ବଲାଙ୍ଗୀର

ଓଡିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୩୧(ଓଡିଶା ଡ଼ଟ୍ କମ୍ )- ଗୁରୁବାରଠାରୁ ଆରମ୍ଭ ହୋଇଛିି ଆଇସିସି ମହିଳା ବିଶ୍ୱକପ । ଏହି ଟୁର୍ଣ୍ଣାମେଣ୍ଟର ଉଦଘାଟନୀ ମ୍ୟାଚ ମୁମ୍ବଇର ବ୍ରାବୋର୍ଣ୍ଣ ଷ୍ଟାଡିୟମରେ ଆୟୋଜକ ଭାରତ ଓ ୱେଷ୍ଟଇଣ୍ଡିଜ ମହିଳା ଦଳ ମଧ୍ୟରେ ଗ୍ରୁପ ‘ଏ’ର ପ୍ରଥମ ଲିଗ ମ୍ୟାଚ ଅନୁଷ୍ଠିତ ହୋଇଅଛି ।

ଏହି ବିଶ୍ୱକପ୍ ରେ ଓଡିଆ ଝିଅ ରୋସନାର ଅଫ୍ ସ୍ପିନର ଭାବେ ଭାରତୀୟ ଦଳରେ ସ୍ଥାନ ପାଇଛନ୍ତି । ସେ ୱେଷ୍ଟଇଣ୍ଡିଜ ବିପକ୍ଷ ଉଦଘାଟନୀ ମ୍ୟାଚ ଖେଳିଛନ୍ତି ।

ଉଲ୍ଲେଖଯୋଗ୍ୟ ଯେ,ବଲାଙ୍ଗୀରର ରୋସନାରା ପୂର୍ବରୁ ଶ୍ରୀଲଙ୍କାରେ ଅନୁଷ୍ଠିତ ଟି-୨୦ ବିଶ୍ୱକପ୍ ଖେଳି ସାରିଛନ୍ତି । ସେ ସେଠାରେ ସୁନ୍ଦର ପ୍ରଦର୍ଶନ କରିଥିଲେ । ସେଥିପାଇଁ ଜାତୀୟ ଚୟନକର୍ତା ଏହି ବିଶ୍ୱକପ୍ ଖେଳିବା ପାଇଁ ତାଙ୍କୁ ମନୋନୀତ କରିଥିଲେ ।

ଓଡିଶା ଡ଼ଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ବଲାଙ୍ଗୀର, ଜାନୁଆରୀ ୧୪(ଓଡିଶା ଡଟ୍ କମ୍)-ମଙ୍ଗଳବାର ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକ ଅନ୍ତର୍ଗତ ଖଇରଗୁଡା ଗ୍ରାମରେ ଆଦିବାସୀଙ୍କ ପ୍ରସିଦ୍ଧ ସୁଲିଆ ଯାତ୍ରା । ଯାତ୍ରା କମିଟି ଏଥିପାଇଁ ସମସ୍ତ ପ୍ରକାର ବ୍ୟବସ୍ଥା କରିଛି । ଅନ୍ୟପଟରେ ମୁଖ୍ୟ ଖଳାରେ ପଶୁ ବଳି ନିଷେଧ କରିବା ପାଇଁ ପ୍ରଶାସନ ୧୪୪ ଧାରା ଲାଗୁ କରିଛି ।

ଆସନ୍ତାକାଲି ୩ ମାଜିଷ୍ଟେଡ ଓ ୨ ପ୍ଲାଟୁନ ପୋଲିସ ଫୋର୍ସ ଯାଇ ଶାନ୍ତିଶୃଙ୍ଖଳା ରକ୍ଷା କରିବେ ବୋଲି ବଲାଙ୍ଗୀର ଉପଜିଲ୍ଲାପାଳ ଜ୍ୟୋତି ରଞ୍ଜନ ପ୍ରଧାନ କହିଛନ୍ତି ।

ଖଇରଗୁଡା ଗ୍ରାମର ସୁଲିଆ ପାହାଡର ପାଦଦେଶରେ ରହିଛି ସୁଲିଆ ଦେବତାଙ୍କ ପୀଠ । ପ୍ରତିବର୍ଷ ପୌଷମାସ ଶୁକ୍ଲପକ୍ଷ ଦ୍ୱିତୀୟ ମଙ୍ଗଳବାରରେ ଏଠାରେ ପୂଜାର୍ଚ୍ଚନା ସହ ହଜାର ହଜାର ପଶୁବଳି ଦିଆଯାଇଥାଏ ।

ମାନସିକ କରି ଲୋକମାନେ ପୋଢ,ଛେଳି ଓ କୁକୁଡାକୁ ବଳି ଦେଇଥାନ୍ତି । ବଳିକୁ ବନ୍ଦ କରିବାକୁ ବହୁ ସ୍ୱଚ୍ଛାସେବୀ ଦାବିକରି ହାଇକୋର୍ଟ ଯିବାପରେ ମାନ୍ୟବର କୋର୍ଟ ବଳିନପକାଇବାକୁ ନିଦେ୍ର୍ଧଶ ଦେଲେ । ତଥାପି ଆଦିବାସୀମାନେ ନୂଆଖଳା ଓ କୁମରିଆ ଗ୍ରାମର ସାନଖଳାରେ ବଳିଦେବା ଆରମ୍ଭ କଲେ ।

ମୁଖ୍ୟଖଳାରେ ପ୍ରଶାସନ ପକ୍ଷରୁ ପ୍ରତିବର୍ଷ ୧୪୪ ଧାରା ଲାଗୁ କରି ବଳି ଦେବାକୁ ବାରଣ କରୁଛନ୍ତି କିନ୍ତୁ ପୋଲିସ ଓ ମାଜିଷ୍ଟେଟଙ୍କ ଉପସ୍ଥିତିରେ ତଥାପି ବଳି ପଡୁଛି ।

ଚଳିତବର୍ଷ ମଧ୍ୟ ଆଦିବାସୀ ନେତାଙ୍କ ସହ ପ୍ରଶାସନ ଆଲୋଚନା କରିଥିଲା । ବଳିବନ୍ଦ ପାଇଁ ନିବେଦନ କରିଥିଲା । କିନ୍ତୁ ଆଦିବାସୀ ପରମ୍ପରା ବଜାୟ ରଖିବାକୁ ଜିଦ୍ ଧରି ସୁଲିଆପିଠରେ ବଳି ପଡିବ ବୋଲି କହିଛନ୍ତି ଆଦିବାସୀ କଲ୍ୟାଣ ମହାସଂଘର ସଭାପତି ବ୍ରଜ କିଶୋର ସିଂ ଭୋଇ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୫(ଓଡିଶା ଡଟ୍ କମ୍ )-୨୦୧୩ ଜାନୁୟାରୀ ୩୧ରୁ ଫେବୃୟାରୀ ୧୭ ପର୍ଯ୍ୟନ୍ତ ବମ୍ବେରେ ଆୟୋଜିତ ହେବ ଆଇସିସି ମହିଳା କ୍ରିକେଟ ବିଶ୍ୱକପ । ଏହଥିପାଇଁ ସୋମବାର ଘୋଷିତ ଭାରତୀୟ ଦଳରେ ଓଡିଶାର ରୋଶନ୍ନାରା ପରବିନ ସ୍ଥାନ ପାଇଛନ୍ତି ।

ଚଳିତବର୍ଷ ଆଇସିସି ମହିଳା ଟ୍ୱେଂଟି୨୦ ବିଶ୍ୱକପ ଓ ଟ୍ୱେଂଟି୨୦ ଏସିଆ କପ ପରେ ୫୦ ଓଭରର ବିଶ୍ୱକପ ଲାଗି ଭାରତୀୟ ଦଳରେ ସ୍ଥାନ ପାଇଛନ୍ତି ବଲାଙ୍ଗୀରର ରୋଶନ୍ନାରା । ପ୍ରଥମ ଓଡ଼ିଆ ଭାବେ ମହିଳା ଟ୍ୱେଂଟି୨୦ ବିଶ୍ୱକପ ଖେଳିବାର ଗୌରବ ହାସଲ କରିଥିବା ରୋଶନ୍ନାରା ପ୍ରଥମ ଓଡ଼ିଆ ଭାବେ ବିଶ୍ୱକପ ଖେଳିବାକୁ ସୁଯୋଗ ପାଇଛନ୍ତି ।

ରୋଶନ୍ନାରା ବିଶ୍ୱକପ ପାଇଁ ଭାରତୀୟ ଦଳରେ ସ୍ଥାନ ପାଇଥିବାରୁ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଓସିଏ ସମ୍ପାଦକ ଆଶୀର୍ବାଦ ବେହେରା ତାଙ୍କୁ ଅଭିନନ୍ଦନ ଜଣାଇବା ସହ ତାଙ୍କର ସଫଳତା କାମନା କରିଛନ୍ତି ।

ହାଟପଦାପଡ଼ା ନିକଟସ୍ଥ ବିଭୁତି ପଡ଼ାରେ ଭଡ଼ା ଘରେ ରହନ୍ତି ରୋଶନ୍ନାରା । ରୋଶନ୍ନାରାଙ୍କ ବାପା କେଫାତୁଲ୍ଲା ଖାନ ଜଣେ ଛୋଟ ବ୍ୟବସାୟୀ । କୋଚ୍ ଅରୁଣ ନାୟକଙ୍କ କହିବା ହେଲା, ଏସିଆ କପ୍ ପରେ ଭାରତ-ଅଷ୍ଟ୍ରେଲିଆ ସିରିଜ୍କୁ ଦୃଷ୍ଟିରେ ରଖି ରୋଶନ୍ନାରା କଠିନ ପରିଶ୍ରମ କରିଛି ଏବଂ ଏହି ସିରିଜ୍ ରେ ଉନ୍ନତମାନର ଖେଳ ପ୍ରଦର୍ଶନ କରି ଟିମ୍କୁ ସଫଳତା ଦେବା ସେ ଲକ୍ଷ୍ୟ ରଖିଛି ।

ଏହା ସହ ରୋଶନ୍ନାରା ଜଣେ ଭଲ ସ୍ପିନର ହୋଇଥିବାରୁ ଏଥର ରୋଶନ୍ନାରାଙ୍କ ବୋଲିଂ ପ୍ରଦର୍ଶନ ଉଚ୍ଚକୋଟୀର ହେବ ବୋଲି ଶ୍ରୀ ନାୟକ କହନ୍ତି ।
ବଲାଙ୍ଗୀରର ୨୧ ବର୍ଷ ବୟସ୍କା ରୋଶନ୍ନାରା ଚଳିତବର୍ଷ ପ୍ରଥମଥର ପାଇଁ ଶ୍ରୀଲଙ୍କାରେ ଆୟୋଜିତ ୨୦୧୨ ମହିଳା ଟ୍ୱେଂଟି ୨୦ ପାଇଁ ଭାରତୀୟ ଦଳରେ ସ୍ଥାନ ପାଇ ଚମତ୍କାର ବୋଲିଂ କରିଥିଲେ ।

ପରେ ଅକ୍ଟୋବରରେ ଚୀନରେ ଆୟୋଜିତ ମହିଳା ଟ୍ୱେଂଟି୨୦ ଏସିଆ କପରେ ମଧ୍ୟ ରୋଶନ୍ନାରା ଭାରତୀୟ ଦଳରେ ସ୍ଥାନପାଇ ଭଲ ପ୍ରଦର୍ଶନ କରିଥିଲେ । ଭାରତୀୟ ମହିଳା କ୍ରିକେଟ ଦଳରେ ସ୍ଥାନ ପାଇବାରେ ରୋଶନ୍ନାରା ୨ୟ ଓଡ଼ିଆ । ତାଙ୍କ ପୂର୍ବରୁ ସେହି ବଲାଙ୍ଗୀରର ମାଧୁରୀ ମେହେଟ୍ଟା ଭାରତୀୟ ଦିନିକିଆ ଦଳରେ ସ୍ଥାନପାଇ ୱେଷ୍ଟଇଣ୍ଡିଜ ଗସ୍ତ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୦(ଓଡିଶା ଡଟ୍ କମ୍)-ଗତ ୧୨ ତାରିଖରେ ବିଧାନସଭାରୁ ନିଲମ୍ବିତ ହୋଇଥିବା କଣ୍ଟାବଞ୍ଝିର କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ସାତ ଦିନପରେ ଗୁରୁବାର ଦିନ ଗୃହକୁ ଫେରିଛନ୍ତି ।

ପ୍ରଶ୍ନ କାଳରେ ଶ୍ରୀ ସାଲୁଜା ପାଟିରେ ଧଳା କପଡା ବାନ୍ଧି ଜୟ ବଲାଙ୍ଗୀର,ଆମର ଦାବି ଲୋୟର ସୁକତେଲ ଲୋଖା ଥିବା ବ୍ୟାନରକୁ ନିଜ ଆସନରେ ଠିଆ ହୋଇ ପଦର୍ଶିତ କରିଥିଲେ ।

ପ୍ରଶ୍ନୋତର କାଳ ଶେଷ ପର୍ଯ୍ୟନ୍ତ ସେ ନିଜ ଆସନରେ ଠିଆ ହୋଇ ରହିଥିଲେ । ପ୍ରଶ୍ନୋତର କାଳରେ ବାଚସ୍ପତି ପ୍ରଦୀପ କୁମାର ଅମାତ ବିଜେଡି ବିଧାୟକ ପ୍ରଦୀପ ମହାରଥୀଙ୍କୁ ଧ୍ୟାନ ଆକର୍ଷଣକାରୀ ନୋଟିସ୍ ରେ କହିବାକୁ ଡାକିଥିଲେ ।

ଏହା ପ୍ରତିବାଦରେ କଂଗ୍ରେସ ବିଧାୟକ ସୁରେନ୍ଦ୍ର ସିଂ ଭୋଇ,ନବ କିଶୋର ଦାସ,ଦେବୀ ପ୍ରସାଦ ଚାନ୍ଦ ପ୍ରମୁଖ ଗୃହର ମଧ୍ୟଭାଗକୁ ଆସି ବିଧାୟକ ଶ୍ରୀ ସାଲୁଜାଙ୍କୁ କହିବାକୁ ସୁଯୋଗ ଦେବାପାଇଁ ଦାବି କରିଥିଲେ ।

ବାଚସ୍ପତି ଶ୍ରୀ ମହାରଥୀଙ୍କ ପରେ କହିବାକୁ ସୁଯୋଗ ଦିଆଯିବ ବୋଲି କହିବା ପରେ ସଦସ୍ୟମାନେ ନିଜ ନିଜ ଆସନକୁ ଫେରିଥିଲେ । ସାଲୁଜା କହିଲେ ମନ୍ତ୍ରୀମାନେ ଗୃହକୁ ବିଭ୍ରାନ୍ତ କରୁଛନ୍ତି । ଗୋଟିଏ ପ୍ରଶ୍ନର ଉତର ମାସକ ତଳେ ଯାହା ଥିଲା ପରବର୍ତୀ ସମୟରେ ତାହା ବଦଳି ଯାଉଛି । ଆଲୋଚନା ପାଇଁ ସୁଯୋଗ ମିଳୁ ନାହିଁ ।

ବୋକଚାବୁହା ନୁହେଁ ବୁଚୁକାବୁହା କହିଥିଲି । ମାତ୍ର ମୋତେ ଦଣ୍ଡ ମିଳିଲା । ହେଲେ ଯେଉଁମାନେ ବୋକଚାବୁହା କହିଲେ ସେମାନେ ଖସିଗଲେ । ତାଙ୍କୁ ଗୃହରୁ ୭ଦିନ ପାଇଁ ନିଲମ୍ବିତ କରାଯିବା ନେଇ ସେ ଦୁଃଖିତ ନୁହଁନ୍ତି ।

କାରଣ ସେ ବଲାଙ୍ଗୀରର କଥିତ ଭାଷାକୁ ଅନ୍ୟମାନେ କହୁଛନ୍ତି ବୋଲି କହି ଉଲ୍ଲେଖ କରିଥିଲେ । ତାଙ୍କ ନିଲମ୍ବନ ପାଇଁ ସେ ଓ କଣ୍ଟାବଞ୍ଝି ବାସୀଙ୍କ ପକ୍ଷରୁ ଧନ୍ୟବାଦ ଜଣାଇଛନ୍ତି ବୋଲି ସାଲୁଜା କହିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବଲାଙ୍ଗୀର,ନଭେମ୍ବର ୪ (ଓଡ଼ିଶା ଡ଼ଟ୍ କମ୍)–ବଲାଙ୍ଗୀର ଜିଲ୍ଲା ଖପରାଖୋଲ ବ୍ଲକ ରେଙ୍ଗାଲି ଗାଁରେ ଘରେ ପଶି ମାଓବାଦୀମାନୋ ପୋଲିସ ଇନ୍ଫର୍ମର ଓ ମଦ ବ୍ୟବସାୟ କରୁଥିବା ଅଭିଯୋଗରେ ମୁରଲୀ ମେହେରଙ୍କୁ ଅତି ନିର୍ମମ ଭାବରେ ହତ୍ୟା କରିଛନ୍ତି ।

ଶନିବାର ରାତି ପ୍ରାୟ ୯ଟାରେ ମାଓବାଦୀମାନେ ମୁଲରୀଙ୍କ ଘରେ ପସି ମୁଣ୍ଡରେ ଗୁଳି ମାରିବା ପରେ ଦେହସାରା ଟାଙ୍ଗିଆରେ ହାଣି ଅତି ନୃଶଂସଭାବରେ ହତ୍ୟା କରିବାପରେ ପୋଷ୍ଟର ଛାଡି ଯାଇଛନ୍ତି ।

ଘଟଣାପରେ ଆଜି ସକାଳୁ ବଲାଙ୍ଗୀର, ନୂଆପଡା ସୀମାନ୍ତ ଫରୁଆ ମୁଣ୍ଡା ଗାଁ ଜଙ୍ଗଲରେ ପୋଲିସ କମ୍ବିଂ ଅପରେସନ ଚଳାଇଛି । ମୁହାଁମୁହିଁ ହେଲେ ପୋଲିସ ଏବଂ ମାଓବାଦୀ । ଦୀର୍ଘ ସମୟଧରି ଉଭୟପଟୁ ଗୁଳି ବିନିମୟ ହେଲା । ଶେଷରେ ପୋଲିସକୁ ଚକମା ଦେଇ ପଳାଇଗଲେ ମାଓବାଦୀ ।

ପୋଲିସ ଜଙ୍ଗଲ ଭିତରେ ଗୋଟିଏ ମାଓ କ୍ୟାମ୍ପକୁ ଠାବ କରିବା ସହିତ ଅନେକ ବିସ୍ପୋରକ ସହିତ ମାଓ ସାମଗ୍ରୀ ଜବତ କରିଛି ।

ଡିଆଇଜି ସଂଜୟ କୁମାର କହିଛନ୍ତି ଯେହେତୁ ସେ ମଦ ବିକ୍ରୀ କରୁଥିଲା ସେହି ରାଗରେ ମାଓବାଦୀମାନେ ତାକୁ ହତ୍ୟା କରିଛନ୍ତି । ସଂଘର୍ଷବେଳେ କିଛି ମାଓବାଦୀ ଆହତ ହୋଇଥାଇପାରନ୍ତି ବୋଲି ଆମେ ଆଶା କରୁଛୁ ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ କମ