ବିଧାନସଭା

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୩(ଓଡିଶା ଡଟ୍ କମ୍)-ବାଚସ୍ପତିଙ୍କ ପ୍ରତି ଆପତିଜନକ ମନ୍ତବ୍ୟ ଦେଇଥିବାରୁ କଣ୍ଟାବାଞ୍ଜିର କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜାଙ୍କୁ ବିଧାନସଭାରୁ ସାତଦିନ ପାଇଁ ନିଲମ୍ବିତ କରାଯାଇଛି । ଏହାର ପ୍ରତିବାଦରେ ବିରୋଧି କଂଗ୍ରେସ କକ୍ଷତ୍ୟାଗ କରିଛି ।

ବୁଧବାର ଦିନ ଶୂନ୍ୟକାଳରେ ଆକ୍ଷେପଜନିତ ବିବାଦ ଆପାତତଃ ତୁଟିଯାଇଥିଲେ ମଧ୍ୟ ଅପରାହ୍ଣ ଅଧିବେଶନରେ ମୁଲତବି ପ୍ରସ୍ତାବ ଉପରେ ଦୁଇଘଣ୍ଟିଆ ଆଲୋଚନା ହୋଇଥିଲା । ଏହି ସମୟରେ ଶାସକ ଦଳର ମୁଖ୍ୟସଚେତକ ପୁନର୍ବାର ସାଲୁଜାଙ୍କ ପ୍ରସଙ୍ଗ ଉଠାଇଥିଲେ ।

ଗଣତାନ୍ତ୍ରିକ ବିଧିବ୍ୟବସ୍ଥା ପ୍ରତି ସମ୍ମାନ ରଖି ଦୁଃଖ ପ୍ରକାଶ ନକରିବାରୁ ତାଙ୍କୁ ନିଲମ୍ବନ କରିବା ଦାବିରେ ପ୍ରଭାତ ତ୍ରିପାଠୀ ଏକ ପ୍ରସ୍ତାବ ଆଣିଥିଲେ । ପ୍ରସ୍ତାବକୁ ଗହଣକରି ସନ୍ଧ୍ୟା ୬ଟା ୧୫ରେ ବାଚସ୍ପତି ସାଲୁଜାଙ୍କୁ ନିଲମ୍ବିତ ଆଦେଶ ଶୁଣାଇଥିଲେ ଓ ଗୃହ ଛାଡ଼ିବାକୁ ନିଦେ୍ର୍ଧଶ ଦେଇଥିଲେ ।

ଶୂନ୍ୟକାଳରେ କିଏ ପ୍ରଥମେ କହିବେ ସେ ନେଇ ବାଦାନୁବାଦ ସୃଷ୍ଟି ହୋଇଥିବାବେଳେ ଏହାକୁ ନେଇ ବିରୋଧୀ ଦଳ ସଦସ୍ୟ ସନ୍ତୋଷ ସିଂହ ସାଲୁଜା ବାଚସ୍ପତିଙ୍କ ପ୍ରତି ଅନୁଚିତ ଶବ୍ଦ ପ୍ରୟୋଗ କରିଥିଲେ ।

ଗୃହର ଓ ବାଚସ୍ପତିଙ୍କର ପଦମର୍ଯ୍ୟାଦା ଦୃଷ୍ଟିରୁ ଦଳମତ ନିର୍ବିଶେଷରେ ସମସ୍ତେ ଏହାର ପ୍ରତିବାଦ କରିବା ସହିତ ସାଲୁଜା କ୍ଷମା ମାଗିବାକୁ ଦାବି କରିଥିଲେ । ବିରୋଧୀ ଦଳ ନେତା ଓ ମୁଖ୍ୟ ସଚେତକ ଏ ନେଇ ଦୁଃଖ ପ୍ରକାଶ କରିବାରେ ଦୀର୍ଘ ସମୟଧରି ଚାଲିଥିବା ବିବାଦର ଅବସାନ ଘଟିଥିଲା ।

ବିରୋଧୀ ଦଳ ନେତା ସାଧାରଣତଃ ଶୂନ୍ୟକାଳରେ ଆଲୋଚନା ଆରମ୍ଭ କରିବାର ପରମ୍ପରା ଚଳିଆସିଥିବାବେଳେ ତାଙ୍କ ଅନୁପସ୍ଥିତିରେ ବାଚସ୍ପତି ଶାସକ ଦଳର ଉପମୁଖ୍ୟ ସଚେତକ ସଞ୍ଜୟ ଦାସବର୍ମାଙ୍କୁ ତାଙ୍କର ବକ୍ତବ୍ୟ ରଖିବାକୁ ଡାକିଥିଲେ ।

ବିରୋଧୀ ଦଳର ମୁଖ୍ୟ ସଚେତକ ପ୍ରସାଦ ହରିଚନ୍ଦନ କାହିଁକି ପରାମ୍ପରା ଭଙ୍ଗହେଲା ବୋଲି ପଚାରିବା ସହ ଜଣେ ସରକାରୀ ସଦସ୍ୟଙ୍କୁ ଡାକିବା ନେଇ ବୈଧାନିକ ପ୍ରଶ୍ନ ଉଠାଇଥିଲେ ।

ଏହି ସମୟରେ ସନ୍ତୋଷ ସିଂହ ସାଲୁଜା ବାଚସ୍ପତିଙ୍କ ଦୃଷ୍ଟି ଅକର୍ଷଣକରି ତାଙ୍କୁ ଆଲୋଚନାର ସୁଯୋଗରୁ ବଞ୍ଚିତ କରାଯାଉଛି ବୋଲି ଅଭିଯୋଗ କରିଥିଲେ । ବାଚସ୍ପତି ପାତରଅନ୍ତର କରୁଛନ୍ତି ଓ ବିଜେଡ଼ି ସଦସ୍ୟ ଭଳି କାମ କରୁଛନ୍ତି । ସେ ବିଜେଡିର ‘ବୋକଚାବୁହା’ ବୋଲି ସାଲୁଜା ଆକ୍ଷେପ କରିଥିଲେ । ଶାସକ ଦଳର ସଦସ୍ୟମାନେ ତତକ୍ଷଣାତ ଏଥିରେ ହସ୍ତକ୍ଷେପ କରିଥିଲେ ।

ପ୍ରଦୀପ ମହାରଥୀ ସାଲୁଜା ଗୃହକୁ ଜୋତା ମାରିଛନ୍ତି, ଏହା ଅତ୍ୟନ୍ତ ଲଜ୍ଜାଜନକ ବୋଲି ମତଦେଇ ପ୍ରୟୋଗ କରିଥିବା ଅପଶବ୍ଦ ପ୍ରତ୍ୟାହରର ସହ କ୍ଷମା ମାଗିବାକୁ ପରାମର୍ଶ ଦେଇଥିଲେ ।

ରାଜସ୍ୱମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ଏଥିରେ ହସ୍ତକ୍ଷେପକରି ସରକାରୀ ଦଳର ସଦସ୍ୟଙ୍କୁ ପ୍ରଥମେ ଡାକିବାରେ କିଛି ଅସୁବିଧା ନାହିଁ ବୋଲି ମନ୍ତବ୍ୟ ଦେଇଥିଲେ ।

ବିରୋଧୀ ଦଳ ନେତା ଭୂପିନ୍ଦର ସିଂହ ଅନେକ ସମୟରେ ବିରୋଧୀ ଦଳର ସଦସ୍ୟଙ୍କୁ ମତ ରଖିବାର ସୁଯୋଗ ମିଳୁନଥିବା ନେଇ କ୍ଷୋଭ ପ୍ରକାଶ କରିଥିଲେ । ତେବେ ସାଲୁଜାଙ୍କ ମନ୍ତବ୍ୟ ନେଇ ଦଳ ପକ୍ଷରୁ ସେ ଦୁଃଖ ପ୍ରକାଶ କରିଥିଲେ । ତାଙ୍କ ସହିତ ପ୍ରସାଦ ହରିଚନ୍ଦନ ମଧ୍ୟ ଏ ନେଇ ଦୁଃଖ ପ୍ରକାଶ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୨(ଓଡିଶା ଡଟ୍ କମ୍)-ହାତୀ,ମାଙ୍କଡକୁ ନେଇ ବିଧାନସଭାରେ ଶାସକ ଓ ବିରୋଧୀ ଉଦ୍ବେଗ ପ୍ରକାଶ କରିଛନ୍ତି । ଏମାନଙ୍କ ଉପଦ୍ରବ ଅସହ୍ୟ ହେଲାଣି । ସରକାର ହାତୀ ସହିତ ମଣିଷଙ୍କୁ ମଧ୍ୟ ସୁରକ୍ଷା ଦିଅନ୍ତୁ ବୋଲି ବିଧାୟକମାନେ ବିଧାନସଭାରେ ମଙ୍ଗଳବାର ଦିନ ଅଭିଯୋଗ ଆଣିଛନ୍ତି ।

ନୀଳଗିରିରେ ଦେଢ଼ଶହ ପର୍ଯ୍ୟନ୍ତ ହାତୀ ଉପଦ୍ରବ କରୁଛନ୍ତି । ଏହାକୁ ରୋକାଯାଇପାରୁନି । ବନ ବିଭାଗ ଓ ପୁଲିସ କର୍ମଚାରୀ ହାତ ଟେକିଦେଇଛନ୍ତି । ହାତୀ ପଲ ଘରଦ୍ୱାର ଭାଙ୍ଗୁଛନ୍ତି । ଏହାର ସ୍ଥାୟୀ ସମାଧାନ କରିବାକୁ ଆଜି ବିଧାନସଭାରେ ସ୍ୱାଧୀନ ସଦସ୍ୟ ପ୍ରତାପ ଷଡଙ୍ଗୀ ଜଙ୍ଗଲ ଓ ପରିବେଶ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ ।

ବିଭାଗୀୟ ମନ୍ତ୍ରୀ ବିଜୟଶ୍ରୀ ରାଉତରାୟ କହିଥିଲେ ହାତୀ ସ୍କୁଲରେ ପାଠ ପଢିନାହାନ୍ତି କି ଜ୍ଞାନ ଆହରଣ କରିନାହାନ୍ତି ଯେ ସେମାନେ ସବୁ କଥା ବୁଝିଯିବେ । ହାତୀ ଏକାଠି ହେଉଥିବା ବେଳେ ଲୋକମାନେ ସେମାନଙ୍କୁ ଘେରୁଛନ୍ତି । ଫଟୋ ଉଠାଉଛନ୍ତି । ହାତୀ ରାଗିଯିବା ସ୍ୱାଭାବିକ ।

ଯେଉଁ ସ୍ଥାନରେ ହାତୀ ପଲ ଏକାଠି ହେଉଛନ୍ତି ସେ ସ୍ଥାନକୁ କେବଳ ବନ ବିଭାଗ କର୍ମଚାରୀଙ୍କୁ ଯିବାକୁ ଦିଅନ୍ତୁ । ସେମାନଙ୍କ କାମ କରିବାକୁ ଦେବା ପାଇଁ ପରାମର୍ଶ ଦେଇ ଅନ୍ୟମାନେ ପଶି ମାମଲତି ନକରିବାକୁ ମନ୍ତ୍ରୀ କହିଥିଲେ ।

ମନ୍ତ୍ରୀଙ୍କ ଉତରରେ ଅସନ୍ତୋଷ ପ୍ରକାଶ କରି ବିଧାୟକ ଶ୍ରୀ ଷଡ଼ଙ୍ଗୀ ଗୃହର ମଧ୍ୟଭାଗକୁ ଚାଲିଆସି ଧାରଣାରେ ବସିଥିଲେ । ମନ୍ତ୍ରୀ ଶ୍ରୀ ରାଉତରାୟ ନିଜ ଆସନରୁ ଉଠି ଆସି ତାଙ୍କୁ ବୁଝାଇବା ପରେ ବିଧାୟକ ଶ୍ରୀ ଷଡ଼ଙ୍ଗୀ ନିଜ ଆସନକୁ ଫେରିଥିଲେ ।

ବିଧାୟକ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ହାତୀ, ମଇଁଷି ଓ ମାଙ୍କଡ଼ ଉପଦ୍ରବ ଯୋଗୁ ଚାଷୀ ବିବ୍ରତ ହୋଇପଡ଼ିିଛନ୍ତି ପ୍ରଶ୍ନର ଉତର ରଖି ମନ୍ତ୍ରୀ ଶ୍ରୀ ରାଉତରାୟ କହିଥିଲେ, ମଇଁଷି ବନ୍ୟଜନ୍ତୁ ନୁହେଁ, ଷଣ୍ଢ ଏସବୁ କରୁଥିବ । ମାଙ୍କଡ଼ଙ୍କ ପାଇଁ ସବୁଆଡ଼େ ସମସ୍ୟା ସୃଷ୍ଟି ହୋଇଛି । ମାଙ୍କଡ଼ ଘଉଡ଼େଇବା ପାଇଁ ସଦସ୍ୟ ନେତୃତ୍ୱ ନେଇ କାମ କଲେ ମୁଁ ତାଙ୍କ ପଛରେ ରହିବି ।

ହାତୀ ଉପଦ୍ରବ ଉପରେ ବିଧାୟକ ସୁବର୍ଣ୍ଣ ନାୟକ ହାତୀ ମୃତୁ୍ୟ ସମ୍ପର୍କରେ ପଚାରିଥିବା ପ୍ରଶ୍ନର ଉତରରେ ମନ୍ତ୍ରୀ ଶ୍ରୀ ରାଉତରାୟ କହିଥିଲେ ଯେ କେତେକ ଜଙ୍ଗଲ ଓ ଚାଷ ଜମିରେ ବନ୍ୟଜନ୍ତୁଙ୍କ ପ୍ରବେଶ ପ୍ରତିହତ କରିବା ପାଇଁ ଲୋକମାନେ ଲୁହାତାର ଘେରାଉ କରି ଅନଧିକୃତ ଭାବେ ବିଦ୍ୟତ ଚାର୍ଜ କରୁଛନ୍ତି । ଏଥିଯୋଗୁଁ ବେଳେବେଳେ ହାତୀଙ୍କ ମୃତ୍ୟୁ ଘଟୁଛି । ଏହାକୁ ବନ୍ଦ କରିବା ପାଇଁ ସଚେତନତା ସୃଷ୍ଟି କରାଯାଉଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୧(ଓଡିଶା ଡଟ୍ କମ୍)-ଗଣଶିକ୍ଷକଙ୍କ ସମସ୍ୟା ଓ ନାଲକୋରୁ ପୁଞ୍ଜି ପ୍ରତ୍ୟାହାର ନେଇ ମଙ୍ଗଳବାର ଦିନ ବିଧାନସଭାରେ ଉଦ୍ବେଗ ପ୍ରକାଶ ପାଇଛି ।

ଗଣଶିକ୍ଷକଙ୍କ ସମସ୍ୟା ସମାଧାନ ପାଇଁ ଉଭୟ ଶାସକ ଓ ବିରୋଧୀ ସଭ୍ୟମାନେ ଦାବି କରିଥିବା ବେଳେ ଶାସକ ବିଜେଡି ଦଳର ସଭ୍ୟମାନେ ନାଲକୋରୁ ପୁଞ୍ଜି ପ୍ରତ୍ୟାହାର ନିଷ୍ପତି ବିରୋଧରେ ସର୍ବସମ୍ମତ ପ୍ରସ୍ତାବ ଆଣିବା ପାଇଁ ମତ ରଖିଥିଲେ ।

ମଙ୍ଗଳବାର ଦିନ ଶୂନ୍ୟକାଳରେ ବିରୋଧିଦଳ ନେତା ଭୂପିନ୍ଦର ସିଂ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରି କହିଲେ ଯେ,ସରକାର ଶିକ୍ଷକଙ୍କ ପ୍ରତି ପାତର ଅନ୍ତର କରିଛନ୍ତି । ସେମାନଙ୍କ ପେଟପାଟଣାକୁ ନେଇ ରାଜନୀତି କରୁଛନ୍ତି ।

ଆଜି ଗଣଶିକ୍ଷକମାନେ ବିଧାୟକମାନଙ୍କ ବାସଭବନକୁ ଘେରାଉ କରିଛନ୍ତି । ବିଧାୟକମାନେ ବିଧାନସଭା ଆସିବାକୁ ଅସୁବଧାର ସମ୍ମୁଖୀନ ହୋଇଛନ୍ତି । ସରକାର ସେମାନଙ୍କ ସମ୍ପର୍କରେ ତୁରନ୍ତ ନିଷ୍ପତି ନେବା ଦରକାର ବୋଲି ଶ୍ରୀ ସିଂ କହିଥିଲେ ।

ସରକାରୀ ଦଳର ଉପମୁଖ୍ୟ ସଚେତକ ସଂଜୟ ଦାସବର୍ମା କହିଲେ ଯେ,ଗଣ ଶିକ୍ଷକଙ୍କ ପ୍ରତି କେବଳ ବିରୋଧୀ ଦଳର ଦରଦ ଅଛି ବୋଲି ଦେଖାଇ ହୁଅନ୍ତୁ ନାହିଁ । ସେମାନଙ୍କ ପ୍ରତି ସରକରା ମଧ୍ୟ ସଚେତନ ଅଛନ୍ତି ।

ବିଜେଡି ସରକାର ସେମାନଙ୍କୁ ଗଣଶିକ୍ଷକ କରୁଛନ୍ତି । ଶିକ୍ଷକମାନଙ୍କ ସମସ୍ୟାର ସମାଧାନକେବଳ ନବୀନ ପଟ୍ଟନାୟକଙ୍କ ସରକାର ହିଁ କରିଛନ୍ତି ବୋଲି ସେ କହିଛନ୍ତି । ଶ୍ରୀ ଦାସବର୍ମା କହିଲେ ଯେ,ଗତ ସେପ୍ଟେମ୍ବର ୧୪ ତାରିଖରେ କେନ୍ଦ୍ର ସରକାର ରାଷ୍ଟ୍ରାୟତ ଉଦ୍ୟୋଗ ନାଲକୋରୁ ୧୨.୧୫ ପ୍ରତିଶତ ପୁଞ୍ଜି ପ୍ରତ୍ୟାହାର ପାଇଁ ନିଷ୍ପତି କରିଛନ୍ତି । ଏହି ନିସ୍ପତି ରାଜ୍ୟ ସ୍ୱାର୍ଥ ପରିପନ୍ଥୀ ।

ତେଣୁ କେନ୍ଦ୍ର ସରକାର ଏହି ନିସ୍ପତି ପ୍ରତ୍ୟାହାର କରିବା ପାଇଁ ବିଧାନସଭାରେ ସର୍ବସମ୍ମତ ପ୍ରସ୍ତାବ ଗ୍ରହଣ କରାଯାଇ କେନ୍ଦ୍ରକୁ ପଠାଯାଉ ବୋଲି ସେ କହିଥିଲେ ।

ବିଜେପିର କନକବର୍ଦ୍ଧନ ସିଂଦେଓ କହିଲେ ଯେ ଗଣଶିକ୍ଷକଙ୍କ ସମସ୍ୟା ସମାଧାନ ହେବା ଉଚିତ୍ । ବିଧାନସଭା ଅଧିବେଶନ ସମୟରେ ଯେଉଁମାନେ ଆନ୍ଦୋଳନ କରିବେ ଯଦି ସେମାନଙ୍କ ସମସ୍ୟା ସମାଧାନ କରାଯିବ ତାହା ଏକ ଖରାପ ପରମ୍ପରା ସୃଷ୍ଟି କରିବ ।

ତେଣୁ ଆନ୍ଦୋଳନ ହେବାପୂର୍ବରୁ ସମସ୍ୟାର ସମାଧାନ କରାଯାଉ । ଏହାଛଡା ନାଲକୋ ପୁଞ୍ଜି ପ୍ରତ୍ୟାହାର ନିଷ୍ପତିକୁ ସେ ବିରୋଧ କରୁଛନ୍ତି । ନାଲକୋ ଏକ ଲାଭଜନକ ସଂସ୍ଥା । ଏହାର ପୁଞ୍ଜି ପ୍ରତ୍ୟାହାର ରାଜ୍ୟ ସ୍ୱାର୍ଥର ପରିପନ୍ଥୀ ।

ଅନ୍ୟମାନଙ୍କ ମଧ୍ୟରେ ବିଧାୟକ ପ୍ରଦୀପ ମହାରଥୀ,ଅମର ପ୍ରସାଦ ଶତପଥୀ,ରଣେନ୍ଦ୍ର ପ୍ରତାପ ସ୍ୱାଇଁ,ପ୍ରଫୁଲ ମାଝି,ଚକ୍ରଧର ପାଇକ,ଅନଙ୍ଗ ଉଦୟ ସିଂହଦେଓ ପ୍ରମୁଖ ଏହି ଦଦୁଇ ପ୍ରସଙ୍ଗରେ ନିଜ ନିଜର ମତ ରଖିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୦(ଓଡିଶା ଡଟ୍ କମ୍)-ବ୍ଲକ ଗ୍ରାଣ୍ଟ ଶିକ୍ଷକଙ୍କ ପରେ ସୋମବାର ଦିନ ଗଣଶିକ୍ଷକ କରିଛନ୍ତି ରାଜଧାନୀରେ ରଣହୁଙ୍କାର । ସ୍ଥାୟୀ ନିଯୁକ୍ତି ଦାବୀରେ ଆନ୍ଦୋଳନ କରିଆସୁଥିବା ଗଣ ଶିକ୍ଷକମାନେ ରାଜଧାନୀରେ ବିଶାଳ ଶୋଭାଯାତ୍ରା ସହ ବିକ୍ଷୋଭ କରିଛନ୍ତି ।

ଦାବୀ ପୁରଣ ନହେବା ପର୍ଯ୍ୟନ୍ତ ସ୍କୁଲକୁ ଫେରିବେ ନାହିଁ ବୋଲି ଧମକ ଦେଇଛନ୍ତି । ଆଲୋଚନା ମାଧ୍ୟମରେ ଦାବୀ ପୁରଣ ହେବ ବୋଲି ପ୍ରତିଶ୍ରୁତି ଦେଇଛନ୍ତି ବିଭାଗୀୟ ମନ୍ତ୍ରୀ ।

ରାଜ୍ୟ ଗଣଶିକ୍ଷକ ମହାସଂଘର ଉପସଭାପତି ଶରତ ଚନ୍ଦ୍ର ନାୟକ ଅଭିଯୋଗ କରିଛନ୍ତି ଯେ,ଗଣଶିକ୍ଷକଙ୍କୁ ସ୍ଥାୟୀ କରିବା ପାଇଁ ସରକାର ପ୍ରତିଶ୍ରୁତି ଦେଇଥିବା ବେଳେ ଏ ଯାଏଁ ତାହା ପୂରଣ ନକରି ଠକି ଚାଲିଛନ୍ତି । ଦାବୀ ପୂରଣ ନହେଲା ଯାଏ ଆନ୍ଦୋଳନ ଚାଲୁ ରହିବ ବୋଲି ସେ ପ୍ରକାଶ କରିିଛନ୍ତି ।

“ସରକାରଙ୍କ ଦାବୀ ମୂତାବକ ଆମକୁ ଗଣଶିକ୍ଷକ ନିଯୁକ୍ତିର ୩ ବର୍ଷ ଭିତରେ ନିୟମିତ ଶିକ୍ଷକ ଘୋଷଣା କରନ୍ତୁ । ଏବଂ ତାହାର ନିଦେ୍ର୍ଧଶନାମା ପ୍ରକାଶ କରନ୍ତୁ । ଯଦି ଏହା ନକରିବେ ସେତେଦିନ ପର୍ଯ୍ୟନ୍ତ ଏ ରାଜରାସ୍ତାରେ ୨୪ ଘଣ୍ଟା ବସିରହିବୁ “।

ରାଜ୍ୟ ଗଣଶିକ୍ଷକ ମହାସଂଘର ସମ୍ପାଦକ ବୁଲୁ ବେହେରା କହିଛନ୍ତି ଯେ,ସରକାର ଆମକୁ ବାରମ୍ବାର ପ୍ରତିଶ୍ରୃତି ଦେଇଛନ୍ତି , ବିଧାନସଭାରେ ଘୋଷଣା କରିଛନ୍ତି । ଏପରିକି ମୁଖ୍ୟ ଶାସନ ସଚିବ ଆମକୁ ଡାକି ଆଲୋଚନା କରି ସୁଦ୍ଧା ପ୍ରତିଶ୍ରୃତି ପାଳନ କରିନାହାଁନ୍ତି ।

ଗଣଶିକ୍ଷା ମନ୍ତ୍ରୀ ରବି ନାରାୟଣ ନନ୍ଦ ପ୍ରତିଶ୍ରୃତି ଦେଇଛନ୍ତ ଯେ ବ୍ଲକ ଗ୍ରାଣ୍ଟ ଶିକ୍ଷକଙ୍କ ଭଳି ଆଲୋଚନା ମାଧ୍ୟମରେ ସମସ୍ୟାର ସମାଧାନ କରାଯିିବ । ମୁଖ୍ୟମନ୍ତ୍ରୀ ଏ ବିଷୟରେ ସମାଧାନ କରିବା ପାଇଁ ମଧ୍ୟ ନିର୍ଦ୍ଦେଶ ମଧ୍ୟ ଦେଇଛନ୍ତି ।

ସେ କହିଲେ ଆନ୍ଦୋଳନକାରୀମାନେ ହେଉଛନ୍ତି ଆମ ପରିବାର ଲୋକ । ଅଳି କରିବାର ଅଧିକାର ସେମାନଙ୍କର ଅଛି । ସେମାନଙ୍କର ଦାବୀ ଉପରେ ଆମେ ବିଚାର କରୁଛୁ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୮(ଓଡିଶା ଡଟ୍ କମ୍)-୨୦୧୩-୧୪ଶିକ୍ଷାବର୍ଷରୁ ବ୍ଲକ ଗ୍ରାଣ୍ଟ ପରିବର୍ତେ ପ୍ରତ୍ୟକ୍ଷ ଅନୁଦାନ ବ୍ୟବସ୍ଥା ଲାଗୁ କରିବାକୁ ସରକାର ସମ୍ମତି ପ୍ରଦାନ କରିବାପରେ ଆଜିଠାରୁ କାମରେ ଯୋଗ ଦେଇଛନ୍ତି ରାଜ୍ୟ ବ୍ଲକ ଗ୍ରାଣ୍ଟ ସ୍କୁଲର ଶିକ୍ଷକ ଓ କର୍ମଚାରୀ ।

ବ୍ଲକ ଗ୍ରାଣ୍ଟ ବ୍ୟବସ୍ଥାକୁ ଉଠାଇ ପ୍ରତ୍ୟକ୍ଷ ଅନୁଦାନ ବ୍ୟବସ୍ଥା ଲାଗୁ କରିବାକୁ ସରକାର ନୀତିଗତ ନିଷ୍ପତି ନେଇଛନ୍ତି ବୋଲି ବିଧାନସଭାରେ ରାଜ୍ୟ ସ୍କୁଲ ଓ ଗଣଶିକ୍ଷା ମନ୍ତ୍ରୀ ରବିନାରାୟଣ ନନ୍ଦ ସୂଚନା ଦେଇଛନ୍ତି ।

ଏ ସଂର୍ପକରେ ମନ୍ତ୍ରୀ ଶ୍ରୀ ନନ୍ଦ ଶୁକ୍ରବାର ଦିନ ବିଧାନସଭାରେ କହିଛନ୍ତି,ଏହି ପରିପ୍ରେକ୍ଷୀରେ ଗତ ନଭେମ୍ବର ୨୩ତାରିଖରେ ହୋଇଥିବା କ୍ୟାବିନେଟ ନିଷ୍ପତିର ପୁନର୍ବିଚାର କରାଯିବାକୁ ନିଷ୍ପତି ନିଆଯାଇଛି ।

ସରକାରଙ୍କ ଏହି ନିଷ୍ପତି ଫଳରେ ରାଜ୍ୟରେ ଥିବା ୧୯୮୨ଟି ବ୍ଲକ ଗ୍ରାଣ୍ଟ ସ୍କୁଲର ୨୫ହଜାରରୁ ଅଧିକ ଶିକ୍ଷକ ଓ କର୍ମଚାରୀ ଉପକୃତ ହେବେ । ୨୦୧୩ ଫେବୃଆରୀ ମାସ ସୁଦ୍ଧା କାବିନେଟରେ ଏହି ନୂତନ ବ୍ୟବସ୍ଥାକୁ ଉପସ୍ଥାପନ କରିବା ପାଇଁ ନିଷ୍ପତି ନିଆଯାଇଛି ।

ଏହି ନୂତନ ବ୍ୟବସ୍ଥାକୁ ରୂପାୟନ କରିବା ପାଇଁ ଦୁଇ ମାସ ସମୟ ଧାର୍ଯ୍ୟ କରାଯାଇଛି । ପ୍ରଥମ ପର୍ଯ୍ୟାୟରେ ୮ବର୍ଷ ଧରି ବ୍ଲକ ଗ୍ରାଣ୍ଟ ପାଇ ଆସୁଥିବା ବିଦ୍ୟାଳୟର ଶିକ୍ଷକ କର୍ମଚାରୀମାନଙ୍କୁ ପ୍ରତ୍ୟକ୍ଷ ଅନୁଦାନ ବ୍ୟବସ୍ଥାର ପରିସରକୁ ଅଣାଯିବ । ସରକାରଙ୍କ ଏହି ଘୋଷଣାକୁ ଶିକ୍ଷକ ସଂଘ ସ୍ୱାଗତ କରିଛି ।

ସୂଚନାଯୋଗ୍ୟ, ଗତ ନଭେମ୍ବର ୨୩ତାରିଖର କ୍ୟାବିନେଟ ନିଷ୍ପତିକୁ ବିରୋଧ କରି ଶିକ୍ଷକ ସଂଘ ପକ୍ଷରୁ ଗତ୨୯ରେ ଆଇନ ଅମାନ୍ୟ ଆନ୍ଦୋଳନ କରାଯାଇଥିଲା । ଏହାସହ ୩୦ ଓ ୩୧ ତାରିଖରେ ସମସ୍ତ ବିଧାୟକଙ୍କ ସରକାରୀ ବାସଭବନ ଘେରାଉ କରାଯାଇଥିଲା । ଦାବି ପୂରଣ ପାଇଁ ଡିସେମ୍ବର ୧୦ ତାରିଖରେ ରାଜଧାନୀରେ ବିଶାଳ ସମାବେଶ କରାଯିବାକୁ ସଂଘ ନିଷ୍ପତି ନେଇଥିଲା ।

ବ୍ଲକ ଗ୍ରାଣ୍ଟ ଶିକ୍ଷକ ଓ କର୍ମଚାରୀ ସଂଘର ସଭାପତି ପ୍ରଶାନ୍ତ ମହାପାତ୍ର କହିଛନ୍ତି ଯେ ଏଥିପାଇଁ ଆମେ ସରକାରଙ୍କୁ ଧନ୍ୟବାଦ ଦେଉଛୁ । ଆଜି ଠାରୁ ସମସ୍ତ ବିଦ୍ୟାଳୟରେ ପାଠ ପଢାଇବା ସହ କାମରେ ଯୋଗଦେବା ପାଇଁ ମୁଁ ଆମର ସସସ୍ତ ଶିକ୍ଷକ ଓ କର୍ମଚାରୀଙ୍କୁ ଅନୁରୋଧ କରୁଛି । ମାଟ୍ରିକ ପରୀକ୍ଷା ଓ ଟେଷ୍ଟ ପରୀକ୍ଷା କିପରି ସଫଳ ହେବ ସେଥିପାଇଁ ଶିକ୍ଷକମାନେ ଧ୍ୟାନଦିଅନ୍ତୁ ବୋଲି ସେ ନିବେଦନ କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୮(ଓଡିଶା ଡଟ୍ କମ୍)-ରାଜ୍ୟରେ ଅନାହାର ମୁତ୍ୟୁ ଉଦ୍ବେଗ ଜନକ ପରିସ୍ଥିତି ସୃଷ୍ଟି କରିଛି । ସରକାରଙ୍କ ଅବହେଳା ପାଇଁ ଏହା କ୍ରମଶଃ ବୃଦ୍ଧି ପାଉଛି ବୋଲି ଶୁକ୍ରବାର ଦିନ ବିରୋଧୀ ଦଳ ପକ୍ଷରୁ ବିଧାନ ସଭାରେ ଅଭିଯୋଗ କରାଯାଇଛି ।

ରାଜସ୍ୱମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ଏ ସଂପର୍କରେ କହିଲେ ବର୍ତମାନ ଯେଉଁ ସବୁ କାର୍ଯ୍ୟକ୍ରମ ସରକାରଙ୍କ ତରଫରୁ ଗ୍ରହଣ କରାଯାଉଛି ସେଥିରେ କେହି ଅନାହାର ମୃତ୍ୟୁବରଣ କରିବା ହାସ୍ୟାସ୍ପଦ ।

ଅନାହାର ମୃତ୍ୟୁ ସମ୍ପର୍କରେ ଗଣମାଧ୍ୟମରୁ ଖବର ପାଇବାର ୪୮ ଘଣ୍ଟା ମଧ୍ୟରେ ତାହାର ତଦନ୍ତ କରାଯାଉଛି । ହେଲେ ଏହି ଘଟଣା ସଂପର୍କରେ କେବେ କୌଣସି ବିଧାୟକ କି ଲୋକପ୍ରତିନିଧି ଟେଲି ଫୋନ କରି ଜଣାଇ ନାହାଁନ୍ତି ।

ମୁଲତବୀ ଆଲୋଚନା ଆରମ୍ଭ କରି କଂଗ୍ରେସ ସଭ୍ୟ ସନ୍ତୋଷ ସିଂ ସାଲୁଜା କହିଥିଲେ ଯେ,ଗରିବ ଲୋକଙ୍କ ପାଇଁ କେନ୍ଦ୍ର ସରକାର ବିଭିନ୍ନ ଯୋଜନା କରୁଛନ୍ତି । କିନ୍ତୁ ରାଜ୍ୟ ସରକାର ତାକୁ ଠିକ୍ ଭାବେ କାର୍ଯ୍ୟକାରୀ କରୁନାହିଁନ୍ତି । ଫଳରେ ଗରିବ ଲୋକ ଅନାହାରରେ ମରୁଛନ୍ତି ।

ବିରୋଧିଦଳ ନେତା ଭୂପିନ୍ଦର ସିଂ କହିଲେ ଯେ,ଯଦି ଜଣଙ୍କର ଜୀବନହାନି ହୁଏ ସେଥିପାଇଁ ସରକାର ଦାୟୀ । କେନ୍ଦ୍ର ସରକାର ଗରୀବ ହଟାଇବା ପାଇଁ ସବୁ ଯୋଜନା କରିଛନ୍ତି । କିନ୍ତୁ ରାଜ୍ୟ ସରକାର ଠିକ୍ ଭାବେ କାର୍ଯ୍ୟକାରୀ କରିନାହିାଁନ୍ତି ।

ଭାଜପା ସଦସ୍ୟ ହିତେଶ କୁମାର ବଗର୍ତି କହିଥିଲେ ଯେ,ଏବେ ବି ନୂଆପଡାରେ ୮୦ ପ୍ରତିଶତ ଲୋକ ଗରିବର ତାଡନାରେ ଶଢୁଛନ୍ତି ।

ଦୃଷ୍ଟି ଆକର୍ଷଣକାରୀ ନୋଟିସ୍ ଜରିଆରେ ଶାସକ ଦଳର ସଭ୍ୟ ଅନନ୍ତ ଦାସ କହିଲେ ଯେ,ଯେଉଁ ଅଞ୍ଚଳରେ ଅନାହାର ମୁତ୍ୟୁ ହେଉଛି ସେଥିପାଇଁ ସେ ଅଞ୍ଚଳର ବିଧାୟକ ଦାୟୀ । କାରଣ ସେ ତାଙ୍କ ଲୋକଙ୍କ ପ୍ରତି ଧ୍ୟାନ ଦେଉନାହାଁନ୍ତି । ଲୋକଙ୍କ କଥା ଭୁଲି ଯାଉଛନ୍ତି ।

କେବଳ ଦାୟୀକଲେ ହେବନାହିଁ । ତାଙ୍କ ବିରୋଧରେ ୩୦୨ ଦଫାରେ ମାମଲା ହେବା ଆବଶ୍ୟକ । ଲୋକପ୍ରତିନିଧିଙ୍କୁ ଉତରଦାୟୀ ବ୍ୟବସ୍ଥା ରହିଲେ ସବୁ ଠିକ୍ ହୋଇଯିବ । କିନ୍ତୁ ଅନାହାର ମୃତ୍ୟୁ ହେବା ଅଭିଯୋଗ ସତ୍ୟ ନୁହେଁ ବୋଲି ଶ୍ରୀ ଦାସ ଦର୍ଶାଇଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୬(ଓଡିଶା ଡଟ୍ କମ୍)-ରାଜନେତାଙ୍କ ଫୋନ ଟ୍ୟାପିଂ ନେଇ ଆଜି ବିଧାନସଭାରେ ଗଭୀର ଉଦ୍ବେଗ ପ୍ରକାଶ ପାଇଛି । କିଏ ଅପରାଧୀ,କିଏ ଦେଶଦ୍ରୋହୀ,କାହାର ନକ୍ସଲଙ୍କ ସହ ସମ୍ପର୍କ ଅଛି ତାହା ମୁଖ୍ୟମନ୍ତ୍ରୀ କୁହନ୍ତୁ । ନଚେତ୍ ବ୍ୟକ୍ତିଗତ ଅଧିକାର କ୍ଷୁର୍ଣ୍ଣ କରୁଥିବାରୁ ତୁରନ୍ତ ଇସ୍ତଫା ଦିଅନ୍ତୁ ବୋଲି ବିରୋଧୀ ଦଳ ପକ୍ଷରୁ ଦାବି କରାଯାଇଛି ।

ଗୁରୁବାର ଦିନ ଶୂନ୍ୟକାଳରେ ବିରୋଧୀ ଦଳ ନେତା ଭୂପିନ୍ଦର ସିଂ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରି କହିଲେ ଯେ, ସୁପ୍ରିମକୋର୍ଟଙ୍କ ରାୟ ଅନୁସାରେ କୌଣସି ରାଜନେତାଙ୍କ ଫୋନ ଟ୍ୟାପିଂ କରାଯାଇ ପାରିବ ନାହିଁ ।

ମାତ୍ର ଓଡିଶାରେ ଚାରି ବର୍ଷ ମଧ୍ୟରେ ୪ ହଜାର ୬ଶହ ୨୦ ଲୋକଙ୍କ ଫୋନ ଟ୍ୟାପିଂ କରାଯାଇଛି । ସେମାନେ କିଏ ? ଏମାନଙ୍କ ମଧ୍ୟରୁ କିଏ ଅପରାଧୀ ତାହା ସ୍ପଷ୍ଟ ହେବା ଉଚିତ୍ ।

କର୍ଣ୍ଣାଟକ ମୁଖ୍ୟମନ୍ତ୍ରୀ ରାମକୃଷ୍ଣ ହେଗ୍ଡେ ଓ ୟେଦୁରାପ୍ପା ମଧ୍ୟ ଫୋନ ଟ୍ୟାପିଂ କରିଥିବାରୁ ତାଙ୍କୁ ଇସ୍ତଫା ଦେବାକୁ ପଡିଥିଲା । ରାଜ୍ୟରେ କେଉଁ ଜରୁରୀ ପରିସ୍ଥିତି ସୃଷ୍ଟି ହେଲା ଯେ, ଏତେ ଲୋକଙ୍କ ଫୋନ ଟ୍ୟାପିଂ କରାଗଲା । ତାହା ଗୃହକୁ ଜଣାନ୍ତୁ ।

ଯଦି ମୁଖ୍ୟମନ୍ତ୍ରୀ ଏହାର ଉତର ନଦେବେ ତାହଲେ ରାଜନେତା ଫୋନଟ୍ୟାପିଂ ସତବୋଲି ଜଣାପଡିବ ଏବଂ ଏଥିପାଇଁ ମୁଖ୍ୟମନ୍ତ୍ରୀ ତୁରନ୍ତ ଇସ୍ତଫା ଦିଅନ୍ତୁ ବୋଲି ଶ୍ରୀ ସିଂ କହିଥିଲେ ।

ଏହି ପ୍ରସଙ୍ଗକୁ ସମର୍ଥନ କରି ବିଜେପି ବିଧାୟକ କନକ ବର୍ଦ୍ଧନ ସିଂଦେଓ କହିଲେ ଯେ, ମୁଖ୍ୟମନ୍ତ୍ରୀ ଏ ସମ୍ପର୍କରେ ଗୃହରେ ବିବୃତି ଦେବା ଆବଶ୍ୟକ । ଏହା ଅତ୍ୟନ୍ତ ଗୁରୁତର ବିଷୟ । ରାଜ୍ୟ ସରକାର ଏହି ଫୋନ ଟ୍ୟାପିଂକୁ ଜଣେ ଘରୋଇ ଅପରେଟର ଦ୍ୱାରାଆଉଟ୍ସୋର୍ସିଂ କରିଛନ୍ତି କି ନାହିଁ ତା ସ୍ପଷ୍ଟ କରନ୍ତୁ ।

କେଉଁ ଲୋକମାନଙ୍କ ଫୋନ୍ଟ୍ୟାପିଂ କରାଗଲା ସେହି ଫୋନ ନମ୍ବର ଗୃହକୁ ଦିଅନ୍ତୁ । କାହାର ନା ଦେବା ଦରକାର ନାହିଁ । କେଉ୍ଁମାନେ ଅପରାଧୀ,ଦେଶଦ୍ରୋହୀ ତାହା ସ୍ପଷ୍ଟ କରନ୍ତୁ ବୋଲି ଶ୍ରୀ ସିଂଦେଓ କହିଥିଲେ ।

ସଂସଦୀୟ ବ୍ୟାପାର ମନ୍ତ୍ରୀ କଳ୍ପତରୁ ଦାସ ଏହି ସବୁ ଅଭିଯୋଗକୁ ଖଣ୍ଡନକରି କହିଲେ କୌଣସି ରାଜନେତାଙ୍କ ଫୋନ ଟ୍ୟାପିଂ ହୋଇନାହିଁ । ଅପରାଧ ରୋକିବା ପାଇଁ ଫୋନ ଟ୍ୟାପିଂ କରାଯାଇଛି । କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ମଧ୍ୟ ଏ ପ୍ରସଙ୍ଗରେ ତାଙ୍କ ମତ ରଖିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୬(ଓଡିଶା ଡଟ୍ କମ୍ )-ସ୍କୁଲସ୍ତରରେ ଡ୍ରପଆଉଟ୍ ରୋକିବା ପାଇଁ ସରକାର ମାଗଣା ପୋଷାକ ଯୋଜନା ଆପଣାଇଛନ୍ତି ଓ ଏହାଦ୍ୱାରା ସ୍କୁଲରେ ଉପସ୍ଥାନ ସଂଖ୍ୟା ବଢାଇଛି ଗଣଶିକ୍ଷାମନ୍ତ୍ରୀ ରବିନାରାୟଣ ନନ୍ଦ ଗୁରୁବାର ଦିନ ବିଧାନ ସଭାରେ ପ୍ରକାଶ କରିଛନ୍ତି ।

ସମାନଭାବେ ଦଶମ ଶ୍ରେଣୀରେ ମାଗଣା ସାଇକେଲ ଦିଆଯିବା ଦ୍ୱାରାଡ୍ରପଆଉଟ କମିଛି ବୋଲି ଗଣଶିକ୍ଷାମନ୍ତ୍ରୀ ନନ୍ଦ ପ୍ରକାଶ କରିଛନ୍ତି ।

୨୦୧୧-୧୨ ଆର୍ଥିକ ବର୍ଷରୁ ଆରମ୍ଭ ହୋଇଥିବା ମାଗଣା ସାଇକେଲ ଯୋଜନାରେ ସରକାର ଏଯାବତ୍ ୧୯୩ କୋଟି ୨୫ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି । ଏଥିରେ ୭ ଲକ୍ଷ ୩୪ ହଜାର ୬୯୨ ଛାତ୍ରଛାତ୍ରୀ ଉପକୃତ ହୋଇଛନ୍ତି ।

ସର୍ବଶିକ୍ଷା ଅଭିଯାନ ଓ ମୁଖ୍ୟମନ୍ତ୍ରୀଙ୍କ ରିଲିଫି ପାଣ୍ଠିରୁ ଏହି ଅର୍ଥ ଖର୍ଚ୍ଚ କରାଯାଉନି ବୋଲି ମନ୍ତ୍ରୀ ପ୍ରକାଶ କରିଛନ୍ତି । ଅନ୍ୟପକ୍ଷରେ ବିରୋଧୀ ଦଳ ଏହାକୁ ଏକ ଭୋଟବ୍ୟାଙ୍କ ଯୋଜନା ବୋଲି ଅଭିହିତ କରିବା ସହ ଏହାକୁ ସବୁ ସ୍କୁଲ ଓ ସବୁ ଦଳଙ୍କ ପ୍ରତି କାର୍ଯ୍ୟକାରୀ କରାଇବାକୁ ଅନୁରୋଧ କରିଛନ୍ତି ।

ସ୍ୱାଧୀନ ବିଧାୟକ ପ୍ରତାପ ଷଡଙ୍ଗୀ, ପ୍ରଫୁଲ ମାଝି, ରମେଶ ଚନ୍ଦ୍ର ଚ୍ୟାଉପଟ୍ଟନାୟକ, ଭୀମସେନ ଚୌଧୁରୀ, ଦେବୀ ଚାନ୍ଦ, ପ୍ରମୋଦ କୁମାର ମଲ୍ଲିକ ଓ କନକ ବର୍ଦ୍ଧନ ସିଂଦେଓ ପ୍ରମୁଖ ଏହି ଆଲୋଚନାରେ ଅଂଶ ଗ୍ରହଣ କରିଥିଲେ ।

ଓଡିଶା ଡଟ୍ କମ୍

ଭୁବନେଶ୍ୱର,ଡିସେମ୍ବର ୫(ଓଡିଶା ଡଟ୍ କମ୍)-ଖାଉଟି କ୍ଷେତ୍ରରେ ବିଦେଶୀ ପୁଞ୍ଜି ବିନିଯୋଗ ପ୍ରସଙ୍ଗକୁ ନେଇ ଲୋକସଭାରେ ଉପା ସରକାର ବିଜୟ ହୋଇଥିବା ବେଳେ ବୁଧବାର ଦିନ ବିଧାନସଭାରେ ଜୋରଦାର ଆଲୋଚନା ହୋଇଛି ।

ଏହି ପ୍ରସଙ୍ଗକୁ ନେଇ ବିଜେଡି,ବିଜେପି ଓ ସିପିଆଇ ସଦସ୍ୟ କେନ୍ଦ୍ରକୁ ସମାଲୋଚନା କରିଛନ୍ତି । ଅନ୍ୟ ପକ୍ଷରେ କଂଗ୍ରେସ ଏଫଡିଆଇ ସମର୍ଥନରେ ଦୃଢ ଯୁକ୍ତି ବାଢିଛି ।

ଶୂନ୍ୟକାଳରେ ପୂର୍ବତନ ଅର୍ଥମନ୍ତ୍ରୀ ତଥା ବିଜେଡି ବିଧାୟକ ପ୍ରଫୁଲ ଘଡାଇ ଏହି ପ୍ରସଙ୍ଗ ଉତ୍ଥାପନ କରିଥିଲେ । ସେ କହିଲେ ଏଫ୍ଡିଆଇକୁ ବିଜେଡି ସମେତ ବହୁ ଦଳ ବିରୋଧ କରୁଛନ୍ତି ।

ବିଧାନସଭାରେ ମଧ୍ୟ ଏହା ବିରୋଧରେ ପ୍ରସ୍ତାବ ଗ୍ରହଣ କରାଯିବା ଦରକାର । ଓଡିଶାବାସୀ କଦାପି କଂଗ୍ରେସ ସରକାରର ଏହି ନିଷ୍ପତିକୁ ଗ୍ରହଣ କରିବେ ନାହିଁ ।

ଯେଉଁ ମନମୋହନ ସିଂହ ରାଜ୍ୟ ସଭାରେ ବିରୋଧିଦଳର ନେତା ଥିବାବେଳେ ଏଫିଡିଆଇକୁ ବିରୋଧ କରୁଥିଲେ,ସେ ଏବେ ପ୍ରଧାନମନ୍ତ୍ରୀ ଭାବେ ଏହାକୁ ସ୍ୱାଗତ କରୁଛନ୍ତି ।

ଏହା କାର୍ଯ୍ୟକାରୀ ହେଲେ ୧୨ କୋଟି ଲୋକ ବେକାର ହୋଇଯିବେ । ଦେଶର ଗରିବ ଲୋକ ଅଧିକ ଗରିବ ହେବେ । କ୍ଷୁଦ୍ର ବ୍ୟବସାୟୀଙ୍କ ବେଉସା ବୁଡିଯିବ ।

ବିଜେଡିର ପ୍ରଦୀପ ମହାରଥୀ କହିଥିଲେ ଯେ, କଂଗ୍ରେସ ଏବେ ବିଦେଶୀ ହାତରେ ବନ୍ଧା ପଡିଛି । ସୋନିଆ ଗାନ୍ଧୀ ବିଦେଶରୁ ଆସି ସୁଇସ ବ୍ୟାଙ୍କରେ ଟଙ୍କା ରଖିବା ପାଇଁ ଭାରତର ଗରିବ ଲୋକଙ୍କୁ ପଙ୍ଗୁ କରି ଦେଉଛି । ଲୋକେ କିନ୍ତୁ କଂଗ୍ରେସିଆଙ୍କ ବଦନ ଚିହ୍ନିଗଲେଣି ।

ଏମାନେ ଲୁଟପାଇଁ ଚନ୍ଦନମାରି ଲୋକଙ୍କୁ ଏଫ୍ଡିଆଇ ଲଣ୍ଠନ ଦେଖାଉଛନ୍ତି । କଂଗ୍ରେସ ପକ୍ଷରୁ ବିରୋଧିଦଳ ମୁଖ୍ୟ ସଚେତକ ପ୍ରସାଦ ହରିଚନ୍ଦନ କହିଲେ ଯେ, ବୈଦେଶିକ ପୁଞ୍ଜି କ୍ଷେତ୍ରରେ ବିଜେଡି ଦୋମୁହାଁ ନୀତି ଅବଲମ୍ବନ କରୁଛି । ରାଜ୍ୟ ସରକାର ସବୁ କ୍ଷେତ୍ରରେ ବୈଦେଶିକ ପୁଞ୍ଜି ଖଟାଉଛନ୍ତି ।

କେବଳ ବଡ ଶିଳ୍ପ ନୁହେଁ,ଚାଷ କ୍ଷେତ୍ରରେ ମଧ୍ୟ ରାଜ୍ୟ ସରକାର ବୈଦେଶିକ ପୁଞ୍ଜିପତିଙ୍କୁ ନିମନ୍ତ୍ରଣ କରୁଛନ୍ତି । ବିଦେଶୀ ସହରରେ ମେଳା କରାଯାଇ ବିଦେଶୀ କଂପାନୀକୁ ଡାକି ଅଣାଯାଉଛି । ଏପଟେ କିନ୍ତୁ ବିରୋଧ କରାଯାଉଛି ।

କଂଗ୍ରେସର ସନ୍ତୋଷ ସିଂ ସାଲୁଜା, ନବକିଶୋର ଦାସ କହିଥିଲେ ଏଫ୍ଡିଆଇକୁ ବିରୋଧ କରାଯିବା ଠିକ୍ ନୁହେଁ । ଏହା ସ୍ୱାଗତ ଯୋଗ୍ୟ । ବିଧାୟକ ଦେବୀ ପ୍ରସନ୍ନ ଚାନ୍ଦ,ଡା ପ୍ରଫୁଲ ମାଝି ଏହାକୁ ସମର୍ଥନ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୩(ଓଡିଶା ଡଟ୍ କମ୍)-ବିଧାନସଭାରେ ଲାଗି ରହିଥିବା ଅଚଳାବସ୍ଥାକୁ ଦୂର କରିବାକୁ ସୋମବାର ଦିନ ବାଚସ୍ପତି ପ୍ରଦୀପ କୁମାର ଅମାତ ଯେଉଁ ସର୍ବଦଳୀୟ ବୈଠକ ଡାକିଥିଲେ ତାହା ଅସମାପ୍ତ ରହିଛିି ।

ମଙ୍ଗଳବାର ଦିନ ପୁଣିଥରେ ବୈଠକ ବସିପାରେ ବୋଲି ବାଚସ୍ପତି କହିଥିବା ବେଳେ କଂଗ୍ରେସ ଓ ବିଜେପି ଦଳର ନେତାମାନେ କହିଛନ୍ତି ଆଜିର ଏହି ବୈଠକରେ କୌଣସି ନିସ୍ପତି ହୋଇପାରି ନାହିଁ ।

ବୈଠକରେ ବିରୋଧିଦଳର ନେତା ଭୂପିନ୍ଦର ସିଂ, ସଂସଦୀୟ ବ୍ୟାପାର ମନ୍ତ୍ରୀ କଳ୍ପତରୁ ଦାସ, ଆଇନମନ୍ତ୍ରୀ ରଘୁନାଥ ମହାନ୍ତି, ସରକାରୀ ମୁଖ୍ୟ ସଚେତକ ପ୍ରଭାତ ତ୍ରିପାଠୀ, ବିରୋଧିଦଳ ମୁଖ୍ୟସଚେତକ ପ୍ରସାଦ ହରିଚନ୍ଦନ, ସରକାରୀ ଉପମୁଖ୍ୟ ସଚେତକ ସଂଜୟ ଦାସବର୍ମା, ବିଜେପିର କରେନ୍ଦ୍ର ମାଝି, ସିପିଆଇର ଆଦିକନ୍ଦ ସେଠୀ ଏବଂ କଂଗ୍ରେସର ସନ୍ତୋଷ ସିଂ ସାଲୁଜା ଯୋଗ ଦେଇଥିଲେ ।

ବୈଠକ ଦୀର୍ଘ ସମୟ ଚାଲିଥିଲେ ମଧ୍ୟ କୌଣସି ନିସ୍କର୍ଷ ବାହାରି ପାରିନାହିଁ । ବୈଠକ ଶେଷରେ ବିରୋଧିଦଳ ନେତା ଶ୍ରୀ ସିଂ କହିଛନ୍ତି ପ୍ରଥମେ ଚାଷୀଙ୍କ ପ୍ରସଙ୍ଗରେ ଦିଆଯାଇଥିବା ମୁଲତବୀ ପ୍ରସ୍ତାବ ଉପରେ ଆଲୋଚନା କରାଯାଉ ।

ସଂସଦୀୟ ବ୍ୟାପାର ମନ୍ତ୍ରୀ ଶ୍ରୀ ଦାସ କହିଛନ୍ତି ଏହି ମୁଲତବୀ ପ୍ରସ୍ତାବ ୩ଟି ବିଭାଗର ବିଷୟ ହୋଇଥିବାରୁ ଏହାକୁ ମୁଲତବୀ ପ୍ରସ୍ତାବ ଆକାରରେ ଆଲୋଚନା କରାଯିବା ସମ୍ଭବ ନୁହେଁ । ଆମେ ଚାଷୀ ସମସ୍ୟା ଆଲୋଚନା କରିବା ପାଇଁ ପ୍ରସ୍ତୁତ ଅଛୁ । ମାନ୍ୟବର ବାଚସ୍ପତି ଯେଉଁ ଫୋରମରେ ଆଲୋଚନା କରିବାକୁ ଚାହିଁବେ ଆମେ ସେହିବାଟରେ ଆଲୋଚନା କରିବାକୁ ରାଜି ଅଛୁ ।

ବିଜେପିର କରେନ୍ଦ୍ର ମାଝିଙ୍କ ମତରେ ଗୃହକାର୍ଯ୍ୟ ଠିକ୍ ଠାକ ଭାବରେ ଚାଲୁ । କୃଷକମାନଙ୍କର ଯେଉଁ ସମସ୍ୟା ଅଛି ତାହା ମଧ୍ୟ ବିଧାନସଭାରେ ଆଲୋଚନା କରାଯାଉ । ବିଧାନସଭାର ଶୀତ ଅଧିବେଶନ ଆରମ୍ଭରୁ ବିରୋଧିଦଳ ଚାଷୀଙ୍କ ପ୍ରସଙ୍ଗ ଆଲୋଚନା ଦାବିରେ ବିଧାନସଭାକୁ ଅଚଳ କରି ରଖିଛି ।

ପ୍ରଥମ ଦିନରୁ ଚାଷୀଙ୍କ ଧାନ ବିକ୍ରି ନହେବା, ଚାଷୀଙ୍କୁ ବିହନ ଦିଆନଯିବା,ବୋନସ ପ୍ରଦାନ କରାନଯିବା ଆଦି ପ୍ରସଙ୍ଗ ନେଇ ବିରୋଧିଦଳ ମୁଲତବୀ ନୋଟିସ ଦେଇଥିଲେ । ତେବେ ବାଚସ୍ପତି ଏହାକୁ ଅଗ୍ରାହ୍ୟ କରିଦେବାରୁ ସେବେଠାରୁ ବିରୋଧିଦଳ ଗୃହକୁ ଅଚଳ କରିଛି । ଆଜି ଗୃହକାର୍ଯ୍ୟ ଆରମ୍ଭ ହେବାମାତ୍ରେ ବାଚସ୍ପତି ପ୍ରଶ୍ନୋତର କାର୍ଯ୍ୟକ୍ରମ ପରେ ସବୁଦଳର ନେତୃବୃନ୍ଦକୁ ଡାକି ଆଲୋଚନା କରିବେ ବୋଲି କହିଥିଲେ ।

ଫଳରେ କଂଗ୍ରେସ ବିଧାୟକମାନେ ପ୍ରଶ୍ନୋତର କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ନିର୍ଦ୍ଧାରିତ ସମୟରେ ମାତ୍ର ୨ଟି ପ୍ରଶ୍ନ ଆଲୋଚନା ହୋଇ ପାରିଥିଲା । ଏଥିରେ ମୁଖ୍ୟମନ୍ତ୍ରୀଙ୍କ ପକ୍ଷରୁ ଆଇନମନ୍ତ୍ରୀ ରଘୁନାଥ ମହାନ୍ତି ଓ କୃଷିମନ୍ତ୍ରୀ ଦେବୀପ୍ରସାଦ ମିଶ୍ର ଉତର ରଖିଥିଲେ ।

ଶୂନ୍ୟକାଳ ଆରମ୍ଭ ହେବାପରେ ବାଚସ୍ପତି ଅନ୍ୟ କୌଣସି କାର୍ଯ୍ୟକ୍ରମ ନନେଇ ସର୍ବଦଳୀୟ ବୈଠକ ଡାକିଥିଲେ । ଏଥିପାଇଁ ଗୃହକୁ ପ୍ରଥମେ ୧୨ଟା ପର୍ଯ୍ୟନ୍ତ ମୁଲତବୀ କରାଯାଇଥିଲା ।

୧୨ଟାରୁ ୧୨.୩୦ ଓ ଏହାପରେ ଅପରାହ୍ନ ୩ଟା ପର୍ଯନ୍ତ ଗୃହକୁ ମୁଲତବୀ ଘୋଷଣା କରାଯାଇଥିଲା । ୩ଟାରେ ପୁଣି ଗୃହକାର୍ଯ୍ୟ ଆରମ୍ଭ ହେବାମାତ୍ରେ କଂଗ୍ରେସ ବିଧାୟକ ଫ୍ଲାକାର୍ଡ ଧରି ଗୃହମଧ୍ୟରେ ହୋହାଲ୍ଲା କରିବାରୁ ବାଚସ୍ପତି ବାଧ୍ୟହୋଇ ଗୃହକୁ ମଙ୍ଗଳବାର ପର୍ଯନ୍ତ ମୁଲତବୀ ରଖିଛନ୍ତି ।

ଓଡିଶା ଡଟ୍ କମ୍