ବାଲେଶ୍ୱର ଜିଲ୍ଲା

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବାଲେଶ୍ୱର, ମାର୍ଚ୍ଚ ୩୦(ଓଡ଼ିଶା ଡ଼ଟ୍ କମ୍) ବାଲେଶ୍ୱର ଜିଲ୍ଲା ଚାନ୍ଦିପୁର କ୍ଷେପଣାସ୍ତ୍ର ପରୀକ୍ଷଣ ଘାଟୀରୁ ଶୁକ୍ରବାର ଭୂପୃଷ୍ଠରୁ ଭୂପୃଷ୍ଠକୁ ନିକ୍ଷେପ କରାଯାଇ ପାରୁଥିବା ବ୍ରହ୍ମୋସ କ୍ଷପଣାସ୍ତ୍ରର ପରୀକ୍ଷଣ କରାଯାଇଛି ।

କ୍ଷେପଣାସ୍ତ୍ର ଘାଟୀର ତିନି ନମ୍ବର ଲଂଚ ପ୍ୟାଡ଼ରୁ ଏହାର ପରୀକ୍ଷଣ କରାଯାଇଥିବା ବେଳେ ୩୦୦ କିଗ୍ରା ଓଜନର ଯୁଦ୍ଧାସ୍ତ୍ର ବହନ କରିବା ସହ ୨୯୦ କିମି ପର୍ଯ୍ୟନ୍ତ ଲକ୍ଷଭେ କରିବାର ଏହାର କ୍ଷମତା ରହିଛି ।

ଭାରତ ଓ ଋଷିଆର ମିଳିତ ଉ୍ୟମରେ ଏହା ପ୍ରସ୍ତୁତ କରାଯାଇଥିବା ବେଳେ ୨୦୦୬ରୁ ଏହାକୁ ସେନା ବାହୀନୀରେ ସାମିଲ କରାଯାଇଛି । ତିନି ହଜାର କିଗ୍ରା ଓଜନ ବିଶିଷ୍ଟ ଏହି କ୍ଷେପଣାସ୍ତ୍ରର ଲମ୍ବ ୮.୪ ମିଟର ଓ ଗୋଲେଇ ୦.୬ ମିଟର ।

ଗତ ବୁଧବାର ମଧ୍ୟ ଏହି କ୍ଷେପଣାସ୍ତ୍ରର ସଫଳ ପରୀକ୍ଷଣ କରାଯାଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବାଲେଶ୍ୱର, ଡ଼ିସେମ୍ବର ୨୧(ଓଡ଼ିଶା ଡ଼ଟ୍ କମ୍) ବାଲେଶ୍ୱର ଜିଲ୍ଲା ଚାନ୍ଦିପୁର କ୍ଷେପଣାସ୍ତ୍ର ଘାଟିରୁ ବୁଧବାର ହେବାକୁଥିବା ପୃଥ୍ୱୀ-୨ କ୍ଷେପଣାସ୍ତ୍ରର ପରୀକ୍ଷଣ ସ୍ଥଗିତ ରଖାଯାଇଛି ।

କେତେକ ବୈଷୟିକ ତୃଟି ଯୋଗୁଁ ଏହି ପରୀକ୍ଷଣ ସ୍ଥଗିତ କରାଯାଇଥିବା ପରୀକ୍ଷଣ କେନ୍ଦ୍ରରନିର୍ଦ୍ଦେଶକ ଏସ୍.ପି.ଦାଶ ଓଡ଼ିଶା ଡ଼ଟ୍ କମ୍କୁ କହିଛନ୍ତି ।

ଭୂପୃଷ୍ଠରୁ ଭୂପୃଷ୍ଠକୁ ନିକ୍ଷେପ କରାଯାଇପାରୁଥିବା ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ଏହି  କ୍ଷେପଣାସ୍ତ୍ର ୩୫୦ କିମି ପର୍ଯ୍ୟନ୍ତ ଲକ୍ଷଭେଦ କରିପାରିବ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ହେମନ୍ତ ରାଉତ

ବାଲେଶ୍ୱର, ଡ଼ିସେମ୍ବର ୨୨(ଓଡ଼ିଶା ଡ଼ଟ୍ କମ୍) ବାଲେଶ୍ୱର ଜିଲ୍ଲା ଚାନ୍ଦିପୁର କ୍ଷେପଣାସ୍ତ୍ର ପରୀକ୍ଷଣ ଘାଟିରୁ ବୁଧବାର ଆଣବିକ କ୍ଷମତା ସଂପନ୍ନ ପୃଥ୍ୱୀ-୨ କ୍ଷେପଣାସ୍ତ୍ରର ଦୁଇ ଥର ସଫଳ ପରୀକ୍ଷଣ କରାଯାଇଛି ।

ଭୂପୃଷ୍ଠରୁ ଭୂପୃଷ୍ଠକୁ ନିକ୍ଷେପ କରାଯାଇପାରୁଥିବା ଏହି କ୍ଷେପଣାସ୍ତ୍ର ପ୍ରଥମେ ୮.୧୬ରେ ଓ ପରେ ୯.୧୫ରେ ପରୀକ୍ଷଣ କରାଯାଇଥିବା ପ୍ରତିରକ୍ଷା ବିଭାଗର ଜଣେ ଅଧିକାରୀ କହିଛନ୍ତି । ଭାରତୀୟ ସେନାବାହୀନୀରେ ପୂର୍ବରୁ ଏହା ସାମିଲ ହୋଇସାରିଛି ।

ମଧ୍ୟମ ଦୂରଗାମୀ ଏହି କ୍ଷେପଣାସ୍ତ୍ରର ୩୫୦ କିମି ପର୍ଯ୍ୟନ୍ତ ଲକ୍ଷଭେଦ କରିବାର କ୍ଷମତା ଥିବା ବେଳେ ୫୦୦ କିଗ୍ରା ଯୁଦ୍ଧାସ୍ତ୍ର ବହନ କରିବାର କ୍ଷମତା ରହିଛି । ଗତ ସେପ୍ଟେମ୍ବର ୨୪ରେ ଏହି କ୍ଷେପଣାସ୍ତ୍ରର ପରୀକ୍ଷଣ ବିଫଳ ହୋଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ହେମନ୍ତ ରାଉତ

ବାଲେଶ୍ୱର, ନଭେମ୍ବର ୧୯(ଓଡ଼ିଶା ଡ଼ଟ୍ କମ୍) ଲୋକଙ୍କ ମଧ୍ୟରେ ଅପରିଚିତ ଥିବା ବାଲେଶ୍ୱର ଜିଲ୍ଲାର ଭାଇ ଭଉଣୀ ଏକ ଘରୋଇ ଚ୍ୟାନେଲରେ ପ୍ରସାରିତ ମନୋରଂଜନ କାର୍ଯ୍ୟକ୍ରମର ଚୂଡ଼ାନ୍ତ ପର୍ଯ୍ୟାୟରେ ପ୍ରବେଶ କରିଥିବା ଘୋଷଣା ହେବା ପରେ ସେମାନେ ସମସ୍ତଙ୍କ ନିକଟରେ ପରିଚିତ ହୋଇପାରିଛନ୍ତି ।

ରୋହିତ ଚୌଧୁରୀ, ୧୧ ଓ ତାଙ୍କ ଭଉଣୀ ଅଭିପ୍ସା, ୧୩ ଓଡ଼ିଶାର ଲୋକପ୍ରିୟ ନୃତ୍ୟ କାର୍ଯ୍ୟକ୍ରମ ଝୁମ୍ ଓଡ଼ିଶା ଝୁମ୍(ଜୁନିୟର) ପ୍ରତିଯୋଗୀତାର ଚରମ ପର୍ଯ୍ୟାୟରେ ଅଂଶ ଗ୍ରହଣ କରିଥିବାରୁ ବିଭିନ୍ନ କାର୍ଯ୍ୟକ୍ରମ କରିବା ପାଇଁ ସେମାନଙ୍କ ପାଖକୁ ନିମନ୍ତ୍ରଣର ସୁଅ ଛୁଟିଛି ।

ଫାଇନାଲରେ ଅଂଶ ଗ୍ରହଣ କରିଥିବା ଛଅ ଜଣ ପ୍ରତିଯୋଗୀଙ୍କ ମଧ୍ୟରୁ ଏମାନେ ଦୁଇ ଜଣ କେବଳ ଭାଇ ଓ ଭଉଣୀ । ଏହା ପୂର୍ବରୁ ଉଭୟେ କୌଣସି ମଞ୍ଚରେ ଅଭିନୟ ନକରି ଏଭଳି ସଫଳତା ପାଇଥିବାରୁ ସେମାନଙ୍କ ବାପା ମା’ ଗର୍ବଅନୁଭବ କରିଛନ୍ତି ।

“ଗତ ବର୍ଷ ନଭେମ୍ବର ୨୮ରେ ବାଲେଶ୍ୱର ଜିଲ୍ଲା ସ୍କୁଲରେ ହୋଇଥିବା ଅଡ଼ିସନ୍ ଦିନଠାରୁ ସେମାନେ ଭଲ ପ୍ରଦର୍ଶନ କରିଆସିଛନ୍ତି । ସେମାନଙ୍କ ସଫଳତାରେ ଆମେ ବେଶ୍ ଗର୍ବିତ । ସମଗ୍ର ରାଜ୍ୟରେ ଆମକୁ ସେମାନେ ପରିଚିତ କରାଇଛନ୍ତି” ବାପା ରାଜେଶ କୁମାର ଚୌଧୁରୀ କହିଛନ୍ତି ।

ବାଲେଶ୍ୱର ସ୍ଥିତ ମହର୍ଷୀ ବିଦ୍ୟାମନ୍ଦିରରେ ଅଭିପ୍ସା ଷ୍ଟାଣ୍ଡାର୍ଡ଼ ୮ରେ ପଢୁଥିବା ବେଳେ ରୋହିତ ଷ୍ଟାଣ୍ଡାର୍ଡ଼ ୭ରେ ପଢୁଛନ୍ତି । ବର୍ତ୍ତମାନ ପର୍ଯ୍ୟନ୍ତ ସେମାନେ ବାଲେଶ୍ୱର, ଭଦ୍ରକ, ଯାଜପୁର, ବାରିପଦା, କଟକ, ଢେଙ୍କାନାଳ, ଭୁବନେଶ୍ୱରର ବିଭିନ୍ନ ସ୍ଥାନରେ ଓ ବାଣିବିହାର, କୃପାଜଳ ଇଂଜିନିୟରିଂ କଲେଜ ପରିସରରେ ମଧ୍ୟ ନୃତ୍ୟ ପରିବେଷଣ କରିଛନ୍ତି, ମା’ ମୌସୁମୀ ଚୌଧୁରୀ କହିଛନ୍ତି ।

ହିନ୍ଦୁସ୍ଥାନୀ ସଂଗୀତରେ ଦ୍ଵୀତୀୟ ବର୍ଷର ଛାତ୍ରୀ ଅଭିପ୍ସା ଆଇଏଏସ୍ ଅଫିସର ହେବାକୁ ଲକ୍ଷ୍ୟ ରଖିଥିବା ବେଳେ ରୋହିତ କ୍ରିକେଟ ଖେଳିବାକୁ ଭଲ ପାଆନ୍ତି । ଏହି ସଫଳତା ପାଇଁ ସେମାନେ ବିକେ ଡ଼୍ୟାନ୍ସ ଗୃପର ରାଜେଶ ପ୍ରଧାନଙ୍କୁ ଶ୍ରେୟ ଦେଇଛନ୍ତି ।

“ଆମେ କଠିନ ପରିଶ୍ରମ କରି ନିୟମିତ ଅଭ୍ୟାସ ଜାରି ରଖିଥିଲୁ ଏବଂ ବିଚାରକ ମଣ୍ଡଳୀଙ୍କ ଉପଦେଶ ଅନୁସାରେ କଳା ପ୍ରଦର୍ଶନ କରିଥିଲୁ । ଆମେ ଆମର କାର୍ଯ୍ୟ କରିଛୁ ବର୍ତ୍ତମାନ ଲୋକଙ୍କ ଏସ୍ଏମ୍ଏସ୍ ଭୋଟ୍ ଉପରେ ଏହା ନିର୍ଭର କରୁଛି । ଆମକୁ ଭୋଟ୍ ଦେବା ପାଇଁ ଲୋକଙ୍କୁ ଅନୁରୋଧ କରୁଛୁ” ସେମାନେ କହିଛନ୍ତି ।

ରାଜ୍ୟରେ ଥିବା ପ୍ରତିଭା ମାନଙ୍କୁ ଲୋକଲୋଚନକୁ ଆଣିବାରେ ଚ୍ୟାନେଲ କର୍ତ୍ତୃପକ୍ଷଙ୍କ ପ୍ରଚେଷ୍ଟାକୁ ପ୍ରଶଂସା କରୁଛୁ, ବାପା ମା’ କହିଛନ୍ତି । ଉଭୟଙ୍କୁ ଭୋଟ୍ ଦେଇ ଏହି କାର୍ଯ୍ୟକ୍ରମରେ ବିଜୟୀ କରିବା ପାଇଁ ସେମାନେ ଅନୁରୋଧ କରିଛନ୍ତି ।

ଏମାନଙ୍କ କୋଡ଼୍ ୦୬ ଓ ମୋବାଇଲରେ ଜେଓଜେଆର୍ ରେ ଟାଇପ କରି ୫୪୯୯୯୨୩କୁ ଏସ୍ଏମ୍ଏସ୍ କରିବାକୁ ଅନୁରୋଧ କରିଛନ୍ତି ।

ଓଡିଶା ଡଟ୍ କମ୍