଦିବସ ପାଇଁ । ସେତେବେଳେ ଚିକାଗୋ ସହର ଶ୍ରମିକ ଶ୍ରେଣୀ ସଙ୍ଗଠନମାନଙ୍କ ପେଣ୍ଠସ୍ଥଳୀ ଥିଲା, ଶ୍ରମିକ ଆନ୍ଦୋଳନରେ ବାମପନ୍ଥୀମାନଙ୍କର କେନ୍ଦ୍ର, ଯାହାର ଆଗରେ ଥିଲେ ଅନ୍ତଃରାଷ୍ଟ୍ରୀୟ ଶ୍ରମିକ ସଂଘ ବା ୱାର୍କିଂ ପିପୁଲସ୍ ଆସୋସିଏସନ୍ ।

ଯେମିତି ଆଶା କରାଯାଉଥିଲା ଶ୍ରମିକ ଆନ୍ଦୋଳନକୁ ପୁଞ୍ଜିପତି ଶ୍ରେଣୀର ସଙ୍ଗଠିତ ବିରୋଧର ସାମ୍ନା କରିବାକୁ ପଡ଼ିଲା । ଏହି ପୁଞ୍ଜିପତି ଶ୍ରେଣୀ ପଛରେ ଥିଲେ ବ୍ୟବସାୟିକ ଗଣମାଧ୍ୟମ ଏବଂ ନିଷ୍ଠୁରତା ପାଇଁ ପରିଚିତ ପୋଲିସ ।

ମେ ୧, ୧୮୮୬ରେ ଚିକାଗୋର ହେ’ ମାର୍କେଟ ଛକରେ ବୋମା ବିସ୍ଫୋରଣ କରିଛନ୍ତି କହି ୪ଜଣ ଶ୍ରମିକଙ୍କୁ ମିଛ ମକଦ୍ଦମାରେ ଫସାଇ ଦିଆଗଲା, ଅନ୍ୟାୟ କରି ଦୋଷୀ ସାବ୍ୟସ୍ତ କରାଗଲା ଏବଂ ମୃତ୍ୟୁଦଣ୍ଡ ଦିଆଗଲା ।

ସେମାନଙ୍କ ଭିତରେ ଥିଲେ ଅରାଜକତାବାଦୀ ଅଗଷ୍ଟ ସ୍ପାଇ ଏବଂ ଆଲବଟ୍ ପାରସନ୍ସ, ଯେଉଁମାନଙ୍କର ‘ଏକମାତ୍ର’ ଅପରାଧ ହେଲା ଯେ ସେମାନେ ଉଗ୍ର ଶ୍ରମିକ ଯୋଦ୍ଧା ଥିଲେ ଯେଉଁମାନେ ଆଠଘଂଟିଆ କାର୍ଯ୍ୟଦିବସ ସମେତ ଶ୍ରମିକମାନଙ୍କ ଅଧିକାର ପାଇଁ ନିରବଚ୍ଛିନ୍ନ ଭାବେ ସଂଘର୍ଷ କରିଆସିଥିଲେ ।

ଯଦିଓ ଆଠଘଂଟିଆ କାର୍ଯ୍ୟଦିବସ ଅନେକ ରାଜ୍ୟର କାନୁନ୍ରେ ଥିଲା ପୁଞ୍ଜିପତିମାନେ ତାକୁ କାର୍ଯ୍ୟକାରୀ କରିବା ପାଇଁ ବିରୋଧ କରୁଥିଲେ ଏବଂ ଆଇନ ରକ୍ଷକ ଓ ବିଚାରକମାନେ ଆଇନ ଉଲ୍ଲଂଘନ କଥାଟିକୁ ଅଣଦେଖା କରିଆସିଥିଲେ ।ଶ୍ରମିକମାନଙ୍କ ପାଖରେ ମେ ୧ରୁ ଧର୍ମଘଟ ଆରମ୍ଭ କରିବା ବ୍ୟତିରେକ ଅନ୍ୟ କିଛି ବିକଳ୍ପ ନଥିଲା ।

ବିଚାରବେଳେ ସରକାରୀ ଓକିଲ କହିଲେ, ‘ଆଇନର ପରୀକ୍ଷା ଚାଲିଛି, ଅରାଜକତାର ପରୀକ୍ଷା ଚାଲିଛି ଏହି ଲୋକମାନଙ୍କୁ ଦୋଷୀ ସାବ୍ୟସ୍ତ କରନ୍ତୁ, ସେମାନେ ଉଦାହରଣ ହେଇ ରୁହନ୍ତୁ, ସେମାନଙ୍କୁ ଫାଶୀରେ ଚଢ଼ାଯାଉ ଏବଂ ଆପଣ ଆମର ଅନୁଷ୍ଠାନଗୁଡ଼ିକୁ, ଆମ ସମାଜକୁ ବଂଚାନ୍ତୁ ।

’ କିନ୍ତୁ ସ୍ପାଇଙ୍କର ମୃତ୍ୟୁଦଣ୍ଡ କାର୍ଯ୍ୟକାରୀ କରିବା ପୂର୍ବରୁ ସେ ତାଗିଦ କରି କହିଥିଲେ, ‘ତମେ ଯଦି ଭାବୁଛ ଆମକୁ ଫାଶୀଦେଇ ତମେ ଶ୍ରମିକ ଆନ୍ଦୋଳନର ସମାପ୍ତି କରିବ, ଯେଉଁ ଆନ୍ଦୋଳନ ଅଭାବ ଏବଂ ଦୁର୍ଦ୍ଦଶାରୁ ମୁକ୍ତି ଦେବ ବୋଲି ଲକ୍ଷ ଲକ୍ଷ ନିଷ୍ପେଷିତ ଲୋକେ ଆଶା ବାନ୍ଧି ଅପେକ୍ଷା କରିଛନ୍ତି… ଯଦି ଏହା ହେଉଛି ତୁମର ମତ ତେବେ ଆମକୁ ଫାଶୀ ଦିଅ । ତୁମେ ଏଠି ଅଗ୍ନିଶିଖାଟିଏ ଲଗାଇ ଦେବ, କିନ୍ତୁ ଏଇଠି ଓ ସେଇଠି, ତୁମ ପଛରେ ଏବଂ ଆଗରେ ଏବଂ ସବୁଠି, ସେହି ଅଗ୍ନି ପ୍ରଜ୍ୱଳିତ ହେବ ।

ଏଇଟା ଗୋଟିଏ ଭୂମିଗତ ନିଅାଁ, ତୁମେ ତାକୁ ନିର୍ବାପିତ କରିପାରିବ ନାହିଁ । ସେତେବେଳେ ଚିକାଗୋ ଶ୍ରମିକ ଶ୍ରେଣୀର ପ୍ରତିଭାବାନ ନେତୃତ୍ୱ ଥିଲେ । ସ୍ପାଇଙ୍କ ଦ୍ୱାରା ସମ୍ପାଦିତ ଜର୍ମାନୀ ଦୈନିକ ଆରବେଇଟିର – ଜିତୁଙ୍ଗ ଭଳି ସକ୍ରିୟ ବାମପନ୍ଥୀ ପ୍ରେସ୍ ମଧ୍ୟ ଥିଲା । ଟଙ୍କା ଥଳି ଧରି ବୁଲୁଥିବା ଲୋକେ ଶ୍ରମିକମାନଙ୍କୁ ଏକ ‘ଭୟଙ୍କର ଶ୍ରେଣୀ’ ବୋଲି ସମ୍ବୋଧନ କରୁଥିଲେ ।

ଦୁଃଖର କଥା ଆଜି ଆମେରିକାର ଶ୍ରମିକମାନେ ଅଧିକାଂଶରେ ଏକ ଅଣସଙ୍ଗଠିତ ଶ୍ରେଣୀ । ସତରେ ରଷ୍ଟ୍ବେଲେଟ୍ ପ୍ରଦେଶ (ଅର୍ଥନୈତିକ ଅବକ୍ଷୟ, ଜନସଂଖ୍ୟା ହ୍ରାସ, ସହର ବିଲୟ ଶିଳ୍ପର ପତନ ଯୋଗୁଁ) ହିସାବରେ ପରିଚିତ, ଆଇୱା, ମିଚିଗାନ୍, ଓହିଓ, ପେନ୍ସିଲଭାନିଆ ଏବଂ ୱିସ୍କନସିନ୍ ରାଷ୍ଟ୍ରପତି ଡୋନାଲଡ଼୍ ଟ୍ରମ୍ପଙ୍କୁ ଜିତେଇବାରେ ସହାୟକ ହେଇଥିଲେ ବୋଲି କୁହାଯାଉଛି ।

ଏହି ଟ୍ରମ୍ପ ବର୍ଣ୍ଣବାଦୀ, ବିଦେଶୀମାନଙ୍କ ପ୍ରତି ବିଦ୍ୱେଷ, ଜାତୀୟତାବାଦୀ, ଆମେରିକୀୟ ହିତର ସୁରକ୍ଷାବାଦୀର ଚର୍ଚ୍ଚା ପାଇଁ ପରିଚିତ ଓ ‘ପୁଣିଥରେ ଆମେରିକାକୁ ମହାନ କରିବା’ ଆହ୍ୱାନ ଦେଇ ନିର୍ବାଚନ ଜିତିଥିଲେ । ଟ୍ରମ୍ପଙ୍କ ଅଭ୍ୟୁଦୟ ସହ ତାଳ ଦେଇ ଅନ୍ୟତ୍ର ମଧ୍ୟ ସମାନ ଶକ୍ତିମାନଙ୍କର ଉତ୍ଥାନ ଘଟିଛି; ଫ୍ରାନ୍ସରେ ନ୍ୟାସନାଲ ଫ୍ରଂଟ୍, ବ୍ରେକ୍ଜିଟ୍ ଅଭିଯାନର ନେତୃତ୍ୱ ନେଉଥିବା ଇଂଲଣ୍ଡର ଇଣ୍ଡିପେଣ୍ଡେନ୍ସ ପାର୍ଟି, ଇଟାଲୀର ଫାଇଭ୍ଷ୍ଟାର୍ ଆନ୍ଦୋଳନ ଏବଂ ଜର୍ମାଟ୍ର ପେଡ଼ିଗା ।

ତା ସହିତ ଅଛି ଜର୍ମାନୀରେ ଶରଣାର୍ଥୀ ବିରୋଧୀ ଅଭିଯାନ ଚଳାଇଥିବା ଅଲଟର୍ନେଟିଭ୍ ଫର୍ ଜର୍ମାନୀ । ଭାରତରେ ନରେନ୍ଦ୍ର ମୋଦୀଙ୍କ ‘ଭାରତରେ ପ୍ରସ୍ତୁତ’ ବା ‘ମେକ୍ ଇନ୍ ଇଣ୍ଡିଆ’ ଅଭିଯାନର ସଫଳତା ଯେଉଁ କଥାଟି ଉପରେ ଆଧାରିତ ତାହା ହେଉଛି ସ୍ଥାୟୀ ଶ୍ରମିକମାନେ ଏକା କାମ ପାଇଁ ଯେଉଁ ପାରିଶ୍ରମିକ ପାଆନ୍ତି ତାହାର ୫ଭାଗରୁ ମାତ୍ର ୧ରୁ ୩ଭାଗ ପାଉଣାରେ ଠିକା ବା ଅସ୍ଥାୟୀ ଶ୍ରମିକ ନିଯୁକ୍ତ କରିବା, ଯେଉଁମାନଙ୍କର ନିଯୁକ୍ତିର କୌଣସି ନିରାପତା ବା ସୁରକ୍ଷା ନଥିବ ଏବଂ ପୁଣି ସେମାନଙ୍କର ସ୍ୱାଧୀନ ଶ୍ରମିକ ସଂଘ କାମ କରିବା ପାଇଁ ସୁଯୋଗ ଦିଆଯିବ; ମାଲିକମାନଙ୍କ କାଠ ପିତୁଳି ଯଦି ସାଜନ୍ତି ।

ପୋଲିସ ଅଧିକାରୀମାନେ କମ୍ପାନୀ ଅଧିକାରୀଙ୍କ ସହ ହାତ ମିଳାଇ କାମ କରନ୍ତି ଯାହାର ନମୂନା ହରିୟାନାର ମାନେଶ୍ୱର ଠାରେ ଥିବା ମାରୁତି-ସୁଜୁକି କାରଖାନାରେ ଦେଖିବାକୁ ମିଳିଥିଲା ।

ଭାରତର ଶ୍ରମ ଆଇନରେ ଥିବା ଶ୍ରମିକମାନଙ୍କ ଅଧିକାର ପାଇବା ପାଇଁ ଯେତେବେଳେ ଶ୍ରମିକମାନେ ଦାବୀ କରନ୍ତି, ଏମାନେ ଏମିତି ହାତ ମିଳାଇ ସେମାନଙ୍କୁ କଠୋର ଭାବେ ଦମନ କରନ୍ତି ।

ଜଣେ ନିଯୁକ୍ତିଦାତା ହିସାବରେ ସରକାର ନିଜେ ସ୍ୱୀକାର କରିବା ପାଇଁ ପ୍ରସ୍ତୁତ ନୁହନ୍ତି ୧୦ଲକ୍ଷରୁ ଅଧିକ ଲୋକ ନିୟମିତ ଶ୍ରମିକ ଭାବେ ସାମ୍ନାରେ ରହି ଅତ୍ୟାବଶ୍ୟକୀୟ ସେବା ଯୋଗାଇ ଆସୁଛନ୍ତି ।

ଅଙ୍ଗନୱାଡ଼ି କର୍ମୀ, ସର୍ବଶିକ୍ଷା ଅଭିଯାନର ପାରା ଶିକ୍ଷକ ଏବଂ ସ୍ୱୀକୃତିପ୍ରାପ୍ତ ସାମାଜିକ ସ୍ୱାସ୍ଥ୍ୟକର୍ମୀ ଯେଉଁମାନେ ଜାତୀୟ ଗ୍ରାମୀଣ ସ୍ୱାସ୍ଥ୍ୟ ମିଶନରେ କାମ କରନ୍ତି କାହାର ବି କର୍ମଚାରୀର ଅଧିକାର ନାହିଁ ।

ଦୁଃଖର କଥା ଯେ ନୌରାଶ୍ୟଜନକ ଭାବେ ବିଭାଜିତ ଆମ ଶ୍ରମିକ ସଙ୍ଗଠନମାନେ ସମୟର ଆହ୍ୱାନ ସତ୍ୱେ ଏକାଠି ହୋଇପାରୁ ନାହାନ୍ତି, ଯଦ୍ୱାରା ଶ୍ରମିକ ଶ୍ରେଣୀର ପୁନଃରୁତ୍ଥାନ ହୋଇ ସାମୟିକ ନିଯୁକ୍ତି ଓ ଠିକା ନିଯୁକ୍ତି, କମ୍ ମଜୁରୀ, ଦର୍ଘ ସମୟ ଧରି ଶ୍ରମ ଦେବାର ଅବଧି ଏବଂ କାର୍ଯ୍ୟସ୍ଥଳୀଗୁଡ଼ିକରେ ଝାଳନାଳ ହୋଇ କାମ କରିବାର ଅବସ୍ଥା ବିରୁଦ୍ଧରେ ସଙ୍ଗଠିତ ଆନ୍ଦୋଳନ ହୋଇପାରନ୍ତା ।

ଏମିତିକି ଅଧିକାଂଶ ଶ୍ରମିକ ସଙ୍ଗଠନ ପାଇଁ ଅତୀତର ସଂଘର୍ଷଗୁଡ଼ିକୁ ଶ୍ରଦ୍ଧାଞ୍ଜଳି ଦେବାପାଇଁ ମେ ଦିବସଟି ଗୋଟିଏ ଦିବସ ହିସାବରେ ବିଚାର କରାଯାଏନି, ଭବିଷ୍ୟତରେ ପୁଞ୍ଜିବାଦ ବିରୁଦ୍ଧରେ ଲଢ଼େଇ ପାଇଁ ଏକ ସଙ୍କେତ ହିସାବରେ ମାନିବା ତ ଦୂରର କଥା! ହୁଏତ ଆମେ ୧୮୮୦ ଦଶକରେ ଚିକାଗୋ ସହରରେ ୮ଘଂଟିଆ କାର୍ଯ୍ୟଦିବସ ପାଇଁ ଆହ୍ୱାନ ଦେଇ ଯେଉଁ ଗୀତ ଶ୍ରମିକମାନେ ଗାଇ ଚାଲିଥିଲେ ତାକୁ ମନେ ପକାଇଦେବା ଦରକାର । ଗୀତର ଧାଡ଼ିଗୁଡ଼ିକ ଏମିତି କିଛି ଥିଲା :-

ଆମେ ସୂର୍ଯ୍ୟର ଉଷ୍ମତାକୁ ଅନୁଭବ କରିବା ପାଇଁ ଚାହୁଁ,

ଆମେ ଚାହୁଁ ଫୁଲର ସୁରଭିକୁ ଆଘ୍ରାଣ କରିବାକୁ;

ଆମେ ନିଶ୍ଚିତ ଈଶ୍ୱରଙ୍କ ଏହା ହିଁ ଇଚ୍ଛା,

ଏବଂ ସେଥିପାଇଁ ଆମେ ଚାହୁଁ ଆଠଟି ଘଂଟା,

ଡାକରା ଦେଇଛୁ ଆସିବେ ଆମ ସେନା,

ଅଛନ୍ତି ଯେଉଁମାନେ ପୋତ ପ୍ରାଙ୍ଗଣରେ,

ଦୋକାନ ଓ କାରଖାନାରେ,

ଶ୍ରମ ପାଇଁ ଆଠ ଘଂଟା, ବିଶ୍ରାମ ପାଇଁ ଆଠ ଘଂଟା,

ଏବଂ ବାକି ଆଠ ଘଂଟା

ଆମେ ବିତାଇବୁ ଆମରି ଇଚ୍ଛାରେ ।

 

April 29, 2017 vol L II no 17 Remembering May Day

ଅଶୋକ ସାହୁ

ପ୍ରଶାସନରେ ବିଭିନ୍ନ ପଦପଦବୀ ବିଭିନ୍ନ କାନୁନ୍ ଅନୁଯାୟୀ ରହିଛି । ଉକ୍ତ ପଦପଦବୀରେ ଉପଯୁକ୍ତ ବ୍ୟକ୍ତିଙ୍କୁ ନିଯୁକ୍ତି କରିବାପାଇଁ କାନୁନି ବ୍ୟବସ୍ଥା ରହିଛି, ଯାହା ପଦୋନ୍ନତି ମାଧ୍ୟମରେ ମଧ୍ୟ ସାଧିତ ହୋଇଥାଏ ।

ସେହି ଉଦ୍ଧେଶ୍ୟରେ ନିର୍ଦ୍ଧାରିତ ଯୋଗ୍ୟତା ଅନୁଯାୟୀ ସମ୍ପୃକ୍ତ ବିଭାଗର ସରକାରୀ ଚାକିରୀ କରୁଥିବା ବ୍ୟକ୍ତିମାନଙ୍କ ମଧ୍ୟରୁ ଯୋଗ୍ୟ ବ୍ୟକ୍ତିଙ୍କ ଏକ ତାଲିକା ପ୍ରସ୍ତୁତ କରାଯାଏ, ଯାହା ମଧ୍ୟରୁ ଚୟନ ପ୍ରକ୍ରିୟା ମାଧ୍ୟମରେ ଶୂନ୍ୟ ପଦବୀରେ ନିଯୁକ୍ତି ମିଳିଥାଏ ।

ଆବଶ୍ୟକତା ଅନୁଯାୟୀ ପ୍ରଶାସନିକ ପଦପଦବୀରେ ନିଯୁକ୍ତି ପଦୋନ୍ନତି ମାଧ୍ୟମରେ ସମାହିତ କରିବାପାଇଁ ବିଭିନ୍ନ ସମୟରେ ନିର୍ଦ୍ଧେଶନାମା ଏବଂ ନିୟମାବଳୀ ପ୍ରସ୍ତୁତ ହୋଇଥାଏ ଯାହାକୁ ଅକ୍ଷରେ ଅକ୍ଷରେ ପାଳନ କରିବାର ବିଧି ଏବଂ ନଜିର ରହିଛି ।

ଏଥିରେ କିଛି  ବିଭ୍ରାଟ ହେଲେ ଅନ୍ୟାୟ ଏବଂ ଅବ୍ୟବସ୍ଥାର ଶୀକାର ହୋଇଥିବା ସରକାରୀ କର୍ମଚାରୀ ନ୍ୟାୟାଳୟର ଆଶ୍ରୟ ନେଇ ପାରନ୍ତି ।

କିଛିଦିନତଳେ ଓଡ଼ିଶାର ପୋଲିସ ମହା ନିର୍ଦ୍ଦେଶକଙ୍କ ନିଯୁକ୍ତିକୁ କେନ୍ଦ୍ରକରି ଗଣମାଧ୍ୟମରେ ଭିନ୍ନ ଭିନ୍ନ ମତ ଦେଖିବାକୁ ମିଳିଥିଲା ।

ସଦ୍ୟ ନିଯୁକ୍ତିପ୍ରାପ୍ତ ମହାନିର୍ଦ୍ଦେଶକ ପୂର୍ବରୁ ଭଜିଲାନସ ଡିଜି ଥିବା ସମୟରେ ପୂର୍ବତନ ଡିଜି ଶ୍ରୀ ପ୍ରକାଶ ମିଶ୍ରଙ୍କ ବିରୁଦ୍ଧରେ ରୁଜୁ ହୋଇଥିବା ଏକ ବିବାଦୀୟ ମାମଲାର ନିଷ୍ପତ୍ତି କରି ମାନ୍ୟବର ଓଡ଼ିଶା ଉଚ୍ଚ ନ୍ୟାୟାଳୟ ତତ୍କାଳୀନ ଭିଜିଲାନସ ଡିଜିଙ୍କ କାଯ୍ୟର୍କଳାପ ଉପରେ ତିର୍ଯ୍ୟକ୍ ମନ୍ତବ୍ୟ ଦେଇ ଏକ ପ୍ରକାର ଭର୍ସ୍ତନା କରିଥିଲେ ।

ତଥାପି କିପରି ମାନ୍ୟବର ମୁଖ୍ୟମନ୍ତ୍ରୀ ଏ ଭଳି ଏକ ବ୍ୟକ୍ତିଙ୍କୁ ପୋଲିସ ବିଭାଗର ମୁଖ୍ୟଭାବେ ନିଯୁକ୍ତି ଦେଲେ ତାକୁ କେହି କେହି ପ୍ରଶ୍ନ କରିଛନ୍ତି ।

ଉଚ୍ଚ ନ୍ୟାୟାଳୟ କୌଣସି ସରକାରୀ କର୍ମଚାରୀଙ୍କ ଦାୟିତ୍ଵ ସମ୍ପାଦନ କ୍ଷେତ୍ରରେ ଚେଷ୍ଟାକୃତ ଭାବେ ମନ୍ଦ ଉଦ୍ଧେଶ୍ୟ ରଖି କାର୍ଯ୍ୟ କରିଥିବା କାରଣରୁ ଯଦି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଥାଆନ୍ତି ତେବେ ସରକାର ତାହା ଅନୁରୂପ କାର୍ଯ୍ୟାନୁଷ୍ଠାନ କରିବାକୁ ବାଧ୍ୟ ।

କିନ୍ତୁ ଉପରୋକ୍ତ ମାମଲାରେ ସେମିତି କୌଣସି ନିର୍ଦ୍ଦେଶ ନଥିବା କାରଣରୁ ଶ୍ରୀ କେବି ସିଂହଙ୍କ ନିଯୁକ୍ତି କ୍ଷେତ୍ରରେ କୌଣସି ତୃଟି ହୋଇନାହିଁ ।

 

(ଅଶୋକ ସାହୁ ଜଣେ ପୂର୍ବତନ ଭାରତୀୟ ପୁଲିସ ସେବା ଅଧିକାରୀ)

ଓଡ଼ିଶା ଡ଼ଟ୍ କମରେ ପ୍ରକାଶିତ ଏହି ଲେଖା ଲେଖକଙ୍କ ନିଜସ୍ୱ ମତ । ଏହା ଓଡ଼ିଶା ଡ଼ଟ୍ କମର ମତାମତ ନୁହେଁ ।

ଓଡିଶା ଡଟ୍ କମ ଘୋଷଣାନାମା

କେଦାର ମିଶ୍ର

ଏହି ସପ୍ତାହରେ ରାଜଧାନୀ ଭୁବନେଶ୍ୱରରେ ଏକ ଘଟଣା ଘଟିଲା । ରାଜଧାନୀର ଏକ ବସ୍ତିରେ ସାଧାରଣ ଲୋକେ ପୋଲିସ୍‍କୁ ଗୋଡ଼େଇ ଗୋଡ଼େଇ ପିଟିଲେ । ସାମ୍ବାଦିକଙ୍କ କ୍ୟାମେରା ଆଗରେ ସ୍ତ୍ରୀ, ପୁରୁଷ ମିଶି ଜଣେ ଥାନା ଅଧିକାରୀଙ୍କୁ ମାଡ଼ ଦେଉଥିବାର ଦୃଶ୍ୟ ଆମେ ଦେଖିବାକୁ ପାଇଲେ । ଅବଶ୍ୟ ଦୃଶ୍ୟଟି ନୂଆ ନୁହେଁ ।

ରାଜଧାନୀ ଭୁବନେଶ୍ୱରରେ ଆଗରୁ ମଧ୍ୟ ଏପ୍ରକାର ଦୃଶ୍ୟ ଦେଖିବାକୁ ମିଳିଛି । କିଛି ବର୍ଷ ଆଗରୁ ଆଉ ଜଣେ ଥାନାଅଧିକାରୀଙ୍କୁ ରାଜଧାନୀବାସୀ ଗୋଡ଼େଇ ଗୋଡ଼େଇ ମାଡ଼ ଦେଇଥିଲେ । ତେବେ ଶେଷଘଟଣାଟି ଟିକିଏ ଅଲଗା ।

ଏଥିରେ ପୋଲିସ୍‍ ସହ ବସ୍ତି ଜୀବନର ଆଉ ଏକ ପକ୍ଷ ମଧ୍ୟ ଉନ୍ମୋଚିତ ହୋଇଛି । ହଠାତ୍‍ ଓଡ଼ିଆ ସମ୍ବାଦପତ୍ରରେ ଆମେ ଜଣେ  ମହିଳାଙ୍କ ଫଟୋ ଦେଖିଲୁ, ଯାହାଙ୍କୁ କୁହାଗଲା ସେ ଜଣେ ଲେଡି ଡନ୍‍ । ସିନେମା ଶୈଳୀରେ ଖଳନାୟିକାର ଚିତ୍ର ଭଳି ତାଙ୍କର ଚିତ୍କାର କରୁଥିବା ଫଟୋଟି ଖବରକାଗଜରେ ଛପା ହେଲା ।

ଶୈଳ ରଣସିଂହ ନାମକ ଏହି ଭଦ୍ରମହିଳା ଜଣକ ପୋଲିସ ବିରୋଧରେ ଲୋକଙ୍କୁ ମତାଇଥିଲେ ଓ ବସ୍ତିରେ ଆତଙ୍କରାଜ ଚଳାଇଥିଲେ ବୋଲି ଖବରକାଗଜରେ ରିପୋର୍ଟ ପ୍ରକାଶ ପାଇଲା ।

ତାଙ୍କୁ ଲେଡି ଡନ୍‍ ବୋଲି କହିବା ବେଳେ ଆମେ ଚିନ୍ତା କଲୁ ଯେ, ଏହାଙ୍କ ବିଷୟରେ ଆଗରୁ ଖବରକାଗଜରେ କୋଉଠି କିଛି ବାହାରିଥିଲା କି ?

ଯେଉଁ ଟେଲିଭିଜନ ସାମ୍ବାଦିକମାନେ ଶୈଳ ରଣସିଂହଙ୍କ କାର୍ଯ୍ୟଶୈଳୀକୁ ସିନେମାର ଲେଡି ଡନ୍‍ ଭଳି କହୁଛନ୍ତି, ସେମାନେ କେବେ ତାଙ୍କ ବିଷୟରେ ବା ତାଙ୍କର ଅପରାଧ ସମ୍ପର୍କରେ କୌଣସି ରିପୋର୍ଟ ପ୍ରକାଶ କରିଥିଲେ କି !

ଗତ ୧୫ ବର୍ଷ ଧରି ଶୈଳ ରଣସିଂହଙ୍କ ନାଁ ଗଣମାଧ୍ୟମରେ ଅନ୍ତତଃ ମୁଁ ଶୁଣିନଥିଲି ।  ହଠାତ୍‍ ଏବେ ତାଙ୍କୁ ଏତେବଡ଼ ଖଳନାୟିକା ବୋଲି କହିବାର ମାନେ କ’ଣ ?

ପୁଲିସ କହୁଛି ପ୍ରତିବାଦ, ବିକ୍ଷୋଭ ଛଡା ତାଙ୍କ ବିରୁଦ୍ଧରେ ସେମିତି କିଛି ଗୁରୁତର ଅପରାଧିକ ମାମଲା ପୂର୍ବରୁ ପଞ୍ଜୀକୃତ ହୋଇନାହିଁ  ।

ହୁଏତ ବସ୍ତିରେ ରହୁଥିବା ଜଣେ ମୁଖରା ଓ କେବେ କେମିତି ହିଂସ୍ର ହୋଇ ଉଠୁଥିବା ଜଣେ ସାଧାରଣ ମହିଳାଙ୍କୁ ଏତେବଡ଼ ଖଳନାୟିକା ବୋଲି ଚିତ୍ରିତ କରିବା ପଛରେ ଗଣମାଧ୍ୟମର ଉଦ୍ଦେଶ୍ୟ କ’ଣ?

ଗୋଟିଏ ଛୋଟ ଘଟଣା ଏତେ ବଡ଼ ଖଳନାୟିକାକୁ ଜନ୍ମ ଦେଇପାରେ – ଏହା ହେଉଛି ଆମ ଗଣମାଧ୍ୟମର ଚାଲାକି । ଆମେ ଜଣେ ସାଧାରଣ ଗଣ୍ଡଗୋଳକାରିଣୀଙ୍କୁ କଙ୍ଗାରୁ କୋର୍ଟ ଚଲାଉଥିବା ନକ୍ସଲ ବୋଲି କହିପାରୁ । ଏହାହିଁ ଆମ ସମୟର ବିଡମ୍ବନା ।

ଏକଥା ସତ ଯେ, ଯେଉଁମାନେ ପୋଲିସ୍‍ ଉପରେ ଆକ୍ରମଣ କଲେ, ସେମାନେ ଆଇନ୍‍କୁ ହାତକୁ ନେଇଛନ୍ତି ଓ ଏହାର ଦଣ୍ଡ ତାଙ୍କୁ ମିଳିବା ଦରକାର । ତା’ର ଅର୍ଥ ନୁହଁ ଯେ ପୋଲିସ୍‍ ସମ୍ପୂର୍ଣ୍ଣ ଭାବରେ ନିର୍ଦୋଷ ।

ଅପରାଧୀମାନଙ୍କୁ ଘଣ୍ଟ ଘୋଡ଼ାଇବାକୁ ଯାଇ ଗରିବ ଓ ବସ୍ତିବାସିନ୍ଦାଙ୍କ ପ୍ରତି ପୋଲିସ୍‍ ଯେଉଁ ପ୍ରକାର ବ୍ୟବହାର କରେ, ତାହା କଦାପି କ୍ଷମାଯୋଗ୍ୟ ନୁହେଁ । ପୋଲିସ୍‍ ଉପରେ ଲୋକେ ସେତେବେଳେ ଆକ୍ରମଣ କରନ୍ତି, ଯେତେବେଳେ ପୋଲିସ୍‍ର ନିର୍ଯ୍ୟାତନା ଅସହ୍ୟ ହୋଇ ଉଠେ ।

ଏହି କ୍ଷେତ୍ରରେ ମଧ୍ୟ ତାହା ଘଟିଛି । ପୋଲିସ୍‍ ଉପରେ ନିରୀହ ବସ୍ତି ବାସିନ୍ଦା ଆକ୍ରମଣ କରିବା ପଛରେ କିଛି ଗୋଟେ ଅସହ୍ୟ କାରଣ ରହିଛି, ଯାହାକୁ ଗଣମାଧ୍ୟମ ପୋଲିସ୍‍ର ପ୍ରରୋଚନାରେ ଲୁଚାଇବାକୁ ଚାହୁଁଛି । ଶୈଳ ରଣସିଂହଙ୍କୁ ଏହି ସମଗ୍ର ଘଟଣାରେ ଦୋଷୀ ବୋଲି ହୁଏତ କୁହାଯାଇପାରେ, କିନ୍ତୁ ତାଙ୍କୁ ଲେଡି ଡନ୍‍ ଓ କଙ୍ଗାରୁ କୋର୍ଟର ବିଚାରପତି ବୋଲି କହିବା ଅତିଶୟୋକ୍ତି ମାତ୍ର ।

ବୋଧହୁଏ ଗଣମାଧ୍ୟମ ପାଇଁ ଏକ ଯାତ୍ରା ନାୟିକା ଦରକାର । ସେଥିପାଇଁ ଶୈଳ ରଣସିଂହ ଜଣେ ସହଜ ଶିକାର । ତାଙ୍କୁ ଲେଡି ଡନ୍‍ ସଜାଇ ଆମେ ଖବରର ଏକ ତଟକା ବଜାର ସୃଷ୍ଟି କରିଛୁ । ଯେଉଁ ବଜାରରେ ପୋଲିସ୍‍ର କଳାକାରନାମା ଲୁଚି ଯାଉଛି ।

ଏକଥା କହିଲାବେଳେ ଆମେ ଭୁଲିଯିବା ଉଚିତ୍‍ ନୁହେଁ ଯେ ସମାନ୍ତରାଳରେ ପୋଲିସ୍‍ ବର୍ବରତାର ଆଉ ଏକ ଉଦାହରଣ ମଧ୍ୟ ଆମେ ଦେଖୁଛୁ । ଜୁନ୍‍ ୮ ତାରିଖ ଦିନ ଗଞ୍ଜାମ ଜିଲ୍ଲା ଜଗନ୍ନାଥ ପ୍ରସାଦ ପୋଲିସ୍‍ ଥାନାରେ ଗୌରହରି ସ୍ୱାଇଁ ନାମକ ଜଣେ ଛୋଟିଆ ଚୋରକୁ ଥାନା ହାଜତରେ ପିଟିପିଟି ପୋଲିସ୍‍ ମାରିଦେଇଛି ।

ପୋଲିସ୍‍ର ଅତ୍ୟଧିକ ଅତ୍ୟାଚାରରେ ଗୌରହରି ମୃତ୍ୟୁ ବରଣ କରିଛନ୍ତି । ଏହିଘଟଣାକୁ ନେଇ ଆମର ସାଧାରଣ ଜୀବନରେ ବିଶେଷ ହଲଚଲ୍‍ ଆସୁନାହିଁ । ଗୋଟେ ସମୟ ଥିଲା ହାଜତ ମୃତ୍ୟୁକୁ ଏକ ବଡ଼ ରାଜନୈତିକ ପ୍ରସଙ୍ଗ ବୋଲି ବିଚାର କରାଯାଉଥିଲା ।

ଆଜିର ତାରିଖରେ ରାଜନୈତିକ ଦଳ ଓ ଗଣମାଧ୍ୟମ ହାଜତ ମୃତ୍ୟୁକୁ ପୋଲିସ୍‍ର ଅଧିକାର କ୍ଷେତ୍ର ବୋଲି ବିଚାର କରୁଛନ୍ତି । ଗଣମାଧ୍ୟମର ଏହି ବିବେକହୀନ ଆଚରଣ ଆଗରେ ସାଧାରଣ ଚୋର ଖଳନାୟକ ପାଲଟିଥିବାବେଳେ ବସ୍ତିର ସାଧାରଣ ମୁଖରା ନାରୀଟିଏ ଲେଡି ଡନ୍‍ ପାଲଟିଯାଉଛି । ଏହା ଅତ୍ୟନ୍ତ ଦୁଃଖଦାୟକ ।

ଫୋନ୍‍ : ୯୪୩୭୧୫୪୪୪୫

(ଓଡ଼ିଶା ଡ଼ଟ୍ କମରେ ପ୍ରକାଶିତ ଲେଖା/ରିପୋର୍ଟ ଓ ସ୍ତମ୍ଭ ଲେଖକ/ଲେଖିକାଙ୍କର ନିଜସ୍ୱ ମତ ) ଓଡିଶା ଡଟ୍ କମ ଘୋଷଣାନାମା

ଓଡିଶା ଡଟ୍ କମ୍ ସମ୍ବାଦଦାତା

କୋରାପୁଟ,ଫେବୃଆରି ୩ (ଓଡିଶା ଡଟ୍ କମ୍)-ଲକ୍ଷ୍ମୀପୁର ବ୍ଲକ ମୁର୍ଲାପୁଟ ଜଙ୍ଗଲରେ ୭ ଜଣ ମାଓବାଦୀଙ୍କୁ ଗିରଫ କରାଯିବା ସହ ବିପୁଳ ବିସ୍ପୋରକ ସାମଗ୍ରୀ ଜବତ କରାଯାଇଛି ।

ଏହି ଜଙ୍ଗଲରେ ମାଓବାଦୀଙ୍କ କ୍ୟାମ୍ପ ଚାଲିଥିବାର ଖବର ପାଇ ସ୍ଥାନୀୟ ପୋଲିସ ଓ ସୀମା ସୁରକ୍ଷାବାହିନୀ ପକ୍ଷରୁ ମିଳିତ ଚଢାଉ କରାଯାଇଥିଲା । ସୁରକ୍ଷାବାହିନୀ ସହ ସଂଘର୍ଷରେ ୭ ମାଓବାଦୀ ଧରାପଡିଥିଲେ ବୋଲି କୋରାପୁଟ ଏସ୍ପି ଅବିନାଶ କୁମାର ସୂଚନା ଦେଇଛନ୍ତି ।

ଓଡିଶା ଡଟ୍ କମ୍

ଓଡିଶା ଡ଼ଟ୍ କମ୍ ସମ୍ବାଦଦାତା

କଟକ, ଜାନୁଆରୀ ୩୦(ଓଡିଶା ଡ଼ଟ୍ କମ୍)- ଆଇସିସି ମହିଳା ବିଶ୍ୱକପ ପୂର୍ବରୁ ବାରବାଟୀ ଷ୍ଟାଡିୟମରେ କମିଶନରେଟ ପୋଲିସ ତରଫରୁ ବ୍ୟାପକ ସୁରକ୍ଷା ବନ୍ଦବୋସ୍ତ କରାଯାଇଛି ।

ମଙ୍ଗଳବାର ଡ୍ରେସ ରିହର୍ସଲ ଅର୍ଥାତ ଅଭ୍ୟାସ ମ୍ୟାଚ ଖେଳା ଯାଇଥିଲା । ଏହି ମ୍ୟାଚ କଡ଼ା ନିରାପତା ମଧ୍ୟରେ ଖେଳା ଯାଇଥିଲେ ମଧ୍ୟ ମ୍ୟାଚ ଦେଖିବା ପାଇଁ ପ୍ରାୟ ଶହେ ଦର୍ଶକ ଉପସ୍ଥିତ ଥିଲେ ।

କଟକ ଡିସିସି ଏସ୍ ପ୍ରବୀଣ କୁମାର କହିଛନ୍ତି କଟକରେ ଆଇସିସି ମହିଳା ବିଶ୍ୱକପ ପାଇଁ ଷ୍ଟାଡିୟମକୁ ପୁରା ସିଲ କରାଯାଇଛି । ବିଭିନ୍ନ ସେକ୍ଟର ଓ ଜୋନ ଅନୁସାରେ ବିଭାଜନକରି ସୁରକ୍ଷା ବ୍ୟବସ୍ଥା କରାଯାଇଛି ।

ଆସନ୍ତା ଫେବୃୟାରୀ ୧ ତାରିଖରେ ବାରବାଟୀ ଷ୍ଟାଡିୟମରେ ହେବାକୁ ଥିବା ଆଇସିସି ମହିଳା ବିଶ୍ୱକପ୍ ମ୍ୟାଚ ପାଇଁ ପୋଲିସ ସୁରକ୍ଷା ବ୍ୟବସ୍ଥା ସଂପର୍କରେ ମଙ୍ଗଳବାର ଦିନ ଷ୍ଟାଡିୟମ ପରିସରରେ କଟକ କମିଶନର ପୋଲିସ ତରଫରୁ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି ।

ଏହି ବୈଠକରେ କଟକ ଡିସିସି ଏସ୍ ପ୍ରବୀଣ କୁମାର,କଟକ କମିଶନରେଟ ପୋଲିସର ଅଧିନରେ ଥିବା ସମସ୍ତ ଏସ୍ପି,ଆଇଆଇସି ଓ ଅନ୍ୟ ବରିଷ୍ଠ ଅଧିକାରୀ ମାନେ ଉପସ୍ଥିତ ଥିଲେ ।

ଖେଳ ସମୟରେ ଷ୍ଟାଡିୟମ ଭିତରେ ଓ ବାହାରେ ସୁରକ୍ଷା ବ୍ୟବସ୍ଥା ସହ ,ଖେଳ ଚାଲିଥିବା ସମୟରେ ଦର୍ଶକମାନେ କିପରି କୌଣସି ସାମଗ୍ରୀ ନପିଙ୍ଗନ୍ତି ତାଉପରେ କଡାକଡି ନଜର ରଖିବାକୁ ନିର୍ଦ୍ଦେଶ ଦିଆଯାଇଛି ।

ସୂଚନା ଯୋଗ୍ୟଯେ,ସମସ୍ତ କଳ୍ପନା ଜଳ୍ପନାର ଅନ୍ତ ଘଟାଇ ପାକିସ୍ତାନ ମହିଳା କ୍ରିକେଟ ଦଳ କଡ଼ା ସୁରକ୍ଷା ମଧ୍ୟରେ ରବିବାର ରାତିରେ ବାରବାଟୀ ଷ୍ଟାଡିୟମରେ ଆସି ପହଞ୍ଚିଥିଲା । ପୁଲିସ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଥିଲା । ବିଜୁ ପଟ୍ଟନାୟକ ବିମାନ ବନ୍ଦରରୁ ବାରବାଟୀ ଷ୍ଟାଡିୟମ ପର୍ଯ୍ୟନ୍ତ ଦୀର୍ଘ ୩୦ କିଲୋମିଟର ରାସ୍ତା ଏକରକମ ପୁଲିସ ଛାଉଣିରେ ପରିଣତ ହୋଇଥିଲା ।

ରବିବାର ସନ୍ଧ୍ୟା ପ୍ରାୟ ୭ଟା୧୫ରେ ୨୩ ଜଣିଆ ଦଳକୁ ନେଇ ଏକ ସ୍ୱତନ୍ତ୍ର ବିମାନ ବିମାନବନ୍ଦରରେ ପହଞ୍ଚିଥିଲା । ସେଠାରୁ ପୁଲିସ ଘେରରେ ଏକ ସ୍ୱତନ୍ତ୍ର ବସରେ ଦଳ ୭ଟା ୩୫ରେ କଟକ ଅଭିମୁଖେ ଯାତ୍ରା କରିଥିଲା ।

ଏଜି ଛକ, ଆଚାର୍ଯ୍ୟ ବିହାର ଛକ ଓ ରସୁଲଗଡ଼ ଛକ ଦେଇ ଏହି ବସ କଟକରେ ପହଞ୍ଚିଥିଲା ।

ଖେଳାଳିଙ୍କ ସୁରକ୍ଷା ପାଇଁ ପ୍ରାୟ ୩୦ ପ୍ଲାଟୁନ ପୋଲିସ ଫୋର୍ସଙ୍କୁ ମୁତୟନ କରାଯାଇଥିଲା । ଖେଳାଳିଙ୍କୁ ନେଇ ଯାଉଥିବା ବସର ଆଗରେ ଦୁଇଟି ପାଇଲଟ ଭ୍ୟାନ ପଛରେ ଏକ ଏସଏସବି ବାଟାଲିଅନର କମାଣ୍ଡୋମାନେ ଏକ ଖୋଲା ଜିପରେ ଏସକଟ କରୁଥିଲେ । ସେହିପରି ବସର ଦୁଇ ପାଖରେ ଦୁଇଟି ଭ୍ୟାନ ଓ ପଛରେ ଏକ ଭ୍ୟାନରେ ମଧ୍ୟ କମାଣ୍ଡୋମାନେ ରହିଥିଲେ ।

ତେବେ ଗତ ସପ୍ତାହେ ହେଲା ଓଡ଼ିଶାରେ ପାକିସ୍ତାନ ଖେଳାଳିଙ୍କୁ ଖେଳିବାକୁ ଦିଆଯିବ ନାହିଁ ବୋଲି ହୁଙ୍କାର ଦେଉଥିବା କୌଣସି ବ୍ୟକ୍ତି ବା ସଂଗଠନଙ୍କୁ ଦେଖିବାକୁ ମିଳିନଥିଲା । କେଉଁଠାରେ ବି ପାକିସ୍ତାନୀ ବିରୋଧୀ ସ୍ଲୋଗାନ ମଧ୍ୟ ଦିଆଯିବା ଦେଖା ଯାଇନଥିଲା । ମୋଟ ଉପରେ କହିବାକୁ ଗଲେ; ଓଡ଼ିଶାମାଟିରେ ପାକିସ୍ତାନୀ କ୍ରିକେଟରଙ୍କୁ ବିରୋଧ କିମ୍ବା ବିଦ୍ୱେଷ ନୁହେଁ; ବରଂ ଆତିଥ୍ୟ ମିଳିଥିଲା ।

ଆଇିସିସି ବିଶ୍ୱକପରେ ଭାଗ ନେବାକୁ ଆସିଥିବା ପାକିସ୍ତାନ ମହିଳା କ୍ରିକେଟ ଖେଳାଳି ଓ ଦଳର ସପୋର୍ଟ ଷ୍ଟାଫଙ୍କୁ ଓଡ଼ିଶା କ୍ରିକେଟ ଆସୋସିଏସନ (ଓସିଏ) ପକ୍ଷରୁ ଭବ୍ୟ ସମ୍ବର୍ଦ୍ଧନା ଦିଆଯାଇଥିଲା ।

କ୍ୟଟୋଂନମେଂଟ ରୋଡରୁ ବାରବାଟୀ ଷ୍ଟାଡିୟମ ପର୍ଯ୍ୟନ୍ତ ରାସ୍ତାର ଦୁଇ ପାଶ୍ୱର୍ରେ ପ୍ରାୟ ୫୦୦ କ୍ରୀଡାବିତ ହାତରେ ଫ୍ଲାଗକାର୍ଡ ଧରି ପାକିସ୍ତାନ ଖେଳାଳିଙ୍କୁ ସ୍ୱାଗତ କରିଥିଲେ । ସେହିପରି ବିମାନବନ୍ଦର ବାହାରେ ମଧ୍ୟବହୁ କ୍ରିକେଟର ଏହି ଦଳକୁ ସ୍ୱାଗତ କରିଥିଲେ ।

ଷ୍ଟାଡିୟମ ନବନିର୍ମିତ ଅତ୍ୟାଧୁନିକ ଓସିଏ କ୍ଲବରେ ପାକିସ୍ତାନ ଖେଳାଳି ଅବସ୍ଥାପନ କରିଛନ୍ତି । ସେମାନଙ୍କୁ ବ୍ୟାପକ ସୁରକ୍ଷା ଯୋଗାଇ ଦିିଆଯାଇଛି ।

ଶୁକ୍ରବାରଠାରୁ ଏଠାରେ ଗ୍ରୁପ ‘ବି’ର ପ୍ରଥମ ମ୍ୟାଚ ଖେଳିବା ପୂର୍ବରୁ ପାକିସ୍ତାନ ଦଳ ସେମାନଙ୍କ ରଣକ୍ଷେତ୍ର ବାରବାଟୀ ଷ୍ଟାଡିୟମରେ ସୋମବାର ପୂର୍ବାହ୍ନରେ ଓହ୍ଲାଇଥିଲେ । ସେମାନେ ପ୍ରାୟ ୩ ଘଣ୍ଟା ଧରି ନେଟ୍ ଅଭ୍ୟାସ କରିଥିଲେ । ମଙ୍ଗଳବାର ପାକିସ୍ତାନ ଦଳ ଘରୋଇ ଓଡ଼ିଶା ଏକାଦଶ ସହିତ ପ୍ରଥମ ଅଭ୍ୟାସ ମ୍ୟାଚ ଖେଳିଥିଲା ବୋଲି ଓସିଏ ସମ୍ପାଦକ ଆଶୀର୍ବାଦ ବେହେରା ସୂଚନା ଦେଇଛନ୍ତି ।

ଘରୋଇ ଓଡ଼ିଶା ମହିଳା ଏକାଦଶ ବିରୋଧରେ ଏହି ଅଭ୍ୟାସ ମ୍ୟାଚରେ ପାକିସ୍ତାନ ୯୫ ରନରେ ବିଜୟୀ ହୋଇଛି । ପାକିସ୍ତାନ ୪୮.୪ ଓଭରରେ ୨୪୦ ରନକରି ଅଲ୍‍ଆଉଟ ହୋଇ ଯାଇଥିଲା ।

୨୪୧ ରନ ବିଜୟଲକ୍ଷ୍ୟକୁ ପିଛାକରି ଓଡ଼ିଶା ଏକାଦଶ ୫୦ ଓଭର ଶେଷରେ ୮ ୱିକେଟରେ ୧୪୫ ରନ କରି ପାରିଥିଲା ।
ଏହି ମାଚରେ ପାକିସ୍ତାନ ଏକ ଆନ୍ତର୍ଜାତିକ ଦଳ ଭାବେ ପ୍ରାଧାନ୍ୟ ବିସ୍ତାରକରି ଖେଳିଥିଲା । ତେବେ ପାକିସ୍ତାନକୁ ୫୦ ଓଭର ପୂର୍ବରୁ ଅଲଆଉଟ କରିବା ଓଡ଼ିଆ ଖେଳାଳିଙ୍କ ପାଇଁ ଏକ ସଫଳତା ।

ଘରୋଇ ଅଧିନାୟିକା ମଧୁସ୍ମିତା ବେହେରା ୮ଟି ଚୌକା ସହ ସର୍ବାଧିକ ୫୩ ରନ କରିଥିଲେ । କାଦମ୍ବିନୀ ମହାକୁଡ଼ ୨୧, ଗଙ୍ଗୋତ୍ରୀ ବେହେରା ୩୧ ଓ ମାଧୁରୀ ମେହେଟ୍ଟା ୧୩ ରନ କରିଥିଲେ ।

ପାକିସ୍ତାନର ଆସମାଭିୟା ଇକବାଲ ୩ଟି ୱିକେଟ ନେଇଥିବା ବେଳେ ସାନା ମୀର ଓ ସାଦିଆ ୟୁସୁଫ ୨ଟି ଲେଖାଏଁ ୱିକେଟ ନେଇଥିଲେ ।

ପାକିସ୍ତାନ ଅଧିନାୟକ ସାନା ମୀର ଟସ ଜିତି ପ୍ରଥମେ ବ୍ୟାଟିଂ ନିଷ୍ପତି ନେଇଥିଲେ । ୭ ରନରେ ଦଦୁଇ ଓପନର ସାନା ମୀର (୨) ଓ ନାହିଦା ଖାଁ (୨) ଆଉଟ ହୋଇଥିଲେ ସୁଦ୍ଧା ନୈନ ଆବିଦି ଓ ଉପଅଧିନାୟିକା ବିସମା ମାରୁଫ ୩ୟ ୱିକେଟ ପାଇଁ ୧୪୮ ରନ ଯୋଡ଼ିଥିଲେ ।

ଆବିଦି ୭ଟି ଚୌକା ଓ ଗୋଟିଏ ଛକା ସହ ୭୩ ଏବଂ ମାରୁଫ ୧୨ଟି ଚୌକା ସହ ୭୬ ରନ କରିଥିଲେ । ଜାଭେରିଆ ଖାଁ ୩୩ ଓ କ୍ୱାନିତା ଜଲିଲ ୨୫ ରନ କରିଥିଲେ । ଓଡ଼ିଶାର ସୁଜାତା ମଲ୍ଲିକ ଓ ଗଙ୍ଗୋତ୍ରୀ ବେହେରା ୩ଟି ଲେଖାଏଁ ୱିକେଟ ନେଇଥିବା ବେଳେ ସୁଶ୍ରୀ ପ୍ରଧାନ ୨ଟି ୱିକେଟ ପାଇଥିଲେ ।

ଓଡିଶା ଡ଼ଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ରାଉରକେଲା,ଡିସେମ୍ବର ୧୦(ଓଡିଶା ଡଟ୍ କମ୍)-ସୁନ୍ଦରଗଡ ଜିଲ୍ଲାର ନୂଆଗାଁ ଅଞ୍ଚଳରେ ଥିବା ଏକ ବିଦେଶୀ ମଦ ଦୋକାନ ପରିଚାଳକଙ୍କୁ ୩ ଲକ୍ଷ ଟଙ୍କା ବଟି ମାଗି ଧମକ ଚମକ ଦେଉଥିବା ଝାଡଖଣ୍ଡର ପିଏଲ୍ ଏଫ୍ ଆଇ ସଦସ୍ୟ ବସନ୍ତ ରାମକୁ ଗିରଫ କରି ସୋମବାର ଦିନ ତାକୁ କୋର୍ଟ ଚାଲାଣ କରିଛି ବୋଲି ପୋଲିସ କହିଛି ।

ଗତ ନଭେମ୍ବର ୨୯ ତାରିଖ ଦିନ ବସନ୍ତ ୩ ଲକ୍ଷ ଟଙ୍କା ବଟି ମାଗି ଜୀବନରୁ ମାରିଦେବାକୁ ଧମକ ଦେଇଥିଲା । ଏ ସଂପର୍କରେ ବୀରମିତ୍ରପୁର ଥାନାରେ ଏତଲା ଦିଆଯାଇଥିଲା ।
ଏତଲାକୁ ଭିତିକରି ପୋଲିସ ଓଡିଶା-ଝାଡଖଣ୍ଡ ସୀମାନ୍ତ ବାଘଲାଟୋଲି ଗ୍ରାମରେ ଚଢଉକରି ତାକୁ ଗିରଫ କରିବା ପରେ ତାଠାରୁ ଗୋଟିଏ ମୋବାଇଲ ଜବତ କରିଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ପାରଳାଖେମୁଣ୍ଡି,ଡିସେମ୍ବର ୬(ଓଡିଶା ଡଟ୍ କମ୍)-ମାଓବାଦୀଙ୍କ ସହିତ ସମ୍ପର୍କ ରଖିଥିବା ତଥା ମାଓବାଦୀଙ୍କୁ ଅସ୍ତ୍ରଶସ୍ତ୍ର ଯୋଗାଇବା ଅଭିଯୋଗରେ ମୋହନା ପୁଲିସ ଗିରଫ କରିଥିବା ଦମନ ପ୍ରତିରୋଧ ମଞ୍ଚର ଆବାହକ ତଥା ମାଓବାଦୀ-ସରକାରଙ୍କ ମଧ୍ୟସ୍ଥି ଦଣ୍ଡପାଣି ମହାନ୍ତିଙ୍କ ପୁଅ ସଂଗ୍ରାମକେଶରୀ ମହାନ୍ତି ଓ ତାଙ୍କ ସାଥିଙ୍କୁ ଜେଏମ୍ସି କୋର୍ଟରେ ହାଜର କରିବା ପରେ ଆର ଉଦୟଗିରି ଜେଲକୁ ପଠାଇ ଦିଆଯାଇଛି ।

ସେମାନଙ୍କର ଜାମିନ ଆବେଦନ ଗୁରୁବାର ଦିନ କୋର୍ଟରେ ଖାରଜ ହୋଇ ଯାଇଛି । ତେବେ ଜେଲ୍ ଭିତରେ ସେହି ଦୁଇଜଣ ଅନଶନରେ ବସିଥିବାର ଜଣାପଡିଛି ।

ସେମାନେ ଅଭିଯୋଗ କରିଛନ୍ତି ଯେ ସେମାନଙ୍କୁ ଆକ୍ରୋଶ ମୂଳକ ଭାବେ ପୋଲିସ ଗିରଫ କରିଛି । ମାଓବାଦୀଙ୍କ ସହ ସେମାନଙ୍କର କୌଣସି ସମ୍ପର୍କନାହିଁ । ଏହାର ନିରପେକ୍ଷ ତଦନ୍ତ କରାଯାଇ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବୀ କରିଛନ୍ତି ।

କାର୍ଯ୍ୟାନୁଷ୍ଠାନ ଗ୍ରହଣ ନହେବା ପର୍ଯ୍ୟନ୍ତ ସେମାନେ ଖାଦ୍ୟ ଗ୍ରହଣ କରିବେ ନାହିଁ । ସେ ନକସଲ କାର୍ଯ୍ୟରେ ବିଶ୍ୱାସ କରନ୍ତି ନାହିଁ ବୋଲି ସଂଗ୍ରାମ କହିଛନ୍ତି । ଗତକାଲି ରାତିରେ ସଂଗ୍ରାମକୁ ମୋହନାରୁ ଆର ଉଦୟଗିରିକୁ ସ୍ଥାନାନ୍ତରିତ କରାଯାଇଥିଲା ।

ବୁଧବାର ପୂର୍ବାହ୍ନରେ ମୋହନା ବ୍ଲକ ଅନ୍ତର୍ଗତ କମଳାପୁର ଗେଟ ନିକଟରେ ସଂଗ୍ରାମଙ୍କୁ ଗିରଫ କରାଯାଇଥିଲା । ସଂଗ୍ରାମ କିଛି ମାଓପୁସ୍ତିକା, ବିସ୍ଫୋରକ ଦ୍ରବ୍ୟ ଓ ବିଭିନ୍ନ ସାମଗ୍ରୀ କୈଳାସ ମଣ୍ଡଳ ନାମକ ଜଣେ ଯୁବକଙ୍କୁ ଦେବା ସମୟରେ ମୋହନା ପୁଲିସ ତାଙ୍କୁ ଗିରଫ କରିଥିବା ଦାବି କରିଥିଲା ।

ମାଓ ମଧ୍ୟସ୍ଥି ଦଣ୍ଡପାଣି ପ୍ରାୟ ଏକ ବର୍ଷ ହେଲା ଚର୍ଚ୍ଚାରେ ରହିଥିଲେ । କିଛି ମାସ ତଳେ ଦୁଇ ଇଟାଲି ପର୍ଯ୍ୟଟକଙ୍କୁ ମାଓବାଦୀ ଅପହରଣ କରି ନେବା ପରେ ଦଣ୍ଡପାଣି ମାଓବାଦୀ ଓ ସରକାରଙ୍କ ମଧ୍ୟରେ ମଧ୍ୟସ୍ଥି ଦାୟିତ୍ୱ ନିର୍ବାହ କରିଥିଲେ । ପୂର୍ବରୁ ତତ୍କାଳୀନ ମାଲକାନଗିରି ଜିଲାପାଳ ଭିନିଲ କ୍ରିଷ୍ଣାଙ୍କ ଅପହରଣ ସମୟରେ ଦଣ୍ଡପାଣି ମଧ୍ୟସ୍ଥି ରୂପେ କାର୍ଯ୍ୟ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୫(ଓଡିଶା ଡଟ୍ କମ୍)-ଜନଅଧିକାର ମଞ୍ଚର ଆବାହକ ତଥା ନକ୍ସଲ ସମର୍ଥକ ଭାବେ ପରିଚିତ ଓ ମାଓ ମଧ୍ୟସ୍ଥ ଦଣ୍ଡପାଣି ମହାନ୍ତିଙ୍କ ପୁଅ ସଂଗ୍ରାମ କେଶରୀ ମହାନ୍ତିଙ୍କୁ ବ୍ରହ୍ମପୁରରେ ଗିରଫ କରାଯାଇଥିବା ପୋଲିସ କହିଛି ।

ଗୁଇନ୍ଦା ଖବର ଆଧାରରେ ପୋଲିସ ସଂଗ୍ରାମ ଓ ତାଙ୍କ ସହଯୋଗି କୈଳାସଙ୍କୁ ମୋହନାର କମାଳାପୁର ଅଞ୍ଚଳରୁ ଗିରଫ କରିବାସହ ସେମାନଙ୍କ ଠାରୁ ଦୁଇଟି ପିସ୍ତଲ,ପ୍ରାୟ ୯୫ ରାଉଣ୍ଡ ଗୁଳି, ମୋବାଇଲ,ମାଓ ପ୍ରଚାର ପତ୍ର,ଖାଦ୍ୟ ପଦାର୍ଥ ଜବତ କରାଯାଇ ପୋଲିସ ଦାବି କରିଛି ।

ବୈଦ୍ୟନାଥ ଥାନା,ବ୍ରହ୍ମପରୁରେ ପାଲଟା ଅଭିଯୋଗ ଆଣିଛନ୍ତି ଦଣ୍ଡପାଣି ମହାନ୍ତି । ସେ ଥାନାରେ ଅଭିଯୋଗ କରିଛନ୍ତି ତାଙ୍କ ପୁଅକୁ ପୋଲିସ ଅପହରଣ କରିନେଇଛନ୍ତି ।

ସୂଚନାଯୋଗ୍ୟ ଯେ ଗତ ନଭେମ୍ବର ୩୦ରେ ଭୁବନେଶ୍ୱରରେ ଦଣ୍ଡପାଣିଙ୍କ ନେତୃତ୍ୱରେ ଅପରେସନ ସବ୍ୟସାଚୀ ବନ୍ଦ କରିବାପାଇଁ ଆନ୍ଦୋଳନ କରାଯାଇଥିଲା । ଭାଲିଆଗୁଡା ଏନ୍କାଉଁଟରରେ ନିରିହ ଆଦିବାସୀ ନିହତ ହୋଇଥିଲେ ବୋଲି କହିଥିଲେ ଦଣ୍ଡପାଣି । ଏଥିସହିତ ସେ ସରକାର ଓ ମାଓବାଦୀଙ୍କ ମଧ୍ୟରେ ଅନେକ ଥର ମଧ୍ୟସ୍ଥତା କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ମାଲକାନାଗିରି,ଡିସେମ୍ବର ୨(ଓଡିଶା ଡଟ୍ କମ୍)-ରବିବାର ଠାରୁ ଆରମ୍ଭ ହୋଇଛି ମାଓବାଦୀଙ୍କ ପିଏଲ୍ଜି ସପ୍ତାହ । ଏହାକୁ ଆଖି ଆଗରେ ରଖି ନକ୍ସଲ ପ୍ରବଣ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି ବୋଲି ମାଲକାନାଗିରି ଏସ୍ ପି ଅବିନାଶ କୁମାର କହିଛନ୍ତି ।

ଏସ୍ ପି କହିଛନ୍ତି ୨ ତାରିଖରୁ ୮ ତାରିଖ ପର୍ଯ୍ୟନ୍ତ ମାଓବାଦୀଙ୍କ ତରଫରୁ ପାଳନ କରାଯାଉଥିବା ପିଏଲ୍ଜି ସପ୍ତାହ ଅବସରରେ କିପରି ଆଇନ ଶୃଙ୍ଖଳା ପରିସ୍ଥିତି ନଘଟୁ ସେଥିପାଇଁ ପୋଲିସକୁ ସଜାଗ ରଖାଯାଇଛି । ଜିଲ୍ଲା ପୋଲିସ, ଡିଭିଏଫ୍, ବିଏସ୍ଏଫ୍ ତରଫରୁ ସମସ୍ତ ଅଞ୍ଚଳରେ ପୋଲିସ କର୍ମୀମାନେ ମୁତୟନ ହୋଇଛନ୍ତି ।

ଜନସାଧାରଣମାନେ ଯେପରି ଭୟଭିତ ନହେବେ ସେଥିପାଇଁ କାର୍ଯ୍ୟାନୁଷ୍ଠାନମାନ ଗ୍ରହଣ କରାଯାଇଛି । ମାଲକାନାଗୀରିରୁ ମୋଟୁ, ଚିତ୍ରକୋଣ୍ଡା, କାଲିମେଳା ରାସ୍ତାରେ ଗାଡି ମଟର ଚଳାଚଳ କରୁନାହିଁ । କମ୍ଭି ଅପରେସନ ଚାଲିବା ସହ ଯାନବାହନ ଯାଞ୍ଚ କରାଯାଉଛି ।

ଜୟପୁରରୁ କନ୍ଧମାଳ ବସଚଳାଚଳ ବନ୍ଦ ରହିଛି । ଜୟପୁରରୁ ରାୟଗଡା ଦେଇ ବ୍ରହ୍ମପୁର, ଭୁବନେଶ୍ୱର, କଟକ ଆସୁଥିବା ବସ୍ ଆନ୍ଦ୍ରପ୍ରଦେଶ ଦେଇ ଚଳାଚଳ କରୁଛି । ଲମତାପୁଟ, ବୈପାରିଗୁଡା, ନାରାୟଣ ପାଟଣାରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି ।

ରାୟଗଡାରେ କଡା ସୁରକ୍ଷା ବ୍ୟବସ୍ଥା କରାଯିବା ସହ ଗାଡି ଗୁଡିକ ଯାଞ୍ଚ ଚାଲଛି । କୋରାପୁଟ ସହରରେ ସାଧା ବେଶରେ ମୁତୟନ ହୋଇଥିବା ପୋଲିସ ସମସ୍ତ ଗାଡି ଯାଞ୍ଚ କରୁଛନ୍ତି ।

ଗଜପତି ଜିଲ୍ଲା ଦେଇ କୌଣସି ସରକାରୀ ବସ ଚଳାଚଳ କରୁନାହିଁ । ପାରଳାଖେମୁଣ୍ଡି ସମେତ ଜିଲ୍ଲାର ଅନ୍ୟ ସ୍ଥାନ ଗୁଡିକରେ ଘରୋଇ ବସ ଚଳାଚଳ କରୁଥିବା ବେଳେ ଦୋକାନ ବଜାର ଖୋଲା ରହିଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୨୯(ଓଡିଶା ଡଟ୍ କମ୍)-ଗୁରୁବାର ଦିନ ବିଧାନସଭା ଘେରାଉବେଳେ ବ୍ଲକ ଗ୍ରାଣ୍ଡ ହାଇସ୍କୁଲ ଶିକ୍ଷକଙ୍କ ଉପରେ ପୋଲିସର ଲାଠି ଚାର୍ଜ ଯୋଗୁଁ ୪୦ରୁ ଅଧିକ ଶିକ୍ଷକ ଆହତ ହୋଇଛନ୍ତି ।

ଫଟୋ : ଅରବିନ୍ଦ ମହାପାତ୍ର

ବ୍ଲକ ଗ୍ରାଣ୍ଡ ଉଛେଦ ଏବଂ ପୂର୍ଣ୍ଣ ଅନୁଦାନ ଦାବୀରେ ଶିକ୍ଷକମାନେ ଏକ ବିଶାଳ ଶୋଭାଯାତ୍ରାରେ ମାଷ୍ଟର କ୍ୟାଣ୍ଟିନ ଛକ ଠାରୁ ବାହାରି ପିଏମ୍ଜି ଛକରେ ପହଞ୍ଚିଥିଲେ । ସରକାରୀ ବିରେଧି ସ୍ଲୋଗାନ ଦେଇ ପୋଲିସ କଡନ୍ ଭାଙ୍ଗି ବିଧାନ ସଭା ଆଡକୁ ଧାଇଁ ଯାଇଥିଲେ ।

ହଜାର ହଜାର ଶିକ୍ଷକ ଆଇନ୍ ଅମାନ୍ୟ ଆନ୍ଦୋଳନକରି ବିଧାନସଭା ଆଡେ ମୁହାଁଇଥିଲେ । ବ୍ୟାରିକେଟ୍ ଭାଙ୍ଗିବାକୁ ଉଦ୍ୟମ କଲାବେଳେ ପୋଲିସ ବାଧ୍ୟ ହୋଇ ବାଧାଦେଇଥିଲା । ପରିସ୍ଥିତି ଅଣାୟତ ହେବା ଯୋଗୁଁ ପୋଲିସ ପ୍ରଥମେ ପାଣି ମାଡ, ପରେ ଲୁହବୁହା ଗ୍ୟାସ ଏବଂ ତାହାପରେ ଲାଠି ଚାର୍ଜ କରିଥିଲା ।

ଏହି ଘଟଣାରେ ୪୦ରୁ ଅଧିକ ଶିକ୍ଷକ ଆହତ ହୋଇଛନ୍ତି । ପ୍ରାୟ ତିନି ଘଣ୍ଟାଧରି ଶିକ୍ଷକମାନେ ପିଏମ୍ଜିକୁ ନିଜ ଅକ୍ତିଆରରେ ରଖିଥିଲେ । ବ୍ଲକଗ୍ରାଣ୍ଡ ଶିକ୍ଷକ ସଂଘର ସଭାପତି ପ୍ରଶାନ୍ତ କୁମାର ମହାପାତ୍ର କହିଛନ୍ତି ଯେ, ଗତ ୨୦ ବର୍ଷହେଲା ହଜାର ହଜାର ବ୍ଲକ ଗ୍ରାଣ୍ଡ ଶିକ୍ଷକ ପ୍ରତିବର୍ଷ ନିଜର ଦାବିପାଇଁ ଆନ୍ଦୋଳନ କରି ଆସୁଛନ୍ତି ହେଲେ ସରାକର ସେମାନଙ୍କ କଥା ଶୁଣୁ ନାହାଁନ୍ତି ।

ଆଜି ହଜାର ହଜାର ଶିକ୍ଷକ ଯେଉଁ ଆନ୍ଦୋଳନ କରି ରାଜରାସ୍ତାକୁ ଓହ୍ଲାଇ ଆସିଛନ୍ତି ସରକାର ପୋଲିସ ଲଗାଇ ଏହି ଆନ୍ଦୋଳନକୁ ଚପାଇ ଦେବାକୁ ଉଦ୍ୟମ କରୁଛନ୍ତି । କିନ୍ତୁ ଏହା ଜାରି ରହିବ । ଆସନ୍ତାକାଲି ଠାରୁ ବିଧାୟକମାନଙ୍କ ଘର ଘେରାଉ କରାଯିବ ବୋଲି ସେ ଚେତାବନି ଦେଇଛନ୍ତି ।

ଶିକ୍ଷକମାନଙ୍କ ଉପରେ ହୋଇଥିବା ଲାଠି ଚାର୍ଜ ଉପରେ ସ୍କୁଲ ଗଣଶିକ୍ଷା ମନ୍ତ୍ରୀ ରବି ନାରାୟଣ ନନ୍ଦ ଦୁଃଖପ୍ରକାଶ କରିଛନ୍ତି । ସେ କହିଛନ୍ତି ଶିକ୍ଷକମାନେ ସଦାବେଳେ ନମସ୍ୟ । ଯାହାକଛି ହୋଇଛି ସେଥିପାଇଁ ମୋତେ ଦୁଃଖଦେଇଛି । ଶିକ୍ଷକମାନଙ୍କର ଦାବି ସରକାର ମାନିନେଇଛନ୍ତି । ଆଉ ଯଦି କିଛି ଅଛି ତାହାର ଆଲୋଚନା ପାଇଁ ମୁ ବି ପ୍ରସ୍ତୁତ ଅଛି । ଆଜିବି ମୁଁ ସେମାନଙ୍କ ନିକଟକୁ ଖବର ପଠାଇଛି ।

ପୋଲିସ ମହାନିର୍ଦ୍ଦେଶକ ପ୍ରକାଶ ମିଶ୍ର କହିଛନ୍ତି ଟେକା ପଥର ପକାଇ ଶିକ୍ଷକମାନେ ବ୍ୟାରିକେଟ ଭାଙ୍ଗିବାରୁ ପୋଲିସମାନେ ବଳ ପ୍ରୟୋଗ କରିବାକୁ ବାଧ୍ୟହେଲେ । ସେମାନଙ୍କୁ ପଛକୁ ହଟାଯାଇଥିଲା । ଏହି ଘଟଣାରେ ପୋଲିସର ୧୦/୧୨ ଆହତ ହୋଇଛନ୍ତି ।

ପିସିସି ମୁଖପାତ୍ର ଆର୍ଯ୍ୟକୁମାର ଜ୍ଞାନେନ୍ଦ୍ର କହିଛନ୍ତି ବ୍ଲକ ଗ୍ରାଣ୍ଡ ଶିକ୍ଷକମାନେ ତାଙ୍କର ନ୍ୟାଯ୍ୟଦାବି ପାଇଁ ଆନ୍ଦୋଳନ ଚଲାଇ ଆସିଛନ୍ତି । ଗଣତାନ୍ତ୍ରୀକ ପଦ୍ଧତିରେ ଯେଉଁ ଆନ୍ଦୋଳନ କରୁଛନ୍ତି ତା ଉପରେ ଆଜି ପୋଲିସ ବର୍ବରଚିତ ଆକ୍ରମଣ କରିଛି । ଓଡିଶା ପ୍ରଦେଶ କଂଗ୍ରେସ କିମିଟି ତରଫରୁ ଘୋର ନିନ୍ଦା କରାଯାଇ ଏହାର ଘଟଣାର ବିଚାର ବିଭାଗୀୟ ତଦନ୍ତ ଦାବି କରାଯାଇଛି ।

ଓଡିଶା ଡଟ୍ କମ୍