ବିଧାୟକ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୩୦(ଓଡ଼ିଶା ଡ଼ଟ୍ କମ୍) ଗଣତାନ୍ତ୍ରିକ ପଦ୍ଧତିରେ ଜଣେ ନିର୍ବାଚିତ ଜନ ପ୍ରତିନିଧି ଚାପରେ କାହିଁକି ଇସ୍ତଫା ଦେବେ ବୋଲି ଲକ୍ଷ୍ମୀପୁର ବିଧାୟକ ଝିନ୍ନ ହିକକାଙ୍କ ଇସ୍ତଫା ପ୍ରସଙ୍ଗକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୋମବାର କହିଛନ୍ତି ।

ମାଓବାଦୀଙ୍କ କବଳରୁ ମୁକ୍ତ ହେବାପାଇଁ ବିଧାୟକ ହିକକା ବିଧାୟକ ତଥା ବିଜେଡ଼ିର ସଦସ୍ୟ ପଦରୁ ଇସ୍ତଫା ଦେବେ ବୋଲି ପ୍ରଜାକୋର୍ଟରେ ପ୍ରତିଶ୍ରୁତି ଦେଇଥିଲେ ।

ଅନ୍ୟପକ୍ଷରେ ବିଧାୟକ ଝିନ୍ନ ହିକକା ପତ୍ନୀ କୌଶଲ୍ୟା, ଦୁଇ ପୁଅ, ମନ୍ତ୍ରୀ ରମେଶ ମାଝୀ ଏବଂ ବିଧାୟକ ରଘୁରାମ ପୋଡାଲଙ୍କ ସହ ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରିଛନ୍ତି ।

ମୁଖ୍ୟମନ୍ତ୍ରୀ ହିକକାଙ୍କୁ ତାଙ୍କ ସ୍ୱାସ୍ଥ୍ୟବସ୍ଥା ବିଷୟରେ ପଚାରିଥିଲେ । ବିଧାୟକ ଅପହରଣ ସମୟରେ କେଉଁ ପରିସ୍ଥିତିର ସମ୍ମୁଖିନ ହୋଇଥିଲେ ସେ ସଂପର୍କରେ ହିକକା କହିଥିଲେ ।

ଦୀର୍ଘ ୩୪ଦିନ ସେ ମାଓବାଦୀ ଶିବିରରେ ଥିଲେ ଏବଂ ବର୍ତମାନ ଏମ୍ଏଲ୍ଏ କଲୋନୀରେ ରହିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ଗତ ମାର୍ଚ୍ଚ ୨୩ରେ କୋରାପୁଟ ଜିଲ୍ଲା ୟାପୁଟ ଠାରୁ ମାଓବାଦୀମାନେ ହିକକାଙ୍କୁ ଅପହରଣ କରିନେଇଥିଲେ ଏବଂ ଗତ ୨୬ରେ ମୁକ୍ତ କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

କୋରାପୁଟ, ଅପ୍ରେଲ ୨୯(ଓଡ଼ିଶା ଡ଼ଟ୍ କମ୍) ବିଧାୟକ ପରୁ ଇସ୍ତଫା ନେଇ ମାଓବାଦୀମାନେ ଏକ ଅଡିଓ ଟେପ୍ ଜାରି କରିପାରନ୍ତି ବୋଲି ମୁକ୍ତ ହେବାର ତିନିଦିନ ପରେ ରବିବାର ବିଜେଡି ବିଧାୟକ ଝିନ୍ନ ହିକକା କହିଛନ୍ତି ।

“ମାଓବାଦୀଙ୍କ ପକ୍ଷରୁ ଏନେଇ ଶୀଘ୍ର ଏକ ଅଡିଓ ଟେପ୍ ଜାରି ହେବାକୁ ଯାଉଛି ଏବଂ ଏହା ଇସ୍ତଫା ସଂପର୍କିତ ସମସ୍ତ ବିଭ୍ରାନ୍ତି ଦୂର କରିବ” ୩୭ ବର୍ଷ ବୟସ୍କ ଲକ୍ଷ୍ମୀପୁର ବିଧାୟକ ହିକକା କହିଛନ୍ତି ।

ଖୁବ୍ ଶୀଘ୍ର ସେ ରାଜଧାନୀ ଆସି ଇସ୍ତଫା ସଂପର୍କରେ ଆଲୋଚନା କରିବେ ଏବଂ ଭବିଷ୍ୟତ କାର୍ଯ୍ୟପନ୍ଥା ନେଇ ଜଣାପଡ଼ିବ ବୋଲି ହିକକା କହିଛନ୍ତି । ଏହାସହ ସେ ତାଙ୍କ ନିର୍ବାଚନ ମଣ୍ଡଳୀର ଲୋକ ମାନଙ୍କ ସହ ମଧ୍ୟ ପରାମର୍ଶ କରିବେ ବୋଲି କହିଛନ୍ତି ।

ଗତ ମାର୍ଚ୍ଚ ୨୪ରେ କୋରାପୁଟ ଜିଲ୍ଲା ୟାପୁଟ ଠାରୁ ମାଓବାଦୀମାନେ ହିକକାଙ୍କୁ ଅପହରଣ କରିନେଇଥିଲେ । ବିଧାୟକ ତଥା ବିଜେଡ଼ିର ପ୍ରାଥମିକ ସଦସ୍ୟ ପଥରୁ ଇସ୍ତଫା ଦେବା ପାଇଁ ରାଜି ହେବାରୁ ଗତ ୨୬ ତାରିଖଦିନ ସେମାନେ ତାଙ୍କୁ ବାଲିପେଟାଠାରେ ଛାଡ଼ିେଇଥିଲେ ।

ପ୍ରଜାକୋର୍ଟରେ ହିକକା ବିଧାୟକ ତଥା ବିଜୁ ଜନତା ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେବାକୁ ପ୍ରତିଶୃତି ଦେଇଛନ୍ତି ବୋଲି ବିଧାୟକଙ୍କୁ ମୁକ୍ତ କରିବା ପୂର୍ବରୁ ମାଓବାଦୀମାନେ ଏକ ଅଡ଼ିଓ ଟେପ୍ ରେ ଗଣମାଧ୍ୟମକୁ ଜଣାଇଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୨୬(ଓଡ଼ିଶା ଡ଼ଟ୍ କମ୍) ଅପହରଣର ୩୩ଦିନ ପରେ ଅପହୃତ ବିଧାୟକ ଝିନ୍ନ ହିକକାଙ୍କୁ ଗୁରୁବାର ମାଓବାଦୀମାନେ ମୁକ୍ତ କରିଛନ୍ତି ।

କୋରାପୁଟ ଜିଲ୍ଲା ନାରାୟଣପାଟଣା ଅନ୍ତର୍ଗତ ବାଲିପେଟା ଠାରେ ମାଓବାଦୀମାନେ ବିଧାୟକଙ୍କକୁ ଛାଡ଼ି ଦେଇଛନ୍ତି । ପତ୍ନୀ କୌଶଲ୍ୟା ଏବଂ ଓକିଲ ନିହାର ପଟ୍ଟନାୟକ ପାଲିପେଟାରେ ଉପସ୍ଥିତ ଥିଲେ ।

ଗତ ୨୩ ଓ ୨୪ ତାରିଖରେ ଅନୁଷ୍ଠିତ ପ୍ରଜାକୋର୍ଟରେ ବିଧାୟକଙ୍କୁ ମୁକ୍ତ କରିବାକୁ ନିଷ୍ପତି ନିଯାଇଥିଲା ଏବଂ ତାଙ୍କୁ ବାଲିପେଟା ଠାରେ ଛାଡ଼ି ଦିଆଯିବ ବୋଲି ବୁଧବାର ମାଓନେତ୍ରୀ ଅରୁଣା ଅଡ଼ିଓ ବାର୍ତାରେ କହିଥିଲେ ।

ଲକ୍ଷ୍ମୀପୁର ନିର୍ବାଚନ ମଣ୍ଡଳୀରୁ ପ୍ରତିନିଧିତ୍ୱ କରୁଥିବା ୩୭ ବର୍ଷ ବୟସ୍କ ବିଧାୟକ ଝିନ୍ନ ହିକକାଙ୍କୁ ଆନ୍ଧ୍ର ଓଡ଼ିଶା ବୋର୍ଡ଼ର ସ୍ପେଶାଲ ଜୋନାଲ କମିଟି ଗତ ମାର୍ଚ୍ଚ ୨୪ରେ କୋରାପୁଟ ଜିଲ୍ଲା ୟାପୁଟ ନିକଟରୁ ଅପହରଣ କରିନେଇଥିଲା ।

ପୂର୍ବରୁ ମାଓବାଦୀମାନେ ବିଧାୟକଙ୍କ ମୁକ୍ତି ବଦଳରେ ୩୦ ଜଣ ବନ୍ଦୀଙ୍କୁ ଖଲାସ କରିବାକୁ ଦାବି କରିଆସୁଥିବା ବେଳେ ବିଭିନ୍ନ ମାମଲାରେ ଜଡ଼ିତ ମାଓନେତା ଘାସିକୁ ଖଲାସ କରାଯାଇ ପାରିବ ନାହିଁ ବୋଲି ସରକାର କହିବା ପରେ ସେମାନେ ୨୯ ଜଣଙ୍କୁ ଖଲାସ କରିବାକୁ ଦାବି କରିଥିଲେ ।

ପରେ ସରକାର ଦାବି ମୁତାବକ ୨୫ ଜଣଙ୍କୁ ଖଲାସ କରିବାକୁ ରାଜି ହୋଇଥିବା ବେଳେ ମାଓବାଦୀମାନେ ଏହାକୁ ପ୍ରତ୍ୟାଖ୍ୟାନ କରିବା ସହ ଚାଷୀମୂଲିଆ ଆଦିବାସୀ ସଂଘର ସମସ୍ତ ବନ୍ଦୀଙ୍କୁ ଖଲାସ କରିବାକୁ ଦାବି କରିଥିଲେ ।

ସେମାନଙ୍କ ଦାବି ଅନୁସାରେ ସରକାର କୌଣସି ପଦକ୍ଷେପ ନେଉନଥିବା ଅଭିଯୋଗ କରି ଅପହୃତ ବିଧାୟକଙ୍କ ମୁକ୍ତି ନେଇ ପ୍ରଜାକୋର୍ଟରେ ନିଷ୍ପତି ନିଆଯିବ ବୋଲି ଗତ ବୁଧବାର ମାଓବାଦୀମାନେ ଜଣାଇଥିଲେ ।

ତେବେ ସମୟସୀମା ନବଢ଼ାଇ ପ୍ରଜାକୋର୍ଟ ମାଧ୍ୟମରେ ନିଷ୍ପତି ନିଆଯିବ ବୋଲି ସେମାନେ କହିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ନୂଆଦିଲ୍ଲୀ, ଅପ୍ରେଲ ୨୫(ଓଡ଼ିଶା ଡ଼ଟ୍ କମ୍) ଅପହୃତ ଲକ୍ଷ୍ମୀପୁର ବିଧାୟକ ଝିନ୍ନ ହିକକାଙ୍କ ନିରାପଦ ମୁକ୍ତି ପାଇଁ ବୁଧବାର ବିଜେଡି ସାଂସଦମାନେ ସଂସଦ ପରିସରରେ ଥିବା ଗାନ୍ଧୀମୂର୍ତି ସମ୍ମୁଖରେ ଏକତ୍ରିତ ହୋଇ ମାଓବାଦୀଙ୍କୁ ନିବେଦନ କରିଛନ୍ତି ।

ହିକ୍କାଙ୍କ ଫଟୋ ଥିବା ପ୍ଲାକାର୍ଡ଼ ଧରି ସେମାନେ ମାଓବାଦୀମାନେ ଏଭଳି କାର୍ଯ୍ୟ ନକରି ସମାଜର ମୁଖ୍ୟ ସ୍ରୋତରେ ସାମିଲ ହୁଅନ୍ତୁ ବୋଲି କହିଛନ୍ତି ।

ବର୍ତମାନ ମାଓବାଦୀମାନେ ବରିଷ୍ଠ ଅଧିକାରୀ ଓ ବିଧାୟକଙ୍କୁ ଅପହରଣ କରୁଛନ୍ତି । ଏହା କେବଳ ଓଡ଼ିଶାର ନୁହେଁ ସମଗ୍ର ଦେଶର ସମସ୍ୟା ହୋଇଥିବାରୁ କେନ୍ଦ୍ର ସରକାର ଏହାକୁ ଗୁରୁତର ସହ ବିଚାର କରିବାକୁ ସେମାନେ କହିଛନ୍ତି ।

ଏଥିରେ ସାଂସଦ ପ୍ୟାରୀମୋହନ ମହାପାତ୍ର, ବୈଜୟନ୍ତ ପଣ୍ଡା, ଅର୍ଜୁନ ଚରଣ ସେଠୀ, ବୈଷ୍ଣବ ଚରଣ ପରିଡ଼ା, ଶଶିଭୂଷଣ ବେହେରା, ପିନାକୀ ମିଶ୍ର, ଭତୃୃହରି ମହତାବ, ପ୍ରସନ୍ନ ପାଟ୍ଟଶାଣୀ, ମୋହନ ଜେନା, କଳିକେଶ ସିଂହେଓ, ଦିଲ୍ଲୀପ ତିର୍କୀ ଓ ମଙ୍ଗଳା କିଷାନ ପ୍ରମୁଖ ଯୋଗ ଦେଇଥିଲେ ।

ସେହିପରି ଭୁବନେଶ୍ୱର ସ୍ଥିତ ଗାନ୍ଧୀ ପାର୍କ ଠାରେ ବିଜେଡ଼ି ବିଧାୟକ, କର୍ମୀମାନେ ବିଭିନ୍ନ ପ୍ଲାକାର୍ଡ଼ ଧରି ଧାରଣା ଦେବା ସହ ବିଧାୟକଙ୍କ ମୁକ୍ତି ପାଇଁ ନିବେଦନ କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୨୫(ଓଡ଼ିଶା ଡ଼ଟ୍ କମ୍) ଅପହୃତ ବିଧାୟକ ଝିନ୍ନ ହିକକାଙ୍କୁ ମାଓବାଦୀମାନେ ଗୁରୁବାର ମୁକ୍ତ କରିବେ ବୋଲି ଜଣେ ମାଓନେତ୍ରୀ ବୁଧବାର କହିଛନ୍ତି ।

ସୋମବାର ଏବଂ ମଙ୍ଗଳବାର ଅନୁଷ୍ଠିତ ପ୍ରଜାକୋର୍ଟରେ ସେ ବିଧାୟକ ତଥା ବିଜୁ ଜନତା ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେବାକୁ ପ୍ରତିଶୃତି ଦେବା ପରେ ତାଙ୍କୁ ମୁକ୍ତ କରିବାକୁ ନିଷ୍ପତି ନିଆଯାଇଥିବା ମାଓନେତ୍ରୀ ଅରୁଣା ଏକ ଟିଭି ଚ୍ୟାନେଲକୁ ଅଡ଼ିଓ ବାର୍ତାରେ କହିଛନ୍ତି ।

ଆଦିବାସୀଙ୍କ ସମସ୍ୟାର ସମାଧାନ କରିବାରେ ସେ ବିଫଳ ହୋଇଥିବା କିହକା ପ୍ରଜାକୋର୍ଟରେ ମାଓବାଦୀ ତଥା ଗ୍ରାମାବସୀଙ୍କୁ କହିଛନ୍ତି ।

ମୁକ୍ତ ହେବା ପରେ ସେ ତୁରନ୍ତ ବିଧାୟକ ଏବଂ ଦଳରୁ ଇସ୍ତଫା ଦେବାକୁ ଘୋଷଣା କରିଥିବାରୁ ତାଙ୍କୁ ମୁକ୍ତ କରିବା ପାଇଁ ପ୍ରଜାକୋର୍ଟରେ ନିଷ୍ପତି ନିଆଯାଇଛି, ମାଓନେତ୍ରୀ କହିଛନ୍ତି ।

ସେମାନେ ସ୍ଥାନୀୟ ଓକିଲ ନିହାର ରଂଜନ ପଟ୍ଟନାୟକ, ବିଧାୟକଙ୍କ ପତ୍ନୀ କୌଶଲ୍ୟା ଏବଂ କେତେକ ଗଣମାଧ୍ୟମ ପ୍ରତିନିଧିଙ୍କ ଉପସ୍ଥିତିରେ ନାରାୟଣପାଟଣା ସ୍ଥିତ ପାଲିପେଟା ଠାରେ ହିକକାଙ୍କୁ ହସ୍ତାନ୍ତର କରିବେ ବୋଲି ସେ କହିଛନ୍ତି ।

ତେବେ ଏନେଇ ସରକାରୀ ଭାବେ କୌଣସି ସୂଚନା ଦିଆଯାଇ ନାହିଁ ।

୩୭ ବର୍ଷ ବୟସ୍କ ଲକ୍ଷ୍ମୀପୁର ବିଧାୟକ ହିକକାଙ୍କୁ ମାଓବାଦୀମାନେ ଗତ ମାର୍ଚ୍ଚ ୨୪ରେ କୋରାପୁଟ ଠାରୁ ଅପହରଣ କରିନେଇଥିଲେ । ତାଙ୍କ ମୁକ୍ତି ପାଇଁ ବୁଧବାର ପ୍ରଜାକୋର୍ଟରେ ନିଷ୍ପତି ନିଆଯିବ ବୋଲି ମାଓବାଦୀମାନେ ପୂର୍ବରୁ ଘୋଷଣା କରିଥିଲେ ।

ବିଧାୟକଙ୍କ ମୁକ୍ତି ପାଇଁ ସେମାନେ ୨୯ ଜଣ ବନ୍ଦୀଙ୍କୁ ଖଲାସ କରିବାକୁ ସରକାରଙ୍କ ନିକଟରେ ଦାବି କରିଥିବା ବେଳେ ଦାବି ମୁତାବକ ୨୫ ଜଣଙ୍କୁ ଖଲାସ କରିବାକୁ ସରକାର ରାଜି ହୋଇଥିଲେ ।

ତେବେ ମାଓବାଦୀମାନେ ଏହାକୁ ପ୍ରତ୍ୟାଖ୍ୟାନ କରିବା ସହ ଚାଷୀମୂଲିଆ ଆଦିବାସୀ ସଂଘର ସମସ୍ତ ବନ୍ଦୀଙ୍କୁ ଖଲାସ କରିବାକୁ ଦାବି କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ପୁରୀ, ଅପ୍ରେଲ ୨୪(ଓଡ଼ିଶା ଡ଼ଟ୍ କମ୍) କୋରାପୁଟ ଜିଲ୍ଲା ଲକ୍ଷ୍ମୀପୁର ବିଧାୟକ ଝିନ୍ନ ହିକକା ଏବଂ ଛତିଶଗଡ଼ ସୁକମା ଜିଲ୍ଲାପାଳଙ୍କୁ ଶୀଘ୍ର ମୁକ୍ତ କରିବାକୁ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ବାଲୁକା କଳା ମାଧ୍ୟମରେ ମାଓବାଦୀଙ୍କୁ ନିବେଦନ କରିଛନ୍ତି ।

ପଟ୍ଟନାୟକ ମଙ୍ଗଳବାର ପୁରୀ ବେଳାଭୂମିରେ ବିଧାୟକ ଏବଂ ଜିଲ୍ଲାପାଳଙ୍କ ବାଲୁକା କୃତି ତିଆରି କରି “ବିଧାୟକ ଓ ଜିଲ୍ଲାପାଳଙ୍କୁ ଦୟାକରି ମୁକ୍ତ କର” ବାର୍ତା ଦେଇଛନ୍ତି ।

ମାନବିକତା ଦୃଷ୍ଟିରେ ମାଓବାଦୀମାନେ ଉଭୟଙ୍କୁ ମୁକ୍ତ କରିବାକୁ ମୁଁ ନିବେଦନ କରିଛି ବୋଲି ସୁଦର୍ଶନ କହିଛନ୍ତି । ଅପହରଣ ପରିବର୍ତେ ଆଲୋଚନା ମାଧ୍ୟମରେ ସେମାନଙ୍କର ସମସ୍ୟା ସମାଧାନ କରନ୍ତୁ,ସେ କହିଛନ୍ତି ।

ଏହି ଅବସରରେ ବହୁ ପର୍ଯ୍ୟଟକ ଏବଂ ଲୋକମାନେ ବାଲୁକା କଳାକୃତି ଦେଖିବା ସହ ଉଭୟଙ୍କ ମୁକ୍ତି କରିବା ପାଇଁ ନିବେଦନ କରିଛନ୍ତି ।

ଚାରି ଫୁଟ ଉଚ୍ଚତା ବିଶିଷ୍ଟ ଏହି କଳାକୃତି କରିବା ପାଇଁ ସୁଦର୍ଶନ ଏବଂ ତାଙ୍କ ଛାତ୍ରଛାତ୍ରୀଙ୍କୁ ପାଂଚ ଘଂଟା ସମୟ ଲାଗିଥିବା ବେଳେ ଏଥିରେ ଚାରି ଟନ୍ ବାଲି ବ୍ୟବହାର ହୋଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୨୧(ଓଡ଼ିଶା ଡ଼ଟ୍ କମ୍) ଅପହୃତ ଲକ୍ଷ୍ମୀପୁର ବିଧାୟକଙ୍କ ମୁକ୍ତି ପାଇଁ ମାଓବାଦୀମାନେ ଶନିବାର ପୁଣି ସେମାନଙ୍କର ଦାବି ଦୋହରାଇଛନ୍ତି ।

ଚାଷୀମୂଲିଆ ଆଦିବାସୀ ସଂଘର ସମସ୍ତ କର୍ମକର୍ତାଙ୍କୁ ମୁକ୍ତ କରିବାକୁ ସେମାନେ ଦାବି କରିଛନ୍ତି । ପୂର୍ବରୁ ସେମାନେ ୨୯ ଜଣ ବନ୍ଦୀଙ୍କୁ ଛାଡ଼ିବୋକୁ ଦାବି କରିଥିଲେ ।

କିନ୍ତୁ ସରକାର ସେମାନଙ୍କ ମଧ୍ୟରୁ ୨୫ ଜଣଙ୍କୁ ମୁକ୍ତ କରିବା ପାଇଁ ରାଜି ହୋଇଥିବା ବେଳେ ମାଓବାଦୀମାନେ ଏହାକୁ ଅଗ୍ରାହ୍ୟ କରି ଆସନ୍ତା ୨୫ରେ ପ୍ରଜାକୋର୍ଟରେ ବିଧାୟଙ୍କ ମୁକ୍ତି ନେଇ ନିଷ୍ପତି ନିଆଯିବ ବୋଲି କହିଥିଲେ ।

ଦାବି ସଂପର୍କରେ ସରକାର ଯେଉଁଭଳି ଭାବରେ ପଦକ୍ଷେପ ଗ୍ରହଣ କରୁଛନ୍ତି ଏହା କୌଣସି ନିର୍ଦ୍ଧିଷ୍ଟ ସମାଧାନରେ ପହଞ୍ଚିବ ନାହିଁ ବୋଲି ମାଓନେତା ଏକ ବାର୍ତାରେ କହିଛନ୍ତି ।

ବିଧାୟକଙ୍କୁ ମୁକ୍ତ କରିବାକୁ ଯଦି ସରକାରଙ୍କ ଇଚ୍ଛା ଅଛି ତେବେ ଚାଷୀମୂଲିଆ ଆଦିବାସୀ ସଂଘର ସମସ୍ତ ସଦସ୍ୟଙ୍କୁ ଖଲାସ କରିବା ଉଚିତ୍ ବୋଲି ସେ କେତେକ ଗଣମାଧ୍ୟକୁ ପଠାଇଥିବା ଏକ ପତ୍ରରେ ଉଲ୍ଲେଖ କକରାଯାଇଛି ।

“ଆମେ ସରକାରଙ୍କ ଯୋଜନାକୁ ବିରୋଧ କରୁଛୁ, ଅପହୃତଙ୍କ ମୁକ୍ତି ପାଇଁ ସରକାର ଯେଉଁ ବିଳମ୍ବ କରୁଛନ୍ତି ତାହାକୁ ମଧ୍ୟ ଆମେ ନିନ୍ଦା କରୁଛୁ” ସେ କହିଛନ୍ତି । ମାଓ ବିରୋଧୀ ଅଭିଯାନକୁ ସଂପୂର୍ଣ୍ଣ ବନ୍ଦ କରିବାକୁ ସେ କହିଛନ୍ତି ।

ମାଓବାଦୀ ସଂଗଠନର ଆନ୍ଧ୍ର ଓଡ଼ିଶା ବୋର୍ଡ଼ର ସ୍ପେଶାଲ ଜୋନାଲ କମିଟି ଗତ ମାର୍ଚ୍ଚ ୨୪ରେ ଲକ୍ଷ୍ମୀପୁର ବିଧାୟକ ଝିନ୍ନ ହିକକାଙ୍କୁ କୋରାପୁଟରୁ ଅପହରଣ କରିନେଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୨୦(ଓଡ଼ିଶା ଡ଼ଟ୍ କମ୍) ଶାସକ ବିଜୁ ଜନତା ଳର ଅପହୃତ ବିଧାୟକଙ୍କ ମୁକ୍ତି ପାଇଁ ଆସନ୍ତା ୨୫ରେ ପ୍ରଜାକୋର୍ଟରେ ନିଷ୍ପତି ହେବ ବୋଲି ଶୁକ୍ରବାର ମାଓବାଦୀମାନେ ଗଣମାଧ୍ୟମକୁ ସୂଚନା ଦେଇଛନ୍ତି

ବର୍ତମାନ ପର୍ଯ୍ୟନ୍ତ ପ୍ରଜାକୋର୍ଟ କରାଯାଇ ନାହିଁ ବୋଲି ମାଓନେତ୍ରୀ ଅରୁଣା କେତେକ ଟିଭି ଚ୍ୟାନେଲକୁ ପଠାଇଥିବା ଅଡ଼ିଓ ଟେପ୍ ରେ କହିଛନ୍ତି ।

ସେମାନଙ୍କର ଦାବି ସଂପର୍କରେ ସରକାର କୌଣସି ନିଷ୍ପତି ନନେଇ ଅଧିକ ସମୟ ନେଉଛନ୍ତି ବୋଲି ସେ ଅଭିଯୋଗ କରିଛନ୍ତି । ପ୍ରଜାକୋର୍ଟ ପାଇଁ ଆମେ ମଧ୍ୟ ସମୟ ନେବୁ । ହିକକା ସୁରକ୍ଷିତ ଥିବା ବେଳେ ତାଙ୍କ ସ୍ୱାସ୍ଥ୍ୟବସ୍ଥା ମଧ୍ୟ ଭଲ ଅଛି, ସେ କହିଛନ୍ତି ।

ସେମାନେ ବିଧାୟକଙ୍କୁ ଇସ୍ତଫା ବୋକୁ କହିପାରନ୍ତି କିମ୍ବା ସରକାରଙ୍କ ନିକଟରେ ଅଧିକ ଦାବି ମଧ୍ୟ ରଖିପାରନ୍ତି ବୋଲି ଜଣେ ବିଶେଷଜ୍ଞ କହିଛନ୍ତି ।

ମାଓବାଦୀ ସଂଗଠନର ଆନ୍ଧ୍ର ଓଡ଼ିଶା ବୋର୍ଡ଼ର ସ୍ପେଶାଲ ଜୋନାଲ କମିଟି ଗତ ମାର୍ଚ୍ଚ ୨୪ରେ ଲକ୍ଷ୍ମୀପୁର ବିଧାୟକ ଝିନ୍ନ ହିକକାଙ୍କୁ କୋରାପୁଟରୁ ଅପହରଣ କରିନେଇଥିଲେ ।

ବିଧାୟକଙ୍କ ମୁକ୍ତି ବଳରେ ୨୯ ଜଣ ବନ୍ଦୀଙ୍କୁ ଖଲାସ କରିବାକୁ ମାଓବାଦୀମାନେ ଦାବି କରିଥିବା ବେଳେ କେବଳ ୧୩ ଜଣଙ୍କୁ ମୁକ୍ତ କରାଯାଇ ପାରିବ ବୋଲି ସରକାର ଗତ କିଛିଦିନ ତଳେ କହିଥିଲେ ।

ତେବେ ସରକାରଙ୍କ ଏଭଳି ନିଷ୍ପତିକୁ ସେମାନେ ବିରୋଧ କରିବା ସହ ବିଧାୟକଙ୍କ ମୁକ୍ତି ପାଇଁ ପ୍ରଜାକୋର୍ଟରେ ନିଷ୍ପତି ନିଆଯିବ ବୋଲି କହିଥିଲେ ।

ବନ୍ଦୀ ମାନଙ୍କ ମଧ୍ୟରୁ ସାତ ଜଣ ଜାମିନ ଆବେଦନ କରିଥିବା ବେଳେ ସେମାନଙ୍କ ମଧ୍ୟରୁ ଚାରି ଜଣ ଜାମିନ ପାଇ ସାରିଛନ୍ତି ଏବଂ ଅନ୍ୟ ଦୁଇ ଜଣ ମଧ୍ୟ ଖୁବ୍ଶୀଘ୍ର ମୁକ୍ତ ହେବେ ବୋଲି ଗୁରୁବାର ସରକାରଙ୍କ ପକ୍ଷରୁ କୁହାଯାଇଥିଲା ।

ଓଡ଼ିଶା ଡ଼ଟ୍ କମ୍