ବିଜେଡ଼ି

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ମାର୍ଚ୍ଚ ୫ (ଓଡିଶା ଡଟ୍ କମ୍) ରାଜ୍ୟରେ ବିଜୁ ଜନତା ଦଳ(ବିଜେଡି)ଏକ ଦଶନ୍ଧୀ ଧରି ଶାସନ
କରିଆସିଥିବା ବେଳେ ଶନିବାର ନବୀନ ପଟ୍ଟନାୟକ ଓଡିଶାର ମୁଖ୍ୟମନ୍ତ୍ରୀ ଭାବେ ଏଗାର ବର୍ଷ ପୂରଣ କରିଛନ୍ତି ।

୨୦୦୦ ମସିହା ମାର୍ଚ୍ଚ ପାଞ୍ଚ ତାରିଖରେ ସେ ପ୍ରଥମ ଥର ପାଇଁ ଓଡିଶାର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ ।
ତା’ପରେ ୨୦୦୪ ଓ ୨୦୦୯ ନିର୍ବାଚନରେ ମଧ୍ୟ ସେ ପଦବୀ ଅଳଙ୍କୃତ କଲେ ।

ଗତ ଏଗାର ବର୍ଷ ମଧ୍ୟରେ ସେ ବହୁ ଚ୍ୟାଲେଞ୍ଜର ସମ୍ମୁଖୀନ ହୋଇଥିଲେ ମଧ୍ୟ ଏହାକୁ ଏଡାଇଯାଇଛନ୍ତି । ଓଡିଶାର
ମୁଖ୍ୟମନ୍ତ୍ରୀ ହୋଇ ଓଡିଆ ଭାଷା ଉପରେ ତାଙ୍କର କମ୍ ଜ୍ଞାନ ଯୋଗୁଁ ବହୁ ଲୋକ, ନେତା ଭାବେ ତାଙ୍କ ଦକ୍ଷତା ଉପରେ ପ୍ରଶ୍ନ ଉଠାଇଛନ୍ତି ।

ତିନି ତିନି ଥର ମୁଖ୍ୟମନ୍ତ୍ରୀ ଆସନରେ ବସିଥିବା ନବୀନ ଗତ ଏଗାର ବର୍ଷ ମଧ୍ୟରେ ଗରିବଙ୍କ ପାଇଁ ଦୁଇ ଟଙ୍କିଆ ଚାଉଳ, ବିଜୁ କେବିକେ, ବିଜୁ କନ୍ଧମାଳ-ଗଜପତି ଯୋଜନା, ମଧୁବାବୁ ପେନ୍ସନ ଯୋଜନା, ମୋ କୁଡ଼ିଆ ଭଳି ବହୁ ଜନହିତକାରୀ ଯୋଜନା ଆରମ୍ଭ କରିଥିବା ବେଳେ ବହୁ ସମସ୍ୟାର ସମ୍ମୁଖୀନ ମଧ୍ୟ ହୋଇଛନ୍ତି ।

ଏହା ମଧ୍ୟରେ ରହିଛି କଳିଙ୍ଗନଗର ଗୁଳିକାଣ୍ଡ, କନ୍ଧମାଳ ଦଙ୍ଗା ଓ ବିଜେପି ସହିତ କରିଥିବା ମେଣ୍ଟ ଭାଙ୍ଗିବା । ସରକାର ଶିଳ୍ପାୟନକୁ ଅଗ୍ରାଧିକାର ଦେଇ ବିଭିନ୍ନ ଦେଶୀ ବିଦେଶୀ କମ୍ପାନୀ ସହ ୮୮ଟି ବୁଝାମଣାପତ୍ର ସ୍ୱାକ୍ଷରିତ କରିଛନ୍ତି ।

ପୋସ୍କୋ, ବେଦାନ୍ତ, ଆର୍ସେଲର-ମିତ୍ତଲ, ଟାଟା ଷ୍ଟିଲ ଓ ଅନ୍ୟ କେତେକ ଛୋଟ ବଡ କମ୍ପାନୀ ରାଜ୍ୟରେ ଶିଳ୍ପ ପ୍ରତିଷ୍ଠାନ ପାଇଁ ଚୁକ୍ତିପତ୍ର ମଧ୍ୟ ସ୍ୱାକ୍ଷର କରିଛନ୍ତି । କିନ୍ତୁ ବିଭିନ୍ନ କାରଣରୁ ଅଧିକାଂଶ ପ୍ରକଳ୍ପ କାର୍ଯ୍ୟ ଆରମ୍ଭ ହୋଇପାରି ନାହିଁ ।

ରାଜ୍ୟବାସୀଙ୍କୁ ଦୁର୍ନୀତିମୁକ୍ତ ଓ ସ୍ୱଚ୍ଛ ଶାସନ ଦେବାକୁ କହୁଥିବା ନବୀନ ସରକାରଙ୍କ ନାଁରେ ଖଣି ଦୁର୍ନୀତି, ଡ଼ାଲି ଦୁର୍ନୀତି ଭଳି ମହା ଅଭିଯୋଗ ଆସିଛି ।

ଏହି ଶାସନ କାଳରେ ମାଓବାଦୀଙ୍କ କାର୍ଯ୍ୟକଳାପ ବୃଦ୍ଧି ପାଇଛି । ପୂର୍ବରୁ ଦୁଇ ତିନୋଟି ଜିଲ୍ଲାରେ ସେମାନଙ୍କ ଉପସ୍ଥିତି ଜଣାପଡ଼ୁଥିବା ବେଳେ ବର୍ତ୍ତମାନ ୨୦ରୁ ଉର୍ଦ୍ଧ୍ଵ ଜିଲ୍ଲାରେ ସେମାନେ କାୟାବିସ୍ତାର କରିସାରିଲେଣି ।

ଦୁର୍ନୀତି ଓ ଅଭିଯୋଗ ସରକାରଙ୍କ ପିଛା ଛାଡ଼ୁନଥିବା ବେଳେ ଓଡିଶାର ଜନସାଧାରଣ ନବୀନଙ୍କ ଉପରେ ଆସ୍ଥା ପ୍ରକଟ କରି ତିନି ତିନି ଥର ରାଜ୍ୟର ଶାସନ ଭାର ଦେଇଛନ୍ତି ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର, ଜାନୁୟାରୀ ୧୭(ଓଡ଼ିଶା ଡ଼ଟ୍ କମ୍) “ଦୁର୍ନୀତିରେ ବିଜେଡ଼ି ମଧ୍ୟ କଂଗ୍ରେସ ଠାରୁ ପଛରେ ନାହିଁ’ ରାଜଧାନୀ ଭୁବନେଶ୍ୱରରେ ସୋମବାର ବିଜେପି ପକ୍ଷରୁ ଆୟୋଜିତ ଭ୍ରଷ୍ଟାଚାର ହଟାଅ ସମାବେଶରେ ଯୋଗେଇ ଦଳର ରାଷ୍ଟ୍ରୀୟ ଅଧ୍ୟକ୍ଷ ନୀତିନ୍ ଗଡ଼କରୀ କହିଛନ୍ତି ।

ସେ ଉଭୟ କେନ୍ଦ୍ର ସରକାର ଓ ରାଜ୍ୟ ସରକାର ବିରୁଦ୍ଧରେ ନିଜର ବକ୍ତବ୍ୟ ପ୍ରଦାନ କରିଥିଲେ । ବିଜେଡ଼ି ସରକାର କଂଗ୍ରେସକୁ କହୁଛି “ତୁମ୍ ଦିଲ୍ଲୀ ଲୁଟୋ, ହମ୍ ଓଡ଼ିଶା ଲୁଟ୍ନେକା କାମ କରେଙ୍ଗେ’ ବୋଲି ଗଡ଼କରୀ କହିଥିଲେ ।

କେନ୍ଦ୍ର ସରକାର ଆଦର୍ଶ ହାଉସିଂ, ରାଜ୍ୟଗୋଷ୍ଠୀ କ୍ରୀଡ଼ା, ଟୁଜି ସ୍ପେକ୍ଟ୍ରମ ଭଳି ଦୁର୍ନୀତିରେ ବୁଡ଼ି ଯାଇଥିବା ବେଳେ ଓଡ଼ିଶାରେ ନବୀନ ପଟ୍ଟନାୟକ ସରକାର ଖଣି ଦୁର୍ନୀତି, ବେଦାନ୍ତ ବିଶ୍ୱବ୍ୟିାଳୟ ଜମିକୁ ନେଇ ସମାଲୋଚିତ ହୋଇଛି । ତେଣୁ ରାଜ୍ୟରେ ବିଜେପି ହିଁ ଏକମାତ୍ର ବିକଳ୍ପ, ସେ କହିଛନ୍ତି ।

ବିଶ୍ୱହିନ୍ଦୁ ପରିଷ ନେତା ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ହତ୍ୟାକାରୀଙ୍କୁ କାହିଁକି ଏପର୍ଯ୍ୟନ୍ତ ଗିରଫ କରାଯାଇ ନାହିଁ ବୋଲି ସେ ଓଡ଼ିଶା ସରକାରକୁ ପ୍ରଶ୍ନ କରିଥିଲେ ।

ବିଜେଡ଼ି ଏବେ ଓଡ଼ିଶାରେ ପ୍ରତି ଘରକୁ ଯାଇ ସଂପର୍କ ଯୋଡ଼ିବା ଅଭିଯାନ ଆରମ୍ଭ କରିଛି । ବିଜେପି ମଧ୍ୟ ଲୋକ ମାନଙ୍କ ପାଖରେ ବିଜେଡ଼ିର ଦୁର୍ନୀତି କାରନାମା ଉପସ୍ଥାପନ କରୁ, ଫଳରେ ଲୋକେ ବିଜେଡ଼ିକୁ ଘରେ ପୁରାଇବା ପରିବର୍ତ୍ତେ ଘରକୁ ପଠାଇ ଦେବେ ବୋଲି ସେ କହିଥିଲେ ।

ନବୀନ ହେଉଛନ୍ତି ଦୁର୍ନୀତି ଭ୍ରଷ୍ଟାଚାରର ସମ୍ରାଟ । ତାଙ୍କ ଶାସନ କାଳରେ ଖଣି କାରବାରରେ ତିନି ଲକ୍ଷ କୋଟି ଟଙ୍କାର ଦୁର୍ନୀତି ହୋଇଛି ଓ ସ୍ୱଚ୍ଛ ଶାସନର ଦ୍ଵାହି ଦେଇ ଲୋକଙ୍କୁ ଠକୁଛନ୍ତି ବୋଲି ସମାବେଶରେ ଅଧ୍ୟକ୍ଷତା କରିଥିବା ରାଜ୍ୟ ସଭାପତି ଜୁଏଲ ଓରାମ କହିଥିଲେ ।

ନବୀନଙ୍କ ବିଶ୍ୱାସଘାତକତାର ଜବାବ ଦିଆଯିବ ଓ ଭବିଷ୍ୟତରେ ବିଜେଡ଼ି ସହ ଆମେ ମେଣ୍ଟ କରିବୁ ନାହିଁ, ସେ କହିଛନ୍ତି ।

ରାଜ୍ୟର ୨୧ଟି ଲୋକସଭା ନିର୍ବାଚନ ମଣ୍ଡଳୀରୁ ଆସିଥିବା କର୍ମୀମାନେ ରାଜଧାନୀର ଆଠଟି ସ୍ଥାନରୁ ରାଲିରେ ବାହାରି ସ୍ଥାନୀୟ ପିଏମ୍ଜି ଛକ ଠାରେ ସମାବେଶରେ ଯୋଗ ଦେଇଥିଲେ ।
୨୦୦୯ ସାଧାରଣ ନିର୍ବାଚନରେ ପରାଜୟ ପରେ ରାଜ୍ୟରେ ଏହା ବିଜେପିର ସର୍ବ ବୃହତ ସମାବେଶ । ଏଥିରେ ପ୍ରାୟ ଦୁଇ ଲକ୍ଷରୁ ଉଦ୍ଧ୍ୱର୍ କର୍ମୀ ଯୋଗ ଦେ ଇଥିଲେ ।

ସମାବେଶଷର ଅନ୍ୟ ମାନଙ୍କ ମଧ୍ୟରେ ସାଂସଦ ବଲବୀର ପୁଞ୍ଜ, ବରିଷ୍ଠ ନେତା ବିଜୟ ମହାପାତ୍ର, ବିଶ୍ୱଭୂଷଣ ହରିଚନ୍ଦନ, କେ.ଭି.ସିଂହେଓ, ପୂର୍ବତନ ରାଜ୍ୟ ସଭାପତି ସୁରେଶ ପୂଜାରୀ ପ୍ରମୁଖ ଉଦବୋଧନ ଦେଇ ଦଳକୁ ଶକ୍ତିଶାଳୀ କରିବା ନିମନ୍ତେ କାର୍ଯ୍ୟ କରିବାକୁ କର୍ମୀ ମାନଙ୍କୁ ଆହ୍ୱାନ ଦେଇଥିଲେ ।

ତେବେ ଏହି ସମାବେଶ କୌଣସି ପ୍ରଭାବ ପକାଇବ ନାହିଁ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ପ୍ରତିକ୍ରିୟାରେ କହିଛନ୍ତି ।

ଓଡିଶା ଡଟ୍ କମ୍