ବିଧାୟକ

ଓଡିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୩୦ (ଓଡିଶା ଡ଼ଟ୍ କମ୍)-ବେଜେଡିରେ ଏନ୍ସିପିର ୪ ଜଣ ବିଧାୟକ ମିଶ୍ରଣକୁ ନେଇ ସେମାନଙ୍କର ସଭ୍ୟ ପଦ ବୈଧତା ସଂର୍ପକିତ ମାମଲାରେ ବାଚସ୍ପତିଙ୍କ ବିରୋଧରେ ରୁଜୁ ହୋଇଛି ଅଦାଲତ ଅବମାନନା ମାମଲା । ହାଇକୋର୍ଟରେ ଏ ମାମଲା ଦାୟର କରିଛନ୍ତି ଏନ୍ସିପିର ରାଜ୍ୟ ସଭାପତି ଉତ୍କଳ କେଶରୀ ପରିଡା ।

ଉତ୍କଳ କେଶରୀ ତାଙ୍କ ଆବେଦନରେ ଦର୍ଶାଇଛନ୍ତି ଏନ୍ସିପିର ୪ ଜଣ ବିଧାୟକ ବିଜେଡିରେ ମିଶିବାପରେ ସେମାନଙ୍କର ବିଧାୟକ ପଦ ରଦ୍ଧ ସଂପର୍କ ମାମଲାରେ ବାଚସ୍ପତି ଉଭୟ ହାଇକୋର୍ଟ ଓ ସୁପ୍ରୀମକୋର୍ଟଙ୍କ ଆଦେଶ ପାଳନ କରୁନାହାଁନ୍ତି ।

ଗତ ସେପ୍ଟେମ୍ବର ମାସରେ ହାଇକୋର୍ଟ ଦେଇଥିବା ଆଦେଶ ଓ ଗତ ଡିସେମ୍ବର ମାସରେ ସୁପ୍ରୀମକୋର୍ଟ ଦେଇଥିବା ଆଦେଶକୁ ବାଚସ୍ପତି ପାଳନ କରିନାହିାଁନ୍ତି ।

ତାଛଡା ଏମାସ ୧୭ ତାରିଖରେ ସୁପ୍ରୀମକୋର୍ଟ ଚୁଡାନ୍ତ ରାୟ ଦେଇଥିଲେ ମଧ୍ୟ ବାଚସ୍ପତି ଏ ମାମଲାର ବିଚାର କରୁନାହାଁନ୍ତି ବୋଲି ଏନ୍ସିପିର ରାଜ୍ୟ ସଭାପତି ଅଭିଯୋଗ କରିଛନ୍ତି । ତେଣୁ ତୁରନ୍ତ ବାଚସ୍ପତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଉତ୍କଳ କେଶରୀ ହାଇକୋର୍ଟରେ ପ୍ରାର୍ଥାନା କରିଛନ୍ତି ।

ଉତ୍କଳ କେଶରୀ କହିଛନ୍ତି ଯେ,ମାନ୍ୟବର ହାଇକୋର୍ଟ ଯାହା ରାୟ ଦେଇଛନ୍ତି ସେ ଅନୁଯାୟୀ ଏ କେସ୍ ରେ ଫଳାଫଳ ନିର୍ଣ୍ଣୟ ହେବ । ଜାନୁୟାରୀ ୧୮ ତାରିଖ ଠାରୁ ଆଜି ପର୍ଯ୍ୟନ୍ତ ମଧ୍ୟ ବାଚସ୍ପତି କୌଣସି ପଦକ୍ଷେପ ନେଉ ନାହିାଁନ୍ତି ।

ଓଡିଶା ହାଇକୋର୍ଟ ଓ ସୁପ୍ରୀମକୋର୍ଟର ନିର୍ଦ୍ଦେଶନାମାକୁ ପାଳନ ନକରିବାରୁ ଆମେ ବାଧ୍ୟହୋଇ ତାଙ୍କ ନାମରେ କୋର୍ଟ ଅବମାନନା ଦାଖଲ କଲୁ ,କେଶରୀ କହିଛନ୍ତି ।

ଓଡିଶା ଡ଼ଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୨୨(ଓଡିଶା ଡଟ୍ କମ୍)-ଆସନ୍ତା ୨୮ତାରିଖରେ ବିଜେଡି ରାଜ୍ୟ ସଭାପତି ପଦ ପାଇଁ ନିର୍ବାଚନ ଅନୁଷ୍ଠିତ ହେବ । ଏଥିପାଇଁ ୨୫ତାରିଖରେ ନାମାଙ୍କନପତ୍ର ଦାଖଲ ହେବ ।

ବର୍ତମାନର ସଭାପତି ଆସନ୍ତା ୨୫ରେ ନାମାଙ୍କନପତ୍ର ଦାଖଲ କରିବେ । ୨୮ରେ ମଧ୍ୟ ରାଜ୍ୟର କାର୍ଯ୍ୟନିର୍ବାହୀ କମିଟି, ଉପସଭାପତି ଏବଂ ଅନ୍ୟାନ୍ୟ ଛାମୁଆ ସଙ୍ଗଠନର ମୋଟ ୮୧ଜଣିଆ କାର୍ଯ୍ୟକର୍ତାଙ୍କ ନାମ ଘୋଷଣା କରାଯିବ ବୋଲି ଦଳୀୟ ସୂତ୍ରରୁ ଜଣାପଡ଼ିଛି ।

ଜିଲା ସଭାପତି ନିର୍ବାଚନ ପରେ ବିଜେଡି ରାଜ୍ୟ ପରିଷଦ ନିର୍ବାଚନ ଶେଷ ହୋଇଛି । ପରିଷଦକୁ ୩୩୧ ସଦସ୍ୟଙ୍କ ନାମ ଘୋଷଣା କରାଯାଇଛି । ସର୍ବସମ୍ମତି କ୍ରମେ ଏହି ନିର୍ବାଚନ ହୋଇଥିବା ଦଳର ନିର୍ବାଚନ ଅଧିକାରୀ ବିଧାୟକ ପ୍ରଭାତ ତ୍ରିପାଠୀ ସୂଚନା ଦେଇଛନ୍ତି ।

ଏହି ନିର୍ବାଚନ ମତୈକ ଭିତିରେ ହୋଇଥିବା ନିର୍ବାଚନ ଅଧିକାରୀ କହୁଥିଲେ ହେଁ ଏଥିନେଇ ଦଳୀୟ ମହଲରେ ଅସନ୍ତୋଷ ଭରି ରହିଛି । ନୂଆ ପରିଷଦରେ ଜିଲାସ୍ତରରୁ ଆରମ୍ଭ କରି ରାଜ୍ୟ ପର୍ଯ୍ୟନ୍ତ ଯୁବ ନେତା, ମହିଳା, ସଂଖ୍ୟାଲଘୁ, ଯାଦବ ସମ୍ପ୍ରଦାୟ ସମେତ ବିଭିନ୍ନ ବର୍ଗର ଅନୁଭବୀ ନେତାଙ୍କୁ ନିଆଯାଇଛି ବୋଲି ଦଳ ପକ୍ଷରୁ କୁହାଯାଇଛି ।

ପରିଷଦକୁ ୧୪୭ଟି ବିଧାନସଭା ଆସନରୁ ୧୪୭ଜଣ ସଦସ୍ୟ ମନୋନୀତ ହୋଇଥିବାବେଳେ ୧୦୩ ବିଧାୟକ, ୩୨ ସାଙ୍ଗଠନିକ ଜିଲା ସଭାପତି, ୧୪ଜଣ ଲୋକସଭା ସଭ୍ୟ, ୬ଜଣ ରାଜ୍ୟସଭା ସଭ୍ୟ ଏବଂ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ପରାଜିତ ହୋଇଥିବା ୨୫ଜଣ ଓ ସାଂସଦ ନିର୍ବାଚନରେ ପରାଜିତ ୪ଜଣ ନେତାଙ୍କୁ ମନୋନୀତ କରାଯାଇଛି ।

ନୂଆ ପରିଷଦରେ ଗତ ଥର ବାଦ ପଡ଼ିଥିବା ବହୁ ପୁରୁଖା ଓ ଅଭିଜ୍ଞ ନେତାଙ୍କୁ ଏଥର ସାମିଲ କରାଯାଇଛି । ବିଶେଷ କରି ଖୋର୍ଦ୍ଧା ଜିଲା ସଭାପତି ପଦରୁ ଅବ୍ୟାହତି ଦିଆଯାଇଥିବା ପୂର୍ବତନ ଜିଲା ପରିଷଦ ଅଧ୍ୟକ୍ଷ ପ୍ରଶାନ୍ତ ଜଗଦ୍ଦେବଙ୍କ ସମେତ କଟକରୁ ଧର୍ମାନନ୍ଦ ବେହେରାଙ୍କୁ ପରିଷଦରେ ରଖାଯାଇଛି ।

ସେହିପରି ପଶ୍ଚିମ ଓଡିଶା ବିକାଶ ପରିଷଦ ଅଧ୍ୟକ୍ଷ ପଦ୍ମିନୀଶେଖର ଦେଓଙ୍କ ସମେତ ମାନସ ମାଡ଼କାନି, ରାମକୃଷ୍ଣ ଦାସମହାପାତ୍ର, ମୁନ୍ନା ଖାଁ, ନଗେନ୍ଦ୍ର ପ୍ରଧାନ ପ୍ରମୁଖଙ୍କୁ ପରିଷଦକୁ ମନୋନୀତ କରାଯାଇଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୨୨(ଓଡିଶା ଡଟ୍ କମ୍)- ଗ୍ରାମସଭାର ନିଷ୍ପତି ଚୂଡ଼ାନ୍ତ । କୌଣସି ପରିସ୍ଥିତିରେ ଗ୍ରାମ ସଭା ଦଦ୍ୱାରାପ୍ରସ୍ତାବିତ ପ୍ରକଳ୍ପ ବାହାରେ କାର୍ଯ୍ୟ ଗ୍ରହଣ କରାଯିବ ନାହିଁ ବୋଲି ପଞ୍ଚାୟତିରାଜ ବିଭାଗର ନୂଆ ନିୟମାବଳୀ ତିଆରି ହୋଇଛି ।

ସାଂସଦ, ବିଧାୟକ ଚାହିଁଲେ ବି ଗ୍ରାମ ସଭାରୁ ଆସିଥିବା ପ୍ରକଳ୍ପ ତାଲିକାରେ ପରିବର୍ତନ ହେବ ନାହିଁ । ଏକ୍ଷେତ୍ରରେ ଯଦି ଅନ୍ୟ କୌଣସି ପ୍ରକଳ୍ପ କାର୍ଯ୍ୟକାରୀ କରିବା ଆବଶ୍ୟକ ହୁଏ ତେବେ ସେଥିପାଇଁ ପଞ୍ଚାୟତିରାଜ ବିଭାଗର ଅନୁମୋଦନ ନେବାକୁ ପଡ଼ିବ ।

ପଞ୍ଚାୟତିରାଜ ମନ୍ତ୍ରୀ କଳ୍ପତରୁ ଦାସ କହିଛନ୍ତି ଯେ ପୂର୍ବରୁ ଯେକୌଣସି ସ୍ଥିରିକୃତ ପ୍ରକଳ୍ପ ନିମନ୍ତେ କାର୍ଯ୍ୟାଦେଶ ଦେବାକୁ ମାସ ମାସ ସମୟ ଲାଗୁଥିଲା । ଏଥିରେ ପରିବର୍ତନ ଆଣିବା ପାଇଁ ୨୦୧୩-୧୪ ଆର୍ଥିକ ବର୍ଷର ପ୍ରକଳ୍ପ ପାଇଁ ଏପ୍ରିଲ ୧୯ ତାରିଖ ସୁଦ୍ଧା ତାଲିକା ପ୍ରସ୍ତୁତ କରାଯିବ ।

ଏପ୍ରିଲ ମାସ ୨୦ ତାରିଖରୁ ମଇ ମାସ ୨୦ ତାରିଖ ମଧ୍ୟରେ କାର୍ଯ୍ୟାଦେଶ ଦେବାକୁ ନିର୍ଦେଶ ଦିଆଯାଇଛି । ଆକ୍ସନ ପ୍ଲାନଗୁଡ଼ିକ ବିଭିନ୍ନସ୍ତରରେ ଅନୁମୋଦନ କରି ଏପ୍ରିଲ ୨୫ ତାରିଖ ସୁଦ୍ଧା ସଂପୃକ୍ତ ଅଧିକାରୀଙ୍କ ନିକଟକୁ ପଠାଯିବା ବ୍ୟବସ୍ଥା ରହିଛି ।

ଏସଂକ୍ରାନ୍ତ ବ୍ୟୟ ଅଟ୍ଟକଳ, ବୈଷୟିକ ମଞ୍ଜୁରୀ ଏବଂ ଗ୍ରାମଶ୍ରମିକ ନେତା ନିଯୁକ୍ତି କାର୍ଯ୍ୟ ଏପ୍ରିଲ ୧୯ ତାରିଖ ସୁଦ୍ଧା ଶେଷ ହେବ । ୨୦୧୨-୧୩ ଆର୍ଥିକ ବର୍ଷ ପାଇଁ ବିଭିନ୍ନ ଯୋଜନାରେ ଦିଆଯାଇଥିବା ଅର୍ଥରୁ କିଛି ବଳକା ରହିଛି ।

ମାର୍ଚ୍ଚ ୩୧ ତାରିଖରେ ବ୍ୟୟ ମଞ୍ଜୁରୀ ବିଲ ଗୃହିତ ହେବା ପରେ ୨୦୧୨-୧୩ର କାର୍ଯ୍ୟାଦେଶ ମେଳା ମାଧ୍ୟମରେ ଦିଆଯିବ । ମେ ମାସ ୨୧ ସୁଦ୍ଧା ତାରିଖ ସୁଦ୍ଧା ଇନ୍ଦିରା ଆବାସ ଓ ମୋ କୁଡ଼ିଆ ପାଇଁ କାର୍ଯ୍ୟାଦେଶ ଦିଆଯିବ ।

ସମୟସୀମା ମଧ୍ୟରେ ପ୍ରକଳ୍ପକୁ ବୈଷୟିକ ମଞ୍ଜୁରୀ ନମିଳିଲେ ତାକୁ ମଞ୍ଜୁରୀ ପ୍ରାପ୍ତ ବୋଲି ଧରିନିଆଯିବ । ସିମେଂଟ କଂକ୍ରିଟ ରୋଡ଼ ତାଲିକା ଚୂଡ଼ାନ୍ତ ବେଳେ ବିଡିଓ, ସରପଂଚ, ସମିତି ସଭ୍ୟ ଜିଲା ପରିଷଦ ସଦସ୍ୟ ଏବଂ ସାଂସଦ ଓ ବିଧାୟକଙ୍କ ପ୍ରତିନିଧି ଉପସ୍ଥିତ ରହିବେ ।

ବିଭାଗୀୟ ସଚିବ ଅପରାଜିତା ଷଡ଼ଙ୍ଗୀ କହିଥିଲେ ଯେ, ବିଡିଓମାନଙ୍କୁ ବ୍ଲକ ହେଡକ୍ୱାର୍ଟରରେ ରହିବାକୁ ନିର୍ଦେଶ ଦିଆଯାଇଛି । ଜିଲାପାଳମାନେ ଏସମ୍ପର୍କରେ ରିପୋର୍ଟ ଦେବେ । ଆବଶ୍ୟକ ପଡ଼ିଲେ ହେଡକ୍ୱାର୍ଟରରେ ରହୁନଥିବା ବିଡିଓମାନଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ସେମାନଙ୍କ ଦରମା ବନ୍ଦ କରିବାକୁ ନିର୍ଦେଶ ଦିଆଯାଇଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୪(ଓଡିଶା ଡଟ୍ କମ୍)-ଆସନ୍ତା କାଲି ସାରା ରାଜ୍ୟରେ କମ୍ବଳ ଭତା ବଣ୍ଟନ କରାଯିବ । ମଧୁବାବୁ ପେନସନ ଯୋଜନାରେ ମାସିକ ଭତା ପାଉଥିବା ବୃଦ୍ଧ-ବୃଦ୍ଧା,ବିଧବା,ଭିନ୍ନକ୍ଷମ ଏବଂ ଏଚଆଇଭି ସଂକ୍ରମିତ ଏହି କମ୍ବଳ ଭତା ପାଇବେ ବୋଲି ବିଧାନସଭାରେ ଶୁକ୍ରବାର ଦିନ ଶୂନ୍ୟକାଳରେ ସରକାରୀ ଉପମୁଖ୍ୟ ସଚେତକ ସଂଜୟ ଦାସବର୍ମା ପ୍ରକାଶ କରିଛନ୍ତି ।

ସେ କହିଛନ୍ତି ଆସନ୍ତାକାଲି ଜନସେବା ଦିବସରେ ଏହି କାର୍ଯ୍ୟ କରାଯିବ । ମୁଖ୍ୟମନ୍ତ୍ରୀଙ୍କ ରିଲିଫି ପାଣ୍ଠିରୁ ଏହି ଅର୍ଥ ପ୍ରଦାନ କରାଯିବ । ସ୍ୱତନ୍ତ୍ର ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଂଜୁର କରିଥିବା ୨୦୦ ଟଙ୍କାଏଁ ଭତା କମ୍ବଳ କିଣିବାକୁ ୩୭ ଲକ୍ଷରୁ ଅଧିକ ହିତାଧିକାରୀଙ୍କୁ ଦିଆଯିବ । ଏଥିପାଇଁ ରାଜ୍ୟ ସରକାର ୭୪କୋଟି ଟଙ୍କାର ବ୍ୟୟବରାଦ କରିଛନ୍ତି ।

ପ୍ରଥମଥର ପାଇଁ ଶୀତଦିନେ କମ୍ବଳ କିଣିବାକୁ ସରକାର ଏପରି ଭତା ବ୍ୟବସ୍ଥା କରିଛନ୍ତି । ଏଥିଲାଗି ବିଧାନସଭାରେ ବିଜେଡିର ସମସ୍ତ ସଦସ୍ୟ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି । ଏହା ଏକ ଐତିହାସିକ ନିଷ୍ପତି ବୋଲି ବିଜେଡି ବିଧାୟକମାନେ କହିଛନ୍ତି ।

ବିଜେଡିର ପ୍ରଫୁଲ ସାମଲ,ଅନନ୍ତ ଦାସ,ଅଶୋକ ଚନ୍ଦ୍ର ପଣ୍ଡା ପ୍ରମୁଖ ଏହି ପ୍ରସ୍ତାବକୁ ସମର୍ଥନ କରି ମୁଖ୍ୟମନ୍ତ୍ରୀଙ୍କ ପ୍ରତି କୃତଜ୍ଞତା ଜ୍ଞାପନ କରିଥିବାବେଳେ କଂଗ୍ରେସର ରାମଚନ୍ଦ୍ର କାଡମ କହିଥିଲେ ଯେ,ସରକାର ଟଙ୍କା ନଦେଇ କମ୍ବଳ କିଣିକରି ଦିଅନ୍ତୁ । କମ୍ବଳ କିଣିଦେଲେ ଲୋକେ ବ୍ୟବହାର କରିପାରିବେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୨(ଓଡିଶା ଡଟ୍ କମ୍)-ହାତୀ,ମାଙ୍କଡକୁ ନେଇ ବିଧାନସଭାରେ ଶାସକ ଓ ବିରୋଧୀ ଉଦ୍ବେଗ ପ୍ରକାଶ କରିଛନ୍ତି । ଏମାନଙ୍କ ଉପଦ୍ରବ ଅସହ୍ୟ ହେଲାଣି । ସରକାର ହାତୀ ସହିତ ମଣିଷଙ୍କୁ ମଧ୍ୟ ସୁରକ୍ଷା ଦିଅନ୍ତୁ ବୋଲି ବିଧାୟକମାନେ ବିଧାନସଭାରେ ମଙ୍ଗଳବାର ଦିନ ଅଭିଯୋଗ ଆଣିଛନ୍ତି ।

ନୀଳଗିରିରେ ଦେଢ଼ଶହ ପର୍ଯ୍ୟନ୍ତ ହାତୀ ଉପଦ୍ରବ କରୁଛନ୍ତି । ଏହାକୁ ରୋକାଯାଇପାରୁନି । ବନ ବିଭାଗ ଓ ପୁଲିସ କର୍ମଚାରୀ ହାତ ଟେକିଦେଇଛନ୍ତି । ହାତୀ ପଲ ଘରଦ୍ୱାର ଭାଙ୍ଗୁଛନ୍ତି । ଏହାର ସ୍ଥାୟୀ ସମାଧାନ କରିବାକୁ ଆଜି ବିଧାନସଭାରେ ସ୍ୱାଧୀନ ସଦସ୍ୟ ପ୍ରତାପ ଷଡଙ୍ଗୀ ଜଙ୍ଗଲ ଓ ପରିବେଶ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ ।

ବିଭାଗୀୟ ମନ୍ତ୍ରୀ ବିଜୟଶ୍ରୀ ରାଉତରାୟ କହିଥିଲେ ହାତୀ ସ୍କୁଲରେ ପାଠ ପଢିନାହାନ୍ତି କି ଜ୍ଞାନ ଆହରଣ କରିନାହାନ୍ତି ଯେ ସେମାନେ ସବୁ କଥା ବୁଝିଯିବେ । ହାତୀ ଏକାଠି ହେଉଥିବା ବେଳେ ଲୋକମାନେ ସେମାନଙ୍କୁ ଘେରୁଛନ୍ତି । ଫଟୋ ଉଠାଉଛନ୍ତି । ହାତୀ ରାଗିଯିବା ସ୍ୱାଭାବିକ ।

ଯେଉଁ ସ୍ଥାନରେ ହାତୀ ପଲ ଏକାଠି ହେଉଛନ୍ତି ସେ ସ୍ଥାନକୁ କେବଳ ବନ ବିଭାଗ କର୍ମଚାରୀଙ୍କୁ ଯିବାକୁ ଦିଅନ୍ତୁ । ସେମାନଙ୍କ କାମ କରିବାକୁ ଦେବା ପାଇଁ ପରାମର୍ଶ ଦେଇ ଅନ୍ୟମାନେ ପଶି ମାମଲତି ନକରିବାକୁ ମନ୍ତ୍ରୀ କହିଥିଲେ ।

ମନ୍ତ୍ରୀଙ୍କ ଉତରରେ ଅସନ୍ତୋଷ ପ୍ରକାଶ କରି ବିଧାୟକ ଶ୍ରୀ ଷଡ଼ଙ୍ଗୀ ଗୃହର ମଧ୍ୟଭାଗକୁ ଚାଲିଆସି ଧାରଣାରେ ବସିଥିଲେ । ମନ୍ତ୍ରୀ ଶ୍ରୀ ରାଉତରାୟ ନିଜ ଆସନରୁ ଉଠି ଆସି ତାଙ୍କୁ ବୁଝାଇବା ପରେ ବିଧାୟକ ଶ୍ରୀ ଷଡ଼ଙ୍ଗୀ ନିଜ ଆସନକୁ ଫେରିଥିଲେ ।

ବିଧାୟକ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ହାତୀ, ମଇଁଷି ଓ ମାଙ୍କଡ଼ ଉପଦ୍ରବ ଯୋଗୁ ଚାଷୀ ବିବ୍ରତ ହୋଇପଡ଼ିିଛନ୍ତି ପ୍ରଶ୍ନର ଉତର ରଖି ମନ୍ତ୍ରୀ ଶ୍ରୀ ରାଉତରାୟ କହିଥିଲେ, ମଇଁଷି ବନ୍ୟଜନ୍ତୁ ନୁହେଁ, ଷଣ୍ଢ ଏସବୁ କରୁଥିବ । ମାଙ୍କଡ଼ଙ୍କ ପାଇଁ ସବୁଆଡ଼େ ସମସ୍ୟା ସୃଷ୍ଟି ହୋଇଛି । ମାଙ୍କଡ଼ ଘଉଡ଼େଇବା ପାଇଁ ସଦସ୍ୟ ନେତୃତ୍ୱ ନେଇ କାମ କଲେ ମୁଁ ତାଙ୍କ ପଛରେ ରହିବି ।

ହାତୀ ଉପଦ୍ରବ ଉପରେ ବିଧାୟକ ସୁବର୍ଣ୍ଣ ନାୟକ ହାତୀ ମୃତୁ୍ୟ ସମ୍ପର୍କରେ ପଚାରିଥିବା ପ୍ରଶ୍ନର ଉତରରେ ମନ୍ତ୍ରୀ ଶ୍ରୀ ରାଉତରାୟ କହିଥିଲେ ଯେ କେତେକ ଜଙ୍ଗଲ ଓ ଚାଷ ଜମିରେ ବନ୍ୟଜନ୍ତୁଙ୍କ ପ୍ରବେଶ ପ୍ରତିହତ କରିବା ପାଇଁ ଲୋକମାନେ ଲୁହାତାର ଘେରାଉ କରି ଅନଧିକୃତ ଭାବେ ବିଦ୍ୟତ ଚାର୍ଜ କରୁଛନ୍ତି । ଏଥିଯୋଗୁଁ ବେଳେବେଳେ ହାତୀଙ୍କ ମୃତ୍ୟୁ ଘଟୁଛି । ଏହାକୁ ବନ୍ଦ କରିବା ପାଇଁ ସଚେତନତା ସୃଷ୍ଟି କରାଯାଉଛି ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୯(ଓଡ଼ିଶା ଡ଼ଟ୍ କମ୍)-ଡାକ୍ତର ମାଧବୀଲତା ପ୍ରଧାନଙ୍କ ମୃତ୍ୟୁ ଘଟଣାରେ ପୁରୀ ସିଡିଏମଓଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସୁପାରିଶ କରିଛନ୍ତି ରାଜ୍ୟ ମହିଳା କମିଶନ ଅଧ୍ୟକ୍ଷା ଜ୍ୟୋତି ପାଣିଗ୍ରାହୀ ।

ତଦନ୍ତ ରିପୋର୍ଟରେ ସେ ଏଥିସହ ସରକାରଙ୍କୁ ମୃତ ମାଧବୀଙ୍କ ପରିବାରକୁ ଆର୍ଥିକ ସହାୟତା ଦେବାକୁ ମଧ୍ୟ ସୁପାରିଶ କରିଛନ୍ତି । ମହିଳା କମିଶନ ଅଧ୍ୟକ୍ଷା ଆହୁରି କହିଛନ୍ତ ଯେ ଯଦି ଦରକାର ପଡେ ସେ ଏମାମଲାରେ ସଂଗ୍ରହ କରିଥିବା କାଗଜପତ୍ର ସବୁ କ୍ରାଇମବ୍ରାଞ୍ଚ କୁ ମଧ୍ୟ ଦେବେ ।

ସେ କହିଛନ୍ତି ସିଡିଏମଓ ଯେଉଁ ବଦଳି କରିଥିଲେ ତାହା ଠିକ୍ ପ୍ରୋସେସରେ ସେ କରି ନାହାଁନ୍ତି । ତାଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ।

ପୋଷ୍ଟମଟମ୍ ପାଇଁ ଆସୁଥିବା ଅଚିହ୍ନା ଶବର ପରିଚୟ ପାଇଁ ବିଭିନ୍ନ ଗଣମାଧ୍ୟମକୁ ସାଙ୍ଗେସାଙ୍ଗେ ଦିଆଯାଉ । ଯାହାଦ୍ୱାରାକି ସେହି ଅପରିଚିତ ଶବକୁ ଲୋକେ ଚିହ୍ନି ପାରିବେ । ତେଣୁକରି ପରିବାର ଲୋକ ଅତି ନିକଟରେ ଥାଇ ମଧ୍ୟ ମାଧବୀଲତାର ଶବ ପାଇପାରିଲେ ନାହିଁ ।

ଏ ଘଟଣାକୁ ନେଇ ଏଆଇଡିଡବ୍ଲୁଏ ଉପସଭାପତି ତାପସୀ ପ୍ରହରାଜ ତାଙ୍କ ପ୍ରତିକ୍ରୀୟାରେ କହିଛନ୍ତି ଯେ, ମହିଳା କମିଶନ ଯେଉଁ ତଦନ୍ତ ରିପୋର୍ଟ ଦେଇଛନ୍ତି କାହା ସ୍ୱାର୍ଥରେ । ଯାହା ଜଣାପଡୁଛି ଦଳୀୟ ବିଧାୟକଙ୍କୁ ସୁରକ୍ଷା ଦେବାପାଇଁ କରିଛନ୍ତି । ସେ ଜଣେ ଦଳୀୟ ନିଷ୍ଠାପର କର୍ମୀ ଭାବରେ ଜଣେ ଦଳୀୟ ନେତାଙ୍କୁ ସୁରକ୍ଷା ଦେଲେ ଆମର କିଛି କହିବାର ନାହିଁ ।

ଓଡ଼ିଶା ଡ଼ଟ୍ କମ୍