ବିଚାରପତି

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଡ଼ିସେମ୍ବର ୧(ଓଡ଼ିଶା ଡ଼ଟ୍ କମ୍) ଏକ ଚେକ୍ ବାଉନ୍ସ ମାମଲାର ବିଚାର କରି ସ୍ଥାନୀୟ ଅଦାଲତ ଜଣେ ଭାରତୀୟ ବନସେବା ଅଧିକାରୀଙ୍କୁ ଗୁରୁବାର ଦଣ୍ଡାଦେଶ କରିଛନ୍ତି ।

ଭୁବନେଶ୍ୱର ପ୍ରଥମଶ୍ରେଣୀ ବିଚାର ବିଭାଗୀୟ ବିଚାରପତି ସଂପୃକ୍ତ ଅଧିକାରୀ ଡମ୍ବରୁଧର ସାହୁଙ୍କୁ ସାତ ମାସ ଜେଲ ଦଣ୍ଡ ସହ୩ଲକ୍ଷ ୬୦ ହଜାର ଟଙ୍କା ପୈଠ କରିବାକୁ ନିର୍ଦ୍ଦେଶ ଦେଇଛନ୍ତି ।

ଅର୍ଥ ପୈଠ ନକଲେ ଆଉ ୫ମାସ ଅଧିକ ଜେଲ ଦଣ୍ଡ ଭୋଗିବାକୁ ପଡ଼ିବ ବୋଲି କୋର୍ଟ ଦର୍ଶାଇଛନ୍ତି ।

ଗତ ୨୦୦୭ରେ ଡମ୍ବରୁଧର ତାଙ୍କ ସାଙ୍ଗ ପ୍ରମୋଦ କୁମାର ଅଧିକାରୀଙ୍କଠାରୁ ୨ଲକ୍ଷ ୯୬ ହଜାର ଟଙ୍କା କରଜ ଆଣି ବାରମ୍ବାର ମାଗିବା ସତ୍ୱେ ଫେରାଇନଥିଲେ । ଏନେଇ ପ୍ରମୋଦ ଗତ ୨୦୦୯ରେ ଭୁବନେଶ୍ୱର କୋର୍ଟରେ ମାମଲା କରିଥିଲେ । କୋର୍ଟ ଏହି ମାମଲାର ଶୁଣାଣି କରି ଦଣ୍ଡାଦେଶ କରିଛନ୍ତି ।

ଟଙ୍କା ନେବା ସମୟରେ ଡମ୍ବରୁଧର ଭୁବନେଶ୍ୱର ସ୍ଥିତ ଅରଣ୍ୟ ଭବନରେ କାର୍ଯ୍ୟ କରୁଥିବା ବେଳେ ବର୍ତମାନ ସେ ମୁଖ୍ୟ ବନସଂରକ୍ଷକ ଭାବେ ସମ୍ବଲପୁରରେ କାର୍ଯ୍ୟ କରୁଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା
କଟକ, ଅପ୍ରେଲ ୧୮(ଓଡ଼ିଶା ଡ଼ଟ୍ କମ୍) ରାଜ୍ୟରେ ହୋଇଥିବା ବହୁ କୋଟି ଟଙ୍କାର ଖଣି ଦୁର୍ନୀତି ମାମଲାର ଶୁଣାଣି ସୋମବାର ହାଇକୋର୍ଟରେ ଶେଷ ହୋଇଥିବା ବେଳେ ଅଦାଲତ ରାୟ ସଂରକ୍ଷିତ ରଖିଛନ୍ତି ।

ମୁଖ୍ୟ ବିଚାରପତି ଭି. ଗୋପାଳଗୌଡ ଓ ବିଚାରପତି ବିଶ୍ୱନାଥ ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି ରାୟକୁ ସଂରକ୍ଷିତ ରଖିଛନ୍ତି ।

ଖଣି ଦୁର୍ନୀତି ସମ୍ପର୍କରେ ସିବିଆଇ ତଦନ୍ତ ତଥା ଏଥିରେ ସଂପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ହାଇକୋର୍ଟରେ ୯ଟି ମାମଲା ରୁଜୁ ହୋଇଥିଲା ।

ଦୁର୍ନୀତି ଯୋଗୁ ରାଜ୍ୟ ସରକାରଙ୍କ ଯେଉଁ କ୍ଷତି ଘଟିଛି ତାହା ଏଥିରେ ସଂପୃକ୍ତ ଥିବା ଅଧିକାରୀଙ୍କ ଅ।ଦାୟ କରିବା ପାଇଁ ଆବେଦନକାରୀମାନେ କୋର୍ଟକୁ ଅନୁରୋଧ କରିଥିଲେ । ମାମଲା ବହୁଦିନ ଧରି ଶୁଣାଣି ହେବା ପରେ ଖଣ୍ଡପୀଠ ଶୁଣାଣି ସମାପ୍ତ କରି ରାୟକୁ ସଂରକ୍ଷିତ ରଖିଛନ୍ତି ।

ରାଜ୍ୟ ସରକାରଙ୍କ ପକ୍ଷରୁ ଆଡ଼ଭୋକେଟ ଜେନେରାଲ ଅଶୋକ ମହାନ୍ତି ଓ ସ୍ୱତନ୍ତ୍ର ଭାବେ ନିୟୋଜିତ ସୁପ୍ରିମକୋର୍ଟ ଆଇନଜୀବୀ ଏହି ଦୁର୍ନୀତିର ସିବିଆଇ ତଦନ୍ତ କରାଯିବା ଯୁକ୍ତିକୁ ବିରୋଧ କରିଥିଲେ ।

ଆବେନକାରୀ ପକ୍ଷରୁ ଆଇନଜୀବୀ ନରସିଂହ ମିଶ୍ର ଓ ଦିଲୀପ ମହାପାତ୍ର ଖଣି ଦୁର୍ନୀତିର ସିବିଆଇ ତଦନ୍ତ କରିବାକୁ ଯୁକ୍ତି ଉପସ୍ଥାପନ କରିଥିଲେ ।

ଓଡ଼ିଶା ଡ଼ଟ୍ କମ୍

 

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଡ଼ିସେମ୍ବର ୧୭(ଓଡ଼ିଶା ଡ଼ଟ୍ କମ୍) ବହୁ ଚର୍ଚ୍ଚିତ ଜୁଡ଼ୋ କୋଚ୍ ବିରଞ୍ଚି ଦାସ ହତ୍ୟା ମାମଲାରେ ସ୍ଥାନୀୟ ଏକ ଆଲତ ଶୁକ୍ରବାର ଅଭିଯୁକ୍ତ ରାଜା ଆଚାର୍ଯ୍ୟ ଓ ତାର ସହଯୋଗୀ ଚଗଲାକୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି ।

ଭୁବନେଶ୍ୱର ଫାଷ୍ଟ ଟ୍ରାକ୍ କୋର୍ଟ-୩ ବିଚାରପତି ବିବେକାନନ୍ଦ ଦାସ ଉଭୟଙ୍କୁ ଏହି ଦଣ୍ଡାଦେଶ ସହ ଦଶ ହଜାର ଟଙ୍କା ଲେଖାଏଁ ଜରିମାନା ଆଦେଶ କରିଛନ୍ତି । ଜରିମାନା ଅନାଦେୟ ଅଧିକ ଏକ ବର୍ଷ ଜେଲଦଣ୍ଡ ଭୋଗିବାକୁ ପଡ଼ିବ ।

ସରକାରୀ ଓକିଲ ଉଭୟଙ୍କୁ ମୃତ୍ୟୁ ଦଣ୍ଡ ଦେବାକୁ ଯୁକ୍ତି ବାଢିଥିବା ବେଳେ ରାଜାର ଓକିଲ ଦଣ୍ଡ କୋହଳ କରିବାକୁ ଯୁକ୍ତି ବାଢିଥିଲେ । ଉଭୟ ଓକିଲଙ୍କ ଯୁକ୍ତି ଶୁଣିବା ପରେ ବିଚାରପତି ଏହି ଦଣ୍ଡାଦେଶ କରିଛନ୍ତି ।

ଏହି ମାମଲାର ବିଚାର କରି ବିଚିାରପତି ଗତ ୧୩ ତାରିଖରେ ଉଭୟଙ୍କୁ ଦୋଷୀ ସାବ୍ୟସ୍ତ କରିଥିଲେ ।

ଗତ ୨୦୦୮ ଅପ୍ରେଲ ୧୩ରେ ପଣା ସଂକ୍ରାନ୍ତି ସଂଧ୍ୟାରେ କଳ୍ପନା ଛକ ସ୍ଥିତ ଜୁଡ଼ୋ ହଲରେ ବିରଞ୍ଚିଙ୍କୁ ଗୁଳି କରି ହତ୍ୟା କରାଯାଇଥିଲା । ସେତେବେଳେ ଏହି ଘଟଣା ସମଗ୍ର ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିଲା ।

ହତ୍ୟାକାଣ୍ଡ ପରେ ଉଭୟେ ଫେରାର୍ ହୋଇଯାଇଥିଲେ । ପରେ ଚଗଲା ଓରଫ୍ ଅକ୍ଷୟ ବେହେରା ଅପ୍ରେଲ ୨୨ ତାରିଖରେ ଭୋପାଳ ପୋଲିସ ନିକଟରେ ଆତ୍ମସମର୍ପଣ କରିଥିଲା ।

ସେହିପରି ମଇ ୫ ତାରିଖରେ ରାଜା ଆଚାର୍ଯ୍ୟ ଗୋଆର ପାନାଜି ପୋଲିସ ନିକଟରେ ଆତ୍ମସମର୍ପଣ କରିବା ପରେ ଭୁବନେଶ୍ୱର ପୋଲିସ ତାକୁ ଗିରଫ କରି କୋର୍ଟ ଚାଲାଣ କରିଥିଲା ।

୨୦୦୯ ଜାନୁୟାରୀ ୧ରୁ ସାକ୍ଷ୍ୟ ଗ୍ରହଣ ଆରମ୍ଭ ହୋଇଥିଲା । ମୋଟ୍ ୨୯ ଜଣ ସାକ୍ଷୀ ଓ ପାଞ୍ଚ ଜଣ ପ୍ରତ୍ୟକ୍ଷଦର୍ଶୀଙ୍କ ବୟାନ ରେକର୍ଡ଼ କରାଯାଇଥିଲା ।

ଦଣ୍ଡାଦେଶ ପରିପ୍ରେକ୍ଷୀରେ କୋର୍ଟ ପରିସର, ବାହାରେ ଏବଂ ଜୁଡ଼ୋହଲରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ।

ଓଡ଼ିଶା ଡ଼ଟ୍ କମ୍