ବ୍ରହ୍ମପୁର

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବ୍ରହ୍ମପୁର, ଅଗଷ୍ଟ ୭(ଓଡ଼ିଶା ଡ଼ଟ୍ କମ୍) ଗଞ୍ଜାମ ଜିଲ୍ଲା ସୋରଡ଼ା ବ୍ଲକ ଅନ୍ତର୍ଗତ ଭଗବାନପୁର ଗ୍ରାମରେ ମଙ୍ଗଳବାର ଜଣେ ବ୍ୟକ୍ତି ମାନସିକ ବିକୃତି ଯୋଗୁଁ ପତ୍ନୀ ଓ ଦୁଇ ବର୍ଷର ଝିଅକୁ ପୋଡ଼ି ହତ୍ୟା କରିଥିବା ପୋଲିସ କହିଛି ।

ଅସୁରବନ୍ଧ ଭଗବାନପୁର ଗ୍ରାମର ଶୁକ ମହାକୁଡ଼ଙ୍କ ପୁଅ ସଞ୍ଜୟ ଓରଫ କନ୍ଧ ଗୌଡ଼ ଓ ସେହି ଗ୍ରାମର ବାଟା ଗୌଡ଼ଙ୍କ ଝିଅ ସୁନୀତାକୁଦୁଇବର୍ଷ ପୂର୍ବେ ପ୍ରେମ ବିବାହ କରିଥିଲେ । ତେବେ ଏହି ବିବାହକୁ ଗ୍ରାମର ଗୌଡ଼ ସମାଜ ବିରୋଧ କରିଆସୁଥିଲା ।

ପରେ କନ୍ଧ ଜରିମାନା ଦେଇ ସମାଜରେ ମିଶିଥିଲେ । ପୁଅ କନ୍ଧର ଅତ୍ୟାଚାର ସହିନପାରି ବାପା ଶୁକ ଓ ମା’ ଧୋବଣି ଅଲଗା ରହୁଥିଲେ । କନ୍ଧଦିନ ମଜୁରିଆ ଭାବେ କାର୍ଯ୍ୟକରି ପରିବାରର ଚଳାଉଥିଲେ ।

ତେବେ ସୋମବାର ଅପରାହ୍ନ କନ୍ଧ ଘରକୁ ଖାଇବାକୁ ଆସିଥିବା ବେଳେ ସ୍ତ୍ରୀକୁ ମାଡ଼ମାରିବା ସହ ଝଗଡ଼ା କରିଥିଲା । ମଙ୍ଗଳବାର ସକାଳେ କନ୍ଧ ଗୌଡ଼ର ଘରେ ନିଆଁ ଜଳୁଥିବା ଦେଖି ଗ୍ରାମବାସୀ ଘରର କବାଟ ଭାଙ୍ଗି ଭିତରେ ପ୍ରବେଶ କରିଥିଲେ । ତେବେ କନ୍ଧର ସ୍ତ୍ରୀ ସୁନୀତା ଓ ଦୁଇବର୍ଷର ଝିଅ ଜୀଅନ୍ତା ଜଳିଯାଇଥିଲେ ।

ଏହି ଘଟଣା ପରେ କନ୍ଧ ଗ୍ରାମରୁ ପଳାଇଯାଇଥିବା ବେଳେ ଗ୍ରାମବାସୀ ତାକୁ ଗ୍ରାମକୁ ଆଣି ଅଟକ ରଖିଥିଲେ । ଖବର ପାଇ ସୋରଡ଼ା ମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଅାଁକୁ ଲିଭାଇଥିଲେ । ତେବେ କନ୍ଧ କିରୋସିନି ଢାଳି ଘରେ ନିଅାଁ ଲଗାଇ ଦେଇଥିବା ବେଳେ ଏଥିରେ ପତ୍ନୀ ଓ ଝିଅ ପୋଡ଼ି ମୃତ୍ୟୁବରଣ କରିଥିବା ପୋଲିସ କହିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବ୍ରହ୍ମପୁର, ଜୁଲାଇ ୧୬(ଓଡ଼ିଶା ଡ଼ଟ୍ କମ୍) କନ୍ଧମାଳ ଜିଲ୍ଲା ବ୍ରାହ୍ମଣୀଗାଁ ଥାନା ଅନ୍ତର୍ଗତ ବିନାଲ ଗ୍ରାମର ଜଣେ ମହିଳା ମାଓବାଦୀ ଗଞ୍ଜାମ ପୋଲିସ ନିକଟରେ ସୋମବାର ଆତ୍ମସମର୍ପଣ କରିଛି ।

୨୦୦୯ରେ ସିପିଆଇ ମାଓବାଦୀ ସଂଗଠନରେ ସାମିଲ ହୋଇଥିବା ସବିତା ମଲ୍ଲିକ ଏସ୍ପିଙ୍କ ନିକଟରେ ଆତ୍ମସର୍ମପଣ କରିଥିବା ଜଣେ ଅଧିକାରୀ କହିଛନ୍ତି ।

ସଂପୃକ୍ତ ମାଓବାଦୀ ମାଓକ୍ୟାମ୍ପରେ ଖାଦ୍ୟ ପ୍ରସ୍ତୁତି କରିବା ସହ ଅନ୍ୟାନ୍ୟ କାମ କରୁଥିବା ପୋଲିସ କହିଛି । ଜଣେ ସିଆର୍ ପିଏଫ୍ ଯବାନଙ୍କ ହତ୍ୟା ଘଟଣାରେ ସେ ସଂପୃକ୍ତ ଥିବା ପୋଲିସ କହିଛି ।

ସମାଜର ମୁଖ୍ୟ ସ୍ରୋତରେ ସାମିଲ ହେବା ପାଇଁ ଆତ୍ମସମର୍ପଣ କରିଥିବା ସେ ପୋଲିସ ନିକଟରେ କହିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବ୍ରହ୍ମପୁର, ମଇ ୨୯(ଓଡ଼ିଶା ଡ଼ଟ୍ କମ୍) ଗଞ୍ଜାମ ଜିଲ୍ଲା ଗୋପାଳପୁର ଅଂଚଳରୁ ଜଣେ ମଣିପୁରୀ ଉଗ୍ରପନ୍ଥୀକୁ ଗିରଫ କରିଥିବା ପୋଲିସ ମଙ୍ଗଳବାର କହିଛି ।

ମଣିପୁର ପିପୁଲ୍ସ ଲିବରେଶନ ଆର୍ମିର ୪୦ ବର୍ଷ ବୟସ୍କ ଏହି ବ୍ୟକ୍ତିଙ୍କୁ ସୋମବାର ସଂଧ୍ୟାରେ ଏନ୍ଆଇଏ ଗିରଫ କରିଥିବା ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି ।

ନିଜ ପତ୍ନୀଙ୍କୁ ଦେଖା କରିବାକୁ ସେ ଆସିଥିଲା ଏବଂ ସଂଗଠନର ବର୍ହି ବିଭାଗ ଦାୟିତ୍ୱ ତୁଳାଉଥିବା ଅଧିକାରୀ ଜଣକ କହିଛନ୍ତି । ତେବେ ମାଓବାଦୀଙ୍କ ସହ ତା’ର କୌଣସି ସଂପର୍କ ଥିବା ବିଷୟରେ ଜଣାପଡ଼ି ନାହିଁ ବୋଲି ସେ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବ୍ରହ୍ମପୁର, ମଇ ୨୬(ଓଡ଼ିଶା ଡ଼ଟ୍ କମ୍) ମୁଖ୍ୟମନ୍ତ୍ରୀଙ୍କ ନିର୍ବାଚନମଣ୍ଡଳୀ ଗଞ୍ଜାମ ଜିଲ୍ଲା ହିଂଜିଳିକାଟୁ ଅଂଚଳର ଜଣେ ବ୍ୟକ୍ତି ଶନିବାର ଜିଲ୍ଲାପାଳଙ୍କ ଅଭିଯୋଗ ପ୍ରକୋଷ୍ଠ ସମ୍ମୁଖରେ ଦେହରେ ନିଆଁ ଲଗାଇ ଆତ୍ମହୁତି ଉଦ୍ୟମ କରିଛନ୍ତି ।

ହିଂଜିଳିକାଟୁ ନିର୍ବାଚନମଣ୍ଡଳୀ ବେଲଗାଁର ୪୫ ବର୍ଷ ବୟସ୍କ ସୁରେଶ ସାହୁ ଦେହରେ ପେଟ୍ରୋଲ ଢାଳି ନିଅାଁ ଲଗାଇ ଆତ୍ମହୁତି ଉଦ୍ୟମ କରିବା ପରେ ପୋଲିସ ତାଙ୍କୁ ଗିରଫ କରିଥିବା ଜଣେ ଅଧିକାରୀ କହିଛନ୍ତି ।

ଗିରଫ ପରେ ତାଙ୍କୁ କୋର୍ଟ ଚାଲାଣ କରାଯାଇଛି । ରାୟଗଡ଼ା ଜିଲ୍ଲା କାଶୀନଗର ତହସିଲ ଅନ୍ତର୍ଗତ ଟିକିରି ଗ୍ରାମରେ ତାଙ୍କର ଜମି ଗଣ୍ଡଗୋଳ ସମାଧାନରେ ବିଳମ୍ବ ହେବାରୁ ସେ ହତାଶ ହୋଇ ଆତ୍ମାହୁତି ପାଇଁ ଉଦ୍ୟମ କରିଥିଲେ ବୋଲି ସେ କହିଛନ୍ତି ।

ତେବେ ସଂପୃକ୍ତ ବ୍ୟକ୍ତିଙ୍କ ମାମଲା ରାୟଗଡ଼ା ଜିଲ୍ଲାର ହୋଇଥିବାରୁ ମାମଲାକୁ ସେଠାକାର ତହସିଲାରଙ୍କ ନିକଟକୁ ପଠାଇ ଦିଆଯିବ ବୋଲି ଜିଲ୍ଲାପାଳ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୧(ଓଡ଼ିଶା ଡ଼ଟ୍ କମ୍) ଗଞ୍ଜାମ ଜିଲ୍ଲା କୋଦଳା ଅନ୍ତର୍ଗତ ଫାସିପଡ଼ାରେ ହୋଇଥିବା ପୋଲିସ ଗୁଳିକାଣ୍ଡ ଘଟଣାରେ କୋଦଳା ଥାନା ଅଧିକାରୀଙ୍କୁ ରବିବାର ନିଲମ୍ବିତ କରାଯାଇଛି ।

ପୋଲିସ ଗୁଳିରେ ଦୁଇ ଜଣଙ୍କ ମୃତ୍ୟୁ ଘଟଣାରେ ଆଇଆଇସି ସୌଭାଗ୍ୟ ସ୍ୱାଇଁଙ୍କୁ ନିଲମ୍ବନ କରାଯାଇଥିବା ଜଣେ ବରିଷ୍ଠ ଅଧିକାରୀ କହିଛନ୍ତି । ବର୍ତମାନ ପରିସ୍ଥିତି ଶାନ୍ତ ରହିଛି ଏବଂ ସଂପୃକ୍ତ ଗ୍ରାମରେ ପାଞ୍ଚ ପ୍ଲାଟୁନ ଫୋର୍ସ ମୁତୟନ କରାଯାଇଛି, ସେ କହିଛନ୍ତି ।

ଗୁଣିଗାରେଡ଼ି ସନ୍ଦେହରେ ଗୁରୁବାର ଗ୍ରାମବାସୀମାନେ ଜଣେ ମହିଳାଙ୍କ ସମେତ ଚାରି ଜଣଙ୍କୁ ଅଟକ ରଖିଥିଲେ ଏବଂ ଖବର ପାଇ ଘଟଣାର ତଦନ୍ତ ପାଇଁ ପୋଲିସ ଶନିବାର ଗାଁକୁ ଯାଇଥିବା ବେଳେ ଗ୍ରାମବାସୀମାନେ ସେମାନଙ୍କୁ ବିରୋଧ କରିଥିଲେ ।

ଫଳରେ ପୋଲିସ ଓ ଗ୍ରାମାବସୀଙ୍କ ମଧ୍ୟରେ ସଂଘର୍ଷ ହୋଇଥିଲା । ଉତ୍ୟକ୍ତ ଲୋକମାନେ ପୋଲିସ
ଉପରକୁ ଆକ୍ରମଣ କରିଥିବା ବେଳେ ପରିସ୍ଥିତି ନିୟନ୍ତ୍ରଣ ପାଇଁ ପୋଲିସ ପ୍ରଥମେ ଲୁହବୁହା ବାଷ୍ପ ଏବଂ ପରେ ଗୁଳି ମାଡ଼ କରିଥିଲା । ଗୁଳିମାଡ଼ରେ ଦୁଇ ଜଣଙ୍କ ମୃତ୍ୟୁ ହୋଇଥିଲା ।

ଏହି ଘଟଣାର ବିଚାର ବିଭାଗୀୟ ତଦନ୍ତ ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିବା ବେଳେ ମୃତକଙ୍କ ପରିବାରକୁ ଦୁଇ ଲକ୍ଷ ଟଙ୍କା ଲେଖାଏଁ ସହାୟତା ରାଶି ଘୋଷଣା କରିଛନ୍ତି ।

ସଂଘର୍ଷରେ କେତେକ ପୋଲିସ କର୍ମଚାରୀଙ୍କ ସମେତ ୧୫ ଜଣ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ସାତ ଜଣଙ୍କ ଅବସ୍ଥା ଗୁରୁତର ରହିଛି । ଆହତ ମାନଙ୍କୁ ବ୍ରହ୍ମପୁର ଡ଼ାକ୍ତରଖାନାରେ ଭର୍ତି କରାଯାଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବ୍ରହ୍ମପୁର, ମାର୍ଚ୍ଚ ୩୧(ଓଡ଼ିଶା ଡ଼ଟ୍ କମ୍) ଗଞ୍ଜାମ ଜିଲ୍ଲା କୋଦଳା ଥାନା ଅନ୍ତର୍ଗତ ଫାସିପଡ଼ାରେ ଶନିବାର ଗ୍ରାମବାସୀ ଓ ପୋଲିସ ମଧ୍ୟରେ ସଂଘର୍ଷ ଘଟି ଦୁଇ ଜଣଙ୍କ ମୃତ୍ୟୁ ହେବା ସହ ଆଠ ଜଣ ଆହତ ହୋଇଛନ୍ତି ।

ଗୁଣିଗାରେଡ଼ି ସନ୍ଦେହରେ ଅନ୍ଧବିଶ୍ୱାସ ଯୋଗୁଁ ଗୁରୁବାର ଗ୍ରାମବାସୀମାନେ ଜଣେ ମହିଳାଙ୍କ ସମେତ ଚାରି ଜଣଙ୍କୁ ଲଣ୍ଡା କରି ଗାଁରେ ବୁଲାଇଥିବା ଅଭିଯୋଗ ହୋଇଥିଲା ।

ଖବର ପାଇ ଏହି ଘଟଣାର ତଦନ୍ତ ପାଇଁ ପୋଲିସ ଆଜି ଗାଁକୁ ଯାଇଥିବା ବେଳେ ଗ୍ରାମବାସୀମାନେ ସେମାନଙ୍କୁ ବିରୋଧ କରିଥିଲେ ।

ଫଳରେ ପୋଲିସ ଓ ଗ୍ରାମାବସୀଙ୍କ ମଧ୍ୟରେ ବଚସା ହୋଇଥିଲା । ଉତ୍ୟକ୍ତ ଲୋକମାନେ ପୋଲିସ
ଉପରକୁ ଆକ୍ରମଣ କରିଥିବା ବେଳେ ପୋଲିସ ପ୍ରଥମେ ଲୁହବୁହା ବାଷ୍ପ ଏବଂ ପରେ ଗୁଳି ମାଡ଼
କରିଥିଲା ।

ପୋଲିସ ଗୁଳି ମାଡ଼ରେ ଦୁଇ ଜଣଙ୍କ ମୃତ୍ୟୁ ହେବା ସହ ଆଠ ଜଣ ଆହତ ହୋଇଛନ୍ତି । ଗ୍ରାମବାସୀଙ୍କ ଆକ୍ରମଣରେ କେତେକ ପୋଲିସ ମଧ୍ୟ ଆହତ ହୋଇଛନ୍ତି ।

ଘଟଣା ସ୍ଥଳରେ ଉତ୍ତେଜନା ଲାଗି ରହିଥିବାରୁ କୌଣସି ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ବ୍ୟାପକ ପୋଲିସ ମୁତୟନ କରାଯାଇଛି । ଆହତ ବ୍ୟକ୍ତି ମାନଙ୍କୁ ବ୍ରହ୍ମପୁର ଡ଼ାକ୍ତରଖାନାରେ ଭର୍ତି କରାଯାଇଛି ।

ଏଭଳି ଘଟଣା ଦୁଃଖଦାୟକ ଏବଂ ବର୍ବରୋଚିତ । ଆଇନ ଅନୁଯାୟୀ ପଦକ୍ଷେପ ଗ୍ରହଣ କରାଯିବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ମାର୍ଚ୍ଚ ୨୬(ଓଡ଼ିଶା ଡ଼ଟ୍ କମ୍) ରାଜ୍ୟରେ କର୍କଟ ରୋଗର ନିରୂପଣ ଓ ଆକ୍ରାନ୍ତଙ୍କୁ ଅତ୍ୟାଧୁନିକ ଚିକିତ୍ସା ସେବା ଯୋଗାଇ ଦେବା ପାଇଁ ବୁର୍ଲା ଏବଂ ବ୍ରହ୍ମପୁର ମେଡ଼ିକାଲ କଲେଜ ହସ୍ପିଟାଲରେ ଉନ୍ନତତମ ଚିକିତ୍ସା କେନ୍ଦ୍ର ଖୋଲିବାକୁ ସରକାର ନିଷ୍ପତି ନେଇଛନ୍ତି ।

ଏନ୍ପିସିଡିସିଏସ୍ କାର୍ଯ୍ୟକ୍ରମ ମାଧ୍ୟମରେ ବୁର୍ଲ୍ଲା ସ୍ଥିତ ଭିଏସ୍ଏସ୍ ଏବଂ ବ୍ରହ୍ମପୁର ସ୍ଥିତ ଏମ୍.କେ.ସି.ଜି ମେଡିକାଲ କଲେଜ ଓ ହସ୍ପିଟାଲରେ ଉନ୍ନତତମ କର୍କଟ ରୋଗ ନିରୂପଣ ଓ ଚିକିତ୍ସା କେନ୍ଦ୍ର ପ୍ରତିଷ୍ଠା କରାଯିବ ବୋଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ସୋମବାର କହିଛନ୍ତି ।

ପ୍ରତ୍ୟେକ କେନ୍ଦ୍ର ପ୍ରତିଷ୍ଠା ନିମନ୍ତେ ପ୍ରାମ୍ଭିକ ଭାବେ ୬ କୋଟି ଟଙ୍କା ବ୍ୟୟ ଅଟକଳ କରାଯାଇଛି । କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ଆର୍ଥିକ ସହଯୋଗରେ ଏହି କେନ୍ଦ୍ର ପ୍ରତିଷ୍ଠା କରାଯିବ ।

ଫଳରେ ପଶ୍ଚିମ ଓ ଦକ୍ଷିଣ ଓଡିଶାର ସମସ୍ତ ଜିଲ୍ଲାର ଲୋକମାନେ ଉନ୍ନତ ମାନର ରୋଗ ନିରୂପଣ ଓ ଚିକିତ୍ସା ସୁବିଧା ପାଇ ପାରିବେ । ଗତ ୨୦୧୧ ଅପ୍ରେଲ ୩୦ରେ ନୂଆପଡା ଜିଲ୍ଲାରେ ପାଇଲଟ ପ୍ରକଳ୍ପ ଭାବେ ଏହି କାର୍ଯ୍ୟକ୍ରମ ଆରମ୍ଭ କରାଯାଇଥିଲା ।

ଏହି କାର୍ଯ୍ୟକ୍ରମ ପ୍ରତି ଲୋକଙ୍କ ଆଗ୍ରହକୁ ଦୃଷ୍ଟିରେ ରଖି ବଲାଙ୍ଗିର, ନବରଙ୍ଗପୁର, କୋରାପୁଟ ଏବଂ ମାଲକାନଗିରି ଜିଲ୍ଲାକୁ ଏହା ସଂପ୍ରସାରିତ କରାଯାଇଛି ।ଦ୍ଵାଦଶ ଯୋଜନା କାଳରେ ରାଜ୍ୟର ସମସ୍ତ ଜିଲ୍ଲାରେ ଏହାକୁ କାର୍ଯ୍ୟକାରୀ କରାଯିବ ବୋଲି ସେ କହିଛନ୍ତି ।

ଓଡ଼ିଶା ଡ଼ଟ୍ କମ୍