ବାଚସ୍ପତି

ଓଡିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୩୦ (ଓଡିଶା ଡ଼ଟ୍ କମ୍)-ବେଜେଡିରେ ଏନ୍ସିପିର ୪ ଜଣ ବିଧାୟକ ମିଶ୍ରଣକୁ ନେଇ ସେମାନଙ୍କର ସଭ୍ୟ ପଦ ବୈଧତା ସଂର୍ପକିତ ମାମଲାରେ ବାଚସ୍ପତିଙ୍କ ବିରୋଧରେ ରୁଜୁ ହୋଇଛି ଅଦାଲତ ଅବମାନନା ମାମଲା । ହାଇକୋର୍ଟରେ ଏ ମାମଲା ଦାୟର କରିଛନ୍ତି ଏନ୍ସିପିର ରାଜ୍ୟ ସଭାପତି ଉତ୍କଳ କେଶରୀ ପରିଡା ।

ଉତ୍କଳ କେଶରୀ ତାଙ୍କ ଆବେଦନରେ ଦର୍ଶାଇଛନ୍ତି ଏନ୍ସିପିର ୪ ଜଣ ବିଧାୟକ ବିଜେଡିରେ ମିଶିବାପରେ ସେମାନଙ୍କର ବିଧାୟକ ପଦ ରଦ୍ଧ ସଂପର୍କ ମାମଲାରେ ବାଚସ୍ପତି ଉଭୟ ହାଇକୋର୍ଟ ଓ ସୁପ୍ରୀମକୋର୍ଟଙ୍କ ଆଦେଶ ପାଳନ କରୁନାହାଁନ୍ତି ।

ଗତ ସେପ୍ଟେମ୍ବର ମାସରେ ହାଇକୋର୍ଟ ଦେଇଥିବା ଆଦେଶ ଓ ଗତ ଡିସେମ୍ବର ମାସରେ ସୁପ୍ରୀମକୋର୍ଟ ଦେଇଥିବା ଆଦେଶକୁ ବାଚସ୍ପତି ପାଳନ କରିନାହିାଁନ୍ତି ।

ତାଛଡା ଏମାସ ୧୭ ତାରିଖରେ ସୁପ୍ରୀମକୋର୍ଟ ଚୁଡାନ୍ତ ରାୟ ଦେଇଥିଲେ ମଧ୍ୟ ବାଚସ୍ପତି ଏ ମାମଲାର ବିଚାର କରୁନାହାଁନ୍ତି ବୋଲି ଏନ୍ସିପିର ରାଜ୍ୟ ସଭାପତି ଅଭିଯୋଗ କରିଛନ୍ତି । ତେଣୁ ତୁରନ୍ତ ବାଚସ୍ପତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଉତ୍କଳ କେଶରୀ ହାଇକୋର୍ଟରେ ପ୍ରାର୍ଥାନା କରିଛନ୍ତି ।

ଉତ୍କଳ କେଶରୀ କହିଛନ୍ତି ଯେ,ମାନ୍ୟବର ହାଇକୋର୍ଟ ଯାହା ରାୟ ଦେଇଛନ୍ତି ସେ ଅନୁଯାୟୀ ଏ କେସ୍ ରେ ଫଳାଫଳ ନିର୍ଣ୍ଣୟ ହେବ । ଜାନୁୟାରୀ ୧୮ ତାରିଖ ଠାରୁ ଆଜି ପର୍ଯ୍ୟନ୍ତ ମଧ୍ୟ ବାଚସ୍ପତି କୌଣସି ପଦକ୍ଷେପ ନେଉ ନାହିାଁନ୍ତି ।

ଓଡିଶା ହାଇକୋର୍ଟ ଓ ସୁପ୍ରୀମକୋର୍ଟର ନିର୍ଦ୍ଦେଶନାମାକୁ ପାଳନ ନକରିବାରୁ ଆମେ ବାଧ୍ୟହୋଇ ତାଙ୍କ ନାମରେ କୋର୍ଟ ଅବମାନନା ଦାଖଲ କଲୁ ,କେଶରୀ କହିଛନ୍ତି ।

ଓଡିଶା ଡ଼ଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୩ (ଓଡିଶା ଡଟ୍ କମ୍)-ବିଜେଡ଼ିରୁ ବହିଷ୍କାର କରାଯାଇଥିଲେ ହେଁ ଏ ପର୍ଯ୍ୟନ୍ତ ପ୍ୟାରୀଙ୍କୁ ବହିଷ୍କାର ସମ୍ପର୍କରେ ଲିଖିତ ଆଦେଶ ମିଳିନଥିବାରୁ ସେ ଦାଖଲ କରିଥିବା ଆବେଦନକୁ ମାନ୍ୟବର ସୁପ୍ରିମକୋର୍ଟ ବୁଧବାର ଦିନ ଗ୍ରହଣ କରିଛନ୍ତି ।

ଏହାଛଡା ତାଙ୍କୁ ଦଳରୁ ବହିଷ୍କାର କରାଯିବା ପ୍ରସଙ୍ଗରେ ଆଭିମୁଖ୍ୟ ସ୍ପଷ୍ଟ କରିବା ପାଇଁ ମଧ୍ୟ ବିଜେଡି ସଭାପତିଙ୍କୁ ସୁପ୍ରିମକୋଟ ପକ୍ଷରୁ ନୋଟିସ୍ ଜାରି କରାଯାଇଛି ।

ପ୍ୟାରୀଙ୍କ କହିବା କଥାହେଲା ସୁପ୍ରୀମକୋର୍ଟ ତାଙ୍କର ଗୁହାରି ଶୁଣି ନ୍ୟାୟ ପ୍ରଦାନ କରିଛନ୍ତି । ରାଜ୍ୟ ସଭାରେ ଏଫଡ଼ିଆଇ ପ୍ରସଙ୍ଗରେ ଭୋଟ ଦାନ ଉପରେ ତାଙ୍କୁ ବିଜେଡ଼ି ପକ୍ଷରୁ ହ୍ୱିପ ଜାରି କରାଯାଇ ନଥିଲା । ତାଙ୍କୁ ବହିଷ୍କାର କରାଯାଇଥିବା ସଂକ୍ରାନ୍ତରେ ବାଚସ୍ପତିଙ୍କୁ ମଧ୍ୟ ଅବଗତ କରାଯାଇ ନାହିଁ ।

ରାଜ୍ୟସଭାରେ ତାଙ୍କର ସ୍ଥିତି ଅସ୍ପଷ୍ଟ ରଖିବା ପାଇଁ ଏଭଳି ଯୋଜନା ଚାଲିଥିବାରୁ ସେ ସୁପ୍ରିମକୋର୍ଟ ଯାଇଛନ୍ତି । ବିଜେଡ଼ିରୁ ନିଲମ୍ବନ ହେବା ପରେ ଚିଠି ମିଳି ନଥିଲା । ଦଳରୁ ବହିଷ୍କାର କରାଯିବା ପରେ ବି ଚିଠି ମିଳିଲା ନାହିଁ ।

ତାଙ୍କ ପକ୍ଷରୁ ଓକିଲ ସୁରେଶ ତ୍ରିପାଠୀ ମାମଲା ପରିଚାଳନା କରୁଛନ୍ତି । ନିଲମ୍ବନର ୬ମାସ ବିତିଯାଇଥିଲେ ହେଁ ତାଙ୍କ ନିକଟକୁ ଏ ପର୍ଯ୍ୟନ୍ତ ଏ ସଂକ୍ରାନ୍ତରେ ଆଦେଶନାମା ପଠାଯାଇ ନାହିଁ । ସେ ତ୍ରିଶଙ୍କୁ ଅବସ୍ଥାରେ ଥିଲେ ।

ପ୍ରଧାନ ବିଚାରପତି ଅଲତମସ କବିର,ବିଚାରପତି ସୁରେନ୍ଦ୍ର ସିଂହ ନିଜାର ଓ ବିଚାରପତି ଜେ ଚେଲମେଶ୍ୱରଙ୍କ ଖଣ୍ଡପୀଠରେ ଏହି ଶୁଣାଳୀ ହୋଇଥିଲା । ଶୁଣାଣି ବେଳେ କୋର୍ଟ କହିଥିଲେ ସ୍ୱାଧୀନ ସଦସ୍ୟ ଭାବେ ପ୍ୟାରୀ ଗୃହରେ ଆଲୋଚନା ଓ ବିତର୍କରେ ଭାଗ ନେଇ ପାରିବେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୩(ଓଡିଶା ଡଟ୍ କମ୍)-ବାଚସ୍ପତିଙ୍କ ପ୍ରତି ଆପତିଜନକ ମନ୍ତବ୍ୟ ଦେଇଥିବାରୁ କଣ୍ଟାବାଞ୍ଜିର କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜାଙ୍କୁ ବିଧାନସଭାରୁ ସାତଦିନ ପାଇଁ ନିଲମ୍ବିତ କରାଯାଇଛି । ଏହାର ପ୍ରତିବାଦରେ ବିରୋଧି କଂଗ୍ରେସ କକ୍ଷତ୍ୟାଗ କରିଛି ।

ବୁଧବାର ଦିନ ଶୂନ୍ୟକାଳରେ ଆକ୍ଷେପଜନିତ ବିବାଦ ଆପାତତଃ ତୁଟିଯାଇଥିଲେ ମଧ୍ୟ ଅପରାହ୍ଣ ଅଧିବେଶନରେ ମୁଲତବି ପ୍ରସ୍ତାବ ଉପରେ ଦୁଇଘଣ୍ଟିଆ ଆଲୋଚନା ହୋଇଥିଲା । ଏହି ସମୟରେ ଶାସକ ଦଳର ମୁଖ୍ୟସଚେତକ ପୁନର୍ବାର ସାଲୁଜାଙ୍କ ପ୍ରସଙ୍ଗ ଉଠାଇଥିଲେ ।

ଗଣତାନ୍ତ୍ରିକ ବିଧିବ୍ୟବସ୍ଥା ପ୍ରତି ସମ୍ମାନ ରଖି ଦୁଃଖ ପ୍ରକାଶ ନକରିବାରୁ ତାଙ୍କୁ ନିଲମ୍ବନ କରିବା ଦାବିରେ ପ୍ରଭାତ ତ୍ରିପାଠୀ ଏକ ପ୍ରସ୍ତାବ ଆଣିଥିଲେ । ପ୍ରସ୍ତାବକୁ ଗହଣକରି ସନ୍ଧ୍ୟା ୬ଟା ୧୫ରେ ବାଚସ୍ପତି ସାଲୁଜାଙ୍କୁ ନିଲମ୍ବିତ ଆଦେଶ ଶୁଣାଇଥିଲେ ଓ ଗୃହ ଛାଡ଼ିବାକୁ ନିଦେ୍ର୍ଧଶ ଦେଇଥିଲେ ।

ଶୂନ୍ୟକାଳରେ କିଏ ପ୍ରଥମେ କହିବେ ସେ ନେଇ ବାଦାନୁବାଦ ସୃଷ୍ଟି ହୋଇଥିବାବେଳେ ଏହାକୁ ନେଇ ବିରୋଧୀ ଦଳ ସଦସ୍ୟ ସନ୍ତୋଷ ସିଂହ ସାଲୁଜା ବାଚସ୍ପତିଙ୍କ ପ୍ରତି ଅନୁଚିତ ଶବ୍ଦ ପ୍ରୟୋଗ କରିଥିଲେ ।

ଗୃହର ଓ ବାଚସ୍ପତିଙ୍କର ପଦମର୍ଯ୍ୟାଦା ଦୃଷ୍ଟିରୁ ଦଳମତ ନିର୍ବିଶେଷରେ ସମସ୍ତେ ଏହାର ପ୍ରତିବାଦ କରିବା ସହିତ ସାଲୁଜା କ୍ଷମା ମାଗିବାକୁ ଦାବି କରିଥିଲେ । ବିରୋଧୀ ଦଳ ନେତା ଓ ମୁଖ୍ୟ ସଚେତକ ଏ ନେଇ ଦୁଃଖ ପ୍ରକାଶ କରିବାରେ ଦୀର୍ଘ ସମୟଧରି ଚାଲିଥିବା ବିବାଦର ଅବସାନ ଘଟିଥିଲା ।

ବିରୋଧୀ ଦଳ ନେତା ସାଧାରଣତଃ ଶୂନ୍ୟକାଳରେ ଆଲୋଚନା ଆରମ୍ଭ କରିବାର ପରମ୍ପରା ଚଳିଆସିଥିବାବେଳେ ତାଙ୍କ ଅନୁପସ୍ଥିତିରେ ବାଚସ୍ପତି ଶାସକ ଦଳର ଉପମୁଖ୍ୟ ସଚେତକ ସଞ୍ଜୟ ଦାସବର୍ମାଙ୍କୁ ତାଙ୍କର ବକ୍ତବ୍ୟ ରଖିବାକୁ ଡାକିଥିଲେ ।

ବିରୋଧୀ ଦଳର ମୁଖ୍ୟ ସଚେତକ ପ୍ରସାଦ ହରିଚନ୍ଦନ କାହିଁକି ପରାମ୍ପରା ଭଙ୍ଗହେଲା ବୋଲି ପଚାରିବା ସହ ଜଣେ ସରକାରୀ ସଦସ୍ୟଙ୍କୁ ଡାକିବା ନେଇ ବୈଧାନିକ ପ୍ରଶ୍ନ ଉଠାଇଥିଲେ ।

ଏହି ସମୟରେ ସନ୍ତୋଷ ସିଂହ ସାଲୁଜା ବାଚସ୍ପତିଙ୍କ ଦୃଷ୍ଟି ଅକର୍ଷଣକରି ତାଙ୍କୁ ଆଲୋଚନାର ସୁଯୋଗରୁ ବଞ୍ଚିତ କରାଯାଉଛି ବୋଲି ଅଭିଯୋଗ କରିଥିଲେ । ବାଚସ୍ପତି ପାତରଅନ୍ତର କରୁଛନ୍ତି ଓ ବିଜେଡ଼ି ସଦସ୍ୟ ଭଳି କାମ କରୁଛନ୍ତି । ସେ ବିଜେଡିର ‘ବୋକଚାବୁହା’ ବୋଲି ସାଲୁଜା ଆକ୍ଷେପ କରିଥିଲେ । ଶାସକ ଦଳର ସଦସ୍ୟମାନେ ତତକ୍ଷଣାତ ଏଥିରେ ହସ୍ତକ୍ଷେପ କରିଥିଲେ ।

ପ୍ରଦୀପ ମହାରଥୀ ସାଲୁଜା ଗୃହକୁ ଜୋତା ମାରିଛନ୍ତି, ଏହା ଅତ୍ୟନ୍ତ ଲଜ୍ଜାଜନକ ବୋଲି ମତଦେଇ ପ୍ରୟୋଗ କରିଥିବା ଅପଶବ୍ଦ ପ୍ରତ୍ୟାହରର ସହ କ୍ଷମା ମାଗିବାକୁ ପରାମର୍ଶ ଦେଇଥିଲେ ।

ରାଜସ୍ୱମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ଏଥିରେ ହସ୍ତକ୍ଷେପକରି ସରକାରୀ ଦଳର ସଦସ୍ୟଙ୍କୁ ପ୍ରଥମେ ଡାକିବାରେ କିଛି ଅସୁବିଧା ନାହିଁ ବୋଲି ମନ୍ତବ୍ୟ ଦେଇଥିଲେ ।

ବିରୋଧୀ ଦଳ ନେତା ଭୂପିନ୍ଦର ସିଂହ ଅନେକ ସମୟରେ ବିରୋଧୀ ଦଳର ସଦସ୍ୟଙ୍କୁ ମତ ରଖିବାର ସୁଯୋଗ ମିଳୁନଥିବା ନେଇ କ୍ଷୋଭ ପ୍ରକାଶ କରିଥିଲେ । ତେବେ ସାଲୁଜାଙ୍କ ମନ୍ତବ୍ୟ ନେଇ ଦଳ ପକ୍ଷରୁ ସେ ଦୁଃଖ ପ୍ରକାଶ କରିଥିଲେ । ତାଙ୍କ ସହିତ ପ୍ରସାଦ ହରିଚନ୍ଦନ ମଧ୍ୟ ଏ ନେଇ ଦୁଃଖ ପ୍ରକାଶ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୦(ଓଡିଶା ଡଟ୍ କମ୍)-ରାଜ୍ୟରେ ମଣ୍ଡି ଖୋଲାଯାଇନାହିଁ । ଚାଷୀଙ୍କଠାରୁ ଧାନ କିଣା ଯାଉନାହିଁ । ଚାଷୀଙ୍କ ଅବସ୍ଥା ଦୁର୍ବିସହ ହୋଇଛି । ଯୋଗାଣ ବିଭାଗ କର୍ମଚାରୀ ଓ ମିଲର ମଧୁଚନ୍ଦ୍ରିକାରୁ କୃଷକମାନେ ରାଜରାସ୍ତାକୁ ଓହ୍ଲାଇଛନ୍ତି ବୋଲି ବିରୋଧି କଂଗ୍ରେସ ଓ ଶାସକ ଦଳର ବିଧାୟକମାନେ ଆଜି ବିଧାନ ସଭାରେ ସ୍ୱର ଉଠାଇଛନ୍ତି ।

ସୋମବାର ଦିନ ଶୂନ୍ୟକାଳ ଆରମ୍ଭ ହେବାକ୍ଷଣି ବିରୋଧିଦଳ ନେତା ଭୂପିନ୍ଦର ସିଂ ଚାଷୀଙ୍କ ସମସ୍ୟା ପ୍ରସଙ୍ଗ ଉତ୍ଥାପନ କରିଥିଲେ । ସେ କହିଲେ ଚାଷୀଙ୍କ ବିଭିନ୍ନ ସମସ୍ୟା ନେଇ କଳାହାଣ୍ଡି ପରେ ଆଜି ନୂଆପଡା ଜିଲ୍ଲା ବନ୍ଦ ହୋଇଛି ।

ସରକାରଙ୍କ ଘୋଷଣାପରେ ମଧ୍ୟ ମଣ୍ଡି ଖୋଲୁ ନାହିଁ । ହଜାର ହଜାର ବସ୍ତାଧାନଧରି ଚାଷୀ ରାଜରାସ୍ତାରେ ରହିଛି । ତୁରନ୍ତ ଏଥିରେ ବାଚସ୍ପତି ହସ୍ତକ୍ଷେପ କରିବା ଆବଶ୍ୟକ ।

କଂଗ୍ରେସର ସନ୍ତୋଷ ସିଂ ସାଲୁଜା କହିଥିଲେ କେଉଁଠାରେ ମଣ୍ଡି ଖୋଲାଯାଇଛି ଓ ବର୍ତମାନ ସୁଦ୍ଧା କେତେ ଧାନଚାଷୀଙ୍କ ଠାରୁ ସଂଗ୍ରହ କରାଯାଇଛି ସେ ସଂପର୍କରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ଗୃହକୁ ଜଣାଇବା ଉଚିତ ।

କଂଗ୍ରସର ଏହି ଅଭିଯୋଗ ସହ ବିଜେଡି ବିଧାୟକମାନେ ମଧ୍ୟ ସମସ୍ୱର ପ୍ରକଟ କରିଛନ୍ତି । ବିଜେଡିର ପ୍ରଦୀପ ମହାରଥୀ ଉଦ୍ବେଗ ପ୍ରକାଶ କରି କହିଥିଲେ ଯେ,ମଣ୍ଡି ଖୋଲିନାହିଁ । ଧାନ କ୍ରୟ ହେଉନି । ମନ୍ତ୍ରୀ ବିଧାନସଭାକୁ ଏହି ବିଷୟରେ ସବିଶେଷ ଜଣାଇବା ଉଚିତ ।

ଭଗବାନଙ୍କ ଦୟାରୁ ଏଥର ଫସଲ ଭଲ ହୋଇଛି । କିନ୍ତୁ ଧାନ ସଂଗ୍ରହ ହେଉନଥିବାରୁ ଲକ୍ଷ ଲକ୍ଷ ଚାଷୀ ଧାନଧରି ବସିଛନ୍ତି । ଯୋଗାଣ ବିଭାଗର କିଛି ଅଫିସର ଓ ମିଲ ମାଲିକ ମଧୁଚନ୍ଦ୍ରିକା କରି ଚାଷୀଙ୍କୁ ରାଜରାସ୍ତାରେ ବସାଇଛନ୍ତି ।

ବିଧାୟକ ନବକିଶୋର ଦାସ, ଡା.ପ୍ରଫୁଲ ମାଝି, ଦୁର୍ଯ୍ୟୋଧନ ଗରଡିଆ, ଦେବୀ ପ୍ରସନ୍ନ ଚାନ୍ଦ, ଗୋବର୍ଦ୍ଧନ ଦାସ, ଚକ୍ରଧର ପାଇକ, ସୁରେନ୍ଦ୍ର ପ୍ରସାଦ ପ୍ରମାଣିକ, ଅନନ୍ତ ଦାସ, ପୂଣ୍ଣଚନ୍ଦ୍ର ସେଠୀ, ଖଗେଶ୍ୱର ବେହେରା, ରାଜେନ୍ଦ୍ର ଦାସ, ଡଃ ସିପ୍ରା ମଲ୍ଲିକ, ପ୍ରଫୁଲ ଘଡେଇ ପ୍ରମୁଖ ଚାଷୀ ସମସ୍ୟା ନେଇ ଉଦ୍ବେଗ ପ୍ରକାଶ କରିଥିଲେ ।

ବାଚସ୍ପତି ଏଥିନେଇ ଏକ ବୈଠକ ଡାକିବା ସହିତ ମଣ୍ଡିକୁ ଯାଇ ସ୍ଥିତି ଅନୁଧ୍ୟାନ କରିବାକୁ ଏକ ବିଧାନସଭା ଗୃହ କମିଟି ଗଠନ କରାଯାଉ ବୋଲି କହିଛନ୍ତି । ପରେ ବାଚସ୍ପତି ପ୍ରଦୀପ କୁମାର ଅମାତ ଖୁବ୍ଶୀଘ୍ର ଏଥିନେଇ ଏକ ବୈଠକ ଡାକିବେ ବୋଲି କହିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୩(ଓଡିଶା ଡଟ୍ କମ୍)-ବିଧାନସଭାରେ ଲାଗି ରହିଥିବା ଅଚଳାବସ୍ଥାକୁ ଦୂର କରିବାକୁ ସୋମବାର ଦିନ ବାଚସ୍ପତି ପ୍ରଦୀପ କୁମାର ଅମାତ ଯେଉଁ ସର୍ବଦଳୀୟ ବୈଠକ ଡାକିଥିଲେ ତାହା ଅସମାପ୍ତ ରହିଛିି ।

ମଙ୍ଗଳବାର ଦିନ ପୁଣିଥରେ ବୈଠକ ବସିପାରେ ବୋଲି ବାଚସ୍ପତି କହିଥିବା ବେଳେ କଂଗ୍ରେସ ଓ ବିଜେପି ଦଳର ନେତାମାନେ କହିଛନ୍ତି ଆଜିର ଏହି ବୈଠକରେ କୌଣସି ନିସ୍ପତି ହୋଇପାରି ନାହିଁ ।

ବୈଠକରେ ବିରୋଧିଦଳର ନେତା ଭୂପିନ୍ଦର ସିଂ, ସଂସଦୀୟ ବ୍ୟାପାର ମନ୍ତ୍ରୀ କଳ୍ପତରୁ ଦାସ, ଆଇନମନ୍ତ୍ରୀ ରଘୁନାଥ ମହାନ୍ତି, ସରକାରୀ ମୁଖ୍ୟ ସଚେତକ ପ୍ରଭାତ ତ୍ରିପାଠୀ, ବିରୋଧିଦଳ ମୁଖ୍ୟସଚେତକ ପ୍ରସାଦ ହରିଚନ୍ଦନ, ସରକାରୀ ଉପମୁଖ୍ୟ ସଚେତକ ସଂଜୟ ଦାସବର୍ମା, ବିଜେପିର କରେନ୍ଦ୍ର ମାଝି, ସିପିଆଇର ଆଦିକନ୍ଦ ସେଠୀ ଏବଂ କଂଗ୍ରେସର ସନ୍ତୋଷ ସିଂ ସାଲୁଜା ଯୋଗ ଦେଇଥିଲେ ।

ବୈଠକ ଦୀର୍ଘ ସମୟ ଚାଲିଥିଲେ ମଧ୍ୟ କୌଣସି ନିସ୍କର୍ଷ ବାହାରି ପାରିନାହିଁ । ବୈଠକ ଶେଷରେ ବିରୋଧିଦଳ ନେତା ଶ୍ରୀ ସିଂ କହିଛନ୍ତି ପ୍ରଥମେ ଚାଷୀଙ୍କ ପ୍ରସଙ୍ଗରେ ଦିଆଯାଇଥିବା ମୁଲତବୀ ପ୍ରସ୍ତାବ ଉପରେ ଆଲୋଚନା କରାଯାଉ ।

ସଂସଦୀୟ ବ୍ୟାପାର ମନ୍ତ୍ରୀ ଶ୍ରୀ ଦାସ କହିଛନ୍ତି ଏହି ମୁଲତବୀ ପ୍ରସ୍ତାବ ୩ଟି ବିଭାଗର ବିଷୟ ହୋଇଥିବାରୁ ଏହାକୁ ମୁଲତବୀ ପ୍ରସ୍ତାବ ଆକାରରେ ଆଲୋଚନା କରାଯିବା ସମ୍ଭବ ନୁହେଁ । ଆମେ ଚାଷୀ ସମସ୍ୟା ଆଲୋଚନା କରିବା ପାଇଁ ପ୍ରସ୍ତୁତ ଅଛୁ । ମାନ୍ୟବର ବାଚସ୍ପତି ଯେଉଁ ଫୋରମରେ ଆଲୋଚନା କରିବାକୁ ଚାହିଁବେ ଆମେ ସେହିବାଟରେ ଆଲୋଚନା କରିବାକୁ ରାଜି ଅଛୁ ।

ବିଜେପିର କରେନ୍ଦ୍ର ମାଝିଙ୍କ ମତରେ ଗୃହକାର୍ଯ୍ୟ ଠିକ୍ ଠାକ ଭାବରେ ଚାଲୁ । କୃଷକମାନଙ୍କର ଯେଉଁ ସମସ୍ୟା ଅଛି ତାହା ମଧ୍ୟ ବିଧାନସଭାରେ ଆଲୋଚନା କରାଯାଉ । ବିଧାନସଭାର ଶୀତ ଅଧିବେଶନ ଆରମ୍ଭରୁ ବିରୋଧିଦଳ ଚାଷୀଙ୍କ ପ୍ରସଙ୍ଗ ଆଲୋଚନା ଦାବିରେ ବିଧାନସଭାକୁ ଅଚଳ କରି ରଖିଛି ।

ପ୍ରଥମ ଦିନରୁ ଚାଷୀଙ୍କ ଧାନ ବିକ୍ରି ନହେବା, ଚାଷୀଙ୍କୁ ବିହନ ଦିଆନଯିବା,ବୋନସ ପ୍ରଦାନ କରାନଯିବା ଆଦି ପ୍ରସଙ୍ଗ ନେଇ ବିରୋଧିଦଳ ମୁଲତବୀ ନୋଟିସ ଦେଇଥିଲେ । ତେବେ ବାଚସ୍ପତି ଏହାକୁ ଅଗ୍ରାହ୍ୟ କରିଦେବାରୁ ସେବେଠାରୁ ବିରୋଧିଦଳ ଗୃହକୁ ଅଚଳ କରିଛି । ଆଜି ଗୃହକାର୍ଯ୍ୟ ଆରମ୍ଭ ହେବାମାତ୍ରେ ବାଚସ୍ପତି ପ୍ରଶ୍ନୋତର କାର୍ଯ୍ୟକ୍ରମ ପରେ ସବୁଦଳର ନେତୃବୃନ୍ଦକୁ ଡାକି ଆଲୋଚନା କରିବେ ବୋଲି କହିଥିଲେ ।

ଫଳରେ କଂଗ୍ରେସ ବିଧାୟକମାନେ ପ୍ରଶ୍ନୋତର କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ନିର୍ଦ୍ଧାରିତ ସମୟରେ ମାତ୍ର ୨ଟି ପ୍ରଶ୍ନ ଆଲୋଚନା ହୋଇ ପାରିଥିଲା । ଏଥିରେ ମୁଖ୍ୟମନ୍ତ୍ରୀଙ୍କ ପକ୍ଷରୁ ଆଇନମନ୍ତ୍ରୀ ରଘୁନାଥ ମହାନ୍ତି ଓ କୃଷିମନ୍ତ୍ରୀ ଦେବୀପ୍ରସାଦ ମିଶ୍ର ଉତର ରଖିଥିଲେ ।

ଶୂନ୍ୟକାଳ ଆରମ୍ଭ ହେବାପରେ ବାଚସ୍ପତି ଅନ୍ୟ କୌଣସି କାର୍ଯ୍ୟକ୍ରମ ନନେଇ ସର୍ବଦଳୀୟ ବୈଠକ ଡାକିଥିଲେ । ଏଥିପାଇଁ ଗୃହକୁ ପ୍ରଥମେ ୧୨ଟା ପର୍ଯ୍ୟନ୍ତ ମୁଲତବୀ କରାଯାଇଥିଲା ।

୧୨ଟାରୁ ୧୨.୩୦ ଓ ଏହାପରେ ଅପରାହ୍ନ ୩ଟା ପର୍ଯନ୍ତ ଗୃହକୁ ମୁଲତବୀ ଘୋଷଣା କରାଯାଇଥିଲା । ୩ଟାରେ ପୁଣି ଗୃହକାର୍ଯ୍ୟ ଆରମ୍ଭ ହେବାମାତ୍ରେ କଂଗ୍ରେସ ବିଧାୟକ ଫ୍ଲାକାର୍ଡ ଧରି ଗୃହମଧ୍ୟରେ ହୋହାଲ୍ଲା କରିବାରୁ ବାଚସ୍ପତି ବାଧ୍ୟହୋଇ ଗୃହକୁ ମଙ୍ଗଳବାର ପର୍ଯନ୍ତ ମୁଲତବୀ ରଖିଛନ୍ତି ।

ଓଡିଶା ଡଟ୍ କମ୍