ବିଜେପି

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୨୪(ଓଡିଶା ଡଟ୍ କମ୍)-କେନ୍ଦ୍ର ଗୃହମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ସୁଶୀଲ କୁମାର ସିନ୍ଦେ ଜୟପୁରରେ କଂଗ୍ରେସର ଚିନ୍ତନ ବୈଠକରେ , ଦେଶରେ ଗୈରିକ ଆତଙ୍କବାଦ ବିଜେପି ଓ ସଂଘ ତାଲିମରେ ଚାଲିଛି ।

ଦେଶରେ ଏଭଳି ଆତଙ୍କବାଦର ବିସ୍ତାର ଲାଗି ଉଭୟ ବିଜେପି ଓ ସଂଘ ‘ଉଗ୍ରବାଦୀ ଶିବିର’ ଚଳାଇଛନ୍ତି ବୋଲି ମନ୍ତବ୍ୟ ଦେଇଥିଲେ । ଗୃହମନ୍ତ୍ରୀଙ୍କ ଏଭଳି ଦାୟିତ୍ୱହୀନ ମନ୍ତବ୍ୟ ଯୋଗୁ ଗୁରୁବାର ଦିନ ଦେଶବ୍ୟାପୀ ଯୋରଦାର ବିକ୍ଷୋଭ କରିଛି ବିଜେପି । ଆଜି ରାଜ୍ୟରେ ମଧ୍ୟ ବିକ୍ଷୋଭ କରାଯାଇଛି । ରାଜରାସ୍ତାକୁ ଓହ୍ଲାଇଛନ୍ତି ନେତା ଓ କର୍ମୀ ।

ରାଜଧାନୀ ଭୁବନେଶ୍ୱରରେ ବିଜେପି ରାଜ୍ୟ କାର୍ଯ୍ୟାଳୟରୁ ଏକ ବିଶାଳ ଶୋଭାଯାତ୍ରା ବାହାରି ରାମ ମନ୍ଦିର ଛକରେ ବିକ୍ଷୋଭ କରିଥିଲେ । କର୍ମୀ ସେଠାରେ କେନ୍ଦ୍ର ଗୃହମନ୍ତ୍ରୀଙ୍କ କୁଶପୁତଳିକା ଦାହ କରିଥିଲେ ।

ଗୃହମନ୍ତ୍ରୀ ତାଙ୍କର ମନ୍ତବ୍ୟ ଫେରାଇ ନନେଲେ ଆଗାମୀ ଦିନରେ ପ୍ରଧାନମନ୍ତ୍ରୀ ଓ ଦଳର ସଭାପତି ସୋନିଆ ଗାନ୍ଧୀଙ୍କ ବିରୋଧରେ ଦେଶବ୍ୟାପୀ ଆନ୍ଦୋଳନ କରାଯିବ ବୋଲି ବିଜେପି ଧମକ ଦେଇଛି ।

ବିଜେପି ନେତା କନକ ବର୍ଦ୍ଧନ ସିଂହଦେଓ କହିଛନ୍ତି ଭାରତର ଆଧ୍ୟାତ୍ମ ଓ ଧାର୍ମିକ ଐତିହ୍ୟର ପଥପ୍ରଦର୍ଶକ ତଥା ପ୍ରତୀକ ହେଉଛି ଗୈରକ । ଗୈରକକୁ ଉଗ୍ରବାଦ ସହ ତୁଳନା କରି ଭାରତୀୟ ସାଧୁସନ୍ଥଙ୍କୁ ସ୍ୱରାଷ୍ଟ୍ରମନ୍ତ୍ରୀ ସିନ୍ଦେ ଅପମାନିତ କରିଛନ୍ତି । ତେଣୁ ସେ ତାଙ୍କ ପଦରୁ ପଦରୁ ଇସ୍ତଫା ଦିଅନ୍ତୁ ଏବଂ କ୍ଷମାମାଗନ୍ତୁ ବୋଲି ସେ ଦାବୀ କରିଛନ୍ତି ।

ବ୍ରହ୍ମପୁର ମଧ୍ୟ ବିରୋଧ କରାଯିବା ସହିତ ଗୃହମନ୍ତ୍ରୀଙ୍କ କୁଶପୁତଳିକା ଦାହ କରାଯାଇଛି । ଗଞ୍ଜାମ ଜିଲ୍ଲା ବିଜେପି ସଭାପତି ବିଜୟ ସ୍ୱାଇଁ କହିଛନ୍ତି ଗୃହମନ୍ତ୍ରୀଙ୍କ ଏଭଳି ଦାୟିତ୍ୱହୀନ ମନ୍ତବ୍ୟ ପାକିସ୍ତାନ ପାୟୋଜିତ ଆତଙ୍କବାଦକୁ ଅଧିକ ପ୍ରୋତ୍ସାହିତ କରିବ ।

ଏଭଳି ମନ୍ତବ୍ୟ ଦେଇ ପ୍ରକୃତ ଉଗ୍ରବାଦୀଙ୍କୁ ଗୃହମନ୍ତ୍ରୀ ସିନ୍ଦେ ପ୍ରକାରାନ୍ତରେ କ୍ଲିନଚିଟ ଦେଇଛନ୍ତି । ଏହା ଭାରତ ବିରୋଧୀ ଉଗ୍ରବାଦୀ ଗୋଷ୍ଠୀକୁ ଶକ୍ତିଶାଳୀ କରିବ । ଅନେକ ସମୟରେ କଂଗ୍ରେସ ପକ୍ଷରୁ ଆସୁଥିବା ଏଭଳି ମନ୍ତବ୍ୟକୁ ଶୁଣିବା ପରେ କଂଗ୍ରେସ ଯେ ଏକ କାପୁରଷ ଗୋଷ୍ଠୀରେ ପରିଣତ ହୋଇଛି ତାହା ସେ ବେଳେବେଳେ ଅନୁଭବ କରୁଥିବା ସ୍ୱାଇଁ ସମାଲୋଚନା କରିଛନ୍ତି ।

ପାରଳାଖେମୁଣ୍ଡିରେ ମଧ୍ୟ ବନ୍ଦ ପାଳନ କରାଯାଇଛି । ଫାୟାରଷ୍ଟେସନ ଛକରେ କେନ୍ଦ୍ର ଗୃହମନ୍ତ୍ରୀଙ୍କ କୁଶପୁତଳିକା ମଧ୍ୟ ଦାହ କରାଯାଇଛି । ଅନୁଗୁଳ ଜିଲ୍ଲାରେ ମଧ୍ୟ ବିଜେପି ନେତା ଓ କର୍ମୀମାନେ ରାଜରାସ୍ତାକୁ ଓହ୍ଲାଇଛନ୍ତି । ବାଇପାସ୍ ଛକଠାରେ ବିକ୍ଷୋଭ ପଦର୍ଶନ କରାଯାଇଛି ।

କଳାହାଣ୍ଡି ଜିଲ୍ଲା ବିଜେପି ଶାଖା ପକ୍ଷରୁ ପ୍ରତିବାଦ ସଭା କରାଯାଇଛି । କେନ୍ଦ୍ର ଗୃହମନ୍ତ୍ରୀଙ୍କ ଇସ୍ତଫା ଦାବିରେ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କୁ ସ୍ମାରକପତ୍ର ପ୍ରଦାନ କରାଯାଇଛି । ଯାଜପୁର,କେନ୍ଦ୍ରାପଡା ଆଦି ରାଜ୍ୟର ଅନେକ ସ୍ଥାନରେ ମଧ୍ୟ ଯୋରଦାର ବିରୋଧ କରାଯାଇଛି ।

 

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୨(ଓଡିଶା ଡଟ୍ କମ୍)-ଓଡିଶା ଖଣି ନିଗମ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ଦେଇଥିବା ୯୫ କୋଟି ଟଙ୍କାକୁ ସରକାର ମାଗଣା ସାଇକେଲ ବଣ୍ଟନ କାର୍ଯ୍ୟକ୍ରମରେ ବିନିଯୋଗ କରିଥିବା ନେଇ ବିରୋଧୀ ଦଳ ତରଫରୁ ଏହାର ପ୍ରତିବାଦ କରାଯିବା ସହ ସମାଲୋଚନା କରାଯାଇଛି । ଏହା ଉପରେ ସେମାନେ ସରକାରଙ୍କ ଠାରୁ ଜବାବ ଚାହିଁଛନ୍ତି ।

ଶୁକ୍ରବାର ଦିନ ବିଧାନସଭାର ପ୍ରଶ୍ନୋତର କାଳରେ ବିରୋଧୀ ଦଳ ନେତା ଭୂପିନ୍ଦର ସିଂହ ସ୍ପଷ୍ଟୀକରଣ ଚାହିଁଥିଲେ ଯେ,ଚିକିତ୍ସା ପାଇଁ ଗରିବ ରୋଗୀ ସହାୟତା ପାଉନାହାନ୍ତି ଅଥଚ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଦଶମ ଶ୍ରେଣୀ ଛାତ୍ରଛାତ୍ରୀଙ୍କୁ ସାଇକେଲ ପାଇଁ ୯୫ କୋଟି ଟଙ୍କା ଦିଆଯାଇଛି । ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ସାଇକେଲ ବାବଦରେ କିଭଳି ଅର୍ଥ ଦିଆଗଲା ବୋଲି ସେ ପ୍ରଶ୍ନ ରଖିଥିଲେ ।

ଏହାର ଉତର ରଖି ସ୍ୱାସ୍ଥ୍ୟମନ୍ତ୍ରୀ ଶ୍ରୀ ରାଉତ କହିଥିଲେ, କେବଳ ଦଶମ ଶ୍ରେଣୀ ଛାତ୍ରଛାତ୍ରୀଙ୍କୁ ସାଇକେଲ ନୁହେଁ; ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଯେକୌଣସି ପ୍ରକାର ରିଲିଫ ଦିଆଯାଇପାରିବ । ଏହା ବିରୋଧୀଙ୍କୁ ସନ୍ତୁଷ୍ଟ କରିପାରି ନଥିଲା ।

ଅପରାହ୍ଣ ଅଧିବେଶନରେ କଂଗ୍ରେସ ଓ ବିଜେପି ପୁନର୍ବାର ଏହି ପ୍ରସଙ୍ଗ ଉଠାଇ ସରକାରଙ୍କ ଠାରୁ ଉତର ଦାବି କରିଥିଲେ । ବିଜେପି ବିଧାୟକ ଦଳ ନେତା କନକବର୍ଦ୍ଧନ ସିଂହଦେଓ ମଧ୍ୟ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠି ଅର୍ଥରୁ ସାଇକେଲ କିଣା ଯାଇଥିବା ପ୍ରସଙ୍ଗ ସମ୍ପର୍କରେ ଆଲୋଚନା କରି ସରକାରଙ୍କୁ ସମାଲୋଚନା କରିଥିଲେ ।

ସେ କହିଥିଲେ, ସରକାର ଯଦି ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠି ପାଇଁ ଥିବା ଗାଇଡ ଲାଇନରେ ସଂଶୋଧନ ଆଣିଛନ୍ତି, ତେବେ ଗୃହକୁ ଅବଗତ କରାନ୍ତୁ ।
ବିରୋଧୀ ଦଳ ମୁଖ୍ୟ ସଚେତକ ପ୍ରସାଦ ହରିଚନ୍ଦନ କହିଥିଲେ, ଓଡିଶା ଖଣିି ନିଗମ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ଯେଉଁ ଅର୍ଥ ଦେଇଥିଲେ ତାର ସିଧାସଳଖ ଦୁରୂପଯୋଗ କରାଯାଇଛି ।

ବିରୋଧୀ ଦଳ ନେତା ଶ୍ରୀ ସିଂହ କହିଥିଲେ, ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠି ଅର୍ଥ ପ୍ରଦାନ ପାଇଁ ଥିବା ନିୟମାବଳୀକୁ ଉଲ୍ଲଘଂନ କରାଯାଇ ଏଭଳି ସାଇକେଲ ବଣ୍ଟନ କରାଯାଇଛି । ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠି ଅର୍ଥ ଉପଯୁକ୍ତ ଲୋକଙ୍କୁ ମିଳିବା ଦରକାର । ସ୍ୱାସ୍ଥ୍ୟମନ୍ତ୍ରୀ ରଖିଥିବା ମନ୍ତବ୍ୟ ଦୁର୍ଭାଗ୍ୟଜନକ । ଆମେ ଏହା ଉପରେ ସ୍ୱାଧିକାର ଭଙ୍ଗ ନୋଟିସ ଆଣିବୁ କି ବୋଲି ସେ ପ୍ରଶ୍ନ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୧(ଓଡିଶା ଡଟ୍ କମ୍)-ପଲ୍ଲୀସଭା ଓ ଗ୍ରାମ ସଭା କାର୍ଯ୍ୟକ୍ରମ ପ୍ରଚାର ପ୍ରସାରରେ ଯେଉଁ ୧୫ କୋଟି ଟଙ୍କା ଖର୍ଚ୍ଚ କରାଯାଇଛି ସେଥିରେ ବ୍ୟାପକ ଦୁର୍ନୀତି କରାଯାଇଛି ବୋଲି ମଙ୍ଗଳବାର ଦିନ ବିଧାନ ସଭାରେ ଅଭିଯୋଗ କରିଛନ୍ତି ଉଭୟ କଂଗ୍ରସ ଓ ବିଜେପି ।

ବିଧାନସଭାର ପ୍ରଶ୍ନୋତର କାଳରେ ତାରକା ପ୍ରଶ୍ନ ମାଧ୍ୟମରେ ଅଭିଯୋଗ ଆଣିଥିଲେ ବିଜେପି ବିଧାୟକ କରେନ୍ଦ୍ର ମାଝି । ଗାଁ ଲୋକଙ୍କୁ ସଶକ୍ତି କରଣ ଉଦ୍ଦେଶ୍ୟରେ ଗତ ଅକ୍ଟୋବର ମାସରେ ପଲ୍ଲୀସଭା ଓ ଗ୍ରାମ ସଭା ପାଇଁ ପ୍ରଚାର ପ୍ରସାର କାର୍ଯ୍ୟକ୍ରମରେ ବଡଧରଣର ଦୁର୍ନୀତି ହୋଇଛି ବୋଲି ସେ ଅଭିଯୋଗ କରିଛନ୍ତି ।

ପ୍ରଚାର ପ୍ରସାର ପାଇଁ ଯେଉଁ ସବୁ ପ୍ରିଟିଂ କରାଯାଇଛି ତାହା ସରକାରୀ ଛାପାଖାନାରେ କାହିଁକି କରାଗଲା ନାହିଁ , ଘରୋଇ ଛାପାଖାନାରେ କାହିଁକି ଛପା ଗଲା ବୋଲି ସେ ପ୍ରଶ୍ନ କରିଛନ୍ତି ।

ପଞ୍ଚାୟତିରାଜ ମନ୍ତ୍ରୀ କଳ୍ପତରୁ ଦାସ କହିଛନ୍ତି ପଲ୍ଲୀସଭା ଓ ଗ୍ରାମ ସଭାପାଇଁ ବ୍ଲକ ସ୍ତରରେ ୧୫ କୋଟି ୧୦ ଲକ୍ଷ ଟଙ୍କା ଏବଂ ପ୍ରଚାର ପ୍ରସାର ବାବଦରେ ରାଜ୍ୟସ୍ତରରେ ୨କୋଟି ୩୭ ଲକ୍ଷ ଟଙ୍କା ଖର୍ଚ୍ଚ କରାଯାଇଛି ।

ପଲ୍ଲୀସଭା ଓ ଗ୍ରାମ ସଭା ପାଇଁ ପ୍ରତି ପଂଚାୟତକୁ ସାମିଏନା ବାବଦକୁ ୧୦ ହଜାର ଟଙ୍କା ଦିଆଯାଇଥିଲା । ମାଇକ,ଭିଡିଓ ରେକଡିଂ ଓ ଅନ୍ୟାନ୍ୟ ବାବଦରେ ୧୭ ହଜାର ଟଙ୍କା ଖର୍ଚ୍ଚ କରାଯାଇଛି ।

ଯୋଜନା ଓ ଶିକ୍ଷା ବାବଦରେ ଯେଉଁ ଅର୍ଥ ବରାଦ କରାଯାଇଛି ସେହି ଅର୍ଥ ଏଠାରେ ଖର୍ଚ୍ଚ କରାଯାଇଛି । ଗତ ଅକ୍ଟୋବର ୨ ତାରିଖରୁ ୧୭ ତାରିଖ ମଧ୍ୟରେ ରାଜ୍ୟର ୬୨୩୮ପଞ୍ଚାୟତରେ ପଲ୍ଲୀସଭା ଓ ଗ୍ରାମ ସଭା କରାଯାଇଥିଲା । ଏଥିରେ ପାଖାପାଖି ୧ଲକ୍ଷ ୭୨ ହଜାର କର୍ମଚାରୀ ନିୟୋଜିତ ହୋଇଥିଲେ ।

କାର୍ଯ୍ୟକ୍ରମ ତଦାରଖ ଲାଗି ପ୍ରତି ପଞ୍ଚାୟତ ପାଇଁ ଜିଲ୍ଲା ସ୍ତରରେ ୪ ହଜାର ୫ଶହ ଏବଂ ବ୍ଲକ ସ୍ତରରେ ୧୫ ହାଜରା ଟଙ୍କା ଖର୍ଚ୍ଚ କରାଯାଇଛି । ଏହା ସହ ସଚେତନତା ପାଇଁ ପାଲା,ଦାସକାଠିଆ ଓ ଲୋକନୃତ୍ୟ ପରିବେଷଣ ହୋଇଥିବା ବିଭାଗୀୟ ମନ୍ତ୍ରୀ ସୂଚନା ଦେଇଛନ୍ତି । ମନ୍ତ୍ରୀ ସଫେଇ ଦେଇ କହିଛନ୍ତି କିଛି ଦୁର୍ନୀତି ହୋଇ ନାହିଁ । ଯାହାକିଛି ହୋଇଛି ସରକାରୀ ନୀତି ନିୟମ ଅନୁସାରେ ହୋଇଛି ।

ମାତ୍ର ଅନେକ ସ୍ଥାନରେ ଏଭଳି କାର୍ଯ୍ୟକ୍ରମ ହୋଇନଥିବା ଅଭିଯୋଗ କରିଛନ୍ତି କଂଗ୍ରେସ ବିଧାୟକ ପ୍ରଫୁଲ ମାଝି । ସେ କହିଛନ୍ତି ଏ କାର୍ଯକ୍ରମ ମାଧ୍ୟମରେ କୋଟି କୋଟି ଟଙ୍କା ଚଳୁ କରାଯାଇଛି । କୋଉଠି ଦାସକାଠିଆ,ପାଲା ହୋଇଛି ତାହା ସରକାର କହିପାରିବେ କି ?

ଆଜି ବିଧାନସଭାରେ ପଞ୍ଚାୟତ ରାଜ ମନ୍ତ୍ରୀଙ୍କୁ ଘେରିଥିଲେ ବିରୋଧି । ଏ ବଷୟକୁ ନେଇ ମନ୍ତ୍ରୀ ସଫେଇ ଦେଇ କହିଛନ୍ତି କିଛି ଦୁର୍ନୀତି ହୋଇ ନାହିଁ । ଯାହାକିଛି ହୋଇଛି ସରକାରୀ ନୀତି ନିୟମ ଅନୁସାରେ ହୋଇଛି ।

ଓଡିଶା ଡଟ୍ କମ୍

ଭୁବନେଶ୍ୱର,ଡିସେମ୍ବର ୫(ଓଡିଶା ଡଟ୍ କମ୍)-ଖାଉଟି କ୍ଷେତ୍ରରେ ବିଦେଶୀ ପୁଞ୍ଜି ବିନିଯୋଗ ପ୍ରସଙ୍ଗକୁ ନେଇ ଲୋକସଭାରେ ଉପା ସରକାର ବିଜୟ ହୋଇଥିବା ବେଳେ ବୁଧବାର ଦିନ ବିଧାନସଭାରେ ଜୋରଦାର ଆଲୋଚନା ହୋଇଛି ।

ଏହି ପ୍ରସଙ୍ଗକୁ ନେଇ ବିଜେଡି,ବିଜେପି ଓ ସିପିଆଇ ସଦସ୍ୟ କେନ୍ଦ୍ରକୁ ସମାଲୋଚନା କରିଛନ୍ତି । ଅନ୍ୟ ପକ୍ଷରେ କଂଗ୍ରେସ ଏଫଡିଆଇ ସମର୍ଥନରେ ଦୃଢ ଯୁକ୍ତି ବାଢିଛି ।

ଶୂନ୍ୟକାଳରେ ପୂର୍ବତନ ଅର୍ଥମନ୍ତ୍ରୀ ତଥା ବିଜେଡି ବିଧାୟକ ପ୍ରଫୁଲ ଘଡାଇ ଏହି ପ୍ରସଙ୍ଗ ଉତ୍ଥାପନ କରିଥିଲେ । ସେ କହିଲେ ଏଫ୍ଡିଆଇକୁ ବିଜେଡି ସମେତ ବହୁ ଦଳ ବିରୋଧ କରୁଛନ୍ତି ।

ବିଧାନସଭାରେ ମଧ୍ୟ ଏହା ବିରୋଧରେ ପ୍ରସ୍ତାବ ଗ୍ରହଣ କରାଯିବା ଦରକାର । ଓଡିଶାବାସୀ କଦାପି କଂଗ୍ରେସ ସରକାରର ଏହି ନିଷ୍ପତିକୁ ଗ୍ରହଣ କରିବେ ନାହିଁ ।

ଯେଉଁ ମନମୋହନ ସିଂହ ରାଜ୍ୟ ସଭାରେ ବିରୋଧିଦଳର ନେତା ଥିବାବେଳେ ଏଫିଡିଆଇକୁ ବିରୋଧ କରୁଥିଲେ,ସେ ଏବେ ପ୍ରଧାନମନ୍ତ୍ରୀ ଭାବେ ଏହାକୁ ସ୍ୱାଗତ କରୁଛନ୍ତି ।

ଏହା କାର୍ଯ୍ୟକାରୀ ହେଲେ ୧୨ କୋଟି ଲୋକ ବେକାର ହୋଇଯିବେ । ଦେଶର ଗରିବ ଲୋକ ଅଧିକ ଗରିବ ହେବେ । କ୍ଷୁଦ୍ର ବ୍ୟବସାୟୀଙ୍କ ବେଉସା ବୁଡିଯିବ ।

ବିଜେଡିର ପ୍ରଦୀପ ମହାରଥୀ କହିଥିଲେ ଯେ, କଂଗ୍ରେସ ଏବେ ବିଦେଶୀ ହାତରେ ବନ୍ଧା ପଡିଛି । ସୋନିଆ ଗାନ୍ଧୀ ବିଦେଶରୁ ଆସି ସୁଇସ ବ୍ୟାଙ୍କରେ ଟଙ୍କା ରଖିବା ପାଇଁ ଭାରତର ଗରିବ ଲୋକଙ୍କୁ ପଙ୍ଗୁ କରି ଦେଉଛି । ଲୋକେ କିନ୍ତୁ କଂଗ୍ରେସିଆଙ୍କ ବଦନ ଚିହ୍ନିଗଲେଣି ।

ଏମାନେ ଲୁଟପାଇଁ ଚନ୍ଦନମାରି ଲୋକଙ୍କୁ ଏଫ୍ଡିଆଇ ଲଣ୍ଠନ ଦେଖାଉଛନ୍ତି । କଂଗ୍ରେସ ପକ୍ଷରୁ ବିରୋଧିଦଳ ମୁଖ୍ୟ ସଚେତକ ପ୍ରସାଦ ହରିଚନ୍ଦନ କହିଲେ ଯେ, ବୈଦେଶିକ ପୁଞ୍ଜି କ୍ଷେତ୍ରରେ ବିଜେଡି ଦୋମୁହାଁ ନୀତି ଅବଲମ୍ବନ କରୁଛି । ରାଜ୍ୟ ସରକାର ସବୁ କ୍ଷେତ୍ରରେ ବୈଦେଶିକ ପୁଞ୍ଜି ଖଟାଉଛନ୍ତି ।

କେବଳ ବଡ ଶିଳ୍ପ ନୁହେଁ,ଚାଷ କ୍ଷେତ୍ରରେ ମଧ୍ୟ ରାଜ୍ୟ ସରକାର ବୈଦେଶିକ ପୁଞ୍ଜିପତିଙ୍କୁ ନିମନ୍ତ୍ରଣ କରୁଛନ୍ତି । ବିଦେଶୀ ସହରରେ ମେଳା କରାଯାଇ ବିଦେଶୀ କଂପାନୀକୁ ଡାକି ଅଣାଯାଉଛି । ଏପଟେ କିନ୍ତୁ ବିରୋଧ କରାଯାଉଛି ।

କଂଗ୍ରେସର ସନ୍ତୋଷ ସିଂ ସାଲୁଜା, ନବକିଶୋର ଦାସ କହିଥିଲେ ଏଫ୍ଡିଆଇକୁ ବିରୋଧ କରାଯିବା ଠିକ୍ ନୁହେଁ । ଏହା ସ୍ୱାଗତ ଯୋଗ୍ୟ । ବିଧାୟକ ଦେବୀ ପ୍ରସନ୍ନ ଚାନ୍ଦ,ଡା ପ୍ରଫୁଲ ମାଝି ଏହାକୁ ସମର୍ଥନ କରିଥିଲେ ।

ଓଡିଶା ଡଟ୍ କମ୍