ଫୁଲବାଣୀ

ଓଡିଶା ଡଟକମ ସଂବାଦ ଦାତା

ଫୁଲବାଣୀ, ମଇ ୧୯ (ଓଡିଶା ଡଟ କମ) ମା’ ନବଜାତ ଓ ଶିଶୁ ସ୍ୱାସ୍ଥ୍ୟ ବିକାଶରେ ଗଣମାଧ୍ୟମର ଭୂମିକା ଗୁରୁତ୍ୱପୂର୍ଣ୍ଣ ବୋଲି ଫୁଲବାଣୀରେ ମଙ୍ଗଳବାର ଆୟୋଜିତ ଏ ସଂପର୍କିତ ଏକ ଦିବସୀୟ କର୍ମଶାଳାରେ ବକ୍ତା ମାନେ ମତପ୍ରକାଶ କରିଛନ୍ତି ।

ଆଲୋଚନାରେ ଅଂଶଗ୍ରହଣ କରି ବହୁ ବିଶିଷ୍ଟ ବ୍ୟକ୍ତି ଶିଶୁ ମୃତ୍ୟୁହାର କନ୍ଧମାଳ ଜିଲ୍ଲାରେ ଅତି ଉଦବେଗଜନକ ଅବସ୍ଥାରେ ଅଛି ବୋଲି କହିବା ସହ ଏହାକୁ ଦୂର କରିବାକୁ ହେଲେ ଗଣମାଧ୍ୟମ ଜନସଚେତନା ସୃଷ୍ଟିକରିବା ଦିଗରେ ମହତ୍ଵ ପୂର୍ଣ ଭୂମିକା ନେବା ପାଇଁ ବକ୍ତା ମାନେ ଆହ୍ଵାନ ଦେଇଥିଲେ ।

କନ୍ଧମାଳ ଜିଲ୍ଲାର ଗଣମାଧ୍ୟମ ପ୍ରତିନିଧିମାନଙ୍କୁ ନେଇ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କ ସମ୍ମୀଳନି କକ୍ଷରେ ୟୁନିସେଫ୍ ସହଯୋଗରେ ରାଜ୍ୟର ଅନ୍ୟତମ ଅଗ୍ରଣୀ ସାମାଜିକ ଅନୁଷ୍ଠାନ ପିପୁଲ୍ସ କଲଚରାଲ୍ ସେଣ୍ଟର (ପିକକ୍) ଏହି କର୍ମ ଶାଳାର ଆୟୋଜନ କରିଥିଲା ।

ପିକକର ସଂପାଦକ ରଂଜନ ମହାନ୍ତି ସଭାପତିତ୍ୱରେ ଏହି କର୍ଯ୍ୟକ୍ରମରେ ଅତିଥିଭାବେ କନ୍ଧମାଳ ଜିଲ୍ଲାର ଅତିରିକ୍ତ ଜିଲ୍ଲାପାଳ ପ୍ରଦିପ୍ତ କୁମାର ସାହାଣି, ଜିଲ୍ଲା ମୂଖ୍ୟ ଚିକିତ୍ସାଧିକାରୀ ଡ଼. ଜତିନ୍ଦ୍ର କୁମାର ପଟ୍ଟନାୟକ, ୟୁନିସେଫ୍ ର ଶ୍ରୀମତି ଅଳକା ଗୁପ୍ତା ଏବଂ ଡ଼. ମିନା ସୋମ୍ ଓ ବରିଷ୍ଠ ସାମ୍ବାଦିକ ଯତିନ୍ଦ୍ର ଦାଶ ଯୋଗ ଦେଇଥିଲେ ।

ପିକକ ସଂପାଦକ ରଂଜନ ମହାନ୍ତି ସମସ୍ତଙ୍କୁ ସ୍ୱାଗତ କରି ଗଣମାଧ୍ୟମର ଗୁରୁତ୍ୱ ପୂର୍ଣ୍ଣ ଭୂମିକା ଉପରେ ଆଲୋକ ପାତ କରିଥିଲେ । ୟୁନିସେଫ୍ ର ଅଳକା ଗୁପ୍ତା ଏହି କର୍ମଶାଳାର ଉଦ୍ଦେଶ୍ୟ ସମ୍ବନ୍ଧରେ ଗଣମାଧ୍ୟମ ପ୍ରତିନିଧି ମାନଙ୍କୁ ଅବଗତ କରିଥିଲେ । ଡ. ମିନା ସୋମ୍ ମା’ନବଜାତ ଶିଶୁ ଦେଶ, ରାଜ୍ୟ ତଥା କନ୍ଧମାଳ ଜିଲ୍ଲାର ସ୍ଥିତି ବିଷୟରେ ତଥ୍ୟ ଉପସ୍ଥାପନ କରିଥିଲେ ।

ଆଲୋଚନାରେ ଅଂଶଗ୍ରହଣ କରି ବହୁ ବିଶିଷ୍ଟ ବ୍ୟକ୍ତି ଶିଶୁ ମୃତ୍ୟୁହାର କନ୍ଧମାଳ ଜିଲ୍ଲାରେ ଅତି ଉଦବେଗଜନକ ଅବସ୍ଥାରେ ଅଛି ବୋଲି ମତବ୍ୟକ୍ତ କରିଥିଲେ । ଏହାକୁ ଦୂର କରିବାକୁ ହେଲେ ଗଣମାଧ୍ୟମ ଜନସଚେତନା ସୃଷ୍ଟିକରିବା ଆବଶ୍ୟକ ବୋଲି କହିଥିଲେ ।

ଜିଲ୍ଲା ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡ଼. ଜତିନ୍ଦ୍ର କୁମାର ପଟ୍ଟନାୟକ ନିଜର ବକ୍ତବ୍ୟ ରଖି ମା ଓ ଶିଶୁ ସ୍ୱାସ୍ଥ୍ୟର ଉନ୍ନତି ପାଇଁ ସରକାରଙ୍କର କାର୍ଯ୍ୟକ୍ରମର ବିଭିନ୍ନ ସୂଚନା ଦେଇଥିଲେ । ସରକାରଙ୍କର ଏହି ଯୋଜନା ଗୁଡିକର ସଫଳ ରୂପାୟନ ପାଇଁ ତଥା ସ୍ୱାସ୍ଥ୍ୟ ସଂପର୍କିତ ବ୍ୟାପକ ଜନସଚେତନତା ସୃଷ୍ଟି ପାଇଁ ସେ ଗଣମାଧ୍ୟମର ସହଯୋଗ କାମନା କରିଥିଲେ ।

ବରିଷ୍ଠ ସାମ୍ବାଦିକ ଜତିନ୍ଦ୍ର ଦାଶ ତାଙ୍କର ବକ୍ତବ୍ୟ ରଖି କହିଥିଲେ ଯେ ଅନ୍ୟ ଖବର ସହ ସମାଜରେ ହେଉଥିବା ବିଭିନ୍ନ ସକରାତ୍ମକ ପରିବର୍ତ୍ତନକୁ ସମାଜର ସାମ୍ନାକୁ ଆଣିବା ପାଇଁ ମଧ୍ୟ ଗଣମାଧ୍ୟମ ସଦା ସର୍ବଦା ଚେଷ୍ଟା କରିବା ଆବଶ୍ୟକ ।

କନ୍ଧମାଳ ଜିଲ୍ଲାର ପ୍ରାୟ ୬୦ରୁ ଉଦ୍ଧ୍ୱର୍ ବିଭିନ୍ନ ଖବର କାଗଜ ଓ ବୈଦୁତିକ ଗଣମାଧ୍ୟମର ପ୍ରତିନିଧିମାନେ ଏହି କାର୍ମଶାଳାରେ ଯୋଗ ଦେଇଥିଲେ । ଦୁଇଟି ଗାଁ ଯଥା ବଲସ୍କୁମ୍ପା ଓ ଅଡାବାଡି  ପରିଦର୍ଶନ କରି ଗ୍ରାମ୍ୟ ସ୍ତରର ବିଭିନ୍ନ ସ୍ୱାସ୍ଥ୍ୟ କର୍ମୀ ଓ ଅଙ୍ଗନୱାଡି କର୍ମୀ, ମା’ ଓ ଶିଶୁ ମାନଙ୍କ ସହିତ ସେମାନେ ସିଧା ସଳଖ ଆଲୋଚନା କରିଥିଲେ ।

ଏହି କାର୍ଯ୍ୟକ୍ରମରେ ଜିଲ୍ଲା ପ୍ରକଳ୍ପ ନିର୍ଦ୍ଦେଶକ ବୁଲୁ ନାଥ ସାହୁ , ଜିଲ୍ଲା ସୁଚନା ଅଧିକାରୀ ବସନ୍ତ କୁମାର ମହାନ୍ତି ପ୍ରମୁଖ ମଧ୍ୟ ଆଲୋଚନାରେ ଅଂଶଗ୍ରହଣ କରିଥିଲେ । ଶେଷରେ ସୁକାନ୍ତ କୁମାର ନାୟକ ଧନ୍ୟବାଦ ଅର୍ପଣ କରିଥିଲେ ।

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ଫେବୃଆରୀ ୨(ଓଡିଶା ଡଟ୍ କମ୍)-ଶୀତ କମିଲା ବଢିଲା କୁହୁଡି । କୁହୁଡି ଯୋଗୁଁ କଲବଲ ହେଉଛନ୍ତି ଉପକୂଳ ବାସୀ । ରାଜଧାନୀର ଜନଜୀବନ ଅସ୍ତବ୍ୟସ୍ତ ହୋଇ ପଡିଛି । ରାଜ୍ୟର ଅଧିକାଂଶ ଅଞ୍ଚଳରେ ସକାଳ ୯ଟା ପର୍ଯ୍ୟନ୍ତ କୁହୁଡି କମୁନାହିଁ ।

କୁହୁଡି ଯୋଗୁଁ ଭୁବନେଶ୍ୱରରେ ଜୀବନ ଯାତ୍ରା ପ୍ରଭାବିତ ହୋଇଛି । ବିମାନସେବାରେ ମଧ୍ୟ ବାଧା ଉପୁଜିଛି । ଗତ ଦୁଇ ଦିନ ହେଲାଣି ରାଜ୍ୟର ଉପକୁଳ ଅଞ୍ଚଳର ସକାଳ କୁହୁଡିରେ ଆଛାଦିତ ହୋଇ ରହୁଛି । ଆଭ୍ୟନ୍ତରିଣ ଜିଲ୍ଲାରେ କୁହୁଡି ରହୁନି ସତ ଶୀତର ପ୍ରକୋପ ଏପର୍ଯ୍ୟନ୍ତ କମି ନାହିଁ ।

ଫୁଲବାଣୀ ଓ ସୁନ୍ଦରଗଡ଼ ଜିଲାକୁ ଛାଡ଼ିଦେଲେ ରାଜ୍ୟର ଅନ୍ୟ ସମସ୍ତ ଜିଲାରେ ସର୍ବନିମ୍ନ ତାପମାତ୍ରା ୧୦ଡ଼ିଗ୍ରୀ ସେଲସିୟସ ଉପରେ ରହିଛି । ଫୁଲବାଣୀରେ ରାତିର ସର୍ବନିମ୍ନ ତାପମାତ୍ରା ୬ଡ଼ିଗ୍ରୀ ଥିବାବେଳେ ଏହାର ଆଖପାଖ ଅଞ୍ଚଳରେ ସର୍ବନିମ୍ନ ତାପମାତ୍ରା ୫ଡ଼ିଗ୍ରୀ ତଳେ ରହିଛି ।

ତେବେ ଆସନ୍ତା ୨୪ ଘଣ୍ଟା ମଧ୍ୟରେ ଅଳ୍ପ କେତେକ ଅଞ୍ଚଳକୁ ବାଦଦେଲେ ରାଜ୍ୟର ବାକି ଅଞ୍ଚଳରେ ଶୀତ ପ୍ରକୋପ କମିବ । ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ଘନ କୁହୁଡ଼ି ଦେଖାଦେବ ବୋଲି ଭୁବନେଶ୍ୱର ପାଣିପାଗ କେନ୍ଦ୍ର ସୂତ୍ରରୁ ଜଣାପଡ଼ିଛି ।

ଓଡିଶା ଡଟ୍ କମ୍

 

ଓଡିଶା ଡଟ୍ କମ୍: ସୀମାଂଚଳ ପଟନାୟକ

ଫୁଲବାଣୀ,ଡିସେମ୍ବର ୩୧(ଓଡିଶା ଡଟ୍ କମ୍ )- କନ୍ଧମାଳ ଜିଲ୍ଲା କୋଟପାଡ ଥାନା ଅନ୍ତର୍ଗତ ଶ୍ରୀରାମପୁରରେ ଗତ ଜାନୁୟାରୀରେ ହୋଇଥିବା ଲ୍ୟାଣ୍ଡ ମାଇନ୍ ବିସ୍ଫୋରଣ ଘଟଣା ଏବେ ଜାତୀୟ ମାନବାଧିକାର କମିସନଙ୍କ ନିକଟରେ ପହଞ୍ଚିଛି ।

୨୦୧୨ ଜାନୁୟାରୀ ୫ ତାରିଖରେ ଏହି ଲ୍ୟାଣ୍ଡ ମାଇନ୍ ବିସ୍ଫୋରଣ ହୋଇଥିଲା । ଏଥିରେ କନ୍ଧମାଳ ରିଜର୍ଭ ବାଟାଲିଅନ୍ ର ୩ ଜଣ ଯବାନ ପ୍ରାଣ ହରାଇଥିଲେ । ଏମାନେ ହେଲେ ଫୁଲବାଣୀ ସାହିର ସୁନାସିର ଲେଙ୍କା, ପିଅନ ପଡାର ଉମା ଜାନୀ ଓ ତି୍ରତ୍ରାପଙ୍ଗାର ସଂଗ୍ରାମ ଲେଙ୍କା ।

ପୁଲିସ୍ ବିଭାଗର ଉଚ୍ଚାଧିକାରୀମାନେ ଷ୍ଟାଣ୍ଡାର୍ଡ ଅପରେସନ ପ୍ରୋସିଡିୟୋର(ଏସ୍ଓପି) ଉଲଂଘନ କରି ଯବାନମାନଙ୍କୁ ପଠାଇଥିବାରୁ ଏଭଳି ଘଟିଲା ବୋଲି ଅଭିଯୋଗ ହୋଇଥିଲା ।

ଏହା ଦ୍ୱାରାମାନବାଧିକାର ଉଲଂଘନ ହୋଇଛି ବୋଲି ଦର୍ଶାଇ ରାଜ୍ୟସ୍ତରୀୟ ମାନବାଧିକାର ସଂଗଠନ ‘ଇଣ୍ଡିଆ ମିଡିଆ ସେଂଟର’ର ମ୍ୟାନେଜିଂ ଟ୍ରଷ୍ଟି ତଥା ମାନାବାଧିକାର କର୍ମୀ ଶ୍ରୀ ଅଖଣ୍ଡ ଜାତୀୟ ମାନବାଧିକାର କମିସନଙ୍କ ନିକଟରେ ପିଟିସନ ଦାୟର କରିଥିଲେ ।

ପୂର୍ବଦିନ ହୋଇଥିବା ଏକ ଲାଣ୍ଡମାଇନ୍ ବିସ୍ଫୋରଣର ତଦାରଖ ପାଇଁ ଯବାନମାନଙ୍କୁ ପଠାଯାଇଥିଲା । କିନ୍ତୁ ଏସ୍ଓପି ଅନୁଯାୟୀ ଲାଣ୍ଡମାଇନ୍ ଘଟିଥିବା ରାସ୍ତାରେ ପୋଲିସ୍ ଭେହିକିଲ୍ ଯିବା କଥା ନୁହେଁ ।

ପୁଣି ଯବାନମାନଙ୍କ ସହ କେହି ଅଫିସର ମଧ୍ୟ ନଥିଲେ ବୋଲି ପିଟିସନକାରୀ ଅଖଣ୍ଡ କମିସନଙ୍କୁ ଜଣାଇଛନ୍ତି । କମିସନ ମାମଲାକୁ ବିଚାର ପାଇଁ ଗ୍ରହଣ କରିଛନ୍ତି । କେସ୍ ନମ୍ବର ୫୬୧୯/୧୮/୨୬/୨୦୧୨ରେ ମାମଲା ରୁଜୁ ହୋଇଛି ।

ଏସ୍ଓପି ଉଲଂଘନ ଘଟଣାର ତଦନ୍ତ କରିବା ସହ ଦୋଷୀ ପୁଲିସ୍ ଅଧିକାରୀଙ୍କ ବିରୋଧରେ କାର୍ଯ୍ୟାନୁ୍ଷ୍ଠାନ ପାଇଁ କମିସନଙ୍କ ନିକଟରେ ନିବେଦନ କରାଯାଇଛି । ଏହି ମାମଲାରେ ଗୃହ ସଚିବ, ପୁଲିସ୍ ଡିଜି ଓ ଆଇଜି ଅପରେସନଙ୍କୁ ପକ୍ଷଭୁକ୍ତ କରାଯାଇଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୮(ଓଡିଶା ଡଟ୍ କମ୍ )- ସାରା ରାଜ୍ୟରେ ପ୍ରଚଣ୍ଡ ଜାଡ଼ ଅନୁଭୂତ ହେଉଥିବାବେଳେ ଆହୁରି ଉପକୂଳ ଓଡିଶାରେ ୨୪ଘଣ୍ଟା ଏବଂ ଆଭ୍ୟନ୍ତରିଣ ଅଞ୍ଚଳରେ ୪୮ ଘଣ୍ଟା ଧରି ଶୀତ ପ୍ରକୋପ ଲାଗି ରହିବ ବୋଲି ପାଣି ପାଗ ବିଭାଗ ଆକଳନ କରିିଛି ।

ଭୁବନେଶ୍ୱର ପାଣିପାଗ କେନ୍ଦ୍ରର ସୂଚନା ଅନୁସାରେ ଓଡିଶାକୁ ଉତର ଓ ପଶ୍ଚିମ ଦିଗରୁ ଥଣ୍ଡା ପବନ ବହୁଥିବାରୁ ଶୀତ ପ୍ରକୋପ ଲାଗିରହିଛି । ୫ ଦିନ ଧରି ଲାଗିରହିଥିବା ଶୀତର ପ୍ରକୋପ ଆଜି ମଧ୍ୟ ଲାଗି ରହିଛି । ଆସନ୍ତା ୨୪ଘଣ୍ଟା ମଧ୍ୟରେ ଅଭ୍ୟନ୍ତରୀଣ ଓ ଉତର ଉପକୂଳରେ ଶୀତ ପ୍ରବାହ ଲାଗିରହିବ ।

ରାଜ୍ୟର ସର୍ବନିମ୍ନ ତାପମାତ୍ରା ଫୁଲବାଣୀଠାରେ ସବୁଠୁ ତଳେ ରହିଛି । ଏଠାରେ କ୍ରମାଗତ ଭାବେ ଦୁଇଦିନ ହେଲା ତାପମାତ୍ରା ୩ଡିଗ୍ରୀ ରହୁଥିବାବେେଳେ ଆଜି ୨ଡିଗ୍ରୀ ସେଲସିୟସ ଥିବା ରେକର୍ଡ଼ କରାଯାଇଛି ।

ରାଜ୍ୟର ୧୨ଟି ସ୍ଥାନରେ ପାରଦ ୧୦ଡିଗ୍ରୀ ତଳେ ଥିବା ଭୁବନେଶ୍ୱର ପାଣିପାଗ କେନ୍ଦ୍ର ସୂତ୍ରରୁ ଜଣାପଡ଼ିଛି । କଟକର ତାପମାତ୍ରା ୧୦.୫ଡିଗ୍ରୀ ଥିବାବେଳେ ଭୁବନେଶ୍ୱରର ସର୍ବନିମ୍ନ ତାପମାତ୍ରା ୧୦.୭ଡିଗ୍ରୀ ସେଲସିୟସ ରହିଥିବା ସୂଚନା ମିଳିଛି ।

ଅଧିକାଂଶ ଅଞ୍ଚଳରେ ଘନ କୁହୁଡ଼ି ଯୋଗୁ ସ୍ୱାଭାବିକ ଜୀବନଯାତ୍ରା ବାଧାପ୍ରାପ୍ତ ହୋଇଛି ।ସୁନ୍ଦରଗଡ ବାରିପଦାରେ ସର୍ବନିମ୍ନ ତାପମାତ୍ରା ୫ଡିଗ୍ରୀ ସେଲସିୟସ ଥିବାବେଳେ , କେନ୍ଦୁଝରଗଡ଼ରେ ୬, ସମ୍ବଲପୁରରେ ୬.୫, ବଲାଙ୍ଗୀରରେ ୭.୧, ଝାରସୁଗୁଡ଼ା ଓ ଭବାନୀପାଟଣାରେ ୮, ବାଲେଶ୍ୱରରେ ୯, ହୀରାକୁଦରେ ୯.୪, କୋରାପୁଟରେ ୯.୫, ଅନୁଗୋଳରେ ୯.୬ ଡିଗ୍ରୀ ରହିଛି ।

ତାପମାତ୍ରା ରେକର୍ଡ଼ିଂ କରାଯାଉଥିବା ୨୨ଟି କେନ୍ଦ୍ର ମଧ୍ୟରୁ ୧୨ଟି ସ୍ଥାନରେ ସର୍ବନିମ୍ନ ତାପମାତ୍ରା ୧୦ଡିଗ୍ରୀ ତଳେ ଥିବାବେଳେ ଅନ୍ୟ ୧୦ଟି କେନ୍ଦ୍ର ମଧ୍ୟରୁ ଗୋପାଳପୁର ଓ ପାରାଦ୍ୱୀପକୁ ବାଦ ଦେଲେ ଅନ୍ୟ ସବୁଠି ସର୍ବନିମ୍ନ ତାପମାତ୍ରା ୧୪ଡିଗ୍ରୀ ତଳେ ରହିଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଫୁଲବାଣୀ,ଡିସେମ୍ବର ୨୪(ଓଡିଶା ଡଟ୍ କମ୍)-ଉତର ଓ ଉତର ପଶ୍ଚିମ ଦିଗରୁ ପ୍ରବଳ ଥଣ୍ଡା ପବନ ବହିବା ଯୋଗୁଁ ଫୁଲବାଣୀ ସମେତ ସମଗ୍ର କନ୍ଧମାଳ ଜିଲ୍ଲା ଶୀତରେ ଥରୁଥିବା ବେଳେ ତାପମାତ୍ରା ଖସିବାରେ ଲାଗିଛି । ପ୍ରବଳ ଥଣ୍ଡା ଅନୁଭୂତ ହୋଇଛି ।

ଫୁଲବାଣୀ ସହରରେ ତାପମାତ୍ରା ଗତକାଲି ୩.୨ ଡିଗ୍ରୀ ସେଲସିଅସ ରହିଥିବାବେଳେ ସୋମବାର ଦିନ ୩ ଡିଗ୍ରୀ ରହିଛି । ଓଡିଶାର କାଶ୍ମୀର କୁହାଯାଉଥିବା ଦାରିଙ୍ଗବାଡିରେ ତାପମାତ୍ରା ଶୂନ ଡିଗ୍ରୀକୁ ଖସି ଆସିଥିବାବେଳେ ବେଲଘର,ସୁବର୍ଣ୍ଣପୁର ଅଞ୍ଚଳରେ ପାରଦ ୧ ଡିଗ୍ରୀ ସେଲସିଅସ ରହିଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଫୁଲବାଣୀ,ଅକ୍ଟୋବର ୧୨ (ଓଡିଶା ଡଟ୍ କମ୍)-କୁଇନେତା ଲମ୍ବୋଦର କହଁରଙ୍କ ଗିରଫ ପ୍ରତିବାଦରେ ତାଙ୍କର ସମର୍ଥକମାନେ ଶୁକ୍ରବାର ଦେଇଥିବା ଫୁଲବାଣୀ ବନ୍ଦ ଡାକରା ଆଂଶିକ ସଫଳ ହୋଇଥିଲେ ମଧ୍ୟ ଶାନ୍ତିପୂର୍ଣ୍ଣ ଭାବେ ଶେଷ ହୋଇଛି ।

ବନ୍ଦର ପ୍ରଭାବରେ ଦୋକାନବଜାର ସମେତ କିଚି ସମୟ ପାଇଁ ଗାଡି ଚଳାଚଳ ବନ୍ଦ ରହିଥିଲା । ଏଥିସହିତ ଆନ୍ଦୋଳନକାରୀମାନେ ଟାୟାର ଜାଳି ରାସ୍ତା ଅବରୋଧ କରିଥିଲେ ।

ବନ୍ଦର ପ୍ରଭାବ ଫୁଲବାଣୀ ସମେତ ଟିକାବାଲି ଅଞ୍ଚଳରେ ମଧ୍ୟ ଦେଖିବାକୁ ମିଳିଥିଲା । ବନ୍ଦଯୋଗୁଁ ସହରର ସମସ୍ତ ଦୋକାନ ବଜାର, ସ୍କୁଲ କଲେଜ ବନ୍ଦ ଥିବାବେଳେ ସରରକାରୀ କାର୍ଯ୍ୟାଳୟ ଗୁଡିକ ସ୍ୱାଭାବିକ ଖୋଲା ରହିଥିଲା ।

ଆଇନ ଶୃଙ୍ଖଳା ପରିସ୍ଥିତି ଦୃଷ୍ଟିରୁ ସହରର ବିଭିନ୍ନ ସ୍ଥାନରେ ପୋଲିସ ଫୋର୍ସ ମୁତୟନ କରା ଯାଇଥିଲା ।

ଏହି ବନ୍ଦକୁ ଫୁଲବାଣୀ ବିଧାୟକ ଦେବେନ୍ଦ୍ର କହଁର ଠିକ୍ ନୁହେଁ ବୋଲି କହିଛନ୍ତି । ଏହି ବନ୍ଦ ଯୋଗୁଁ ସାଧରଣ ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖିନ ହୋଇଛନ୍ତି ।

ସୂଚନା ଯୋଗ୍ୟ ଶିକ୍ଷା ସହାୟକ ପାର୍ଥୀଙ୍କୁ ବିଚ ରାସ୍ତାରେ ମାଡମାରି ଆକ୍ରମଣ କରିବା ଓ ସେମାନଙ୍କ ସାର୍ଟିଫିକେଟ ଚିରିବା ଘଟଣାରେ ଗତକାଲି ରାତିରେ ଫୁଲବାଣୀ ଟାଉନ ଥାନା ପୋଲିସ ଦୁଇ ସମାଜ ସମନ୍ୱୟ ସମିତି ଆବାହକ ଲମ୍ବୋଦର କହଁରଙ୍କୁ ଗିରଫ ଜେଲେକୁ ପଠାଇଦେଇ ଥିଲେ ।

ଏହି ଘଟଣାରେ ଆଉ କିଛି ଅଭିଯୁକ୍ତଙ୍କୁ ଗିରଫ କରିବା ପାଇଁ ପୋଲିସ ଖୋଜୁଛି । ଘଟଣାସ୍ଥଳର ଭିଡିଓ ଚିତ୍ରକୁ ତନ୍ନତନ୍ନକରି ପୋଲିସ ଦେଖି ଅନ୍ୟ ଅଭି ଯୁକ୍ତମାନଙ୍କୁ ଚିହ୍ନଟ କରି ସେମାନଙ୍କ ନାମ ତାଲିକା ସହ ଠିକଣା ସଂଗ୍ରହ କରୁଛି । ସେମାନଙ୍କୁ ଅତିଶୀଘ୍ର ଗିରଫ କରାଯିବ ବୋଲି ପୋଲିସ କହିଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଫୁଲବାଣୀ,ଅକ୍ଟୋବର ୧୧ (ଓଡିଶା ଡଟ୍ କମ୍)-ଶିକ୍ଷା ସହାୟକ ପଦରେ ନିଯୁକ୍ତି ପାଇଁ ଅନ୍ୟ ଜିଲ୍ଲାରୁ ଆସିଥିବା କେତେକ ଆବେଦନକାରୀଙ୍କ ଉପରେ ମଙ୍ଗଳବାର ହୋଇଥିବା ଆକ୍ରମଣ ଘଟଣାରେ ପୋଲିସ ଗୁରୁବାର କଦୁଇ ସମାଜ ସମନ୍ୱୟ ସମିତି ଆବାହକ ଲମ୍ବୋଦର କହଁରଙ୍କୁ ଗିରଫ ଗିରଫ କରିଥିବା କହିଛି ।

ସ୍ଥାନୀୟ ଅଦାଲତରେ କହଁରଙ୍କର ଜାମିନ ନାମଞ୍ଜୁର ହୋଇଯିବାରୁ ତାଙ୍କୁ ୧୪ ଦିନ ପାଇଁ ବିଚାରବିଭାଗୀୟ ହାଜତ କୁ ପଠାଇଦିଆଯାଇଥିବା ଜିଲ୍ଲାର ଜଣେ ବରିଷ୍ଠ ପୋଲିସ ଅଧିକାରୀ ଓଡ଼ିଶା ଡ଼ଟ୍ କମ୍ କୁ କହିଛନ୍ତି ।

ଏଠାରେ ଉଲ୍ଲେଖଯୋଗ୍ୟ ଯେ, ସ୍ଥାନୀୟ ପିଲାଙ୍କୁ ଚାକିରୀ ମିଳୁନଥିବା ଅଭିଯୋଗ କରି କୁଇସମାଜର କର୍ମକର୍ତ୍ତାମାନେ ଅନ୍ୟ ଜିଲ୍ଲାରୁ ଆସିଥିବା ଆବେଦନକାରୀଙ୍କୁ ସାର୍ଟିଫିକେଟ୍ ଯାଞ୍ଚ କରିବାର ସୁଯୋଗ ଦେଇନଥିଲେ ।

ଏହାର କର୍ମକର୍ତ୍ତାମାନେ କେତେକ ଆବେଦନକାରୀଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରୁଥିବା ଦେଖାଯାଇଥିଲା । ଏପରିକି ଜଣେ ଆବେଦନକାରୀଙ୍କୁ କହଁର ଏକ ବାଡ଼ିରେ ପିଟୁଥିବାର ଦୃଶ୍ୟ କେତେକ ଟିଭି ଚ୍ୟାନେଲ ପ୍ରଦର୍ଶିତ କରିଥିଲେ ।

କେତେକ ଆବେଦନକାରୀଙ୍କ ଅଭିଯୋଗ ପରେ ଏହି ଘଟଣାରେ ପୋଲିସ ତିନୋଟି ମାମଲା ରୁଜୁ କରିଥିଲା ।ଗିରଫ ହେବାପରେ କଦୁଇ ସମାଜ ସମନ୍ୱୟ ସମିତି ଆବାହକ ଲମ୍ବୋଦର କହଁର କହିଛନ୍ତି ତାଙ୍କୁ ଅନ୍ୟାୟ ଭାବରେ ଗିରଫ କରା ଯାଇଛି । ତାଙ୍କ ନାମରେ ମିଥ୍ୟାମାମଲା ରୁଜୁ କରା ଯାଇଛି ।

ସେ ଯାହା କରିଛନ୍ତି ସମଗ୍ର କନ୍ଧମାଳବାସୀ ପାଇଁ କରିଛନ୍ତି । ତାଙ୍କ ଗିରଫରେ ଯଦି ଜିଲାବାସୀ ଉପକୃତ ହୁଅନ୍ତି ତେବେ ସେ ଏ ଗିରଫକୁ ସ୍ୱାଗତ କରିବେ । ଜିଲ୍ଲାବାସୀ ଉପକୃତ ପାଇଁ ସେ ବାରମ୍ବାର ଗିରଫହେଲେ ମଧ୍ୟ ତାଙ୍କ ମନରେ ଦୁଃଖନାହିଁ ।

ଓଡିଶା ଡଟ୍ କମ୍