ଓଡିଶା ଡଟ କମ ସମ୍ବାଦଦାତା
ଭୁବନେଶ୍ଵର,ମଇ ୨୭ (ଓଡିଶା ଡଟ କମ) ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତରେ ଏନଡିଏ ସରକାରର ଏକ ବର୍ଷପୂର୍ତ୍ତି ଅବସରରେ ବୁଧବାର ସାଧାରଣ ଜନତାଙ୍କ ପାଖରେ ସରକାରଙ୍କ ରିପୋର୍ଟ କାର୍ଡ ରଖିଛନ୍ତି କେନ୍ଦ୍ରୀୟ ସହରାଞ୍ଚଳ ବିକାଶ ମନ୍ତ୍ରୀ ଭେଙ୍କେୟା ନାଇଡୁ ।
ଭୁବନେଶ୍ଵରରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧନ କରି ସେ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତରେ ଗତ ଏକବର୍ଷ ମଧ୍ୟରେ ଦେଶର ଦିଗହରା ଅର୍ଥନୀତି ରାସ୍ତାକୁ ଆସିଛି ।
ଦୀର୍ଘ ଦଶନ୍ଧି ଧରି ଦେଶରେ ଦେଖାଦେଇଥିବା ନିରାଶାର ବାତାବରଣରେ ବିରାମ ଲାଗିଛି। ଦେଶର ଆର୍ଥିକ ଅଭିବୃଦ୍ଧି ହୋଇଛି, ରୋଜଗାରର ପନ୍ଥା ଖୋଲିଛି । ଅନ୍ତର୍ଜାତିକ ସ୍ତରରେ ଦେଶର ଏକ ନୂଆ ଛବି ତିଆରି ହୋଇଛି।
ଭେଙ୍କେୟା କହିଛନ୍ତି ଯେ, ଭ୍ରଷ୍ଟାଚାର ରୋକିବାରେ ସରକାର ସଫଳ ହୋଇଛନ୍ତି । ଯାହାର ଫଳସ୍ଵରୂପ ଲୋକଙ୍କ ବିଶ୍ଵାସ ସରକାର ଉପରେ ଆସିଛି। ଦେଶରେ ପୁଞ୍ଜି ବିନିଯୋଗ ବଢିଛି । ଦରଦାମ ନିୟନ୍ତ୍ରଣରେ ରହିଛି।
ସାଧାରଣ ଲୋକଙ୍କୁ ଯେପରି ଦେଶର ଆର୍ଥିକ ଅଭିବୃଦ୍ଧିର ଲାଭ ମିଳିପାରିବ ସରକାର ସେଦିଗରେ ସଫଳ ପଦକ୍ଷେପ ନେଇଛନ୍ତି । ପ୍ରଧାନମନ୍ତ୍ରୀ ଜନଧନ ଯୋଜନାରେ ୧୫କୋଟି ଲୋକ ବ୍ୟାଙ୍କ ଆକାଉଣ୍ଟ ଖୋଲିଛନ୍ତି। ଦେଶରେ ଧନୀ ଗରିବଙ୍କ ମଧ୍ୟରେ ଯେପରି ଆର୍ଥିକ ଅସମାନତା ଦୂରହେବା ସେଦିଗରେ ସରକାର ପଦକ୍ଷେପ ନେଇଛନ୍ତି ।
ଏହି ଅବସରରେ ଭେଙ୍କେୟା, ମୋଦି ସରକାରଙ୍କ ଦ୍ଵାରା ଆର୍ଥିକ କ୍ଷେତ୍ରରେ ପଛୁଆ ଥିବା ଲୋକଙ୍କପାଇଁ ଆରମ୍ଭ କରାଯାଇଥିବା ଲୋକାଭିମୁଖୀ ଯୋଜନା ପ୍ରଧାନମନ୍ତ୍ରୀ ଜନଧନ ଯୋଜନା, ପ୍ରଧାନମନ୍ତ୍ରୀ ସୁରକ୍ଷା ଯୋଜନା, ଅଟଳ ପେନସନ ଯୋଜନା, ଜୀବନ ଜ୍ୟୋତି ଯୋଜନା ବିଷୟରେ କହିଥିଲେ।
ଭେଙ୍କେୟା କହିଥିଲେ ଯେ ଭାରତର ସଂଘୀୟ ବ୍ୟବସ୍ଥା ଅନୁଯାୟୀ ରାଜ୍ୟର ବିକାଶ ପାଇଁ କେନ୍ଦ୍ର ସରକାର ସବୁବେଳେ ଚେଷ୍ଟିତ ଅଛନ୍ତି । ଏନଡିଏ ସରକାର ରାଜ୍ୟ ବାବଦ ଆର୍ଥିକ ଭାଗ ବଢାଇବା ସହ ବିଭିନ୍ନ ଯୋଜନାରେ ଅନୁଦାନ ଅର୍ଥ ବଢାଇଛନ୍ତି।
ଭିତ୍ତିଭୂମି ବିକାଶ ପାଇଁ ନୂଆ ଯୋଜନା ପ୍ରଣୟନ ହୋଇଛି । ନୂଆ ବିଦେଶ ନୀତି ତିଆରି ହୋଇଛି । ବ୍ୟାପାର ଓ ବିଦେଶୀପୁଞ୍ଜି ବିନିଯୋଗ ବଢାଇବା ପାଇଁ ମୋଦି ସରକାରଙ୍କ ମେକ ଇନ ଇଣ୍ଡିଆ କାର୍ଯ୍ୟକ୍ରମ ବିକାଶର ଗତିକୁ ଆହୁରି ତ୍ୱରାନ୍ୱିତ କରିବବୋଲି ଭେଙ୍କେୟା କହିଥିଲେ।
ଗତ ପଚାଶ ବର୍ଷ ଧରି ଦେଶର ଲାଗିରହିଥିବା ଆର୍ଥିକ ସ୍ଥାଣୁତା ପାଇଁ ସେ କଂଗ୍ରେସକୁ ଦାୟୀ କରିବାସହ ଦେଶରର ପ୍ରଗତି କଥା ଉଠିଲେ ସମାଲୋଚନା ନକରି ସହଯୋଗ କରିବାକୁ କଂଗ୍ରେସକୁ ପରାମର୍ଶ ଦେଇଥିଲେ।
ଓଡିଶା ଡଟ କମ